بیست وهشتِ صفرِ اؤن بیرِ هجرت گئجه سی
گورسنیب حضرتِ پیغمبره رحلت گئجه سی
روح پیغمبر ائدیر جنت الاعلایه سفر
آلیب اطرافینی ایستکلی لری دیده سی تر
نازپرورده قیزی جاری ائدیر اشک بصر
حضرت فاطمیه اولدی مصیبت گئجه سی
بانگ ماتم اوجالیب گؤیلره هرمأوادن
یِئر اوزی قاره گییندی بوغم عظمادن
یعنی پیغمبر اسلام گئدیر دنیادن
آل طاهایه نمایانیدی محنت گئجه سی
ایکی عدّه سئوینیر تِئز قوتارا عُمرِرسول!
بیر گروهی کی اولوب حکم غدیر اوسته ملول
ظاهراً جِزیه وِئرن لرده کی ائتمیشدی قبول
باشلانیر زمزمه بَلّلندی ریاست گئجه سی
زهر دیرینه سالیب رَعشَه پیمبرجانینا
تبِ رحلت اثر اِئتمیشدی اوحضرت قانینا
سسلدی اهل وعیالین هامی گلدی یانینا
لحظهٔ آخر عمرایدی بو دعوت گئجه سی
ایسته ییردی قلم و کاغذ او کانون وفا
آخر عُمرِ مبارک ده اِئده بیر سؤز اَدا
بیر نفر مانع اولوب قیلدی بو موردده جفا
اِنَّ اَلْمَرْءُ لَیَهْجُرْ دئدی صحبت گئجه سی!
بو آغیر تهمت اثر ائتدی گلن اصحابه
اعتراض ائیله دیلر اِبنِ اَبي الْاَنْصابَه
دئدی قرآن بیزه بسدیر سؤز آتیب اعرابه
ظالمِ اوّله لعنت اوخی لعنت گئجه سی
بستر رحلت ایچینده اوزانیب پیغمبر
امّتین دن نگران دیر او حبیب داور
آلیب اطرافینی اولاد بتول اطهر
زینبین و حسنیینه اولوب حسرت گئجه سی
اوغلو یوخ قارداشی یوخ باجی سی یوخ وای سؤلییه
تک وجودی کی اونا کیمدی بو گون اَشک اَلییه
گؤزونون نوری فقط بیر قیزی دیر نوحه دییه
نئجه کی آغلادی هجرانینه هجرت گئجه سی
دست پیغمبری آلدی الینه شاه ولا
گاه آچیر گؤزلرینی گاه یومور خیرالوَرا
آل هاشم باشینین اوسته اِئدیر آه و نوا
اولوب اصحاب وفاپروره فرقت گئجه سی
دیزینین اوسته علی آلدی پیمبر باشینی
ائله آهسته تؤکور صورتینه گؤز یاشینی
صبح اولونجاق فلک الدن آلاجاق قارداشینی
شام هجرانه مبدّل اولی وصلت گئجه سی
مرتضی گؤردی او دم یارین آتیب یار گئدور
چاره یوخ گئتملیدور یار و فادارگئدور
دئدی آماده اولون احمد مختار گئدور
اهل اسلامه ولی اولدی قیامت گئجه سی
ائتدی دنیانی وداع سرور و سالار اُمم
مرتضانین اوزونه اولدی جری اهل ستم
بیعت اوسته قاپیسین چکدی اودا قوم ظُلَم
یازدیلار صفحهٔ تاریخ ده بدعت گئجه سی!
او شقی لر کی چکیب باغلادی طاها قاپیسین
شعله ور اِئتدیله ظلمیله او مولا قاپیسین
گون گون اورتا چاغی یاندیردیلا زهرا قاپیسین!
او زماندان گؤرونوب شیون و ظلمت گئجه سی
قاپینی یاندیران اشرار اولوب بانی شر
شرّه فتوا وِئرن البته گؤرر عمده ضرر
اَللی ایلدن سورا بیر واقعه نی اِئتدی ثمر
هجرتین آلتمیشی اوج ائیلدی غارت گئجه سی
گلدی غارت سؤزو یافاطمه امدادیمه گل
کوفه اَجلافی تاپیپ زینبین اجلالینه ال
خیمه لر یاندی دگوب بیربیره اوضاع ملل
قاچاقاچ دوشدو یانان خیمه ده وحشت گئجه سی
یانار اؤددان قوتاران قانلی بیابانه قاچور
بیری نهر علقمه ساری بیری میدانه قاچور
بیری سسلور بی بی سین چاره و درمانه قاچور
او گئجه اولدی خانم زینبه شدّت گئجه سی
بیری سسلور گولووی ائتدی خزان زحمتِ خار
بیری سسلور بی بی اولدوم نئجه گؤر درده دچار
تیکان اوستونده قاچاندا آیاقیم اولدو قابار
عمه عمه چاغیریر هر قیز اسارت گئجه سی
اولدو«ستاری»بوگون حضرت طاهایه دخیل
بالاسی فاطمه يه اُمِّ اَبیهاٰیه دخیل
اول رقیه بی بی سی زینب کبرایه دخیل
بو خانم حلّ ائله ییر مشکلی خدمت گئجه سی
- دوشنبه
- 26
- آبان
- 1399
- ساعت
- 10:29
- نوشته شده توسط
- یوسف اکبری
ادامه مطلب
