دختر شمس الضُحی خیرالنسا یا فاطمه
خاک درگاهی مطاف انبیا یا فاطمه
طاعتون واجب ایدوبدی ذیحیاته ذوالجلال
هر ایکی دنیاده سنسن مقتدا یا فاطمه
اوّلین وارد اولانسان روز محشر جنّته
ساخلاسان الده شفاعتدن لِوا یا فاطمه
یاندورار سن گلمسن اُود اُمّت پیغمبری
گوز تیکر تنها سنه اهل ولا یا فاطمه
اهل محشر شاد اولارسن محشره قویسان قدم
بوشلامازلار دامنون اولماز رها یا فاطمه
اُود یاخونناشماز سنه احبابیوه روز جزا
فاطمه یعنی یانان اُود دان جدا یا فاطمه
احمد مرسل بویوردی بوقیزیم حوریه دی
حورونی قویماز خدا اُوددا یانا یا فاطمه
حوری اهل جنانسان ظاهرا بین بشر
عِطرجَنّت سندن آلدی مُصطفی یافاطمه
گلمَسیدون عالمه کفوون تاپانمازدی علی
گویده عقدوز اولدی سنله مرتضی یا فاطمه
نور نوریلن گرگ ایتسون جهاندا ازدواج
وصلتوزدن اولدی عالم با صفا یا فاطمه
پرده چکدون مرد اَعمانی گورنده منزله
اخذ ایده نسوان گرگ سندن حیا یا فاطمه
میوۀ قلب رسول الله اولوب اوغلانلارون
همسرین نور دو چشم مصطفی یا فاطمه
میوۀ باغ وجودون عُمر کَمدَه پُرثمر
اون بیراولدوز ویردی دنیایه ضیا یا فاطمه
دامنونده پرورش ویردون خدای معرفت
سینه اوسته بسلدون سن مجتبی یا فاطمه
گلستانوندا آچان گل خامِس آل عَبا
عالمینه اولدی مُصباح الهُدا یا فاطمه
درس عصمت عشق وهمّت آلدی سندن زینبون
اولدی آخر قهرمان کربلا یا فاطمه
وارث نسل پیمبر ناشر اصل وجود
سنله مهدی زمان تاپدی بقا یا فاطمه
حیف اولا رحلت ایدندن حضرت ختمی مأب
گولمدی مه صورتون گوردون جفا یا فاطمه
آغلادون بیت الحزنده فرقته سن روز وشب
ساخلادون پیغمبره بزم عزا یا فاطمه
آغلاماقلیق بیردفاع اولدی ولایتدن ولیک
جسموی ایتدی نحیف دردِ قضا یا فاطمه
کوچه ده سیلی ویروب ثانی سنه گوردی حسن
هم ایدوب ایذا درو دیوار آرا یا فاطمه
باب وحیه بیعت اوسته اود ویروب یاندوردولار
اور دا سقط اولدی بالان سینن یارا یا فاطمه
ماجرای دربیدن دوتدون بیراللی سن قنوت
اوّلین مقتول دینسن جان فدا یا فاطمه
قویمادون مولا علینی باخبراولسون ولی
غسلوی ویردی بولوندی ماجرا یا فاطمه
گوردی رخسارون کبود و قول سنوب سینن یارا
آغلادی خیبر شکن دویدی جانا یا فاطمه
نصف شب طبق وصیّت ویردی غسل ایتدی کفن
گتدیلر تابوتیده دفن ایتماقا یا فاطمه
گلمیونجان مهدی موعود بولنمز شیعه لر
هاردا دفن اولدون نیه اولدی خفا یا فاطمه
نچّه قبری قازدی پنهان لیک قبرحاضره
صورت نیلینی قویدی توپراقا یا فاطمه
روحونی سنله قویوب توپراقلار آتدا آغلادی
تاپمادی تسکین قلب درده دوا یا فاطمه
خادموز (عدلی) یازوب بوسوزلری دلده نوا
لطف ایله اول شافعه روز جزا یا فاطمه
- پنج شنبه
- 18
- دی
- 1399
- ساعت
- 20:29
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه