هر گون عاشورادی هر یِر کربلا دور شیعه لر
عرش و فرش آغلار جهان ماتم سرا دور شیعه لر
یغ بساطِ عیش و نوشون فصلِ ماتم دور بو آی
قاره پوش اول یاسه بات ماهِ محرم دور بو آی
قامتِ مَه قامتِ زینب کیمی خم دور بو آی
چون عزای خامس آل عبا دور شیعه لر
شیعۀ خالص بو آی گیتمز گلستان سیرینه
نه گلستان نه چمن نه باغ و بستان سیری نه
قُمریلر کُوکُو دیر چخموش نیستان سیری نه
وادی کرب و بلا گلشن سرا دور شیعه لر
زلفِ زینب تک پریشان دور بو گوگلوم خانه سی
اولموشام مجنون لیلا تک حسین دیوانه سی
بی سبب دولماز سرشگیله گوزوم پیمانه سی
ورد و ذکریم هر زمان یا کربلا دور شیعه لر
قبرینون شوقی نه مدت دور دوشوب دور باشیمه
اولمادیم من هم عنان اوز یاریمه یولداشی مه
چاره یوخ دور بیر گمانیم وار همین گوز یاشی مه
قطره سی دریا، خریداری خدا دور شیعه لر
ساخلیان الله اکبر دور حسینون ماتم ین
روضه خوان دور عرشده بو شاهه جبریل امین
متّصل فریاد ایدر آغلار امیرالمومنین
آغلیان بو شاهه جدّی مُصطفی دور شیعه لر
حوریان جنّت ده آغلار مریم و سارائی لن
دم به دم آدم سیزیل دار حضرتِ حوّائی لن
گوز یاشین زینب توکر انسیۀ حورائی لن
باش آچوب زلفین یولان خِیرالنّسا دور شیعه لر
نوجوان لار یاده سالسون شاهزاده اکبری
عکس مرآت جمال مَظهر پیغمبری
ایسّی قوم لار اوسته قالدی پاره پاره پیکری
دلده وردی لیلی نون وا اکبرا دور شیعه لر
یان دورور عالم لری شهزاده قاسم محنتی
تازه داماده باخون اولدی کفن طُوى خلعتی
حشره تک گیتمز اور کلردن بو داغِ حسرتی
کاکلی، زلفی، الی، قاندان حنا دور شیعه لر
عرصه نی تنگ ایتدی دشمن لر شهِ بی یاوره
ویرمدی بیر قطره سو ذُرّیّۀ پیغمبره
اوخ الینده حرمله سو ویردی تشنه اصغره
بیر گورون بو هانسی مذهب ده روا دور شیعه لر
سو گورنده تشنه لب سقانی شیعه یاد ایدون
یاد ایدون حالین سو مشگین قوللارون فریاد ایدون
زینب و کلثومه گوز یاشیله سیز امداد ایدون
بو حسین سقّاسی دور صاحب لوا دور شیعه لر
باخ بصیرتله گوزوم بیر کربلا صحراسی نه
غرق اولوب نوحِ نبی کشتی سی قان دریاسی نه
دشمن از بس اوخ وروب اول زخمدار اعضاسی نه
پیکری باشدان باشا تیر جفا دور شیعه لر
ذُوالجناح اوستن دوشنده شاهِ مظلومان یره
ویردی جسم چاک چاکی تازه روح و جان یره
یاره سیندن چشمه چشمه آخدی ناحقّ قان یره
تربتی باعث او دور خاک شفا دور شیعه لر
گوردیلر اُول بی کسی اُول عرصه ده بیدادرس
قتلِ نفس ایتماق لیقا مشتاق اولوب هر بوالهوس
قتلی نه اقدام ایدوب خولی، سنان ابنِ أنس
لیک مقصوده یتن شِمر دَغا دور شیعه لر
بسکه قان دوتموشدی شِمر بی حیانون گوزلرین
شرم ایتموب دور پیمبردن چکوب دور خنجرین
مخزنِ علم الدّنی اوسته قویدی دیزلرین
اول شقى ده بول مورم بو نه حیا دور شیعه لر
ایستدی ذِبح ایلسون تشنه حسین بی کسی
باشینی اُول دم قفادن کسدی قطع اولدی سسی
قالدی ایسّی قوم لار اوستونده وجود اَقدسی
فاطمه اوغلی ذَبیحاً مِن قَفا دور شیعه لر
کلمۀ تکبیری له باشی اوجالدی نیزیه
نیزه نون رنجین گوروب تسلیم اولوب دور خولیه
میهمانین میزبان گتدی دیار کوفیه
هانسی مهمانون یری مطبخ سرا دور شیعه لر
کوفه قالسون کربلاسین یاده سال بو سرورین
سنگ دللّر نعشی اوسته چاپ دوروب دور مرکبین
ساربان بَجدل اولوب ال بیر کسوب لر اللّرین
فی الحقیقه ساربان چوخ بی وَفا دور شیعه لر
بو نه ظلم و نه عداوت دور عداوتدن صورا
بغض اهل کینه باخ شیعه شهادتدن صورا
وردی لار اود خیمه گاهه قتل و غارت دن صورا
آتش ظلمه یانان زِین العبا دور شیعه لر
(نوحه خوان) جاری ایله رخساری وه اشک بصر
شور گوز یاشون ویرر بی شک سنه شیرین ثمر
حاضری نه ذکر ایله بو مصرعی شام و سحر
هر گون عاشورادی هر یِر کربلا دور شیعه لر
- چهارشنبه
- 17
- شهریور
- 1400
- ساعت
- 14:55
- نوشته شده توسط
- یوسف اکبری
ادامه مطلب
