تعجیل ایله گلماق دا امان دور آتام اوغلی
سندن اورگیم چوخ نگران دور آتام اوغلی
عفو ایله بو دعوتده اگر اولدی جَسارت
اولسون قسم اوز جانوه خواهش دی نه دعوت
احسان ایله بو خواهشیمی ایله اِجابت
گل باشوه عباسی دولان دور آتام اوغلی
تا گوز آچوب احساس ایلدیم گوز نَدی قارداش
خورشیدی له مَه یا گئجه گون دوز نَدی قارداش
نطقه گله لی درک ایده لی سوز نَدی قارداش
عبّاسه آدون ورد زبان دور آتام اوغلی
یوخ دور نظر الفاظی ده سن سن هامی منظور
سن دلده بیان گوزده ضیا باشدا اولان شور
گوز چهره وی ترک ایتمدی، گوردون شب عاشور
هرگز دِی مَدی باغ جنان دور آتام اوغلی
عادتله یانان قلبیم ایدوب اسمیوی تکرار
خشکیده زبان ایتدی اورک دردینی اظهار
عشقون که منی ایلدی بو خواهشه وادار
ذرّات وجودیم ده نهان دور آتام اوغلی
عشقوندی فقط قلبیده یوخ اوزگه تعلّق
بو خُلق له نفسیم تاپیب اوّلده تَخلّق
گَل گَلماقی وا اِیت گیله عباسی تَصَدّق
هر بیر قدمون ارزشی جان دور آتام اوغلی
جان فدیهء یار اولماسا خدمت دیماق اولماز
باش بذل نگار اولماسا عزّت دیماق اولماز
سودای مُحبّت دی مُصیبت دیماق اولماز
هر غم منه تهذیب روان دور آتام اوغلی
بیر حرف زبانیم ده منیم یوخدی گلایه
خشکی ده لبیم خنده ویرار موج بلایه
امواج بلا دور یِتورَن اُوجِ وِلایه
بو امر، مسلّم نه گمان دور آتام اوغلی
من لازمی دی فدیهء جانان اولام اولدوم
لب تشنه رَه یاری ده قربان اولام اولدوم
سو اوسته سوسوز قانی مه غلطان اولام اولدوم
سندن ولی دل چوخ نگران دور آتام اوغلی
مین‌لر من اولام بیر نفسون قیمتی اولماز
گل اولماسا هرگز چمنین نزهتی اولماز
سن سیز بو جهان اول سادا خاصیّتی اولماز
بالّهی جهان سنله جهان دور آتام اوغلی
سینم سِپر ایستردی اولا تیرِ بلایه
تا یتمیه گنجینهء اسرار خدایه
افسوس دوشوب توپراقا ایندی بو وقایه
هر چند گنه تیره نشان دور آتام اوغلی
دردیم بودی، سن بی مدد و یاور و تنها
بو دشت کمین گاه و کمان دار سراپا
اِیوای، نشان بیر، یارالی تشنه لب، امّا
دنیا دولوسی تیر و کمان دور آتام اوغلی
آخِر نفس احساس ایلورم عمره علاقه
ایستور منی توش ایتسون اَجل دَرد فَراقه
بیر لحظه بُلورسن دوشه گر سندن اوزاقه
عباسین او دم حالی یامان دور آتام اوغلی
گُل یاره لر ایلوب بُلورم بو چولی گلشن
امّا ندی بو منظر گلگون گورورم من
آیا هامی دنیانی دوتوب سُوری و سُوسَن
یا آینهء چشمی ده قان دور آتام اوغلی
یازدی خطِ خونین، وَرقِ جسمی ده شمشیر
گُلواژهء عشق اولدی گوزل طرزی له تعبیر
دنیا بویی گویادی بو تعبیر و بو تحریر
اهل دله تبیان و بیان دور آتام اوغلی
دیداری ویله دل یتر آخر بلی کامه
توفیق تاپار جان بُلورم اخذ مرامه
عطرون گَتورور باد صبا پیکی مشامه
اَنفاسی او دور مشگ فشان دور آتام اوغلی
مأنوس اولالی عشقه ازل، خامهء تقدیر
دل صفحه سینه عکس رُخون ایلدی تصویر
عشقون منه جان مونسی دور منده نه تقصیر
سن سیز گر ایشیم داد و فغان دور آتام اوغلی
قان سیل کیمی موج ووروب داغ داشا قارداش
بیر وُرطه دی بو غم چولی باشدان باشا قارداش
قان قوی موری قارداش یتیشه قارداشا قارداش
غَرقاب، کران تا به کران دور آتام اوغلی
بو طایفه دنیایه آزوب دینی نی ساتدی
باشدان هوس باطله حقّ فکرینی آتدی
هر چند که ظاهرده اوز آمالی نه چاتدی
هر سود، بو سوداده زیان دور آتام اوغلی
نفسیم اولالی نعمت تکوینی له مأنوس
اولدوم سنه خادم، سنه چاکر، سنه پا بوس
آخِر نفسی ایلمه مشتاق یوی مأیوس
لطفه بُلوسن یاخشی زمان دور آتام اوغلی
دل روشن اولوب آتشِ جانسوز جگردن
چوخ فیضه یتوب نالهء شب، آه سحردن
دوشموب بُلورم ناله، دعا، آه، اَثَردن
دیدارون او تأثیره نشان دور آتام اوغلی
ای بارقهء رحمت بی منّت داور
ای جودِ مجسّم، کرم و فیض مُصوّر
تنها نه منم لطفیوه محتاج، برادر
محتاج سنه کون و مکان دور آتام اوغلی
قان آیت نصرتدی بو قانلی علمون ده
دل هدیهء ناچیزی دی تشریف غمون ده
باش نقده نثار اولماسا خاک قدمون ده
جان دوشی نه بیر بارِ گران دور آتام اوغلی
(عابد) سنه دم وِیردیله (ذهنی) و (سخاوی)
چون ذکر مصیبتده او شاعر دی بو راوی
تکرار ایله اوّل سوز اولوب چوخ سوزه حاوی
تعجیل ایله گلماق دا امان دور آتام اوغلی
- پنج شنبه
- 18
- شهریور
- 1400
- ساعت
- 19:5
- نوشته شده توسط
- یوسف اکبری
- شاعر:
-
محمد عابد
ارسال دیدگاه