ای کوفیان اَلوزدن گلمیشدی جانه حیدر
سجده زمانی گوردوز غرق اولدی قانه حیدر
بَذر نِفاقی سَپدوز ای کوفیان بو شهره
فِسق اهلی بو عَملدن بیلدوز آپاردی بَهره
گَلمز علی مِثالی بی شُبهه بیرده دَهره
مام فلک دوغانماز ، گورمَز زمانه حیدر
باش یاره سی عَلینی سالمازدی اِحتضاره
طعنه وِرانلّار امّا وِردی اِمامه یاره
دیل یاره سی سالوبدور روحین نجه فشاره
خَلوَتده چوخ گَلردی آه و فغانه حیدر
ای کوفیان وروبسوز قاموس دینه یاره
شیرازه دن چیخوبدور قرآن اولوبدی پاره
نفرین اولا بو دَهره ، نفرین بو روزگاره
عزم سفر ائدوبدور بیر آیری یانه حیدر
ای مسجد آگَه اول سن حیدر نمازه گَلمز
مِحرابه شاه مردان راز و نیازه گَلمز
سجده زمانی کیمسَه اول سوز و سازه گَلمز
عطر فراقی یایدی کون و مکانه حیدر
ای کوفه شهری سندن بانک صَلا کَسیلدی
قرآن خموش اولوبدور ذکر و دعا کَسیلدی
مرغ سحر یارالی ، آه و نوا کَسیلدی
ائتمز داخی تَرنُّم بیرده شبانه حیدر
- شنبه
- 12
- تیر
- 1400
- ساعت
- 19:35
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه