پَریشان طُرّهء زِینَب که غَرقِ اَشگِ ماتَم دور
خیالی اَشگ اَفزا دور چون اَبرِ بارشِ غَم دور
نِقابِ مَهدِ عُلیا دور حِجابِ عِصمَتِ والا
مَسیحا طَیلَسانی دور که سِرَّ قُدسی مَریم دور
یُوزی کشف اوُلدی اَمّا سِرَّی وار اَغیارَه کشف اوُلماز
کلام اللهِ ناطق کَسری جَزماً فَتحینَه ضَم دور
یُوزیندَه زُلفیلَه مَکتُوب خَطّ لَن تَرانی دور
تَجلّای رُخیندَن غَشّ اِیدَن مُوسای اَکرَم دور
مُنافق روی زِینَبدَن تَماشا قِیضی نی آلماز
که زُلفی لیلةالقَدر و یُوزی ماهِ مُحرّم دور
پَرِ عُنقای وَحدتدور نِقابِ عارضِ زِینَب
عَلاوه اَهلِ کِثرَت نُورِ باطن دور مُسلّم دور
فَنایَه گِیتسَه عالملَر آچلماز پَردهء زِینَب
وَ یَبقی وَجه رَبّک آیَه سی بُرهانِ مُحکَم دور
بُو زُلفین شَرحی طُولانیدی حَلّ عُقدی مُشکل دور
دالیندا شاهدی وار شاهدی اللهِ اَعلَم دور
او گُون باشین آچوب زِینَب نَه گُوردی نِیزَه باشینده
حُسینین تِل بَه تِل آق سَقّالی قانیلَه پُر نَم دور
قُویُوب یُوز قَتلگاهَه پارَه پارَه نَعشینی تاپدی
گُوروب بیر آز قَباقجا گُوردُوقی اَعضاسی بَر هَم دور
سُواد سُورهء نیورِ هُدا دور آیهء تَطهیر
اؤزی خَط یُوز دالندا ناطقِ قرآنِ اَعظم دور
دُوشُوب چون صَفحهء قرآن یازیلمُوش آیهء قرآن
قَلَم اوُخ قرمزی قانیلَه مَعناسی مُتَرجِم دور
دِیدی قیلّام کَفَن بو جِسمَه زُلف مُشک باریمدَن
اَگر چه مُشک اِیگیندَن زَخمدارین عادَتی رَم دور
وَلی چون زُلفیمی آهیم شَراری یاندیرُوب قارداش
تُوکُوم قُوی سینوَه چون زَخمَه یانمُوش قارَه مَرهَم دور
داغیلمُوش زُلفی تَک نَعشین داغتمُوش نِیزَه و خَنجَر
نَفَس گَلمَز وَلی گُلماقلیقی قانین دَما دَم دور
قُویُوب نَعشُون قُوری یِردَه گِیدور حوّالَرون شامَه
چَکَن بُو هِجر دَردین مَندَن اوُزگه هانسی آدَم دور
حسین آدُون قُویُوبلار خارجی عِلّت بُو دور گُویا
گُوروبلَر حَقّینی خارج اِیچیندَه چوخ مُجَسَّم دور
حسین ئولدی دُوتولدی گُون سالوب زُلفین یُوزَه زِینَب
چخا هَر گُوندَه گر مِین گُون گِینه آفاق مُظَلَم دور
دِلیم یانسُون دِیسَم زِینَب یُوزین اَشرارَه گُوستَردی
مَگر صِدّیقۀ کُبرا قِیزینا شِمر مَحرَم دور
گُورَه بُلمَز جَمالین بُلمِیَن لا یُبصِرون اَهلی
بَصیرَت اَهلینَه قرآنِ حَق سِرّی مُتمّم دور
دُوشَردِی گه یُوزی اوُسته دوراندا زُلفی اؤرتَردی
خیالوندا او حالی سِیر اِیلَه گُور بیر نَه عالَم دور
قُوجاقلُوب نَعشین آغلاردی اؤپَردِی زَخمین اِیگلردِی
دِیردی دور آنام اوُغلی باجین اَحوالی دَر هَم دور
هَدَر گِیتمَز #دخیلین قانی گر چه فی المَثَل سَگ دور
نَه چُون رُوحُ القُدُس اُستادی دور، کَلبِ مُعلّم دور
- سه شنبه
- 7
- شهریور
- 1402
- ساعت
- 23:23
- نوشته شده توسط
- یوسف اکبری
ادامه مطلب
