جمعیدور یارب ندن بئیله جماعت شامیده
سدّ اولوب دروازهء ساعت بو ساعت شامیده
اجتماع مردم شامه مگر علت ندور
گوئیا برپا اولوب شور قیامت شامیده
بیر طرفده شامیان بر پا ایدوب جشن و سرور
بیر طرفده گورسنور غملی حکایت شامیده
نوک نی ده بیر کسوک باشدور حجازی لحنیلن
ایلیور آیات قرانی تلاوت شامیده
دین اسلامی فراز نیزه ده تبلیغ ایدور
شامیان تبلیغینه ایلور عداوت شامیده
ذکری ذکر حقیدور، بولمم نه عنوانه اونا
داش آتور شام اهلی ایلور حتک حرمت شامیده
راس نی ده گوئیا گوندور چخوب چرخ اوستونه
کیم گورور انوارینی ایلور حسادت شامیده
نورینی سندن آلور بو نور مطلق، لا کلام
ایلیور اهل دلی یکسر هدایت شامیده
نقش اولوبدور عرشیوی گویا بو دم فرش اوستونه
گورماقا یوخدور ولی چشم بصیرت شامیده
شش جهتدن یکسر اطرافین آلوب اولدوزلاری
مه خسوف ایلوب ندن بولمم بو ظلمت شامیده
بیر خانم عورت گهی سسلور ایا ماه منیر
هاردا قالدون زینبه وقت حمایت شامیده
گاه سسلور ای گل زهرا سنه جانیم فدا
نیزه دن آچ گوزلرون ایله عنایت شامیده
گور نه احواله قالوبدور زینب نالانیوی
یوز ویرور هر لحظه ده مینلر مصیبت شامیده
ووردی بیر داش که عجوزه سجده گاهیندن سنون
اولدوره بو غم منی ایلر کفایت شامیده
سجده گاهیندن آخان قان ، باغریمی قان ایلدی
یادیمه عباسی دوشدی چکدیم حسرت شامیده
نطقیدن سالدی سنی ای پاره قلب رسول
نطقه گل ظلم آیه سین ایله قرائت شامیده
عمرده بیر بیله غم یوز ویرممیشدی زینبه
اوندان آرتوق یوز ویروبدور درد و محنت شامیده
بیر طرفده بیر نچه محملده اطفال آغلاشور
آغلادوقجا شامیان ایلور شماتت شامیده
ناقه عریانین اوستونده مریض عشقیوی
بسته زنجیر ایدوب قوم ضلالت شامیده
ظلمیله باشینده یاندی اوغلوون عمامه سی
قویمادی خاموش ایده قید اسارت شامیده
یاندی یاندوقجا، باخوب یاندوم، اونون احوالینه
قلبیمی یاندوردی ظلم بی نهایت شامیده
وار سنون قلبونده چوخ شوق زیارت ای ((عتیق))
بیر زمان بو سس دوشر ایلور زیارت شامیده
- یکشنبه
- 3
- مرداد
- 1400
- ساعت
- 11:38
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه