منه غصه آور اولدی
بو چولون فضاسی قارداش
اوزون آگه ایله بولمم
ندی ماجراسی قارداش
نجه تنگ و تار ایدوب گور
گوزومه بو روزگاری
بوریوب چولین فضاسی
بو قدر که غم غباری
من دلفکاری اگلش
اوزون آگه ایله باری
قوی اقللی تز بولونسین
باشمین بلاسی قارداش
من ایاقمی قویاندان
بو دیار پر ملاله
ایله تنگشور دلیم تا
دوشورم بیر اوزگه حاله
بو قدر سالولا سانکه
الوم آیه سین خیاله
الومین که اولماز آخر
بولوسن دواسی قارداش
اورگیم دولور بولوت تک
سیخلور چوخ انتظارم
یوزومه باخان بولرسن
که نقدر من خمارم
متلاشی یم پوزولموش
داغیناخلی تار و مارم
داخی بیر یره یغلماز
توکولن بناسی قارداش
دانیشاندا سن حسینیم
بیله آیرلیق سوزیندن
بولوسن که تاب ایدنمز
باجیلار چیخار اوزوندن
باجیا الوم سزادی
دوشه قارداشین گوزیندن
اولا مستجاب ای کاش
دیلیمین دعاسی قارداش
منه بو مسافرت ده
یازلبدی غم کتابی
اوخورام تاپاندا فرصت
الیمه گلور حسابی
اورگیم دوگور دمادم
بو قدر وار اضطرابی
بو علامت خطردی
چخاجاق صداسی قارداش
دوتا گر بلا بو چولده
سنی ای شه ولایت
او بلا ایدر بلالی
باجیوا یقین سرایت
بو علامته قیامت
اولاجاقدی بی نهایت
هله تازه باشلانبدور
قاریشور هواسی قارداش
سارالیب سنونده رنگین
قاریشبدی سانکه حالون
ایله دمبدم منیم تک
چوخالور غمون ملالون
نجه تاب ایدر عیالون
یانا خیمهٔ جلالون
داغیلا ایوین اساسی
پوزولا نماسی قارداش
سالیب ابتدادن ایله
الینه محال "امینی"
یازیر الده غم کتابین
همه ماه و سال امینی
یانور آغلور ایلور افغان
توکور اشک آل امینی
گلوب التجایه بیزدن
ایدور التماسی قارداش
- شنبه
- 23
- مرداد
- 1400
- ساعت
- 16:33
- نوشته شده توسط
- یوسف اکبری
ارسال دیدگاه