اشعار مخصوص کوفه

یاخشی هدفه دگدی بو قرآن اوخی قارداش
قربان یارالی باشوه قرآن اوخی قارداش

قرآن اوخی، ویر کوفه لیلر فکرینه تغییر
بُلسونله بیزه نازل اولوب آیۀ تطهیر

ای سنگ ستمله سینان آئینۀ رحمان
اولسون او لب لعله فدا زینب نالان
بو کوفه نین اهلی بیزی بولمولّه مسلمان
قرآنیله دیندن بیزی بیگانه بولولّر
گه کف چالوب اشرار بیزه گاه گولولّر

گل نطقه دانیش قدرت یکتانی نشان ویر
دل مرده لره معجز عیسانی نشان ویر
قرآنی دانان ملّته قرآنی نشان ویر
قرآن اوخی تا بلکه یاتان ملّت اویانسون
تا واردی جهان حقّیله باطل آرالانسون

ای قولی کیمی فعلی اولان حجّت مطلق
وی قانی ویرن مصحفین آیاتینه رونق
قرآن اوخی بو مسئله نی ایله محقّق
اولما

• پنج شنبه
• 21
• شهریور
• 1398
• ساعت
• 11:25
• نوشته شده توسط
• علیرضا گودرزی

گیتدون الیمدن یاحسین قالدی بلالر زینبه
یاتدون او قانلی دشتیده اولدی جفالر زینبه
زینب باجون - قربان سنه - ای باوفــا قارداش
قران اوخی - زینب سنه - اولسون فدا قارداش
جانم حسین جانم حسین جانــم حسین قارداش

ای کربلا شاهی حسین من زینبم تک قالمیشام
قارداشلاریم اولدی باشا بیر قاره معجر سالمیشام
من پــــرچم حُــــرّیتی کـــــربلایه چــالمیشام
قمچی وروبلار کینـــه دن بو اشقیالر زینبه

زینب باجون - قربان سنه - ای باوفــا قارداش
قران اوخی - زینب سنه - اولسون فدا قارداش
جانم حسین جانم حسین جانــم حسین قارداش

یاس ساخلیوم هاردا سنه زهرا مــارالی قرداشیم
آواره قالدوم دوشموشم سندن آرالی قارداشیم
قیزلار دیور نوحه سنــــه قلبی یارالی قارداشیم
گُل تک سولوب باتدون حسین قالدی نوالر زینبه
جانم حسین جانم حسین جانــم حسین قارداش

لای لای دیور خسته رباب آهو مثالی اصغره
آغلور رقیه تابی یـــــــوخ اول پاره پاره اکبره
معجر سالوبلار قیزلارون نهر اوسته قانلی اللره
اوغلانلاریم گیتدی قالوب خردا بالالر زینبه
جانم حسین جانم حسین جانــم حسین قارداش

اللهه قربان اولموسان باشین اوجــــاتدون زینبون
ای نازنینیم بس نه تز سن گوزدن آتدون زینبون
دوشدون یارالی مقتله گور نه قوجاتدون زینبون
آی تک باتوب یاشلی قالوب، بیرجه ضیالر زینبه

بو کوفه اهلی رشته ی مهر و وفانی قیردیلار
سن برگه ی قرانیدون از روی کینه جیردیلار
حتی باشیوه نیزده یاندیم حسین داش وردولار
طعنه وورولار خصمیدن بو بی حیالر زینبه

من زینبم شیــــر زنم اینــــدی ولی قول باغلیام
دشمن باخور اولمور سنه بیز گوز دولیجا آغلیام
زینب اولوب خونین جگر قارداش اورکدن داغلیام
ای (پوریا ) یاز کوفه ده آغلور جدالر زینبه

• یکشنبه
• 20
• تیر
• 1400
• ساعت
• 15:31
• نوشته شده توسط
• یوسف اکبری

او دم کی گوردی جدا اوسته قارداشین باشینی
مخاطب ائتدی بو نوعی یارالی قارداشینی

امان بو کوفه ده بیعت شکن جماعت دن
دولوب اورکلری نیرنگ دن شقاوت دن

دئیوله خارجی پیغمبرین بالالارینا
دونوبدی قانه اورک طعنه و شماتت دن

تاپانمادیم سنی صبحه قدر داریخیدیم حسین
قوتاردی صبریمی هجرین سالیب دی طاقت دن

مجال یوخ دانیشام من سنه اورک سوزونی
دییم کئچن گئجه باشه گلن حکایت دن

هایاندا قالمیشیدون زینبیبن دوتولموش آیی
نه تئز غروب ائله دین دوشدون استقامت دن

کئچن گئجه باجین ئولسون کیمه قوناقیدون
کی یوخدی بهره سی انصافیدن مروّت دن

هایاندا آچمیشیدی میزبان یاتان یئریوی
حکایتی اوخونور یوزده کی علامت دن

وروبلا باشیوه

• شنبه
• 23
• شهریور
• 1398
• ساعت
• 10:29
• نوشته شده توسط
• علیرضا گودرزی

کیم دئدی اهل کسا قلبلرین داغلیاسوز

سیز گرک حالیمیزه صبح و مسا آغلیاسوز

سیز گرک آل علی حرمتینی ساخلیاسوز

زینبون آدی گلن یرده گرک گول توکوله

نه کی هر شهره گیرنده باشینا کول توکوله

زینبون دوتدی الین خردا بیر اوچ یاشدا بالا

یره اگلشدی ایکی ناظر صحرای بلا

سسلدی بسدی بی بی کوفه لیده یوخدی وفا

ایلیوب بیر محنون بو یارالی قلبیمی قان

بیر منه سویله باشون ایندیده آغری بی بی جان

معجرین گوشه سینی آلدی اله کان حیا

چکدی زینب یوزونه تا سیله قانین اوبالا

گوردی پاک اولمادی لازمدی او معجر تر اولا

گوردی بیر ایش خلق و ماخلقی آغلاتدی

توکدی گوز یاش او قرا معجرینی ایسلاتدی

• سه شنبه
• 13
• آبان
• 1399
• ساعت
• 21:06
• نوشته شده توسط
• یوسف اکبری

سالدی قرآن سسون آوازه بو مأوایه حسین
کوفه اهلی ایشیدوب گلدی تماشایه حسین

عاشقم گرچه آنام اوغلی او شیرین سخنه
ویرور هر لحظه تسلّی بو چتین وقته منه
ولی هر کس که گلوب دوردی تماشایه سنه
ووردی مین یاره دل عترت طاهایه حسین

ازدحام ایتدی جماعت کسیلوب راه عبور
رخت فاخر گینوب مردم ایدر وجد و سرور
غرفه‌ده عورت اوشاقلار دف و نقّاره چالور
داش آتوب طعنه ویرالّار منه لیلایه حسین

آلوب اطرافیمی غم فوجی اوزوم خسته و زار
خوردا قزلار مله‌شور ناقه‌ده بی‌صبر و قرار
جرس ناقه صداسینده عزا نغمه‌سی وار
گله ماتم‌زده‌لر بلکه تسلّایه حسین

صبری مشق ایلمیشم ایتمرم هیچ وقته گله
یارالی قلبیمی امّا گتورور کوفه دله
زینبون یتمز الی تازه آخان قانی سیله
تا جمالون گله بیر لحظه تجلّایه حسین

قاتلون صورتوی خاک تنوره بلیوب
دگوب آئینۀ رخساروی کول جلوه‌‌‌لیوب
فرصت دهر یتوب ظالمه طغیان ایلیوب
تُف بیله گردشه لعنت بیله دنیایه حسین

پیشواز ایلموسن عترت غم‌پروروی
سالموسان یادوه لیلانی علی‌اکبروی
گورمدون حیف اولا بو قافله‌ده اصغروی
سن بولورسن نولوب اول دُرّ گرانمایه حسین

سنی ئولدوردیلر چون عالمی تار ایلدیلر
ناز پرورده‌ لری ووردیلا خوار ایلدیلر
سویوب اهل حرمون ناقه‌سوار ایلدیر
باش آچوخ زینبوی چکدیله صحرایه حسین

سن دونن فارغ اولوب مقصدوه یتمشیدون
ظهر وقتیدی جدا اوسته عروج ایتمشیدون
گیجه معلوم دو معراج حقه گتمشیدون
بنزیوردی بو گیجه لیلةالاسرایه حسین

گوزومی اشک دوتوب تیره‌لنوبدور نظریم
شب اوّلده دونوب حال خسوفه قمریم
اودور اولدوزلاریلان دوره‌لنوب دور و بریم
اوزلرین اوخشادالار بو دوتولان آیه حسین

• یکشنبه
• 2
• آذر
• 1399
• ساعت
• 22:02
• نوشته شده توسط
• یوسف اکبری

باشین اشاقه سالوب زینب آغلیوردی حزین

دوشردی یاده گئچن گونلری اولوردی غمین

دیردی کیم بیلوری کوفه ده جدالیم وار

گئچن زمانلاری یاده سالام خیالیم وار

بورا او یردی آتام پایتخت ائدوب اوزونه

گورردی کوفه لیلر حشمت و جلالیم وار

بورا او یردی که بش ایل خانملیق ایلمیشم

گورردی عورت اوشاق مکتب و مقالیم وار

بورا او یردی ابوالفضل و نچه قارداش

آلاردی دوره می مردم گوره نه حالیم وار

من هرکسین سوئونردی سلامین آلسیدیم

دیردیلر منه لطف ائت خانم ملالیم وار

گورردی کوفه نین عورتلری مجالسده

باشیمدا معجر و بوینومدا سبز شالیم وار

یوخومدی معجر اضافه چکم الان یوزومه

یوخاری قوزامورام باشیمی بو حالیم وار

او زینبم ولی کیم باور ایلیر گورسه

باشیمدا سایه‌ی شمشیر وار ظالم وار

قبول ایلمز هیچ کیمسه زینبم یارب

قولومدا بند رَسَن باشدا قیل و قالیم وار

گنه خانم ئوزون آماده ایلدی دانیشا

بویوردی اُسکُتو ای کوفیان سئوالیم وار

بیلورسوز هانسی جگر پاره ائتدوز احمددن

سیزه قضّیه نی روشن ائدم خیالیم وار

اون ایکی مین اونا نامه یازندا یوخ غیرت

یزیده اگدیله باش شرحه انفعالیم وار

اوتانموسوز یغیشوب آل احمده گولوسوز

بیلنموسوز نقدر محنت استغالیم وار

خیال ایلموسوز ایندی اقتداریم یوخ

یزید کاخینی ویران ائدم مآلیم وار

سیزه عُبید زیادون مرامی روشندور

بو کوفه ده اونی رسوا ائدم مجالیم ور

علف کیمی اسوروز یل اسنده هر طرفه

منافق اولماقوزا دلده اشتغالیم وار

گوروم که آز گوله سیز سیزلری چوخ آغلیاسوز

همیشه حیله لروزدن غم لیالیم وار

• جمعه
• 7
• آذر
• 1399
• ساعت
• 20:51
• نوشته شده توسط
• یوسف اکبری

قران اوخیان باش، یارالی باشوا قربان
باش باشه چاتان اوغلووا قارداشوا قربان
گل گوزلریوون قاننی اشگیمله سیلیم من
آیات اوخیان دیللره قربان کسیلیم من

حاشا بو منور باشی تشبیه ایدم آیه
آی نیزه ده قران اوخوماز آیه به آیه
آیات مبین دور بو باش آیات خدایه
باشدان ایاقا عشقله پرشوردی بوباش
پیغمبرون آنّندان اولان نوردی بوباش

وار بو یارالی باشون عجب حُسن لقاسی
خون گرم دوداقلاردا حزین طرز اداسی
حق کامه‌سی کهف آیه‌سی جان بخش صداسی
ای وای بوباش قارداشیمون باشینه بنزر
بیر صورت زیبادی که نقاشینه بنزر

بو جاذبه لی سسده بویوک بیر هیجان وار
دنیا دولوسی جان یارادان جوهر جان وار
زینب کیمی قلبونده مگر سوز نهان وار
اود دوتدوم آلیشدیم بو یانقلی نفسوندن
جان یولدی گیچن گونلریمون نقشی سسوندن

عطشان کسیلن باش لب شادابی نشان ویر
لعل لب آرا لؤلؤ نایابی نشان ویر
کهف آیه‌سی تک آیت اعجابی نشان ویر
دور کرب و بلا سمتینه اعجازیوی گوستر
کهفنده یاتان پیکر جانبازیوی گوستر

ای باشی سرافراز ایلین نوک جدانی
دلکش سسیله لرزیه سال موج فضانی
تیترت یری افلاکی بوتون کون و مکانی
قوی دولدورا آفاقی کمال کلماتون
عالم گوره یکساندی حیاتونله مماتون

قران اوخی قران اوخوماق ذکر جلیدور
گورسونله بو باش صاحبی نور ازلیدور
دردانه ی زهرادی حسین ابن علیدور
تحصیلینی تکمیل ایلیوب دوش نبی ده
تفسیر یازار نیزه ده قران مجیده

حسرت چکرم نیزه نون احوالینه قارداش
ئوپدی بوغازوندان یتوب آمالینه قارداش
افسوس باجون زینبون احوالینه قارداش
دشمنلر الینده گزر الدن اله باشون
گویمازلا منیم یانیمه بیردم گله باشون

قان قطه‌سی مرجان کیمی مژگانه دوزولموش
جان رشته سینه گوهر شادانه دوزولموش
افروخته مشعلدی نیستانه دوزولموش
دلخون جگریم پارچالانوب پاره سی دور بو
بیر داغ درونون باش آچان یاره سی دور بو

اوّل باشینی باشدان ایدر شمع شبستان
روشن اولور اوندان صورا خلوتگه جانان
سن عشقده سرخیل وفاسن، سنه قربان
باش سهلدی سن حق یولونا واریوی ویردون
دوتدون قولونی قولسوز علمداریوی ویردون

بیر باش که ایدر ناز اونون جلوه سی نوره
بیر باش که باشین قویمازیدی سینه حوره
خولی نه جثارتله اونی قویدی تنوره
سن ای گل رعنا نیه توپراقه باتوبسان
یوخسا گیجه کول اوسته تنور ایچره یاتوبسان

بیلدیم بو اوزاق یولاری قارداش نیه گلدون
باش چکماقا باشسیزلارا بو کوفیه گلدون
لیلانون اوغول وای سسینه وای دیه گلدون
خوش گلدون عجب وقتیده سالدون بیزی یاده
گل قویما گیداخ بزمگه اِبن زیاده

ای پادشهیم قبله گهیم بنده نوازیم
زنجیر ستم گردن بیماره نه لازم
آرتار اونا باخدوقجا منیم سوز و گدازیم
وار گور یری باشین آچا زلفون یولا زینب
قانه بویانان باشوا قربان اولا زینب

بیر عائله نون مسکن آبادی یخیلدی
تاراجه گیدن لانه ی بربادی یخیلدی
طوفان بلاخیزیله بنیادی یخیلدی
حسرت کشم آخرنه اولور یانیمه گلسون
ای روح و روان، روح گلور جانیمه گلسون

افسوس گل نازیمی دست ستم آلدی
بلبل باش آلوب گیتدی گلستانی غم آلدی
بیر قاره بولود چیخدی بیابانی چم آلدی
گُل گیتدی خزان گلدی چمن ایللره قالدی
گرمیّتِ جمعیّتیمیز محشره قالدی

گوردوم یارالی باشوی باش محمله چالدیم
بنزتدیم او باشه باشیمی کام دل آلدیم
سن سیز آنام اوغلی نه یامان گونلره قالدیم
صد شکر باشون سایه‌سی دوشدی باشیم اوسته
آرتیخ منی وورمازلا آخان گوز یاشیم اوسته

هر یانه گیدم منله گلیر جور زمانه
خوش مونس دلسوزدی وار منّتی جانه
کیم گوردی یاناندا گَلَه پروانه فغانه
عشقونله سنون گوگلومی قارداش غمه ویرمم
عشق عالمنون عالمینی عالمه ویرمم

کیم کعبه مقصودی گوروبدور چیخا سیره
سیرینده بوتون خیر ویره یاریله غیره
بو سیر برادر چکر آخر سنی دیره
گوزلر یولووی ایمدی در دیرده عیسی
یوز قبلیه سجّاده آچوب راهب ترسا

ای پایه ارشادی سماواته چیخان باش
گلدسته‌ی عرش اوسته مناجاته چیخان باش
یالقوز باشینا گردش شاماته چیخان باش
شامون یولی چوخ قورخولیدی تک باشا گیتمه
گیتمه بو باشین زحمتی باشدان آشا،گیتمه

دائم باشون آردینجا گلور محنت ایام
گورسون بو باشون امری تاپار هاردا سرانجام
من تک سورونور یرده باشون سایه‌سی تا شام
ذرات گزر سیرده خورشید دالنجا
منده گزرم سایه ی امّید دالنجا

حسرتله اولور ساکن ویرانه رقیه
ویرانه نی ایلر بیزه غمخانه رقیه
طوفان مصیبتده دویار جانه رقیه
شام ایچره غریبانه قالیر مهد مزاری
دائم او مزار اوسته گزر ناله زاری

(هندی) ندی بو سنده اولان حرص اضافی
ترک ایله سخنگولره میدان مصافی
هر فرده بو بازاریده کافیدی کلافی
شاه شهدا چون آچار ابواب جنانی
البته سالور یاده بوتون نوحه یازانی

• جمعه
• 7
• آذر
• 1399
• ساعت
• 20:54
• نوشته شده توسط
• یوسف اکبری

سبک : ای منی آواره قویان ابالفضل

ای باشیما سایه سالان حسینیم حسینیم
نوک جداده دولانان حسینیم حسینیم

عزت و جاهیله حسین گئدورسن گئدورسن
سویله هارا شاه زمن گئدورسن گئدورسن
ناقه ده من نیزه ده سن گئدورسن گئدورسن
مقصدوی ایله بیان حسینیم حسینیم

هر یئره گئتسن گلرم دالینجا دالینجا
کوفه و شاماته شرر سالینجا سالینجا
کوینگین اللردن اخا آلینجا آلینجا
شمر و سنان ویرسه امان حسینیم حسینیم

سالدیلا اوت خرمنوه سراسر سراسر
باخ منه ای نی ده گزن برادر برادر
غصه گزور زینبیلن برابر برابر
ائتدی منی قدی کمان حسینیم حسینیم

صحبتی دیللرده قالیب او باشین او باشین
اللری اللرده قالیب او باشین او باشین
پیکری چوللرده قالیب او باشین او باشین
گؤزلری کول لبلری قان حسینیم حسینیم

مندن حسین چرخ فلک باج آلدی باج آلدی
ناله سسیم عرشه کیمین اوجالدی اوجالدی
بیر گونون عرضینده باجون قوجالدی قوجالدی
اولدی بهار عمری خزان حسینیم حسینیم

سن شهدا رهبریسن عزیزیم عزیزیم
آل عبا سروریسن عزیزیم عزیزیم
فاطمه نین دلبری سن عزیزیم عزیزیم
شهرتی عرشه اوجالان حسینیم حسینیم

هجر اوتی قلبیمده چکور شراره شراره
دامنوه چاتمور الیم نه چاره نه چاره
نیزه دن ایله باجوا اشاره اشاره
لطف ائله بیر لحظه دایان حسینیم حسینیم

باخ یوزومه بوسه ووروم یوزوندن یوزوندن
منله دانیش دویمامیشام سوزوندن سوزوندن
ایستیورم بیرده ئوپم گوزوندن گوزوندن
سن گوزووه وئرمه تکان حسینیم حسینیم

کانال اشعار عباسی معروفان اهری

• سه شنبه
• 2
• دی
• 1399
• ساعت
• 23:19
• نوشته شده توسط
• یوسف اکبری

دنیانی حیران ایلروک،من ناقه دن سن نیزه دن
تبلیغ قرآن ایلروک،من ناقه دن سن نیزه دن

ذرّعالمی عهدایلییب پیمانی باهم باشلادوق
دین دردینی باهم گوروب،درمانی باهم باشلادوق
نشرپیام عترت و قرآنی باهم باشلادوق
ایفای پیمان ایلروک،من ناقه دن سن نیزه دن

کرب وبلادشتینده کی،ایثاری تکمیل ایلدون
دنیانی وئردون وقریله،عقبانی تحصیل ایلدون
قانلی مناده قانووه باتماقدا تعجیل ایلدون
حقی نمایان ایلروک،من ناقه دن،سن نیزه دن

توش اولدی گل جسمون حسین،اوخ، نیزه،تیروخنجره
آت چاپدی قوم اشقیا،جسمون داغیلدی یکسره
منده اسیراولدوم اَخا،نالم اوجالدی گوگلره
دژخیمی نالان ایلروک،من ناقه دن سن نیزه دن

بوکوفه اهلی عترت طاهایه حرمت قویمای
تندن ردای خفتی،اهل شقاوت سویمادی
قارداش دئمه بوقلبیمی تیرشقاوت اُیمادی
خصمی پشیمان ایلروک،من ناقه دن سن کوفه دن

آل امیه فکرائدوب نورهدی خاموش اولار
بیلموربلالر باده سی،اهل ولایه نوش اولار
فکرائتدیلرئولسه حسین،راه علی مخدوش اولار
بیزحقی اعلان ایلروک،من ناقه دن سن نیزه دن

قوزاندی عرش نیزه دن،اعجازیله قرآن سسون
سالدی دیارکوفیه،بیرسهمگین طوفان سسون
اولدی یارالی قلبیمه،اوحالیده درمان سسون
بیزکسب رجحان ایلروک،من ناقه دن سن نیزه دن

من زینبم زهراقیزی،ارذللره باش اگمرم
باران کیمی یاغدیرساداش،والله یولومدان دونمرم
باش وئرّم اما مطلقا،اشراره معجروئرمرم
کفری پریشان ایلروک،من ناقه دن سن نیزه دن

بیرخطبه ایرادایلدیم،ملت دیدی اخگردی بو
نطقی عجب کوبنده دی،گویاایتی خنجردی بو
رجعت ائدوب شیرخدا،یاللعجب حیدردی بو
خلقی هراسان ایلروک،من ناقه دن سن نیزه دن

من کی زبان نطقیله،خصمیله پیکارایلدیم
منطقله اهل کوفه نی،خوارایلدیم زارایلدیم
ابن زیادی تختدن سالدیم یئره خوارایلدیم
بیرآیری طوفان ایلروک،من ناقه ده سن نیزه ده

ایندی دیارکوفه دن،اولدوق دمشقه رهسپار
سن نیزه ده من ناقه ده،سن غصه لی من غمگسار
یول یولداشی اولدی بیزه،بیرده بوشمرنابکار
ترک سروجان ایلروک،من ناقه دن سن نیزه دن

• دوشنبه
• 18
• اسفند
• 1399
• ساعت
• 23:00
• نوشته شده توسط
• یوسف اکبری

زینب گورنده کوفه‌ لیلرده او کثرتی
قان جوشه گلدی ائتدی مخاطب جماعتی

ای اهل کوفه ایلمیون چوخ جفا منه
آد خارجی قویوب دئمیون ناسزا منه

ساکت اولون قویون اوزومی من تانیدّیریم
شاید بو جمعیدن تاپولا آشنا منه

من زینبم حسین باجیسی فاطمه قیزی
بو اسم پاکی خالقیم ائتمیش عطا منه

جدّیم محمّد عربی‌ دور آتام علی
قارداشدی دوغرانان جگری مجتبا منه

گون گورمیوبدی زلفیمون آتدان جمالیمی
وئرمیش حجاب درسینی خیرالنّسا منه

بو معجرین بهاسینه جان حاضرم وئرم
کشف حجابی نهی ائلیوب مصطفا منه

تأکید ائدوب حجابی شریعت خانملارا
مستوره‌ لیقدا ایلیه‌لر اقتدا منه

نابود اولار او گوز باخا زینب جمالینه
زهرادن ارثیدور بو عفاف و حیا منه

قول باغلیوق بسیمدی جماعت داش آتمیون
انصاف ائدون دگول بو اهانت روا منه

بش ایل بو شهریده سیزه دین درسی وئرمیشم
اولدوز نه تئز ندن بئله بی‌ اعتنا منه

قارداشلاریم ئولوب جگریم داغلیدور منیم
طعنیله وورمیون یارا اوستن یارا منه

قارداشیمون باشین نظریمندن ایتورمیون
هر چاله‌ ده بو باشدی اولان رهنما منه

پیر و جوان باخور منه منده بو نیزیه
بیر سرو با صفادی بو قانلی جدا منه

ساکت اولون رقیّه قوجاقیمده اگلشوب
آغلیر بالام اولوبدی اودا هم‌ صدا منه

حلال مشکلین قیزی باب‌ الحوائجم
مشکلده قالمیشام هانی مشکل‌گشا منه

من آسمان معرفته بدر کاملم
ابر ظلام ظلم وئرنمز خفا منه

بیرگون دیار شامی گتورّم تصرفه
ابنای روزگار دئیر مرحبا منه

بیر سبز رنگ پرچمی ورّام خرابیه
تاریخ یلرده خلق یازار حبّذا منه

تنها منم بو قافلیه ملجأ و پناه
هر دردمند دردینی ایلر ادا منه

هشتاده‌ دین عورت اوشاق گوز تیکوب منه
بو جمعی تاپشوروبدی شه کربلا منه

بعضی دییور آی عمه یخیلدیم مواظب اول
قویما بو ساربان آچا دست جفا منه

ایّوب امتیاز آپاروب صبریده ولی
ایلر مقام صبریده روحین فدا منه

زلفین طعامه ساتدی رحیمه بو فکریله
ایّوب ئولمه‌ سین که بودور پیشوا منه

من گیرمیشم یانار اودا سجّاد یانماسین
قارداش بالاسیدی هم امام هدا منه

بیر یر وئرون که راحت اولاخ چوخ یورولموشوخ
یولّاردا چوخ یئتوب غم و رنج و عنا منه

عبّاسیمی اوزاقدا گؤروب جرأت ائتمیسوز
هر آغلیاندا قمچی وورور اشقیا منه

صبحه کیمی یاتانمامیشام من گئچن گئجه
یانمیش چادر چون اولموشیدی غمسرا منه

دوتموشدوم اوردا شام‌ غریبان حسینیمه
زهرا آنامدا اولموشودی هم‌ نوا منه

گولدورمه‌ سین خدا یوزوزی آز گولون بیزه
سیز کف چالوب گولنده وئرور یوز بکا منه

آغلار (کریمی) شوریله وازینبا دئیر
وار حاجتی اورکده ائدر التجا منه

چوخ آرزو ائدر گله بیر وقفه قبریمه
اجلالیمی گؤروب یازا مدح و ثنا منه

• یکشنبه
• 7
• شهریور
• 1400
• ساعت
• 22:42
• نوشته شده توسط
• یوسف اکبری

نیزه ده قارداش باشون اوُز حَقّین اِعلان اِیلوری
عالی بیر عُنوانیله تَبلیغِ قرآن اِیلوری

لبلرون کَهف آیه سین خوش لحنی له اِیلور بیان
تا اولا اصلِ حقیقت خوش بیانی له عیان
ایلوری اِرشادِ دین بلکه آیلسون کوفیان
بی دیانت ملّته حقّی نمایان ایلوری

کیم گوروب نُوک جداده قانلی باش گلسون دیله
کیم گوروب بو طرزیله شَه عارضی باتسون کُوله
بیر بیله ظلمیله اصلاً ائتمه سون بیر دم گله
مُعجزاتون کوفه اَهلین گور نه حیران ایلوری

اِی وجودی خلقتِ کُونه اولان عُمده دَلیل
ظلم الیله دین یولوندا اولموسان عَطشان قَتیل
پرتوِ حُسنون جدانی اِیلیوب طُوره بَدیل
غبطه بو اَحوالیوه موسی ابن عُمران ایلوری

اِیلین داودی حیران ای حِجازی نَغمه سی
ای کفن پوش اِیلین جسمین چولون خار و خَسی
ای اولان قانلی قوم اوُستی آخرین سجّاده سی
سجده گه ظلمی باجون حالین پریشان ایلوری

کوفه اَهلی گور نه نوعی مندن ایلور پیشواز
بولموری من زینبم دُختِ شهنشاه حِجاز
قویموری باجی له قارداش اِیلسون راز و نیاز
اَشقیا ظلم و ستمده گور نه طغیان ایلوری

خاندان ِعصمتی بو فرقهء بی ننگ و عار
ایلیوبلر بیر قطار عریان دوه اوسته سوار
اولموشوخ سندن صورا بیز گور نجه بی اعتبار
آلِ طاهایه تَرحّم قومِ عدوان ایلوری

بی حیا اُمّت بو فکریله آلوب بیزدن نِقاب
تا اولا اَشرار ایچنده خوار عیالِ بُوتُراب
بولموری زَهرا شیَم لر اِیلمز کشفِ حجاب
قیزلارون گُل یوزلرین زلف آتدا پنهان ایلوری

دین اِیوین گوردوم یخور بو لشکرِ باطل پَرست
آتشین گفتاریله کفر اهلی نه ویردیم شکست
حقّ سوزوم اَهل ضَلالت قلبی نه ایتدی نشست
بولدولر حقّه کمک لیق حَیَّ سبحان ایلوری

کاسهء صبریم حسین خُولی جفاسی ندن دولوب
پردهء خاکستَر آتدا گُل یوزون مَستور اولوب
جورِ اعدادن نجه گور فاطمه رَنگی سُولوب
فرقتون اوُل نازنی نون باغرینی قان ایلوری

سن بیلورسن ظلم الیندن زینبون اِیتمز گِله
دین یولوندا هر نه گلسه باشه اِیلر حوصله
گر توانی گِیت سه باشین وُورسا چوبِ مَحمله
خانهء صبرین تنورین ظلمی تالان ایلوری

وار نه علّت خاکی له مَم زوج اولوب دور گوز یاشون
نه یوزیله میزبانون مَطبخه قویدی باشون
هاردا قالمی شدی حسینیم بس وفالی قارداشون
تا گوریدی خُولی هاردا شاهی مِهمان ایلوری

نیزه لر باشین نقدری گوزلریم سِیر ایلوری
رأس عبّاسی ندور باعث جداده گورموری
دردیمی سندن صورا بیر کیمسه قارداش بیلموری
دردِ زینب دیدهء زَهرانی گریان ایلوری

(روفه_گر) عبّاس آدیله ختم قیل بو نوحه نی
تا قوتارسون حشریده نارِ جَهنّم دن سنی
اولسا دنیاده نصیبون گر مقدّس مدفنی
سویله قبرون آرزوسین هر مسلمان ایلور

• پنج شنبه
• 18
• شهریور
• 1400
• ساعت
• 19:52
• نوشته شده توسط
• یوسف اکبری

کوفه ده زهرا قیزی محشر نمایان ایلدی
باشلادی بیر ایله خطبه خلقی حیران ایلدی

استقامتله او دم صدّیقۀ کبری قیزی
اوج همّتده آچوب پرچم شه بطحا قیزی
ایتدی اوّل باشدا محکم معجرین زهرا قیزی
آی کیمی گون صورتین ابر آتدا پنهان ایلدی

دُر نثار ایتسون حیانین با ادب گنجینه سی
باشلیوب بیر خطبه زهرا قلبینون آئینه سی
آل سفیانین او دم تعطیل اولوب کابینه سی
حقّ و حقّانیّتی دنیایه اعلان ایلدی

گوردی کوفه ازدحامین زینب والا مقام
سسلنوبدور اُسکُتوا، آیا ندور بو ازدحام
قطع اولوب سسلر، دوشوب سسدن جرسلرده تمام
حیدر کرّار گویا عزم میدان ایلدی

بیر شجاعت گوستروب اول دمده دخت بوتراب
کوفه نین وضعین دگیشدی زینب علیا جناب
د

• پنج شنبه
• 21
• شهریور
• 1398
• ساعت
• 10:55
• نوشته شده توسط
• علیرضا گودرزی

سبک: احوالیمیز_یاماندی...
سبک: قان یاغدی کربلاده...
ای دست دلرباسی...
اود یاپوشدی سینمه…
از ما خطا یا الله…

ویردی صفا بو قلبه
قرآن صداسی قارداش
بیرده اوخی او لحنون
زینب فداسی قارداش

ایوای یارالی قارداش (۲)

باشون جداده قارداش عزم ایلیوبدی شامه
دوندردی کوفه اهلی روشن گونومی شامه
بیربیله ظلم ایدوللر یتمور نیه تمامه
اول مونسیم بوچولده الله رضاسی قارداش

ایوای یارالی قارداش (۲)

ای یوسف مدینه قرآن تلاوت ایله
منله دانش برادر مهرو محبت ایله
کیم‌قویدی کوللر اوسته باشون حکایت ایله
سنده صورا کیمون وار کربوبلاسی قارداش

ایوای یارالی قارداش (۲)

یانّام گورنده قارداش بوداش آتان جماعت
آد خارجی قویوبلار ایلور هامی شماتت
نامه یازان شقی‌لر هیچ چکموری خجالت
بو شهریده چوخ آز وار اولسون حیاسی قارداش

ایوای یارالی قارداش (۲)

گتمه کناره قارداش بوردا دایان بیرآز قال
کهف آیه سین دوباره باشلا بوگویلومی آل
ماه منیر زینب ایتمه خسوف ایشق سال
سنلندی کاروانون نور و ضیاسی قارداش

ایوای یارالی قارداش (۲)

بو داش آتان جماعت مندن توان آلوللار
بیر عدّه سی شماتت بیرعدّه کف چالوللار
حیدر آتام یاراسین بوردا یادا سالوللار
اولدی آتام سنون تک دینون فداسی قارداش

ایوای یارالی قارداش (۲)

عرشه چخان بوباشون کامه چاتوبدی قارداش
دین اوسته ماسوانی گوزدن آتوبدی قارداش
مطبخ سراده کوللر اوسته یاتوبدی قارداش
بو باشوون نقدری وار ماجراسی قارداش

ایوای یارالی قارداش (۲)

گوردون دولوبدی قلبیم آلامه بس یارالی
بوکوفه ایچره اولدون سن هم نفس یارالی
قرآن صداسی اولدی فریاد رس یارالی
وار دور تلاوتینده دردیم دواسی قارداش

ایوای یارالی قارداش (۲)

اولدون بو دینه قربان دین اهلی اولسون آگاه
لازمدی هر مسلمان اولسون همیشه دین خواه
دینه خیانت اللر اولسون گرکدی کوتاه
خائن الی اولوبدی دینون بلاسی قارداش

ایوای یارالی قارداش (۲)

یاز زینبون دیلینجه(عدلی)بو نوحه اولسون
بوکاروان ایچینده بیر گل ندندی سولسون
سوایستین زماندا قونداقی قانه دولسون
باشین گورور بالانون آغلور آناسی قارداش

ایوای یارالی قارداش (۲)

اصغرباشین نی اوسته گورجاق دیوری ایوای
گل سینمه صودوم وار گلمور بالا دیوروای
فرض ایلوری قوجاقدا سسلور بالامدی لایلای
آخر سوسوز ویروب جان نازلی‌بالاسی قارداش

ایوای یارالی قارداش (۲)

• پنج شنبه
• 29
• آبان
• 1399
• ساعت
• 20:59
• نوشته شده توسط
• یوسف اکبری

سبک .... ای قلم ... جامۀ عشقوی ... مطهری ...

زینبم درد هجرانه یاندیم
کوفه شهرین پریشان دولاندیم
نیزه ده باشوه داش دگنده
من باخیب گؤزلریندن اوتاندیم

سرزمین محبت سراجی
عشق بازارینون سن رواجی
ان اوجا نیزه دن بیر اشاقه
زینبین وار سنه احتیاجی

باشدا یاره حسین غملی ساعت
سوره کهفی ایله تلاوت
صبر ایدنمور ئورک سن یارالی
من گزم ناقه لرده سلامت

عاشقم باشیمی منده یاررام
قانیلن عشق باغین سوواررام
باش یاراسین بو غملی سفردن
یثربه الده سوغات آپاررام

درد و غم زینبه یولداش اولدی
دوندی اشک تریم قانیاش اولدی
سینه مه کربلا داغ چکوبدی
کوفه کرب و بلادن باش اولدی

کوفه نین ملت بی حیاسی
ائتدیلر بیزلره ناسپاسی
نیزه ده باشوه داش وورانلار
ووردیلار زینبه دیل یاراسی

قافله باشینه کوچه لردن
کول توکور کوفیان غرفه لردن
سن کولی یاره وه مرهم ایله
من دوا آختاریم نیزه لردن

کانال اشعار عباسی معروفان اهری

• چهارشنبه
• 26
• آذر
• 1399
• ساعت
• 22:52
• نوشته شده توسط
• یوسف اکبری

باشه یتوب غائله کربلا
اورداتوکولدی یره خون خدا

دهم عاشوربلا طی اولوب
یتمیش ایکی گللی گلستان سولوب

کامه چاتوب فاسد و سگباز امیر
عترت پیغمبراولوبلاراسیر

کوفیه تاچکدیلر آل اللهی
گتدیله جوشه گینه ثاراللهی

حمله ایدوب زینبه فوج بلا
گلدی خانم کوفیه طوفان سالا

من نه يازوم كوفي نامرديدن
عاطفه سيز لرده دم سرديدن

هر نه يازام كوفه ليدن آزدي آز
اولدولا آيا نجه مهمان نواز

اولدي عوض رسم ورسوم جهان
مهماني داشلور عجبا ميزبان

بيلمورم آيا نه روادور خدا
عترت حيدر ايشيده ناسزا

شادليق ايدور مردم كوي و گذر
بير بيله حالدانجه زينب دوزر

گوردی کی طغیان ایلیور کوفیان
شرم ایلمورملت هرزه روان

غیرت حیدر داماریندا داشوب
رگده كي قاني قيزيشوبدي جوشوب

بیله خانم گورمیه جک روزگار
ترک غلاف ایتدی نجه ذوالفقار

سسلدی ای ملت دون اسکتوا
سیزده مگرذره جه یوخ آبرو

شرم ايدون ای ملت پست و لعین
لقلقه اولموش سیزه قرآن و دین

جیره خور سفره سفيان سوز
فاقد اندیشه و ایمان سوز

جیفه دنیاسیزی کورایلیوب
گوزلروزی فاقدنورایلیوب

بیربیله بی غیرت و عاراولمیون
هرگلن امواجه سواراولمیون

بیرآییلون راه حقیقت گیدون
عترت پیغمبره تعظیم ایدون

جهلیله دین ریشه سینی یولموسوز
نفسوزه ذلتله اسیراولموسوز

زینبم اسطوره صبر و وفا
مخبر اخبار غم کربلا

زینت و آیینه ام و ابم
بنددل فاطمه ام زینبم

زینبم آیینه حریتم
اسوه آزادگی و همتم

زینبم الگوی عفاف وحجاب
گورکیمه سیزخارجی ایتدوزخطاب

خارجی اول زاده مرجانه دی
زانیه دی خانه سی ویرانه دی

خارجي سعداوغلي اونادانيدور
حرمله كافرو شيطانيدور

خارجي شمر شر و بي عاريدور
اخنس بي شرم و زناكاريدور

خارجي اولارديكي قاتل ديلر
بو كسيلن باشلارا حامل ديلر

زاده مرجانه قوروب سیزلری
گرتانیمورسوز تانیون بیزلری

بیزتانیون عترت پیغمبروک
تک تکیمیز مست می کوثروک

منده امیراسرایم بیلون
ناشراخباربلایم بیلون

قارداشیمون یاروفاداریم
بانی فرهنگ عزاداریم

(آذرين) عاشق سن اگرگل يولا
تاسنه زينب اوزي شافع اولا

• پنج شنبه
• 25
• دی
• 1399
• ساعت
• 09:37
• نوشته شده توسط
• یوسف اکبری

وارداولدی کوفیه تا اهل بیت مرتضا
چوخ شماتت گوردیلر دشمندن آل مصطفا
مرد و زن پیر وجوان ایلوبله هرنوعی جفا
دین و ایمان و مروت هیچ یوخیمیش کوفه ده
بی حیا و بی وفا اما چوخیمیش کوفه ده

كيمدي زينب آتش غمدن يانان بير مه لقا
معدن عشق و وفا و عفت و حجب و حيا
بنت ميرمومناندي زاده خيرالنسا
زاده مرجانه ني سركوب ايدوبدي كوفه ده
خصم آل حيدري مغلوب ايدوبدي كوفه ده

كيمدي زينب كوفه ده گورستدي صبر و همتين
اوردا عالم گيرايدوب مظلوم حسينون نهضتين
گورسديب كفره اوزيندن مرتضانين غيرتين
نطق آتشباريلن ايتدي قيامت كوفه ده
دين و قرآنه دوباره ويردي قيمت كوفه ده

كيمدي زينب غصه لردن برگ ريحان تك سولان
قتلگاه كربلاده آغليوب باشين يولان
قارداشين نعشين گورندن ابرباران تك دولان
بوهمان زينبدي كي ايلوبدي طوفان كوفه ده
اسكتوا سسلندي لال اولدي لئيمان كوفه ده

كيمدي زينب رگلرينده غيرت حيدر جوشان
مجلس ابن زياده گلدي چون شير ژيان
سسلدي من زينبم دخت اميرمومنان
گلميشم نطقمله طوفان ايليم من كوفه ده
قالميا تا زاده مرجانه ايمن كوفه ده

زينبم من خواهر شاه شهيدانم بيلون
زاده شيرم سفير عشق و ايمانم بيلون
قارداشيم عباس تك حامي قرآنم بيلون
زاده مرجانه ني ؛ جانه گتوررم كوفه ده
باشينه تختين بونادانين چويوررم كوفه ده

كيمدي زينب فاطمه گلزارينون ريحانيدي
حجت حق گرچه ايللردي اونون گريانيدي
(آذرين)بيل هرچتين دردين خانم درمانيدي
دردوز اولسا دوشميون دنياده چوخ تاب و تبه
سويليون حاجاتوزي صدق دلیلن زينبه

• دوشنبه
• 29
• دی
• 1399
• ساعت
• 15:34
• نوشته شده توسط
• یوسف اکبری

اشتباهی که ائدوب حاکم شوم اموی
ایلدی قتل حسیندن صورا چوخ تندروی
زینبی گؤردی آدامسیز ئوزینی بیلدی قوی
بئله فکر ائتدی قولون باغلاسا خار ایلیه جک
بیلمدی قلبی یانان زینب اونا نیلیه جک

چکیلوب جار غرض کوفه سراسر بزنوب
کاروان اُسرا شهر کنارینده اَنوب
مجلس عامه عجب پرده و مسند دوشنوب
قوشولوب عمدۀ رقاصه خوش آوازه لره
یوز قویوب اهل تماشا هامی دروازه لره

زینبه گلدی گران رقص زنان اُموی
گوردی قول باغلیدی اما دل پرشوری قوی
جوشه گلدی شریاننده کی خون علوی
قیزشوب شیر کیمی اشکیله دولدوردی گؤزون
باشینون قانی آخان حالدا شروع ائتدی سؤزون

دئدی ای امّت پر حیله و روباه مثل
ال آچوب شادلق ائدیرسوز الوز ایکاش اولا شل
عادتوز حیله،ایشوز مکریدی نیرنگ و دغل
سکّۀ قلب کیمی صفر ائلدوز قیمتوزی
سیندیروب بیعتی محو ایلدوز حیثیتوزی

رحم ائدون باشدا اولان تازه یارام خاطرنه
سیزه بِش ایل آتالیق ائتمیش آتام خاطرنه
یالوارون قیزلارا صدیقه آنام خاطرنه
یاره یه طاقت ائدنمز یارا اوستن یارالی
آتماسونلار داش حسینیم یارالی من یارالی

قالمیشام کوفه ده من،واردی روسوموز بو سیاق
سیزون همسایه ده ئولسه صود امر خیردا اوشاق
قوجاقیندا اوشاق هئچ کیم او ائوه قویماز ایاق
یاخشی همسایه ئیدیم منده بو شهر ایچره اگر
نیه پیشوازیمه گلدوز قوجاقوزدا صودامر

او ربابی که گورورسوز باشنا قاره سالوب
اوخلانوب صودامری گول کیمی رنگی سارالوب
صود گلوب دؤشلرینه اللری قوینوندا قالوب
سیزی تاری داخی بسدی بو قدر دیل یاراسی
چکیلوب باخسون اوزاقدان صودامر لر آناسی

• دوشنبه
• 2
• فروردین
• 1400
• ساعت
• 23:44
• نوشته شده توسط
• یوسف اکبری

غم یئمه قارداش سالار دنیایه غوغا زینبون
انقلابِ اعظمه اولموش مهیا زینبون
نیزه دن باخ،قوی توان تاپسون دل آرا زینبون
سیندیرار ظالم لرین تاجین توانا زینبون
لا فتی الا حسین لاسیف الّا زینبون

آگهم چوخداندی اسرار و پیام زلفووه
مرغ روحیم خو تاپوب عالمده دام زلفووه
اگلشوب پیچیده بیرمعنا نظام زلفووه
من کیمین تحلیلگر اولماز قیام زلفووه
موبه مو ایلر بوگون حل معما زینبون

تا عیان اولدی یوزونده ظلم اعدانون یری
زینبه اولدی عوض دردیله درمانون یری
کیم دئیور الان دگول اجرای فرمانون یری
گوردی پیماننامه ده بوشدی بیرامضانون یری
چوبهء محملده ووردی قانلی امضا زینبون

عرصهء محشردی شاهانفخه نفخه صور وئر
اذن پیکاری بو پرچمداره دورا دور وئر
عشق بازارینده جان آل جلوه مستور وئر
نوح سن سن ناخداسن سن فقط دستور وئر
هر قدم خلق ایلسین طوفانلی دریا زینبون

من همان تصویر فریادم واریم صوت جلی
وصل اولوب اندام نطقیمده ابولفضلین الی
ورد و ذکریم یاعلیدور یاعلیدور یاعلی
آب وآتش بیر گونی شایدائده سازش ولی
ایلمز فاسد یزیدیلن مدارا زینبون

من همان شخصم کی بیربیر گورمیشم مکتبلری
بولمیشم شمشیر گفتاریله چوخ مرحبلری
چکمیشم زهراکیمین اوتدان یانان کوکبلری
وئرمیوب دنیا منه بیهوده بو منصبلری
تک باشا گه مرتضادی گاه زهرا زینبون

دشمنیم جاهلدی، جاهل فطرتاً مغروریدور
فطرتاً مغرور اولان،گوزدن ئورکدن کوریدور
اولدوزام تابندیم نقشیم نگاریم نوریدور
شام یوللاری منه منزل به منزل طوریدور
طوریلرده نور تک ایلر تجلا زینبون

باخما بیکس باجوون سئل تک آخان گوزیاشینه
باج وئرمز شیشهء وقریم اِهانت داشینه
عکسیمی گورستسه لر محملده سوز نقاشینه
فکر ائدر نهج البلاغه معجر اورتوب باشینه
معجر آلتیندان ائدر تبلیغ معنا زینبون

خالق یکتا بینمز مسلخینده هر قانی
قان اگر قان اولسا، خنجرده ائدر باور قانی
عین ثاراللهیدور اکبر قانی اصغر قانی
قویمارام یرده قالایتمیش ایکی اطهر قانی
شامیده بیرگون آلار بو قانی یکجا زینبون

بوردا حرمت ساخلیان یوخدی آغارمیش ساشلارا
داش آتورلار باملر اوستن بیزیم قارداشلارا
اذن وئر محکم جوابیه وئریم بو داشلارا
خطبه خطبه یاغدیریم اوتلی گدازه باشلارا
قوی گورک آتشفشان قدرتلیدی یا زینبون

کیم مبارزدی گرک حقدن حمایت ایلیه
قمچیلر آلتیندا قرآندان حراست ایلیه
جان قویا راه وفاده استقامت ایلیه
ایستسه دشمن منی تسلیمه دعوت ایلیه
صورتِ ظلمه وورار بیر سیلیِ لا زینبون

دردینه هئچ کس قولاق آسماز غریب و بیکسین
سن ائشیدورسن فقط بو چیرپینان قلبین سسین
روشن ائتدون گوزلرین بو خواهر دلواپسین
خوش گلوبسن سایووی آلله باشیمدان کسمه سین
مقدمونده جان وئرر مین یول بو شیدا زینبون( لافتی الا حسین لاسیف الازینبون )

یاخچی گلدون سرفراز ائتدون بو پوزقون گلشنی
اشکِ حسرتلن لبالب دی گلایه دامنی
چوخ داریخمیشدیم ایکی گوندی گورنمیدیم سنی
نیلیوم هجرانه عادت وئرممیشدون سن منی
قالمامیشدی عمریده بو قدری تنها زینبون

یولدا یاغدی سینهءبیماریمه بیر بیت شعر
ساطع اولدی هرقدم افکاریمه بیر بیت شعر
توشه گتدیم کوفه ده دلداریمه بیر بیت شعر
حک ائدوب هرقمچی بوقوللاریمه بیر بیت شعر
پیکرینده حمل ائدور اشعار زیبا زینبون

کربلادن ایلمیشدیم دلده پنهان نذریمی
شکر اولا ائتدیم ادا محملده الان نذریمی
باشیمی یاردیم قبول ایله حسینجان نذریمی
آزدا اولسا چوخ حساب ایله پریشان نذریمی
ایلدی ئوز عهدینی عالمده ایفا زینبون

گوزلرونده اگلشن کولدی اخا یا سُرمه دی
کیم چکوب بوسُرمه نی قارداش نه زیبا سُرمه دی
هانسی بزمه دعوتیدون گورنه اعلا سُرمه دی
قاش گوزون، زلفون، دوداقلارون سراپا سُرمه دی
بزم الفتده اولوب محو تماشا زینبون

هانسی صاحبخانه بو دقتله مهمانین بزَر
کیم مگر خاکستریلن جلد قرآنین بزَر
کیم تنور ایچره رخ خورشیدتابانین بزَر
خولی بیلمزدیم بئله مهمان عطشانین بزَر
بو بزَنمیش باشوه قرباندی شیدا زینبون

ماتمونده ساخلارام بو گوزلری پیوسته،تر
خستیم اما ربابین حالی مندن خسته تر
هر قدم اولموش رقیون عشقوه وابسته تر
نیزه بانه یالوارور نولار بیر آز آهسته تر
بو قیزون احساسینه حیراندی دانا زینبون

• سه شنبه
• 24
• فروردین
• 1400
• ساعت
• 16:07
• نوشته شده توسط
• یوسف اکبری

کوفه ليلر داش آتميون ➖باشي بلالي زينبم
آرخام ئولوب ائليم ئولوب➖ ياسلي،عزالي زينبم

چوخ منه طعنه وورميون➖عالمين افتخاريم
عزّتيمي الوب فلک ➖محنت و غم دچاريم
خاتم الانبیا قيزي ➖فاطمه يادگاريم
ابطحی یم ،حجازيم➖کرب و بلالی زينبم
باشی بلا لی زينبم

من بو سنق کجاوه ني➖کاخ يزيده ساتمارام
بش گونون عیش و نوشينه ➖دينمي گوزدن اتمارام
عصرين امامين ئولدوروب➖وز و وباله باتمارام
ديننه جان فدا ائدن➖عهد و وفالي زينبم
باشی بلالي زينبم

گردنيمون طنابيني ➖طوق طلايه وئرمرم
قيد اسارتيمدي بو ➖باد فنايه وئرمرم
اهل ولا بلا سوور ➖ لا بو بلايه وئرمرم
رختي عزالي زينبم➖ بختي قرالي زينبم
باشي بلالي زينبم

شکر خدا سالوب قضا➖گردنيمه طناب عشق
پرده به پرده کشف اولور➖منظريمه حجاب عشق
يوزده بو قانلي ساچلاري ➖ايلمشم نقاب عشق
نابغه ام محجّبه ➖شرم و حيالي زينبم
باشی بلا لی زينبم

کوفه نین اهلی من بش ایل ➖درس حیا دئديم سيزه
گولميون آل عصمته ➖ ايلميون جفا بيزه
گون دولانوب قوناق گلوب➖شاه مدینه شهروزه
ايمدي باشمدا معجريم ➖يوخدي نحالي زينبم
باشی بلالي زينبم

اون ايکي مين مدينيه➖نامه کتابت ايلدوز
قارداشيمي نه عجزيله➖کوفيه دعوت ايلدوز
ائولريزي خراب اولا➖ياخشي ضیافت ايلدوز
سیز کيمي بی وفالرين ➖غرق ملالی زينبم
باشی بلالي زينبم

نور حسيندي ايلين ➖مات کلیمی طورده
قارداشيمون فضائلي➖وار کلمات نورده
هانسي قوناق ياتار گجه➖صبحه کيمي تنورده
ساچلاري زلفی ،اللري ➖قانلي حنالي زينبم
باشی بلا لی زينبم

آغلا "کريميا" غم کوفه و شام زينبه
اغلار امام عصر ئوزي صبر و دوام زينبه

• یکشنبه
• 9
• خرداد
• 1400
• ساعت
• 16:44
• نوشته شده توسط
• یوسف اکبری

حضرت زینب(س):
مطبخ کی حسینیم سنه بیت الحزن اولدی
آیا ده گوروم یانیوه هچ بیر گلن اولدی؟
یا قانلی کولی قانلی گوزوندن سیلن اولدی؟
اما گجه نی صبحه کیمی یاتماموشام من
گوزدن باجون ءاولسون حرمین آتماموشام من

امام حسين(ع):
خولی باجی جان دینینی دنیاسینه ساتدی
قویدی منی مطبخده اوزی قصریده یاتدی
یاتموشدوم او حالیله ننم گلدی اویاتدی
سسلندی حسین عترتیوی گوزدن آتوبسان
پیغمبرین اوغلی نیه مطبخده یاتوبسان؟

حضرت زینب(س):
نه حالیده گوردون ننمی ای شه خوبان
شرح ایت باجووا شادیدی یا دیده سی گریان
سویله ننمون حالی نجیدی سنه قربان
سنموش قولون آیا یارالی سینه ده گوردون
سندن دانشوب گولدی و یا غمزده گوردون

امام حسين(ع):
ای مهر و وفاده منه زهرایه برابر
زهرا یوزی گولمز نه قدر وار بو ستملر
پهلو سینه قویموشدی الین زار و مکدر
ناراحتیدی چون در و دیوار اثریندن
اوپدوم یارالی سینه ده مسمار اثریندن

حضرت زینب(س):
سنسن یارالی نی ده کسوگ باشلارا سرور
باشون الیوب کوچه و بازاری منور
سقا باشی اما آرادا یوخدی برادر
چوخ ایستیورم ماه بنی هاشیمی قارداش
دوزمور اورگیم ایستوری قارداشیمی قارداش

امام حسين(ع):
هچ کیم اونون احوالینی مندن صورا بولمز
بیر باش کی او حاله قالا نی ده دورا بولمز
چون قاتل اونی گوردی جدایه وورا بولمز
قویدی یارالی نعشینی میدان آراسیندا
شامه آپارور باشینی قلخان آراسیندا

• یکشنبه
• 9
• خرداد
• 1400
• ساعت
• 17:28
• نوشته شده توسط
• یوسف اکبری

بودي کوفه شهر اعظم آتامين دیاری قارداش
دئميشم علوم قرآن بش ایل افتخاری قارداش

بو خانملارا حسینجان بش ایل ائتميشم خدارت
چوخي آرزو ائدردي منی ايلسون زیارت
تانورام چوخون گورنده چکورم اودور خجالت
توکورم خجالتيمدن يوزه زلف تاری قارداش

ايکي دفعه قسمت اولدي باجووا ورود کوفه
بيري گلستان بختيم گل آچوب ويروب شکوفه
بيري ايمدي طالعيمده قمريم دوشوب خسوفه
دايانيدي گردشيندن بئله روزگاری قارداش

بو دياردن او گئچمش گونومين صفاسين آلاّم
او محلّیه باخاندا آتامين صداسين آلاّم
او نه کولدي گُل يوزونده گوزيوين قاداسين آلاّم
يتشيدي ال سيليديم او قاني غباری قارداش

سالورام خياله قارداش آتامين او باش ياراسين
الیم اسدی باغلياندا نه ياواش ياواش ياواش ياراسين
گتور ايمدي باغليوم من آنام اوغلي داش ياراسين
یارا باغلاماق اولوبدي باجووين شعاری قارداش

بولوسن غم آتشينده آلشان سمندرم من
بولوسن بابام ئولندن بئله قاره معجرم من
هاني یدّی قارداشيمدان بيري زار و مضطرم من
باجووين گئدوب وقاری کسيلوب قراری قارداش

نقدر تفاوت اولدي بو ايکي سفرده اما
او زمان کجاوم اوسته گُل آتاردي پیر و برنا
باشيما توکولله کوللر داش آتولاّر ايمدي اعدا
او گون اختیاری گلديم بو گون اضطراری قارداش

بو ديارين اهلی قارداش نجه بيوفائمشلر
ها می ظاهرا مسلمان نجه باصفائمشلر
يوخومش بولاردا ایمان بئله بيحيائمشلر
ايکي اوزلي لردي آتمش هامي شرم و عاری قارداش

• یکشنبه
• 9
• خرداد
• 1400
• ساعت
• 17:42
• نوشته شده توسط
• یوسف اکبری

حسین عجب منه برپا قیامت ایلموسن
جدا باشندا یارالی اقامت ایلموسن

منیم ایشقلی آییم بس هایاندا باتموشدین
گیچن گجه باجوی سن گوزوندن اتموشدون
منی گوزوندن آتوب کوللر اوسته یاتموشدون
عجب گیچن گیجه نی استراحت ایلموسن

یوزنده کولدن علامت قالور گیچن گیجه دن
سنی خیاله باجون چوخ سالور گیچن گیجه دن
بو شهرده آنام عطری قالور گیچن گیجه دن
یقین آنامی گیجه سن زیارت ایلموسن

سزادی ویرسم اجازه بو قانلی گوز یاشینا
منیم کیمی باجی حسرت قالوبدی قارداشینا
او نیزدن باشون ای بیر قویوم اورک باشینا
گر اولسا ممکن حسین چوخ کرامت ایلموسن

اگر چه خولیه سن اولموسان حسین مهمان
منیمده منزلیم اولدی گیچن گجه زندان
ولی سنون غمون آرتوخدی من سنه قربان
کولیله صبحه کیمی انس و اُلفت ایلموسن

عبث دگول شرر درد و غمله اودلانورام
وار عمده علّتی قلبمدن اود دوتوب یانورام
شماتت ایلین عورتلرین چوخون تانورام
بو حال زاریمه هیچ سن نظارت ایلموسن

بلای حاله یانوم یا جلال ماسبقه
اوجالسون آتش آهیم شراری نه طبقه
ویرور بر عده سی آل پیمبره صدقه
دین تاپلموری آرتوخ جسارت ایلموسن

بو بس دگول آلوب اطرافی صف به صف اعدا
الینده قمچی ایدور آل عصمته ایذا
ویرور بیری بالا قزلاره نانیله خرما
بیری دیور که عجب قصد غربت ایلموسن

• دوشنبه
• 10
• خرداد
• 1400
• ساعت
• 16:27
• نوشته شده توسط
• یوسف اکبری

دریای غمده غوطه ورم ایلورم فغان
درد و غمیم باشیمدان آشوب قالمیوب توان

قلبیم یانور دوباره دوشوب کوفه یادیمه
اشکیم سولان یوزومده اولوب سیل تک روان

وارد اولاندا شهره اوگون کاروان غم
پیشواز ائدوبله جور و جفائیله کوفیان

ال چالدیلار شماتت ائدوبلر اسیرلره
تیر غمه غم اهلی گنه اولدولار نشان

غرق محنلرین باشینا کول سپوپدیلر
یازدیم عیان اولا بو محن قالمیا نهان

گوللر سارالدی سولدی جفای زمانه دن
گویا اسوبدی شهریده بیر صرصر خزان

دیل یاره سی ووروبدولار اوغلی ئولنلره
طاقت یوخومدی اولدی نلر ایلیم بیان

غم چکدیلر غم اوستن اودم غم کشیده لر
غمدن یانوبلا یکسره اول داغ دیده لر

بولمم ندندی کوفه ده مهمانی ووردولار
دینین آدیلا صاحب ایمانی ووردولار

سجده ائدن جماعته باخ حی داوره
ظلم ایلیوبلر عاشق جانانی ووردولار

مسلم قویوبلار آدلارینی ظاهراً ولی
ظالم اولوبلار اصل مسلمانی ووردولار

رحم ائتمیوبله کوفلیلر آل حیدره
قولاری باغلی جمله اسیرانی ووردولار

آخدی سرشکیلر یوزه جور زمانه دن
قارداش غمینده دیده سی گریانی ووردولار

گون تک ائدوب تجلی حسینون کسیک باشی
نیزه باشیندا مهر درخشانی ووردولار

کهف آیه سین تلاوت ائدنده شهید عشق
داش قلبیلر او قاری قرآنی ووردولار

بیر کیمسه اولمادی دیه اول ظلم ائدنلره
یولدان چیخوب طریق جفاده گئدنلره

بسدور جفا که معدن ایمانی وورمویون
اوغلی ئولوبدی شاه لب عطشانی وورمویون

آخر ندندی حی ازلدن اوتانموسوز
ظلم و ستمله حجت یزدانی وورمویون

قرآن تلاوت ایلیوری شاه مشرقین
شرم ایلیون او ناطق قرآنی وورمویون

حرمت ائدون بویوردی پیامبر قوناقوزه
مهمان گلنده شهروزه مهمانی وورمویون

اولسا عزالی کیمسه اونا تسلیت دیون
غرق ملال و دیده سی گریانی وورمویون

زینب عزالیدی که ئولوب یدی قارداشی
قدی کماندی حالی پریشانی وورمویون

دریای غمده غرق اولانون گویلونی آلون
غملر یوراندا دردی فراوانی وورمویون

شرم ائتمیوبله لیک جفا اوسته دوردولار
(سالک) او شهر کوفه ده مهمانی ووردولار

• یکشنبه
• 23
• خرداد
• 1400
• ساعت
• 19:18
• نوشته شده توسط
• یوسف اکبری

ای ائدن نیزده عالملری حیران یارالی

اوخی قرآن اولا زینب سنه.قربان.یارالی

اوخی قرآن یارالی(۲)

اوخی.قارداش.او،اوجا.نیزده قرآن.اوجادان

تا ائشیتسین.سسیوی.شهرده.هر.پیروجوان

بلکه قرآنلا سینا شهرده جو خفقان

اویاناکوفه لی.غفلت یوخوسیندان.یارالی

اوخی قرآن یرالی(۲)

اوخی قرآن او،اوجا نیزده تا کوفه لیلر

نخل دینه بیله لر کیمدی پسندیده ثمر

اوخ قرآن،اوخی کهف آیه سین.ای.ماه.ظفر

بلکه بیدار اولا بو امت قرآن یارالی

اوخی قران یارالی(۲)

• یکشنبه
• 6
• تیر
• 1400
• ساعت
• 11:59
• نوشته شده توسط
• یوسف اکبری

نیزه باشینده حسینجان اوخی قرآن یارالی
او گوزل نطقووَه زینب اولا قربان یارالی

منده زهرا قیزیام حق سوزی عنوان ائدرم
نُطق پُر شوریمیله کوفه نی ویران ائدرم
دِیَرم سن دِیَنی ، عالمی حیران ائدرم
قویمارام تا هَدَر اولسون بِله بیر قان یارالی

نیزه باشینده حسینیم گورورَم قانون آخار
زینبونده باشینا تازه آخان قانی یاخار
گوزلرون گَه منه گَه فرقهء عدوانه باخار
داش آتانلار نجه گور ایلوری طغیان یارالی

دَف چالانلار سوزی ائتمز بو اِرادمده اثر
ائدرم نیزه ده قارداش سر پُر شوره نظر
بَلَشوبدور کوله باشون نَدن ای قرص قمر
هانسی ظالم باشووی ایلدی مهمان یارالی

دستگیر اولدی اَخا بو صف اَغیاره باجون
فاطمیله دولانوب چوللری آواره باجون
دردین اظهار ائلیر حضرت داداره باجون
چاره سیز دردیمه تا ایلیه درمان یارالی

• دوشنبه
• 14
• تیر
• 1400
• ساعت
• 11:24
• نوشته شده توسط
• یوسف اکبری

نیـزه باشیـــندا اوخــی قرآن حسین
کفره ایله حق سوزون اعلان حسین
ای ذبیــح اشقــیا
نطقوه زینب فـدا

قانلی باشون کوفده اعجاز ایدوب
حق کلامــین نیــزده ابــراز ایدوب
اهـل عشقه باب رحمت بـاز ایدوب
من حجــازی لحنـوه قربان حسین
ای ذبیــح اشقــیا
نطقوه زینب فـدا

سوره کهفـی اوخــورسان دشمـنه
گوستـــرورسن دوزیـولی اهریمنه
زینبون اولسون ویرولارداش سنه
هتک حرمت ایلیور عدوان حسین
ای ذبیــح اشقــیا
نطقوه زینب فـدا

ای رضــــا حـــکم قضــــایه برملا
ذکـــــــری هـــردم البـــلا و للــولا
ذبح اولان باشی سوسوز یوم بلا
حجت حق شاه مظلومان حسین
ای ذبیــح اشقــیا
نطقوه زینب فـدا

• دوشنبه
• 11
• مرداد
• 1400
• ساعت
• 11:09
• نوشته شده توسط
• یوسف اکبری

اَهل کوفه گوردیلر بیر کاروان غم گلور
زینبِ کُبرا حسینه ساخلیوب ماتم گلور

زادهء مرجانه دن بیر حُکم اولوب عالم یانوب
بو مصیبت ده نه یا لقوز زینبِ کُبری یانوب
قلب هاجَر خاطرِ اِنسیّهء حورا یانوب
زلفینی سارا یولار هم شیونه مریم گلور

بی حیالر اِیتدیلر بیر مجلس عشرت بنا
قوردولار اسباب نَردی ظلمی له اَهل جفا
حکم ایدوب گلسون گرک بو بزمه آل مُصطفی
آه او دَم دن عترتِ پیغمبرِ خاتم گلور

باخدی زینب مجلسه گوردی دوروب بیگانه لر
شمعه یان دوردی اوزون گورجک یانان پروانه لر
سالدی غملی خاطرینه اوزگه بیر غم خانه لر
گزلنوب عورت ایچره گوردی نامحرم گلور

زادهء مرجانه بو اوضاعی دن آلدی خبر
کیم دی بو عورت که عورتلر ایچنده گزلنر
دیدیلر بنت علی دور زینبِ خونین جگر
سرّی وار گوزیاشی گوزدن صورته هر دَم گلور

زینبین آدین ایشیتدی سویلدی گورکیم نِیدوب
شکر اولا خلّاق عالم سیزلری رُسوا ایدوب
زینبین کلاً قرار و طاقتی اَلدن گیدوب
غصّه اُستن غصه پی در پی غم اُستن غم گلور

سویلدی لال اول شقی اولاد پیغمبر بیزوُق
زُهرۀ زَهرا آنام دور زادهء حیدر بیزوُق
جمله اهل کایناته هادی و رهبر بیزوُق
باش آچوب حوّا یانیم جا حضرت مریم گلور

فانی دور دنیا (ثریا) عمریده یوخ اعتبار
چوخ عزیزی عاقبت ناکام ایدوب بو روزگار
بو یولی چوخ طی ایدر عالمده هر خرد و کُبار
کاروان مرگ بیری آخر بیری اقدم گلور

• پنج شنبه
• 18
• شهریور
• 1400
• ساعت
• 19:47
• نوشته شده توسط
• یوسف اکبری

ای شاهِ دادگستر وی دادخواه زینب
بیر عشق پاک اولوبدی والله گناهِ زینب

بی رنگِ رنگِ رنگم رنگِ غمه بویانّام
پروانه تک شرارِ حسنونله منده یانّام
یانّام کُول اولّام آخر رُخسارون اوسته قونّام
سنله دوباره یانّام ای پادشاهِ زینب

شَطرنجِ روزگاری گزدوق جا خانه خانه
رُخ تُوپراق اوسته قوی دوم هر یاندا یانه یانه
گوز یاشیمی الردیم توپراقه دانه دانه
تا دانه دانه اشکیم اولسون گواهِ زینب

باشون کسیلدی باشدان باش سیز عیالون آتدون
ای کُوله بار مُحنت سن زینبی قوجات دون
قارداش نجه اولدی آخر مَطبخ سَراده یاتدون
کُول هاله سینده قالدی رُخسارِ ماهِ زینب

ای علّت هر علّت معلول دست علّت
وَحدتده رَمز کِثرت کِثرتده رَمز وَحدت
سال باشی مه جدادن ظِلّ ظلیل عِزّت
شاید سَعادت اوُلسون هَمراهِ راهِ زینب

مَخمورِ جامِ عشقم سر مست و سرگرانم
اِی جان جانِ خلقت ظلمی له نیمه جانم
اِی گل بُوداقون اوُسته بیر مرغِ نَغمه خوانم
سالمیش چَمنده شورش شورِ و سه گاهِ زینب

مَحملده مَکتب آچموش آموزگارِ دَینم
هر چند اَسیرم امّا عزّ و وِقارِ دَینم
تاریخِ کربلاده من اِفتخارِ دَینم
قرآن سسوندی قارداش چون تِکیه گاهِ زینب

دُرِ یتیم اَشکی سیمابِ عشقه قاتدیم
سیمابهء مُحبّت سیمابِ عشقه ساتدیم
بو کوفه ده حسین جان زندان اِیچینده یاتدیم
هر تیره شَبده مِثلِ بَختِ سیاهِ زینب

دلدادهء فقیرم بُو فقره نا گزیرم
صَد حِیف دَستگیرم شام اَهلی نه اَسیرم
هر چند اَسیرم اَمّا من شیر زاد و شیرم
طُوق اِسارت اولموش بُرهانِ جاهِ زینب

هر شِی فَنادی فانی روحِ مُجرّد اوُلماز
دنیانی طَرد قیلّام قلبیم مُردّد اوُلماز
قید غمه مُقیّد قیده مُقیّد اوُلماز
ئولسم دَه هرگز ئولمز فانوسِ آهِ زینب

(هادی) فَنای اِنسان اَنگیزهء بَقا دور
بیمارِ عشقه هم دَم اَندوه نِینوا دور
گر آرزوی قلبون صَحرای کَربلاده دور
اُمیدوارون اِیتسون اُمیدگاهِ زینب

• پنج شنبه
• 18
• شهریور
• 1400
• ساعت
• 19:58
• نوشته شده توسط
• یوسف اکبری

نیزده قارداش باشون ایلور تجلّا زینبه
گوسترور هر جلوه‌سیندن مین تسلّا زینبه

پرتو انور حقدن نوک نیزه‌ طوریدی
طورده موسانی حیرتده قویان بو نوریدی
لفظ «اَرنی»‌دن کلیمه نور حق منظوریدی
«لَن» تَرانی سویلین اولموش هویدا زینبه

نیزه‌ده باشون گورن ای مظهر حیّ وَدود
سویلوری عیسادی بو داره چکوب قوم یهود
شعلۀ آهیله وورسا مشعل خورشیده دود
وار یری دُوردومجی گؤیدن باخسا عیسا زینبه

ای هلالی زینبون وی صورتی بَدر تمام
ایله‌موشدون بو گیجه یوخسا کول اوستونده مقام
تازه آی تک گوسترولّر بیر بیرینه خاصّ و عام
باشووه خلق ایلور ایما باشون ایما زینبه

تئز گلیدون پیشوازه سن گرک قالدون گیجه
قالموشام حیرتده من بولمم گونوزدور یا گیجه
گون ندور اولسا گیجه گوندوزدور آی چیخموش نیجه
اولساگر گوندوز ایدوب غم لیل یَلدا زینبه

ای هدایت اهلینه مصباح ذات ذوالمِنَن
نه دیوم نه چکموشم شام غریبانوندا من
روشن ایتموشدون گیجه خلوتگه اغیاری سن
بیر قرانلوق خیمه اولموشدی مصلّا زینبه

ای جمال اللّهه مَظهر وجهی وجه باقیه
میندیروب عشقون منی قول باغلو عریان ناقیه
عشق اولا بو بادۀ عشقی ایچوردن ساقیه
ایله مست ایلوب گلور غملر گوارا زینبه

ایمدی تبلیغات ایدوردوم خلقه اصل مذهبی
تاسسون گلدی گلوگیر ایتدی غصّه زینبی
سن دانیش زینب دلون قربانی آندور مطلبی
خارجی آد قویماسون بو قوم اعدا زینبه

ایله محو ایتدون منی بیر جلوۀ دیدارده
اوزلوقومدان خارج ایتدون مجمع اغیارده
باشون آردینجا دولانّام کوچه و بازارده
عالم عشقونده خوشدور هر بلایا زینبه

هاشمیّانه آچوبلار ظلم اَلین اهل جفا
گه دوگولّر قیزلارون گاهی دیولّر ناسزا
بیر نفر یوخ دادرس ناچار ایدولّر اِلتجا
گه رقیّه گه سکینه گاه لیلا زینبه

فکریمه ایتمزدی هیچ بو ماجرا قارداش خُطور
سن اؤلرسن زینبین باغلار قولون قوم شَرور
ایلر اهل کوفه‌دن بو پایه‌ده کینه ظهور
کف چالالار طعن ایدلّر دُخت‌زهرا زینبه

زینبون دیندیرمسن دیندیرمه قوی پژمرده حال
اوز قیزوندور فاطمه باری دانیشدیر گوگلون آل
آز قالور قلبین اریتسون غصّه ایتسون ارتحال
بو صغیره دردی اولسون درد عُظمی زینبه

ایتمورم یالقوز منِ بیخانمان نی‌‌تک نوا
هاردا بیر اوغلی اؤلَن وار دلشکسته بینوا
ییِغمیشام اطرافیمه منلن اولوبلار همصدا
آغلیاندا سس ویرور بیر دسته ثَکلا زینبه

ایلین گونلر آتام حیدر خلافت کوفه‌ده
خدمتیم اولموشدی اهل شهره عادت کوفه‌ده
ایمدی ایلولّر منه قارداش شماتت کوفه‌ده
تنگ اولوبدور چشم سوزن‌تک بو دنیا زینبه

ظاهراً گر چه اسیرم دستگیرم بیقرار
باطناً امّا خوشام چون ‌وار رضای کردگار
صورت مکشوفه‌لرده معنی توحیدوار
بو اسارت گوسترور صورتده معنا زینبه

ای (حسینی) چوخ مقدّسدور بو زینب ساحَتی
غصّه‌دن مین ایل گیچوب عمرونده هر بیر ساعتی
هر کیمون اولسا بیوک دردی چتین بیر حاجتی
صدق اوزیله یا حسینه آغلاسون یا زینبه

• پنج شنبه
• 18
• شهریور
• 1400
• ساعت
• 20:05
• نوشته شده توسط
• یوسف اکبری

گون باتمادان گیچن گون بنزردی آیه باشون
دشمن ایوینده یاتدون دوشدی بلایه باشون
ایکاش گیتمییدی مطبخ سرایه باشون

شوریده سر باشوندا بیر آتشین شرر وار
بیر جذبه بیر کشاکش بیر عالم دگر وار
یوخسا تجلّیات دلداردن خبر وار
چیخموش سر سنانه سیر و ثنایه باشون

گیتمه دیدیم گوزومدن باش دوتمین سوز اولدی
گیتدون صباح اولونجا بیر محنتیم یوز اولدی
وار شکری صبح آچیلدی گون چیخدی گوندوز اولدی
ایتدی بیزی مشرف فیض لقایه باشون

صبح اولدی گلدی باشون گون چیخدی منزلیمده
قندیل نور آسیلدی ایوان محفلیمده
شأن شریفه لایق بیر تحفه یوخ الیمده
لطفا عنایت ایلر بو خاکپایه باشون

بیر باش که واردی وصفی الله نور ایچینده
یاتمازدی مهد ناز دامان حور ایچینده
بو باشه نه روادور یاتسون تنور ایچینده
ایتدی نجه تحمّل بو ناروایه باشون

عشقون گذشتی چوخدور جاندان گیچن دل اوسته
قویماز ره وفاده باش بستر گل اوسته
امّا یارالی بیر باش هاردا یاتوب کل اوسته
آرتوردی بو گذشتی رسم وفایه باشون

گون تک گیدردی باشون شامه ایکیندی چاقی
شام اولدی یاندی سوندی پیغمبرین اوجاقی
وقتینده یتدی داده صدّیقه نون قوجاقی
مین جان ایدردی قربان بیر لایلایه باشون

حقّا که معجز ایلر آغوش گرم مادر
گوردون آنا قوجاقین گلدون دله برادر
غم قویدی غملر اوسته شرح حجاب و معجر
خوش تسلیت ویروبدی خیرالنسایه باشون

بیر اربعین بو باشین دورینده جان نثارم
تا خادم حضورم خوشبخت روزگارم
افسوس باقی عمر هجران الینده زارم
من یثربه بشیرم کرب و بلایه باشون

بیر گونده مین یول ایستر گون باشیمه دولانسون
یانمیش جمالی گورسون باخدوقجا جانی یانسون
توپراقلارا دوشنسون سایمده دالدالانسون
سایمده وار بو عزّت سالدوقجا سایه باشون

بیر جذبه بیر توجّه بیر برق نور ایمان
کافیدی پیر دیری ایتسون رهین احسان
سندن عجب دگول ای سرّ بُطون قرآن
ترسانی ایتسه تبدیل بیر پارسایه باشون

سرّ بلا یازیلمیش بیر سطر مشق ایچینده
دردآشنا گورر بو سرمشقی عشق ایچینده
بیجا دگول برادر شام و دمشق ایچینده
بیر بیر گزر چکر باش هر ابتلایه باشون

سرگرمی تنوری هرگز من ایتمرم فاش
صبر ایلیوب دایانّام هر بیر بلایه قارداش
امّا حرم لرونده نه ال قالار نه ده باش
قویسا اگر ایاقین طشت طلایه باشون

(هندی) الینده توشه برگ خزان آپاردی
برگ خزانی یولدا باد وزان آپاردی
صافی دیوبدی گرچه نوحه یازان آپاردی
کلّا شفاعت ایلر اهل عزایه باشون

• سه شنبه
• 13
• مهر
• 1400
• ساعت
• 14:54
• نوشته شده توسط
• یوسف اکبری