یتوبدی باشه دوباره مه عزیز صیام
ییغیشدیرور بو گوزل سفره نی خدای انام
بیر عده کامه چاتوب تاپدی معرفت یولونی
گئدور وقاریله دنیاده منزلت یولونی
بیرعده من کیمی اما قالوبدی سرگردان
هنوز واردی وجودینده جامه ی عصیان
و لیک واردی امیدیم حق توانایه
منیمده باشیمه لطف ایلیه سالا سایه
دوتا منیم الیمی قویمیا قالام حیران
الیمی دوتماسا گر،آللادار منی شیطان
گلن صیامه کیمین نوریله دولا قلبیم
سرای معرفت کردگار اولا قلبیم
گلون وداع الیک موسم صیامیله
قلمده جاری،اولان قدرت کلامیله
دعای شام ونوای سحر خداحافظ
صباح نور و مساء ظفر خداحافظ
نوای نیمه شب و ربنا خداحافظ
دعای اغفروهم اتنا خداحافظ
سنی وداع ائدورم بیر قوناق کیمی ای مه
مه ضیافت دادار ، فی امان الله
دئمم که اهل عبادت،دئمم که لایقووم
خدا بیلورکه سنون قلبیدن من عاشقووم
سالوبدی جانیمه رعشه سنون بو آیریلیقون
ویروبدی روحیمه خدشه سنون بو آیریلیقون
وداع سوزی دل زاری همیشه قان ایلر
وفالی عاشقی مستغرق فغان ایلر
وداع سوزی یارا ویردی بوقلب ناشاده
وداع شاه شهیدی قلم سالوب یاده
پرآچدی طایرطبعیم گینه سمایه طرف
یول آلدی تا گئده شوریله کربلایه طرف
ده محرم او مأواده عصر ساعاتی
بنات فاطمه نون او اسفلی حالاتی
تنور شعله سی تک گون شاخور یره گویدن
یتور مرادینه گویا،سپاه اهریمن
اثر ائدوبدی سوسوزلوق عیال طاهایه
فغان و ناله سرادن چیخور ثریایه
باتوبدی قانه جوانان هاشمی تک تک
گیوبله هاموسی گویا که قرمزی کوینک
چیخوبدی یاددان عطش خیمه گاه عترتده
آچوبدی باشینی زهرا سرای جنتده
فقط قالان بیرحسیندور،که یوخدی یاراسی
نه واردی قاسم و اکبر نه واردی عباسی
وداع آخریدی ،شاه دین یارالیدی
وصاله چوخ تلسوب نی کیمین نوالیدی
مخدرات حرم دورینی آلوب شاهون
ستاره لر دیه سن باشینه دونور ماهون
چاغوردی بیربیر اوشاقلاری کامیاب ائتدی
بو منظره جگر عالمی کباب ائتدی
سفارش ایلدی بیر بیر بنات طاهایه
یاخیندی قانیم آخا ، جوریلن بو صحرایه
یتوبدی لحظه ی هجران وداع آخردی
یاخیندی تا گوره سوز سیزحسین بی سردی
اوجالماسون گویه سیزدن صدای واویلا
وریلسه غارته دستور قورخمیون اصلا
فقط قاچون داغیلون جمله دشت وصحرایه
قالانی ئولدوره جک فرقه ی فرومایه
بو چوللرون گجه من درمیشم تیکانلارینی
مباد تا گوره سوز ایندی سیز زیانلارینی
و بیرده آگه اولون بو مهم مطلبدن
اماندی چکمیون ال دلشکسته زینبدن
منیم باجیم سیزی جان تک حمایت ایلیه جک
امیرکوفه نی غرق مذلت ایلیه جک
اوتانماز اهل جفا یوزده اشک نابوزدن
فقط مراقب اولون عصمت و حجابوزدن
خلاصه اهل و عیالی اودم وداع ائتدی
قتاله ساری یول آلدی ،وقاریلن گتدی
نچه قدم اوزاق اولدی دونوب دالا باخدی
بوباخماقیلا دل عرشی یاندیروب یاخدی
چاغوردی زینب کبرانی شاه دلخسته
گل ای حسینه اولان عاشقانه وابسته
باجی گورنده منی قان ایچینده صبر ایله
نه باشه وور نه دکی صبر مرکبین پی له
آخور سو چوللره گر چه ولی من عطشانم
داخی نه غم بو گجه مرتضایه مهمانم
کچنمورم ولی بو بیر قضیه دن زینب
مواظب ال او سه ساله رقیه دن زینب
الونده عزیله ساخلا بو بیرق دینی
فنایه قویما گیده ختم مرسل آیینی
یاخوندی تا گوره سن پیکریمده سر یوخدی
منی آرایه آلان داشدی نیزه دی اوخدی
گوروب بو منظره نی صبر خانه سین ییخما
ئوزوندن ای یم عصمت مواظب ،اول چیخما
یتنده سوز بو یره زینبی کباب ائتدی
آخیندی دیده لری هوشیدن خانم گتدی
اثر ائدوبدی بو صحنه وفالی قارداشینا
الین قویوبدی حسین تز اور گینون باشینا
بو دمده زینب علیا گینه حالا گلدی
توکوبدی سیل سرشگین و لیک دینجلدی
دیدی،گئدورسن اگر مانع اولمارام قارداش
سارالمارام دئمورم یا که سولمارام قارداش
بوهجره سانما باجون دلده تاب وطاقتی وار
وفالی فاطمه نون منده بیر امانتی وار
امانتی که وئروب فاطمه منه تک دی
اوز اللریله توخونموش،حریر کوینکدی
سفارش اتمیشیدی چوخ گجه،آنام زهرا
گییندیرر سن حسینه،یتیشسه عاشورا
اونی ئوزوم توخودوم سیزبالا یاتان گجه لر
سینان قابورقالاریم آغریدان یانان گجه لر
آلوبدی کوینگی حضرت جهانی داغلاتدی
گینده اگنینه بیرده باجیسین آغلاتدی
بوکوینگه دئدی مستور بو بدن اولسون
خوشام منه بو ننم تحفه سی کفن اولسون
ولی امان فلکون چرخ کجمداریندن
اوتانمادی خانیمون چشم اشکباریندن
دولاندی کج دل زهرایه گتدی چوخ محنت
اوکوینگی ده جفا اهلی ایلدی،غارت
اماندی ساخلا قلم(ناعما) اورک یاندی
قلم بو غمده گلوب داده، دفتر اودلاندی
- چهارشنبه
- 13
- اسفند
- 1399
- ساعت
- 17:11
- نوشته شده توسط
- یوسف اکبری
ادامه مطلب
