عزّتدی بیزه ماه محرّم قره کوینک
حرمتدی شهیدانه مسلّم قره کوینک
باشلاندی حسینون ائله کی ایلده عزاسی
آللّه طرفیندن چکیلر گوگده قراسی
عاشقلرینون عرشه چیخار آه و نواسی
جمله گینر اگنینه با هم قره کوینک
هر کیم وئره نسبت اوزین عشّاق زمانه
اولسون گرک عاشقده مسلّمدی نشانه
زینب کیمی واجبدی گله آه و فغانه
ائتسون اوزینی گیمگه ملزم قره کوینک
بو قاره نی اوّلده گیوب اگنینه زینب
قارداش دیلینون ازبری آغلاردی مرتّب
جسمی اریدی غمدن اولوبدی مه نخشب
قبره گئدیب آخر او مکرّم قره کوینک
مفتی بیزه بو رسمده زینبدی جهاندا
بو درسی حسین دوستلره وئردی او علیا
علّت اودی عشّاق حسین دور زماندا
اگنینده اولار موسم ماتم قره کوینک
بو قاره مخالف لره اعلان جدلدی
زین اَبه نسوان سیه پوشی بدلدی
حُرّه وهَب گیسه کیشی قاره مثلدی
فخر ایله سنه گر اولا همدم قره کوینک
مکروهدی اسلامده گر جامه ی تیره
امّا نه محرّمده عزادار حسینه
مطرودیدی بو آیدا قرا گیمه سه شیعه
هر درده دوادی همی مرهم قره کوینک
دقّت ائله هر دهه ی ایّام عزاده
شرکت ائلیور گور نه قدر شیعه بکاده
واللّهی نباید دوتاسان بو سؤزی ساده
بیر گونکی گیور حضرت خاتم قره کوینک
شخصیّت سالار شهیدان جهانه
عاجزدی گله خامده قدریجه بیانه
دائم گیم ایکاش دونه قلبیمی قانه
گوزلر اولا چون چشمه ی زمزم قره کوینک
کیم گیسه حسینه گوره قاره اوتا یانماز
ایراد ایلسه قاره نی هر کیم اونا باخماز
محشر گونی میزان و صراط اوسته دایانماز
حفظ ایلیر اوتدان سنی محکم قره کوینک
ای آنکه شدی رانده ز هر درگه حاجت
گر طالب فیض ابدی هست مرامت
خواهی شوی از غصّه ی دارِین سلامت
گی سنده حسینه گوره جانم قره کوینک
امّ سلمه زوجه ی پیغمبر خاتم
گوردی آلیب آغوشه حسینی او مکرّم
گُل تک اوپوب ائیلر دیر ای دردیمه مرهم
بیر گون سنه خاطر گیر عالم قره کوینک
بانوی گرانمایه گلیب فوری سؤاله
اشکون نیه جاریدی آقا سطح جماله
شرح ائتدی حسینون غمینی باتدی ملاله
واردور یری گوردی گیه مریم قره کوینک
عرض ایلدی امّ سلمه ای گل خلقت
گَل ایله دعا اولمیا بو حادث محنت
حضرت بویوروب واردی بو سوداده چوخ عزت
منده گزرم اوردا قدیم خم قره کوینک
آللّه اوزی بو حکمتی ایلوبدی مهیّا
اولسون بالامون شیعه سینون گوز یاشی حمرا
عشاق حسین وار یری اولسونلا معزّا
گزسون اَلی قوینوندا اورک غم قره کوینک
اون گون بالاما ایلده منیم امّتیم آغلار
آللّهدا اونون اجرینه کیم اولسا عزادار
گوز یاشلارینا خاطر عزاداری باغشلار
گوز یاشینه خوشدی اولا منظم قره کوینک
بیل قدروی آی فاطمه نون اوغلینا خواهان
نعمتدی حسینون غمی آللّه ائدیب احسان
اوتدان قوتارا امّتی بو نحویله آسان
گلبرگدی توک اوستونه شبنم قره کوینک
حمداً لکَ بو نعمت عظمایه الهی
نه نعمت او نعمت کی یوار عذر و گناهی
تمهید ایلیور خلق گنهکاره رفاهی
گوز یاشی بیاد شه علقم قره کوینک
لطفین بیزه کامل ائلیوب خالق داور
بیز ماه محرّم ایلدوک عمری سراسر
آغلار سنه یازدیقجا "صفا" شعر مکرّر
شاد اولّام حسین محشره گلسم قره کوینک
- دوشنبه
- 4
- مرداد
- 1400
- ساعت
- 16:25
- نوشته شده توسط
- یوسف اکبری
