لشگر شامی جری گوردی حسین بن علی
منبع نور شرف مظهر ذات ازلی
یغدی فکرین باشا بیر خطبهٔ بین المللی
ایتدی ایراد او جری لشگره با نطق رسا
سر به زیر اولدی قوشون یکسره حتی رؤسا
شیطنت لر سیزی قویماز دیدی بیدار اولاسیز
قلبوز آهندی یوزوز قاره گوروم خوار اولاسیز
درد بیچارهٔ ایامه گرفتار اولاسیز
سعی ایدرسوز نه سویندیرمه گه شیطان لاریزی
سیندیریرسوز حق دادارله پیمانلاریزی
هیچ بولورسوز بو بیاباندا نه طغیان ایدیسوز
متن قرآنی یخیرسوز یره عصیان ایدیسوز
جنگ صفین له جنگ جمل عنوان ایدیسوز
اهل ایمانله نار اهلینی بولمورسوز هله
دورموسوز زادهٔ زهرائیله جنگ و جدله
من حسینم سیزه قرآندا کی نور آیه سی یم
گوزلروز کوردی گورمور منی شور آیه سی یم
سیز شعور ایلمسوز یوخسا شعور آیه سی یم
مظهر صورت زیبای حق داوره من
گلمشم هدیه بو گون محضر پیغمبره من
جمع اولوبسوز بو بیاباندا که شورا قوروسوز
گلشن معرفتین گللرینی سولدوروسوز
کاسهٔ چشمیمی اشک تریلن دولدوروسوز
نوجوان اوغلومی اوز قانینه غلطان ایلدوز
اوخلادوز طفل لب عطشانمی خندان ایلدوز
باغلیبسوز منه نهر القمه نین یولارینی
سالمسوز قارداشیم عباسین اوزون قولارینی
سرولر بیر به بیر الدن ویروب اوز خولارینی
الله عاشقلری ظلمیله قزل قانه باتیب
قانلی میداندا دوزولموش هامی یانیانه یاتیب
ای جماعت سیزی سرگرم ایلیوب نفس دنی
گیمسوز اگنیوه بی عاطفه لیک پیرهنی
المدوز باشیزی ظالملره اگدوز علنی
دوشدوز القصه بو سوداده بیوک دردسره
دای چتیندور دونه بو لیل سیاهوز سحره
ای جماعت سیزه اتمام ایدورم حجتمی
ایلورم گون کیمی واضح اوزوم اصلیتمی
انحراف ایلیه هیهات بیری نیتمی
نیتیم پاک دی پاکیزه سعادتدی منه
المگیم یوخدی نصیب عمده شهادتدی بیزه
آرزومندیدین اولدن ایله بو عمله
شکر لله اوزی مقصود دلیم گلمیش اله
گوزلورم مشتریم الساعه خریداره گله
سوزیمی دلدن اوزی یاریم آلا ساز وره
روحیمه عرش معلاسینه پرواز وره
اوینیور ایندی که قان توکمگه شمشیر لروز
ایلیبدور من مظلومی هدف تیرلروز
گونده مین مرتبه افسوس ایدجاق پیرلروز
کینه زی قلبده گون مثلی منه بولدوروسوز
رستگار اولمیاجاقسوز که امام الدوروسوز
گرچه بو کرب و بلا دشتی غم افزادی منه
ایچسه القانمی تبدیل اولاجاقدور چمنه
هر کیم اوز دردین"امینی" ایده اظهار منه
قول وررم اونی محشر گونی اوتدان قوتارام
- شنبه
- 23
- مرداد
- 1400
- ساعت
- 12:15
- نوشته شده توسط
- یوسف اکبری
ارسال دیدگاه