یول چوخدی کوی حضرت خلّاق عالمه
بیر بیر نشان ویروبدیله اولاد آدامه
هر بیر یولا مسیر و منازل یازوبدیلار
چوخ تندرو فلاسفه یولدان آزوبدیلار
شمرون دیولّه سنّی یتیشمشدی دوخسانا
دوخسان یاشندا غرق ایلدی اللّرین قانا
چوخ جنگیده جهاد ایلدی چخدی راهیدن
گور هانسی درّیه یخیلوب پرتگاهیدن
بیریول نشان ویروبدیله هموار و صاف و صاف
نام مقدسی او یولون عین و شین و قاف
دوگدی قاپونی بیر نفر عاشق دیلینده غم
سس گلدی کیمسن عرض ایلدی آچ منم منم
معشوقه سسلدی دیدی گیت خامیسن هله
یوخدور منم منم دینه منده خوصله
خامون علاجی اوتدی قیت یان فراقیمه
پخته اولان زماندا گلرسن سراقیمه
شیطان دیدی من اوتدانام آدم که خاکیدور
من کلمه سنده وردیلار چوخدان هلاکیدور
ضّد نقیضیدور گونودور نوریلن غرور
سندرماسون غروروی دوشمز وجوده نور
باد غروریلن ایله که دولدی گوسفند
باشدان باشا وجودینی دوغرالّا بند و بند
قارون غروره غرقیدی غرق ایتدیلر یره
عیسی غروری وردی یره گیتدی گوگلره
موسی دیدی گوروک منه امر ایتدی لم یزل
سن سن هله قِییت اوزوی دوت دوباره گل
تا ایستدی دوباره دیسون اولدی سرنگون
بیر سیلی ووردی نوریله غش ایتدی یدّی گون
گیتمه غروریلن یره باخ ال ایاقیدور
گوزدور قولاقدی زلف دی دیلدور دوداقیدور
باخ گور همان او دیل او دوداقلار نلر دِیور
ایتگین گیدن او قافله میزدن خبر دیور
داشلار اَزوب او باشلاری اگمزدی چرخه باش
قویما قدم تکبّریله گوزدی باشدی قاش
گوزدور گورور ستاره لری گورمیور ئوزون
علّت اودور وجودیده سلطانیدور گوزون
سلطانیچون محافظ اولار روزگاریده
الّلر گوزون محافظیدور گیر و داریده
خودبین دَگُل اودور که بو گوزلر عزیزدور
چوخدور تواضعی اوزوده اشکریز دور
اورگش تواضعی او آغاشدان که بَر ویرور
سن داشلاسون اونی او سنه میوه لر ویرور
نرگس گولی باش اگدی او دور اولدی سرفراز
گولّلر ایچنده نرگسه بیر یوخدی همطراز
امّا باشین بلند ایلدی گردنین دراز
علّت اودرو که چوخ آجیدور زَهر تک پیاز
توپراق منم منم دیمَدی خاک راهیدور
عصرون اما مِینه اودی که سجده گاهیدور
دنیانی خلق ایدن دیمدی من یاراتمشام
گیت آی منم دِیَن سنی من چوخدان آتمشام
عاشق تکان یدی بو سوال و جوابیدن
گیتمشدی خواب غفلته دیسگیندی خوابیدن
گیتدی دولاندی بیر نچه ایل تاپدی معرفت
گلدی گنه دوگوب قاپونی دیلده معذرت
سس گلدی کیم سن آی دل شبده قاپی دوگن
سن سن دیدی عزیزیم أوزون سن نه اینکه من
گَل گَل دیدی دایانما گل ای نازنین صنم
سندن چخوبسان ایندی وجودون منم منم
سن سن دین بودائره دن قاشمیوبدیلار
من من دِیَنلره قاپونی آشمیوبدیلار
قاشما آماندی دوگ قاپونی لیل تاریده
چوخ یاتما یوز مین ایل یاتاجاقسان مزاریده
- چهارشنبه
- 12
- آذر
- 1399
- ساعت
- 22:29
- نوشته شده توسط
- یوسف اکبری
ادامه مطلب
