زمانه بئله دوندی
گوز یاشیم سئله دوندی
گوزومی یولا تیکدیم
ساعتیم ایله دوندی
داغلار دومان اولدی گل
حالیم یامان اولدی گل
گئجه گونوز آغلارام
عُمروم تمام اولدی گل
یارالیام یاتمارام
گونی گونه ساتمارام
قوتارمیان دردیوی
هئچ بیر درده قاتمارام
قیزیل گول حَشَم اولدی
توکولدی حَشَم اولدی
بئله گونلره قالدیم
آغلاماق پِئشَم اولدی
ام البنینم گهر حیدرم
کربوبلانون یلینه مادرم
وئردیم حسینه - عباسی یاور
پاینده قالسون - دیـن پیمـبر
فاطمه تک حیدری تک قویمادیم
دورت بالاسیندان ابداً دویمادیم
جامهٔ حجب و شرفی سویمادیم
فخریم اودور حیدره من همسرم
وئردیم حسینه - عباسی یاور
پاینده قالسون - دیـن پیمـبر
بسله میشم عشقیله عباسیمی
گورسده تا غیرت و احساسیمی
سیم و زره ویرمرم الماسیمی
مریم و سارایه بیلون سرورم
وئردیم حسینه - عباسی یاور
پاینده قالسون - دیـن پیمـبر
ماه منوردی اوجا قدی وار
گوزلرینون اوسته قرا مدی وار
ملک شجاعتده اونون ردی وار
واردی یقینیم صدف گوهرم
وئردیم حسینه - عباسی یاور
پاینده قالسون - دیـن پیمـبر
کربوبلا شاهینه سقا اولوب
زینبه گویا ید بیضا اولوب
هامی اباالفضلیمه شیدا اولوب
فاطمه نون اوغلونا یل پرورم
وئردیم حسینه - عباسی یاور
پاینده قالسون - دیـن پیمـبر
حیف اولا قانه بویانیب پیکری
ساق گوزونه دگدی دغا اوچ پری
زاغ و زغن دوره لدی صفدری
هر گجه گوندوز یولونی گوزلرم
وئردیم حسینه - عباسی یاور
پاینده قالسون - دیـن پیمـبر
لعنت اولا قوم جفا پروره
ظلم ائلیوبلر ره پیغمبره
قانیله غم چکدی حزین منظره
دوغرانان عباسه گوره مضطرم
وئردیم حسینه - عباسی یاور
پاینده قالسون - دیـن پیمـبر
قبری کیچیکدی اوجا سرداریمین
عاشقی چوخدی یل پیکاریمین
آدی دوادی گل گلزاریمین
تربتینی عالمه من وئرمرم
وئردیم حسینه - عباسی یاور
پاینده قالسون - دیـن پیمـبر
صاحب شان وجلالتدی اباالفضل آناسی
بحر پر موج کرامتدی اباالفضل آناسی
معدن فضل و فضیلتدی اباالفضل آناسی
بانوی بیت ولایت ئوزی محجوب و متین
فاطمه آدی،مبارک لقبی ام بنین
همسرشیرخدا،بانوی ارزنده مقال
همنشین نجبا،صاحبهٔ جــاه و جلال
اولدی زهرا ائوینین جاریه سی تاپدی کمال
قدمی وئردی صفا،غمله سولان انجمنه
اشتیاقیله ائدوب خدمت حسین وحسنه
عربستانیده مشهوریدی اصل و نسبی
پاکزادیدی طریقتده اونون اُمّ و اَبی
نقل محفللردی طینت و زهد و ادبی
بی نظیریدی او دورانیده عفتده خانیم
خلقه ضرب المثل اولموشدی دیانتده خانیم
دین و قرآنه اوره کدن بوخانیم شایقیدی
پیرو مکتب اطهاریدی چوخ لایقیدی
جان ودلدن ئوزی زهراخانیما عاشقیدی
آرزوسیدی اولا بیت ولا خادمه سی
اونادادرس شرافت وئره زینب ننه سی
اون ایله دونموشودی فاطمه نون هجرانی
آناسیزلیق غمی سولدورموشودی طفلانی
غصه لرتنگه گتورموشدی دل مولانی
چون وصیت ائلمیشدی ئوزی زهرای بتول
عزم تجدیدفِراش ایلدی دامــادِ رسول
علم اَنسابیده چوخ ماهریدی شخص عقیل
حیدرون قارداشی بیرفردوفادار و اصیل
اونا تاپشوردی خود حجت خلاق جلیل
ایستورم غصه لی صرافووه گوهر تاپاسان
گزه سن طایفه لردن منه همسر تاپاسان
ولی وارشرطی اوقیز وصلتیمه شایق اولا
ننه لیگ اولمیا،،دورت نوگلیمه عاشق اولا
یاخشی تحقیق ائله،زهرا ائوینه لایق اولا
شهرهٔ یثرب اولا قوم و نژادو نَسَبی
اوخشیافاطمیه حجب وحیا و ادبی
گلمگیلن بو ائوه غملره پایان گتوره
غصه لی قلبیمی آرام ائده درمان گتوره
قدمیلن بوعزالی ائوه سامان گتــوره
قویمیا فاطمه نون گللری محنتده سولا
گوگلوم ایستور اوخانیمداندا منیم اوغلوم اولا
بیراوغول که داریخان وقتده هواداریم اولا
حسنینه قوشولا یار و مددکاریم اولا
اوجابوی،اَنّی کورَک،غم گونی غمخواریم اولا
عشقی قارداشلارینا بی حدوهم دائم اولا
یوزی زیبا،لقبی ماه بنی هاشم اولا
دیدی مولا،تانورام بیرقیزی که عالمه دی
شان و شوکتده ملکلر بوقیزا خادمه دی
عفتدی شهره دی یثربده،آدی فاطمه دی
دخت محجوب حَزام،جدی اونون شخص کلاب
یوخدی عفتده نظیری،ئوزی صدیقه مآب
خواستگاری اولونوب ماحصلی گلدی گلین
گلدی زهراائوینه فاطمح،محجوب ومتین
پوزولان انجمــــنه وئردی صفا ام بنین
گوردی بوصحنه نی نسوان مدینه سالیب های
ننه لیک گلدی علینون ائوینه،زینبه وای
مطلبی بیلدی اوخاتون وفادار و نجیب
دیدی یوخ ذره وجودیمده منیم حیله و ریب
ایندی که اوج سعادت منیچون اولدی نصیب
ظاهراً همسرسلطان حجیزم تانیــون
گرقبول ایلسه زهـــرایه کنیزم تانیـــون
آنداولا فاطمه نون ذکر نماز شبینه
عالمی درده سالان غصه لی تاب وتبینه
گرقبول ائتسه کنیــزم خانیمون زینبینه
خادم منزل سردار حنینم تانیـــون
فاخرم،چونکه کنیزحسنیــنم تانیون
دوشنوب درگه زهرایه او بانوی گرام
دورد اوغول وئردی اونا حضرت خلاق انام
دیدی خوشدور اولا هر دوردیده زهرایه غلام
اعتنــا ایلمــرم خلق الین همهمیــه
بالالاریم هامی نوکردی بنی فاطمیه
گون به گون حرمتی آرتوردی او والانسبین
هامی تعریف الیوردی حسنات و ادبین
عاشق اولموشدی حسینه خبر آلما سببین
عالم عشقیده بیرهمت شایان ائلدی
فاطمه اوغلوناهردوردونی قربان ائلدی
تربیت ایلدی دورداوغلونی وانفساده
که فقط عشق حسیندی قالاجاق دنیاده
گوزلیون قویمیاسوزتک،اونی هـــر بلواده
ساتمیون عشقینی گر وئرسه له،دنیا بویی زر
فاطمه یوسفینون بیر توکی دنیایه دَیَر
عالم عشقیده بالمره قیامت سالدی
دست زهرادن ئوزی رتبهٔ شایایان آلدی
جان وئرن وقتیده افسوس اولاکه تک قالدی
دیدی لبیک حسین،صون نفسیمدور ئولورم
گل که گورسم یوزویی بیرده بسیمدور،ئولورم
نچه ایلدور بئله خدمت شالینی باغلامیشام
اگنیده رخت عروسی،آنووا آغلامیشام
غملرون یاده سالیب غمله جگرداغلامیشام
جان وئرن لحظه نه خوشدور منی ده یادائده سن
نه اولار،اوغلی ئولن بیر ننه نی شادائده سن
دئمورم ماتمیمه دسته گل یاسیله گل
یا که قلبونده اوغول آهیله احساسیله گل
اولساامکانی ملاقاتیمه عباسیله گل
ایکی دلداده گلون بیردا جگر داغلاماقا
گتورعباسیمی آغلار گوزیمی باغلاماقا
ایله زهــرایه سفارش،او انیس محنــه
ایلسون عمده عنایت بوجلای وطنه
باخسابیردفعه محبتله اگــر بسدی منه
منی مشمول ائلسون باغ جناندا کـــرمه
باغ جنتده ده اولادینه ائتسون خدمه
ای طوطی قریحه گنه یاریدن دانیش
سوزباشلابیرده عاشق بیداریدن دانیش
یول سال بقیعه گوشه دیواره باخ گنه
ام البنین آدیندا وفاداریدن دانیش
قلبی سینقدی یاره سینه ایسته سون دوا
کرب و بلاده قولسوزعلمداریدن دانیش
گلدی او گونکه بیت ولایه خانم گلین
بیرایش گوروبدی مهرسزاواریدن دانیش
یانمیش قاپیلا اولدی اواثنا که روبرو
رسم وفاده ائتدیگی کرداریدن دانیش
قویدی ادبله ساق یوزونی آستانیه
یا فاطمه دئدی درودیواریدن دانیش
قربان اولوم خانم بوگوزل قتلگاهووه
دردون بوسینه مه منه مسماریدن دانیش
بو آستانه نون توزونی سرمه ایلرم
ای کان جود او رحمت بسیاریدن دانیش
وئرسون اجازه من بوائووه گلمیشم کنیز
وئر درس عشقی دفتر ایثاریدن دانیش
سن سن رسول فاطمه سی منده فاطمه
اما بو ائوده خوشدور آدیم اولسا خادمه
زهرا ائوینده تاپدی خانم بو جلالتی
اعرابون ایچره وردزبان اولدی شهرتی
عباس آدینداحق اونابذل ائتدی بیراوغول
اوغلانلارایچره واردور اونون بو علامتی
قدی کشیده،انی کورک،قولاری اوزون
خجلتده قویدی سرولری قدو قامتی
گوزلر آلادی،آلنی آچیق،قاشلاری کمان
تمثیل اولوبدی بدر درخشانه صورتی
هر باخدوقیجا قدینه ام البنین اونون
گوزله دیردی بدنظرون وار اذیتی
چوخ گورمه سین بالاسنی الله حسینیمه
حد کماله جک ائده سن تاکه خدمتی
کرب وبلاقطاری چیخان وقتی بوخانم
عباسینه دیوب بله بیر سوز اشارتی
گرایسته سون حلال ائلیم وئردیگیم صودی
هم دوقوز آی اوحمل زمانیمده زحمتی
مدنظرده ساخلاهمیشه بو بیرسوزی
دنیاسنونکی اولساحسین سیزنه لذتی
سینونده ال دایان اوشهون خدمتینده سن
پروانه نون گرک اولا شمعیله الفتی
بیرده ئوپممسم سفراوسته سنی اگر
اولما گیلیلی علتی وار ای وفا سیر
یوخدورحسینیمون ننه سی دلفکاریدور
دائم جوان ئولن ننیه داغداریدور
قالسون هله بوقول بویون اولماق قیتمگه
سن گئت بالا یولوندا ننون انتظاریدور
سالدی غرض گجه یله یولا غم قطارینی
آیلار کئچوبدی ماوقعی آشکاریدور
بیرگون ائشیتدی شهره گلن خسته کاروان
عترت نشانی کرب وبلانون قطاریدور
عباسون اوغلونی اویادوب خواب نازیدن
سسلندی دورگئدک بالاخوش روزگاریدور
باتما ملاله،گوزلرون آیدین بابون گلور
تازه لباسی گی غم هجران کناریدور
دروازیه طرف یولا دوشدی آنا بالا
یولدا بشیری گوردیله چوخ دلفکاریدور
الده قرا علم اسوری سینه ده ئورک
گلمور دیلی سوزه گوزیده اشکباریدور
ام البنین تز خبر آلدی بشیریدن
اول حسینیدن دئ گوگل بی قراریدور
باشین اشاقه سالدی بشیرعرض ائدوب اونا
واضح جوابی بو سوزوون آه و زاریدور
ام البنین باخدی اباالفضلون اوغلونا
گل بیز گئدک دئدی بالا غملر بهاریدور
سد ایلدی قباقینی گلدی دیله بشیر
عرض ائتدی ای خانم عملون مغزداریدور
کرب وبلایه دوردگوزل اوغلون ائدوب سفر
هیچ بیرسوروشمادون اولارآیا هاچان گلر
وئردی جواب عشقیده نقصانی نیلورم
پوزقون چمنده سرو خرامانی نیلورم
ئولدی حسین فاطمه غربتده وای منه
سوندی چراغیمیز سروسامانی نیلورم
انوار شمسیدن ایشیق اخذایلیرقمر
مهریم کسوف ائدوب مه تابانی نیلورم
سلطان سیز وزیره منیم یوخدی حاجتیم
درد ئولدوررمنی داخی درمانی نیلورم
آل پیمبرون قاپوسین باغلادی فلک
باشسیز قالان عمارتی،ایوانی نیلورم
ام البنین آدیلا منی دای چاغیرمیون
اوغلانلاریم ئولوبدی بو عنوانی نیلورم
دایر ائدم ائویمده گرکدور بساط غم
عبداللهین وئرم الینه قانلی بیر علم
عباسيم اي گوزل ادي ورد زبان اوغول
درمانده لر الیندن همیشه دوتان اوغول
بو صُون نفسده غرق یم محنت اولموشام
امدادیمه یتیش منیم ای مهربان اوغول
مشکلده کیم قالار، سنی سسلر هراینه
باب الحوائج آدیوه قربان آنان اوغول
آلسان اگر بو دم سسیمی سس یتور منه
ایمدی یامان گونومدی منیم هارداسان اوغول
گوز تیکمیشم گلن یولوا گوزلورم سنی
ای صبریمی فراقی الیمدن آلان اوغول
درد و غمون بیر عمریدی من جانه آلموشام
سینم اولوبدی غم قوشونا آشیان اوغول
بیر بیر سورشمشام باشیوون سرگذشتینی
شرحین ائدوب باجون منه عیناً بیان اوغول
نهری آلوب سو ایچممیسن نفسیوه فدا
دولدورموسان سو مشکیوی تنها سودان اوغول
بیر مشک سو دیولّه که قان آغلادوب سنی
نیسگیللرون گلور منه ایله گران اوغول
اولسون سودوم حلال سنه ای دلاوریم
سندن رضادی پادشه انس و جان اوغول
زهرا یانوندا باشیمی عرشه اوجاتموسان
کرب و بلاده ویردون عجب امتحان اوغول
درس وفانی عالمه تفسیر ائتمیسن
تدریس اولار قیامته دین هر زمان اوغول
فخر ایلیوب آنان سنه دنیاده دائما
بو افتخاری ایلییَرم همچنان اوغول
امّا یانوب غمونده گرک سینه داغلیام
دلده غمون اولوبدی نه چون بیکران اوغول
اللی لرین الینده او السیز بدن قالوب
جرات تاپوپ جسارت ایدوب شامیان اوغول
ای وای منه که پارچالانوبدور او دم باشون
بی رحمیمیش باشوندان عمودی ووران اوعول
الله بولورنه حاله ساليب باشوي سنون
دائم بو غمدی قلب ایوینی یاندوران اوغول
یاده سالوب اوحالیوی یانام غمونده من
یانماز منیم کیمین سنه هیچ بیر یانان اوغول
قالسین هله سینان باشووون درد و محنتی
چاتماز باشا بو درد و غم جانستان اوغول
قارداشوینده یانّام اورکدن او حالینه
سسلندی یاتما قوملارون اوسته اویان اوغول
ایسّی قوم اوسته یاتماقیوا یاندی قلبیدن
اولدی غمونده من تک اودا باغریقان اوغول
چوخ سعی ایدوبدی خیمیه نعشون گتورماقا
یردن یغانمیوبدی امام زمان اوغول
اکبر کیمی بیر اوغلی اولن روزگاریده
قالسا مگر قالار اورکینده توان اوغول؟
اکبر اُلنده اُلدی حسینیم دئیر باجون
سن جان ویرنده قدّی اولوبدور کمان اوغول
آتدان دوشنده سسلمیسن گل هرایمه
زهرا آنان یتوبدی هرایه اوآن اوغول
جسمون دوشنده قوملارون اوسته بویور گوروم
آچدی نجه سنان قولی زهرا آنان اوغول؟
قبرینده ده او کان حیا دینجَلَنمدی
دینجلمیوبدی اهل وفا هیچ زمان اوغول
قانلی گوزون ساتاشدی او نیلی عذارینه؟
سندنده یا یوزون ایلمیشدی نهان اوغول؟
آچموشدی باش غمونده او درگاهی اودلانان؟
یا قویمادی سولان یوزی اولسون عیان اوغول؟
بیر یوز که ویرممیشدی آتان حیدره نشان
مشکلدی گورسدیدی سنه اول زمان اوغول
حسرت نه حاله سالدی سنی غملی ساعتون
غیرتلیه چتیندی غم دلستان اوغول؟
آغلار گوزیله نظمه چکوب (ساده) غم سوزون
آچ مشکلون فدا سنه مشکل آچان اوغول
گوزومده اشکیمی قان ایلیوب جگر قانی
سالور خیالیمه ام البنین مولانی
اِیدردی بزم عزانی مدینه ده بر پا
یِتَردی عرش خدایه اورکدن افغانی
آلاردی عطر حسینی جناب زینبدن
باساردی باغرینا جان تک عزیز زهرانی
دیردی نیسکیلیوه زینبا ئوزوم قربان
اورکده غملریوین یوخدی حد و پایانی
فدا اولوم سنه بیر نطقه گل منیله دانش
سن ای سرادق عصمتده عصمتین جانی
دیار ماریه نین شرحینی بیان ایله
اگر چه شرح ایلیوبسن همان بلایانی
گَلردی عالمه بی معلمه نطقه
ویرردی شرح او مجلسده ظلم اعدانی
شکسته نی تک اِیله اِیلیردی آه و نوا
اِیدردی گوز یاشی شرمنده بحر عمانی
دیردی آغلامیوم نینیوم بو ماتمده
گتیردی تنگه مصیبت من پریشانی
بلا چولونده فلک بولدوقون اِیدوبدی منه
تاپوبدی سینه پر غصه حال ویرانی
او دم که صبح آچیلوب اولدی روز عاشورا
امام شرح اِیلدی آیه فدینانی
ازلده بیر نچّه انصار قانینه باتدی
مزَیَن اِیلدیلر قانیله او میدانی
یِتیشدی اکبره تا نوبت آل هاشمدن
منور اِیلدی اکبر او قانلی صحرانی
گورن دیردی که رجعت اِیدوبدی پیغنبر
شهید اِیتدیله ظلمیله شِبه طاهانی
گلنده خیمیه نَعشی قیامت اولدی عیان
فراقی عرشه اوجاتدی نوای لیلانی
آچیلدی راه شهادت جوانلارا یکسر
تمامی سالدلا گوزدن بو دور دورانی
گیدوب شهادته یِتدی بقییه شهدا
قالوب اوچولده فقط مهر و ماه تابانی
حضور شاهه گلوب تلیده ابوالفضلون
ددی فدا سنه شاها بو نوکرین جانی
بو چولده غم یئمه که اکبرون باتوب قانه
قَبول اِیله گیلن دلده بو تمنانی
محبت ایله منه اذن ویر جداله گیدوم
داریخدیروبدی منی انتظار طولانی
امام ایلدی فرمایش ای ابوالفظلیم
اماندی درک ایله حال رباب نالانی
گوتور سو مشکینی بیر مشک سو طلب اِیله
سقایت ایله بو صحراده آل طاهانی
بو گون خیامیده اوچ گوندی که سوسوزدی حرم
علی اصغرین اودلاندی قلب سوزانی
گوتوردی مشکینی یول سالدی وادی عشقه
سو اِیسته دی ددیلر یوخ بو فعلین امکانی
فراتی آلدی ولی اِیچمدی سویوندان ئوزی
خدایله اِیلیوب بیر عجیبه سودانی
جهاد اکبر اِیدیبدور اوگون ابوالفضلون
فقط سو مشکینی دولدوردی اول وفا کانی
خیامه سالدی یولون آیری شور و شوقیله
یول اوسته اوخلادی مشکین گروه سفیانی
بیر اوخدا دَگمیشیدی آلنونا ابوالفضلین
خدا بولور نجّه چَکدی آت اوسته پیکانی
فدا اولوم بالاوین دلده حسن نیتینه
خیامه یِتمدی هر چند که او احسانی
اولونجه آغلاسام آزدور اورکده نیسکیلینه
گتیردی درده او غم نهرین اوسته سقانی
خجالتیندن اودور گلمدی خیامه طرف
فغانه گتدی فراقی شه شهیدانی
حسینیمین بِلیِ سیندی همین مصیبتدن
چوخ آز قالوردی چیخا جسمیدن سوسوز جانی
همان او حالیده سسلوردی آچ گوزون عباس
دانش گوروم نجّه چکدون سه شعبه پیکانی
نه قَدری سَسلدی سس گَلمدی او مظلومه
ایشخلی گوندوزی اولدی گوزونده ظلمانی
بویوردی ام بنینین اِیوی اولا آباد
ویروبدی دینه بو صحراده نچّه قربانی
یئتَنده بو یره سوز گوردی زینب کبرای
اوجالدی ام بنینین سمایه افغانی
مخاطب اِیلدی عباسی مادر عباس
فدا اولا بیله ایثاره عالم فانی
باشیمی عرشه اوجاتدی بو عزت نفسون
خجالت اِیلمیسن سن او چولده دریانی
سودوم حلالون اولا اِی مه بنی هاشم
او نفسیده گورونوبدور کمال انسانی
آنان او عزت نفسه اولونجه فخر اِیلر
او نفس واله و حیران ایدوبدی دنیانی
ولی بو نیسکیلیوه آغلیام گرک قان یاش
خجالتوندن آخوبدور یوزه اورک قانی
خدا بولور نه قَدر وار یانان دلونده غمون
نه ابتداسی عیاندور نه واردی پایانی
سالاندا قولاریوی نخل زاریده اعدا
هرایوه چاغیروبسان او چولده جانانی
بیر عالمین غمی بیر آنیده ویروب سنه یوز
او آز زماندا چکوبسن فشار دنیانی
او اوجا قامتیله خیردا بیر مزار ایچره
نه نوعی یاتموسان ای سرو ناز سلطانی
چاتیدی اللریم ای کاش او خیردا مرقدیوه
چَکَرم حسرت اولونجه بو فعله هرآنی
علاوه که چَکَیرم عکسیوی خیالیمده
مجسم ایلیورم گوزده ماه سیمانی
جمالیوی گورَرَم اوغلون جمالینده
انان او ماه جمالین اولیدی قربانی
گوزومون اوسته اوغول ساخلارام امانتیوی
منه بو نعمتی حَق ایلیوبدی ارزانی
آلارام عطریوی آغلار قالان امانتدن
مشام جانه ایدر دائم عنبر افشانی
او قانلی گوزلریویله (عتیقه ده) بیر باخ
چکوبدی نظم و نظامه بو غملی طغرانی
☑️ بند اول
دلیر و قهرمان اوغول
نوالی‌ام هرایه گل
یئتیب‌دی جان دوداقیمه
آنان اولور عزایه گل
چیخیر جانیم فرقتین آرامیم آلیب‌دی
آناوی هجرین غم و اندوهه سالیب دی
آنالار جان اوسته آختارار اوز بالاسین
ابوالفضلیم گَل گوزوم یول‌لاردا قالیب‌دی
? ابـــوالــفــضــل ابـــوالــفــضــل
☑️ بند دوم
بو سون نفسده قلبیمی
خدنگ درد و غم بولور
سنه بیر عمر آغلیان
عزا دوتان آنان اولور
نه عون و جعفر نه فضلیم وار داده گلسین
باشیمی آلسین دیز اوسته امداده گلسین
سنین‌ده تن‌ده قولون یوخدی آی ابوالفضل
گرح عالم‌لر بو غم نن فریاده گلسین
? ابـــوالــفــضــل ابـــوالــفــضــل
☑️ بند سوم
ائشیدمیشم جوان اوغول
شراره ظلمه یانمیسان
بلا چولونده زینبیم
دییر قانا بویانمیسان
آنان اولسون پیکرین ده یاره چوخیدی
توشنده توپراقه جسمین‌ده ال یوخیدی
دییل‌لر قالمیشدی باشین جلاد الینده
جنازه‌ن باشدان باشا عباسیم اوخیدی
? ابـــوالــفــضــل(ع) ابـــوالــفــضــل(ع)
