آچوب دیل شاه مظلومان لب عطشانون اوستونده
مناجات ایلوری گیزلینده بو عنوانون اوستونده
دیور یارب گلایم یوخ بو قدری داغ و محنتدن
الهی من وارام هردم ازل پیمانون اوستونده
منه بو قتلگه یارب اولوب خلوتگه جانان
تاپوب لذت وجودیم چون باشیم دامانون اوستونده
حسینون خالقی سنسن بو قانین صاحبی سنسن
فدا ایلر حسین باشین حق منانون اوستونده
سنوندی اکبر و اصغر سنوندی هرنییم اولسا
گچوب دار و نداریندن حسین جانانون اوستونده
خدایا من بو وصل اوسته باجیم زینبدن آیریلدیم
یانار حشره کیمین بولم غم هجرانون اوستونده
بلیم سیندی گورنده من فرات اوسته ابوالفضلی
نئچه جلاد وار گوردوم مه تابانون اوستونده
اگر عباس و زینب تک منیم مینلر کسیم اولسا
یقین بیر بیر فدا ورم سر سلطانون اوستونده
منه خوشدور بو قان ایچره سنون عشقونده غرق اولسام
بلی عاشق قورار حجله مسلّم قانون اوستونده
هوا ایستی یاغیر گویدن دمادم تیر زهرآگین
اورجدور کام آلیر جانیم بئله بارانون اوستونده
حسین رد ایلمز هرگز گلن تیر بلایانی
منه سندن علامت وار گلن پیکانون اوستونده
گرکدور وصل بزمینده ئوزون عاشق فنا ائتسون
ورار عشقون داشین عاشق محک طوفانون اوستونده
چکوب سرمه فلک قاندان ائدوب تذهیب قانیله
جبینیمدن آخان قانی دوزوب مژگانون اوستونده
رضادور مرتضا اوغلی قضادن هر بلا گلسه
یازیر دست قضا حکمون تن عریانون اوستونده
نه مشتاقم زر و سیمه نه میلیم وار بو دنیایه
حسین ؛جان نقدینی فدیه وریر قرانون اوستونده
الا ای یار مظلومان بو مظلومی اوزون قورتار
گورورسن کشمکش چوخدور بو تک قربانون اوستونده
اماندی طول وئرمه طائرا دفتر الولاندی
قلم صیحه چکوب آغلور دوروب افغانون اوستونده
تقریر سوم رمضان سال ۱۴۰۱
طائر اورنگی
- سه شنبه
- 16
- فروردین
- 1401
- ساعت
- 15:24
- نوشته شده توسط
- طائر
- شاعر:
-
طائر اورنگی
ارسال دیدگاه