گئجه صباحه کیمی گلمیوب قراری علینون
آچلدی صبح، گلوب باشه انتظاری علینون
گئجه صباحه کیمی گلمیوب یوخی گوزونه
اُفقده قالموشودی چشم اشکباری علینون
باخوب ستاره لره هی دیوب اوزی اوزونه
یتشدی آخره آخرده روزگاری علینون
دیردی دردینی شه بختنون ستاره سینه
سن اول صباحه کیمی یار غمگساری علینون
سنه بو دم دیورم قلبیمون ملالیندن
داغ اولسا گر اریدر آه شعله باری علینون
گوزوم آخاندا سحر سنده آخ یوبانماگلن
قضادن اولمیاجاق اولمیوب فراری علینون
وئروب گلن سحری وعده مُخبر صادق
دولار قانیلا سحر دیده خماری علینون
دولاندیروب یوزونی سالدی ماهتابه نظر
بویوردی ای گئجه وقتی طلایه داری علینون
دویونجا باخ منه بیرده گورنمه سن منی سن
یتر خزانه سحر وقتی نو بهاری علینون
خیاله سال منی هر نوزدهمین گئجه سی
بقایه باغلاناجاق بو گئجه قطاری علینون
او قدری قالموری عمروم گلی سولا بو سحر
سولار سموم خزانیله لاله زاری علینون
بو ایوه سال ایشیقون سالما قبریمون اوسته
بودور مرامی که گیزلین قالا مزاری علینون
نه چون که فاطمه نین قبرین ائتموشم ایتگین
گوزونده تیره اولوب لیل و النّهاری علینون
یامان گونومده هوادار و غم شریکیمیدی
اونیله گیتدی بو دنیادن اعتباری علینون
سحر زمانی باشیم اوسته کاش اولا زهرا
اونون دیز اوسته اولا راس زخمداری علینون
دوشوبدی یادینه زهرا غمی اولوب غمگین
گیدوبدی باده او دم دلدن اصطباری علینون
ائله سیزیلدادی بیردن شه فلک درگاه
اویاتدی خوابدن اطفالی آه و زاری علینون
گوربدی شیر خدا دستماز آخرینی
دوباره کامه یتوب قلب کومکاری علینون
دلینده حمد و ثنا کردگار یکتایه
الاهیلن دانیشور فکر هوشیاری علینون
بالالاری یغشوب عرض ائدوبله گیتمه گیلن
بویوردی وار بو سحر حقّیله قراری علینون
یولومی گوزلوری زهرا آناز خداحافظ
وصالینه تله سیر قلب داغداری علینون
دوشوب یولا قالوب آغلار اگر چه اولادی
خلل چتندی تاپا عزم استواری علینون
وجود اقدسینی شوق وصل چولقالیوب
دلینده کلمه لاحول اولوب شعاری علینون
قاباقدا روح الامین پشت سرده میکائیل
پیمبران سلف اولدی همجواری علینون
یتشدی حق ایوینه حق ایوینده کی دوغولان
دوباره دوشمیه جاق مسجده گذاری علینون
یتوبدی هیکل تقوا دایاندی محرابه
ائدوبدی جلوه مقابلده کردگاری علینون
قیلوبدی نافله صبحی صبح دم وُردی
یتشدی صبحه بو طرزیله شام تاری علینون
صلاتی قائم ائدن قائم الصلوه اولدی
دلینده کلمه تکبیر اولوبدی جاری علینون
او کلمه عالم امکانه بیر تکان وئردی
دوشوب کناره او دم چرخدن مداری علینون
قوتاردی حمدی یتوب باشه سوره توحید
دلینده نقشیدی چون نقشه نگاری علینون
اگلمین قدی دوشمنلره، رکوعه گلوب تا
اگلدی قامت چرخ اولدی شرمساری علینون
قوتاردی ذکر رکوعین دوزتّدی قامتنی
یاخونلاشوبدی گیده الدن اقتداری علینون
ترابه آننینی اَندریردی سجده فکریلن
اولوبدی جنّ و ملک جمله خاکساری علینون
چخاتدی ملجمین اوغلی نیامدن قلجین
اودور که قالدی غلافنیده ذولفقاری علینون
باشینی قوزادی شه دشمن اندیروب شمشیر
وروبدی باشینه اول تیغ زهرداری علینون
آخوبدی قانی باشیندان قویوب ترابه یوزون
سیلیندی آئینه قلبدن غباری علینون
یریله گوی آرا، سسلندی جبرئیل امین
یتشدی آخرینه عمر ناگواری علینون
ایشدیله بو سسی اهل شهر اُناث و ذکور
گلوبله باشینون اوسته تمام یاری علینون
یتشدی وا ابتا دلده مسجده حسنین
گوروبله قانیله وار یرده جویباری علینون
اشاره ائتدی ادامه وئره نمازه حسن چون
نمازی اقدم ائدوب خالق کباری علینون
صورا بویوردی منی دودمانیمه یتورون تئز
گوزتروری یولونی عترت نزاری علینون
گلیمه قویدولا حمل ائتماقا یارالی علینی
زبس موثریدی حال انکساری علینون
ائوه یتنده بویوردی قویون اوزوم یرییوم گر
قرارین الدن آلوب باشدا زخم کاری علینون
بو نوعیلن ایوه گیتسم بالالاریم قورخار
قویون بو حالیده خلوت اولا کناری علینون
اگرچه گیتدی سلامت یارالی منزله گلدی
نیه خیامه گلنموردی یادگاری علینون
اودا گلوبدی علی تک ولی عباده گلوب
بولوردی لیلی کیمی واردی انتظاری علینون
(حسنی) دهریده دوشمز فشاره دوشمیه جاقدی
اولوبدی قلبدن ازبس امیداری علینون
قیامتین گونوده وعده ایلیوب خالق
بهشتی هر کیمه وئرسه وار اختیاری علینون
- دوشنبه
- 10
- خرداد
- 1400
- ساعت
- 16:42
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه