ای دل بو قدر غم یمه صبر ائت مگر اولماز
دنیای فناده قالا باقی بشر اولماز
هر کیم یارانوب گئتمه لیدور دار فنادن
محشر گونونه فکر ائلین فتنه گر اولماز
عقبایه بو دنیا یارانوب مزرعه مثلی
دقت ائده نون مزرعه سینده ضرر اولماز
اعمالیمیزون ناظری خلاق جهاندی
کیم حقدن اطاعت ائده عمری هدر اولماز
فرمایش ائدوب دقت ائله صوم و صلاته
عقباده نماز اهلی یقین دیده تر اولماز
قرآنی اوخی ایله عمل آیه به آیه
قانون الاهیدی به حق بی ثمر اولماز
ظلم اهلی پریشان اولاجاق روز جزاده
دین اهلی او گونده ابدا در به در اولماز
فکر ایلمه دنیایه گلن معتبر اولدی
عالمده ولا اهلی اولان مفتخر اولدی
عمرونده ائدوب دینینه کیم خدمت آپاردی
قورتارسادا عمری ئوزونه رحمت آپاردی
قرآنه عمل ایلدی کیم عزته چاتدی
خالقدن اطاعت ائلیوب لذت آپاردی
ظالملره یاور یاور اولان عمرون هدر ائتدی
مظلومیلره ظلم ائلیوب ذلت آپاردی
کیم اهل ریا اولدی حسینون قاپوسیندا
ذلت باشینا سایه سالوب خفت آپاردی
دوز نوکر اولان درگه اربابه اوجالدی
تسخیر ائلیوب قلبلری عزت آپاردی
کیم عشق حسینیله وئروب عمرونی باشه
اگنینده قرا کوینگینی خلعت آپاردی
واردور بو خبر آغلادی کیم شاه شهیده
عقباسینی آباد ائلیوب جنت آپاردی
(سالک) بو قدر اولما غمین دار فنادن
اوزمه الیوی دامن شاه شهدادن
- چهارشنبه
- 12
- خرداد
- 1400
- ساعت
- 22:13
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه