گینه یارب آسیلوب قاره لوا گویلرده
ملکوت اهلی سالوب باشه قرا گویلرده
غفلتا دوشدی گوزوم ماه دل آرایه گیجه
قامتون گوردوم ایدوب غصه دوتا گویلرده
دیدیم علت ندی قدون بوکولوب دوتقونسان
دیدی یاس ساخلیوب الله آقاما گویلرده
دولانوب هفته لر آیلار آقامون یاسی گلوب
آغلیور اصغره مرغان هوا گویلرده
انبیا قاره چکوب جنته زهرایه گوره
دم دوتوب ایله دیلر آه و نوا گویلرده
اوخیور نحه وورور جمله ملک لر باشینا
یایلوب عطر خوش کرب و بلا گویلرده
سالدیلار فاطمه نون باشینه بیر قاره لچک
اوغلونی اوخشاسین اُمُّ النُّجبا گویلرده
دوره سین آلدی اونون عزتیلن حورالر
دولدوروب مجلسی آوای بُکا گویلرده
صدر مجلسده جلوس ایله دی سلطان زنان
آغلیانلاری خانم ایتدی دعا گویلرده
صورا یوز دوتدی ملازملرینه حسرتیله
بویوروب مادر شاه شهدا گویلرده
کربلایه گیدورم شاید ئورک دینجلسون
هرکیمون وار نظر رحمتی منلن گلسون
هرکیمه چاتدی خبر ووردی مکرر باشینا
انبیا یرده ووروب گویده ملک لر باشینا
آلدیلار دوره سینی عزتیلن فوج ملک
مرتضی نوحه دیدی ووردی پیمبر باشینا
ایتدی تاثیر علینون سوزی شیران نره
سالدیلار شال عزا حمزه و جعفر باشینا
جنگ صفینیده گورموشدی ابالفضل جدلون
منغلب اولدی ووروب مالک اشتر باشینا
کربلایه یتیشوب باشلادیلا آغلاماقا
ووردولار حلقه غم ساقی لشگر باشینا
آتون اوسته اوتوروبدور قمر آل عبا
دورت طرفدن توکولور نیزه و خنجر باشینا
اوخ دگوب مشکینه سو یوخدی قالوب آواره
اللری یوخ دوتا قلخان او دلاور باشینا
داغیلوب اوچ پر اوخیلا گوزونون آغ قره سی
تاج اولوبدی گوزونون قانی مطهر باشینا
ایستیوردی چیخادا دیزلریله اوچ پر اوخی
نوفلین دوشدی گوزی حیدره بنذر باشینا
بیر جنایت ایله دی دیسکینوب اصغر سسینه
ووردی بیر آهن عمودیله او کافر ، باشینا
بیلمورم نیله دی السیز باشینا آهن عمود
دیه بیلّم دولانوب چرخ مدوَّر باشینا
عاقبت لنگر ایدوب دوشدی آت اوستن اشاقا
بالش اولدی یارالی سینه مکسَّر باشینا
یارالی باشی یاپیشدوردی خانم سینه سینه
آنالیق ایتدی اوگون معرفت آئینه سینه
گوزلرون سیلدی ئورکدن دیدی جان جان یارالی
یارالی جانیم اولا جانیوه قربان یارالی
من اوغول فاطمه یم ئوزگه لره قاتما منی
گوزون آچ باخ منه ای سویگلی جانان یارالی
سنی بو حالدا اگر گورسه رقیم تانیماز
بوریوب باشدان ایاقه بدنون قان یارالی
یاره اوستن اوقدر یاره دگوب پیکریوه
ایله بیلّم داغیلوب چوللره قرآن یارالی
نگران اولما اگر یوخدی آنون من آنوام
باشون اوسته ایدرم ناله و افغان یارالی
قدریوی من بیلورم لشگر شیطان نه بیلور
بیلسه وورماز بو قدر نیزه و پیکان یارالی
قورخورام گورسه باشون یاره سینی زینب ئوله
سالا بو یاره باجون زینبی جاندان یارالی
سن مگر ساقی دگولسن نیه مشکون قورودی
گوزلیور خیمه ده قیزلار سنی الآن یارالی
هله سندن صورا قاره گونی چوخدور باجیوون
ایده جک بیر سوز اونون قدینی چوگان یارالی
نجه تشریح ایده جکدور باشیوون سینماقینی
خبر آلسا آنون ام البنین اوندان یارالی
آلغرض آچدی گوزون شیر حقون شیر اوغلی
دیندیروب فاطمه نی آیه ی تطهیر اوغلی
دیدی عطرون بوریوب کرب و بلانی آنا جان
خوش گلوبسن دی گوروم زینبون هانی آنا جان
نه روادور توکه سن گول یوزیوه اشک ترون
الریم یوخدی سیلم اشک روانی آنا جان
ای علی حقینه خاطر سینه سی یاره لنن
آپاران قبر ایوینه درد نهانی آنا جان
گوزومون یاره سی قوربان سینه وون یاره سینه
مرحمت ایله دعا قیل بو جوانی آنا جان
یوزیوه سیلی وورانلار باشیما یاره ووروب
گیدوب الدن بالاوون تاب و توانی آنا جان
قورخورام بیلسه قوشون گلمه گیوی طعنه وورا
طاقتیم یوخ ایشیدم زخم زبانی آنا جان
چوخلاری سفره ی جودونده ییوب نان و نمک
بوقوشون درک ایلمز حرمت نانی آنا جان
من گرک بوسه وورام گرد و غبار قدمون
ایتدی شرمنده منی نوفل جانی آنا جان
گوردی بیر ایش باشیما آهن عمودین اثری
گلمه سون هیچ بشرون باشینه آنی آناجان
ویر اجازه باشیمون اوسته آقامی چاغیروم
پرچموندن نگرانم آنا جانی آنا جان
فاطمه ویردی اجازه چاغیروب قارداشینی
قارداشون عطرین آلوب سالدی اشاقه باشینی
دیدی گل پرچمیوون قیدینه قال آی قارداش
ویردیگون پرچمی مندن اوزون آل آی قارداش
باجوا تاپشور اونی ام بنینه یتوره
گلمه گیم سویله دیسون اولدی محال آی قارداش
اولسا امکانی منی خیمه لره حمل ایلمه
عمری عباسون اولوب رو به زوال آی قارداش
آیریلاندا منی سالدون یولا سن عزتیلن
پوزولوبدور او ویرن جاه و جلال آی قارداش
چوخ چالشدیم گوزومه اوخ دگه سو مشکیمه یوخ
ویرمه دی دشمنون اوخلاری مجال آی قارداش
اوخ دگوب مشکیمه سو اوت کیمی یاندوردی منی
بیلورم یوخ داخی ششماهه ده حال آی قارداش
آند ویرّم سنی زهرا آناوون حرمتینه
دی ربابه ایله سون حقون حلال آی قارداش
- چهارشنبه
- 5
- خرداد
- 1400
- ساعت
- 22:18
- نوشته شده توسط
- یوسف اکبری
ادامه مطلب
