اشعار ترکی امام حسین (ع)

رزمگاهه چوخ شتابان گتمه بیر دایان حسینیم
سن که مندن آیرلورسان باغریم اولدی قان حسینیم

بیله یول آلوب گیدورسن باغریمی کباب ایدورسن
زینبی بو گتمگینن خانه سی خراب ایدورسن
بیر توقفینده قارداش مین بله صواب ایدورسن
روحیم آز قالور وجودی ترک ایده اینان حسینیم

ال چکنمورم حسین جان من سنون محبتوندن
اللی دورد ائل اولدی بیرگون دویمادوم او صحبتوندن
آیرلیق یاماندی اللم ایندی درد فرقتوندن
سندن آیرلام یوخومدور قالماقا گمان حسینیم

اول خمار خمار باخیشلان آز بوقلب زاری یاندور
آخرین وداعون اولسا گل منه بوسرّی آندور
جانوا تصدق ایله باشیوا منی دولاندور
قوی الوم یاخام قوتولسین ای شه جهان حسینیم

• پنج شنبه
• 21
• مرداد
• 1400
• ساعت
• 12:26
• نوشته شده توسط
• یوسف اکبری

یردن صدای الامان اوج ایلور آسمانه
ای مرتضی گل هارداسان اوغلون بویاندی قانه

جسمینده وار دورت مین یارا یوخ بیر دوا حسینه
ایستور فدای دین اولا روحیم فدا حسینه
یردن گلور داش نیزه اوخ گوگدن ندا حسینه
جبریل اولوبدور نوحه خوان ایلور نوا حسینه
قدوسیان آغلور دیور صد مرحبا حسینه
ایفای عهد ایلوبدی وار حقدن رضا حسینه
زهرائیلن گل سنده قور بزم عزا حسینه
اوغلون لب عطشان جان ورور گل قویما یانه یانه

سن ساقی کوثر یانور لیک عترت رسالت
نهرین سوئی داشقین گیدور سقاده یوخ فراغت
گوگدن شاخور گون تابشی یردن چخور حرارت
قان قینیور هر جسمیده مینلرجه وار جراحت
شانشان اولوبدور سینه لر یوخ ذرّه استقامت
گل کربلا صحراسینه اولموش به پا قیامت
باشسیز قالبدور عترتون ای معدن کرامت
برج محندن قزلارون گل چک بیر اوزگه یانه

• پنج شنبه
• 21
• مرداد
• 1400
• ساعت
• 19:25
• نوشته شده توسط
• یوسف اکبری

جهان خلقتین ای ماه آسمانی آتا
خلایقین ایوی نین صاحب آستانی آتا

مسیر زندگی عارفانین سنیدون
امیر قافله سی میر کاروانی آتا

عیال اوشاق آتانین سایه سینده دالدالانار
عیالینه آتادور چرخ زندگی آتا

مدام منده سنون سایه وه سیخلمشدوم
سنیدی چرخ فلک یخدی سایه بانی آتا

عجب داغتدی منیم خاطراتیمن دوفاقین
مرتب ایلدی غم خانه آشیانی آتا

دولاندی قانه منیم قلب داغداریم ایله
سن اول دقیقه که ترک ایلدین جهانی آتا

الوم یاماندی یامان گونلره قویارآدامی
یامان گون اولدی منه آیرلیق زمانی آتا

اوزون گیدندن مونس اولموشام غمیوه
اولوبدی قلبیم ایوی غم غصه لر مکانی آت

گونین باتان چاغی بیر آیری حالته قالیرام
مناردن که گلور مسجدین اذانی آتا

یاتان زماندا گوزوم رختخوابیوه ساتاشیر
قوجا قلیرام دیزمی آغلیرام نهانی آتا

بو آغلاماق من ایچون مایه فضیلت اولور
سالور خیالمه تز شاه کربلانی آتا

بلا چولونده قیام ایتدیلر علیهنه تا
قلچلار آتدا قالوب چسم خونفشانی آتا

باشین کسنده اونین قاتلی جفا ایلدی
نفس واریدی هله چیخمامشدی جانی آتا

حسین اولنده یرین داشلاری قان آغلادیلار
یاخلمشیدی یره لخته لخته قانی آتا

• جمعه
• 22
• مرداد
• 1400
• ساعت
• 11:26
• نوشته شده توسط
• یوسف اکبری

هایاندا اولسا به پا محفل بنام حسین
توسلیم اولاجاق نهضت و قیام حسین

سعادت اولسا گوزل خدمت ایلرم آقاما
قبول ایلسه گر خدمته امام حسین

حبیب اولوب دیمورم آستانسینده یاتوم
اولوم فقط دیورم کمترین غلام حسین

کچیلده کیم اوزینی شهرتی اونین یکه لر
اولار هامیا نوکر گرام حسین

اینانموسان اوزیوی سال بیر آستانه سینه
نقدری گورسن ایچون ایلور احترام حسین

او حرین آل نظره ایتدیگی عمللرینی
دوشونمیوب نیمیش ابتدا مقام حسین

گلوب جسارته آت اوینادیب اویان بویانا
گرک دیوب یخیلا خیمه و خیام حسین

اونین جسارتینه قورخوشوب گوزل بالالار
وروب دوباره اوزی قزلارا نظام حسین

سفارش ایلدی ای حر سن سعید اولوسان
موثر اولدی اونا منطق و کلام حسین

اودمده یار اولوب اوزبختی تنگلوب تختی
چکوب گتوردی اونی جذبهءپیام حسین

گلوب دایاندی یوزین تپراقا قویوب سورونوب
دیدیلر ایندی آلا راوندان انتقام حسین

ولی حسینده سن کشفه باخ کرامته باخ
باغشلیوب اونا بیر رتبهء مدام حسین

یوزیندن اوپدی سوینجک قویوبدی باشینه تاج
اولوبدی حر بلی حر بالتمام حسین

گیدوب خلوصیله کیم آستانینه قویا یوز
عزیز اولار اولا هم مسلک و مرام حسین

بلی حسینچی لیگون ارزشین حسینچی بولر
ایدر مدام اونی چون خرم و خرام حسین

الن زماندا گلر باشینی آلار دیزینه
عذاب مرگی ایدر دوستینه حرام حسین

اود ورمنیمده گوزوم اشکینی توکر یوزیمه
اولوبدی بو دیلیمون ذکری صبح وشام حسین

حسین حسین دیمگه عادت ایلیوب اورگیم
اتیم قانیم سوموگیم سسلور السلام حسین

''امینیا''نقدر نوحه و نوا ایده سن
جزای خیر ورر خالق انعام حسین

• جمعه
• 22
• مرداد
• 1400
• ساعت
• 11:40
• نوشته شده توسط
• یوسف اکبری

چو موسی گرم ایدوبسن سینۀ سینانی سن قارداش
آلوب طورین کنارین لیک اشرار زمن قارداش
داغلموش پیکرون داشلار قلجلار نیزه لر آتدا
سنون تک بو جهاندا اولماز اللرده الن قارداش

اسیر اولموش عیال و اهل بیتون قوم ظلامه
یارالی شیر تک قول باغلی منده دوشموشم دامه
چکوللر زینبین غملی قطارین ظلمیلن شامه
ویروبلار قوللاریمدان تازیانه هر یتن قارداش

نه عالمدور بو عالم زینبه محشر نمایاندور
کسیلمیش اللرون باشون بدن باشدان باشا قاندور
دگوب اوخ نیزه لر سینون حسین چوخ شانه شانشاندور
تاپولماز ایلسین بیر کس سنه غسل و کفن قارداش

رقیه ن که گجه گوندوز یاتاردی گل بوداقینده
قاچاردی ناز ایدردی قاسم و اکبر قباقینده
گورور ایندی قالوب گل جسملر آتلار ایاقینده
یاخندور غصه مرگ اولسون رقیّون غصه دن قارداش

اورک قان باغلیوب یوخدور توانا ایلسین گفتار
دانشسامدا امان ورمز قوشون ای محرم اسرار
بو وقتیمده گلیدی دادیمه کاش حیدر کرار
گوزوم یولدا قالوبدور نه گیدن وار نه گلن قارداش

اگر بو شامیان قویسا یانوندا گتمرم قاللام
گجه آیدان گونوز گوندن دوروب اوز کولگمی ساللام
آنام زهرا گلنده قتلگاهه عطرینی آللام
ندوم حقیمده ایلوللر جفا اهل فتن قارداش

بدنده گرچه دورت مین یاره وار بنزور گله قارداش
چمنده لیک گوزدن یاش توکور وای بلبله قارداش
او باغبانم فلک سالدی ایشیمی مشکله قارداش
گیدور نیلوم بله پوزقون قالور باغ و چمن قارداش

خلیل اللهی که قرآن دیور چوخلی بلا گوردی
بلی سویلوب بلایه گتدی اوز اوغلون منا گوردی
سنون لکن اوزون هم ایل تبارون کربلا گوردی
هانی سن تک جهاندا ایل و تباریندن گیچن قارداش

اولان اولدی گچن کچدی سنه قربان اولا زینب
گورنمور بیر کسین ایلور نظاره صاق صولا زینب
مسافردور گیدور باشلا اذان دوشسین یولا زینب
داخی یوخ فرصتیم قالما خلقا بوشمر دن قارداش

من اول پروانه ام شمع وفادن آیرلانمازدیم
بو مدت عمریمون بیر لحظه سین سنسیز دولانمازدیم
اگر یتسیدی نقصان عشقیمه بیر بیله یانمازدیم
خوش اول من آرتیغام هم شمع و هم پروانه دن قارداش

اگر چه قارداشیم الموش اوجالمیش گوگلره نالم
ولیکن اولموشام عشقونده سایسیز غملره قارداش
یرون چوخ باصفا دور غبطه ایلر بویره عالم
گیدور منلن یانوندا قالموری هیچ اهریمن قارداش

حسین جانم جانیم گر چخمادی هجرونده تاب ایتدی
شرار فرقتون یاندیردی قلبیمی کباب ایتدی
((امینی))سرگذشتیم یازدی بیر غملی کتاب ایتدی
مصیبت نامه میز گچدی هزار صفحه دن قارداش

• جمعه
• 22
• مرداد
• 1400
• ساعت
• 11:52
• نوشته شده توسط
• یوسف اکبری

اولوب کیم سرگران عشق عشقینده جلا تاپدی
دولاندی وعده گاه عشقی یارین برملا تاپدی

دچار درد بی درمان ویا درماندهء دیگر
طبیبین محضرینده چاتدی دردینه دوا تاپدی

اطبا ردایدن صعب العلاج آختاردی آختاردی
قرا پرچملریله گیتدی بیر بزم عزا تاپدی

دایاندی نوحه خوانلار موکبینده سینه سین آچدی
او آغ پیراهنین اگنیندن آتدی بیر قرا تاپدی

قوشولدی سینه زنلر جرگه سینده سینه چاک ایتدی
او ویردیقجان کدرلی سینه سی صلح و صفا تاپدی

اورک آئینه سینده گوردی سردار اطبانی
که درگاه حق منانه ایلوردی دعا تاپدی

بولوبدور معرفت سیز وارد گفتار اولا بولمز
که تاپسین معرفت اول فیضه وقت التجا تاپدی

دیوب اولده رب اشرح لی صدری همده یسر لی
حضور شاه مظلومانه بیر نطق رسا تاپدی

حسینه دردینی کیم صدقلن اظهار ایدوب یاران
همان کس شکر لله درد ایتردی تز دوا تاپدی

کیم اولدی رمز دق البابینه دارا او مولانین
گیدوب عشقیله قالدی درگهونده چون گدا تاپدی

شهادت کلمه سی هر بیر شهیدین چخدی آغزیندان
بو بش گونلوک فنا دنیانی ترک ایتدی بقا تاپدی

بیر عده جان بکف جان آفرینه جان دیدی گیتدی
گزوب میدان رزمی بیر برات کربلا تاپدی

""امینی""سنده اولسان عارفاً بالحق یالوارسان
گورورسن قبرده اوّل سنی اول مقتدا تاپدی

• جمعه
• 22
• مرداد
• 1400
• ساعت
• 12:20
• نوشته شده توسط
• یوسف اکبری

فروزان گوهر گنجینه حق روح با ایمان
سریر و سرمد کل خلایق قوه لی انسان
نبیر محکم ختم رسالت منبع وجدان
اوزینه آدینه شخصیتینه شیعه لر قربان
دل طوفاندا اون گون قالدی نوحی قویدی سرگردان

دیسم زیبنده دور شأنینده هیچ کیم شأنینه چاتماز
اونون خطین دوتان کس سهلدور گوندوز گجه یاتماز
تاپان عشق حسینی آیری عشقی عشقینه قاتماز
حسینین عاشقی عشقین جهانی ورسه لر ساتماز
پوزولماز تا قیامت قانلن امضا اولان پیمان

حسینین عشقی هر عشق مجازیلن قیاس اولماز
نه دانشگاهی تک مکتب کلاسی تک کلاس اولماز
نه عاشوراسی تک نهضت نه یاسی مثلی یاس اولماز
حسینه آغلیان گوزلرده دشمندن هراس اولماز
ز بس که دولدوروب گوز آغلادیقجا قلبینی ایمان

سنون ای پاک عزادار آغلوسان خوش حالیوه آغلا
گولرسن در مقابل روز محشر عهدیوی باغلا
مصیبت نامه سین ذکر ایله سنده سینوی داغلا
حسین آدیله سیل گرد و غبارین تازه دن زاغلا
گیت اگلش گیریوه هر یرده سالسان محفل عرفان

او که عالمده دردی بی دوا و بی علایجدی
یقین ایتسین که دکترلر ایچینده با نتایجدی
نظر قطع اولسادا بولسین که قابل بر معالجدی
کچیک سربازی کل عالمه باب الحوائجدی
خلوصیلن یاپوشسان ایلر آنی دردیوه درمان

اگر لطف اولماسا حقدن کسنمز شیشه نی الماس
ایدوب رویا بیری عصرین امامین بیر شب حساس
دیور اوپدوم الینی عطر جنت ایلدوم احساس
دیدیم ای صاحب عصر و زمان سن بول عمون عباس
اجازه ایسته حقدن گل ظهوره تنگشور دوران

• جمعه
• 22
• مرداد
• 1400
• ساعت
• 12:24
• نوشته شده توسط
• یوسف اکبری

صدره نشین محفل دلدادگان حسین
پرده گشای مرتبه عاشقان حسین
نمره گذار دایره امتحان حسین
اهل نمازه درس وضو اورگدن حسین
جمله جهانه کلمه هو اورگدن حسین

ایتدی جهان خلقتی کلاً امیدوار
روحین ایدنده خلق خداوند کردگار
دوندی زمانه چرخش ایدوب چرخ روزگار
قویدی قدم جهانه اولان خلقه مقتدا
کل ملائک ایلدی مولایه اقتدا

سالدی دیار یثربه دین آفتابی نور
ظلمت ایچیندن ایلدی اوز نورینی ظهور
دسته به دسته اندی یره قدسیان و حور
قصد زیارتیله ملائک او حضرتی
دوره لیوبله خانه امن رسالتی

دوتموش الینده نو گلی نی ختم الانبیا
کسمیش اونین کنارینی سردار اولیا
هاله چکوبله عالم معناده اوصیا
جسم جهانیانه حسین جاندی بالیقین
اهل جهاندا شاد و خراماندی بالیقین

عرش خداده زمزمه البشاره وار
کونه خدای لمیزلی دن اشاره وار
گویده نقدری گون نقدر آی ستاره وار
غبطه ایدوله بو کره با سعادته
نائل اولان چوخ اولدی بو فیض زیارته

چوخلار ایشیتدی ترک ایدوب اوز آشیانه سین
اللر اورکده کسدی حسین آستانه سین
فطرس آلوب قنادلارینی آب و دانه سین
سالدی اوزین او کمسه نه که باب حاجته
امیدوار اولوبدی دوایه طبابته

• جمعه
• 22
• مرداد
• 1400
• ساعت
• 13:27
• نوشته شده توسط
• یوسف اکبری

دیدی بو جمله نی جبرئيل امین
اولون آگه بولون ای اهل زمین

بو حسین اهل جهانه آقادی
یازیلیب جنت الاعلاده آدی

بونا جنت ده خدم حور اولاجاق
شه کونین نیله مشهور اولاجاق

حق یکتا بونی اعلا یارادیب
اوزینه والی والا یارادیب

شرر عشقینه چوخلار یاناجاق
اتکیندن یاپشوب آسلاناجاق

شهدائیله بهشته گیدجاق
اوجالیب گویلره پرواز ایدجاق

اولوب آفاق حقه نور جلی
صفتی مظهر ذات ازلی

نه حسین بنده ممتاز حسین
هامی خلق ایچره سرافراز حسین

اولا هر کیمسه سزاوار حسین
ایدر الله اونی زوار حسین

سالا درگاهینه صدقیله اوزون
دیه بی واسطه مولایه سوزون

اوزی ده صاحب درگاه اولاجاق
عرفا ساحه سینه شاه اولاجاق

عرفانین پایی حق دن گلجاق
سحرین سهمی شفق دن گلجاق

قورا بو سروره کیم بزم عزا
آلاجاق مزدینی ایام جزا

سوزی هاردان هارا گور چکدی قلم
اله لازم دی آلاخ بیزده علم

در احسانینه مهمان آپاراق
اونا لایق نچه قربان آپاراق

دولاناق باشینه پروانه کیمی
دوشناق قبرینه جانانه کیمی

یازیب اشعارین "امین" ای سرور
آدیوی دلده ایدبدور ازبر

دیور ای شاه لب عطشان مولا
لب عطشانیوه قربان مولا

• جمعه
• 22
• مرداد
• 1400
• ساعت
• 13:49
• نوشته شده توسط
• یوسف اکبری

گلوب بو کوفه نین اهلی عجب جسارته قارداش
توکولدی خیمیه لشکر ال آچدی غارته قارداش

اوزون یاخاوی قورتاردون گیدوب شهادته چاتدون
بلالی زینبی قویدون بیوک مصیبته قارداش

داغلدی چوللره یکسر عیال ختم پیغمبر
یامان گونومدی برادر یتیش بو عترته قارداش

پوزولدی غملی سپاهیم اوجالدی گوگلره آهیم
یوخومدی کمسه پناهیم چخام فراغته قارداش

قاچاندا خیمه لریندن حرارتین اثریندن
عیال دربدریندن دوشوب حرارته قارداش

نقدری سیم و زریم وار آلوب بو قان توکن اشرار
عزیزه قزلارون آغلار بو رسم و عادته قارداش

گلوب عیالیوه سان ور طریق چاره نشان ور
محبت ایله اذان ور نماز وحدته قارداش

شاخور گون ایستی سی گوگدن چخور حرارتی یردن
الو شراره سی هردن دونور قیامته قارداش

نشان ورور بو علامت عیان اولوبدی قیامت
هایاندا ختم رسالت یتیشسون امته قارداش

یانیدی لشکر شامی یانینجا شاه خیامی
اود ایچره عصرین امامی دوشوب فلاکته قارداش

گوزومده محشر عیاندور یانان اورک دولی قاندور
نجف دیاری هایاندور قاچام شکایته قارداش

بالان قالبدی شرر ده ایدوم نه چاره بو درده
یوخومدی حین خطر ده مجال نصرته قارداش

ندوم بو چرخ زمانه آلوب الینه بهانه
گتوردی زینبی جانه سالوب مشقته قارداش

سرشک چشمیم اولوب قان غمونده ای شه عطشان
هایاندا قالدون حسین جان گلوم زیارته قارداش

من آغلورام سنه قارداش توکور گوزوم یوزه قانیاش
گولور بو فرقهء اوباش قویور شماتته قارداش

چتین زماندی زمانیم یانوب کل اولدی بو جانیم
حسین باشیوا دولانیم بویور طبابته قارداش

یارالی قوش کمی قزلار نوالی نی کمی سیزلار
هامی سی ای شه ابرار دوشوبله وحشته قارداش

سپاه زادهء هنده دورور سلاسل الینده
الیم قالوب اتگینده نیاز و حاجته قارداش

بو دردی کمسه بولنمز اجل هایاندادی گلمز
ندن بو زینبون المز گیدر اسارته قارداش

((امینی))نوحه یازاندا گلر فغانه نهاندا
تیکوب گوزینی جهاندا فقط شفاعته قارداش

• جمعه
• 22
• مرداد
• 1400
• ساعت
• 13:52
• نوشته شده توسط
• یوسف اکبری

قلبیم آخر دولی قاندور قارداش
قافلم شامه رواندور قارداش

دور یولا سال یارالی
کونلومی آل یارالی

جان قارداش جان قارداش
ای وای عطشان قارداش

گون قاباقینده قالوبسان عریان
یارالی جسمیوه زینب قربان

جام صبریم جالانوب
اورگیم پارچالانوب

جان قارداش جان قارداش
ای وای عطشان قارداش

گللریم پر پر اولوب گلشنده
بلبلی قویمادیلار ایمنده

عندلیبیم سارالوب
قلبیمی غملر آلوب

جان قارداش جان قارداش
ای وای عطشان قارداش

آیرلانمور بو حرمله سندن
چکمور ال شمر ستمگر مندن

قزلار افغانه گلوب
زینبون جانه گلوب

جان قارداش جان قارداش
ای وای عطشان قارداش

مایلم نطقیوه گفتاریوه
رحم ایله زینب غمخواریوه

نطقه گل بیر دانشاق
هم یاناق هم آلیشاق

جان قارداش جان قارداش
ای وای عطشان قارداش

هار دا دور مندن آلان پیراهن
قالموسان بی کفن ای بی سروتن

کیم سویوب پیرهنون
قالوب عریان بدنون

جان قارداش جان قارداش
ای وای عطشان قارداش

آی باتوب دالدالانور اولدوزلار
ایلیور ناله و افغان قزلار

گوردولر شمعی خموش
اولدولار خانه به دوش

جان قارداش جان قارداش
ای وای عطشان قارداش

شمر دن یوخدور امان آغلاردیم
قان ورن یاره لرون باغلاردیم

اولموشام شمره اسیر
گتمگه چوخ تلسیر

جان قارداش جان قارداش
ای وای عطشان قارداش

من خداحافظ ایا جان جهان
دور مسافر یولا سال باشلا اذان

ایللری ترک ایدورم
شامه سنسیز گیدورم

جان قارداش جان قارداش
ای وای عطشان قارداش

آغلیوب اوخشار((امینی))دلدن
قورتار ای قارداش اونی مشکلدن

ای شه کرب و بلا
حاجتین ایله روا

جان قارداش جان قارداش
ای وای عطشان قارداش

• جمعه
• 22
• مرداد
• 1400
• ساعت
• 14:23
• نوشته شده توسط
• یوسف اکبری

گرک حسین چی لرین خدمتی حسین دیین اولسون
بها ورولسه اونین قیمتی حسین دیین اولسون
حسین حسین دیمگون آیری بیر فضیلتی وار
بو شرطیلن دیینین غیرتی حسین دیین اولسون
او شخصلر که آدین نوحه خوان قویوبلا حسینه
گرک آدی اوزی شخصیتی حسین دیین اولسون
حسین او کیمسه نی چوخ دوست دوتار اوزون بولوسن که
وقاری قولی سوزی صحبتی حسین دیین اولسون
دانیشدیراندا حسین نوکرین بیر آیری کانالدان
دانشماقی بلی ماهیتی حسین دیین اولسون
هرایه سسله سه قرآن حسین دیوب یولا دوشسون
کمال صدقله جدیتی حسین دیین اولسون
نه آغلاماق یارانین مرهمی اولار نه ده گولمک
فقط دواسی طبابیتی حسین دیین اولسون
طواف کعبه ایدن کیمسه لر بیر آز آییغ اولسون
زیارتی عملی نیتی حسین دیین اولسون
ربا یین حاجی لار قویمیون مجالسه گلسین
قویون مجالسین حیثیتی حسین دیین اولسون
ورون نه رشوه آلان فرصت آختارانلارا فرصت
قالوب کسیلسین اونین فرصتی حسین دیین اولسون
او مملکت که اونون رهبری حسین دیین اولدی
بیر ایش گورون که هامی ملتی حسین دیین اولسون
شهیدلرین یولونا دوز گرک ادامه وریلسین
شهید آتالارینون حرمتی حسین دیین اولسون
تلاش ایدون او آخان قانلارین محافطتینده
که اونلارین بیزه حلیتی حسین دیین اولسون
اولار حسین یولونی شوقیلن گیدوب تاپوب الحق
اوز ایسته دیگلری بیر جنتی حسین دیین اولسون
او جنتی که خدا خلق ایدوبدی مؤمنه خاطر
او مؤمنی که اونین سیرتی حسین دیین اولسون
ازل جهان دا گرک برده لیک بساطی پوزولسون
هر انسانین بله حریتی حسین دیین اولسون
او شیعه لر که قرا کوینگی تقبل ایدوبلر
بودور هدف اولارین عزتی حسین دیین اولسون
"امینیم" گجه گوندوز گوزوم حسینین الینده
که یازدیقیم شعریمون اجرتی حسین دیین اولسون

• جمعه
• 22
• مرداد
• 1400
• ساعت
• 16:48
• نوشته شده توسط
• یوسف اکبری

اگر بصیر اولا هرکس رموز خلقتینه
دوشر مدام یقین خالقین اطاعتینه

دیوبدی فلسفهءخلقتی خلایقه حق
بوگون فلق دی سنون گوردوگین صباحی شفق

دو روزه عمر گلوم دردیوه دوا ایلمز
اوزی فنا دی بو دهر اهلینه وفا ایلمز

کسوب کناریوی دوز قاصد اجل دولانور
گل حیاتیوه باخ گور نه ال به ال دولانور

چراغ عمری خزان یللری خموش ایلیور
او انلی سینه لری تیر مرگه توش ایلیور

عذاب قبری گرک هیچ فراموش ایلمیاخ
بقا چراغینی دنیاده خاموش ایلمیاخ

بهشتی مؤمینه خلق ایلیوب خدای جهان
محال بد عمل اولسون او جنتینه روان

قصور جنته چوخ کمسه نین تمایلی وار
ولیک بد عملین داغ مثالی حائلی وار

خدا یولوندا النلر بیر المگین بولجاق
نقدر آغلیوب آخرده شاد اولوب گولجاق

خوشا او کسلره ذکر ایلیور حسین آدینی
بهشته وارد اولاندا بولر اونون دادینی

((امینیا))کیمین الده بو امتیازی اولا
حسین اوزی تاپاجاق هر زمان نیازی اولا

• جمعه
• 22
• مرداد
• 1400
• ساعت
• 17:18
• نوشته شده توسط
• یوسف اکبری

عشق عالمینده عاشقه پروانه اورگدر
شمعین اوتوندا یانماقی پروانه اورگدر

من عاشقم حسین آدینا اولموشام دلی
فرزانه نینده عشقی دیوانه اورگدر

دوز آستان قدس حسینه یخلمشام
دیوللر حسین ده عاشقی جانانه اورگدر

مستم نگار الیندن ایچن باده دن بلی
بیرگون ده عشقی عارفه مستانه اورگدر

ایتدیم سوال عارف و صوفی بویوردیلار
مولان,((امینی))نوکری شاهانه اورگدر

• جمعه
• 22
• مرداد
• 1400
• ساعت
• 17:25
• نوشته شده توسط
• یوسف اکبری

عزا مجالسینین زیوری حسین آدیدی
عموم شیعه لرین مفخری حسین آدیدی

کتابت ایتماقا مینلر جه آد یازیلسا گینه
گوزللدن رخ هر دفتری حسین آدیدی

بهشت آدلارینا حقی وار سرآمد اولا
نچونکه ماخلقین سروری حسین آدیدی

تولدینده گیدوب گوگلری گزن آقادی
گوگین ستونی یرین لنگری حسین آدیدی

نه وار بو آد دا گورون ذکر ایدن زماندا خطیب
سوزین هم اولی هم آخری حسین آدیدی

زمانه بیرجور اولوب غم یاغور یرین یوزینه
سیلن اورکده ولی غملری حسین آدیدی

مصیبتین اوخوسان آغلاسان اورک بوشالار
سنونده گوز یاشیوا مشتری حسین آدیدی

اوشاقلقیندا خموش ایلین یاشیل الوی
ایدن رضا اوغولا مادری حسین آدیدی

مریض عشق دور اما طبیب دور هامیا
طبیبلرین دیلینین ازبری حسین آدیدی

یازاندا نسخه دیوللر توکل ایله حقه
دوا ورولّه دعا دللری حسین آدیدی

توسل ایله اورک دردینی گتور نظره
دعالرین گوزلی برتری حسین آدیدی

دوشنده مشکله گل دویگیلن کرم قاپوسین
آچان گره لری مشکلّری حسین آدیدی

بزرگ فلسفهء مکتب و شهادت وعشق
جهاد ایدنلرین همسنگری حسین آدیدی

خوش اول کسیکه اونا قهرمان مدالی ورن
خطوط رزمه چکن عسگری حسین آدیدی

یریندن اوینادیب عشق اهلینی چکن قباقا
سپاه ولشکر و سر لشکری حسین آدیدی

او قانلی نهضت نین قهرمان کمکچی لری
دیوله یول آپاران بیز لری حسین آدیدی

حقیقت اهل دل اولسان دلون فداسی گوررسن
که گسترن دله هر دلبری حسین آدیدی

سلام ایدنده اونا ایستوسن جواب آلاسان
تکلمه گتورن دیللری حسین آدیدی

اوکربلا که سالور شور عالمین باشینا
دچار ایدن غمه عاشقلری حسین آدیدی

((امینی))نوحه دیوب آغلیوب فراق چکوب
کمال وصله چاتان گونلری حسین آدیدی

• جمعه
• 22
• مرداد
• 1400
• ساعت
• 17:34
• نوشته شده توسط
• یوسف اکبری

اوشاقین دردینی دنیاده آنا یاخشی بولر
نه محبت گلور ایجاده آنا یاخشی بولر
آنالیق مهرینی درک ایلیه بولمز هر اوشاق
اوشاقی بسلیَن آزاده آنا یاخشی بولر
گلی باغبان دی گوزل وجهله باغدا بَجَرن
گیت عزیزیم خبر آل ساده آنا یاخشی بولر
گجه نین نصفی بشیگ ترپَده لایلای اوخویا
اوتوروب صود وره نوزاده آنا یاخشی بولر
دیسه لر گنج وفا کیمدی جهاندا دییرم
سوروشون وادی ایفاده آنا یاخشی بولر
بَجرن قیزلاری نازیله حورن طره لرین
سوزینی هر غم عظماده آنا یاخشی بولر
بو گیدوب بولدوگی خدمتلری حقینده ایدن
یتورن نکتهٔ ارشاده آنا یاخشی بولر
اوغولی حد بلوغه یتیروب تا گتیسون
گلینی حجلهٔ داماده آنا یاخشی بولر
آتادان کیمسه یتیم اولسا بش اون گونلوک اولار
بو مسلم دی هر اولاده آنا یاخشی بولر
آنانین قیمتی یا قدری اُلنده بولونر
اونودا بولسه او اثناده آنا یاخشی بولر
حَسنینین اَلی قوینوندا قالان لحظه لری
گورونور سینهٔ زهراده آنا یاخشی بولر
او خانم زینب مظلومه نین اوز اوخشاماسین
دل پر شور معلاده آنا یاخشی بولر
دیدی زهرا ننم ای کاش گلیدی بو چوله
نه اولوب اوغلونا صحراده آنا یاخشی بولر
قیزینین غملی بیاباندا آدامسیزلیقینی
یتیشَن اولماسا فریاده آنا یاخشی بولر
گَله تا شام غریبان دا شریک غم اولا
دایانا طور تجلاده آنا یاخشی بولر
گوروب اوز موسی دورانین "امینی" هر دم
حالینی سینهٔ سیناده آنا یاخشی بولر

• جمعه
• 22
• مرداد
• 1400
• ساعت
• 17:50
• نوشته شده توسط
• یوسف اکبری

کهف الاماندی خلقه حسین آستانه سی
صدره مکاندی خلقه حسین آستانه سی
سد عظیم معصیت و مانع خطا
باب جناندی خلقه حسین آستانه سی

هر کیم او آستاندا اوزون ساخلادی تمیز
تاپدی تقرب اولدی ایکی عالمه عزیز
روشن ایدوبدی ختم پیمبر شه حجیز
گون تک عیاندی خلقه حسین آستانه سی

حسین تولدینده یره گلدی جبرئیل
دلده دعا و ذکر خدا بندهٔ ذلیل
سالدی او پاک بارگهه فطرسی دخیل
فیض فشاندی خلقه حسین آستانه سی

• جمعه
• 22
• مرداد
• 1400
• ساعت
• 18:09
• نوشته شده توسط
• یوسف اکبری

جمله عشاقی چکن بنده حسینین آدی دی
ایلیین آدلاری ارزنده حسینین آدی دی

الدورن نفسینی احیا ایلین دین حقی
ساخلیان شیعه نی پاینده حسینین آدی دی

ای حسین عاشقی گیت قدریوی بول جامعه ده
عشقه معنی یارادان سنده حسینین آدی دی

عشقون اعلادی مجاز عشق لره اوخشاتما
ساخلا سینونده اونی زنده حسینین آدی دی

عشق اولا عشقیوه قالدیقجا اوجالدور آدیوی
مونسین قبرده السنده حسینین آدی دی

چوخلی اخبار و احادیث ده پیمبر بویوروب
علت عقباده او لب خنده حسینین آدی دی

منده عمرومده حسین آدینه چوخ آغلامشام
باغلانان آدیمه پرونده حسینین آدی دی

اول کی او قانین حسین آدینه ایثار ایلیوب
نصب ایدور پرچمی دربنده حسینین آدی دی

قلب تاریخیده البته چوخ آدلار یازیلوب
آدلارین ایچره برازنده حسینین آدی دی

مشکلون اولسا "امینی" دی آچار مشکلیوی
خلقه روشن گر آینده حسینین آدی دی

• جمعه
• 22
• مرداد
• 1400
• ساعت
• 18:11
• نوشته شده توسط
• یوسف اکبری

عشقه باخ وصلتی آیدینلادی هجرانه گوره
یولایوب عاشقی تا نقطهٔ پایانه گوره

یار دیرینه و دلسوزی نه احسان ایلیور
نقش اولوب تپراقا بیر نمرهٔ شایانه گوره

شاه دین مقتلی خلوت گه رازیدی بلی
بیر داغلمش اورگه بیر دل سوزانه گوره

عشقه باخ ورطهٔ طوفاندا خانم فاطمه نین
ساخلیوب روحینی بیر شامغریبانه گوره

طوره گوندردی کلیم اللهه لبیک دیوب
سبط پیغمبری پیغمبره ریحانه گوره

سوز دل سوزشین آرتیردی سوسوزدان اُله نین
ساربان ایلدیگی ظلم فراوانه گوره

دوردی زهرا دیدی اوغلوم گیدورم کوفیه من
تا گورم حرمت ایدن وار سن مهمانه گوره؟

عشقه باخ جذبه سی جنت دن علی نی گتروب
آغلادیر وادی غربت ده یتیمانه گوره

سالمسان درگه مولایه "امینی" اوزیوی
سنده بیر حاجته بیر مطلب پنهانه گوره

• جمعه
• 22
• مرداد
• 1400
• ساعت
• 18:41
• نوشته شده توسط
• یوسف اکبری

آه ای شرر عشق حسینیله یانانلار
عشقین دادین اوّلده آلیب جانه قاتانلار
معشوق وِرَن قول و قراره اینانانلار
مین دفعه گوروم عشقوزه عشق اولسون عزیزان
قرآنی دیریلدیب یره سیزدن توکولن قان

اولدوز نجه سیز شیر حق داوره پیرو
هم حیدره هم حضرت پیغمبره پیرو
سلطان جهان پادشه محشره پیرو
هیچ کیمسه جهاندا بیله فخر ایلیه بولمز
دیوانه ده بو عشقوزه بیر سوز دیه بولمز

سیزلر که شهیدان ره دین خداسیز
دنیانی تحیرده قویان نور هداسیز
همسنگر و یاران شه کرب و بلاسیز
اسلامه که قان لازمیدی قان گتربسوز
قرآن مبین اُلموشیدی جان گتربسوز

خوش حالوزه اقبالوزه چاتدوز بیله کامه
قربان اولا جانلار او پسندیده مرامه
ورّوخ بو حقیقت یولا بیزلرده ادامه
قانلار که آخوب قویماروخ اصلا هدر اولسون
دین دشمنی دنیاده گرک دربدر اولسون

کافی اولا بولمز که عزادار حسینوخ
لبیک خطاب ایلمشوخ یار حسینوخ
عالم بونی بولسین که طرفدار حسینوخ
فرمان آلاروخ بیز بو شه پر برکتدن
دوشمز داخی بو ماه محرم حرکتدن

ای کرب و بلا منطقه سین طور ایلینلر
وی شیعه دیارین بیله معطور ایلینلر
راحت یاتون ای خلقی سلحشور ایلینلر
سیز بارگه قدس الهی ده یاتبسوز
عشقیله گیدوب جنت الاعلایه چاتبسوز

بو جمله حرامی لره اعلان خطردی
اونلاردی دیوللر شهدا قانی هدردی
ظلمت گجه نین آخری بیر شانلی سحردی
ناموس یولوندا اوقانین قیمتی چوخدی
سایماز بو قلج دی قمه دی نیزه دی اوخ دی

یار اولسا بیز عاشقلره گر حضرت باری
جان جوهری تک ساخلیاروخ دین و دیاری
ویران اولا دنیاده گرک ظلمین حصاری
دین آرخالاری سایهٔ قرآندا گزوللر
ایمان سلاحی الده بو ایراندا گزوللر

بیگانه خیال ایتمسین ایراندا یاتان وار
ناموس و شرف غیرت و وجدانی ساتان وار
ایراندا فقط قول قولا باش باشه چاتان وار
آیرلماقمیز یوخدی بیزیم وحدتمیز وار
یاتماق ندی یا قورخی ندی غیرتمیز وار

چپ باخسا بو ایرانه بیری قان سالاروخ بیز
دریانی چالوب بیر بیره طوفان سالاروخ بیز
جداً ملل متحده جان سالاروخ بیز
کیمدور دانشا شیعهٔ اثنی عشریلن
دین آرخاسی گیتمز یولا ضد بشریلن

ملت که اونون مکتبی مکتب دی الهی
مکتب که اونون حفظ ایدنی عشق سپاهی
عشقی که شهادت دی اونون عمده گواهی
ایمان سلاحی الده جدال ایلر او ملت
قویماز دانشا دشمنی لال ایلر او ملت

بولسونله بیزیم رهبریمیز شاه شهیدان
تا روز قیامت اولاجاق دهره سلیمان
هریانه گرک حکم ایده اسلامله قرآن
حریت اگر اولماسا جان ساخلاماق اولماز
الدن گیدر القصه امان ساخلاماق اولماز

ناموس و شرف ، حجب و حیادن خبر اولماز
انسانلار ایچون صلح و صفا دن خبر اولماز
هم عاطفه دن مهر و وفادن خبر اولماز
گوزدن گلی قویسان گوزلیم خار آلاجاقدور
سستالسان اگر یاریوی اغیار آلاجاقدور

مردان خدائیله بیزیم نسبتمیز وار
غیرت سوموگینده قانمیز وار اتمیز وار
غیرتلی ابوالفضل کیمی غیرتمیز وار
حیدر قانی شریانه گلور رگلریمیزده
باشدان باشا غیرت یازلبدور دریمیزده

لبیک دیوب کوفه لیلر ابن زیاده
ایجاد خطر ایلدیلر کرب و بلا ده
شاهنشه دین قتلینه ایلوبله اراده
بولموردیله بوش وعده لره آلاناجاقلار
اما بونی بولسونله که دائم یاناجاقلار

آینده لرین سالمادیلار فکر و خیاله
بوش وعده لره چکدیله شه دورینه هاله
حاصل حرم آهولری سولموشدی چو لاله
نهرین سویی باغلیدی عیال شه دینه
قالخزدی ابوالفضلی تقاضای سکینه

حاصل اوزینی القمیه سالدی ابوالفضل
دورت مین نفری بیر بیرینه چالدی ابوالفضل
بیر حمله ده نهرین سویونی آلدی ابوالفضل
دولدوردی غرض مشکینی سقای سلحشور
سرعتله سودان چخدی ایدوب خیمه نی منظور

چیگنینده حسین بیرقی سرعتله اسوردی
شمشیر عدالت سپه کفری کسوردی
سو پایلاماقا قیزلارا سقا تلسوردی
القصه دولاندی یولی نخلستانا سالدی
جرأت له قاچانلار قییدوب دوره سین آلدی

دورت بیر یانی باغلیدی قوشون تاپدی جسارت
روبه لر الیندن یتشوب شیره خسارت
آهولره صیاد قضا بند اسارت
گوندردی قَدَر قاصدینی سمت خیامه
دوندی غرض عباسین ایشیق گوندوزی شامه

میدان جدل فارِس جنگ و جدل ایستور
اوخ نیزه قلنج ایلیه رد و بدل ایستور
اوّلده ایکی گوز ایکی قوتلی ال ایستور
عباس علی نین ال اوزولموشدی قولوندان
السیز گوروب عباس چکلمزدی یولوندان

استادیدی عباسین اوزی چون اوز ایشینده
حیرتده قویوب عالمی راه و روشینده
ورمشدی مکان قبضهٔ شمشیره دیشینده
بیر اوخ آتانین گلدی اوخی مشگینه دگدی
قالخزدی اوزین قارداشینین قدّینی اگدی

بیر نحویله سسلندی یتیش داده حسینیم
قویما قالام آواره بو صحراده حسینیم
تا ورمه میشم فرصتی جلاده حسینیم
بحرانلی زمانیم دی منی یاد ایله قارداش
جلاد ستمکاریدن آزاد ایله قارداش

ای کاش گَلن لحظه لری منده بولیدیم
دشمن قباقینده سنه قربان کسیلیدیم
یا اینکه محبتدی قوجاقینده الیدیم
اولدوز کیمی منده گونه بیر لحظه باخیدیم
گون باشمین اوستونده اولان وقته آخیدیم

قولسوز منی آتدان که سالیب شام سپاهی
بولدوم که جانیم چخمالی دور خواه نخواهی
گوردوم قباقیمده دایانیب بیرجه سیاهی
تز تز منه سسلوردی گَل آغوشیمه اوغلوم
ای نور سالان خانهٔ خاموشیمه اوغلوم

بیردن که گوزوم ماه جمالینه ساتاشدی
زهرا ننه مین یعنی محبت جامی داشدی
آلسین منی آغوشه ولی بیر قولین آشدی
آتدان یخلاندا یوزوم اوستونده یخلدیم
حسرتله دوشندیم ایاقی آتدا سیخیلدیم

سانکه یخلبدور خُتن آهوسی چمنده
صیاد گزور الده اوخی دشت و دمنده
من قاتل الینده ننه مین گوزلری منده
اوخشور بالاسی اوخلانان آهولره قارداش
گل باری تسلی ور او بی یاوره قارداش

قارداش سسینی آلدی خیَم ده شه محشر
میدانه سراسیمه قدم قویدی او سرور
گوردی یغشوب باشینه بیر عدهٔ کافر
جداً چالشیر خیمیه گلسین یولی یوخدور
باش پارچالانیب سو جالانیب هم قولی یوخدور

لشگر داغلیب شاه لب عطشانی گورنده
سستالدی شاهین دیزلری سقانی گورنده
صبرین جالانیب جامی او اوضانی گورنده
ابر مُحن آفاق حیاتین ایله آلدی
دل تنگه دوشوب گوز قارالیب رنگی سارالدی

قارداش باشین اگلشدی یره آلدی قوجاقه
آهسته آپاردی دوداقین قانلی دوداقه
دوتدی کمریندن دیدی قارداش دور ایاقه
دشمن قباقیندا منی یاندیرما ابوالفضل
آواره بو میدانی دولاندیرما ابوالفضل

قارداش غمی قارداشه بولرسن اثر ایلر
بو غم ایله بیر غمدی که چوخلار حذر ایلر
بوندان صورا صیاد قضا گور نه لر ایلر
زینب قولی باغلانسا طناب ستمیلن
هیهات رقیه م قالا بو درد و غمیلن

آچ گوزلرون ای ماه بنی هاشم آماندی
جوّی بوریوب غم باشیم اوستونده دوماندی
دور قوی آپاریم خیمیه زینب نگراندی
گلمور ایاقیم خیمه سرایه گیدوم آخر
سر گیج ایلیوب غم منی بولمم ندوم آخر

آماج دی غم تیرینه چوخ سینه لر عباس
چوخ سنگ ستملن سینیب آیینه لر عباس
صف صف دایانیب نوکر دیرینه لر عباس
آغلور بو "امینی" سنه هر بزم عزاده
سنده اونی سال قبره گیدن وقتیده یاده

• جمعه
• 22
• مرداد
• 1400
• ساعت
• 19:17
• نوشته شده توسط
• یوسف اکبری

الا ای حاجی بیت الهی
گیدورسن مکه یه خواهی نخواهی
الونده گوزله احرام باغلیاندا
حق دادریدن اولسون گواهی
طواف کعبه عشق ایستور عزیزیم
اگر تاپسان او اعظم بارگاهی
کمال دقت اولسون دوز باخشلا
دیلی دوتما گلیلن اشتباهی
صفاسی اوندادور مرو و صفانین
بیر اولسون هم گداسی هم ده شاهی

غرض خلقه اونی آندیرماق اولسون
حقیقت مشعلین یاندیرماق اولسون
نه ال یورماق نه حمله نه حماسه
نه زور چکماق نه زنجیر قیرماق اولسون
نه های سالماق نه چالماق نه چاغیرماق
نه گوز چاتماق نه باش سیندیرماق اولسون
سحر معشر چولونده داش یغاندا
یغیب اعمالی باشلاندیرماق اولسون
مناده هر ستونی داشلیاندا
داشین معناسی شیطان ویرماق اولسون

منا صحراسی بزم انبیادور
همان بزم عاری از ریب و ریادور
اورا جبریل گویدن قوچ گتوردی
همان قوچ زیب صحرادور ضیادور
خلیل الله الاعظم اسمعیله
خطاب ایتدی بو فرمان خدادور
اوغول امر الهی نهی اولونماز
حسابی چوخ حسابلاردان جدادور
اورکدن اسمعیل عرض ایتدی بابا
خدادن هر قضا گلسه رضادور

دلونده نام الله ازبر اولسون
سنه قوی بار یکتا یاور اولسون
زیارت قصدون اولسا نیت ایله
نصیبون مرقد پیغمبر اولسون
بقیع قبرستانیندا بیر دولان تاپ
که شاید اوردا ایتگین گوهر اولسون
حسن سجاد باقر جعفر اوردا
گمان وار هم بتول اطهر اولسون
مدینه مهد عرف و عارفاندور
چالیش قوی مفرق ایمان زر اولسون

• شنبه
• 23
• مرداد
• 1400
• ساعت
• 11:53
• نوشته شده توسط
• یوسف اکبری

عالم عشق ده سلطاندی حسین
جمله عاشقلره برهاندی حسین

عشقی نین فلسفه سینده یازیلیب
فخر عالم شه خوباندی حسین

درگه قدسینه درباندی ملک
واقعاً دهره سلیماندی حسین

وادی معرفت اللهه قمر
رونق محفل عرفاندی حسین

گورسن اللهی سزادور اونیلن
مظهر حضرت یزدان دی حسین

ای که قرآن اوخویورسان گَل اینان
گر دیسم معنی قرآن دی حسین

آیهٔ نَصرُ مِن اللّه ده گور
جسم قرآنه یقین جاندی حسین

نقد جان الده عَلَم چیگنینده
شاهد بزم شهیداندی حسین

خون بها قادر یکتادور اونا
چون خدادن توکولن قاندی حسین

قیل توسل سن "امینی" آدینا
شافع مطلق عصیاندی حسین

• شنبه
• 23
• مرداد
• 1400
• ساعت
• 15:53
• نوشته شده توسط
• یوسف اکبری

ای بشریت صفین اشغال ایدن
کوفه لیلر ایندی سخنور منم
خواب ذلالت ده یاتبسوز ندن
آگه اولون مرد مظفر منم
امر یزیدیله جری اولموسوز
کیمدی یزید عالمه سرور منم
حجتی اتمام ایدورم سیزلره
فاتح جنگ اول و آخر منم
لفظ بلیاته بلی سویلین
عهد الستیده مخیر منم
گر تانمیرسوز منی دقت ایدون
زینت آغوش پیمبر منم
ام ابیها که آنام دور منیم
زادهٔ زهرای مطهر منم
نابغه فرزند شه لا فتی
یعنی علی فاتح خیبر منم
حامی قرآنم و دین مبین
یاور حق دشمن کافر منم
شهپر جبریل ده عرشه گیدن
گوگلره زیور یره لنگر منم
سید والای زمین و زمان
بندهٔ پاک حق داور منم
بارگه قدس خداوندیده
جمله یارانمشلارا مفخر منم
جن و ملک مندن اطاعت ایدور
حوریله قلمانه ده رهبر منم
کور دلان یوخدی گوزوز گورمگه
ذات حق داوره مظهر منم
ظلمت ایچینده یاشاماق دور سیزی
بنده چکوب نور منور منم
مندن آلار نورینی هم گون هم آی
اولموش آدیم دللره ازبر منم
روح الامین وردی بشارت منه
شافع هنگامهٔ محشر منم
روز قیامت منی سسلر هامی
داده جماعت او که سسلر منم
امتی حق اوندا باغشلار منه
رحمته عنقا و هما فر منم
باغلامسوز راه فراتی منیم
عترتیمه صاحب کوثر منم
باخمیون ایندی لب عطشانیمه
آب حیاتی که دیوللر منم
عالم معناده سویی پایلیان
اهل ایکی عالمه یکسر منم
قانیمی سیز توکمگه آماده سیز
ایندی مقابل سیزه لشگر منم
منده که الله قانی شریان ایدور
قان که اونوندی قوری پیکر منم
سیز نه بولورسوز ایدون ای کوفیان
فکر ایدیسوز بی کس و یاور منم
قارداشیم عباسی که الدورموسوز
گرچه گورن داغ برادر منم
قدیم اگیلدی ولی باش اگمرم
معاویه نین اوغلونا برتر منم

• شنبه
• 23
• مرداد
• 1400
• ساعت
• 16:05
• نوشته شده توسط
• یوسف اکبری

هایانداسان حسینیم امیدیم ای پناهیم
شرار ظلمه یاندی تالاندی خیمه گاهیم

بو چولده بیر نفر یوخ آدین قویا مسلمان
قالا بو اهل بیتون اماندا حدالامکان
امانسیز آت دوشونده بیر عده خیل نسوان
سرشک گوزلریندن آخور اورکدن آلقان
منیم ده اونلاریلان چیخور سمایه آهیم

گوروم سینیدی قارداش بو چرخ کج مداری
خراب اولیدی ای کاش ازلده روزگاری
یامان دومان دوتوبدور بو کربلا دیاری
اسارته چکوللر عیال شهریاری
یامان گونوم دی تز گل اولوبدی سد راهیم

دومانلی چملی غملی اولوب چولون هواسی
دوتوبدی جوّی یکسر حرملرین نواسی
یِتَن دگول تمامه بو لشگرین جفاسی
بولنمورم ندور بس بو دردیمین دواسی
دیوم کیمه کیم اولسون پناه و تکیه گاهیم

او سرودیم که قوت واریدی هر خولومدا
گزوردی آلتی قارداش صاقیمدا هم صولومدا
ایدیم نه چاره ایندی قوشون دوروب یولومدا
اسارتین ویریبلار طنابنی قولومدا
تالانمشام الیمدن چیخوب جلال و جاهیم

• شنبه
• 23
• مرداد
• 1400
• ساعت
• 16:21
• نوشته شده توسط
• یوسف اکبری

یا فاطمه گل کربلا صحراسینه طوفاندی گل
جان اوسته دور اوغلون حسین اوز قانینه غلطاندی گل

گوگدن یاغور گرد و دومان یردن گوگه قالخور فغان
ایستور امام انس و جان جانانه ورسین امتحان
نشر ایلیور جسمینده قان ال چکمور اوخ شمشیر ویران
ورمور امانسیزلار امان زینب قالیبدور الامان
بحران زماندور هارداسان گل گور ایوین ویراندی گل

نهرین سویی طغیان ورور اوز اولدوقین اعلان ورور
وحشی لره امکان ورور ساخلور سر و سامان ورور
عطشان قوناقلار سان ورور سقا لب عطشان جان ورور
آسایشین قرآن ورور دین عمرینه پایان ورور
امت هیچه ایمان ورور بولمم نجه دوراندی گل

قرآنیلن اولادینی تاپشیرمیوب جدیم مگر
قرآن ایاقلاندی قالوب اوغلون حسین ده جان به سر
یوز ییرمی مین دشمن ولی مظلوم حسینیم بیر نفر
جسمین دلر اوخ نیزه لر شمشیرلرین تیغی کسر
سن وردیگون کوینک گیدوب گل پیکری عریاندی گل

اوخلار زهیندن رد اولور گویدن یاغور باران کیمی
گللر سپیلمیش تپراقا اوراق اولان قرآن کیمی
تقسیم اولور یتمیش نفر یوزمین یره قربان کیمی
گل خیمه لرده بیر بیرین قزلار قوجاقلور جان کیمی
قلبیم یانان خیمه م کیمی ظلم آتشیلن یاندی گل

• شنبه
• 23
• مرداد
• 1400
• ساعت
• 17:03
• نوشته شده توسط
• یوسف اکبری

مدینه دن بیله آرالیام حسین
اوزومده قلبدن یارالیام حسین
امان امان امان من بی آشیان
سوروشسالار دیوم هارالیام حسین

داغلدی ظلمیلن جلالی زینبین
چتین گلر سانا ملالی زینبین
امان امان امان الوندن ای زمان
خسوف ایدوب گوزل هلالی زینبین

بو کربلا چولون دوتوبدور اهل شام
علیهیوه سنون ایدوبدیلر قیام
امان امان امان قولومدا ریسمان
اسیر عشقیوه نظر قیل ای امام

بلالی چول کیمی بلالی دور باشیم
الوب منیم نچه وفالی قارداشیم
امان امان امان ایا عزیز جان
جماعت ال چالور آخاندا گوز یاشیم

تعجبم حسین بو قوم ظلمینه
بو قدری ویردیلار جفا داشین سنه
امان امان امان خراب اولوب زمان
من آغلیرام سنه قوشون گولور منه

کمک لرون اخا باتوب قزل قانا
منای عشق ده یاتیبلا یان یانا
امان امان امان اولوب قدی کمان
بلالی زینبون قالیب یانا یانا

نه لر گوروب گوزوم او قتلگاهیده
ترحم اولمادی دل سپاهیده
امان امان امان رعیت الامان
گلوب جسارته حضور شاهیده

مثال لاله دور بو یاره لی بدن
سزادی گر دیسم سنه گل عدن
امان امان امان ایا شه جهان
سن الدون ای عجب من المدوم ندن

یانیب کول اولموشام یاناندا خیمه لر
دیدیم آتام علی هرایمه گلر
امان امان امان اورکلر اولدی قان
قیامت ایلیوب گلنده مقتله

شرار غم سالیب شراره جانیما
ویراندا اود فلک بو دودمانیما
امان امان امان"امینی" نوحه خوان
قوشوب فغانینی منیم فغانیما

• شنبه
• 23
• مرداد
• 1400
• ساعت
• 17:47
• نوشته شده توسط
• یوسف اکبری

ای حسین ای آنام یادگاری
زینبین جان به کف جان نثاری
خردا قزلاری ترک ایتمه قارداش
گتمه گیتسن ده صبر ایله باری

کوفه نین رحمسیز دور سپاهی
گتمه ای عالمینین پناهی
الدوروبلر ابوالفضلی سنسیز
کیمسه یوخ زینبین دادخواهی

آننوین یاره سیندن آخور قان
باغری قان لاله لردن آلور جان
آیرلیق صحبتین سالما قارداش
صبره یوخدور داخی منده امکان

طاقتون قالمیبدور جداله
شمر سسلور ولیکن قتاله
هیچ گیدنلر قییتمور حسینیم
رحم قیل پوزقون اهل و عیاله

ایلدوگجن نظر آفتابه
قلبیمی دوندرورسن کبابه
اوخلانوب شیر خوار اوغلی قارداش
گل اوزون ور تسلی ربابه

یرلر آغلور سنه گوگلر آغلور
انس و جن و ملک یکسر آغلور
قتلیوه شمر اولوبدور مهیا
حالیوه قان توکن خنجر آغلور

سن عزیز دل مصطفی سن
اهل دینه حسین رهنماسن
زینبوندن نه تز دویدون آخر
کل عالم بولور با وفاسن

گلستاندا سولان گللروندن
دویماق اولمور شیرین دللروندن
من وفالی حسین سن وفالی
آیرلورسان ندن ایللروندن

تند یللر اسوب گلستانه
قالمیوب گللروندن نشانه
گلموش افغانه بلبلر آغلور
خار الیندن حسین یانه یانه

اود یاغور لحظه لحظه هوادن
تاب آلور قلب آل عبادن
سن یانورسان آخور نهر القم
دشت پر محنت کربلادن

اولموش امت سنه یاغی قارداش
سولموش عمرون گلی باغی قارداش
المه گه یوخ لزومین چکیلمیش
قلبیوه نوجوان داغی قارداش

مست میخانهٔ عشق یاره
کیم باخار گیتسه بزم نگاره
هانسی اوغلی الن بیر آتانی
الدورللر حسینیم دوباره

گل مریض اوغلوین گوگلین آل گیت
بش دقیقه کنارینده قال گیت
من دیمم گتمه گیتسن ده قارداش
زینبین باشینه قاره سال گیت

غم یوکین چیگنیمه آلمشام من
چوخ یامان گونلره قالمشام من
یاز "امینی" نه نوعی حسینی
خیمه گه دن یولا سالمشام من

• شنبه
• 23
• مرداد
• 1400
• ساعت
• 17:48
• نوشته شده توسط
• یوسف اکبری

شیعه نی زنده ساخلیان
کلمهٔ اتحاد اولور
شیعه دوشنده مشکله
چاره سی بیر جهاد اولور
حکم جهاد ورمه گه
عمده ولایت ایستیور
هاردا ولایت اولماسا
حاکم اورا فساد اولور

چوخلاری آنلامیر هله
عزت و جاه شیعه نی
حکم جهاد شیعه نی
فتح سپاه شیعه نی
باخمیون ایندی هر یتن
طعنه ویریلا صبر ایله
باش اگجاقدور اوندا کیم
گورسه پناه شیعه نی

گرچه زمانه ایندی بیر
ذره جه تنگ دور بیزه
آتماقا بیر قدم دالی
دهرده ننگ دور بیزه
ایندی ییزیم امیریمیز
کرب و بلا شهیدی دور
بزم عزاسی دائماً
جبههٔ جنگ دور بیزه

عقل قبول ایلمیر
هر کسین ادعاسینی
شیعه گرکدی ساخلاسین
دین حقین لواسینی
لشگر مخلص علی
صدقیله سویلیوب بلی
هرنه ای بوشلیار ولی
بوشلاماز آل یاسینی

سنگر عشق دور بیزه
بزم عزای فاطمه
آرتاجاق عشقمیز کیمی
جند و قوای فاطمه
حفظ حجاب ایچون خانم
چوخلی سفارش ایلیوب
نیلیه بوللوک اولماسا
جلب رضای فاطمه

ورمیشوک ابتداده بیز
بیعت الین پیمبره
تاپشروب اول خدیو ده
ساقی حوض کوثره
چشم امیدیلن باخور
شیعه بو خانوادیه
گور نه زماندان آغلروخ
شافع روز محشره

بیز که حسینیوک باخون
کیم دی گورون یزیدی لر
فلسفهٔ ولایتی
آیریلاری چتین بولر
ایندی حسینه آغلاماق
توشهٔ آخرت اولور
دییله حسینه آغلیان
حشرده آغلاماز گولر

کلمهٔ من بکا دیوب
حضرت ختم مرسلین
اوغلوم حسینه آغلیان
کیمسه لر ایلسین یقین
جنتی واجب ایلیوب
نار جهنمی حرام
اوندا حسین اوزی گلور
دوتماقا ذاکرین الین

• شنبه
• 23
• مرداد
• 1400
• ساعت
• 18:07
• نوشته شده توسط
• یوسف اکبری

قانونی رعایت ایلمور جاهل عربلر
هر تک تکی بیر وحشی و دیوانیه بنزر

طوفان غم انگیزیدی صحرای غم افزا
قالموش دل طوفاندا چو کشتی شه والا

گوگدن یاغوری قان ولی یردن چخور افغان
یر گوی ملشور کون پریشاندی پریشان

معناده ملک فوجی قدح الده دایانمش
یتمیش نفر عشق اهلی ولی قانه بویانمش

بیر نیزیه تکیه ایلیوب عصرین امامی
فکری بودی ارشاد ایلسین لشگر شامی

اتمام ایلیوب حجتنی حجت یزدان
لشگرده ولی اولمادی بیر کیمسه مسلمان

اسلامیتین حفظ ایده وجدانینه خاطر
انصاف ایلیه دینینه قرآنینه خاطر

های سالدیلا سس قوپدی بپا اولدی قیامت
اوخ دگدی قلج دگدی یارالاندی امامت

هی حمله نی برکیتدی عمر سعد بد اختر
قالدی آرادا واحد و دلبند پیمبر

دورت مین یارا وار جسم شریفیندن آخور قان
اولموش بدنی خانهٔ زنبور کیمی شانشان

پیشانه سی بیر اوچ پر اوخین اولدی نشانی
اوخ دگدی گلوب قان کسیلوب تاب و توانی

اگلشدی یره ال عربی دامنه آتدی
دامن گیدوب اوسته اوخ آتان مقصده چاتدی

آهسته آپاردی گوزونین قاننی سیلدی
من که دیمم آنندان آخان قانی کسیلدی

گورسندی اورک ملکی فلک تاپدی بهانه
نامرد اوخونا مرد اورگی اولدی نشانه

اوخ قلبه که دگدی اوزی آهسته یخلدی
قویدی یوزینی قانلی تراب اوسته یخلدی

میعاد گه عشقه دوشوب زادهٔ زهرا
آتلار ایاقی آتدا قالوب دوغرانان اعضا

اطفاله خبر چاتدی امام زمن ئولدی
گلزار نبی سولدی گل و یاسمن ئولدی

• شنبه
• 23
• مرداد
• 1400
• ساعت
• 19:49
• نوشته شده توسط
• یوسف اکبری

سنی گوندروب هانسی قضا و قدر ای اوخ
دوباره اورگیمده یاراتدون کدر ای اوخ

سنی حرمله الده کمانه قویوب آتدی
منیم آهیمی یردن سماواته اوجاتدی
ربابین ده اوغول وای سسین سسلره قاتدی
قالوب خیمه ده آهو مثالی ملر ای اوخ

نولیدی او کماندان چخان وقتی دییدون
گلوب غفلتی قولسوز ابوالفضلیمه دیدون
اونون شأنون اوجلتدون منیم قدیمی اَیدون
یتردون دل کون و مکانه خطر ای اوخ

اوزون بیر کیچیک اوخسان آدوندا خطرون چوخ
دوشنده یولا صوتون سسون هم اثرون چوخ
دگمده هارا والله قلجدان کسرون چوخ
ایدر هر کیم اشیتسه آدوندان حذر ای اوخ

ایدوبسن نه جسارت دگوبسن اورگیمدن
گیچوبسن جگریمدن چخوبسان کورگیمدن
الوم تیغی چکوبسن منیم شاه رگیمدن
اجل باشمین اوسته پریشان گزر ای اوخ

ویراردیم او زمان که قدم بیت خداده
وروب دل منه دلبر اوگون سعی و صفاده
ولی سن یولا سالدون بو گون قانلی مناده
ایدوم منده فنادن بقایه سفر ای اوخ

بو چولده منه گرچه چتین مسئله گلدی
خوشام لیک نقدری مرامیم اله گلدی
بو احوالیمه بلکه باجیم مقتله گلدی
حسینین بیله گورسه دایانماز گلر ای اوخ

نه عادت دی که بولمم مسلمان آراسیندا
مسلمانی دوگوللر بیابان آراسیندا
منی گورسه عیالیم قزل قان آراسیندا
اورک قانی گوزوندن عذاره الر ای اوخ

امان یوخ بو قوشوندان اوزوم زار و پریشان
هوا ایستی سوسوزدان گلور ضعف گیدور جان
خصوصا منی سالمش جوان داغی ایاقدان
اوغول مرگی نه بولسه آتایه ایدر ای اوخ

اوزوم ورمشام امضا اوگون عهد السته
دوزم حمله گتورسه قوشون دسته به دسته
گله م یوخ اولا زینب باجیم قلبی شکسته
رضایت وروب اولسین اودا دربدر ای اوخ

اوجالمش هامی نیزه قلجلار منه ساری
ولی کیمسه مسلمان تاپلمور ایده یاری
دیدیم قوی بیر اقلی باجیمدا گله باری
منیم دردیمی سندن او یاخشی بولر ای اوخ

اگر آهیم اوخیله ویرام فُلک قضانی
گیچر ملک قدردن یخار کل جهانی
فقط دینیمه خاطر دیدوم قوی چیخا جانی
نه وار قصد ریاست نه آیری نظر ای اوخ

قیام ایلمیشم من قیلام عشق نمازین
چکم نازلی نگارین نقدر ایلسه نازین
آچام سجده زمانی اورک راز و نیازین
حالیمدان اوزی اولسین منیم باخبر ای اوخ

حسینم فلکینه اوزوم شمس ضحایم
هدایت گمی سینده اولان نور هدایم
بوگون کرب و بلا ده گرفتار بلایم
بو طوفاندا خسوفه دوشوبدور قمر ای اوخ

منیم شمع وجودیم چکور شعله شراره
اونین نوری تلألو ایدور هر شب تاره
آیین دور و برینده گزور فوج ستاره
بو هر نقطیه گیتسه اولاردا گیدر ای اوخ

اوزوم ایستمیشم من دوشم قانلی منایه
چخا شمرین الیلن باشیم نوک جدایه
تلاوت ایدم الله سوزین آیه به آیه
خلایق گوره منده عجایب هنر ای اوخ

او کسلر که یاخوندان بو میدانه باخولار
اولار یاندیروب آخر دل کونی یاخولار
نه گون مثلی شاخولار نه اولدوز تک آخولار
فقط طرح توکولر گروه کُفَر ای اوخ

منیم درگهیمین بیر کچیک قاره غلامی
بویوکدور همه کس دن اونون شأن و مقامی
ازلدن او دوشوندی ندور عصرین امامی
واریمش دل آگاه و چشم بصر ای اوخ

او کسلر که قاپوندا تاپوبلار دل آگاه
همان کسلره یاخشی سعادت وروب الله
گدا اولسا بو درگه اونی ایلیاجاق شاه
قالوب هر ایکی دنیا اولار مفتخر ای اوخ

بو بیر لحظه ده اول حر اولوب طیب و طاهر
ایکی رنگی بیر اولدی اونون باطن و ظاهر
تاپوب تخت زبرجد حبیب ابن مظاهر
آدین هر کیم اشیتسه اولار غبطه ور ای اوخ

"امینی" قلم الده یازار غصه لی دیوان
آدیم گلسه دلینده ایدر شیون و افغان
یقین ایلسین اوندان سلام آلّام اوزاقدان
نقدر آغلیوب اولقدر النده گولر ای اوخ

• یکشنبه
• 24
• مرداد
• 1400
• ساعت
• 10:46
• نوشته شده توسط
• یوسف اکبری