آیلار ایچره نه گوزل آیدی ربیع اول آیی
ائتمه ایراد دئسم گر بو آیین یوخدی تایی
اولدی بو آیدا قومون بانوی اسلام پایی
ائله کی ییرمی اوچی گلدی یتیشدی بو آیین
گوردیلر فاطمه نون قملولار ایراندا تایین
ساوه دن گوردیله بانوی کرامتدی گلور
اسوه حجب و حیا الگوی عفتدی گلور
آدی معصومه اوزی پیک جلالتدی گلور
باش ایوریولدا کی گوللر قره چادر شبینه
هامی ایستوردی جلودار اولا اول مرکبینه
شوق و ذوقیله چیخوب فوری قم اهلی قاباقا
گه کنارینده کچوردیله صولا گاهی ساقا
حکم قرآندی گرک حرمت اولونسون قوناقا
دئدیلر بیز سنه قربان ائدروک جانیمیزی
قدمون جنت ائدوب حسنیده ایرانیمیزی
گوزلر اوسته دئدیلر قوی قدمون قویما یره
شهپرین مقدموه وار یری جبریل سره
کیمدی گرد قدمون لعل بد اخشانه وئره
هم آتوندی بیزه هم دهریده قارداشون امام
بیز غلاموک سنه ای بانوی ارزنده مقام
هرکس اوز عشقینی اول حضرته اعلان ائلدی
خاک راهیندن ئوپوب خدمت شایان ایلدی
اشعری طایفه سی قوچ قوزی قربان ائلدی
موسی خزرج اونا اولدی جلودار اوزی
خدمتینده واریدی گونده گجیله گونوزی
موسی خزرجه اون یدی گجه اولدی قوناق
هی دولوب هی بوشالوردی خانیما خاطر اتاق
یاندیروردی اورگین لیک گنه نار فراق
آرزوسی بوئیدی دردی دوایه یتشه
گوزونون ایشیقی قارداشی رضایه یتشه
نگرانسان دئدیلر سن ندن ای محرم راز
ندو رعلت ائلییورسن بو قدر سوز و گداز
نیه حالون پوزولوب بانوی والای حجاز
دوتولوبدی اورگون غملی گلورسن نظره
گوزلرون لحظه به لحظه بویانور اشک تره
سن وفا محورینون جلوه لی بیر کوکبی سن
طی ائدوبسن بو اوزون یولاری روز و شبی سن
گر رضا اولسا حسین سنده اونون زینبی سن
سنده زینب کیمی باشلاره سعادت تاجی سان
عشقیده عالم آرا زینبه بنزر باجی سان
سنده زینب تک اوزون غرق محن ایلموسن
قارداش آردیجا دوشوب ترک وطن ایلموسن
بو کویر اولکه نی سن باغ عدن ایلموسن
ای حجازه ملکه سن هارا قم شهری هارا
برکت خلق ائلیوبدی قدمون قملولارا
#قم دیارین بیزه منت دیکی ترک ائتمییسن
طوسه گِتسون بودی قورخی هدفه یتمییسن
هارا گِتسون گِدَه سن کوفیه کاش گتمییسن
کوفه اهلی نین اولا یوزلری محشرده قرا
کوفه ده حرمت ائدن اولمادی یورقون قوناقا
قمون اهلین ائلمه کوفه نین اهلیله قیاس
کوفه لیلر کیمی بیزلر دگولوک حق نشناس
تسلیت عرض ائدروک گیسه قوناق قاره لباس
رسمیمیزدی قوناقین باشینه بیز گول سپروک
کوفه لیلر کیمی نه طعنه وئروب کول سپروک
آتماروق بیز قوناقین سمتینه طعنه داشینی
ویرماروق قارداشینون نیزیه قانلی باشینی
حالینه یانوق اورکدن توکروک گوز یاشینی
تیر طعنیله داخی داغلی دیلین داغلاماروق
کوچه لرده قولی باغلی قوناقی ساخلاماروق
- سه شنبه
- 4
- خرداد
- 1400
- ساعت
- 20:53
- نوشته شده توسط
- یوسف اکبری
- شاعر:
-
حاج روح الله رمضانی
ارسال دیدگاه