چه چیزی را میخواهید جستجو کنید؟
گرچه یوز میندی انبیا سن بیر
صفراولار یوزمین اولماسون گرسن
هب لنامن لدنک یامولی
که رفیع وشفیع ویاورسن
سن بیل اصغر توجّه ایله منه
بیلورم اصغری چوخ ایسترسن
دوزدی من بیر غبار ناچیزم
سن ولی شمس مهر پرورسن
ناری نور ایلین گوزل سن سن
روحی مست ایلین غزل سن سن
کیم سنی بیریول ائتدی یادحسین
یتمیش ایل ایلدی جهاد حسین
یانان ئورکلره آه و نوا گلور،نه گلور
گئنه ده قافلهٔ کربلا گلور،نه گلور
قناری لر نِئجه آزاد اولوبلا محبسدن
ترانهٔ غم اوخور جا به جا گلور نه گلور
نِئچه قانادی سینان قوشدی آب ودانه گزور
قدَر بلا یازیب حکمِ قضا گلور،نه ،گلور
کبوتران حریم ایچره بیر هما گؤرونور
یارالی شهپریلن پا به پا گلور،نه،گلور
همایِ اوجِ شهامت چیخیب اسارتدن
اولوبدی فوجِ ستمدن رها گلور نه گلور
قلم رها اِئله بو استعاره تشبیهی
گؤر ایندی فیضِ براتِ خدا گلور نه گلور
قطارِ عشق،گلور اربعین زیارتینه
بیرعدّه بیکس و بی اقربا گلور نه گلور
او کاروان کی اولوب آیلار آیریسی یِئنه ده
دیارِ عشقه طرف آشنا گلور نه گلور
اولوبدی زینب کبریٰ امیرقافله سی
زمینِ کرب و بلایه صفا گلور نه گلور
اِئدیبدی طیِّ منازل وصالِ یاره گؤره
هامیسی عهدینه اِئتسین وفا گلور نه گلور
بیری الینده نشانه سوجامینی گتیریر
باشیندا واردی درین ماجرا گلور نه گلور
بیری عمامهٔ خونین بیری یانان معجر
ئورکده واردی غمه ادّعا گلور نه گلور
عمامه نی گتیرن وای اوغول دِئییورآغلور
بیری دیلینده دئییور وا اَخا گلور نه گلور
بیری دئیولَّه کی بیرقانلی پرچمی گتیریر
نشانِ صاحب مشک و لوا گلور نه گلور
کی،یعنی قارداش علمدار پرچمون گلدی
بو پاره مشکووه تیرِ جفا گلور؟نه گلور؟
بیرینین الده نشان خیردا گاهواره سی وار
دیلینده وِردِزبان وای بالا گلور نه گلور
دئییردی گل بالا گهوارووی گتیردی آنون
بو غمده نالییه ارض و سما گلور نه گلور
او ارمغانلار ایچینده چوخییدی گؤز داغی
ولیک بیر سؤزه گؤزدن بکاء گلور نه گلور
او بیر نشانه نی زهرا اؤزوْ بگنمیشدی
نشان حضرت خیرالنّساء گلور نه گلور
اوقانلی کؤینگی زینب آلیبدی اللردن
مثالِ تحفه او کان وفا گلور نه گلور
حسین مزارینه بیرطُرفَهْ ارمغان گتیریر
امیرِعترتِ آلِ عبا گلور نه گلور
سئنیب اگرچه گلَنْ لشگرین جَناحِیني
بَناتِ غمزهٔ مصطفا گلور نه گلور
او دورت مین اوخ توخانان کؤینگی خانم زینب
باسیبدی باغرینا چوخ بی ریا گلور نه گلور
یارالی قارداشینا گوئیا کفن گتیریر
ئورکده چوخدو ساغالماز یارا گلور نه گلور
دِئییرکی قارداش حسین زینبم وفالی باجین
ساغالمییان یارام آلسین شفا گلور نه گلور
قالاندا بیرنِئچه فرسخ مَطافِ عشّاقه
نسیمِ عطرِ گلِ جانفزا گلور نه گلور
دانیشدی اؤز اؤزونه ناگهان خانم زینب
سؤاله ساجدِ آلِ کِساء گلور نه گلور
بویوردی،عمّه نه احساس اوز وِئریبدی سنه
جوابه شیرزن کربلا گلور نه گلور
اوغول بویِئر دییه سن کربلادی من بیلیرم
بو سرزمینِ بلادن نوا گلور نه گلور
بو سَسْ کِاَنَّ یارالی حسینیمین سسیدیر
علاوه عطرِ بهشتِ خدا گلور نه گلور
وفالی عمّه سینه تسلیت دئییبدی امام
حرملر آغلادی وا حسرتا گلور نه گلور
آتیبدی محمیلین اوستن یِئره اؤزون زینب
دیلینده کلمهٔ وا غربتا گلور نه گلور
«ترابِ کرب وبلاده ابو تراب قیزی»
«سوروندی یِئددی قدم شاهِ نُهْ قباب قیزی»
دئییردی یاره لی قلبیم دؤنوبدو قانه حسین
فدا بو جانیم اولا سن یاتان مکانه حسین
باجین دویونجا سنه آغلییانمییب، یارالی
سَپَر گؤزوم یاشی سو آتشِ نهانه حسین
اجازه صادر ائله زینبین دیله گلسین
سن آغلاما ولی بو غملی داستانه حسین
اسیرِ عشقین اولان زینبی قولی باغلی
سالیبدی چؤللره بو گردش زمانه حسین
سنین یولوندا مصیباته بیر به بیر دُؤزدوم
وورولدی قولاریما چوب و تازیانه حسین
هدف مقدّسی دی قویمادیم قانین باتسین
کمالِ همّتیلن دؤزدوم امتحانه حسین
گتیرمرَم دیله هردرد و محنتی قارداش
ئوزون توجه ائله خسته،میهمانه حسین
فقط،بونو دئییرم اینجیدیم شماتدن
ئورکده طعنه لی سؤزلرچکیرزبانه حسین
ورودِ کوفه ده اَل چالدی ئوزکنیزیلریم
اوجالدی سینه ده کی آهیم آسمانه حسین
او ساعتیمده تلاوت اِئدیردین آیهٔ کهف
یارالی باشین اولوب داشلارا نشانه حسین
دَگنده آننووا داش منده باشیمی یاردیم
بوتون حرملرین آغلاشدی،یانه یانه حسین
چکنده نظمه مصیبتلرین «قیزیل قلمین»
یقین کی گؤزیاشی تبدیل اولوردی قانه حسین
بو بیر سلطاندی که اجلالینه اجدادی والهدی
ایکی عالم بو سلطانین گوزونده خیردا بیر دِهدی
لباس جسمده پنهان اولان لیس کمثلهدی
بونون خاک قدومی گوهر و یاقوتیدن بِهدی
سالار نرخ و بهادن نعل اسبی،لعل و مرجانی
بونون ابرولری بیت الحرام جان وجوهردی
بونون حلقومین اوپسون اللی مین حجه برابری
بونا هربیر نفسده جان دیَن یوز مین پیمبردی
بونی گلدسته لردن سسلیَن اللّهُ اکبردی
بونی مسجد تانور تعریف ایدر منبر بو مولانی
بونون خاک قدومیندن تیمّم ائتسه کیم (شاهی)
صفای سجده سی مخمور ایدر چشم سحرگاهی
ریاض عدنیده هرسبزه دن ائتسون نظرخواهی
دیَر گلده حسیندی٬ عدنیده کوثرده واللهی
حسینسیز کیم آلار بیر بوغدیا مین باغ رضوانی
ای حسینون عاشقی اولسون سنه جانیم فدا
سَسله عشقیله حسینی هارداسان اِیله صفا
صورت ظاهرده باخما باغلانوبدور میکده
صورت باطنده باغلانماز ولیکن می سرا
می سرای عشق ارباب طریقت بازیدور
حضرت صادق بیله فرمایش اِیلوب، انما
کیم دیور میخانه لر باغلاندی ساغرلر سینوب
پیر رنداندور محبانه شهید نینوا
کیم حسینه آغلاسا هر یرده صدقیله اگر
دیده گریان باش چکر اول مجلسه خیرالنسا
دول بوشالدور میکده هوهو چکور دیوانه لر
نغمه پیمانه دن بلبل اِیدور شور و نوا
وه نه نغمه وه نه پیمانه نه باده نه شراب
گوشه میخانه ده عشاق اِیدور رقص و سما
ماه شعبان ، جَذبهِ ساقیِ ، فروغ روی یار
شاد و خرمدور بو بزم ایچره قلوب ماسوا
شهر یثربده چکوب زمره ملائک صف بو دم
اِیلیه مدهوش بلکه نورس شاه ولا
آز قالور زینت تاپا بیر باده نوشیله جهان
روح احبابه تجلی اِیلیه بیر مه لقا
پشت درده منتظردور حضرت روح الامین
گوزلیور قنداقه سین عرشه آپارسین بر ملا
جان جانان عشق منان دلبر دلدادگان
تا قدم قویدی جهانه تاپدی چوخ دیده ضیا
دیده بینای شاه لافتایه آچدی گوز
شاد اولوب یُمنِ قدومیندن او میر مقتدا
گوز گوز اولدی تا شبیریله امام عالمین
یوز دوتوب زهرایه اوز دلدارینی اِیتدی ندا
سویلدی زهرای من ای پاره قلب رسول
ای منیم ایستکلی دلداریم سنه جانیم فدا
بو گوزل مولوده باخدوقجا ایشخلاندی گوزوم
حیدره ذوق و صفا ویردی ایوین آباد اولا
آیری بیر عالم یاراتمیشدی قدوم شاه عشق
حضرت طاهایه تبریک عرض ایدوردی انبیا
بیر نه تک طاها و حیدر اولموشیدی مست مست
سس گلوردی عرشیدن اول نور پاکه مرحبا
سس گلوردی جبریلا تز یتور محبوبیمی
تا او نور پاکیله زینت تاپا اَرض و سما
لفظ کن تا صادر اولدی حضرت دلداریدن
عرش حق حقیده شورش سالوب بو ماجرا
بو ندادن آلدی دم فطرس سماده شوریله
عرض قیلدی بار الاها اِیت بو مسکینه عطا
اذن ویر منده حسینی بیر زیارت ایلیوم
اول زیارتله یته بلکه من زاره شفا
تا بو سوز چیخدی دیلوندن فترس دلخسته نین
گوردی گلدی موجه دریای کرم بحر سخا
بال و پر آچدی دوباره اولدی مدیون حسین
بیر نظر ایتسه حسین دنیایه ایلر اکتفا
تک نه فترس خانقاه عشقینه اولموش دخیل
درگه اربابیده زانو ویرار شاه و گدا
وار بو شاهین بیر وزیر جنگی صاحب پرچمی
سو کنارینده اولوبدور قولاری تندن جدا
آه او ساعتدن اوجا یردن یخیلدی توپراقا
بیر اورکدن آه چکدی سسلدی ای وای آنا
چشم جانیله نه گوردی دیده گریان سر زنان
فاطمه قولارین آچدی سویلدی ای با وفا
عشق اولا ایثاریوه ای جان نثار کوی عشق
گل یارالی سینه مه ای تشنه جام لقا
ایلدی عباس نام آور او دم تدبیرینی
دلده بو فکریله ازلده گیدوب پابوس اولا
بولمورم دوشدی نه نوعیله ترابه گول یوزی
اول اسفلی حالتی زهرایه اولدی جانفزا
وار یری قان آغلاسا بو نکتیه چشم جهان
بیر ایاقی ، بَند اولموشدی رکابه گوئیا
سسلنیردی هارداسان قارداش حسین امداده گل
ای مقدس درگهی اهل جهانه التجا
اوخلانوب مشکیم علاوه صاق صولوم تندن دوشوب
جراَته یکسر گلوبدور عرصه ده قوم دغا
آز قالور تندن آیرسون باشیمی جلادیلر
سون نفسده گل زیارت ایلیوم بیرده اخا
چوخ سوزی آچما (عتیقا) لازمه جَف قلم
چوخ آچیق سوزلر یازوبلار که اوخونماز مطلقا
بیر اشاره بس محبانه مصیبتدن ، او دم
شاه دینون سرو قدی غمدن اولموشدی دوتا
سنده بو طبع رسا یوخدور (عتیقا) گر سنه
ویرمسیدی دم (زکی) اولمازدی فعل پر بها
شاعر:جناب استاد طهمورثی (عتیق) و جناب حامد زکی
تز گلون مسلمانلار کربلاده طوفاندی
ذوالجناحین اوستونده ئوز گوزی قیزیل قاندی
تز گلون کمکسیزدی عرصهٔ بلا تیترر
طبل جنگ صوتیندن دشت کربلا تیترر
سسلنور هوا اوسته اوخلار آشکار آغلار
لنگر ایلیوب تیترر قانلی ذوالفقار آغلار
سینه سینده یا زهرا٬ یاره حدّیدن چوخدی
ایستیور دوشه آتدان بیر قولون توتان یوخدی
قانلی ذوالفقار الده قانلاری آلان گلسون
آلماقا حسین قانین صاحب الزّمان گلسون
اوغلون ئولدی یازهرا جسمینه کفن گوندر
گَل جنازه سین قالخیز قبله سمتینه دوندر
گل نماز میّت قیل یا علی ولیُّ اللّه
پارچا پارچا اعضایه لااله الا اللّه
هارداسان ابالفضلیم خیمه گاهیم اوتلاندی
یاندی ناخوشوم یاندی خیمه لرده طوفاندی
ای کی قانلی وجه ایلن دلداری دیدارایلدون
چهره ی لایبصری آیدین پدیدار ایلدون
اولیا باشینده تک تک واردی گر بیر آیری سرّ
باشیوین سوداسینی سن، سرّ اسرار ائیله دین
خلقی بو بازار عشقه باشدا کی عشقین چکیب
عالمی سن طمطراق عشقه بازار ائیله دین
جوشه گلدی بحر جودین ممکناته ویردی موج
قطره سیله یئتدی دریانی پدیدار ائیله دین
انبیایه اوز ید عشقین، بلا مَشقین وئریب
سن مسیحانی جهاندا طالب دار ائیله دین
حسنووون عشقینده موسی ربّ ارنی سویله دی
سن کلیم اللّهی بو گفتاره وادار ائیله دین
اورگَشیب تا آدیوی اسماءده آدم ایسته دی
اؤلمه سین گورسون سنی مشتاق دیدار ائیله دین
ایسته دی یوسف سنی اوز حسنونه عاشق ائده
یوسفی اوز عشقیوه چَکدین گرفتار ائیله دین
حضرت ایّوبه باخدین داشدی صبری کاسه دن
گوردی قانلی گوزلری ایّوبی بیمار ائیله دین
کلّ ذرّات جهان آیینه دی گول حسنووه
کافری آیینه ی آیینه زنگار ائیله دین
کفر و ایمانی او زولفون بیر توکونده باغلادین
بت پرستین بوینونا سن عِقدِ زنّار ائیله دین
عالمین نقّاش اینین کلکی الینده یاحسین(ع)
عالم امکانی یوخ وادی ده سن وار ائیله دین
سن سن اول حسن آفرینه مظهر حسن وجمال
حسنووی سن صورت جنّات و انهار ائیله دین
عالمی گون روشن ائیلر سن گونی روشن حسین(ع)
آفرینش آفتابین غرق انوار ائیله دین
ممکن واجب نماسَن ذات حقّین مظهری
گوز دولاندیردین بوتون افلاکی دوّار ائیله دین
حقّیوی کیم درک ائدیبدیرحق گورَن گوز اوندا وار
حق شناسلار باطنین سن حقه بیدار ائیله دین
تابهشت وصلیوی درک ائتدی اهل علم و عشق
جنّتی سن گوزلرینده نقش دیوار ائیله دین
شمس ربّانی سن عالمده تمام ایّامیده
مشرق عشقینده سن اشراقی پر بار ائیله دین
سیزلری پاک ائتدی خالق رجسدن ای شاه عشق
آیه ی تطهیری حقّ آل اطهار ائیله دین
گر زجاج ایچره ن ساچیرمصباح حق افلاکه نور
نور حقّی شیشه سیز سن نور رخسار ائیله دی
چون فنا فی اللّه اولوبدی ذات مختارین سنین
خالقین اوز حکمودور هر حکمی طومار ائیله دین
آخدی قانین پوزدی خالق خلقینین عصیانینی
ائتدین آزاد هر کسی عشقه گرفتار ائیله دین
عشق پاکین بیر سپردی تیر قهر خالقه
لطفووی چون مظهر قهر او قهّار ائیله دین
بیربویوک رتبه شفاعتده سن آلدین یاحسین(ع)
ایندی دن محشرده سن محشر پدیدار ائیله دین
قانیله بیر گول بجردین گلشن مکتب ده سن
هر گولی بو گلشن ایچره خار تک خوار ائیله دین
کربلانین تورپاقین قانیله ائتدین سن عجین
اولدی عطر آگین اوتربت مشک تاتار ائیله دین
تربت پاکین شفادیر هر مریضین دردینه
بو شفانی سن نصیب اهل ابرار ائیله دین
تا کی ناحقدن توکولدی اول قیزیل قانین یئره
گویلرین سن گوزلرین بوغمده خونبارائیله دین
زنده قالماز تا ابد هئچ بیر نفر سندن سوا
چون کی سن اوزجانیوی قربان دلدار ائیله دین
هرکیمه چوخ یاره دَیسه، ائدسه درک احوالیوی
درک قیلماز سن نئجه اذکاری تکرار ائیله دین
قلبیوه اوخ دَیدی، چکدین سن کورکدن شوقیله
یول آچیلدی قلبیده سن کشف اسرار ائیله دین
قلبیوی اوخدان بَتر یارمیشدی اکبر غصّه سی
داغی-داغ اوستَه، سینیخ قلبینده انبار ائیله دین
خیمه ده گوردون سوسوزقیزلاری سوایستَراودور
هم وزیر عشقی سقّا، هم علمدار ائیله دین
گوردون عباسین سینیخ باشین ولی سیندی بئلین
حضرت زهرانی بو غمده عزادار ائیله دین
اوخ چکنده حنجریندن اصغرین یا للعجب
عشقیله قانین دوتوب تقدیم دادار ائیله دین
ای قلم گئتمه گریزه گَل دوباره مقتله
یاز اورکدن یاحسین(ع)جانانه پیکار ائیله دین
قان آخیردی مقتله، ذکرین چاتیردی گویلره
دم به دم ارض و سمانی باغ و گلزار ائیله دین
آغ محاسین،گول جمالین،دیل-دوداقین قان اولوب
قان دولان آغزیلا اول یاریله گفتار ائیله دین
ای منیم معبودیم اللّه، دلبریم، محبوبیم اللّه
اللّه اللّه ، اللّه اللّه ذکر و تکرار ائیله دین
قلبیمین یعنی الهی تک اوزون معشوقیسن
عشقوی اوز یاریوه هرحالدا اقرار ائیله دین
سویله دین تکسن الهی هئچ گوزل چاتمازسنه
وحدته وئردین شهادت شرکی انکار ائیله دین
الغرض فعلیله ائتدین وحدتی اثبات حسین(ع)
عالمی مبهوت بو افعال و افکار ائیله دین
گرچی ظاهرده اؤلوبسن قلبیمیزده زنده سن
عاشقیله قلبی ایچره دید و دیدار ائیله دین
هر اورک کی یاتدی عشقینله آییلدی دهریده
ای خوشا اول دل کی سن عالمده بیدار ائیله دین
چوخدی تقصیرین«عزیزا»سن اولانمازسان«فؤاد»
لیک سنده عشقیوی اول شاهه اظهار ائیله دین
شاعر:کربلایی عزیز خانشی
دوشمزهمیشه ساقی بوفصل بهاراله
بو صحن گلستان و لب جویبار اله
دوشمزدوباره بیرده بئله روزگار اله
قور بزم عیش بلکه دوشه وصل یار اله
آل ای مغنّی سنده دف وچنگ و تار اله
سال شوریلن عراقه نوا بیر حجازاوخی
لحن حجازی طی ائله سوز و گدازاوخی
رغم رقیب و محتسبه شاهناز اوخی
فرصتدی، یوخدی بزمیده، اهل مجاز اوخی
گرم ائت بو بزم عیشی گوتور بیر سه تار ائله
دونموش فضای جنته هرگوشۀ چمن
قیلمیش معطّر عالمی نسرین و یاسمن
غنچه آچوب نقاب قوروب طرفه انجمن
شاخ گل اوسته بلبل اولوبدور طرانه زن
چون اوز گلین سالوبدور او بی اختیار اله
ابر بهار اشک توکر آه و زاریلن
سوسن بنفشه ایله آچوب یوز وقاریلن
شمشاد و سرولر دوزولوب بیر قطاریلن
لاله پیاله الده دل داغداریلن
گویا آلوبدی جام لبالب نگار اله
شوق لقای گُل گوتوروب شور بلبلی
هردم نسیم صبح دارار زلف سنبلی
قویماق گرک کناره بوموسم تغافلی
چنگ ملالدن ائله بیر صاف بو دلی
آل جام وباده ای بت سیمین عذار اله
تخت حملده خسرو خار دوتوب قرار
قیلمیش جهانی صحن جنان باد نوبهار
مجموع شاهدان چمن اولدی کامکار
دوتموش جهانی نغمه ی جاءالحق آشکار
آلدی لوای دینی شه کامکار اله
آیینه ی جمال خداوند کبریاء
مسند نشین آیه تطهیر و امتناء
قائم مقام ختم رسل شاه اولیا
دلشاد اولوبدی تخت خلافتده جابجاء
گلدی مراد جمله یخورد وکبار اله
شاد اول گوگول که گلدی اله مقصود و مرام
نطقیلن ایلیوبدی خداوند لاینام
مجموع مؤمینه عجب نعمتین تمام
گلمیش ظهوره بو مه شعبان ایکی امام
شیعه ایچون دوشوبدی عجب افتخار اله
بومژده آرترور فرح و ذوق و دمبدم
قویموش حسین فاطمه بوعالمه قدم
روحه حیات تازه گلوب زایل اولدی غم
قیلمیش وجودی عالمی چون روضۀ ارم
صد شکر گلدی نعمت پروردگار اله
اهل یقینه ائتدی خدا لطف ومرحمت
عاصی لرون یوزونه آچوب باب مغفرت
روح الامین تاپوب بو وجودیله مکرمت
وئردی ازل رسول خدایه او تهنیت
آلدی حسینی پیک خداوندگار اله
نه جبرئیل بلکه هامی اهل آسمان
نازل اولوبلا یر یوزونه جمله شادمان
وئردیله تهنیت شه لولاکه هر زمان
اولسون بئله وجوده فدا جان انس و جان
گلمز بئله وجود بئله شهریار اله
مستحکم اولدی بو شهیلن دین مصطفی
زینت تاپوب وجودیایله عرش کبریا
یمن وجود پاک حسیندن اوتور خدا
صلصایلون ازلکی مقامین ائدوب عطا
سالدی او پر شکسته عجب افتخار اله
ممتاز ائدوبدی بو ایکی مولودی ذوالجلال
بو نیّرینه یوخدی نه مانند و نه مثال
قاصردی عقل وصفین ائده بلکه نطق لال
آیینه ی جمال خداوند لا یزال
ای دل ائدوب تجلّی دوشوب وصل یار اله
تابنده اولدی طاق هلال محمّدی
ائتدی طلوع نور جمال محمدی
دولدوردی نشأتینی جلال محمّدی
گلدی ظهوره قائم آل محمّدی
گون تک وجودی سالمیش عجب افتخار اله
بو شاهدور سریر امامتده چون سراج
بو شاهدور که دین رسوله وئرور رواج
بو شاهدور ائدر هامونون دردینه علاج
مجموع پادشهلره بوندان یتوبدی تاج
گلمز جهاندا بیله شه تاجدار اله
ای یادگار شیر خدا جان فدا سنه
بونه جلال و رتبه دی وئرمیش خدا سنه
نه شاهسن که شهلر ائدر التجا سنه
هر ذی حیات اولسا شها آشنا سنه
گویا سالوبدی پیر زر کامل عیار اله
سن شهریار کشور ایمان سن یقین
سن تاجدارعالم امکان سن یقین
سن نوربخش مهردرخشان سن یقین
سن یر یوزونده حجت یزدانسن یقین
ایستر سالا وصالون هر امیدوار اله
کیمدور یته جلالیوه یا صاحب الزمان
جانلار فدا جمالیوه یا صاحب الزمان
ال یتمیری وصالیوه یا صاحب الزمان
مشتاق دور مقالیوه یا صاحب الزمان
ایستر سالا وصالیوی دل آشکاراله
شاها بولورسن اهل نفاقون مرامینی
اغوا ائدوبله پوزماقا دینون نظامینی
ایلیوبله تیره شیعهلرون صبح و شامینی
قویما قالا غلافده جدون حسامینی
آل بیرجه ای ولیّ خدا ذوالفقار اله
خامه یتنده بو یره دل باشلادی نوا
دوشدی خیاله واقعه ی دشتکربلا
فریاد او وقتدن که شهنشاه نینوا
قالدی اوچولده بیکس و بییار و اقربا
طفل صغیرین آلدی او بی غمگسار اله
قویدی کمانه حرمله بیر تیر خونفشان
حلقوم اصغری ائدوب اول بیحیا نشان
قورتولدی اوخ کماندان او دم دگدی ناگهان
حلق علی اصغره ای شیعه الامان
صیاد کوفه سالدی نه طُرفه شکار اله
ای دل خیال آخرت ائت فانیدور جهان
یاز منقبت همیشه بودور فیض جاودان
جمع ایله زاد و راحله عقبایه هر زمان
(دلریشه) لطف قیل آلا یا صاحب الزمان
آزادلوق براتینی روز شمار اله
ای وجودیندن منظّم نظم عالم یا حسین
سنله محکم دور بنای عرش اعظم یا حسین
سایه ی لطفون پناه اولدی ازلده آدمه
حشره تک مرهون الطافوندی آدم یا حسین
تا نزول ایتدون وقاریله محیط عالمه
اولدی عالم مقدموندن خلد خرّم یا حسین
سالک سلک شهادتسن سلوک عشقیده
نصب ایدوبسن قلّه ی عرفانه پرچم یا حسین
افتخار ایلر وجود پاکیوه آل خلیل
ای منای کربلاده ذبح اعظم یا حسین
جود و احسان و سخاوتده نظیرون یوخدی یوخ
سائل درگاه احسانوندی حاتم یا حسین
عالم عشقون قویوب حیران هامی عالملری
عالمونده وار سنون بیر اوزگه عالم یا حسین
رویت ایتسه جان ویرنده کیمسه گل رخساریوی
باغ جنّت آرزو ایتمز مسلّم یا حسین
ماتمونده کیم عذاره توکسه گر بیر قطره اشک
حشریده گورمز یقین نار جهنّم یا حسین
عرش اعلادن گوزلدور بارگاه حضرتون
رشک ایدر بو درگهه عرش معظّم یا حسین
کربلا اولدی وجودونله مطاف اهل عشق
مرقدون کعبه، فراتون آب زمزم یا حسین
اوزگه لر قلبین جهاندا شاد ایدر بزم سرور
ماتمونده شیعه نین قلبین آچار غم یا حسین
آرزوی طوف قبرون درد اولوب عشّاقیوه
اشک چشمی ایلروخ بو درده مرهم یا حسین
تک نه من لالم مدیحونده اولوب ناطقلرین
دل لری اوصاف اجلالوندا اَبکَم یا حسین
بحر مدحونده نهنگ فکر بکریم غرق اولوب
محو اولار قطره گورنده بی کران یم یا حسین
قبریوین شوقی آلوب دلدن بلوری طاقتین
کربلا ایستور بو دل ای شاه افخم یا حسین
گزسه عیسی گویلری بیر الده گون بیر الده آی
کل عالمده تاپا بیلمز بیزیم مولایه تای
دورسا بیر صفده گوزللر سن حسینی باشدا سای
وئردی الله سوم شعبان اونی زهرایه پای
اولدی ابراهیمه نازل اود یاناندا جبرئیل
هرسوزون اولسا دئدی خدمتگزارم یا خلیل
گئت دئدی کیم پنج تن حقین تانور اولماز ذلیل
منجنیق اوستونده سسلندی حسین جان الدخیل
بو نه سوزدور کی بویورموش حضرت خیرالانام
قانیمیز بیردی حسین مندندی منده اونلانام
گلمسیدی فِدیه اسماعیلیدن قالمازدی نام
او دیری قالدی حسین گلسین وجوده والسلام
بوحسین کیمدور که دوشمز پاک دیللردن آدی
آدینی ذکر ایلدوقجا آغزیمون آرتار دادی
باشینون دسمالینی جبریل گویدن آسلادی
قاره سین سویماز حسین دیوانه سی گر جان چیخا
سینیه ایله وئرار تا دوشلریندن قان چیخا
آغلا ای شیعه گرک یردن گویه افغان چیخا
قویما عاشورا ،قدیر خم کیمی یاددان چیخا
وای اگر قول نبی آویزه گوش اولماسون
بو حسین عشقی گرک دیللرده خاموش اولماسون
ایلیون همت کی عاشورا فراموش اولماسون
رو سیه دور ایلده کیم اون گون سیه پوش اولماسون
آند اولا ویرانه ده زینب دوتان ماتملره
آنداولا دین دوره سینده حصن مستحکملره
آند اولا ارواح طیّب سیر ایدن عالملره
قویماروخ بیگانه چپ باخسون قرا پرچم لره
ای سوزی بیر عمر اولان یا لیتنا کنّا معک
بعد دفنون قبرون اوسته گلر بیر جوت ملک
سسلنلّر ای حسینون عاشقی دور یاتما تک
وحشته دوشمه سنه مولا ئوزی ایلر کمک
عقل حیران عزتوندی حسین
عشق سّرشهادتوندی حسین
سَخّرالشمس ووالقَمرده مراد
بیر گوز آلتی اشارتوندی حسین
جنّتون شبنمی گل اوستونده
سنون اشک مصیبتوندی حسین
نه گوزل سوره دور بوسورۀ عشق
اوسنون استقامتوندی حسین
قان ویروب شیعیه بهشت آلماق
راز و رمز تجارتوندی حسین
سنی یادایلرم نَفَس چکرم
بودا لطف وعنایتوندی حسین
آچیلار تاکه قاره پرچم لر
بیلر عالم قیامتوندی حسین
شیعه لر گیدیگی قرا کوینک
عشق ایوینده علامتوندی حسین
درگهون گنج بی نهایتدی
کیمیا سّر تربتوندی حسین
قلبیم آئینۀ جمالوندی
عشقیم آثارحکمتوندی حسین
بیراشارون گدانی شاه ایلر
بودا اسرار خلقتوندی حسین
شهپر جبرئیله ناز ایلمَک
عزت بی نهایتوندی حسین
(هرزمان دل دوشر سنون یادوا)
(دیرم گوزلریم فدا آدوا)
سسگلدی یاحسینشهداشهریاری سن
عشّاق نامدار جهان افتخاری سن
خلقتده من ائمّهنی کاملیاراتمیشام
امّا سنیئوز عشقیمه عامل یاراتمیشام
عرشین سینوب حجابی سنه قدسیان باخور
مخلوقی آستانووه سائل یاراتمیشام
طیّ ایلیوب یولی یتیشوبسن حضوریمه
مابینمیزده ذرّهٔ حائل یاراتمیشام
باخ گور نقدری حوری ویرور پَر کناروه
محبوبیسن جلالیمه شامل یاراتمیشام
چوخداندی یاحبیبی همان قانلی اللری
قرآن ودین لواسینه حامل یاراتمیشام
چال بحر خونیده ال ایاق آفرین حسین
عالم بوئیجا عشقوه قائل یاراتمیشام
بوحسين كيمدي كه قنداقي گويه ناز ائلييب
بوحسين كيمدي كه زهراني سرافراز ائلييب
بوحسين كيمدي كه عشق آيه سين آغازائلييب
بوحسين كيمدي كه الله آدينا عاشق اولوب
بوحسين كيمدي كه سرنيزده ده ناطق اولوب
بوحسين كيمدي كه اسلام ائوين اباد ائلدي
بوحسين كيمدي اوزي فطرسي آزاد ائلدي
بوحسين كيمدي عدوفكريني برباد ائلدي
بوحسين كيمدي عزيز دل خاتمدي حسين
بوحسين كيمدي كه درداهلينه محرمدي حسين
بوحسين كيمدي هجوم ايلدي ابليسه طرف
بوحسين كيمدي ياييپ هر طرفه درس شرف
بوحسين كيمدي كه فخرائتدي اونا شاه نجف
بوحسين كيمدي عدالت اونا مديوندي فقط
بوحسين كيمدي كه عشاق اونا مجنوندي فقط
بوحسين كيمدي خدايا بئله اعجاز ائلدي
بوحسين كيمدي شفاعت قاپسين باز ائله دي
بوحسين كيمدي كه روحي گويه پرواز ائله دي
بوحسين كيمدي كه آغلاتدي غمي ماملكي
بوحسين كيمدي تحيرده قويوب نه فلكي
بوحسين كيمدي كه ظلمون قباقندا دوردي
بوحسين كيمدي كه اهريمنه سيلي ووردي
بوحسين كيمدي كه بو خيمه وحدت قوردي
بوحسين كيمدي كه عشاق اورگين ياندردي
بوحسين كيمدي يزيدين بئليني سيندیردی
حسین مظهر انوار حقِّ سبحاندی
حسین مخزن اسرار علم یزداندی
حسین بحر شجاعت فضیلت و تقوی
حسین منبع علم و کمال و عرفاندی
حسین نور هُدی قلب عالم امکان
حسین معنی دین و اساس ایماندی
ویروب بو دینه هامی ما سویَ اللّهین قربان
اودور که فخریله جانلار حسینه قرباندی
حسینه معرفتیله گر آغلیه هر کس
جزا گونونده مکانی بهشت رضواندی
قیامی ویردی هامی کونه درس حُرّیت
گرک باش اَگمیه ظلمه او کس که انساندی
اَلنده شود اَمَری اوخلانان بوغازیله
جفای آل یزیده ایشیقلی بُرهاندی
بویاندی قاننه احیا ایدوبدور اسلامی
گورنده دینین ایوی ظلم اَلیله ویراندی
دیوب بلایه بلی اوخ گَلنده دشمندن
اورک باشندا ویروب یر که پیک جاناندی
اوخوردی آیۀ قرآنی نیزه باشندا
هامی بوله که بو باشلار فدای قرآندی
قویوبدی باشینی خولی تنوره کول اوسته
او باش که زینت افلاک و عرش رحماندی
پیمبر اوغلی کَسیک باش هارا تنور هارا
وفاسینه اولا تُف بو وفای دوراندی
نقدر واردی جهان پرچم حسین اَسَه جاخ
قیامی اُسوه دی اهل جهانه عنواندی
سَزادی گر یوزه «دانشوری» توکه قانیاش
مصیبتینده ملک جنّ و انس گریاندی
ای عرش معلایه قنداقی گئدن لبیک
رخساری سماواتی نورانی ائدن لبیک
ای عالم عشاقه سیماسی صفا لبیک
هر یرده عزاداره دریای عطا لبیک
ای دین مبین اوسته دائم چالشان لبیک
کفاره اوز عصرینده محکم دانیشان لبیک
ای جانینی قرآنه قربان ایلین لبیک
مرضایه نگاهینده درمان ایلین لبیک
ای عالم عشقینده جانانی دئین لبیک
میدانیده یتمیش بیر قربانی وئرن لبیک
ای قانی بوغازیندن تپراقه آخان لبیک
جان اوسته گوزی تنها اللهه باخان لبیک
ای قلبی خدنگیله چوخ پارچالانان لبیک
عریان بدنی اوسته داشلار قالانان لبیک
آلتی گوشه قبروون عشقینده زارم یاحسین
عاشق گلدسته و صحن و مزارم یاحسین
بالِ پروازیم اولِیدی پَر ویراردیم عشقووَه
قول قنادسیز، عاشق پروانهوارم یاحسین
کربلا عطری دولوبدور سینَمَه مست اولموشام
دائماً سرمستِ آن شهر و دیارم یاحسین
اولماسا عشقون خزانم، ریشه سیز،
بی برگ وبار!
سایهٔ مِهرونده دائم نوبهارم یاحسین
گورسم هر یرده قرا پرچم سیخیلّام سایُوَه
صبحه جک یاتماز گوزوم شب زنده دارم یاحسین
یئِرگویی زیر و زِبَر ائتسه غمون، واردور یِئری
چیرپینور قلبیم غمونده بیقرارم یاحسین
پرچمون آلتدا سورونّم مجلس ماتملری
گر منی قوسون قاپوندان، تارومارم یاحسین
وار امیدیم قبریمی نورون چراغان ایله سین
اول قرانلوق یئرده من چشمانتظارم یاحسین
از وصال قبر خود بر شاعرت (فیضی) رسان
ای تمام هستی و دار و ندارم یاحسین
از برای بوسهای بر مَرقدِ ششگوشهات
لحظههای عمر خود را میشمارم یاحسین
گئدن زیارته ای کربلایه زائر اولان
گئدن قدملریوه یوللارا ئوزم قربان
نقدر آرتوخ اولار یوللارین غم و رنجی
گلایه ایلمه که رَنجبَر تاپار گنجی
همان او گنج اوزی بس رنجلر خزینه سیدی
آدی حسین دی پیمبر سُرور سینه سیدی
ازل او یرده دایان کاظمین دور آدی
او شهر ایچینده سراغ ائت غریب بغدادی
گیرنده روضۀ غمناکینه یانا یانه
غریب امامه سلام عرض قیل غریبانه
یانیندا یاتمیش امام جوادی گور مسموم
او بیر ضریحیده همدرد اولوب ایکی مظلوم
ایکی سینین یادا سال نسگلین ئورک داغلا
آدامسیز ئولدوله سس چک دویونجا بیر آغلا
سفر تدارکی گور کربلایه ایله گذر
او آلتی گوشه لی قبره یتنده ایله نظر
گورنده روضه ده غمدن گونون قرا گئجه دی
سلامدن صورا عرض ائت یارالارون نئجه دی
ایاق طرفده مراعات احترام ایله
جوانلارین دیلیجه اکبره سلام ایله
اوزووه بو سوزومی هر دقیقه فرض ایله
قوجالاریندا سلامین حبیبه عرض ایله
اون اوچ یاشیندا جوانلار که چوخ گلور داده
یتور سلاملرین حجله گهده داماده
باخ اون یاشیندا جوانلار ئورک یارالارینا
یتور سلاملرین زینبین بالالارینا
بو خوردا قیزلاری دا مقضی المرام ایله
سوسوز ئولن ایکی خوردا قیزا سلام ایله
اونوتما سود امر اطفالی آل گلان نظره
اوشاقلاریندا سلامین یتور او سود امَره
مُخَدَّره آنالاردا بو خواهشی ایلر
آناسیز اصغره لایلای سفارشی ایلر
فرات اوسته یتنده حریم سرداره
سلام عرض ایله یالقیز یاتان علمداره
بو روسیاهه ده لطفون حَدِ تمامه یتور
منیم سلامیمیده اول قره غلامه یتور
مرتضی گوردی خانم فاطمه کوینک توخیور
ولی هر ایلمه ده بیر آیه ی قرآن اوخیور
آغلیور چوخ ته دلدن نگراندور دیه سن
آغلادان فاطمه نی سر نهاندور دیه سن
چون بیلور فاطمه بو کوینگین آینده سینی
نه یازوب یا که خداوند ئوزی برنامه سینی
خبر آلدی کیمه بو کوینگی آیا توخوسان
نیه آغلار گوزیلن فاطمه قرآن اوخوسان
دیمرم ممکنی یوخدور سنه قرآن اوخوما
دیورم زحمته دوشسون ولی کوینک توخوما
چونکه راضی دگولم ذره خانم اینجیه سن
ندی بو آغلاماقون سنده دلیلین دیه سن
سوونر رسمیدی کوینک توخیان فاطمه جان
اولماز هرگز بیلورم صورتینه اشکی روان
ولی بو منظرهدن منظرهی غم گورونور
گوزووه اولماسنون آیری بیر عالم گورونور
واقفم منده همان سن بیلن اسراره خانم
گله سن ایستیورم شرحینه گفتاره خانم
بیر نفس آغلاما اصل جریانی دانیشاخ
ایکیمیز واقعه ی کرب و بلانی دانیشاخ
فاطمه گوردی علینون اورگین غم بوریوب
ائله فکر ایلدی دنیالری ماتم بوریوب
دله گلدی دیدی آهسته عم اوغلی قولا آس
ایدوم اولده خداوندمیزه حمد و سپاس
آغلادان واردی منی آغلامورام ئوز باشما
مشتریدور گورورم ایلمه لریم گوز یاشما
خبر آلدون توخورام کوینگی آیا کیمه من
ناشناس اولمیا عرض ایلیوم ای شاه زمن
زحمتی یوخ نگران اولما ایا میر حنین
توخورام گیسون اونی اگنینه آینده حسین
توخودوقجا ولی من عالم دیگر
گورورم
باشلانوبدی دیه سن دیدهمه محشر گورورم
میله لر بیربیرینه هاردا که والله دگوری
بئله احساس ایدورم اوردا حسین وای دیوری
بو حسین وای سسی آرامشیمی الدن آلور
نیلیوم آغلامیوم قلبیمه چوخ رعشه سالور
بیرده بو صحنه نی بیلمم نیه من چوخ گورورم
دگوب هر ایلمهنون اوسته دیه سن اوخ گورورم
هر گره ووردیغیجاخ سهمیلی طوفان گورورم
دالسیجاخ توکولور من گرهین قان گورورم
بو کیمون قانیدی آلله، دیورم ئوز ئوزیمه
گورونور اوندا منیم قورخولی میدان گوزیمه
دوزولوب بیر طرفه لشکر اعدا به ردیف
یخیلوب قتلگهه یاره لی انسان
شریف
یار و انصاری ئولوبدی کمکی یوخ دیه سن
سینهسین یارهلیوب نیزه کیمین اوخ دیه سن
سوزولور قان یارالاردان یوخیدی باغلیانی
اونا خاطر بو غریبون اولورام آغلیانی
کسیلوب باشی بدندن بویانوبدور قانینا
کیمدی قان پردهسی قویمور بو جنازه تانینا
یوزی اوسته یخیلوب یوخدور هرایه گلنی
اولوب اوخلاره نشان بسکه او باشسیز بدنی
نیزهلر چیخدیقی یردن اوقدر قان توکولوب
ائله بس دشمن الینده خود قرآن سوکولوب
گورورم قانه بلشمیش بو همان کوینگی من
چکورم ئوز اورگیمده او چکن گوینگی من
ننون ئولسون دیورم سن آخی کیمسن یارالی
بئله احساس ایدورم بند دلیمسن یارالی
آشنادی منه واللهی بو یورقون نفسون
دانش آهسته سنون عین حسینمدی سسون
کسیلوب باشون اولوب نحر بوغازون گورورم
بنذور ئوز لحنیمه چوخ لحن حجازون گورورم
سن منیم نور دو عینیم سن عزیزیم تانیدوم
ئولن اللرده حسینیم سن عزیزیم تانیدوم
وای منه ایندی بالام جانی دولانام باشووا
نه گلوبدی دی گوروم اوغلووا یا قارداشووا
روز و شب دائم حسینه اوغلى سجاد آغلادی
کاخ ظلمی ایلدى اشگیله بر باد آغلادی
آغلادی بو آغلاماقدا خلقی بیدار ایلدی
قویمادی گیزلینده قالسون کشف اسرار ایلدی
آغلادی ظالم لری انظارده خوار ایلدی
جور و ظلم شامیانی ایلدی یاد آغلادی
عاقل ایلر خانۀ ایمانی آباد آغلاماز
حاجت ثروت ایدر مِسکینی دلشاد آغلاماز
بند دشمنده گر اولسا مرد آزاد آغلاماز
کیم گوروبدور ائتدی ناله مرد آزاد آغلادی
بو امام بی کسه یوز وئردی بیر أمر عجیب
کیم اولوبدور ئوز ایوینده زادگاهینده غریب
آشنا و یار و احبابیندن اولدی بی نصیب
بزم غم ئوز منزلینده ائتدی ایجاد آغلادی
کیم دیر دنیاده هر بیر آغلاماق مذمومدور
کیم دیر قورخسا خدادن گریه نامفهومدور
آغلاماق اثبات حقده شیوۀ مظلومدور
دینه گوز یاشیله گوردوخ ائتدی امداد آغلادی
آغلادی آدم بهشتین فرقتینده صبح و شام
ترک اولادن ایدوب توبه سزیلداردی مدام
تا قبول ائتدی دعاسین کردگار لاینام
ایلدی حوانی ده بو امره ارشاد آغلادی
آغلادی یعقوب ، یوسف فرقتینده ماه و سال
عارضه گوز یاشینی توکدی به امید وصال
ائتمدی توبیخ اونی هرگز خدای لایزال
تا اولونجا یوسفی زنداندان آزاد آغلادی
عاشقه هر کس رقیب اولسا کراهت ایلمز
آغلاماقدا عاشقی هرگز ملامت ایلمز
عاشق ئوز عشقینده اظهار ندامت ایلمز
فرقت شیرین ده سمی چکدی فرهاد آغلادی
آغلادی زهرا یتوردی خلقه منویّاتینی
تا گیدوب مسجد ده ائتدی حقینون اثباتینی
پوزدی غاصب دولتین معناده تشکیلاتینی
ایلدی غصب فدک امرینده ایراد آغلادی
رسم دنیا بیله دور هر بیر عملده وار اثر
هر نهاله وئرمه سن سو خشک اولار وئرمز ثمر
گورموشوخ دنیاده چوخ گوز یاشلاری گتدی هدر
تیر خورده صیده باخدی گاه صیّاد آغلادی
گرچه اشگ شور آخار گوزدن وئرر شیرین ثمر
اولمادی زینب کیمی بیر آغلیان بیر نوحه گر
ایلیوب کاخ یزیدی اشگیله زیر و زبر
مجلسینده ایلدی بیر خطبه ایراد آغلادی
ائتدی فرمایش اوتان ای بی حیا ایله حیا
شرب خمر ائتمه حریفیله قماری اویناما
قانلو باشه وورما چوب خیزران ائتمه جفا
گورموسن خردا اوشاقلار چکدی فریاد آغلادی
« کهنموئی » سنده توکمه گوز یاشون بیجا یره
باغبان لازمدى مُثمِر بیر نهاله سو وئره
تا اولاندا فصل میوه شاد اولوب میوه دره
چوخلاری محروم اولوندی اولمادی شاد آغلادی
سائله شاه عالمینم /مستحق لطف حسینم
چون حریمون حرم خدادی/عالمه فقط حسین آقادی
کربلا بابه عزتیمیزدی/بوشلا بهشتی،کربلا جنتیمیزدی
یا مولا ابا عبدالله(4)
ائدرم فخر نوکرم من/خاک نعلینه اکبرم من
ائدرم دیلدن آرزو تا/پایینه پاده جان وئرم من
فخر ائدر سنه رب الجمیل/درگهون اوپر گونده جبرائیل
یا مولا ابا عبدالله(4)
حسین سرحلقه ی مردان حقدی
حسین جسم عدالت جان حقدی
حسین حق حق دئدی حقّه یتیشدی
بیلوب عالم حسین عطشان حقدی
حسین دنیاده وحدت تشنه سیدی
حسین جام شهادت تشنه سیدی
حسین قالدی سوسوز ظاهرده،امّا
حق و عدل و عدالت تشنه سیدی
قیامت ملکینه رهبر حسیندی
همان محشرده کی محشر حسیندی
صراطین کورپوسیندن قورخما شیعه
بهشت عدنه سگّیز در حسیندی
قیامتده حسین ایلر قیامت
کسیک باشه قویار تاج شفاعت
چکر اوتدان عزاداری کناره
دوتار ال تک تکین ایلر حمایت
حسینون حشرده والادی جاهی
شفاعت امرینه وار جایگاهی
عزادارین دوزر بیر صف منظم
دیر از دم گناهین گچ الهی
حسین تنهاترین مرد عملدی
حسین حرّیّته شرح و مثلدی
حسین قان وئردی اسلامی دیریتدی
حسین محبوب حیّ لم یزلدی
حسین پیغمبره نور بصردی
حسین زهرا و حیدردن ثمردی
حسین بیر واژه دور شرح اولمیوبدی
حسین مافوق ادراک بشردی
دئمه اوخشاردی پیغمبر حسینه
مثالیدی دئمه حیدر حسینه
حسین تکدور اونون گلمز مثالی
فقط سویله حسین بنذر حسینه
دیوب طاها حسین من ،من حسینم
اورکدن عاشق اول نور عینم
حسینون واقفم آینده سیندن
او علتدندی غرق شور و شینم
بونی صادق آغام ایلوب روایت
حدیثی معتبر دور امری حجت
حسینه کیم عزا دوتسا ننوعی
بدون شرط اونا واجبدی جنت
حسینه آه و وانون شرطی یوخدی
زمان و وقت و جانون شرطی یوخدی
حسینه هر نجه آغلورسان آغلا
تباکا و بکانین شرطی یوخدی
حسین آئینه و مرآت حقدور
حسین گودال ایچینده مات حقدور
حسینه کربلا کوه منادور
حسین قربانی میقات حقدور
حسین عیسی حسین موسی حسین طور
حسین یاسین حسین طاها حسین نور
حسین پرورده ی فتّاح خیبر
حسین میدان دعواده سلحشور
حسین گوردی جهانی دولدوروب جور
حسین خونین قیامه اولدی مجبور
دئدی هیهات من ظلمه اگم باش
قفادن باشیمی ائتسوزده گر دور
قیامینده حسین دوز گتدی راهی
سالوب تنگه اونی کوفه سپاهی
باشین ذبح ائتدیلر شأنی کیچیلسین
او گوندن گون به گون آرتیلدی جاهی
حسینین حنجرین کسموردی خنجر
قفادن کسدی باشین شمر کافر
او ساعت «زعفرا» عالم قاریشدی
دوتولدی گون اسوبدی قاره یللر
او کسلریکه حسینی سووَر بو عالمده
دوتار عزا هامی عمرین نه تک محرمده
خیالیله مُتَصوِّر دگول جلال حسین
تمام فکر و خیالی پوزار خیال حسین
بشردی گر، بو جلالتده کیم گوروبدی بشر
بشر گر اولماسا ممکن دگول مقال حسین
پیمبر اوغلیدی بو مین خلیل و نوح و کلیم
جلال و رتبه ده اولمازلا بیر بلال حسین
او گونکه سسلدی من یشتری بِاَنفُس و مال
تمام عالمه محبوب بی مثال حسین
الی ال اوسته دوروب مشتری دیوب لَبَّیک
فدادی عالم عشقونده نفس و مال حسین
غریبه عالمیدی اولماز ایله داد و ستاد
که ایلیوبدی حسینیله لایزالِ حسین
مَبیع مامَلکِ حقّ و مشتری شه دین
ثمن حسینیدی اول بیعه هم عیال حسین
مجاز اهلینه گوستردی اوز حقیقتینی
مرام حق اولوب علّت اودور وصال حسین
یازوبدی لوحۀ حکمتده کاتب قدرت
گرک فنایه گئده نفس و مال و آل حسین
قویوب اوصفحیه ارواح انبیا امضاء
مقام عشقیده معلوم اولوب کمال حسین
نفوذ عشقیله تفویض اولوندی عین مرام
اولاندا ذات خدا حقّدن سوال حسین
قبول ائدوبدی اؤزون خونبها حسینه خدا
که ظاهر اولسون او گون شوکت و جلال حسین
دولاندی دورۀ دوران یتشدی عاشورا
اولوب او عهدده بیر امتحان خیال حسین
ویروب حبیبینه بیر بیر کمک لرین قربان
تاپوب عذارینه یول گوزدن اشک آل حسین
ایشیقلی گون کیمی اکبر یوزی ائدوبدی کسوف
سنوبدی باغ امامتده نونهال حسین
سواوسته هرایکی الدن گوتوردی ال عباس
گوروب او حالی او ساعت پوزولدی حال حسین
سو وئردی بیر سولی پیکان علیِّ اصغرینه
سپهر غمده غروب ایلدی هلال حسین
ئولوب کمکلری یالقوز قالوب تاپوب جرأت
ال اچدی اوستونه اعدای بدخصال حسین
قلجلیوب باشینی مالک ابن یُسر لعین
دوزَلدی ظهر یتوب گون کیمی زوال حسین
اولوب معاینه شقُّ القمر آخوبدور قان
بویاندی قانه قزل گل کیمی جمال حسین
خیالی ائتماقیدی اوج وحدته پرواز
خدنگ لر پر آچوب اولدی پرّ و بال حسین
ابوتراب عزیزی دوشوب تراب اوسته
بَلَشدی قانیله توپراقه خطّ و خال حسین
دیدی الهی گواه اول بو قوم عقیده سینه
بو چولده واجب و لازم دوشوب قتال حسین
تمام ما ملکیمدن بو چولده گئچدیم من
ازلکی عهدیدن اولموبدی اغتفال حسین
یتوبدی عهد الستیم باشا قالوب بیر باش
بو باره دن بُلوسن واردی انفعال حسین
سنون حضورووه لایق دگول بو تحفه لریم
قبوله لطفیله وار لیک احتمال حسین
«حسینی» فخر ائده سن ساکنان نه طاقه
سالونسا چگنوه نوکر آدیلا شال حسین
ایسته گله آقا بو جمعی بیر وقفه کربلایه/اوردا دسونلر ایوای (شاهنشه ولایه 2 بار)
گل نوایه شور وایه ایسته مولا کربلایه
بو جمعی (2 بار)
گلاخ دیاخ اوردا ای وای /علی اصغره لای لای 2 بار
حسین آقام حسین آقام .آقام ابا عبدالله
دیلر نوایه خوشدی ،شور عزایه خوشدی
والله بو هیئت اهلی/کرب و بلایه خوشدی
وار صفاسی ، چوخ وفاسی ،آقامون کرب و بلاسی
واللهی 2 بار
اورکده حسرتیم واردی سنه ارادتیم واردی 2 بار
حسین آقام حسین آقام.آقام اباعبدالله
شیب الخضیب،خد التریب ،اللرده سن ئولدون اولدون غریب
ماهم حسین ،جاهیم حسین،هر یرده سسلرم من شاهیم حسین
ای شهنشاه عالمین/زاده زهرا یا حسین/گویلومه دوشوبدی گینه/هوای بین الحرمین
آقام حسین .....
عین الیقین ،حبل المتین/زوار ائت منی سن بیر اربعین
مهتاب حسین،نایاب حسین،من نوکرم آقامدی ارباب حسین
واردی سنده چونکی گوزوم/هجرانه یوخ دیلده دوزوم/گلن ایل ایسته تا گلاخ/آتام آنام همده اوزوم
آقام حسین .....
کربلاده دولاناردوخ اودا بیر گونلریدی
اشک آله بویاناردوخ اودا بیر گونلریدی
آغلیوب گاهی گولردوخ او فراتین سویی تک
دورولاردوخ بولاناردوخ اودا بیر گونلریری
مشکین اطرافین آلاردوخ هامی پروانه کیمی
شعله شمعه یاناردوخ اودا بیر گونلریدی
گاهی بالای سرینده گوزی یاشلی دایانوب
حاجتی دردی صاناردوخ اودا بیر گونلریدی
پارک بین الحرمینده او قدر سینه ووروب
یورولاردیق اوصاناردوخ اودا بیر گونلریدی
او پارا مشگه که هر دم ساتاشاردی گوزومیز
سو ایچنده اوتاناردوخ اودا بیر گونلریدی
صبح گلدسته دن آلدوخجا مناجات سسینی
شوقیله تئز اویاناردوخ اودا بیر گونلریدی
بیر گورنده حرمینون اوجا گلدسته لرین
غصه نی دردی داناردوخ اودا بیر گونلریدی
کربلا کعبه دن افضلدی ائشیتمشدوخ اگر
گوروب عینا ایناناردوخ اودا بیر گونلریدی
ای « کریمی » یادووا سال او گوزل خاطره نی
کربلاده دولاناردوخ اودا بیر گونلریدی
واردی باشیمده شوق زیارت
قویما قالسون اورکده بو حسرت
لطف ائله فاطمه جانی مولا
کربلانی بیزه ائله قسمت
نالیه گلوب نه سما سسلوری یا مولا
اربعین آقا قسمت ائله بیزه کربلا
ایلرم گوزل آدیوی یاحسین زمزمه
جان فدا اولا گنبد اوستوندکی پرچمه
یاحسین .....
دیلدهکی دردیمه سن دواسن
دوت الیمدن کی مشکل گشاسن
من گدایم قاپوندا همیشه
سن ولی باب لطف و عطاسن
کربلا،قالوبدور سنون یولاروندا گوزوم
گر گورم اورکده وارمدی سنه چوخ سوزوم
یاحسین،گینه ناره آه و غمه بورونم
گر گوروم آقا قبریوی اوردا من سورونم
یاحسین .....
قلملر وصفوه عاجز، سن ارباب دو عالمسن
سنی تعریف ائدیب الله، شهنشاه معظمسن
سنون عشقون مقدسدی، صفای قلب خاتمسن
سنون زیبا آدون مولا، اورکلر باشینه حکدی
سنون مثلون داخی گلمز، حسین تکدی حسین تکدی
حسین رحم و عطوفتده، یقیناً عین طاهادی
حسین گودالی ده مستِ، سَبوی حَیِ اَعلادی
حسین نیکوترین رهبر، حسین دلبند زهرادی
قزل دان حک اولا بو سوز، درِ جناتَ با جادی
حسین آقا، حسین آقا، حسین آقای آقادی
وئریب سن عالمه عزت، شهامتده تایون یوخدی
آنون زهرا کیمین خُطبون، دل کفار مین اوخدی
زره اندامه چون گِیسه، علی تک زوری چوخ چوخدی
حسین شیر دلاوردی، جَدل دَن یوخدی پرواسی
اُتوز مین لشگری یک جا، قیرار بیر ضَربِ دَعواسی
مقابل لشگره دوردی، دئدی فکر ائتمیون پیرم
نقدری غم گورم اما، آتام حیدر کیمین شیرم
هراسیم یوخدی سوزلردن، بو دنیادن داخی سیرم
بوتون آیات قرآنَ، باخون معنی و تفسیرم
شعار و هلهله بسدی، گلون من مرد شمشیرم
قدم میدانه تا قویدی، نصیحت دای دئدی بسدی
اله شمشیر الان لحظه، دلِ کل سپاه اسدی
طنابه ظلمتی مولا، لب عطشان بیخیدن کسدی
هامی لرزان اولوب اول دم، اوکلر چون دونوب سنگه
دئدی من زاده شیرم، هاموز بیردن گلون جنگه
دئدی یا حیدر و زهرا، قوای بی شمار تاپدی
جلو تا مرکبه وئردی، صفوف دشمنه چاتدی
صف آرایش جنگی، حسین بیر آنیده قاتدی
ملخ تک موری تک لشگر، گلور مولا ولی سایمور
ویرور شمشیرنی محکم، اولاردا باش بدن قالمور
گلن مغلوب اولور اول دم، چوخی گیج اولدی میداندا
بی نوعی جنگ ایدیر مولا، حریفی یوخدی دوراندا
هامی حیران اولوب سسلور، نچه جان وار بو انساندا
گلوب شمرین سسی ناگه، فنون جنگه ازبردی
بئله فرض ایلیون سیزلر، بودا بیر آیری حیدردی
دیلده آدوندی زمزمه کربلا
وئرمرم عشقون عالمه کربلا
قلبیم اسور سنون اوتور سن بولوسن
گون سایارام محرمه کربلا
آقا جان اورگه وئر جلا
وئر اوزون دردیمیزه دوا
کرم قیل سن بو جمعه آقا
روزی ائله بیزه کربلا
جان آقام،آقام آقام آقام....
دردین اولاندا هر زمان سسله حسین
هر سوزون اولسا قیل بیان سسله حسین
قبرینه چاتماسا الین قبلیه باخ
الری سیننده دایان سسله حسین
گرچی دل تلسور وصلته
دوزموری اورگیم فرقته
چاتموری الیمز حرمه
اودور کی گلروخ هیئته
آقا جان،آقام آقام آقام....
ای درس عشقی اورگدن انسانه یاحسین
عشقین یولوندا جسمی باتان قانه یاحسین
تاوار جهان آدون سنون همواره زنده دی
شاهلار قاپوندا یکسره واللهی بنده دی
عشّاقوون حسین، گوزی البته سنده دی
فخر ایلیوله سن کیمی سلطانه یاحسین
مولا جهاندا چوخدی گوزل عاشقون سنون
عشق اهلینه بو بارده جنّتدی مدفنون
گلزار ایچینده روضهٔ رضواندی گلشنون
رونق وئروب قانون بو گلستانه یاحسین
عالم سنه فدا اولا ای شاه کربلا
اوخ مثلی کربلاده یاغوب اوستوه بلا
هرنه بلا گلوب دیلووه گلمیوبدی لا
خدمت ائدوبسن عشقیله قرآنه یاحسین
قلبونده عشق و حُب خدا چکدی منظره
قانیله بیعت ائتدون حسین حی داوره
غبطه ائدر مقامووه عرش اهلی یکسره
بیلمز سنون مقامووی بیگانه یاحسین
عاشق گرک شریف اولا خرگاه عشقیده
یوسف کیمین عبادت ائده چاه عشقیده
مولا سنون کیمی وئره جان راه عشقیده
جانلار فدا اولا بئله بیر جانه یاحسین
حیران قالوبدی عقل بشر ممکناتووه
عشق ایلیور زمانهده عشّاق ذاتووه
بیر عدّه گوز تیکوبدی سنون التفاتووه
گل ائت نظر بو جمع پریشانه یاحسین
کیمدور سنون کیمی گئده حقین سراقینه
عطشان بوغازینی وئره خنجر قباقینه
طشت ایچره خیزران دگه عطشان دوداقینه
جان بذل ائده طریقت سبحانه یاحسین
لایق دگول بیزه گئدک اغیاره یالواراق
یا اینکه هر ستمگر و قداره یالواراق
شایسته دی سنون کیمی دلداره یالواراق
علت اودور کی طالبوک احسانه یاحسین
کیمدور آدین دوتاندا بشر ایلور افتخار
کیمدور جهاندا شیعهلره شأن و اعتبار
کیمدور جزا گونونده اولان صاحب اختیار
سن سن چاتان بورتبهٔ شایانه یاحسین
سن تک جهاندا هانسی گروهون امامی وار
یا عشقیلن بودهریده دیلرده نامی وار
الله آدی کیمین آدوون احترامی وار
آدون ائدوب بو نوکری دیوانه یاحسین
ای شاه کربلا سنه وار دیلده بیر سوزوم
تیمورییم یانار اورگیم یاش توکر گوزوم
نوحه یازاندا محنتووه آغلارام اوزوم
غمدن دونوبدی گوزیاشیم عمّانه یاحسین
بیر عمری سسلرم یا مولا،بو سینان قلبیمه وئر صفا،قسمتیم ائله سن بول آنان،تا اولاخ زائر کربلا.
عالمینه من ،چون فخر ایلرم،درباره شهنشاه نوکرم،عبد و چاکر پور حیدرم،کربلا وارم بهشتی من نئیلرم.
ثارالله حسین .....
کربلا حجه یولار توشه،کعبه دوت گوشه بو شش گوشه،اوردا بیر آتا یارالی،بالاسون آلوب آغوشه.
قاپوندا اگر چی نالایقم،گورماقا حریمون شایقم،یوخ آیری یریم دل دردین دیم،نیلویوم سنه دیلدن عاشقم.
ثارالله حسین.....
طبعیم قوشی پرواز ایلیوب گیتدی سمایه
بیر قافله گوردی گیدوری کرب و بلایه
تعقیب ایلیور مرگ اولاری سایه به سایه
رهبر او گروهه گورونن شخص جلیدور
قونداقی گیدن عرشه حسین بن علیدور
اطرافینی بیر عده آلوب چون مه انور
بیر یاندا جوان قاسمیله شبه پیمبر
بیر سمتیده امّا وار ابوالفضل دلاور
آتدوقجا قدم الده علم پور غضنفر
گویا که گیدور خیبری فتح ایتماقا حیدر
زهرانین عزیزه بالاسی زینب کبرا
قارداشینه خاطر اولوب آواره ی صحرا
ایستور که حسین نهضتینی ایلسون احیا
شاماته گیدوب پرچم کفری یخاجاقدور
اسلام علمین قلب دمشقه ویراجاقدور
زینب نجه زینب که تاپیلماز اونا همتا
پرورده ایدوبدی اونی صدیقۀ کبری
علت اودی اولدی بودا صدیقۀ صغرا
دارادی عجب منقبت و منصبه زینب
الحق یاراشیر که دییَه لَر زینبه زینب
جریانیده دور خون علی لحم و رگینده
قارداشینه چوخ واردی محبت ئوره گینده
آثار کبودی هله یوخدور کوره گینده
اما نچه گوندن صورا صحرای بلاده
زلفی آغارار گورسه حسین باشی جداده
گودالیده صد پاره اولان پیکری گورسه
تپراقیده بیر جوت کسیلن اللری گورسه
زهرا آناسین آلمیش اله معجری گورسه
مین ایلده اگر عمر ایده باشه قارا باغلار
اللرده ئولن قارداشینا وای دیر آغلار
غارتده بیابانه قاچان وقتیده قیزلار
تپراقه یوزی اوسته دوشن لحظه ده بیمار
میداندا حسینین بدنین آتلار ایاقلار
سوزیله دیر اوندا بلالی باشیم ایوای
وای آتلار ایاقینده قالان قارداشیم ایوای
شایسته دگل مطلب اولا بوردا مطوّل
ناموس خدا اوغلی باتوب قانه محصّل
گویا که گینمیشدی او شه قرمزی مخمل
دین گلشنینه باد مخالف اسیلوبدی
لب تشنه امامین باشی دالدان کسیلوبدی
قاره یل اسوب گون دوتولوب قتل امامه
معناده آلوب غم ئوزینه ارض تهامه
باشدان گوتوروب حضرت پیغمبر عمامه
گوز یاشی توکوردی یوزه با ناله وافغان
سسلوردی حسین جدّون اولیدی سنه قربان
اخیامیده زینبده الوردی یوزه گوز یاش
میدانیده بیردن اوجالوب نیزه ده بیر باش
بیر منظره ایدی چکه بیلمز اونی نقاش
هیچ خامه یازانماز که نلراولدی او ساعت
قیزلار ال آتوب باشینه گورسندی قیامت
اوجه یتوره ظلمینی تا فرقه ی عدوان
سعداوغلی ویروب لشگرینه غارته فرمان
سرعتله چاپوب آتلارین اول بدتر از حیوان
هر قدری یاخینلاشدیلا اولاد رسوله
معناده هجوم ایلدی غم قلب بتوله
غارت که شروع اولدی ییوب سیلی اوشاقلار
سالم بیله فکر ایلمیون قالدی قولاقلار
صحرایه قاچان وقته باتوب قانه ایاقلار
قیزلاری دوتوب وحشت ایله موقع حساس
سسلندیله بس هاردا قالوبسان عمو عباس
بیلمم قاچاقاچدا نه حالا قالدی رقیه
جانین قوتارا هاردا پناه آلدی رقیه
بیر سوز دیدی بو عالمه اوت سالدی رقیه
یوخدور بابام ایندی گله امدادیمه عمه
دوشدوم داخی جاندان چات ئوزون دادیمه عمه
میرزائی بو شعره باخا گر لطفیله زهرا
قیمت تاپار ئولمز نقدر واردی بو دنیا
محشرده اولار باشیوه بیر تاج مطلّا
عمرون نقدر واردی یازوب آغلا حسینه
گی قاره محرمده ئورک داغلا حسینه
