اشعار ترکی امام حسین (ع)

(نالان) اولوب اؤز غمیمی سنین غمینله قاتمیشام
یاپیشمیشام اتگیندن آیری اتگی آتمیشام
بؤیوموشم آدینلا من ، عرش اعلایه چاتمیشام

دنیایه وئرمرم سنی بو افتخار بسیم حسین
یئرلرده گؤیلرده فقط سن سن هامی کسیم حسین

عاشقلرین دوتار عزا ، ناله لری قالخار گؤیه
دردلی لر آغلایار آقا ، باشلارینا دؤیه دؤیه
ایسلر بوتون درده دوا لبیک حسین دیه دیه

سنین قاپین عاشقیوه وئریب دی آبرو حسین
باخساندا باخماساندا سن ائدر قاپیندا هو حسین

بیلمسه ده هر کیم اینان قدریوی بیز بیللوق آقا
دیلده ائدیب آه و نوا درگهیوه گللوق آقا
سن سن امیدیمیز فقط ، سن باخماسان اؤللوق آقا

بو قاپیدان سورا حسین آیری قاپی یا گئتمروخ
قوللوق ائدیب آیری دینه سنی پیشیمان ائتمروخ

آی شهدانین آقاسی دینه ائدن جانین فدا
سالار هارای یئره گؤیه سندن اؤتور شاه و گدا
غمینده هئی ووروب باشا هر آن سنی ائدر ندا

بیزده حسین حسین دئییب قان آغلاریخ دؤنه دؤنه
عرض ارادت ائیلروخ ال سینه ده آقا سنه

بیلسن اگر لایق منی ، سنه فدا اوللام اؤزوم
کرملی اول الینده دی غمینده بو آغلار گؤزوم
محشر گونی زهرا آنان یانیندا آغ ائیله اوزوم

نئجه کی سایه سالمیسان باشیمیزا ایندی آقا
یامان گونوموز وار حسین قیل اوندادا لطفون عطا

هر هانسی نوکرین سنی چاغیریب هر یئرده حسین
نظر قیلب سان هر زمان عنایت ائت بیرده حسین
عاجز قالیب طبیب لر چؤخ درمانسیز درده حسین

(نالان) اولوب سسلر سنی هامی مریضلر یا حسین
سنه باغلار امیدینی ، لطفیوی گؤزلر ، یا حسین

• یکشنبه
• 15
• مرداد
• 1402
• ساعت
• 14:54
• نوشته شده توسط
• یوسف اکبری

ای فلک اولسون گوروم معموره عیشون خراب
قویمادون بیر اهل دل دنیاده اولسون کامیاب

ویردون هر بیر دوره ده بیر زهریله لبریز جام
قیلدون اول جامیله اهل ذوق و عشقی تلخکام
ایلدون روز وفات حضرت خیرالانام
بیر (شهابین) داغینه یوز مین دل اهلین دلکباب

سینه لردن گیتمه میش داغ (محمد روفه گر)
ایلدون داغ (شهابیله) او داغی تازه تر
هجرتین مین اوچ یوز آتمش سگزی ماه صفر
هانسی گون؟ روز وفات حضرت ختمی مآب

بیر (شهابیکه) حسینه اللی ایل مداحیدی
خلقی خوش ، رفتاری نیکو، هر ایشی اصلاحیدی
نشئه شهد کلامی اهل روحه راحدی
راح روحه شعر شیریندور ، نه ساغر نه شراب

بیر نفر شاعر چتیندور امتحان ویرسون بیله
یازماسون عمرینده اصلا شعر پوچ و باطله
هر نه تشبیه ایتسم اشعارین وران طعنه گله
لولوء لالا دیسه قیمت ندور در خوشاب

بیز گرک حال حیاتینده بولیدوخ قدرینی
ساخلییدوخ محترم ، اول چرخ نظمین قدرینی
وار گمانیم محفلی فردوس اعلا صدرینی
ایلیوب ایمدی مزین حسنیله (یوسف شهاب)

بیر نفر نوکردی بو ، شاه شهیدانه غلام
دفن و کفنینده ایدوب تبریز اهلی ازدحام
نوکره باخ ، شاهه باخ ، گور چرخده وار ننگ نام
بی کفن توپراقلار اوسته جسم پور بوتراب

مفتی عشق حسینی بیله بولموشدی صلاح
قان ایچینده قالسون عریان جسمی اوچ شام و صباح
بیر کفن اولسون او جسم اطیبه نسج الریاح
بیر کفن آت دیرناقی ، بیرده حریر آفتاب

بیر کفنده عاقبت اوز اوغلی سجاد ایلدی
نالیه گلدی آناسی فاطمه داد ایلدی
نه کفن صبریم حصارین یخدی بر باد ایلدی
وار یری اولسون بو عالم سیل اشگیمدن خراب

نه کفن مانند و مثلین گورمیوب بو چرخ پیر
آختاروب یانمش تالانموش خیمه گاهی ناگزیر
عاقبت اهل قبیله تاپدی بیر پاره حصیر
بو کفن اولدی او جسم چاکچاکه انتخاب

قویدی قبره اوز آتاسین شهریار منتخب
قبری اوسته بارماقیله یازدی اول عالی نسب
بو حسین بن علیدور ، ئولدوردوبلر تشنه لب
قلبینه سوز عطش سالمیشدی اوچ گون التهاب

اولمادی راضی آتادان آیری سالسون اکبرین
قویدی پائین پای شهده شاهزاده اکبرین
هر زمان یاد ایلسم شکلین او قبر انورین
گوز یاشیم جاری اولار رخساره گوزدن ، مثل آب

آیریلاندا خیمه دن بیر سوز دیمشدی گوشنه
گلدی اوچ گوندن صورا گویا همان سوز هوشنه
سود امر قارداشینی ویردی آتا آغوشینه
خوشدی شهلر سینه سینده شاهزاده ایتسه خواب

گوردولر سجادی ناگه باشلادی بیر سمته یول
تاپدی بیر پیکر ، نه پیکر؟ نه بدنده باش نه قول
ای فلک بو ظلم لر بسدی یورول شرمنده اول
مطلبه من پرده چکدیم ، سنده بیر ایله حجاب

پیکر عباسی سالمیشدی نه حاله کوفیان؟
هانسی داده وار او قدرت کاملاً ایتسون بیان
یاتدیقی یردن مبرهندور اولور مطلب عیان
تاپموب امکان حمل و نقله خسرو گردون جناب

دوشدوقی یرده قازیلدی قبری داد و آهیله
سری وار قولسوز علمدار آیری دوشدی شاهیله
فاصله اولسون گرکدور آفتاب و ماهیله
بیر بیریندن گوز گوتورمز آفتاب و ماهتاب

بار الها من سنی ویرم علمداره قسم
عزت دارین ویر ، دنیاده ساخلا محترم
ختم اولاندا عمروموز اوز لطفویله قیل کرم
جرموموزدن گچ ، حسینی کیمسه لردن ائت حساب

(شانیا) بو شعری(خوشخوان) اولدی سندن خواستار
تا او مرحومون اولا تاریخ فوتی یادگار
حیف اولا دنیاده واردی گل تک آز بهار
دلنشین سوزلرده اما وار همیشه آب و تاب

قیمتین زهرا بولر شیرین سوزون آغلار گوزون
گون گچر بیر گون گلر دنیاده سن یوخسان اوزون
ایستسه زهرا قالار بزم عزاده سوزلرون
خلق ایدر دائم دعا ، خلاق ایلر مستجاب

• دوشنبه
• 16
• مرداد
• 1402
• ساعت
• 22:50
• نوشته شده توسط
• یوسف اکبری

وجود پاکنه اولمشدی هر قضیه که حتم
تمام اولدی چون اوچ گون اولوب بلالری ختم

گلوب بنی اسد اول سرزمینه زار و فکار
امام جسمینه قازسونلا تا او چولده مزار

او یاندا کوفه ده سجاده یتدی بو الهام
که کربلایه گلوب دفن ایده امامی امام

قبیله اهلی هامی دیلرینده ناله وداد
باخوردیلا چوله گورسندی سید سجاد

عقیق رنگی سرشکین توکوب رخ زرده
آقا حضورینه گلدی دوروب برابرده

گوروب جنازه سینین نقشه سین پوزوب اعدا
ویروب سلام او سرخیل عترت طاها

آتا وجودینه باخدوقجا دل گلوب شوره
ایدوب جنازه نی تشبیه وتر موتوره

زیارتنده همین کلمه نی یازوبلا صریح
بودور خیال ایدم من او نکته نی تصریح

بویورموییدی اگر اول شه دل افسرده
بنی امیه ایدن ظلمه چکمیون پرده

محالیدور که ویریدیم او نکتیه توضیح
ایدیدوم اول شه دینون کلامینی تشریح

زیارتنده کی سوزچون دلیل دور الده
علوم صاحبی ثبت ایلیوبدی مقتلده

او قدر آتلار ایاق وورموشیدی پیکرینه
قارشمیشیدی سوموکی اتی بیری برینه

علیل امام گوروب اولموری ویره حرکت
قبیله اهلینه فرمایش ایتدی اول حضرت

اوزوزی خیمه لریمیز یانان یره یتورون
اگر تاپولسا بو مظلومه بیر کفن یتورون

قبیله اهلی شبیه ایتدی گوزلرین ابره
که شاه جسمی کفنسیز قویولماسون قبره

یانان خیام یرین گزدیلر نوا دیلده
تاپوب گتوردیله بیر پاره بوریا الده

امام یغدی اونا شاه دینون اعضاسین
مزاره قویدی گوز یاشلی جسم زیباسین

قبیله اهلی گوروبلر که سید سجاد
صاقا صولا باخور آغلور دیلینده ناله وداد

تمام حیرتیله قتلگاهیده دولانور
گهی باخور یره آغلور گهی دورور دایانور

دولاندی اشگیله دولدوردی دیده ترینی
تاپوب گتوردی بیلکدن کسیلمیش اللرینی

گینه گوروبله امامین یوزه سرشکی آخور
اولوبدی خم قدی گودال قتلگاهه باخور

اویان بویان ایلیوب قتلگاه توپراقینی
غریب آتاسینون آختاردی تاپدی بارماقینی

علی اکبریده اول امام دل محزون
قویوب آتا ایاقی آتدا ایلدی مدفون

علی اصغریده اول علیل دلخسته
قویوب آتاسنون اول قانلی سینه سی اوسته

آتا مزارینی ایتدی درست اوغلی علی
یازوبدی قبرینه بیر یادگار خط جلی

حسین قبریدی بو قبر علت الاکوان
همان حسین که باشین کسدیلر سوسوزدالیدان

دونوب النلرینه بیر به بیر او شه باخدی
آلیشدی قلبی یوزه قانلی گوز یاشی آخدی

گوروب وروبدیلا از بسکه یاره اهل نفاق
اولوبدی گل کیمی قانلو جنازه لر اوراق

بولوردی نکته مخفینی ، حجت اللهیدی
تمام کائن و ما کان علمه آگهیدی

بولوب که گردش ایام نه سیاق اولاجاق
او یر بهشت کیمی بارگه رواق اولاجاق

لزومدور اولا شه استانه سینده غلام
شه آستانینه دربان قویوب حبیبی امام

قالان جنازه لره باخدی گلدی فریاده
گوزی دوشوبدی او صحراده نعش داماده

گوروب پوزوبدیلا ترکیب جسمنی کفار
اتین ، قانین ، سوموگین بیربیره قاتوب آتلار

بدن دیمه دیه سن گلدی یرده خنداندور
یارالی پیکری توپراقلاریله یکساندور

همین بو طرزده دور یرده هر نه پیکر وار
دگل لزوم قازیلسون هامی شهیده مزار

قبیله اهلینه امر ایتدی شاه عرش جلال
مزار شاه یانیندا قازوبلا بیر گودال

یغوبلا قطعه به قطعه بدنلری یردن
درست ایلدیلر اوردا بیر کیچیک مدفن

کشیکچی لازمه دور شاهه رسم چون بیله دی
آتاسنون قوشونون اوز یانیندا دفن ایلدی

امام عالیمیدی یرده بیر یایرالی قالور
اونون یارالاری شیر خدا قرارین آلور

بیر آیری سری وار ایتدی دوباره استعلام
بویوردی واردی قالن ، یا که دفن اولوبدی تمام ؟

قبله اهلی دیدی یا بقیه الاخیار
کنار نهرده ، بیر پهلوان جنازه سی وار

نقدر جهد ایلدوق ای امام دور زمن
اونون جنازه سینی قالخزانمادوق یردن

ز بسکه جسمی اولوب تیر اشقیا هدفی
قالور صاقین گوتورنده یر اوسته صول طرفی

چخوبدی جانی بدندن هله قانی سوزولور
وراندا ال بدنی بند بندیدن اوزولور

امام آغلادی اود دوتدی یاندی بو سوزدن
گلوب نوایه جگر قانینی توکوب گوزدن

ایله نوایه گلوب نی کیمی او میر هدا
که دولدوروبدی بوتون دشت نینوانی نوا

دیدی ای اهل قبیله سولوب منیم چمنیم
او گل کیمی داغیلان نامدار عمومدی منیم

گلوب امامیله اهل قبیله خورد و کبار
همان او یرده علمداره ده قازوبلا مزار

ز بسکه اولموشیدی جسم پاکی صد پاره
درست قیلدیلا بیر خوردا قبر علمداره

• دوشنبه
• 16
• مرداد
• 1402
• ساعت
• 22:51
• نوشته شده توسط
• یوسف اکبری

گوزوم مجسّم ایله کربلاده محنته باخ
شهیدِ کرب و بلایه یِتَن مصیبته باخ

او گونکی لشکره فرمان ویروبدی سعد اوغلی
یغون جنازه لری دفن ایدون عداوته باخ

حسینین اولمادی امّا او چولده دفن ایدنی
قوناق چاغیرماقا باخ بیر قوناقه حرمته باخ

قالوبلا اوچ گیجه گوندوز جنازه لر یرده
او بی حیاده بیر انصافه باخ مروّته باخ

ایدوبله دفن او چولده تمام ئولنلرینی
قویوبلا گون قاباقیندا حسینی جرأته باخ

یتیشدی حضرتئ سجّاده امرِ ربّ جلیل
آتان حسینی گیدوب دفن ایله بیر حکمته باخ

گلوبدی طرفة العین ایچره کربلایه امام
او گلماقیندا امامون کمالِ سرعته باخ

نه گوردی اهل قبیله گلور بیر آتلی ولی
تمام دوشدوله تشویشه اضطرابته باخ

یتوب سوروشدی امام اول قبیله اهلیندن
سبب ندور بو یغیشماقدا؟ طرزِ صحبته باخ

جواب ویردیله بیز گلمیشوق تماشایه
بو جسملرده ای آتلی بویور جراحته باخ

کتاب صفحه سی تک پاره پاره یرده قالوب
ورق ورق یازیلوب جلدسیز کتابته باخ

بویوردی حضرتِ سجّاد اوزوم گوزل تانورام
تصوّر ایله او بیمار امامه قدرته باخ

تاپوب آتاسینی قان ایچره بیر چوخور یردن
سلام عرض ایلدی کثرتِ محبّته باخ

گتوردی جسمینی قویسون مزاره گوز یاشلی
بوکوب حصیره کفن سیز اونی حقارته باخ

بولوردی اصغرِ عطشانه چوخ محبّتی وار
ویروب قوجاقینه خوردا بالانی ، همّته باخ

قویوب جنازه نی قبره یازوب او قبر اوسته
بودور حسینِ لب عطشان ، کلامِ حجّته باخ

گوروبکی لیلی مضطر ملول اولار دلدن
قویوب ایاق طرفینده علینی حرمته باخ

قازوبلا امرِ امامیله بیر بویوک گودال
که دفن ایدوب شهدانی گوزل سعادته باخ

گوروب حبیبی شهنشاهه لایقِ دربار
اگر نصیب اولا قبری گیدوب جلالته باخ

توکوب سرشکینی باخدی امام فراته طرف
گوروب عَموسی دوشوب سویلدی جراحته باخ

نه وار قولی بدنینده نه باش سلامتدور
او حالی فکر ایله شیعه غم و مصیبته باخ

توکوب عذاره گوزوندن سرشگِ حسرتینی
بویوردی رحمت ایده خالقیم شهامته باخ

منیم عَموم کیمی کیمدور رشید اشجعِ خلق
دوغولمیوب و دوغولماز کمالِ همّته باخ

اوزی سوسوز سو کنارینده تشنه جان وئردی
کماله باخ ، ادب و غیرت و رشادته باخ

قازوبلا بیر بالا قبر اُول وفالی سرداره
او سرو قامته ، باخ قبره باخ ، شجاعته باخ

هامی بولور نیه قبرین کیچیک قازوبلار اونون
اشاره ویرماقا یوخ احتیاجی محنته باخ

خلاصه دفن ایلدی اوز عموسین اُول شهِ دین
مجسّم ایله گوزونده همان او ساعته باخ

اگر نصیب اولا قبری بو جمعیلن #غمگین
گیدوب او یرده دایان بیر مقام و شوکته باخ

بو وقفه اولمادی قسمت او قبرِ شش گوشه
توجّه ایتسله گر ، لذّتِ زیارته باخ

• دوشنبه
• 16
• مرداد
• 1402
• ساعت
• 22:54
• نوشته شده توسط
• یوسف اکبری

گلزارِ نبی اولدی خزان اهلِ قبیله
دوغراندی سوسوز پیر و‌ جوان اهلِ قبیله

اَبدان مطهّر دوشوب آلقاندی جمیعا"
لب تشنه ویروب جان هامی عطشاندی جمیعاً
آماجِ دم خنجر و پیکاندی جمیعاً
بیر بیر ایدرم ایمدی بیان اهلِ قبیله

عریان بو چوخور یرده کی شاهِ شهدادی
باشسیز بدنی ، اللری یوخ ، جسمی یارادی
مقتولِ خدنگِ ستمِ اهلِ جفادی
جسمینده باخون واردی نشان اهل قبیله؟

بی حد یاراسی واردی گورورسوز بو یاراسین
آت چاپدیلا گُل جسمینه سویدیله لباسین
دشمن داغیدوب خیمه سینین جمله اثاثین
ظلم ایلدیلر شمر و سَنان اهل قبیله

بو سبطِ پیمبر بئله دوشموش ندن آخر؟
آغوشِ نبی زینتی دور بو بدن آخر
آیا نه روادور قویالار بی کفن آخر
یوخ جسمینی بیر قبره قویان اهلِ قبیله

بو تازه جوان که وار اونون ماه لقاسی
فرزندِ پیمبردی بو مظلومین آتاسی
اکبردی آدی کرب و بلا کوهِ مناسی
بذل ایلدی بو نوعیله جان اهلِ قبیله

بو طفل که قونداقی اولوب قانیله غلطان
میدانه قوجاقینده آپاردی بابام عطشان
سو ویرمدیلر ، حرمله ویردی اونا پیکان
یاندیردی منی تیر و کمان اهلِ قبیله

بو غم منه چوخ ایلر اثر قلبیمی داغلار
گر علقمه نین سمتینه گیتساخ اولور اظهار
اوردا یخیلوب سرو کیمی قدّ علمدار
قوللاری دوشوب قانی روان ، اهلِ قبیله

نعشِ شهدایه ایدورم هر چه نظاره
بیر بیر ائلماق دفن ، تاپیلماز بونا چاره
مجموعینی ناچار قویاق بیرجه مزاره
دلده ایدوری سلبِ توان اهل قبیله

بو آلِ پیمبر که تاپوب بوردا شهادت
هر مرقد ایچون من قویارام طرفه علامت
بوندانصورا هر هفته ایدون قصدِ زیارت
دائم ائلیون آه و فغان اهل قبیله

سیز دقّتیله ناله ی شبگیریمه باخساز
بو دفن خصوصینده بو تدبیریمه باخساز
بو رنگ بو رخساره بو زنجیریمه باخساز
انسابِ شریفیمدی عیان ، اهلِ قبیله

بو چولده منِ بی کسه سیز ایلدوز امداد
اعلان ایدرم آدیمی اولسون ایویز آباد
فرزندِ حسین بن علی سیّدِ سجّاد
بو عصره امامم بو زمان ، اهلِ قبیله...

• دوشنبه
• 16
• مرداد
• 1402
• ساعت
• 22:55
• نوشته شده توسط
• یوسف اکبری

بو غم زده خاطر گینه صحن و چمن ایستر
بیر منظره ی قابل و سرو و سمن ایستر

مقصود چمندن نه چمن، کرب و بلادور
سروِ دلیم عبّاس او خورشید لقا دور
منظور سمندن او امامِ شهدا دور
چون اهلِ حقیقت نه گل و یاسمن ایستر

بو عالَمِ تکوینه مکوّن که خدادور
مقصود بو ایجاده فقط حُبّ ولادور
سررشته ی اهلِ عرفا مِهر و وفادور
بو مطلبه کشّاف، حسین و حسن ایستر

بو حُبّ سبب اولدی حسین عترت و آلین
ترک ایلدی شوقیله رهِ حقده جلالین
چون حق یولونا ویردی حسین مال و منالین
عالمده بو واضحدی که مُثمن ثَمَن ایستر

خلّاقه اولوب لازم حسینه عوض ایتسون
اولدی بو اراده که حسین حالینه یتسون
امر ایلدی بیماره اونون دفنینه گیتسون
محبوب حبیبین نجه عریان بدن ایستر؟

چون کرب و بلایه یتیشن وقتیده بیمار
بیر جمع گوروب حاضر او صحراده دل افکار
اوز عزملرین اهلِ قبیله ایدوب اظهار
تا کشف اولا مقصودِ دلِ ممتحن ایستر

دفنِ شهدایه او امام اولدی مصمّم
اول جمعیله مشغول اولوب اول شاهِ معظّم
دفن اولدولا بیر نوعیله اصحابِ مکرّم
بو امریده ابصارِ حقیقت گورن ایستر

گوردی آتاسین پیکرِ مجروحیله عریان
گونلر قاباقیندا قالیب اولشاه لب عطشان
تقدیمِ سلام ایلدی با دیده ی گریان
صدپاره اولان نعشی گوروب بیر کفن ایستر

امر ایتدی او جَمعه دولانا کامل او یرده
بیر زاد تاپالا دفنه اولا نائل او یرده
بیر پارچا اولوب کهنه حصیر حاصل او یرده
بیمار بو غمده نجه بیت الحزن ایستر

بیر قبر درست ایلدی اول سبطِ یدُالله
ایتدی آتاسین دفن تاپوب اصغری ناگاه
قویدی بالاسین سینه سی اوستونده چکوب آه
تا امّته محشرده شفاعت ایدن ایستر

ناکام قالان اکبری گوردی یری بوشدور
از بسکه مؤدبدی ایاق سمتینه خوشدور
دفن ایتدی همان یرده کی شهزادیه نوشدور
یا اینکه آتاینان بالا بیر انجمن ایستر

عبّاسِ وفاداره یتوب نوبه ی آخر
دوشموشدی فراته طرف اول طیّب و طاهر
تا گوردی عمو نعشینی اعضا مُتَناشِر
بیمار ملول اولدی او حاله دوزن ایستر

سجّاد یازوب قبرِ امامه بیر علامت
بو قبرِ حسین‌دور که ایچوب جامِ شهادت
عطشان یتیشوب قتله بو صحراده جماعت
بیر قطره او سو ایستدی امّا ویرن ایستر

(حصنی) یتیشوب مطلبون آخرده تمامه
سنده گوزیوی تیم گینه اول شاهِ انامه
چون باب وسیعدور اوزیوی سال او مقامه
مقصودوی عرض ایله که گوگلون ندن ایستر.

مرحوم حصنی خوئی، فنّ شاعری را از مرحوم استاد میرزا عبدالوهاب حقیر خویی(ره) آموخته و پس از فوتِ مرحوم حقیر خویی، قسمتی از اشعارِ حقیر خویی و سروده های خود را در سال ۱۳۵۰ هجری قمری، به چاپ رسانده است، مرحوم حصنی خویی معاصرِ مرحومین گنجی خویی و سائل خویی بوده است؛ فقیر خویی که اشعارِ مراثی زیادی دارد و دارای دیوانِ چاپی هم می باشد، فرزندِ مرحوم حصنی خویی می باشد؛ و یک حصنی تبریزی هم در شهرِ تبریز، محله ی شتربان، چهار دربندها سکونت داشت، که این حصنی به غیر از حصنی تبریزی است.

• دوشنبه
• 16
• مرداد
• 1402
• ساعت
• 23:07
• نوشته شده توسط
• یوسف اکبری