اشعار ترکی امام حسین (ع)

یتیشدی قتلگهه زینب اَلَم پرور
کمال حزنیله سسلندی ای گل پرپر

دئمه غمونده باجون آه زاره گلمیجاخ
نشاط ئولونجه من دلفکاره گلمیجاخ

آلوب قراریمی دلدن بو پیکر بی سر
قرار بیرده دل بی قراره گلمیجاخ

اَیاخلاریم یِریمور ترک ایدم بو گول بدنی
دعا گر ایلمسن اختیاره گلمیجاخ

فدا اولوم سنه دور زینبی دعا ایله
کلام لا بولورم آشکاره، گلمیجاخ

کسیلمیش اللریوی عرش داوره آچسان
شمار رحمت رحمان شماره گلمیجاخ

دیردیم ئولم اگر چه مصیبتون گورسم
مشیّتیمدی اجل بو گذاره گلمیجاخ

آنام بویورمشیدی،تا بو جاندا جانیم وار
فلک منیله بیرآنی کناره گلمیجاخ

بلالی باشیمه مین یول اگر بلا گَتیره
گلایه صحبتی تقدیر یاره گلمیجاخ

مصمم اولموشام اوز عهدیمه وفا ایلیم
اوزی بولور که باجون زیر باره گلمیجاخ

آخان بو قانلاری ایستور که ایلیه اخفا
بیله خیال اِیدوری کیمسه جاره گلمیجاخ

یتیشسه شامه باجون، چوخلاری اولار رسوا
یزید او یرده مگر اعتذاره گلمیجاخ

یزیدی اِیتمسه رسوا اگر باجون زینب
بو غملی قلبیم حسین اقتداره گلمیجاخ

آخوبدی قانی ابوالفضلیوین بو صحراده
وفاده مثلی اونون روزگاره گلمیجاخ

علی اکبره، جان، جهانیان قربان
شبیه حضرت طاها دوباره گلمیجاخ

باتوبدی قاسم شهزاده قانینه بوردا
جهانه بیرده ایله ماهپاره گلمیجاخ

مشیت اولسا گلر عالمه هزاران مهر
ستاره سحرون تک ستاره گلمیجاخ

او شیر خوار که سوتدن آچا اونی بیر اوخ
اولونجاخ حَشر ایله بیر شیرخواره گلمیجاخ

شکسته نی کیمی ایله سیزیلدیور آناسی
دِیور اوغول اورکیم اصطباره گلمیجاخ

اولوبدی من تک اودا تیر غملره آماج
اورکده دردیه بیر راه چاره گلمیجاخ

دییمیرم یولووی گوزلیور یامان گونلر
خزان دوباره مگر لاله زاره گلمیجاج؟

مصیبتی باشیمون تازه باشلانور یارالی
دیار شامیده غملر شماره گلمیجاخ

فنون شعریده استاد استعاره اولا
مثال (شانی) (عتیقا) دوباره گلمیجاخ

• یکشنبه
• 3
• مرداد
• 1400
• ساعت
• 12:10
• نوشته شده توسط
• یوسف اکبری

سن شهید اولدون حقیقت آشکار اولسون حسین
نهضتون تا وار بو عالم پایدار اولسون حسین

ای بو باشسیز پیکره اولسون باجون زینب فدا
تا ندای ارجعی حقدن یتیشدی ، اول ندا
حالیوه تعقیر ویردی خیمه گهده برملا
سویلدون عاشق اودور که سربه دار اولسون حسین

ساغر پرخونون اولدی تا گواه راه عشق
مست مست اولدون او بیر پیمانه دن ای شاه عشق
منده مستانه او دم اولدوم سنه همراه عشق
یار اودور ئوز یارینه هر یرده یار اولسون حسین

کارزاره عزم اِیدن دمده سن ای شاه شهید
اود دوتوب اودلاندی قلبیم چون که قالمشدون وحید
غیرت ا... غیرتی منده اودور اولدی پدید
قطب عالم قویمادیم درده دچار اولسون حسین

گوشه چشمیله تا خرگاهیوه ایتدون نگاه
آنلادیم منظوریوی ای خسرو زرین کلاه
شاهی لازمدور سوار مرکب ایتسون سرسپاه
مرکبه سلطان سَرمَد تا سوار اولسون حسین

قانینه باتمیشدی اول دم یکسر انصارون سنون
عترتوندن غیری قالموردی هوادارون سنون
من اوزوم اولدوم بو ماواده جلو دارون سنون
ایستدیم مندن رضا پروردگار اولسون حسین

برج زین اوستَن طلوع ایتدون که سن خورشید وش
چرخ چارمدا توکوبدور عارضه خورشید رَش
باده ایصالیوه زینب دیردی العطش
زینبین کامی مبادا ناگوار اولسون حسین!

مرکبه مهمیز چکدون فاتح خیبر کیمین
لشکره اولدون مقابل ضیغم صفدر کیمین
گوئیا صفینیدور جنگ ایلدون حیدر کیمین
بیر نولاردی سطوتین بیرده کِرار اولسون حسین

حمله ایتدون لشکر ابن زیادین هنگینه
بیر قلج ویردون ازل سر کرده لر سرهنگینه
لشگر بی رحمی سالدون ذوالجناحین تنگینه
سس گلوردی عرصه دن لشکر کنار اولسون حسین

اوخشیوبسان جنگیده الحق که شیر داوره
ذوالفقارین اوت توکوردی دم به دم بحر و بره
جنگ صفینی نشان ویردون دوباره لشکره
ایستمیردون کل لشکر تار مار اولسون حسین

ناگهان بیر اوخ یتیشدی قلبیوی اِیتدی مکان
غیره گوردون که مکان اولماز مکان لامکان
مرکب اوستونده یاپشدون بیر اوخا ویردون تکان
اولمادی خارج ، نَدن سوز پرده دار اولسون حسین

الامان و الامان و الامان و الامان
الامان مین یول او دمدن قدیوی اِیتدون کمان
لاجرم چکدون اوخی سن پشت سَردن ناگهان
اوخ ووران ظالم ایکی دنیاده خوار اولسون حسین

قانون آخدوقجا اَلوندن گیتدی قارداش اختیار
منده تَل اوستن باخوردوم ایلیردیم آه و زار
بیر زمان گوردم که مرکبدن یخیلدون آشکار
سسلدون عاشق گرکدور جان نثار اولسون حسین

هر طرفدن حمله اِیتدی کوفیان خیره سر
شیر مستی دور ویردی روبهان حیله گر
سالدیلار توپراقلار اوسته قوم دونِ، بد سیر
آز قالوردی جسمدن روحون کنار اولسون حسین

خنجر الده شمر دون گلدی مقام اَحفره
فاطمه یومدی گوزون تاثیر ایدوبدور کوثره
دوزمدیم منده ال آتدوم شمر الینده خنجره
زینبینده لازمیدی زخمدار اولسون حسین

ایستیرم ای مرد مردان خدادن مَردِ مَرد
باغلیام تَسخیرشامه من کمربند نَبرد
ایلینمز شیریله روباه شامی جنگ سَرد
اذن ویر شاماته زینب رهسپار اولسون حسین

سن که جانانین یولوندا ایلیوبسن ترک سَر
اولموشام منده مصمم اِیلیم شامه سَفر
اُلمسم حتما گتیرم شامیدن عالی خَبر
بیر خبر که زینبوندن یادگار اولسون حسین

ای اولان ظلمیله بو صحراده غلطان قانینه
شامیده اوت سالماسام گر لشکرین ارکانینه
اوندا من دینجلمرم آند اولسون اکبر جانینه
شامیان بو فعله مندن انتظار اولسون حسین

صورت ظاهرده سن هر چند که مغلوب اولموسان
باطناً اما حسین پیروز محسوب اولموسان
مرحبا ایثاریوه محبوبه محبوب اولموسان
دشمنین مخذولیدی اونداندا خوار اولسون حسین

بیله فکر ایلوردی دشمن عالمین دادرسی
قانینه باتسا باتار بالمره بو وحدت سسی
وحدتین حفظ اِیتدی اَهلون ، با کمال بی کسی
کلمه وحدت ددیم دلده شعار اولسون حسین

ایستیرم بو فرصت باقی ده نهره یول سالام
نچه لحظه قید عباس علمداره قالام
قارداشیمدان پرچم انا فتحنانی آلام
نهضته زینب گرک آینه دار اولسون حسین

شاه دین دریای احساندور جهاندا ای (عتیق)
وسعتی بی حددور عمقی بو عالمدن عمیق
صدقیله کیم دامنین دوتسا ایدر طی طریق
عاشقین قویماز اسیر روزگار اولسون، حسین

• یکشنبه
• 3
• مرداد
• 1400
• ساعت
• 12:11
• نوشته شده توسط
• یوسف اکبری

کربلا فخر ایله سنده معنی احسان یاتوب
خلق یکسر دردمند اولسا اونا درمان یاتوب

ایلیوب یکسر احاطه بو جهانی بحر نور
نور حق چوخ بیر شکوهیله ایدوب سنده ظهور
موسی عمرانی حیرتده قویوب نور حضور
طوره باخ نوری ایدوب موسانی سرگردان یاتوب

طور سینای محبت ده ایدوب موسانی مست
موسوی عیسی' اولوبدور طوریده صهبا پرست
قبر پاکی، ایلیوب مسکن، خدای هستِ هست
معنی عشقه وئروب عالی سر و سامان یاتوب

عیسی عیسا قویوب عیسانی حیران عشقینه
وار یئری گر اهل عالم اولسا قربان عشقینه
ایلیوب فدیه بو عشقین صاحبی جان عشقینه
عشقینه عشق ایلیوب فی المحضر جانان یاتوب

آه او ساعتدن یتوب زینب بلا صحراسینه
درد و محنت وئردی یوز کرب و بلا زهراسینه
خون دل قاتدی دوباره چشم خون پالاسینه
سسلدی نهر اوسته ساقی تشنه و عطشان یاتوب

مرقد ششگوشیه دقتله تا سالدی نظر
آه آتشباری ووردی رکن ارکانه شرر
گوردی گویا سینه مشروحیده بیر سود امر
سونمیوبدور سوزی دلده العطش گویان یاتوب

دور مهر عالمه حلقه ووروب نچه قمر
زیب اولوب بالا سره نعش حبیب خونجگر
عرض ایدوب، حر هاردادور، ای خسرو عالی سیر
خجلتیندن بولمورم پیدادی یا پنهان یاتوب

جان زینب عرشیدور، یا فرشدور قبرون شها!
عرشیده بو کثوت اولماز بوردا وار روح خدا
ایلیوب تذهیب بو ششگوشه نی پایین پا
لیلی نالانی ایلوب گور نجه گریان یاتوب

ای یکانه مهر رخشان سپهر آبنوس
روح آدم، جان خاتم، عالمه نفسِ النفوس
صبر ایدوب بیر اربعین هجرانیوه تازه عروس
چون بولوردی کربلاده روحینه ریحان یاتوب

ای شهید راه شاهد شاهد منان حسین
آلتی گوشه بو مزاره زینبون قربان حسین
قاسمین هاردا یاتبدور قالموشام حیران حسین
قاسمینده باغری اولموش اکبرون تک قان یاتوب؟

مجتبی دوشدوقجا یاده قاسمی یاد ایلدیم
نو عروس قاسمی گوردوقجا فریاد ایلدیم
قبرینه گتدیم سریه قلبینی شاد ایلدیم
محضرونده قاسمی گوردوم که دست افشان یاتوب

وار گلایم قلبیدن اسپهر نیلی فامیدن
اولمادوم آسوده خاطر گردش ایامیدن
کاروان عشقیوی آخر گتیردیم شامیدن
بیر قالیب نازلی رقیه ن شامیده نالان یاتوب

شامیده نازلی قیزون اشراریدن طاقت آلوب
شور و حالیله یزیدین جانینه لرزه سالوب
نهضت خونینه شام ایچره نماینده قالوب
فکر واهی ائتمسونلر شامیده طوفان یاتوب

نه نماینده سفیر کشور خونین شاه
درگهی شاهان دهره شامیده عالم پناه
جذبه ی زینبدن اولموش واقف سرّ اِلاه
خط سیرین ایلیوب شاماتیده پایان یاتوب

نازمان مستغرق اولدی زینب کبرا غمه
ایلیه عرض ارادت تا کی صاحب پرچمه
قویدولار یوز دیده گریان سمت نهر علقمه
نهر علقمده بولوردی ساقی عطشان یاتوب

حالت رقّت یئتیشدی قلب زار زینبه
آگه اسرار ایدوب، زوار عشقی مطلبه
خیردا قبر اولماز اوجا قامتلی صاحب منصبه
سرو خوابیده بولوردی پیکری شان شان یاتوب

زکی _ دلجو _ شبگیر _ طهمورثی

• یکشنبه
• 3
• مرداد
• 1400
• ساعت
• 15:50
• نوشته شده توسط
• یوسف اکبری

سنی تا اوز کمانیندن رها اِیتدی قضا ای اوخ
نشانوندن گلوب دگدون دئمه اِیتدون خطا ای اوخ

منه ای کاش مین دفعه قیامت آشکار اولسون
یارا اوستن یارا دَگسون یارالار بی شمار اولسون
طلای خدمت عاشق گرکدور پر عیار اولسون
هلّه چوخ طالبم تندن اولا باشیم جدا ای اوخ

قضای عهدیمه یوخ سوز ازل گون اِیچمیشم صهبا
او می دن که ایچیردوبدور منه ساقی بی همتا
او مَی دن سنده نوش ایتدون که اولدون مست و بی پروا
اودور آیریلماقا رغبت یوخوندور مطلقا ای اوخ

بو چولده وصل دلداره عجب جوش و خروش ایتدون
می روز اَلستیدن هله بیر جرعه نوش اِیتدون
اماندور بیله فکر اِیتمه بو مدهوشی خموش اِیتدون
خموش اولماز خمار نشئه بزم لقا ای اوخ

جهاندا هر تهی بنیان لقااللهه وصل اولماز
اگر چه کِچمسه جاندان می یله ساغری دولماز
می یله دولسا گر ساغر محبت گلشنی سولماز
بو می بیر می دی که ایچسن ویرر روحه صفا ای اوخ

بو می بیر می دی که ایچسن گلرسن دهریده هوشه
بو می بیر می دی که ایچسن ندای حق یِتر گوشه
بو می بیر می دی که ایچسن چَکر دلدارون آغوشه
بو می بیر می دی که ایچسن اولارسان پر بها ای اوخ

منی تا می بصیر ایتدی دو چشم مست و بیماره
همان دمده ویریلدیم من گل رخسار دلداره
اوحُسن بی بدل اِیتدی منی عالمده آواره
نَدور دردیم یانان دلده، بولر درد آشنا ای اوخ

اصابت ایلدون تا سن منیم بو سجده گاهیمدن
دل جان جهان یاندی اورکده سوز آهیمدن
حزین بیر سس او دم گلدی منه لب تشنه شاهیمدن
عجبدور اولمادی اول دم جهان یکسر فنا ای اوخ

دَگن لحظه جبینیمدن یوخیدی قولاریم تنده
نه من باشدان دفاع ایتدیم نَده رحم اولدی بیر سَنده
نه لازمدور ددیم قالسا خجالت جانیم ایمنده
هله چوخ طالبم اولسون منه آرتوق جفا ای اوخ

بو گون سَندن قاباق بیر اوخ دگوب سو مشکیمه ای اوخ
او دمدن دویمشام جانه ئولومدن ذره باکیم یوخ
حسینین وصلینون ایندی بو دم مشتاقیم چوخ چوخ
غریبه درده اولدوم من بو چولده مبتلا ای اوخ

او بلبل تک بو صحراده اگر گلدیم من افغانه
نئدوم که اولموشام طالب، بو صون دم وصل جانانه
گرک معشوقه می گورسون باتوبدی عاشقی قانه
غمیم یوخ دلده گر شاهیم دِیسه صد مرحبا ای اوخ

یقینیم وار بو دیداره گَلر شاهیم محبتدن
چیخاردار عاقبت اوز نوکرین بو غملی حالتدن
او لحظه آیرلار تندن یقینیم وار خجالتدن
او دم کاش اولمیا شاهین رسا قدی دو تا ای اوخ

آدیم سقا قالوب آل علی بو دشتیده عطشان
نه لازمدور منه بو جان حسینه جان اولا قربان
اولیدی عالم امکان حسینسیز یکسره ویران
منه بسدور او شاه اولسا اگر مندن رضا ای اوخ

(عتیقی) آغلادار نیسکیللریم دنیاده پیوسته
توکر قان یاش عذاره دایماً آهسته آهسته
دیر ای قان اولان باغری منی بیر قبریوه ایسته
گلیم قبرون کنارینده اِیدوم آه نوا ای اوخ

• یکشنبه
• 3
• مرداد
• 1400
• ساعت
• 16:09
• نوشته شده توسط
• یوسف اکبری

آنام اوغلی بو نجّه نَعشیدور، که بو داغلی قلبه تکان ویرور
چوخ اَسفلی حاله سالوب عدو، نَدی شرح حالی نشان ویرور

ایله بیر کچن گیجه بو یره، سالوب اوز گذارینی بیر گدا
او گدا بولوبدی که شاه اونی، اَلی بوش چَتین سالاجاخ یولا
گورسن نه خاطره اول شقی، اَل آچوپ جسارت اِیدوب شَها
اوزگون یقین آیرانمیوب، اَلیوی کَسوب یارا قان ویرور

یانا تا شرار مصائبه، بو جهانه قویدی باجون قدم
بویوما بیچیلدی او دم منیم، بو شَقی زمانه ده رخت غم
باشیمی زبس که بلا تاپوپ، اِیلیوبدی داغلی اورک وَرم
گهی اِیستیور چیخا جانیمی، گهی عشق جانیمه جان ویرور

بو جهان عاریه ده هرآن، فلک اِیلیوبدی جفا منه
هایانا قدم قویارام یِتَر، او مکاندا درد و بلا منه
آزالوبدی اَللی اِیله یِته، اولوب همدم آه و نوا منه
باجون عمردور که زمانه ده، اورکینده درده مکان ویرور

بو بلا چولونده تاپوپ گینه، باشیمی دوباره بویوک بلا
قولی باغلی شامه گیدور باجون، بو فراقه من دگورم رضا
اِیله بیر که گولدن او بلبلی، آیرور جفایله اشقیا
او گولی که بلبله دم به دم، بو مکاندا عطر جنان ویرور

آنامیز وصیتینی هله، یتیرنمیوبدی باجون باشا
منی بیر دعا اِیله سن اوزون، دگه گور روادی اوخوم داشا
اوپه بولمورم یارلاریوی، دوزولوبدی ظلم اوخی باش باشا
اوپه اوپدی پیکر پاکیوی، منه سن گور اوخلار امان ویرور !

واریمیش بو لشکرین ای عجب، سنیله نه قَدر عداوتی
باجیوا عیان اِیلدی غمون، بو چوخور یر ایچره قیامتی
اوپم اِیستورم اوپه بیلمیرم، اورکین باشیندا جراحتی
اودی ناله عرشه اوجاتموشام، نه اِئدیم که قان او یاران ویرور

دگوب اوچ پر اوخ که بو سینه وه،
یاراسی اونون نچّه پاره دی
باجیوین بو یاره ایوین یخوب، بولورم بو یاره نه یاره دی
نچّه اوخ دوباره ویروبدولار، یارالار بَسان ستاره دی
اِیله بیر که انجم نه فلک، دوشنیب یر اوستونه سان ویرور

یتیشوب مقام شهادته، او گوزل مرامیوه چاتموسان
باجون افتخار ایلیر سنه، باشیمی سمایه اوجاتموسان
ولی ای شهید ره خدا، بیر عجیبه صحنه یاراتموسان
ایشیدیر دل اهلی گوزل سَسین که کَسیک بوغازون اذان ویرور

ای (عتیق) عشقیله کیمسه گر، اِیده نوحه دهریده هر زمان
یانا یا که دلدن حسینیمه، اِیلیه او گوز یاشینی روان
او کسه امان ویرجاخ حسین، دوتاجاج اَلیندن اونون هرآن
دوشجاخ جزاده ده سَس گًلون، که حسین خلقه اَمان ویرور

• یکشنبه
• 3
• مرداد
• 1400
• ساعت
• 16:18
• نوشته شده توسط
• یوسف اکبری

گینه گولّنیب پهن دشت جهان
بهار اولدی بالمرّه فصل خزان
ایدیب عالمی رشک باغ جنان
گلیب شوره بلبل اولوب نغمه خوان
دونوب عالم پیر اولدی جوان
توکور نور گوگدن یره کهکشان
نسیم فرح بخش روح روان
ایدور مست هر معبری بی گمان
ملائک اوخور اَل چالور حوریان
وئریب سس سسه جمله لاهوتیان
گلیب مظهر ذات یزدان حسین
قدم قویدی دنیایه یاران حسین

شب سوّم ماه شعبانیدی
و یا صبح بو یوم غفرانیدی
مدینه اوگون نور بارانیدی
خانم فاطمه شاد و خندانیدی
دوغوب بیر اوغول ماه تابانیدی
اونا جبرئیل مهد جنبانیدی
ایکی تللری مثل ریحانیدی
گوزل چهره گوندن درخشانیدی
باخان گول جمالینه حیرانیدی
یازیلمیشدی تقدیره عنوانیدی
بو دور تشنه دینه ویرن جان حسین
قدم قویدی دنیایه یاران حسین

خبر ویردیلر گلدی خیرالورا
مبارک دیدی مقدمین مصطفا
بویوردی تز اسما گتور اوغلوما
ویریم سود گرگ بارماقیمدان اونا
تاپا پاک اندامی نشو و نما
اتیمدن اتی قانی قانیم اولا
آلیب تا قوجاقینه نورس بالا
سلام ایلدی جدّینه برملا
اوپوب جدّی گولدی گه ایتدی نوا
دیدی جان حسین جانوه من فدا
سنه من اولام کاش قربان حسین
قدم قویدی دنیایه یاران حسین

اراده ایدیب خاتم انبیا
ئوزی تازه مولودینه آد قویا
گلیب مرکز وحیدن بو ندا
آدین قوی حسین ای حبیب خدا
بوغازیندن اوپ ایلمه من بکا
آناسی اگر بیلسه ایلر نوا
بو گون جشندور اولمارام من رضا
قزون فاطمه قلبینی داغلاما
دگول بو مکان صحنۀ کربلا
نه اکبر نه قاسم دوشوب تپراقا
هله اولمیوب قانه غلطان حسین
قدم قویدی دنیایه یاران حسین

بو اوضاعی اسما گوروب آغلادی
دیدی یا نبی دیل سوزین باشلادی
بو نه آغلاما گیتدی شادلیق دادی
دونوب جشنمیز ماتمه اوخشادی
مگر واردی جسمینده بیر ایرادی
بویوردی یوخ اسما گوزل غنچادی
ئوزی با نمکدی گوزلدی آدی
منی جبرئیلون سوزی اوتدادی
گُل یاس بیجا دیله دولمادی
عجب بی وفا عمردی دنیادی
گلوب رحمت و باب احسان حسین
قدم قویدی دنیایه یاران حسین

حسین فعل مصدردی هر فاعله
آچیب فاصله حقّلن باطله
ویرردی صله هر گلن سائله
آناسی دوغان لحظه بی فاصله
اونا گلدی جنّاتدن قابله
ئوزی باب احساندی پایلار صله
گل ای غافل ایتمه آقوندان گِله
نیه احتیاجون وار اعلان ایله
قضا سالسا هاردا سنی مشکله
گدیب هر یانا دوشمه دیلدن دیله
هامی درد پنهانه درمان حسین
قدم قویدی دنیایه یاران حسین

حسیندور حمایت ایدن شیعه دن
ایدیب دینه خاطر جلای وطن
سالیبدور بلایه وجودین علن
اوزین هم عیالاتین اول ممتحن
چکیب قانلی صحرایه شاه زمن
اول گیدیریب اکبرینه کفن
ال اوزدی هامی یار و انصاردن
باتیب قانه یتمیش ایکی گُل بدن
بزندی گلستان وجه الحسن
قزل قانیدن گیدیلر پیرهن
اوگون ایلدی عید قربان حسین
قدم قویدی دنیایه یاران حسین

گلون ایندی ای جمع اولانلار بورا
سالاخ بیز حسینون او وقتین یادا
یوزین دوندروردی صاقا گه صولا
بیر اوخ دلدی قلبین دوشوب تپراقا
اورکدن گهی سسلیوردی آنا
حسینونده سنتک بویاندی قانا
سنون سینوه دگدی گر بیر یارا
منیم یاره سینمده گلمز سانا
نشان اولموشام بی شمار اوخلارا
باشیم اوسته گل سویله ای وای بالا
«صفا» عشقوه اولدی حیران حسین
قدم قویدی دنیایه یاران حسین

• یکشنبه
• 3
• مرداد
• 1400
• ساعت
• 17:05
• نوشته شده توسط
• یوسف اکبری

نه قدر نورحسین عرشیده تابنده اولا
نه قدر مکتبی دنیا بویی پاینده اولا
نه قدر عشقینه عالمده اونون بنده اولا
نه قدر حبی بو دنیاده ئوله زنده اولا

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر قطره باران ایده ایجاد حیات
گله ایجاده بشر یا آپارا مرگ و ممات
نه قدر شمس و قمر وار نقدر واردی کرات
نه قدر خلق اولا عالمده بنینیله بنات

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر واردی شجر وار نه قدر برگ شجر
نه قدر واردی ستاره نه قدر واردی قمر
نه قدر تابش خورشید ویرر بهر و ثمر
نه قدر واردی ملائک نه قدر واردی بشر

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر روح الامین ذات حقه ایتسه ثنا
ملک الموتیده هر قدر ایده ارواحی فنا
نه قدر دانه انبات اولونا نشو و نما
عرض یر جمع اولا یا ضرب اولا بر طول سما

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر واردی شبابیله بو عالمده کهول
نه قدر واردی فروعاتیله تعداد اصول
نه قدر علم ریاضیده اولا جمع وصول
نه قدر لطف خدایه اولا انفاس شمول

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر شمس و قمر ایلیاجاق سیر فلک
نه قدر ذات حقه حمد ایده جاق حور و ملک
نه قدر خلق ایلیوب بحرده،خلّاق سمک
نه قدرلر یارادوب رزق ،ائدر خلقه کمک

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدرلر یازیلیب آیه قراندا صلات
نه قدر حامی قرآن تاپاجاق راه نجات
نه قدر خلق اولا مجموع به روز عرصات
نه قدرلر اوخونا نام رسوله صلوات

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر رایج ائده حکم خدانی علما
نه قدر نام حسینه ویره احبابی بها
نه قدر گلسه محرم نه قدر اولسا عزا
نه قدر گوز یاشی محشرده اولار درده دوا

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر لوحیده ثبت اولسا حروفیله سخن
نه قدر واردی اونون یادینه تسبیح دیین
نه قدر آغلیان اولسا نه قدر روضه دیین
ثبت ایله قلبیوه تکرار ایله بیر بیله سخن

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر خلق اولونان چکسه دم و بازدمی
نه قدر گلمیوب عاشور حسین منتقمی
نه قدر محشره حمل ائتمیه عباس علمی
نه قدر گئتمیه زهرا اورگیندن اوغمی

عددینجه اوخیون نوحه حسینون آدینا
آغلیون تا دم محشر او غریبین یادینا

صلواتین نه قدر اولسا ثوابینده رقم
نه قدر مؤمنه جنّتده اولا بذل و کرم
نه قدرلر یازا مصحفده حروفاتی قلم
نه قدر عرشیده جبرئیل امین وورسا قدم

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر نور حسین یر گویه سالدی سایه
نه قدر عرشه ویروبدور بَلَگی پیرایه
نه قدر اولسا علاقه او شه بطحایه
نه قدر شیعیه گوز یاشی اولا سرمایه

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر شیعه توکوب گوزیاشی عاشورادن
نه قدردویمادی قارداشی اوگون سقّادن
نه قدر اولسا شفاعت آناسی زهرادن
کیمسه سی عفواولونوب کیمسه سی استثنادن

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر خضر گئدوب یول تاپاجاق اوز راهین
نه قدر جاهی سلیمان کیمی اولسا شاهین
نه قدر اولسا وجودی گجه گویده ماهین
نه قدر حرمتی وار عرشیده آل اللهین

عددینجه اوخیون نوحه حسینون آدینا
آغلیون تا دم محشر او غریبین یادینا

نه قدر عقل اولار ذات خدایه حیران
نه قدر مدح یازار میرزا علی اکبر خان
نه قدر اولسا تکلم نه قدر اولسا لسان
نه قدر « صادق » و مثلینده اولا فنّ بیان

عددینجه اوخیون نوحه حسینون آدینا
آغلیون تا دم محشر او غریبین یادینا

• چهارشنبه
• 6
• مرداد
• 1400
• ساعت
• 15:16
• نوشته شده توسط
• یوسف اکبری

غم ایلمه چوخ سخت اولاجاق راه اسارت
منده سنیلن گلّلم اَیاٰ کان شجاعت

علقمده یاتوبدور باجی بیر شیر علمدار
قارداشیم اباالفضلدی اولدی منه غمخوار
یوخ کیمسه سی تک قالدی فرات اوسته او سردار
دیدارینه گئت اولسا اگر سنده فراغت

یغ باشیوه بیربیر بالاجا قیزلاری زینب
گل قویما گوزوندن دوشه اولدوزلاری زینب
دوت مدّ نظرده سن اوغولسوز لاری زینب
هر امرلری اولسا اوزون ایله اجابت

ای قیزلاریمون یولدا اولان افسر و تاجی
بو یولدا سنه من اولارام حامی و ناجی
گئت ناقیه میندیر بالاجا قیزلاری باجی
قویما وورالار ساخلا گوز اوستونده امانت

لیلا و ربابی سن ئوزون ناقیه میندیر
قاسم آناسین کیمسه سی یوخدور باجی دیندیر
سجادین الیندن یاپشوب کوفده یندیر
ناخوشدی بالام ایله ئوزون چوخلی عنایت

هرچندمبارکدی بیزه امر شهادت
اماسنه وار کوفده بیرآیری قیامت
گورسن باجی باشیمده اگر کولدن علامت
وُورما باشیوی ناقیه ایلّله شمادت

ای کان حیا اُوْل اُسرا ایچره منادی
قویما باتا ئوز جدیوین اول شهریده آدی
رسوا ایله هر خطبه ده سن ابن زیادی
طغیان ائلیوب دینیده ، سن ایله برائت

سن گورسن اگر قیزلارا ایلیلّه شمادت
دوت یوزلرینی ئولدورر اولْ دمده خجالت
گورسن داش آتولار سیزه اولْ قوم جهالت
یوم گوزلریوی، قوی منه وورسونلا جراحت

یولّاردا دوشر بیر بالا سیزلردن آرالی
نازلی ایاقین داشلار ائدر چولده یارالی
سن گوزله گلر، بو حرمون نازلی غزالی
سرنیزده باشیم دایانار بیر نچه ساعت

شاماته گئرنده دایانار نچّه قبایل
چوخ ظالم اولار دینیلن اولْ یرده مقابل
اولْ مست خلیفه یغار اوباش و اراذل
تا أل چالالار سیزلره بیشرم جماعت

گورسن آپارور مجلس خمّاره او لحظه
یا یاوه دییور عترت اطهاره او لحظه
سن شکوه ایله واحد و قهاره او لحظه
عرض ایله خدایا سن ئوزون ایله قضاوت

مسکن اولاجاق سیزلره زندان خرابه
اولْ یرده گلر نالیه طفلان خرابه
باشیم اولاجاق بیر گجه مهمان خرابه
نوریله او ویرانه تاپار آیری جلالت

گر طشت طلاده باشیمی گورسه رقیه
قارداشی عموسی ئولومون بولسه رقیه
چوخ آغلاما بیر لحظه اگر ئولسه رقیه
غم ایلمه سجّادیم ائدر دفنه شراکت

هر چند گلوب «صادقی»بو سوزده فغامه
قبریمدن اوتور شعری ائدوب الده بهانه
دوزدی کی سالوبدور اونی چوخ تنگه زمانه
سن ایسته گَلَه ایلیه بیر وقفه زیارت

• پنج شنبه
• 7
• مرداد
• 1400
• ساعت
• 11:19
• نوشته شده توسط
• یوسف اکبری

دوشموش آدون بو یرده منیم یادیمه آقا
باخ بیر منیم بو دیلده کی فریادیمه آقا

من یاحسین دیینده آدون چون ائشتمیشم
چوخ سسلیوبله باخموشام اجدادیمه آقا

گوردوم گدا سیزین قاپودا سسلنور آقا
منده وصیت ایلدیم اولادیمه آقا

بیر عمر یاحسین دیمیشم یا حسین سنه
ایندی چتین گونومدی یتیش دادیمه آقا

کیم یاحسین دییوبدی سنه سینه وورموشام
سینه م گلوبدی تنگه گل امدادیمه آقا

سن بول آنان جانی , آدینی چوخ چاغورموشام
تیز گل دوشوبدی شعله بو بنیادیمه آقا

عمریم یتوشدی باشه گناهیم قوتولمادی
رحم ائت بو عمردن گئدن هشتادیمه آقا

عادتدی سیزده رحم و مروت باغشلاماق
یوم گوزلرین بو دفعده ایرادیمه آقا

گلموش باش اوسته پیک اجل جانیمی آلا
اولسا سفارشون دینه صیادیمه آقا

بیر یول دئسن کی بیزلره وابسته دی ئولن
بسدور قیامت اولسادا میعادیمه آقا

بو یولدا هر بلایه دییوب « صادقی » بلی
یوم بلاده ضامن اول آزادیمه آقا

• پنج شنبه
• 7
• مرداد
• 1400
• ساعت
• 11:32
• نوشته شده توسط
• یوسف اکبری

خلّاق عالمم یاراداندان بو عالمی
هئچ منده گورممیشدیم حسینیم تک آدمی

هئچ کیمسه جان وئرنده بئله اولمادی غمی
تنها نه زینبی منی یاندیردی ماتمی

زعفر گلوب مساعدته جنگه، قویمادی
جِبریل گلدی سایه سالا راضی اولمادی

گوداله دوشدی باشلادی قانیله دستماز
آننین قویوبدی سجدیه گوردوم قیلور نماز

عرض ایلور الله عفو بیچاره امّتی
مندن کناره سالما جزاده شفاعتی

زینب غمین چخاتدی یادیندان باش آچمادی
عباسی ئولدی هئچ منی یاددان چیخاتمادی

اکبر غمینده عالمی یاندیردی نیسگیلی
نفرینه آچمادی گینه آغزونداکی دیلی

اخیامه تا گتوردیلر اکبر جنازه یین
لیلا یه آچمادی آتاسی غم ترانه سین

میدانه گلدی اصغر الینده نه حالیله
گوردوم آلوب قوجاقه او طفلی ملالیله

ای کوفیان دئدی سو وئرون یاندی اصغریم
اوچ گوندی ایچمیوبدی سو اودلاندی اصغریم

الله بولور عطشدن اولوب سینه سی کباب
بوحالتین گورنده اوزون اولدورر رباب

گوردی اوحالی عرشیده اسرافیل آغلادی
باشه ووروبدی حالینه میکائیل آغلادی

جنتده آچدی باشینی پیغمبر آغلادی
ای وای بالام دیوب آناسی ٬ حیدر آغلادی

گوردوم گئدور او چولده حبیبیم جلالتی
ویردیم قیامتیمده حسینه شفاعتی

عمرونده گر حسینه بیری ساخلاسا عزا
محشر گونی عذابی اونا گورمرم سزا

یاز دفترونده « صادقی » تکرار ایله سوزی
آغلاتمارام حسینیمه من آغلیان گوزی

• پنج شنبه
• 7
• مرداد
• 1400
• ساعت
• 11:36
• نوشته شده توسط
• یوسف اکبری

بزم حسینه باشدا قرا انبیا گلر
آغلار گوزیله ماتمینه اولیا گلر

مجلس باشیندا جدی پیمبر گلوب دورار
بیرده یانیندا آغلیا شیر خدا گلر

گلمیش بو یرده ثبت ایلیه آغلیانلاری
درگاهی اودلانان قولی سینمش آنا گلر

بیر کیمسه ده گلر بو مجلسه کی یوخدور اللری
آغلار گوزیله ذکری اولار وا اخا گلر

اگلشمیون گلنده ابالفضلی مجلسه
عباسی گلسه قائم آل عبا گلر

هر کیمسه گلسه مجلیسینه سینه داغلاسون
دوز عاشقین گوزونن همیشه بکا گلر

دوز آغلا دوز اوتی بو مجالیسده دوز اوخی
محشرده گور سنه نجه حقدن بها گلر

یاز « صادقی » حسینی سوون آشنالره
ارواح مومنینه بو یردن دعا گلر

• پنج شنبه
• 7
• مرداد
• 1400
• ساعت
• 11:46
• نوشته شده توسط
• یوسف اکبری

اود ووردون عجب سینده کی خانیه نیزه
تشبیه ایلدون او ایوی ویرانیه نیزه

هر چند پریشان ایلدون حالیمی نیزه
یاندیردون او مخیمده کی اطفالیمی نیزه
پیغمبر اگر گورسه بو احوالیمی نیزه
غمدن گتیرر جنتی غمخانیه نیزه

گوندردی سنی هانسی دنی , سیره چیخوبسان
بو شدتیلن قلبیمی سینمده سیخوبسان
سن اود ووروب اول خانه ایمانی ییخوبسان
بو ظلیمده اوخشاددون ئوزون ثانیه نیزه

جسمیمده گوروسن یارا چوخ , گلشنه بنزر
هر تک تکی گل تک باش آچوب سوسنه بنزر
باخ گور بو چولون هانسی شهیدی منه بنزر
من شمعه اولار بنزیری پروانیه نیزه

قلبیم یانوب الله بولوری قاسم ئولنده
اکبر کیمی بو چولده گل یاسیم ئولنده
دنیا دولانوب باشیمه عباسیم ئولنده
اظهار ایلدیم دردیمی بیگانیه نیزه

گلدیم دیله هرکیمسه منه گلسه هرایه
محشر گونی سالام باشینون اوستونه سایه
گوردوم کی باجیم اصغریلن گلدی هرایه
سعد اوغلی دئدی دردیمی بیر جانیه نیزه

گلموردی نفس اصغره سوز عطشیندن
بولدوم نه دیور حرملیه کشمکشیندن
اوخ ووردی دگوبدور گولومون غنچه وشوندن
باش آخدی گئدوب جنًته مهمانیه نیزه

قورتار بوغمی « صادقی » چک پرده سوز اوسته
عباسیمده لطف ایلیوب نیزه گوز اوسته
یازما نجه آتدان گتوروب سالدی یوز اوسته
دوندردی بلا دشتین عزاخانیه نیزه

• پنج شنبه
• 7
• مرداد
• 1400
• ساعت
• 11:57
• نوشته شده توسط
• یوسف اکبری

* از مادحین محترم استدعا دارد این
روضه فقط در روز عاشورا و در مجلسی
خوانده شود که حقش ادا گردد

ئولونجه یا حسین ذکر ایله غمدن سینه وی داغلا
بو سوزده خون دل قات گوزیاشیلان روز و شب آغلا

امان اول وقتیدن شمر لعین اوتدی دیزی اوسته
سالوب اوٌل امامی اول زنازاده یوزی اوسته

ووروبدور چکمه سیله ,اود سالوبدور عرش اعلایه
نه باخدی مصطفایه مرتضایه یا کی زهرایه

چخاتدی خنجرین شرم ائتمیوبدور حی اعلادن
چکنده خنجری ایوای سسی قوزاندی زهرادن

قویوبدور خنجری حنجر دالیندان تا تکان وئرسون
چالوب زهرا بالاسی ال ایاق آز قالدی جان وئرسون

کسوب خنجر یتیشدی آخرینده اول نحره
آخوبدور حنجرین قانی چوخور یر بنزدی بحره

یوموب زهرا گوزون اول دمده بیردن یا حسین چکدی
حزین صوتیله سسلندی اوتان ظالم داخی بسدی

او دمده قابض الارواح گلدی غملی صحرایه
اولوب آماده جان آلسون باخوب بیر قانلی اعضایه

گوروب ممکن دگور یوز دوتدی درگاه خداونده
دیوب عجزیله هیچ اعضاسی سالم قالمیوب تنده

نه گوردی سس گلور ترک ایله بو ماوانی اول حایل
یامان وقته اولار هر عاشق اوز معشوقینه مایل

ازلدن تا ابد من کل ذی انفاسه مولایم
ئوزوم جان آلماقا بو بنده مین هر کسدن اولایم

قوتار ؛ حق حسینی اول زنازاده او گون داندی
الونده « صادقی » صفحیله خامه باهم اودلاندی

• پنج شنبه
• 7
• مرداد
• 1400
• ساعت
• 12:36
• نوشته شده توسط
• یوسف اکبری

یا حسین یاده سالوب من آدون هر آن آغلارام
دویمارام هرگز بو آدون من دادننان آغلارام

من بو عشقیله سنه هیئته سینه وورموشام
اولمارام بو عشقیدن بیر آن پشیمان آغلارام

یاده دوشدوقجا سنون نیسگیلرون شام و سحر
حالیوه یانام آقا اولام پریشان آغلارام

سسلینده یا ابالفضل هر زمان عاشقلرون
نهر علقمده یاتان قربانه گریان آغلارام

اکبرون آدی گلنده سنده گل بو هیئته
لطف اوزیله اول گیلن بیر وقفه مهمان آغلارام

اصغره خاطر ایاقون قوی گوزوم اوسته آقا
ای وئرن اوز اصغرین قرانه قربان آغلارام

فاطمه آدیله زینت تاپدی بو هیئت آقا
قاره پرچمده اولوبدور آدی عنوان آغلارام

هر زمان اولسا محرم اگنیمه گییم قرا
یا حسین دیلده سنه ای شاه عطشان آغلارام

لطف ایله جان تاپشوران وقتیمده گل باش اوستونه
« صادقی » جانین وئره اول دمده آسان، آغلارام

• پنج شنبه
• 7
• مرداد
• 1400
• ساعت
• 12:49
• نوشته شده توسط
• یوسف اکبری

دوشنده یاده دلور قلبیمی یانان آهیم
او گون کی گتدی منایه اوز اوغلون ابراهیم

مقدر اولموشیدی اسمعیل اولا قربان
اوز اللریله ائده اوغلونی قانا غلطان

او چولده ایلدی اوز اوغلونا بو سری بیان
کی امر ائدوبدی خدا ایلیم سنی قربان

ندور سوزون دئنه اوغلوم منه بیان ایله
رضایتون وار اگر قلبیدن عیان ایله

بو سوزده گلدی دیله گوردی اوغلی اسماعیل
بو یرده امر خدایه آتا ایله تعجیل

ولیک عمده سوزوم قلبیده بودور آتاجان
عنایت ایلیه سن اللریمی باغلیاسان

کمال لطفیله دوندر ترابه بو یوزومی
کسنمسن باشیمی گورسه گوزلرون گوزومی

گوزونده یاش آتا باشین اشاقه چوندردی
پیچاقینی گوتوروب رو به قبله دوندردی

نه قدر زور وئروب خنجره تکان وئردی
گوروب کی کسمدی قربانینه امان وئردی

داش اوسته چکدی پیچاقین گوروب داشی کسوری
دئدی قوتار بالامی گورموسن مگر اسوری

نه گوردی گلدی الینده دیله او دم خنجر
بو امریدن اوزی حیران قالوبدی پیغمبر

دیوبدی وحشت ائدوب ای خلیل چوخ اسمه
بو امر حقیدی امر ایلور منه کسمه

او دمده نازل اولوبدور منایه جبرائیل
که کسمه باشینی آزاد اولوبدی اسماعیل

بو امتحانی قبول ایلدی حق سبحان
مناده کسماقا گوندردی بو قوچی قربان

بو گوندن ایلدی بو امری لوحیده مرقوم
مناده کسماقا قربانی ایلدی مرسوم

بو یرده یاده دوشوبدور منای کرب و بلا
گتوردی اوغلونی وئرسون حضور حقه فدا

او حالیده یوزونی کبریایه چوندردی
اوز اللریله اونی قتلگاهه گوندردی

دئدی قبول ایله یارب بو تشنه قربانی
آخار منای بلاده بونون قزل قانی

وداع ائدوب آتاسین سیز باخون سرانجامه
مینیبدی مرکبینی یوز قویوبدی میدانه

بیر آز زمان سوغوشوب اولدی دینه قربانی
حسینده ئولدی او دم آند اولا حسین جانی

ئولنده « صادقی » سس چکسه یا حسین ادرک
عنایت ایله او دمده اوزون دئنن لبیک

• پنج شنبه
• 7
• مرداد
• 1400
• ساعت
• 13:19
• نوشته شده توسط
• یوسف اکبری

کرب و بلاده قوم دغا آل یاسینی
زینب مقابلینده سویوبلار اساسینی

رحم ائتمین حسینیده بیر کهنه کوینگه
آیا نئدر رقیه ده گورسه طلاسینی

غارتدن آنلادیم بو قدر بسدی یازمارام
زینب چخاتدی یاددان حسینون عزاسینی

غارت قوتولدی قارداشی اوغلی ئولنلره
گوستردی قوم کین گینه ده اوز وفاسینی

سسلندیلر سویون قوروغی سینیدی میل ائدون
اود دوتدی یاندی کیمسه ائشیتدی صداسینی

بیر بیر یغوبدی عمه سادات قیزلاری
یانمش چادردا قوردی خانم غم بناسینی

اما بیوردی چوخ اوجادان ائتمیون نوا
شمرئولدورر ائشیتسه کیمون آغلاماسینی

گون باتدی سالدی نورینی آی غملی گلشنه
غم دوتموشیدی دشت بلانون فضاسینی

بیر یاندا قاسم اکبریلن دوغرانوب یاتوب
بیر یاندا سالمیشیدی ابالفضل لواسینی

بیر یاندا حال سجده ده دوشمیشدی شاه دین
احسانی وئرمیشیدی اوخوردی دعاسینی

بجدل ده گلدی گوردی کرمدن اوزاق دوشر
مایوس قیتره قاپوسوندان گداسینی

هم بارماقین وئروبدی هم انگشترین اونا
صاحب کرم سوور گئجه نین اختفاسینی

سهمین وئروب نه گوردی گلور آغلاماق سسی
گودالیدن ائشیتدی ربابون نواسینی

سسلور بابا هرایمه سس وئر هایانداسان
هردم دیور گزوم بو چولون من هاراسینی

بولمم نه حالیده باباسین تاپدی بینوا
بیردن گوز آچدی گوردی بوغازدا یاراسینی

سسلندی کیم بو حاله سالوبدور سنی بابا
الله گوروم اونون قویا آغلار آناسینی

باخ بیر ایاقیمه بدنیم تک قابار چالوب
رحم ائتیوبله ووردولا زهرا بالاسینی

عمم بو چولده غارت اولاندان اوتورمیوب
قارداشدا یوخدی کم ائده باشدان بلاسینی

بیر یاره وار الینده بابا یاندیر منی
بیر کیمسه کاش اولیدی وئریدی دواسینی

بیرده بابا بو « صادقیه » رحم ائله اوزون
محشر گونونده لطفا اوزون وئر جزاسینی

• پنج شنبه
• 7
• مرداد
• 1400
• ساعت
• 13:25
• نوشته شده توسط
• یوسف اکبری

سلام ای ( 2 ) وارث طاها حسینجان
سلام ای ( 2 ) عالمه مولا حسینجان

عشقیوه مرحبا
جانیوه جانیم فدا
سنه من نوکرم ای
بحر سخا و عطا

امیری حسینً نعم الامیری

سلام ای ( 2 ) نور چشمان پیمبر
سلام ای ( 2 ) یادگار شیر داور
سلام ای گوزلری زهرایه بنذر
جمال اللهه ای رخساری منظر

ای شه کربلا
معدن مهر و وفا
اللرونده سنون
واری گوزی شاه و گدا

امیری حسین نعم الامیری

سلام ای ( 2 ) جلوه حق کربلاده
وئرن قربان منای نینواده
او بیتی ترک ائدوب سعی و صفاسیز
قوتاردون حجًیوی دشت بلاده

طوافون مبارک
شه عطشان آقا
ازلدن اولوبسان
بیزه سلطان آقا

امیری حسین نعم الامیری

سلام ای ( 2 ) دوشمین اکبر دیلیندن
سلام ای ( 2 ) اصغری وئردون الیندن
یزیده وئرمدون سن دست بیعت
ال اوزدون کربلاده سن ایلیندن

اکبرون حسینجان
جان وئروب لب عطشان
اصغرون اولوبدی
تشنه دینه قربان

امیری حسین نعم الامیری

سلام ای ( 2 ) ماهی اولدوزلاره خاطر
خسوف ائتدی اوغولسوزلاره خاطر
فرات اوسته گئچوب شهلا گوزوندن
وئروبدی قولارون قیزلاره خاطر

وزیرون بئچولدی
بئله بیر غم اولماز
هیچ شهه حسینجان
بئله ماتم اولماز

امیری حسین نعم الامیری

• پنج شنبه
• 7
• مرداد
• 1400
• ساعت
• 20:37
• نوشته شده توسط
• یوسف اکبری

لطف ایله یارب دل شبده بو زار و دلفکاره
قسمت ایله تا اولام زائر او ششگوشه مزاره

آند وئرم زینبون قلبینده کی نسگیللرینه
آند وئرم کربلاده آل عصمت گللرینه
آند وئرم خیمه لرده آغلیان بلبللرینه
کربلانون حسرتون قویما بو قلب داغداره

من حسین آدی گلنده ایسترم کرب و بلانی
یاده ساللام خیمه گاهی ایسترم پائین پانی
رحم ایله منده گوروم عمرومده بیر یول اول مکانی
بیر نولی یارب قویام یوز اول ضریح شهریاره

گئتدی هر کیمسه او یرده اولدی شاهون آشناسی
بو گدایه رحم ایله شامل اولا لطف و سخاسی
من ائشیتدیم عرشیدن زیبادی دشت کربلاسی
واردی یتمش بیر گلی بنزور نماسی لاله زاره

سینه سی اوسته دیوللر صود امر اصغر یاتوبدور
شاهیمون پائین پاسینده علی اکبر یاتوبدور
نهر علقمده دیوللر پیکر بی سر یاتوبدور
شمس دینون ماهیدور اولموشدی مشکی پاره پاره

بانی اشعاره یارب سن اوزون گوندر حواله
کربلا داغی سالوبدور قلبینی درد و ملاله
زینبه خاطر عنایت ایله بیر وقفه « جلاله »
گوزیاشی هیئتده گوردون اوخشیوردی جویباره

بیر نولی منده آلام علقمده یارب دستمازی
باشلیام بالای سرده بیر اذان وقتی نمازی
بو یوزی قاره گدانون یوخ داخی آیری نیازی
مستجاب ایله بو « شیدانون » دعاسین سن دوباره

• پنج شنبه
• 7
• مرداد
• 1400
• ساعت
• 20:54
• نوشته شده توسط
• یوسف اکبری

نام حسین گلنده دوشر یاده کربلا
بیر تپراقی که فخر ایلیر عرشه برملا

فخری بودور که نازل اولار اوردا جبرییل
هر گون گلر زیارتینه صبحیلن مسا

شانینده بسدی کرب و بلا ملکینه بو سوز
اوردا یاتوبدی نور دل ختم الانبیا

تنها ملک دگور که اولا زائری اونون
ال سینه ده گلر او یره کل انبیا

جدی جنانی ترک ایلیر دیلده وای اوغول
زهرا گلر او یرده دوتا اوغلونا عزا

بولسون حسینون عاشقی زهرا گلن یره
حتما گلر نجفده یاتان شاه لافتیٰ

«شیدا» جسارتیله قلم قوی سوزون یازا
زائردی هر زمان او یره حی‌ّ لا یری

• پنج شنبه
• 7
• مرداد
• 1400
• ساعت
• 21:24
• نوشته شده توسط
• یوسف اکبری

بو سوز کی نقل اولوری شاهدیم خدا ئوزودی
منیم دگور ولی بیر دوز حسینچینون سوزودی

روایت ایلدی کرب و بلاده بو خبری
دیه دیه یوزونه آخدی گوزدن اشک تری

دییردی باشیمه دوشدی هوای کرب و بلا
تاپانمادیم اولا بو دردیمه بیر آیری دوا

حسینون عشقی آلوب صبری اختیاریمدن
قیلوب سفر تدارکی آیریلدیم اوز دیاریمدن

بو یولدا نئچّه حسینچی منه اولوب یولداش
بیله دییوم ایله بیر یول گئدور نئچه قارداش

اولاردا من کیمی کرب و بلا قوناقیدور
ولی بیری آقامون نوکری وثاقیدور

یول اوسته گاه اوخیوب نوحه سینه داغلاردی
ولی گلنده حسینون آدی چوخ آغلاردی

بو نحویلن قوتولوب یول ، هدف اله گلدی
وثـــاقی کرب و بلانی گوروب دیله گلدی

« نه کربلا که اونون تل زینبیه سی وار
او تلیده خانمیم زینبین حزین سسی وار

همان او تل خانمین گوز یاشی آخان یریدی
یارالی قارداشینا بویلانوب باخان یریدی »

بو دیللریله دیوب نوحه ایلدوخ شیون
گونوز قوتاردی گئدوب بیر یر ایلدوخ مسکن

زیارت عشقینه باشدان بو عالمی آتدیم
زبس یورولموشودوم من یوموب گوزی یاتدیم

گئجه نین عالمی بیر لحظه من آچاندا گوزی
نه عالم اولدی گرک واضح عرض ائدم بو سوزی

یوزون قوری یره قویموشدی حاجی اسماعیل
ولیک قبله دگوردی اولان یره مایل

دئدیم نماز قیلوبدور یقین چکور آهی
گرک کی اولسون حسینون بو نوعی مداحی

بو فکریلن گینه یاتدیم اولونجا وقت اذان
نه گوردوم اوندا دییور دور ایاقه بسدی اویان

گئداخ زیارته قانه حسین باتان یرده
قیلاخ نمازی حرمده آقام یاتان یرده

قیلوب نمازی نه گوردوم گینه هوسلندی
حزین سسیله او دم بیر یارالی سسلندی

«ایشقلی گون گوزومه تار اولوب منیم گئجه دی
بویور گوروم باجون ئولسون یارالارون نئجه دی »

بو طرزیلن باشا وئردوخ گونی ، یتیشدی گئجه
همان کی صحنه نی گوردوم دوباره من بو گئجه

دئدیم نمازه اگر دورسا وقتی وار اویانار
نمـــاز شبــــده اگر قیلسا قبلیه دایانار

یوزون ولیک دوتوبدور حریمه قان آغلور
دییور آقا سنه قربان اولا بو جان ، آغلور

ایله دییور آقام ایوای توکور گوزون یاشینی
قوری یر اوسته ولیکن قویوبدی اوز باشینی

او ، یرده آغلادی ، من تختین اوسته آهسته
نه گوردوم اوندا که یومدی گوزون او دلخسته

او حاله آغلادیم آخر یتوب اذان وقتی
مرتب ایلدیم اوز یاتدیقیم همان تختی

دوروب ایاقه نه گوردوم که دستماز آلدی
حسین دیلینده منی درد و محنته سالدی

دئدیم گرک دیسن علتین بو یرده منه
او تختین اوسته نیه یاتموسان نولوبدی سنه

بو لفظیلن دیله گلدی توکوبدی گوز یاشینی
قویار وثـــاقــی نئجه بالش اوستونه باشینی

بو باره دن دئدی « سیّد » اورک گلور درده
آقام یاتوبدی مگر بولموسن قـوری یرده

دئدیم که وای اولا من ائتموشم عجب غفلت
ئولونجه بو سببه من گرک چکم خجلت

بو درسی « صادقی » وئردی منه او دلخسته
که یاتمیوم بو یره من گلنده تخت اوسته

سنه ده ممکن اگر اولسا نظمه چک بوسوزی
دیه دیه گینه اول حالیده دولوبدی گوزی

یریدی من اوخودوم گَل ائشیت ،چو راغب سن
« قوری یر اوسته بیله یاتماقا نه طالب سن »

اگر چه سوز تــــازادی لیک بیله ناب اولماز
« اویان عزیزیم اویان توپراق اوسته خواب اولماز»

*این احوالات بر اساس خاطره آقای حاج سیدرضا طباطبائی در سفر خود به کربلا به همراه آقای حاج اسماعیل وثاقی رحمة الله علیه سروده شده است

• جمعه
• 8
• مرداد
• 1400
• ساعت
• 11:57
• نوشته شده توسط
• یوسف اکبری

عنایت ایلسه گر حی قادر و دانا
بو مطلبی ائدرم دفتریمده من انشا

یازوللا حضرت پیغمبرین زمانینده
بو نقل قولی بو طرزیله اکثر عُلَما

گلوبدی شخص یهودی حضور سلمانه
بودیللریله ائدیبدور اورک سوزون افشا

یتور سلامیمی ختم نبی محضرینه
دئنن واریمدور او مولادن التماس دعا

بیر آرزوم وار اورکده دئنن دعا ایلسون
که بلکه دردیمه اولسون منیم بو یرده دوا

سوزوم بودور نچه ایلدور گوزوم قالوب یولدا
منه ده بیر بالا لطفیله حق ائده اعطا

اگر دعا ائده اسلامی ایلرم قبول
تمام ثروتیمی دینه ایلرم اهدا

گلوبدی محضر پیغمبره او دم سلمان
بیان ائدوبدی یهودی سوزون او مرد خدا

یازوللا دوردی ایاقه پیمبر رحمت
بفوری ایلدی نچه رکعت نمازی بپا

قویوبدی سجدیه باشین توکوبدی گوزیاشینی
که بلکه شاد اولا بو یرده امت موسی

آچوبدور اللرینی ایلسون دعا گوردی
یتیشدی محضرینه پیک حی بی همتا

دییوب رسول خدایه دایان، پیامیم وار
سلام ائدور سنه سبحان ربی الاعلی

دییور دعا ایلمه چون که مستجاب اولماز
سوزون دوشر یره دوتما یوزون منه طاها

مقدر ائتمیشم اولادی اولماسون چون که
گئدوب چوخی بونون عمروندن آز قالور قوتولا

روایت ایلوری سلمان گلوب دئدیم بو سوزی
نه گوردوم اولدی عذارینده گوزیاشی پیدا

او آغلادی منی آغلاتدی غملی احوالی
نه او دانیشدی نه من ،گوردوم اوندا دوشدی یولا

او آغلادوقجا منیم قلبیم اود دوتوب یاندی
بو فکریلن که نئدیم درد و غصه سی آزالا

نه گوردوم اوندا گلور فاطمه بالاسی حسین
دئدیم غم ایلمه گلدی طبیب درد و بلا

یتوب سوال ایلدی اول یهودیدن ، دی گوروم
سنون بو گوزیاشیوین علتی ندور آیا

جواب وئردی که ای نور عین پیغمبر
سوروشما حالیمی بوندان چوخ اولمیوم رسوا

فدا اولوم سنه جدون منی ائدوب مایوس
بو یرده چاره ندور سن منه بویور شاها

دایاندی باب نبوته بیر زمان گوردوم
حزین صدائیله اوچ دفعه عرض ائدوب بابا

ئوزون بویورموسان هر کیم گله بیزیم قاپیا
الین بوش ایلمه سن شاه اولا و یا که گدا

ندن بو مرد یهودینی بوش یولا سالدون
عنایت ایله اولا حاجتی بو یرده روا

بویوردی ای گوزومون نوری من دعا ایلدیم
ولیک امر خدادور گرک اولا اجرا

دئدی بو یرده حسین من ئوزوم دعا ایلرم
اجازه وئر منه ای عالمه امید و رجا

دوروب اوحالیله اَوّلده دستماز آلدی
حضور اقدس معبوده ائتدی حمد و ثنا

دئدی خبر ایلیون تا آتام آنام گلسون
دعا ائدوم اولار آمین دئسون که بلکه خدا

یهودی حاجت آلوب اولماسون سرافکنده
یوزون دوتوب بیر امیدیله بیزلره بوگدا

قویوبدی سجدیه باشین توکنده گوزیاشنی
نه گوردوم اوندا پیمبر بویوردی دور ایاقا

سن آغلاما بالا یر گوی قاریشدی بیربیرینه
گلوبدی پیک خدادن قولاقیمه بو صدا

حسینیمه گوره وئردیم بو شخصه قرخ ایل عمر
ایکی بالا ائدرم بیرده بو گدایه عطا

بو یرده واردی سوزوم ای خدای فرد و قدیر
عنایت ایله اگرچه سوزوم جسارت اولا

سنی که راضی دگلدون سنا حسین اورگی
بو حاله سن نجه دوزدون که شمر شوم و دغا

اوسینه اوسته قویا نحس ایاقینی یا رب
جسارتیله حسینی ائده ذبیح قفا

جدایه بیرده ووراندا باشین ئوزون گوردون
نه حاله دوشدی او دم دخت حضرت زهرا

بو دیللریله دئدی زینبون سنه قربان
ایاقه دور گئدروخ شامه گل بیزیله اخا

قلم دایاندی ورق اود دوتوب الولاندی
بس ایله بوندان آچیق یازما مطلبی « شیدا »

• جمعه
• 8
• مرداد
• 1400
• ساعت
• 11:58
• نوشته شده توسط
• یوسف اکبری

ای گلستان علینون گل ریحانی حسین
حضرت فاطمه نون بند دیلی جانی حسین

قاپوون سائلیم باردگر ایله کرم
ای دمادم منه بذل ایلین احسانی حسین

چیخماسون یاددان آدی نوکریوین روز جزا
کرم ایت ایله شفاعت‌ آناوین جانی حسین

آند ویررم سنی عباس او کرم صاحبینه
اوردا خندان ایله بو دیده ی گریانی حسین

قیل دعا شامل اولا حالیمه الطاف خدا
فانی دنیایه گوره آتمیام عقبانی حسین

حری سیندیرمادون آقا منیده سیندیرما
صاحب خانه دوتار حرمت میهمانی حسین

هرنیم ایندی پناهنده وم ای پور علی
آتما،گولدورمه منه خصم و احبانی حسین

نقدر کورپی دالیمجان، وار،ئوزون ایله خراب
ایسته سم گر قییدم اولمیا امکانی حسین

سن او شاهنشه اقلیم سعادتسن آقا
فرشیدن عرشه چکر عشقون احبانی حسین

تار زولفونله کریمانه چکوب بنده، ایله
کنف عشقیوین ایچره منی زندانی حسین

روز و شب اولسا سعادت توکرم گوزیاشیمی
یادایدوب آغلیارام پیکر عریانی حسین

یانارام آتلار ایاقینده قالان پیکریوه
عارضه جاری اولار گوزدن اورک قانی حسین

قوشارام سس ننوین ای وای اوغول ناله سینه
اوخشارام آغلادارام جمله احبانی حسین

آناوین وای بالا وای صوتی اوجالسا یری وار
آغلیوب آغلادا تا عرش معلانی حسین

آناوام قلبی کبابم گورورم عینا اوغول
خاکی سیراب ایلیوب حنجریوین قانی حسین

قانه غلطان ایلیوب ظلمیله عدوان بالاسین
باش آچوب اوخشادی زهرا گل رضوان بالاسین

گوزون آچ قانه باتان گوزلره زهرا قربان
ظلمیلن ذبح اولونان حنجره زهرا قربان

دیله گل دیندیر اوغول قدی کمان زهرانی
قیل تکلم اوشیرین دیللره زهرا قربان

یاره لی مقتله باشسیز یخیلان پیکریوه
ساربان قطع ایلین اللره زهرا قربان

کسیلن باشیله معراج ایلین نیزه باشین
آیه ی کهف اوخیان لبلره زهرا قربان

قانلی گودالی ایدن حوزه ی میقات اوزونه
قانه غلطان یارالی پیکره زهرا قربان

پرپر اولموش گوله بنذر، بدنون اوسته اوغول
پری یانموش،بالابلبللره زهرا قربان

سوسوزوندان قورویان دیل دوداقی یوم بلا
سارالان سوسن و سنبللره زهرا قربان

تالانان وقتیده اخیامی یانان ظلم اودونا
خرمن ناره دوشن گوللره زهرا قربان

• جمعه
• 8
• مرداد
• 1400
• ساعت
• 12:51
• نوشته شده توسط
• یوسف اکبری

گوزآچوب بودنیایه پورزهرا
اولدی روشن نوریندن شهربطحا
گلنیبدور گللر= اوخیور بلبلر
شاداولوبدی دللر= فخرائدور ائللر
بزیوب عرش اهلی عرشی سراسر
نغمه خواندور گویده حور و مللکر (۲)
آلوب آغوشه دلبرین پمبر
کام آلورباخماقدان ساقی کوثر (۲)
گلدی دنیایه دینه پیرایه

پنجمین آل عبا مهر رخشان
نور رخساری نور وجه رحمان
ذات حقه مظهر = وارث پیغمبر
یادگار حیدر = عالم سرور
سوم شعباندور روز ولادت
بیزه بیر بایراملق ایله عنایت (۲)
سنی سسلوربیر عده دلده حسرت
قیل کرم لطفیله بحر کرامت (۲)
گلدی دنیای دینه پیرایه

سائلم ای آیت حق درگهونده
نوکرم مولا یا حسین هیئتونده
گوهر غلطانیم = دردیمه درمانیم
باوفا سلطانیم = ماه کنعانیم
دوت الیمدن ای یاور و پناهیم
بوسنق قلبه تک سنسن گواهیم (۲)
ای شکسته دیلده امید گاهیم
قویما چخسون عرشه فریادوآهیم (۲)
گلدی دنیایه دینه پیرایه

• شنبه
• 9
• مرداد
• 1400
• ساعت
• 13:20
• نوشته شده توسط
• یوسف اکبری

دورای کسیلن باشی قفادن آنام اوغلی
زینب گئدوری کرب وبلادن آنام اوغلی

ای عالمی حیرتده قویان کرب وبلاسی
عرش اهلینی مجذوب ائلین ذکرودعاسی
افلاکه چاتوب زینبوون آه ونواسی
غارتده کئدوب معجروخلخال واباسی
دوندی گونوزی شامه نوادن آنام اوغلی

بوچولده سنی ظلمیله الدوردله عدوان
باخدیم اوجفاپیشه لره ایلدیم افغان
قول باغلی باجون شامه گئدورخسرو خوبان
دورگورنجه مقتلده ائدورچاک گریبان
آل گوگلونی بیرصدق وفادن آنام اوغلی

دیندیرمنی قارداش یورولان جیسمیمه جان وئر
غملرآلوب آرامیمی دورتاب وتوان وئر
اعجازوی شام اهلینه بویرده نشان وئر
عازمدی باجون شامه یارالی دوراذان وئر
محروم ائلمه فیض دعادن آنام اوغلی

ای دوغرانان اعضاسی سوسوزکرب وبلاده
تاراجه گئدن خیمه لری روزبلاده
صبرعالمی یوخدورسنه تای اهل ولاده
شایدیارالی یول دوشه بیرده بوبلاده
کام آلام اوگون سوزوبکادن آنام اوغلی

چوخدوربولوسن دلده ملالیم هله قارداش
مقتلده گوزوم دوشدی کسیلمش اله قارداش
آخدی گوزومون بارشی دوندی سله قارداش
اوت ویردی دوباره بوملالون دله قارداش
دشمنده اثریوخدی حیادن آنام اوغلی

شرم ائتمدی زهرادن اونامرد زمانه
جناتیده گتدی آنامی دادو فغانه
بیربندزراوسته گتوروب ظلمیون عیانه
گوداله گلوبدوراوستم پیشه شبانه
خوف ایلمیوب قهرخدادن آنام اوغلی

ابدان شهیدان داغلوب دشت بلایه
لاله مثلی زینت اولوب باغ ولایه
ظلم اهلی ویروب باشلارینی نوک جدایه
بومنظره دن غم شرری چخدی سمایه
تاب آلدی بوغم اهل ولادن آنام اوغلی

اهل حرمی بیربیرینه باغلادی اعدا
ایلوله شقاوتله زبس اونلارا ایذا
ایمائیله سسلور بالاسین دادینه لیلا
سرنیزده باخدوقجا یارالی باشا گویا
آگاه ائلیور درد جفادن آنام اوغلی

کویونده (جوانی)ائدوری ناله وزاری
سسلورمین امیدیله سنی لیل ونهاری
ایستورصله وئرقویمااولاگوزیاشی جاری
شرمنده دی یوخ خیرعملی لطف ائله باری
وارقورخوسی محشرده جزادن آنام اوغلی

• شنبه
• 9
• مرداد
• 1400
• ساعت
• 13:24
• نوشته شده توسط
• یوسف اکبری

مورخــان خـبرنقل ایدوب بوعنـوانی
دیــار ماریـــده ســـرور احبـــانـی
دچـارایدوبـدی بلایـه گـروه شیطانی
سالـوب کمند مصیباته شاه نه فلکـی
گـتوردی ناله وفریاده عرشیده ملکـی

دوتوبـدی دشت بلانـی گروه بی ایمان
غــلام روم وفـرنگ تالـــی ابوسفـیان
بیـرعـّده دیـوصفت دشمن امـام زمان
عداوتیلـه اوگون قلب شـاهی داغلادیلار
بنـات فاطمــیه سو یولـونی باغـلادیلار

ریاض عصمته یتدی سوسوزلوقون اثری
سولوب سارالدی گلستان حیدرین ثمری
ویراردی دللـره اوت دشت کـربلا شرری
چخـاردی عـرشه فغـان آهوان زیبـادن
آخـاردی عـارضه گـوزیاشلاری بلایـادن

زبس امامـون اولـوب غصه و ملالـی مزید
باتوبدی قانینه قارداشلاری اولوبدی شهید
الـی بلینده قـالوب عرصه گهده شاه وحید
چــاغـوردی حـال نـزاریلــه سرور حرمین
گل ای آنام باجی زینب گیدورقتاله حسین

گل ای شـریک مصیـباتیم ای وفـاداریم
طریق عشقیده جاندان گیچن هواداریم
بــلا و حــادثه لــرده یگانه دلــداریم
عـُدوجفـاسی باجی قلبـیمه شـررسالدی
بوغملی عتـرتیمون زحمـتی سنه قـالدی

سفــارشیم بودی آل الله صیــانت ائله
یانــانداخیملـریم قیـزلارا حمـایت ائله
مریضدوربالام اوندان ئوزون عیادت ائله
امام مفـترض الطـاعه دور اوزین العـبا
اودور وصـی بـلافصـل حضرت طـاهـا

مـریض اولانـدا آنـام سرزمین بطحاده
اوگونلـری که گتورمشدی غصه فـریاده
ویـروب سنه بیر امانت اوغملـی اثناده
همان امانت اولاردی سبب بوگـوزیاشوا
گتـورامانتـی رد٘ ایلـه ایمدی قـارداشوا

بوقدری ایلمه ای گوزلریم ضیاسی فغان
سن آغلیـاندا گیدورقلبـیدن قـرارو توان
گتورآنـام توخــیان کوینگـی گیوم الان
اوکوینـگین غمی دللـرده هرزمان قالاجاق
آنام اوکوینگــیله محشره شـرر سالاجاق

ایشدی بوسـوزی اول دستگـیر دام بلا
دولاندی باشیـنا گــویا دیـار کرب وبلا
گتوردی بوقچانی ویردی حسینه کنز ولا
بوچولده عرض ائلدی یوخدی بیرنفر قالانیم
باجون فداسنه قوی باشوا گلیم دولانیم

• یکشنبه
• 10
• مرداد
• 1400
• ساعت
• 23:08
• نوشته شده توسط
• یوسف اکبری

زینبین کثرت غمدن اورگـی قاندی حسین
دردالیندن بلوسن حالی پریشاندی حسین
قان اولوب دیده لریم
چخدی عرشه شرریم
دایان قارداش دایان قارداش
دایان قارداش

ای منیم روحیمه ریحـان شرف اهل کسا
گورنجه تنگ ائلیوب عرصه نی اشـرار دغا
گل دولانسون بـاشوا زینب غمـدیده اخا
یتشوب وعده حق موسم هجراندی حسین
قان اولوب دیده لریم
چخدی عرشه شرریم
دایان قارداش دایان قارداش
دایان قارداش

یازلوب روز ازل دهریده غمخوارون اولام
نقـَدر وار نفسیم یـار و هـوادارون اولام
یوز وئره هرنه بلا صبریله غمخوارون اولام
ثبت اولوب لوحیده حکم حق رحماندی حسین
قان اولوب دیده لریم
چخدی عرشه شرریم
دایان قارداش دایان قارداش
دایان قارداش

غم دوتوب کرب وبلایه یتشندن دیلیمی
بیربه بیر کوفه لیلر آلدی الیمدن ائلیمی
آزقالور شدت غم سیندیراقارداش بلیمی
دردالیندن باجوون دیده سی گریاندی حسین
قان اولوب دیده لریم
چخدی عرشه شرریم
دایان قارداش دایان قارداش
دایان قارداش

• یکشنبه
• 10
• مرداد
• 1400
• ساعت
• 23:09
• نوشته شده توسط
• یوسف اکبری

زینبـیم محـضر دلـداره شتابان گئدورم
ماملکدن ال ئوزوب شادوخرامان کئدورم
قیـزلارین قیدینه قال
گل حسینی یولا سال

آغـلاما بیـربئله ای محـرم اسـرار حسین
مالک اول صبرائوینه یاوروغمخوار حسین
حافظ اولسون سنه بودشتیده دادار حسین
فـرقتیمـده بوقـَدر اولما پریشان گئدورم
قیـزلارین قیدینه قال
گل حسینی یولا سال

سنی زینب بوگـونه خـالق داور یـارادوب
حجـّت روی زمینه ئوزی یاور یـارادوب
بحـر آلامیــده غـّواص دلاور یـارادوب
صـابراول بحـربلا ایلسه طوفـان گئدورم
قیـزلارین قیدینه قال
گل حسینی یولا سال

دُّرتک گوزیاشوی صورتیوه دوزمه باجی
افق رنجیـده اولدوز مثلی سوزمه باجی
هربلاگلسه بوقیزلاردان الون ئوزمه باجی
اوُل بوصحـراده پرسـتار یتیمان گئدورم
قیـزلارین قیدینه قال
گل حسینی یولا سال

• یکشنبه
• 10
• مرداد
• 1400
• ساعت
• 23:13
• نوشته شده توسط
• یوسف اکبری

بــاده ویـــر ای ســاقی اهل ولا
گلـدی دنیــــایه عزیـــز مصطفا

شمـــس عــــزت آفرینش علتی
جـــان جانــان خــــامس آلعبــا

مفخــــراولاد ختـم المـــرسلین
سیـــد و ســـالار کل ماســـــوا

عـــالمه باب کــــرم مولاحسین
پــور زهـــرا نورچشم مـــرتضا

نور رخسارینــدن آلدی نورینی
سوم شعبـــاندا ارضیلـــه سما

روشن ایتـــدی دیده عالملــری
نـوگل گلــــزار ختـــم الانبـــیا

مژده ویردی عالمینه پیک حق
گلــدی مـــرآت جمال کبــــریا

• دوشنبه
• 11
• مرداد
• 1400
• ساعت
• 12:06
• نوشته شده توسط
• یوسف اکبری

عید قرباندی و قربانلاری عطشان کسمیون
قربانین باشین فقط لطف ایله دالدان کسمیون

سو وئرین سیز قبل اینکه ایستیروز خنجر چکز
صبر ائله گر اولماسا تیغینده بران کسمیون

چون که دشت کربلاده کسدیلر شاهین باشین
سسلدی هی باجیسی ای نامسلمان کسمیون

بیلمیرسوز که حسینیم طاقتیمدور کوفیان؟؟
خیمه ده قیزلاری اولموش گور نه گریان، کسمیون

هی باخیر اخیامه ساری خنجر التیندان حسین
ناگراندی خیمه لردن قوم عدوان کسمیون

بو بوغازی که قویوبسوز خنجری ای اهل کین
ختم پیغمبر ئوپوبدی وئرمه فرمان کسمیون

• دوشنبه
• 11
• مرداد
• 1400
• ساعت
• 16:20
• نوشته شده توسط
• یوسف اکبری

ای دولت اکرامی دوتان هر دوجهانی
دل خسته لره ایله کرم کرب و بلاده

بین الحرمین ،مروه ، صفامیزدی اقا جان
عشق درگهیدی هر دو حرم کرب و بلاده

عاشقلریوی ایسته ءوزون ماه شرافت
طاقتلر آلور مشگ و علم کرب و بلاده

ناامید ایله مسن قاپیوا گر گله ساءل
منده آقاجان دیده ترم کرب وبلاده

ای قانلی مناده توکولن قانی حسین جان
اول تربتیوی من ءوپرم کرب و بلاده

قان آغلیارام ساقی طفلان حسینه
سو استه قولی اولدی قلم کرب و بلاده

قبریمده گله گر دوملک سویلسه گیمسن
عرض ایلیرم "سینه زنم" کرب وبلاده

اربابیم حسین،شاهیم حسین،جان سنه قربان
لبیک حسینیم دءیرم کرب و بلاده

• دوشنبه
• 11
• مرداد
• 1400
• ساعت
• 16:27
• نوشته شده توسط
• یوسف اکبری