اشعار ترکی امام حسین (ع)

صدره نشین محفل دلدادگان حسین
پرده گشای مرتبه عاشقان حسین
نمره گذار دایره امتحان حسین
اهل نمازه درس وضو اورگدن حسین
جمله جهانه کلمه هو اورگدن حسین

ایتدی جهان خلقتی کلاً امیدوار
روحین ایدنده خلق خداوند کردگار
دوندی زمانه چرخش ایدوب چرخ روزگار
قویدی قدم جهانه اولان خلقه مقتدا
کل ملائک ایلدی مولایه اقتدا

سالدی دیار یثربه دین آفتابی نور
ظلمت ایچیندن ایلدی اوز نورینی ظهور
دسته به دسته اندی یره قدسیان و حور
قصد زیارتیله ملائک او حضرتی
دوره لیوبله خانه امن رسالتی

دوتموش الینده نو گلی نی ختم الانبیا
کسمیش اونین کنارینی سردار اولیا
هاله چکوبله عالم معناده اوصیا
جسم جهانیانه حسین جاندی بالیقین
اهل جهاندا شاد و خراماندی بالیقین

عرش خداده زمزمه البشاره وار
کونه خدای لمیزلی دن اشاره وار
گویده نقدری گون نقدر آی ستاره وار
غبطه ایدوله بو کره با سعادته
نائل اولان چوخ اولدی بو فیض زیارته

چوخلار ایشیتدی ترک ایدوب اوز آشیانه سین
اللر اورکده کسدی حسین آستانه سین
فطرس آلوب قنادلارینی آب و دانه سین
سالدی اوزین او کمسه نه که باب حاجته
امیدوار اولوبدی دوایه طبابته

• جمعه
• 22
• مرداد
• 1400
• ساعت
• 13:27
• نوشته شده توسط
• یوسف اکبری

دیدی بو جمله نی جبرئيل امین
اولون آگه بولون ای اهل زمین

بو حسین اهل جهانه آقادی
یازیلیب جنت الاعلاده آدی

بونا جنت ده خدم حور اولاجاق
شه کونین نیله مشهور اولاجاق

حق یکتا بونی اعلا یارادیب
اوزینه والی والا یارادیب

شرر عشقینه چوخلار یاناجاق
اتکیندن یاپشوب آسلاناجاق

شهدائیله بهشته گیدجاق
اوجالیب گویلره پرواز ایدجاق

اولوب آفاق حقه نور جلی
صفتی مظهر ذات ازلی

نه حسین بنده ممتاز حسین
هامی خلق ایچره سرافراز حسین

اولا هر کیمسه سزاوار حسین
ایدر الله اونی زوار حسین

سالا درگاهینه صدقیله اوزون
دیه بی واسطه مولایه سوزون

اوزی ده صاحب درگاه اولاجاق
عرفا ساحه سینه شاه اولاجاق

عرفانین پایی حق دن گلجاق
سحرین سهمی شفق دن گلجاق

قورا بو سروره کیم بزم عزا
آلاجاق مزدینی ایام جزا

سوزی هاردان هارا گور چکدی قلم
اله لازم دی آلاخ بیزده علم

در احسانینه مهمان آپاراق
اونا لایق نچه قربان آپاراق

دولاناق باشینه پروانه کیمی
دوشناق قبرینه جانانه کیمی

یازیب اشعارین "امین" ای سرور
آدیوی دلده ایدبدور ازبر

دیور ای شاه لب عطشان مولا
لب عطشانیوه قربان مولا

• جمعه
• 22
• مرداد
• 1400
• ساعت
• 13:49
• نوشته شده توسط
• یوسف اکبری

گلوب بو کوفه نین اهلی عجب جسارته قارداش
توکولدی خیمیه لشکر ال آچدی غارته قارداش

اوزون یاخاوی قورتاردون گیدوب شهادته چاتدون
بلالی زینبی قویدون بیوک مصیبته قارداش

داغلدی چوللره یکسر عیال ختم پیغمبر
یامان گونومدی برادر یتیش بو عترته قارداش

پوزولدی غملی سپاهیم اوجالدی گوگلره آهیم
یوخومدی کمسه پناهیم چخام فراغته قارداش

قاچاندا خیمه لریندن حرارتین اثریندن
عیال دربدریندن دوشوب حرارته قارداش

نقدری سیم و زریم وار آلوب بو قان توکن اشرار
عزیزه قزلارون آغلار بو رسم و عادته قارداش

گلوب عیالیوه سان ور طریق چاره نشان ور
محبت ایله اذان ور نماز وحدته قارداش

شاخور گون ایستی سی گوگدن چخور حرارتی یردن
الو شراره سی هردن دونور قیامته قارداش

نشان ورور بو علامت عیان اولوبدی قیامت
هایاندا ختم رسالت یتیشسون امته قارداش

یانیدی لشکر شامی یانینجا شاه خیامی
اود ایچره عصرین امامی دوشوب فلاکته قارداش

گوزومده محشر عیاندور یانان اورک دولی قاندور
نجف دیاری هایاندور قاچام شکایته قارداش

بالان قالبدی شرر ده ایدوم نه چاره بو درده
یوخومدی حین خطر ده مجال نصرته قارداش

ندوم بو چرخ زمانه آلوب الینه بهانه
گتوردی زینبی جانه سالوب مشقته قارداش

سرشک چشمیم اولوب قان غمونده ای شه عطشان
هایاندا قالدون حسین جان گلوم زیارته قارداش

من آغلورام سنه قارداش توکور گوزوم یوزه قانیاش
گولور بو فرقهء اوباش قویور شماتته قارداش

چتین زماندی زمانیم یانوب کل اولدی بو جانیم
حسین باشیوا دولانیم بویور طبابته قارداش

یارالی قوش کمی قزلار نوالی نی کمی سیزلار
هامی سی ای شه ابرار دوشوبله وحشته قارداش

سپاه زادهء هنده دورور سلاسل الینده
الیم قالوب اتگینده نیاز و حاجته قارداش

بو دردی کمسه بولنمز اجل هایاندادی گلمز
ندن بو زینبون المز گیدر اسارته قارداش

((امینی))نوحه یازاندا گلر فغانه نهاندا
تیکوب گوزینی جهاندا فقط شفاعته قارداش

• جمعه
• 22
• مرداد
• 1400
• ساعت
• 13:52
• نوشته شده توسط
• یوسف اکبری

قلبیم آخر دولی قاندور قارداش
قافلم شامه رواندور قارداش

دور یولا سال یارالی
کونلومی آل یارالی

جان قارداش جان قارداش
ای وای عطشان قارداش

گون قاباقینده قالوبسان عریان
یارالی جسمیوه زینب قربان

جام صبریم جالانوب
اورگیم پارچالانوب

جان قارداش جان قارداش
ای وای عطشان قارداش

گللریم پر پر اولوب گلشنده
بلبلی قویمادیلار ایمنده

عندلیبیم سارالوب
قلبیمی غملر آلوب

جان قارداش جان قارداش
ای وای عطشان قارداش

آیرلانمور بو حرمله سندن
چکمور ال شمر ستمگر مندن

قزلار افغانه گلوب
زینبون جانه گلوب

جان قارداش جان قارداش
ای وای عطشان قارداش

مایلم نطقیوه گفتاریوه
رحم ایله زینب غمخواریوه

نطقه گل بیر دانشاق
هم یاناق هم آلیشاق

جان قارداش جان قارداش
ای وای عطشان قارداش

هار دا دور مندن آلان پیراهن
قالموسان بی کفن ای بی سروتن

کیم سویوب پیرهنون
قالوب عریان بدنون

جان قارداش جان قارداش
ای وای عطشان قارداش

آی باتوب دالدالانور اولدوزلار
ایلیور ناله و افغان قزلار

گوردولر شمعی خموش
اولدولار خانه به دوش

جان قارداش جان قارداش
ای وای عطشان قارداش

شمر دن یوخدور امان آغلاردیم
قان ورن یاره لرون باغلاردیم

اولموشام شمره اسیر
گتمگه چوخ تلسیر

جان قارداش جان قارداش
ای وای عطشان قارداش

من خداحافظ ایا جان جهان
دور مسافر یولا سال باشلا اذان

ایللری ترک ایدورم
شامه سنسیز گیدورم

جان قارداش جان قارداش
ای وای عطشان قارداش

آغلیوب اوخشار((امینی))دلدن
قورتار ای قارداش اونی مشکلدن

ای شه کرب و بلا
حاجتین ایله روا

جان قارداش جان قارداش
ای وای عطشان قارداش

• جمعه
• 22
• مرداد
• 1400
• ساعت
• 14:23
• نوشته شده توسط
• یوسف اکبری

گرک حسین چی لرین خدمتی حسین دیین اولسون
بها ورولسه اونین قیمتی حسین دیین اولسون
حسین حسین دیمگون آیری بیر فضیلتی وار
بو شرطیلن دیینین غیرتی حسین دیین اولسون
او شخصلر که آدین نوحه خوان قویوبلا حسینه
گرک آدی اوزی شخصیتی حسین دیین اولسون
حسین او کیمسه نی چوخ دوست دوتار اوزون بولوسن که
وقاری قولی سوزی صحبتی حسین دیین اولسون
دانیشدیراندا حسین نوکرین بیر آیری کانالدان
دانشماقی بلی ماهیتی حسین دیین اولسون
هرایه سسله سه قرآن حسین دیوب یولا دوشسون
کمال صدقله جدیتی حسین دیین اولسون
نه آغلاماق یارانین مرهمی اولار نه ده گولمک
فقط دواسی طبابیتی حسین دیین اولسون
طواف کعبه ایدن کیمسه لر بیر آز آییغ اولسون
زیارتی عملی نیتی حسین دیین اولسون
ربا یین حاجی لار قویمیون مجالسه گلسین
قویون مجالسین حیثیتی حسین دیین اولسون
ورون نه رشوه آلان فرصت آختارانلارا فرصت
قالوب کسیلسین اونین فرصتی حسین دیین اولسون
او مملکت که اونون رهبری حسین دیین اولدی
بیر ایش گورون که هامی ملتی حسین دیین اولسون
شهیدلرین یولونا دوز گرک ادامه وریلسین
شهید آتالارینون حرمتی حسین دیین اولسون
تلاش ایدون او آخان قانلارین محافطتینده
که اونلارین بیزه حلیتی حسین دیین اولسون
اولار حسین یولونی شوقیلن گیدوب تاپوب الحق
اوز ایسته دیگلری بیر جنتی حسین دیین اولسون
او جنتی که خدا خلق ایدوبدی مؤمنه خاطر
او مؤمنی که اونین سیرتی حسین دیین اولسون
ازل جهان دا گرک برده لیک بساطی پوزولسون
هر انسانین بله حریتی حسین دیین اولسون
او شیعه لر که قرا کوینگی تقبل ایدوبلر
بودور هدف اولارین عزتی حسین دیین اولسون
"امینیم" گجه گوندوز گوزوم حسینین الینده
که یازدیقیم شعریمون اجرتی حسین دیین اولسون

• جمعه
• 22
• مرداد
• 1400
• ساعت
• 16:48
• نوشته شده توسط
• یوسف اکبری

اگر بصیر اولا هرکس رموز خلقتینه
دوشر مدام یقین خالقین اطاعتینه

دیوبدی فلسفهءخلقتی خلایقه حق
بوگون فلق دی سنون گوردوگین صباحی شفق

دو روزه عمر گلوم دردیوه دوا ایلمز
اوزی فنا دی بو دهر اهلینه وفا ایلمز

کسوب کناریوی دوز قاصد اجل دولانور
گل حیاتیوه باخ گور نه ال به ال دولانور

چراغ عمری خزان یللری خموش ایلیور
او انلی سینه لری تیر مرگه توش ایلیور

عذاب قبری گرک هیچ فراموش ایلمیاخ
بقا چراغینی دنیاده خاموش ایلمیاخ

بهشتی مؤمینه خلق ایلیوب خدای جهان
محال بد عمل اولسون او جنتینه روان

قصور جنته چوخ کمسه نین تمایلی وار
ولیک بد عملین داغ مثالی حائلی وار

خدا یولوندا النلر بیر المگین بولجاق
نقدر آغلیوب آخرده شاد اولوب گولجاق

خوشا او کسلره ذکر ایلیور حسین آدینی
بهشته وارد اولاندا بولر اونون دادینی

((امینیا))کیمین الده بو امتیازی اولا
حسین اوزی تاپاجاق هر زمان نیازی اولا

• جمعه
• 22
• مرداد
• 1400
• ساعت
• 17:18
• نوشته شده توسط
• یوسف اکبری

عشق عالمینده عاشقه پروانه اورگدر
شمعین اوتوندا یانماقی پروانه اورگدر

من عاشقم حسین آدینا اولموشام دلی
فرزانه نینده عشقی دیوانه اورگدر

دوز آستان قدس حسینه یخلمشام
دیوللر حسین ده عاشقی جانانه اورگدر

مستم نگار الیندن ایچن باده دن بلی
بیرگون ده عشقی عارفه مستانه اورگدر

ایتدیم سوال عارف و صوفی بویوردیلار
مولان,((امینی))نوکری شاهانه اورگدر

• جمعه
• 22
• مرداد
• 1400
• ساعت
• 17:25
• نوشته شده توسط
• یوسف اکبری

عزا مجالسینین زیوری حسین آدیدی
عموم شیعه لرین مفخری حسین آدیدی

کتابت ایتماقا مینلر جه آد یازیلسا گینه
گوزللدن رخ هر دفتری حسین آدیدی

بهشت آدلارینا حقی وار سرآمد اولا
نچونکه ماخلقین سروری حسین آدیدی

تولدینده گیدوب گوگلری گزن آقادی
گوگین ستونی یرین لنگری حسین آدیدی

نه وار بو آد دا گورون ذکر ایدن زماندا خطیب
سوزین هم اولی هم آخری حسین آدیدی

زمانه بیرجور اولوب غم یاغور یرین یوزینه
سیلن اورکده ولی غملری حسین آدیدی

مصیبتین اوخوسان آغلاسان اورک بوشالار
سنونده گوز یاشیوا مشتری حسین آدیدی

اوشاقلقیندا خموش ایلین یاشیل الوی
ایدن رضا اوغولا مادری حسین آدیدی

مریض عشق دور اما طبیب دور هامیا
طبیبلرین دیلینین ازبری حسین آدیدی

یازاندا نسخه دیوللر توکل ایله حقه
دوا ورولّه دعا دللری حسین آدیدی

توسل ایله اورک دردینی گتور نظره
دعالرین گوزلی برتری حسین آدیدی

دوشنده مشکله گل دویگیلن کرم قاپوسین
آچان گره لری مشکلّری حسین آدیدی

بزرگ فلسفهء مکتب و شهادت وعشق
جهاد ایدنلرین همسنگری حسین آدیدی

خوش اول کسیکه اونا قهرمان مدالی ورن
خطوط رزمه چکن عسگری حسین آدیدی

یریندن اوینادیب عشق اهلینی چکن قباقا
سپاه ولشکر و سر لشکری حسین آدیدی

او قانلی نهضت نین قهرمان کمکچی لری
دیوله یول آپاران بیز لری حسین آدیدی

حقیقت اهل دل اولسان دلون فداسی گوررسن
که گسترن دله هر دلبری حسین آدیدی

سلام ایدنده اونا ایستوسن جواب آلاسان
تکلمه گتورن دیللری حسین آدیدی

اوکربلا که سالور شور عالمین باشینا
دچار ایدن غمه عاشقلری حسین آدیدی

((امینی))نوحه دیوب آغلیوب فراق چکوب
کمال وصله چاتان گونلری حسین آدیدی

• جمعه
• 22
• مرداد
• 1400
• ساعت
• 17:34
• نوشته شده توسط
• یوسف اکبری

اوشاقین دردینی دنیاده آنا یاخشی بولر
نه محبت گلور ایجاده آنا یاخشی بولر
آنالیق مهرینی درک ایلیه بولمز هر اوشاق
اوشاقی بسلیَن آزاده آنا یاخشی بولر
گلی باغبان دی گوزل وجهله باغدا بَجَرن
گیت عزیزیم خبر آل ساده آنا یاخشی بولر
گجه نین نصفی بشیگ ترپَده لایلای اوخویا
اوتوروب صود وره نوزاده آنا یاخشی بولر
دیسه لر گنج وفا کیمدی جهاندا دییرم
سوروشون وادی ایفاده آنا یاخشی بولر
بَجرن قیزلاری نازیله حورن طره لرین
سوزینی هر غم عظماده آنا یاخشی بولر
بو گیدوب بولدوگی خدمتلری حقینده ایدن
یتورن نکتهٔ ارشاده آنا یاخشی بولر
اوغولی حد بلوغه یتیروب تا گتیسون
گلینی حجلهٔ داماده آنا یاخشی بولر
آتادان کیمسه یتیم اولسا بش اون گونلوک اولار
بو مسلم دی هر اولاده آنا یاخشی بولر
آنانین قیمتی یا قدری اُلنده بولونر
اونودا بولسه او اثناده آنا یاخشی بولر
حَسنینین اَلی قوینوندا قالان لحظه لری
گورونور سینهٔ زهراده آنا یاخشی بولر
او خانم زینب مظلومه نین اوز اوخشاماسین
دل پر شور معلاده آنا یاخشی بولر
دیدی زهرا ننم ای کاش گلیدی بو چوله
نه اولوب اوغلونا صحراده آنا یاخشی بولر
قیزینین غملی بیاباندا آدامسیزلیقینی
یتیشَن اولماسا فریاده آنا یاخشی بولر
گَله تا شام غریبان دا شریک غم اولا
دایانا طور تجلاده آنا یاخشی بولر
گوروب اوز موسی دورانین "امینی" هر دم
حالینی سینهٔ سیناده آنا یاخشی بولر

• جمعه
• 22
• مرداد
• 1400
• ساعت
• 17:50
• نوشته شده توسط
• یوسف اکبری

کهف الاماندی خلقه حسین آستانه سی
صدره مکاندی خلقه حسین آستانه سی
سد عظیم معصیت و مانع خطا
باب جناندی خلقه حسین آستانه سی

هر کیم او آستاندا اوزون ساخلادی تمیز
تاپدی تقرب اولدی ایکی عالمه عزیز
روشن ایدوبدی ختم پیمبر شه حجیز
گون تک عیاندی خلقه حسین آستانه سی

حسین تولدینده یره گلدی جبرئیل
دلده دعا و ذکر خدا بندهٔ ذلیل
سالدی او پاک بارگهه فطرسی دخیل
فیض فشاندی خلقه حسین آستانه سی

• جمعه
• 22
• مرداد
• 1400
• ساعت
• 18:09
• نوشته شده توسط
• یوسف اکبری

جمله عشاقی چکن بنده حسینین آدی دی
ایلیین آدلاری ارزنده حسینین آدی دی

الدورن نفسینی احیا ایلین دین حقی
ساخلیان شیعه نی پاینده حسینین آدی دی

ای حسین عاشقی گیت قدریوی بول جامعه ده
عشقه معنی یارادان سنده حسینین آدی دی

عشقون اعلادی مجاز عشق لره اوخشاتما
ساخلا سینونده اونی زنده حسینین آدی دی

عشق اولا عشقیوه قالدیقجا اوجالدور آدیوی
مونسین قبرده السنده حسینین آدی دی

چوخلی اخبار و احادیث ده پیمبر بویوروب
علت عقباده او لب خنده حسینین آدی دی

منده عمرومده حسین آدینه چوخ آغلامشام
باغلانان آدیمه پرونده حسینین آدی دی

اول کی او قانین حسین آدینه ایثار ایلیوب
نصب ایدور پرچمی دربنده حسینین آدی دی

قلب تاریخیده البته چوخ آدلار یازیلوب
آدلارین ایچره برازنده حسینین آدی دی

مشکلون اولسا "امینی" دی آچار مشکلیوی
خلقه روشن گر آینده حسینین آدی دی

• جمعه
• 22
• مرداد
• 1400
• ساعت
• 18:11
• نوشته شده توسط
• یوسف اکبری

عشقه باخ وصلتی آیدینلادی هجرانه گوره
یولایوب عاشقی تا نقطهٔ پایانه گوره

یار دیرینه و دلسوزی نه احسان ایلیور
نقش اولوب تپراقا بیر نمرهٔ شایانه گوره

شاه دین مقتلی خلوت گه رازیدی بلی
بیر داغلمش اورگه بیر دل سوزانه گوره

عشقه باخ ورطهٔ طوفاندا خانم فاطمه نین
ساخلیوب روحینی بیر شامغریبانه گوره

طوره گوندردی کلیم اللهه لبیک دیوب
سبط پیغمبری پیغمبره ریحانه گوره

سوز دل سوزشین آرتیردی سوسوزدان اُله نین
ساربان ایلدیگی ظلم فراوانه گوره

دوردی زهرا دیدی اوغلوم گیدورم کوفیه من
تا گورم حرمت ایدن وار سن مهمانه گوره؟

عشقه باخ جذبه سی جنت دن علی نی گتروب
آغلادیر وادی غربت ده یتیمانه گوره

سالمسان درگه مولایه "امینی" اوزیوی
سنده بیر حاجته بیر مطلب پنهانه گوره

• جمعه
• 22
• مرداد
• 1400
• ساعت
• 18:41
• نوشته شده توسط
• یوسف اکبری

آه ای شرر عشق حسینیله یانانلار
عشقین دادین اوّلده آلیب جانه قاتانلار
معشوق وِرَن قول و قراره اینانانلار
مین دفعه گوروم عشقوزه عشق اولسون عزیزان
قرآنی دیریلدیب یره سیزدن توکولن قان

اولدوز نجه سیز شیر حق داوره پیرو
هم حیدره هم حضرت پیغمبره پیرو
سلطان جهان پادشه محشره پیرو
هیچ کیمسه جهاندا بیله فخر ایلیه بولمز
دیوانه ده بو عشقوزه بیر سوز دیه بولمز

سیزلر که شهیدان ره دین خداسیز
دنیانی تحیرده قویان نور هداسیز
همسنگر و یاران شه کرب و بلاسیز
اسلامه که قان لازمیدی قان گتربسوز
قرآن مبین اُلموشیدی جان گتربسوز

خوش حالوزه اقبالوزه چاتدوز بیله کامه
قربان اولا جانلار او پسندیده مرامه
ورّوخ بو حقیقت یولا بیزلرده ادامه
قانلار که آخوب قویماروخ اصلا هدر اولسون
دین دشمنی دنیاده گرک دربدر اولسون

کافی اولا بولمز که عزادار حسینوخ
لبیک خطاب ایلمشوخ یار حسینوخ
عالم بونی بولسین که طرفدار حسینوخ
فرمان آلاروخ بیز بو شه پر برکتدن
دوشمز داخی بو ماه محرم حرکتدن

ای کرب و بلا منطقه سین طور ایلینلر
وی شیعه دیارین بیله معطور ایلینلر
راحت یاتون ای خلقی سلحشور ایلینلر
سیز بارگه قدس الهی ده یاتبسوز
عشقیله گیدوب جنت الاعلایه چاتبسوز

بو جمله حرامی لره اعلان خطردی
اونلاردی دیوللر شهدا قانی هدردی
ظلمت گجه نین آخری بیر شانلی سحردی
ناموس یولوندا اوقانین قیمتی چوخدی
سایماز بو قلج دی قمه دی نیزه دی اوخ دی

یار اولسا بیز عاشقلره گر حضرت باری
جان جوهری تک ساخلیاروخ دین و دیاری
ویران اولا دنیاده گرک ظلمین حصاری
دین آرخالاری سایهٔ قرآندا گزوللر
ایمان سلاحی الده بو ایراندا گزوللر

بیگانه خیال ایتمسین ایراندا یاتان وار
ناموس و شرف غیرت و وجدانی ساتان وار
ایراندا فقط قول قولا باش باشه چاتان وار
آیرلماقمیز یوخدی بیزیم وحدتمیز وار
یاتماق ندی یا قورخی ندی غیرتمیز وار

چپ باخسا بو ایرانه بیری قان سالاروخ بیز
دریانی چالوب بیر بیره طوفان سالاروخ بیز
جداً ملل متحده جان سالاروخ بیز
کیمدور دانشا شیعهٔ اثنی عشریلن
دین آرخاسی گیتمز یولا ضد بشریلن

ملت که اونون مکتبی مکتب دی الهی
مکتب که اونون حفظ ایدنی عشق سپاهی
عشقی که شهادت دی اونون عمده گواهی
ایمان سلاحی الده جدال ایلر او ملت
قویماز دانشا دشمنی لال ایلر او ملت

بولسونله بیزیم رهبریمیز شاه شهیدان
تا روز قیامت اولاجاق دهره سلیمان
هریانه گرک حکم ایده اسلامله قرآن
حریت اگر اولماسا جان ساخلاماق اولماز
الدن گیدر القصه امان ساخلاماق اولماز

ناموس و شرف ، حجب و حیادن خبر اولماز
انسانلار ایچون صلح و صفا دن خبر اولماز
هم عاطفه دن مهر و وفادن خبر اولماز
گوزدن گلی قویسان گوزلیم خار آلاجاقدور
سستالسان اگر یاریوی اغیار آلاجاقدور

مردان خدائیله بیزیم نسبتمیز وار
غیرت سوموگینده قانمیز وار اتمیز وار
غیرتلی ابوالفضل کیمی غیرتمیز وار
حیدر قانی شریانه گلور رگلریمیزده
باشدان باشا غیرت یازلبدور دریمیزده

لبیک دیوب کوفه لیلر ابن زیاده
ایجاد خطر ایلدیلر کرب و بلا ده
شاهنشه دین قتلینه ایلوبله اراده
بولموردیله بوش وعده لره آلاناجاقلار
اما بونی بولسونله که دائم یاناجاقلار

آینده لرین سالمادیلار فکر و خیاله
بوش وعده لره چکدیله شه دورینه هاله
حاصل حرم آهولری سولموشدی چو لاله
نهرین سویی باغلیدی عیال شه دینه
قالخزدی ابوالفضلی تقاضای سکینه

حاصل اوزینی القمیه سالدی ابوالفضل
دورت مین نفری بیر بیرینه چالدی ابوالفضل
بیر حمله ده نهرین سویونی آلدی ابوالفضل
دولدوردی غرض مشکینی سقای سلحشور
سرعتله سودان چخدی ایدوب خیمه نی منظور

چیگنینده حسین بیرقی سرعتله اسوردی
شمشیر عدالت سپه کفری کسوردی
سو پایلاماقا قیزلارا سقا تلسوردی
القصه دولاندی یولی نخلستانا سالدی
جرأت له قاچانلار قییدوب دوره سین آلدی

دورت بیر یانی باغلیدی قوشون تاپدی جسارت
روبه لر الیندن یتشوب شیره خسارت
آهولره صیاد قضا بند اسارت
گوندردی قَدَر قاصدینی سمت خیامه
دوندی غرض عباسین ایشیق گوندوزی شامه

میدان جدل فارِس جنگ و جدل ایستور
اوخ نیزه قلنج ایلیه رد و بدل ایستور
اوّلده ایکی گوز ایکی قوتلی ال ایستور
عباس علی نین ال اوزولموشدی قولوندان
السیز گوروب عباس چکلمزدی یولوندان

استادیدی عباسین اوزی چون اوز ایشینده
حیرتده قویوب عالمی راه و روشینده
ورمشدی مکان قبضهٔ شمشیره دیشینده
بیر اوخ آتانین گلدی اوخی مشگینه دگدی
قالخزدی اوزین قارداشینین قدّینی اگدی

بیر نحویله سسلندی یتیش داده حسینیم
قویما قالام آواره بو صحراده حسینیم
تا ورمه میشم فرصتی جلاده حسینیم
بحرانلی زمانیم دی منی یاد ایله قارداش
جلاد ستمکاریدن آزاد ایله قارداش

ای کاش گَلن لحظه لری منده بولیدیم
دشمن قباقینده سنه قربان کسیلیدیم
یا اینکه محبتدی قوجاقینده الیدیم
اولدوز کیمی منده گونه بیر لحظه باخیدیم
گون باشمین اوستونده اولان وقته آخیدیم

قولسوز منی آتدان که سالیب شام سپاهی
بولدوم که جانیم چخمالی دور خواه نخواهی
گوردوم قباقیمده دایانیب بیرجه سیاهی
تز تز منه سسلوردی گَل آغوشیمه اوغلوم
ای نور سالان خانهٔ خاموشیمه اوغلوم

بیردن که گوزوم ماه جمالینه ساتاشدی
زهرا ننه مین یعنی محبت جامی داشدی
آلسین منی آغوشه ولی بیر قولین آشدی
آتدان یخلاندا یوزوم اوستونده یخلدیم
حسرتله دوشندیم ایاقی آتدا سیخیلدیم

سانکه یخلبدور خُتن آهوسی چمنده
صیاد گزور الده اوخی دشت و دمنده
من قاتل الینده ننه مین گوزلری منده
اوخشور بالاسی اوخلانان آهولره قارداش
گل باری تسلی ور او بی یاوره قارداش

قارداش سسینی آلدی خیَم ده شه محشر
میدانه سراسیمه قدم قویدی او سرور
گوردی یغشوب باشینه بیر عدهٔ کافر
جداً چالشیر خیمیه گلسین یولی یوخدور
باش پارچالانیب سو جالانیب هم قولی یوخدور

لشگر داغلیب شاه لب عطشانی گورنده
سستالدی شاهین دیزلری سقانی گورنده
صبرین جالانیب جامی او اوضانی گورنده
ابر مُحن آفاق حیاتین ایله آلدی
دل تنگه دوشوب گوز قارالیب رنگی سارالدی

قارداش باشین اگلشدی یره آلدی قوجاقه
آهسته آپاردی دوداقین قانلی دوداقه
دوتدی کمریندن دیدی قارداش دور ایاقه
دشمن قباقیندا منی یاندیرما ابوالفضل
آواره بو میدانی دولاندیرما ابوالفضل

قارداش غمی قارداشه بولرسن اثر ایلر
بو غم ایله بیر غمدی که چوخلار حذر ایلر
بوندان صورا صیاد قضا گور نه لر ایلر
زینب قولی باغلانسا طناب ستمیلن
هیهات رقیه م قالا بو درد و غمیلن

آچ گوزلرون ای ماه بنی هاشم آماندی
جوّی بوریوب غم باشیم اوستونده دوماندی
دور قوی آپاریم خیمیه زینب نگراندی
گلمور ایاقیم خیمه سرایه گیدوم آخر
سر گیج ایلیوب غم منی بولمم ندوم آخر

آماج دی غم تیرینه چوخ سینه لر عباس
چوخ سنگ ستملن سینیب آیینه لر عباس
صف صف دایانیب نوکر دیرینه لر عباس
آغلور بو "امینی" سنه هر بزم عزاده
سنده اونی سال قبره گیدن وقتیده یاده

• جمعه
• 22
• مرداد
• 1400
• ساعت
• 19:17
• نوشته شده توسط
• یوسف اکبری

الا ای حاجی بیت الهی
گیدورسن مکه یه خواهی نخواهی
الونده گوزله احرام باغلیاندا
حق دادریدن اولسون گواهی
طواف کعبه عشق ایستور عزیزیم
اگر تاپسان او اعظم بارگاهی
کمال دقت اولسون دوز باخشلا
دیلی دوتما گلیلن اشتباهی
صفاسی اوندادور مرو و صفانین
بیر اولسون هم گداسی هم ده شاهی

غرض خلقه اونی آندیرماق اولسون
حقیقت مشعلین یاندیرماق اولسون
نه ال یورماق نه حمله نه حماسه
نه زور چکماق نه زنجیر قیرماق اولسون
نه های سالماق نه چالماق نه چاغیرماق
نه گوز چاتماق نه باش سیندیرماق اولسون
سحر معشر چولونده داش یغاندا
یغیب اعمالی باشلاندیرماق اولسون
مناده هر ستونی داشلیاندا
داشین معناسی شیطان ویرماق اولسون

منا صحراسی بزم انبیادور
همان بزم عاری از ریب و ریادور
اورا جبریل گویدن قوچ گتوردی
همان قوچ زیب صحرادور ضیادور
خلیل الله الاعظم اسمعیله
خطاب ایتدی بو فرمان خدادور
اوغول امر الهی نهی اولونماز
حسابی چوخ حسابلاردان جدادور
اورکدن اسمعیل عرض ایتدی بابا
خدادن هر قضا گلسه رضادور

دلونده نام الله ازبر اولسون
سنه قوی بار یکتا یاور اولسون
زیارت قصدون اولسا نیت ایله
نصیبون مرقد پیغمبر اولسون
بقیع قبرستانیندا بیر دولان تاپ
که شاید اوردا ایتگین گوهر اولسون
حسن سجاد باقر جعفر اوردا
گمان وار هم بتول اطهر اولسون
مدینه مهد عرف و عارفاندور
چالیش قوی مفرق ایمان زر اولسون

• شنبه
• 23
• مرداد
• 1400
• ساعت
• 11:53
• نوشته شده توسط
• یوسف اکبری

عالم عشق ده سلطاندی حسین
جمله عاشقلره برهاندی حسین

عشقی نین فلسفه سینده یازیلیب
فخر عالم شه خوباندی حسین

درگه قدسینه درباندی ملک
واقعاً دهره سلیماندی حسین

وادی معرفت اللهه قمر
رونق محفل عرفاندی حسین

گورسن اللهی سزادور اونیلن
مظهر حضرت یزدان دی حسین

ای که قرآن اوخویورسان گَل اینان
گر دیسم معنی قرآن دی حسین

آیهٔ نَصرُ مِن اللّه ده گور
جسم قرآنه یقین جاندی حسین

نقد جان الده عَلَم چیگنینده
شاهد بزم شهیداندی حسین

خون بها قادر یکتادور اونا
چون خدادن توکولن قاندی حسین

قیل توسل سن "امینی" آدینا
شافع مطلق عصیاندی حسین

• شنبه
• 23
• مرداد
• 1400
• ساعت
• 15:53
• نوشته شده توسط
• یوسف اکبری

ای بشریت صفین اشغال ایدن
کوفه لیلر ایندی سخنور منم
خواب ذلالت ده یاتبسوز ندن
آگه اولون مرد مظفر منم
امر یزیدیله جری اولموسوز
کیمدی یزید عالمه سرور منم
حجتی اتمام ایدورم سیزلره
فاتح جنگ اول و آخر منم
لفظ بلیاته بلی سویلین
عهد الستیده مخیر منم
گر تانمیرسوز منی دقت ایدون
زینت آغوش پیمبر منم
ام ابیها که آنام دور منیم
زادهٔ زهرای مطهر منم
نابغه فرزند شه لا فتی
یعنی علی فاتح خیبر منم
حامی قرآنم و دین مبین
یاور حق دشمن کافر منم
شهپر جبریل ده عرشه گیدن
گوگلره زیور یره لنگر منم
سید والای زمین و زمان
بندهٔ پاک حق داور منم
بارگه قدس خداوندیده
جمله یارانمشلارا مفخر منم
جن و ملک مندن اطاعت ایدور
حوریله قلمانه ده رهبر منم
کور دلان یوخدی گوزوز گورمگه
ذات حق داوره مظهر منم
ظلمت ایچینده یاشاماق دور سیزی
بنده چکوب نور منور منم
مندن آلار نورینی هم گون هم آی
اولموش آدیم دللره ازبر منم
روح الامین وردی بشارت منه
شافع هنگامهٔ محشر منم
روز قیامت منی سسلر هامی
داده جماعت او که سسلر منم
امتی حق اوندا باغشلار منه
رحمته عنقا و هما فر منم
باغلامسوز راه فراتی منیم
عترتیمه صاحب کوثر منم
باخمیون ایندی لب عطشانیمه
آب حیاتی که دیوللر منم
عالم معناده سویی پایلیان
اهل ایکی عالمه یکسر منم
قانیمی سیز توکمگه آماده سیز
ایندی مقابل سیزه لشگر منم
منده که الله قانی شریان ایدور
قان که اونوندی قوری پیکر منم
سیز نه بولورسوز ایدون ای کوفیان
فکر ایدیسوز بی کس و یاور منم
قارداشیم عباسی که الدورموسوز
گرچه گورن داغ برادر منم
قدیم اگیلدی ولی باش اگمرم
معاویه نین اوغلونا برتر منم

• شنبه
• 23
• مرداد
• 1400
• ساعت
• 16:05
• نوشته شده توسط
• یوسف اکبری

هایانداسان حسینیم امیدیم ای پناهیم
شرار ظلمه یاندی تالاندی خیمه گاهیم

بو چولده بیر نفر یوخ آدین قویا مسلمان
قالا بو اهل بیتون اماندا حدالامکان
امانسیز آت دوشونده بیر عده خیل نسوان
سرشک گوزلریندن آخور اورکدن آلقان
منیم ده اونلاریلان چیخور سمایه آهیم

گوروم سینیدی قارداش بو چرخ کج مداری
خراب اولیدی ای کاش ازلده روزگاری
یامان دومان دوتوبدور بو کربلا دیاری
اسارته چکوللر عیال شهریاری
یامان گونوم دی تز گل اولوبدی سد راهیم

دومانلی چملی غملی اولوب چولون هواسی
دوتوبدی جوّی یکسر حرملرین نواسی
یِتَن دگول تمامه بو لشگرین جفاسی
بولنمورم ندور بس بو دردیمین دواسی
دیوم کیمه کیم اولسون پناه و تکیه گاهیم

او سرودیم که قوت واریدی هر خولومدا
گزوردی آلتی قارداش صاقیمدا هم صولومدا
ایدیم نه چاره ایندی قوشون دوروب یولومدا
اسارتین ویریبلار طنابنی قولومدا
تالانمشام الیمدن چیخوب جلال و جاهیم

• شنبه
• 23
• مرداد
• 1400
• ساعت
• 16:21
• نوشته شده توسط
• یوسف اکبری

یا فاطمه گل کربلا صحراسینه طوفاندی گل
جان اوسته دور اوغلون حسین اوز قانینه غلطاندی گل

گوگدن یاغور گرد و دومان یردن گوگه قالخور فغان
ایستور امام انس و جان جانانه ورسین امتحان
نشر ایلیور جسمینده قان ال چکمور اوخ شمشیر ویران
ورمور امانسیزلار امان زینب قالیبدور الامان
بحران زماندور هارداسان گل گور ایوین ویراندی گل

نهرین سویی طغیان ورور اوز اولدوقین اعلان ورور
وحشی لره امکان ورور ساخلور سر و سامان ورور
عطشان قوناقلار سان ورور سقا لب عطشان جان ورور
آسایشین قرآن ورور دین عمرینه پایان ورور
امت هیچه ایمان ورور بولمم نجه دوراندی گل

قرآنیلن اولادینی تاپشیرمیوب جدیم مگر
قرآن ایاقلاندی قالوب اوغلون حسین ده جان به سر
یوز ییرمی مین دشمن ولی مظلوم حسینیم بیر نفر
جسمین دلر اوخ نیزه لر شمشیرلرین تیغی کسر
سن وردیگون کوینک گیدوب گل پیکری عریاندی گل

اوخلار زهیندن رد اولور گویدن یاغور باران کیمی
گللر سپیلمیش تپراقا اوراق اولان قرآن کیمی
تقسیم اولور یتمیش نفر یوزمین یره قربان کیمی
گل خیمه لرده بیر بیرین قزلار قوجاقلور جان کیمی
قلبیم یانان خیمه م کیمی ظلم آتشیلن یاندی گل

• شنبه
• 23
• مرداد
• 1400
• ساعت
• 17:03
• نوشته شده توسط
• یوسف اکبری

مدینه دن بیله آرالیام حسین
اوزومده قلبدن یارالیام حسین
امان امان امان من بی آشیان
سوروشسالار دیوم هارالیام حسین

داغلدی ظلمیلن جلالی زینبین
چتین گلر سانا ملالی زینبین
امان امان امان الوندن ای زمان
خسوف ایدوب گوزل هلالی زینبین

بو کربلا چولون دوتوبدور اهل شام
علیهیوه سنون ایدوبدیلر قیام
امان امان امان قولومدا ریسمان
اسیر عشقیوه نظر قیل ای امام

بلالی چول کیمی بلالی دور باشیم
الوب منیم نچه وفالی قارداشیم
امان امان امان ایا عزیز جان
جماعت ال چالور آخاندا گوز یاشیم

تعجبم حسین بو قوم ظلمینه
بو قدری ویردیلار جفا داشین سنه
امان امان امان خراب اولوب زمان
من آغلیرام سنه قوشون گولور منه

کمک لرون اخا باتوب قزل قانا
منای عشق ده یاتیبلا یان یانا
امان امان امان اولوب قدی کمان
بلالی زینبون قالیب یانا یانا

نه لر گوروب گوزوم او قتلگاهیده
ترحم اولمادی دل سپاهیده
امان امان امان رعیت الامان
گلوب جسارته حضور شاهیده

مثال لاله دور بو یاره لی بدن
سزادی گر دیسم سنه گل عدن
امان امان امان ایا شه جهان
سن الدون ای عجب من المدوم ندن

یانیب کول اولموشام یاناندا خیمه لر
دیدیم آتام علی هرایمه گلر
امان امان امان اورکلر اولدی قان
قیامت ایلیوب گلنده مقتله

شرار غم سالیب شراره جانیما
ویراندا اود فلک بو دودمانیما
امان امان امان"امینی" نوحه خوان
قوشوب فغانینی منیم فغانیما

• شنبه
• 23
• مرداد
• 1400
• ساعت
• 17:47
• نوشته شده توسط
• یوسف اکبری

ای حسین ای آنام یادگاری
زینبین جان به کف جان نثاری
خردا قزلاری ترک ایتمه قارداش
گتمه گیتسن ده صبر ایله باری

کوفه نین رحمسیز دور سپاهی
گتمه ای عالمینین پناهی
الدوروبلر ابوالفضلی سنسیز
کیمسه یوخ زینبین دادخواهی

آننوین یاره سیندن آخور قان
باغری قان لاله لردن آلور جان
آیرلیق صحبتین سالما قارداش
صبره یوخدور داخی منده امکان

طاقتون قالمیبدور جداله
شمر سسلور ولیکن قتاله
هیچ گیدنلر قییتمور حسینیم
رحم قیل پوزقون اهل و عیاله

ایلدوگجن نظر آفتابه
قلبیمی دوندرورسن کبابه
اوخلانوب شیر خوار اوغلی قارداش
گل اوزون ور تسلی ربابه

یرلر آغلور سنه گوگلر آغلور
انس و جن و ملک یکسر آغلور
قتلیوه شمر اولوبدور مهیا
حالیوه قان توکن خنجر آغلور

سن عزیز دل مصطفی سن
اهل دینه حسین رهنماسن
زینبوندن نه تز دویدون آخر
کل عالم بولور با وفاسن

گلستاندا سولان گللروندن
دویماق اولمور شیرین دللروندن
من وفالی حسین سن وفالی
آیرلورسان ندن ایللروندن

تند یللر اسوب گلستانه
قالمیوب گللروندن نشانه
گلموش افغانه بلبلر آغلور
خار الیندن حسین یانه یانه

اود یاغور لحظه لحظه هوادن
تاب آلور قلب آل عبادن
سن یانورسان آخور نهر القم
دشت پر محنت کربلادن

اولموش امت سنه یاغی قارداش
سولموش عمرون گلی باغی قارداش
المه گه یوخ لزومین چکیلمیش
قلبیوه نوجوان داغی قارداش

مست میخانهٔ عشق یاره
کیم باخار گیتسه بزم نگاره
هانسی اوغلی الن بیر آتانی
الدورللر حسینیم دوباره

گل مریض اوغلوین گوگلین آل گیت
بش دقیقه کنارینده قال گیت
من دیمم گتمه گیتسن ده قارداش
زینبین باشینه قاره سال گیت

غم یوکین چیگنیمه آلمشام من
چوخ یامان گونلره قالمشام من
یاز "امینی" نه نوعی حسینی
خیمه گه دن یولا سالمشام من

• شنبه
• 23
• مرداد
• 1400
• ساعت
• 17:48
• نوشته شده توسط
• یوسف اکبری

قانونی رعایت ایلمور جاهل عربلر
هر تک تکی بیر وحشی و دیوانیه بنزر

طوفان غم انگیزیدی صحرای غم افزا
قالموش دل طوفاندا چو کشتی شه والا

گوگدن یاغوری قان ولی یردن چخور افغان
یر گوی ملشور کون پریشاندی پریشان

معناده ملک فوجی قدح الده دایانمش
یتمیش نفر عشق اهلی ولی قانه بویانمش

بیر نیزیه تکیه ایلیوب عصرین امامی
فکری بودی ارشاد ایلسین لشگر شامی

اتمام ایلیوب حجتنی حجت یزدان
لشگرده ولی اولمادی بیر کیمسه مسلمان

اسلامیتین حفظ ایده وجدانینه خاطر
انصاف ایلیه دینینه قرآنینه خاطر

های سالدیلا سس قوپدی بپا اولدی قیامت
اوخ دگدی قلج دگدی یارالاندی امامت

هی حمله نی برکیتدی عمر سعد بد اختر
قالدی آرادا واحد و دلبند پیمبر

دورت مین یارا وار جسم شریفیندن آخور قان
اولموش بدنی خانهٔ زنبور کیمی شانشان

پیشانه سی بیر اوچ پر اوخین اولدی نشانی
اوخ دگدی گلوب قان کسیلوب تاب و توانی

اگلشدی یره ال عربی دامنه آتدی
دامن گیدوب اوسته اوخ آتان مقصده چاتدی

آهسته آپاردی گوزونین قاننی سیلدی
من که دیمم آنندان آخان قانی کسیلدی

گورسندی اورک ملکی فلک تاپدی بهانه
نامرد اوخونا مرد اورگی اولدی نشانه

اوخ قلبه که دگدی اوزی آهسته یخلدی
قویدی یوزینی قانلی تراب اوسته یخلدی

میعاد گه عشقه دوشوب زادهٔ زهرا
آتلار ایاقی آتدا قالوب دوغرانان اعضا

اطفاله خبر چاتدی امام زمن ئولدی
گلزار نبی سولدی گل و یاسمن ئولدی

• شنبه
• 23
• مرداد
• 1400
• ساعت
• 19:49
• نوشته شده توسط
• یوسف اکبری

سنی گوندروب هانسی قضا و قدر ای اوخ
دوباره اورگیمده یاراتدون کدر ای اوخ

سنی حرمله الده کمانه قویوب آتدی
منیم آهیمی یردن سماواته اوجاتدی
ربابین ده اوغول وای سسین سسلره قاتدی
قالوب خیمه ده آهو مثالی ملر ای اوخ

نولیدی او کماندان چخان وقتی دییدون
گلوب غفلتی قولسوز ابوالفضلیمه دیدون
اونون شأنون اوجلتدون منیم قدیمی اَیدون
یتردون دل کون و مکانه خطر ای اوخ

اوزون بیر کیچیک اوخسان آدوندا خطرون چوخ
دوشنده یولا صوتون سسون هم اثرون چوخ
دگمده هارا والله قلجدان کسرون چوخ
ایدر هر کیم اشیتسه آدوندان حذر ای اوخ

ایدوبسن نه جسارت دگوبسن اورگیمدن
گیچوبسن جگریمدن چخوبسان کورگیمدن
الوم تیغی چکوبسن منیم شاه رگیمدن
اجل باشمین اوسته پریشان گزر ای اوخ

ویراردیم او زمان که قدم بیت خداده
وروب دل منه دلبر اوگون سعی و صفاده
ولی سن یولا سالدون بو گون قانلی مناده
ایدوم منده فنادن بقایه سفر ای اوخ

بو چولده منه گرچه چتین مسئله گلدی
خوشام لیک نقدری مرامیم اله گلدی
بو احوالیمه بلکه باجیم مقتله گلدی
حسینین بیله گورسه دایانماز گلر ای اوخ

نه عادت دی که بولمم مسلمان آراسیندا
مسلمانی دوگوللر بیابان آراسیندا
منی گورسه عیالیم قزل قان آراسیندا
اورک قانی گوزوندن عذاره الر ای اوخ

امان یوخ بو قوشوندان اوزوم زار و پریشان
هوا ایستی سوسوزدان گلور ضعف گیدور جان
خصوصا منی سالمش جوان داغی ایاقدان
اوغول مرگی نه بولسه آتایه ایدر ای اوخ

اوزوم ورمشام امضا اوگون عهد السته
دوزم حمله گتورسه قوشون دسته به دسته
گله م یوخ اولا زینب باجیم قلبی شکسته
رضایت وروب اولسین اودا دربدر ای اوخ

اوجالمش هامی نیزه قلجلار منه ساری
ولی کیمسه مسلمان تاپلمور ایده یاری
دیدیم قوی بیر اقلی باجیمدا گله باری
منیم دردیمی سندن او یاخشی بولر ای اوخ

اگر آهیم اوخیله ویرام فُلک قضانی
گیچر ملک قدردن یخار کل جهانی
فقط دینیمه خاطر دیدوم قوی چیخا جانی
نه وار قصد ریاست نه آیری نظر ای اوخ

قیام ایلمیشم من قیلام عشق نمازین
چکم نازلی نگارین نقدر ایلسه نازین
آچام سجده زمانی اورک راز و نیازین
حالیمدان اوزی اولسین منیم باخبر ای اوخ

حسینم فلکینه اوزوم شمس ضحایم
هدایت گمی سینده اولان نور هدایم
بوگون کرب و بلا ده گرفتار بلایم
بو طوفاندا خسوفه دوشوبدور قمر ای اوخ

منیم شمع وجودیم چکور شعله شراره
اونین نوری تلألو ایدور هر شب تاره
آیین دور و برینده گزور فوج ستاره
بو هر نقطیه گیتسه اولاردا گیدر ای اوخ

اوزوم ایستمیشم من دوشم قانلی منایه
چخا شمرین الیلن باشیم نوک جدایه
تلاوت ایدم الله سوزین آیه به آیه
خلایق گوره منده عجایب هنر ای اوخ

او کسلر که یاخوندان بو میدانه باخولار
اولار یاندیروب آخر دل کونی یاخولار
نه گون مثلی شاخولار نه اولدوز تک آخولار
فقط طرح توکولر گروه کُفَر ای اوخ

منیم درگهیمین بیر کچیک قاره غلامی
بویوکدور همه کس دن اونون شأن و مقامی
ازلدن او دوشوندی ندور عصرین امامی
واریمش دل آگاه و چشم بصر ای اوخ

او کسلر که قاپوندا تاپوبلار دل آگاه
همان کسلره یاخشی سعادت وروب الله
گدا اولسا بو درگه اونی ایلیاجاق شاه
قالوب هر ایکی دنیا اولار مفتخر ای اوخ

بو بیر لحظه ده اول حر اولوب طیب و طاهر
ایکی رنگی بیر اولدی اونون باطن و ظاهر
تاپوب تخت زبرجد حبیب ابن مظاهر
آدین هر کیم اشیتسه اولار غبطه ور ای اوخ

"امینی" قلم الده یازار غصه لی دیوان
آدیم گلسه دلینده ایدر شیون و افغان
یقین ایلسین اوندان سلام آلّام اوزاقدان
نقدر آغلیوب اولقدر النده گولر ای اوخ

• یکشنبه
• 24
• مرداد
• 1400
• ساعت
• 10:46
• نوشته شده توسط
• یوسف اکبری

ای گل ثانی حیدر آدیوا قربان حسین
ثمر قلب پیمبر آدیوا قربان حسین

اسم اعظمدی آدین مخلوقا ای آیت حق
قنداقون گویلره زیور آدیوا قربان حسین

گوزگوسن اللها سن ای شرف ارض وسما
عاشقون ماهیله اختر آدیوا قربان حسین

گوردی مه طلعتوی شمس اوتانوب گیزلندی
مظهر خالق داور آدیوا قربان حسین

مدفنون قبله نمادی بیزه ای نور جلی
تربتون تربت برتر آدیوا قربان حسین

باشیوا قوی دولانیم فاطمه نون بند دلی
ای منه سئوگلی دلبر آدیوا قربان حسین

دینه سن حافظ اولوب قانیوی وئردون مولا
یاشاسین سنکیمی رهبر آدیوا قربان حسین

انقلاب ایلموسن گئتدی باشون نیزه لره
نیزه اولدی سنه منبر آدیوا قربان حسین

امر به معروف ائدوبسن درحقیقت بشری
نهی از منکره محور آدیوا قربان حسین

من نجه وصف ائلییم زینبیوین حالاتین
هر دم آغلور سنه خواهر آدیوا قربان حسین

یورولوبدی سسی اما گینه سسلور آدیوی
دیوری ای گل احمر آدیوا قربان حسین

غم یوروبدی باجیوی خسته اولوب دوراندان
سویولوبدی زر و زیور آدیوا قربان حسین

سنیله باهم اولوب کوفیه راهی زینب
باشینی یاردی او سرور آدیوا قربان حسین

یاردی باشین او خانم قارداشینین خاطرینه
سویلدی یاره لی دلبر آدیوا قربان حسین

اوخی سن کهفی اخا من اونی تعبیر ائلیوم
ای اولان یاره لی حنجر آدیوا قربان حسین

کول توکور باشیمه بو کوفه لیلر آی قارداش
هئچ یوخوم یاریله یاور آدیوا قربان حسین

رهنمایم بالاجا قیزلارا دشمن ایچره
همدمیمدی حق داور آدیوا قربان حسین

اوقدرقمچی دگوب جسمیم اخایول یول اولوب
یوخدی عباس دلاور آدیوا قربان حسین

یازدی بو سوزلری (نیسگیللی) گجه وقتی آقا
آغلادی سسلدی نوکر آدیوا قربان حسین

• یکشنبه
• 24
• مرداد
• 1400
• ساعت
• 11:45
• نوشته شده توسط
• یوسف اکبری

ایسته دیم حضرت حق دن یاری
یار اولا بنده سینه حق باری
نیتیم نیت رحمانی دی
رحمتین کسمه دی مندن تاری
اوستومه جوشدی کرم دریاسی
چشمهٔ طبعیم اولوبدور جاری
سیر ایدوب مزرعهٔ همت ده
ایلدیم تازه و تر گلزاری
گوردوم عشقیله اوخور گلشنده
خلقتین طوطی خوش گفتاری
لاله لر اوج مسرت ده دی
ویرمادا چهره لری گلناری
الغرض گل گله ناز ایلیردی
بلبلین گرم دی چون بازاری
نغمه لر زمزمه لر دوتموشدی
سر به سر نه فلک دواری
عرشدن فرشه نزول ایلوردی
فوج فوج حور و ملکلر آری
شور و شوقیله گلور پی در پی
کعبهٔ معرفتین زواری
کونه بیر طفل قدم قویموشدی
خلقه اولموشدی عدن درباری
ساحت قدسینه باغلانمشدی
فطرسین تاپدی شفا شهپاری
حضرت فاطمهٔ زهرانین
یوسفی تحویل آلیب گهواری
لایلایین روح الامین سویلوردی
آغلیوب اشکین ایدوردی جاری
اولین فردیدی اعلان ایتدی
اولموشام منده حسین بیماری

ای قلم یاز بو گوزل عنوانی
عالمه روشن ایله جریانی
یثربین شهرینی گللندیردی
حضرت فاطمه نین ریحانی
قدّسین روحی نمایان اولدی
قیلدی خرسند دل طاهانی
دودمان خود پیغمبرده
قوردولار انجمن روحانی
روح روحانیه بیر جان گتدی
جان نه جان شاد ایلدی جانانی
سومین نور ولایت شاخدی
کون و امکانی ایدوب نورانی
نقل پیغمبره جبریل ایلور
عالم زرّده کی اوضانی
هر نه تقدیر قضا یازمشدی
آلتینا ویردی حسین امضانی
هر بلا گلسه باشیندان آشسا
اولماسین ذره قدر نقصانی
للولا کلمه سین آتماز باشدان
باغلانیب قانلا اونین پیمانی
حیدرین دینه طرفدار اوغلی
جان کیمی ساخلیاجاق قرآنی
کفر اگر دورسا مقابل نوره
آشکار ایلیجاق ایمانی
سنگر عشق ده ممتاز عاشق
جمله عشاقین اولان سلطانی
دل وروب دلبره دلدن هردم
حمل ایده حق دن آلان فرمانی
هرزمان گوردی خطر وار دینه
باشلاسین نهضت عاشورانی

نقل اولوب حضرت پیغمبردن
گلدی بیر مژده حق داوردن
پنجمین نور اوزینی گستردی
دامن فاطمهٔ اطهردن
دوقوز افلاکی اونین سلبوندن
جاگزین ایلمشم ازبردن
نطفه سی میوهٔ جنت دن دور
ورمیشم آب بقا کوثردن
جنتین اهلینه مولادور بو
هامّی فیضین آلار اول سروردن
چون منیم همدم و همرازیم دور
من دلم دونمرم اول دلبردن
ایسته سه هر نه واریمدور ورّم
مهربانم اونا من مادردن
اولین عاشق سرمستیم دور
واقعی باده آلوب ساغردن
منده عاشق اودا معشوق دی منه
گوز گوتورمم او ملک منظردن
سوئله سه گر منه ارنی ربی
سس گلر اوز باباسی حیدردن
گل اوغول گور او لقا اللهی
یوخ سنه کلمهٔ لا داوردن
کیم آدین ذکر ایدوب اوّل آلدی
اجرین اول پادشه محشردن
شافع روز قیامت دور بو
برتریم دور همهٔ برتردن
آغلیوب آغلادانی قورتارام
آتش دوزخ و دردِسردن
رحمتی عالمه ورّم اما
گیچمرم شمر ستم پروردن

• یکشنبه
• 24
• مرداد
• 1400
• ساعت
• 14:18
• نوشته شده توسط
• یوسف اکبری

ای حسین ای شهدا سلطانی
وی اولان دین حقین قربانی
فی سبیل الله اوزون جان وردون
ساخلادون قانیویله قرآنی
توکدولر قانیوی ناحق کس لر
کسدیلر کوفه لیلر امکانی
مرتبت گوهری نی سیندیرسین
ایسته دی نسل ابی سفیانی
آیهٔ نصر من اللهیدون
سنده وارمیش نظر سبحانی
تیغ برنده یه پیروز اولدون
ای خانم فاطمه نین ریحانی
سونمدون ای یوزی گوندن روشن
عالمی ایلموسن نورانی
قلبلر سنله تاپور آرامش
سن خموش ایلموسن طوفانی
کعبه دن کرب و بلا افضل دور
واردی اثباتینه چوخ برهانی
مقتلون نقطهٔ غم افزادور
آغلادیب حاصل آنان زهرانی
آغلادان ای غمی اهل العرشی
غصه سی آغلاماقین عنوانی
ای آدی آدلار ایچون سرلوحه
وی ورن سالکه استشفانی
ای بقا مملکتیمدن باقی
باقی یه منکر اولوبدور فانی
کیم سنون خطیوه پیرو اولدی
کسب ایدوب رتبهٔ استثنانی
حرلر ابن مظاهر لر تک
اولدولار مثل اولار ربانی
دوتدولار جانلارینی اووجوندا
تاپدیلار جنت جاویدانی
بیر طوافیله گیدوب مینلرجه
عاشقین دغدغه و نقصانی
منده سرگشتهٔ عشقم مولا
ایستورم سندن آلام درمانی
مرقدون جلوه گه جاناندور
مات و مبهوت قویوب موسانی
پرچمون الده الیم سینمده
دوشموشم سیر ایدورم دنیانی
من"امینی" ایدورم مداحی
بزم لر سنله اولور عرفانی

• یکشنبه
• 24
• مرداد
• 1400
• ساعت
• 14:34
• نوشته شده توسط
• یوسف اکبری

هر کیم قدم قویور بو حسینین عزاسینه
الحق ارادتین یترور آل یاسینه

ذکر ایلیوب مصیبتینی آغلیانلاری
مشمول اولولا حشرده الله رضاسینه

پیغمبرین بویوردوقی مدرک دی شیعیه
کیم آغلاسا اونین نوهٔ دلرباسینه

بیر قطره گوز یاشین آلاجاقلار بیر عالمه
جنت ورولله گوزدن آخان یاش بهاسینه

هر آغلیان و یا اوخویان نوحه آغلادان
فرق ایلمز او مشغله نین مدعاسینه

حتی اوزین مشابه ایده آغلیانلارا
محضور اولا او بزمه تماشا هواسینه

چوخ گستروب احادث و اخبار و نقل و قول
محتاج اولوبلا اهل عزانین دعاسینه

مولا علی بویوردی بیزیم شأنمیزده دی
ورّوخ جواب ملتمسین التماسینه

مشکل دچاری اولسا اونین صبرین ایستروک
وصل ایلروک سوزین اورگین اوز خداسینه

ای مرتضی علی سنی وروخ قسم آقا
مخلوق عالمین ازل و انتهاسینه

مظلوم اُلن حسینیوه ائللردی آغلیور
اشکین توکور "امینی" رد او قباسینه

امیدیلن که قبری نین اوّل دقایقی
باخسین آچاندا گوزلری نی اوز آقاسینه

• یکشنبه
• 24
• مرداد
• 1400
• ساعت
• 16:42
• نوشته شده توسط
• یوسف اکبری

اگر چه کعبه قبلهٔ عموم مسلمین دور
وگرچه رکن اوّل دلاوران دین دور
ولیک کربلا آدین ایشتدی دوشدی فخردن
اوگون که بولدی وعده گاه حضرت حسین دور

جلالتینده زادهٔ پیمبرین بسیدی بو
خلایق ایلیبدور ابتدا او نوری جستجو
روان پاک انبیائیلن اولوبدی روبرو
ازلده نور سرمد محمدیله تاپدی خو
نبیر ختم الانبیا بتوله نور عین دور

وجود عدله جهل دن اولوردی ضربه لر فرو
برای حفظ دین ایدوب قیام نهضتین شرو
شهادتین نمازینه آلبدی قانیلن وضو
او سجده ایلینده ایلیوب جهانیان رکو
دوشوندیلر که شاه دین پناه عالمین دور

پناه سیز قالوب قوشون کسوبله راه چاره سین
سالوبلا جور و ظلمیلن حیاتی نین ستاره سین
قویوبلا داشلار اوخلار آتدا جسم پاره پاره سین
یازیلا دورت مینه یاخین بدنده کاری یاره سین
مثال او جنگه نه جمل نه بدر نه حنین دور

پوزوب قلجلار اول شهین وجودی نین قواره سین
یارالاری وروردی قان سالوردی گون شراره سین
قانان یوخویدی عرصه ده او بی کسین اشاره سین
ازلده وا حسین دیوب هوا گییندی قاره سین
خطر واریدی جوّده که وحشت آفرین دور

پلید شمر خنجرین قویوب کسور قفاسینی
عیان ایدوبدی گون کیمی جهانه اوز جفاسینی
داغتدی ابرهه صفت عدالتین بناسینی
اوجالدیب عرشه فرشدن صدای آل یاسینی
دیسم سزادی قلبی اول پلیدین آهنین دور

ایشیتمشیدی زینبین فلک سسین صداسینی
باشیندا اللرین گوروب دلینده آه و واسینی
مریض عشقه باخ دوتوب طبیبی نین هواسینی
که آختاروردی دردنین تاپولمیان دواسینی
نه گوردی قتلگاهیده بیر آیری شور و شین دور

امام عصر قانیلن آلوبدی دستمازینی
آچوبدی قانلی تپراق اوسته قانلی جانمازینی
قلجلار آتدا باشلیوب شهادتین نمازینی
ایشتمیور دی زینبین نه سوز و نه گدازینی
دلینده ذکری دمبدم دعای امتین دور

باشیندا آتمشیدی باش بلالی شاهبازی نی
فقط خدای واحده دیوردی قلب زارینی
او حالدا گوردی شمر دون کسور سوسوز بوغازینی
بویوردی بی حیا دایان چکوم اقلی نازینی
او نازنین دور حقه او شاه مشرقین دور

چکیل کناره جان ورور اقلی باغلیوم گوزین
یاواش یاواش دانشدیروم دسین منه اورک سوزین
ور اذن باری قبلیه اوزوم دولاندیروم یوزون
بونین که شامه شامیان دولاندیروبدی گوندوزین
سیز اهل کینه سوز ولی حسینه اهل دین دور

هدایت آفتابی دور نشان ورور یولون دوزین
همان دلیل و علته داغتدیلار آی الدوزین
آزاتدیلار آزادلقین غذاسینین دادین دوزین
او ملتی که زنده گور ایدردی نازنین قزین
بیر عده کافر عدهٔ دگر ده مشرکین دور

او زینبی که ساغلقی اونین حسینه بسته دور
چو برگ بید اسور بدن وجودی روحی خسته دور
حسین دوشوبدی لنگه چون سفینهٔ شکسته دور
مثالی دور خزان گورَن گله ز هم گسسته دور
غمینده اوز آقاسی نین "امینی" دل غمین دور

• یکشنبه
• 24
• مرداد
• 1400
• ساعت
• 16:48
• نوشته شده توسط
• یوسف اکبری

فراز عشق و عرفان دا حسینین پخش اولان نوری
ایشقلی گون کیمی شیعه یارالدیر باشلارا شوری
ازل گوندن او مولانین بودور مقصود و منظوری
عدالت المسین دین المسین دینار الور السین
حقیقت المسین عشق المسین اشرار الور السین

حسین ایستور جهانی جان کیمی جانلار دولاندیرسین
بو چرخ زندگی نی یاخشی انسان لار دولاندیرسین
دیمور انسان لار السین چرخی حیوان لار دولاندیرسین
دیور چوخ آنلیانلار المسین چوخ آنناماز السین
کیم اللهه اولور عبد المسین ضد نماز السین

حسینین پیروی اوز خط سیریندن کنار اولماز
آدین پیرو قویان اهل شراب اهل قمار اولماز
وروب روحیه سین الدن دوشوب مست و خمار اولماز
حسینین پیروی عاشق دی قالسین عشقی پاینده
وقاریلن دولانسین خلق ایچینده دوز نماینده

دوز عاشق لر وفا گنجینه سینده زردی گوهردی
یازیلار بیر دوز عاشق مین یوز عاشقلن برابردی
خوشا عاشق که معشوقی اونین سلطان محشر دی
بلا هنگامه سینده البلا و للولا سویلر
سوروشسان وعده گاه یاری اوندان کربلا سویلر

اصیل یار اولسا یارین ایستیر غیری مجاز اولسون
سِوَر معشوق لن عاشق آرا راز و نیاز اولسون
بو عشقین شرطی دور عاشق گرک اهل نماز اولسون
نمازین سوگلیم بیر وعده سین مین آیه ورمزلر
او عقبائي فضیلت دن گیچوب دنیایه ورمزلر

حسینین مکتبیندن درس آلان بیر ثانیه یاتماز
آتار دنیانی باشدان لیک یارین یادلارا ساتماز
حلال اولسون دییر اوز مالینه رشوه، ربا قاتماز
تلاش ایلر قوتارسین بو بش اون گون فانی دنیانی
آجیندان السه ده السین ولی ننگ اولماسین آدی

حسینه ننگ اولان اشخاصی خوار اولسون ذلیل اولسون
حسینین نوکری لازم دی مثل جبرئيل اولسون
اونیم درگاهینه فطرس ملک ایستور دخیل اولسون
اوزین سورتور یره شه دن مدال افتخار آلسین
ملک انسانه عجز ایلور که اوندان اعتبار آلسین

ولی بیر عده مداح و مراثی خوان اولور ساده
خطاب ایلور حسینه من ایتَم سن مرد آزاده
قاپوندان قووما بو مردار ایتی ای فاطمه زاده
غرض توهین اولور هم طینیتین هم نیتین کورلور
یخور انسانلقین دیوارینی شخصیتین کورلور

حسین ارباب دور اهل کماله اهل ایمانه
حسینین نوکری پابند اولار اسلام و قرآنه
گلوم چوخ ساده لیک ایتمه اوزون اوخشاتما حیوانه
آدین نوکر قویان مولاسینه چوخ احترام ایلر
که مولا نوکرین چوخ محترم گورسه گرام ایلر

• یکشنبه
• 24
• مرداد
• 1400
• ساعت
• 16:55
• نوشته شده توسط
• یوسف اکبری

دایانمش ابر محن روزگارین اوستونده
زمانه چرخی گزور کج مدارین اوستونده
بهار فصلی یاغور گلستانه غم یاغشی
که شبنم اَیلَنوب هر گلعذارین اوستونده
سنیبدی کشتی دین اهریمنلرین گوجونه
سالبدی لنگرینی چشمسارین اوستونده
او کربلا دولانوب اولدی قانلی بیر دریا
آخان خدا قانی دور شوره زارین اوستونده
عدو جماعتی بیر ایش گوروب عدالت الوب
رعیت آت چاپیدور شهریارین اوستونده
جهان خلقتی با اعتبار ایدن آقامیز
چکوب جهانیدن ال اعتبارین اوستونده
وقار و وجهه سینی داندی کوفه نین قوشونی
دورانمادی بیر یرده دوز وقارین اوستونده
وفا و عهد شکن ملتین ایوی یخیلا
قالانمادیلا که قول و قرارین اوستونده
امامی الدورن الدوردی غارتین ایلدی
نه عالم اولدی ایکی گوشوارین اوستونده
خیام آل علی دن شرار اوجالدی گوگه
عداوتین دومانی وار شرارین اوستونده
علیل امامی یانان خیمه دن خانم بی بی سی
کنار ایدونجه یانوب قلبی نارین اوستونده
بتوله نایبه غم قهرمانی زینبدن
الردی غیری او رنج و فشارین اوستونده
ولیک دین علمین چیگنینه آلوب یریدی
طریق عشق ده گرد و غبارین اوستونده
غروب وقتی گونین مغربه چاتان زمانی
دوشوبدی جان دان او خرد و کباری اوستونده
پیمبر عترتی ویلان گزوردی چوللرده
ایاق یالین تیکانین ریگزارین اوستونده
نه گلستلندا قالوب گل نه باغباندا قرار
زمانه باخ اوتوروب غنچه باغین اوستونده
جدا باشیندا حسین باشینی گوردون دیوری
مسیح عصر گلوب نطقه دارین اوستونده
ایدوبدی قصد سفر کوفیه قوناق گیدجاق
مطالع واریدی نیزه دارین اوستونده
نه نیزه دار که بیر دره یوخ عاطفه سی
غبار غفلته باخ نابکارین اوستونده
یتیمه قزلار آتا باشینه دولاندیقجان
الینده قمچی ویرار یاری یارین اوستونده
طناب ظلمه چکوب اهل بیتی سعد اوغلی
دوزوبدی جمله سبنه بیر قطارین اوستونده
ستاره لردن آیین سیرینی آییردی غرض
چکوبدی داغ دل داغدارین اوستونده
"امینی" صبح و مسا ورد ایدوب حسین آدینی
او آدی زیور اولان هر شعارین اوستونده

• یکشنبه
• 24
• مرداد
• 1400
• ساعت
• 18:45
• نوشته شده توسط
• یوسف اکبری

جمله عشاقین اولان ای شانلی سلطانی حسینیم
ساخلیان تحت لوای حق ده قرآنی حسینیم
سن ازل گوندن دیوبسن البلا و للولانی
قانلا امضا ایلوبسن لوح پیمانی حسینیم

ای گوزل غنچه م اولوبسان گور نجه پرپر چمنده
گلشن قرآنه باد سر سرِ آفت گلنده
بلبلون ویلان و سرگردان قالوب دشت و دمنده
پیکرون چون شانه شانشاندور یوخون صاف یر بدنده
گوللنبدور لمعه لمعه جسموین قانی حسینیم

ای وفا گنجینه سینده گوهر مهر و محبت
هانسی صرافین گوجینده وار سنه ورسونله قیمت
سن او کالا سن که سندن چکمز ال تجار خلقت
بولمه دی صد حیف اولا قدرین بو ناشایسته امت
ساتدیلار آز قیمته ارزشلی کالانی حسینیم

ای شهادت باده سیندن مست اولان مستانه قارداش
سن شهید اولدون داغلدی خانه و کاشانه قارداش
دیزلریم تترور قاچاندان خیمه دن میدانه قارداش
منده سرگردان عشق اولموشام دیوانه قارداش
گورنه لرزاندور بلالی زینبین جانی حسینیم

واردی سندن بیر سوالیم ای عزیز جان زینب
زینبون مدهوش ایدیدور قتلگاهونده بو مطلب
نطقه گل قربان دلیوه سن بویور آیا گچن شب
یانوا زهرا گلبدور یوخسا ای مأواسی اطیب
حس ایدور الان مشامیم عطر زهرانی حسینیم

عصر عاشورا الیکی خیمه لر یاندی تالاندی
کاسهٔ صبریم فشار جور اعدادن جالاندی
مجمر قلبیمده قارداش غم غم اوستونده قالاندی
قزلارون یانمش چادر دا صبح اولونجا دالدالاندی
المدوک پایانه وردوک لیل هجرانی حسینیم

السلام ای قلب عالم مشرقینین پادشاهی
گل وجودونده نمایاندور سنون نور الهی
سن همان نوریله کل عالمه وردون گواهی
شاهد اول ظلمینده نقصان قویمیوب شامین سپاهی
آل پیغمبر گزور قول باغلی صحرانی حسینیم

قزلارون گرچه گزوللر چوللری آهو مثالی
دللرینده آه و افغان گوزلرینده اشک آلی
لیک دشمن کفن و دفن ایلوم منه ورمز مجالی
دم غنیمتدور ایدوم قوی باری بو بیر عرض حالی
شامه قول باغلی چکوللر فوج طفلانی حسینیم

ای اولان آتلار ایاقی آتدا صد پاره وجودی
وی قویان حیرتده اهل کونی عرفانلی سجودی
تاپموسان الحق سجودینده قیامونده ودودی
سن او عاشق سن که یوخدور عشقوین حد و حدودی
آغلادان ای حال اغماسینه جانانی حسینیم

سن او عاشق سن که مأوا ایلدون عشقین مناسین
گورسه گر موسی بن عمران جسموین نقشین نماسین
تز دوشر طوره اوجالدار گوگلره آه و نواسین
آستانونده یاتانلار تاپدلار الله رضاسین
باغلیوب سنلن "امینی" عهد و پیمانی حسینیم

• یکشنبه
• 24
• مرداد
• 1400
• ساعت
• 18:47
• نوشته شده توسط
• یوسف اکبری