سال یوز قرخ سکّزِ هجرتده ذاتِ لایَزال
کائناتون صاحبی جان آفرینِ بی مَثال
لطف اِیدوب دور موسی جعفر امامِ هفتمه
بیر اوُغول اِیتدی عَطا نیکو سیر نیکو جَمال
نورِ پاکِ حُجتِ هشتم طلوعِ صبح دَه
بطنِ مادردن فَنا دنیایه تاپ دی اِنتقال
نامِ نامی سین آتاسی اِیتدی هم نامِ علی
بُوالحسن نیت ایدوب دور اوُغلون اُول زیبا خِصال
مرکزِ زُهد و فضیلت دَه تاپوب دور پرورش
چشمه علمِ اِمامت دَن اِیچوب آبِ زُلال
گچدی عمرین دَن اُوتوز بش نُو بهارِ پُر شکوه
ظلمِ هارون حالینی پوزدی اِیدوب اَفسردَه حال
زَهر ویردی سندِ بی ایمان اَبا ابراهیمه
مَحبسِ مَرطُوب و مُهلک دَه تاپوب دور اِرتحال
کاظمین دَه دَفن اولوب دور کاظمِ آلعبا
وِیردی زینت تپراقا گنجینهُ علم و کمال
ثاُمنِ الحُجّت اولوب دور کاظمِ آلِ عبا
محضرین دَن فیض تحصیل اِیتدی اَشراف و رجال
منطقین دَن صاحبِ مَنطق لر اولدی کامیاب
اَمری نه قیلدی اَعاظیم و اَکابر اِمتثال
حقّینی غَصب اِیلدی افسوس هارون الرشید
روحینی آزرده اِیتدی حضرتون اوُل بَد سُگال
مکتبِ هارونی دَه تصدیق آلا شاگرده باخ
مادیات اُوسته ایدوب دور مَعنویت له جَلال
پنج روزه لذّته ساتدی بَقا اِجلالینی
اِیله فکر اِیلوردی یوخ دور عمری نه اَصلاً زَوال
ایستدی شیری کمندِ حیله سینده رام اِیده
مغز مکارین دَه نقشه طرح اِیدوب مثلِ شُغال
رسمی دور بو هر زمان دنیا پرستانِ زمان
قدرتِ عقلی قویوب دور نفسه اِیلر اتّکال
بی حیا مامون اِمامی مَروه دعوت اِیلدی
قائل اوُلدی ظاهرِ صورت دَه چوخ شاُن و جُلال
مکریله افکارِ خلقی اِیستدی جَلب اِیلسون
مُقتضی موقع دَه امامون حقین اِیت سون پایمال
ضامنِ آهویه تکلیفِ خلاقت اِیلدی
قیلدی فرمایش رضا بو اَمر دور اَمرِ مَحال
صادقِ آلِ محمددَن خبر وار دور منه
ئولمگیم زَهری له حَتمی دور نه این که اِحتمال
عمریم آز دور اَل گتور من دَن فشاره سالما چوخ
یوخدی قلبیم دَه منیم بیر ذرّه عشقِ مئلک و مال
درک اِیدوب بو سوزلری ماُمون ولی اَل چکمدی
تاپّادی روحی عَداوت جنبه سین دَن اِنفصال
برگِ گل بادِ صبا دَن جان آلوب بیدار اُولار
کسبِ فیض اِیتمز نسیمِ صبح دَن سنگِ سُفال
جبریله آخر شَهِ دینی وَلیعهد اِیلدی
بُلمدی مُجرم چتین معصومه اُولسون اِتصال
بو علم دَن دل غمین اُولدی گیجه گُون دوز اِمام
آشکار اُولدی یُوزون دَن غصه و حُزن و مَلال
جمعه لر هر هفته دَه جمعه نمازین دَن صُورا
منزله اِیلردی رجعت اُول شهِ فرخندَه فال
درگهِ حَقه اُوجالدوب اَل اِیدردی دردِ دل
ئولمگم دَه گر فَرج وار ای خدای لایَزال
لطف اِیله ماُمون اَلین دَن بو رضانی تز قوتار
سینهء آرامگاهی اِیت منه بزمِ وِصال
من هارا مامونی له بیر یرده اَگلشمک هارا
تَنگ اوُلوب دنیا گِچور هر گُون دُوزوم مانندِ سال
یالواروب معبودی نه اوُلدی دعاسی مُستجاب
آسمانِ مرگی دَه مَستور اولوب مثلِ هِلال
زَهر دار اَنگوری له جامِ شَهادت نُوش اِیدوب
دوشدی نه حاله منی مَعذور دوت اِیتمه سُوال
بو قدر وار دور وجودین دَه تَعادل قالمادی
سَمِّ مُهلک قویمادی قلبین دَه حدَّ اِعتدال
ترک ایدنده مجلسِ ماُمونی تتروردی بَدن
تند طوفاندا نجیکه گُورم سوز تترّ نَهال
اَلّی یُول اَگلشدی دوردی یولدا گلدی مَنزله
اُولمادی طاقت اَباصلتی له تا اِِیت سُون مَقال
قویدی یوز منزلده تپراق اوسته جان وِیردی اِمام
شاخهُ طوبایه مرغِ روحی آچدی پرّ و بال
مُنتهی الآمالی دَه درج اِیلیوب دور بو سوزی
مُخبرِ صدژیق شیخ عباسِ قُمی خوش مَآل
هرثمه آدلو حُوارِ ثاُمن الحُجَت دیور
حاضر اُولدی غسلی نه ماُمور او سر خیلِ ظلال
چون وصیت اِیتمشیدی مانع اُولدوم قوی مادوم
ترک اِیدوب ناچار او جسمِ اَطیبی آشفته حال
ناگهان گُوردوم جَنازه اُوسته دستِ غیبی له
ابیضی بیر خیمه گه اُولدی اِقامه بی مثال
سو سسین درک اِیلدوم بُلدوم وِیرولر غسلینی
انتظاری دوم کچوب بو ماجرادن آز مَجال
خیمه گه بیردَن یوخ اُولدی گُوردوم آیری مَنظره
اُول وجودِ اطهره تاُمین اُولوب دور اِیده آل
زَهریله بی روح اُولان پیکر کفن پیچی دَه دور
آخرت رختین گیوب دور چوخ نفسین و عال العال
عقلوی صَراف اِیدوب قیل ارزیابی مَطلبی
سال خیاله کربلا سلطانین ای نازک خیال
یاخشی فکر ایله حسینیله رضاده فَرقه باخ
طوسی دَن کچ قتلگاهِ کربلانی یاده سال
غسل اُولان وقته رضایه خیمه قوردی دستِ غیب
وردی امّا اُود حسین خرگاهی نه اَشرارِ ضال
عصر وقتیدی حسین سر نیزه نی قیلدی مَقام
ظلمِ شمرِ بی حیادَن تتردی مُحکمِ جَبال
قان توکن لر تندرو مرکب لره وِیردی جلو
فکر غارتله گلوب دور خیمیه اَهلِ قتال
آهوانِ اَهلِ بیته اَل تاپوب صیّادی لر
زینبون آلدی کنارین بیر سُوری یورقون غزال
خیمه لر نّظمِ نظامین وردی لشگر بیز بیره
بعضی سی ترمه آپاردی بعضی سی بیر طاق شال
غارت اوسته اهلِ کوفه اولدوروردی قزلاری
لشکره قان توکمگی سعد اُوغلی اتمیشدی حَلال
آت قباقین دَه قاچاندا قورخدان هر خردا قز
گوشوارین ویرمسی دی تز گوروردی گوش مال
یالواروردی هر بیری بیر رَحم سیز غارتگره
شامون اهلین دَن یوخیدی حیف حالِ اِنفعال
دشمنه هر خوردا قز اما دیوردی بو سوزی
وور منی قمچیله ئولدور معجریمی اوندان آل
نوبت غارت قوتاردی گلدی یانماق نوبه سی
شعله آغوشینده قالدی دختران خردسال
خیمه لر یاندی آلو دوتدی خیامون قبّه سین
باش گتوردی قاچدی صحرایه بیر عده اهل عیال
(انورا) لطف حسین ایتمیش سنی شیرین سخن
مرغ طبعون او سببدندور اولوب شیرین مقال
- چهارشنبه
- 31
- شهریور
- 1400
- ساعت
- 17:30
- نوشته شده توسط
- یوسف اکبری
ادامه مطلب
