محضر سلطانه گلدی اذن آلوب شهزاده قاسم
شوقله میقات عشقه آت سالوب آزاده قاسم
گلدی میدان قتاله یوز دوتوب اهل جداله
غیضدن گوزلر دولاندی اولدی بیر پر خون پیاله
سسلدی هل من مبارز سیزده ساله سُلاله
کیم دیور من من بویورسون تاپشوروم دست زواله
جنّت الاعلاده احسن سویلسون زهراده قاسم
هی ویریب رهوارون اوسته گزدی میدان نبردی
سالدی بیر توز رزمگهده دوتدی جولانگاهی گردی
رعشیه سالدی یلان کفری یاپراق تک اسردی
باشلارا سُمّ ستوری داش توکردی کول سپردی
اود توکوب قور یاغدیروردی بسکی اول صحراده قاسم
مرکز میداندا ناگه بیر صلابتله دایاندی
نعره ی اللّه اکبر چکدی یاتموشلار اویاندی
باشلارین سالدی اشاقه یل یل اعدا اوتاندی
قاسم بن المجتبایم سویلدی شأنیم عیاندی
سبط زهرا نور عینی جنگوزه آماده قاسم
مکتب قرآن و دینون ساده بیر سربازیم من
قلّه ی ایثار و عشقون جنگجو شهبازیم من
بوستان هاشمینون طرفه سرو نازیم من
حق شعارم مرد حقون محرم و جانبازیم من
جان بکف نو رس جوانم شاهیمه دلداده قاسم
اکبرون قانین توکنلر روبرو گلسون قباقه
گوندریم هدیه رئوسین والی شوم عراقه
شرعده واجبدی حرمت میزبان ایتسون قوناقه
حتک حرمت ایلیوبسوز آلّانوبسوز طمطراقه
ساتماز اوز دینین سیزون تک مرد استبداده قاسم
برق شمشیرین گورنلر دوشدیلر خوف و هراسه
گوزلری پر پر ویرانلار نیزه نی اوخشاتدی داسه
قورخوسیندان پهلوانلار یوز گتوردی رمل و طاسه
چون فراره یول یوخیدی هیچ شباب و پیر ناسه
هی حریف ایستور بویاندا صحنه ی هیجاده قاسم
بیر قوی کافر واریدی ازرق شامی آدیندا
دورد خبیث اوغلی باشیندا اولدی پیکاره مهیا
گلدی اول خردا اوغلی ازرقون میدانه گویا
حقلن باطل دایاندی تن به تن باشلاندی دعوا
سو ایچوب دشمن ولیکن تشنه اول مأواده قاسم
ال گدیب ذوبین و تیره اوینادی ششپر هواده
فرصتی اوّل حریفه ویردی قاسم سهل و ساده
ایستدی ویرسون نمایش ابن ازرق بن زیاده
قاسمه بیر نیزه آتدی غیظله اول پست زاده
نیزه سین دوتدی هواده سندیریب شهزاده قاسم
یار و اغیار ایچره بیردن قوزانوب احسن صداسی
جومدی قاسم شیر نر تک چکدی تیغین حق رضاسی
ویردی بیر ضربت پوزولدی دشمن دینون نماسی
گت دیدی نیرانه دیو نفسون اولسون جزاسی
صید اولا حاشا سنون تک پست و بد بنیاده قاسم
صر صر تقدیر توکدی نخل ظلمون شاخ و برگین
ازرقون دورد اوغلی بیر بیر نوش ادیب مرگین شرنگین
غیضدن اود دوتدی ازرق اوینادور زین اوسته چنگین
عاقبت ازرقده گلدی ایچدی زهرین جام مرگین
بیلمیوردی بی مثلدی تن به تن دعواده قاسم
قوردیلار شورای جنگی خائنان بی دیانت
مکریله اول نوجوانه ایلسون اعدا خیانت
حمله ایتسون دورت طرفدن پیکری گورسون جراحت
مجتبی ال باشدا گلسون اوغلینی ایتسون زیارت
قرمزی قاندان گینسون اوخشاسون داماده قاسم
گلّه ی روباه ایچینده دوشسه نیلر بره آهو
مین نفر اطرافین آلدی آچدی نامردانه بازو
هر گلن بیر یاره ویردی قانه همرنگ اولدی گیسو
یاره لر مثل کواکب هی ویرور جسمینده سو سو
سسلیور سلطان دینی دمبدم فریاده قاسم
راوی مطلب حمید ابن مسلم دور بو یرده
سویلیور من ناظریدیم عین بحران خطرده
بیر عمر سعد آدلو ظالم ویردی بیر شمشیر او مرده
باش بولوندی آخدی قانی گوزلرینه چکدی پرده
گتدی یارادن یخلدی قالدی زیر پاده قاسم
دمبدم سسلردی شاها سعی ایله امداده تز گل
جان دوداقیمه گلوبدی لطف ایله فریاده تز گل
اکبره قربان کسیلدی قاسمون سال یاده تز گل
دستگیرم بی مروّت رحمسیز جلّاده تز گل
دوره می دشمن آلوبدی تکدی بو بلواده قاسم
گوش جان عشّاقه هر آن حاصل ایلر ارتباطی
پیک عشقه یوخ مسافت طی ایدر اقصی نقاطی
گلدی امدادینه گوردی قاسمون وار قان بساطی
بیلدی عرفان مرکبیله ترک ایدیب کهنه رباطی
یاره لردن گل بجردیب گوئیا اعضاده قاسم
چکدی تیغ مرگبارین لشکری ویردی کناره
یاره لی جسمین نه گوردی قان ایچینده پاره پاره
سسلدی قارداش بالاسین گوز یاشین توکدی عذاره
گوزلرین آچدی گوروبدور ماهی سوزدی چون ستاره
تاپدی استقرار او ساعت شاخه ی طوباده قاسم
گوردی گل شاخین احاطه ایلوب انبوه ناوک
ئیلدی اوپدی گولوندن رد ایدیب اوخلاری تک تک
گل بالا گیموشدی قرمز مخملی شاهانه کوینک
طوی گونی غرق اولدی آللّه قانلی بیر دریاده قاسم
- دوشنبه
- 4
- مرداد
- 1400
- ساعت
- 20:46
- نوشته شده توسط
- یوسف اکبری
ادامه مطلب
