اشعار حضرت علی اصغر علیه السلام

آنام اوغلی الین اوسته او جیرانی دولاندیرما
الونده اوخلانان لب تشنه قربانی دولاندیرما

اگر چه سینون اوسته اوخلانبدور صود امر اوغلون
ایدبدور هم سنی هم اوز آناسین دیده تر اوغلون
اولوبدور قهرمان دینه وروب یاخشی ثمر اوغلون
بیچیلمیش گل بوغازیندن آخور قانی دولاندیرما

خزان گورموش گلستان دا بالان سولموش گله بنزور
بیچوب اوخ خنجرین گورّم سینان بیر سنبله بنزور
نه سنبل قوی دیوم قارداش قنادسیز بلبله بنزور
آخور قانی چخور جانی او بی جانی دولاندیرما

رضا اولما رباب اللر اورکده آغلاسین قارداش
یانخلی دللریلن اوخشیوب دل داغلاسین قارداش
گتور مرهم قویوب پیکان یاراسین باغلاسین قارداش
اونین واردور نه داروسی نه درمانی دولاندیرما

چاتوب باشه حقیلن عهد و پیمانون قبول اولسون
سنون الله یولوندا تحفه ن احسانون قبول اولسون
خصوصا آلتی آیلیق تشنه قربانون قبول اولسون
چخوب قانلی منادن قانلی میدانی دولاندیرما

اوزون یالقوز اوغولسوز لیک دشمن حدیدن چوخدور
یامان گوندور یامان دم بیر نفر یار و معین یوخدور
بیله معلوم اولور قارداش سنی دلدن سالان اوخ دور
شل اولسون ال که پرتاب ایتدی پیکانی دولاندیرما

اگر فتوا بویورسان من جهاده اولسام آماده
ال آچسام قویمورام دیّار لشگردن بو صحراده
منم بیر شیر زن سنده حسین بیر مرد آزاده
اوزون گوندر جهاده دخت زهرانی دولاندیرما

ابوالفضلیم کیمی منده اله حق پرچمین آلّام
دلیمده ذکر یا الله جهانه ولوله سالام
قاچار لشگر قباقیمدن بو میداندا اوزوم قالام
سینار کفرین قواسی رکنی ارکانی دولاندیرما

ازل گوندن باجون زینب حقه وابسته دور قارداش
ملول اولما بو دعوا دین و قرآن اوسته دور قارداش
قوجاقینده دولاندیرما او طفلک خسته دور قارداش
گُلون خندان اولوب غملی گلستانی دولاندیرما

گوزل کهلیک قالانماز دائماً پوزقون یواسینده
گجه گوندوز گزر بیر امن مأوانین هواسینده
"امینی"ثبت ایدوب بو جمله نی بحر البکاسینده
برات کربلا ور عمر اولور فانی دولاندیرما

• جمعه
• 22
• مرداد
• 1400
• ساعت
• 14:07
• نوشته شده توسط
• یوسف اکبری

سپاهِ غم گینه دل مُلكنه ایدوبدی هجوم
گلوبدی نالیه اعضا ، سیزیلدار عَظم و لُحوم

عظم : استخوان ، لحوم : جمع گوشت

گلور قولاقیمه بیر سس که ای علی اصغر
بو قدر آغلاما آغلار گوزون فداسی اولوم

ایدوم نه چاره بالا منده سن کیمی سوسوزام
نه واردی سینه ده صود نه سوا واریمدی یولوم

بو ماجرا که دل عالَمی کباب ایلر
يازوبدی بعضی کتابینده راویانِ علوم

بالا بو حالیده امّا آتاسی میداندا
دیردی لشکره هل من معين او دل مغموم

سسین آلان کیمی گهواره دن آتوب اوزینی
گوروب بو حالی گلوب داده زینب و كلثوم

نه حاله قالدی خانیملار نه عالَم اولدی خیام
او عالَم اولدی دلِ قلبِ عالمه معلوم

قایتدی خیمیه سسلندی گَل باجی زینب
گتور منه ویر علی اصغریمی بیرده گوروم

گتوردی عمّه بالانی آتاسینا ویردی
آلوب ال اوسته او قنداقی سیّدِ مظلوم

گوروبکه سوز ِعطش غنچه لبلرین قورودوب
عطشدن آز قالوری جان ویره اولور مفهوم

هوسلنوب قوریان لبلرینی بیر ئوپسون
بنا روایته اولدی بو فيضدن محروم

يتشمه موشدی دوداقی دوداقینه بالانون
يتشدی حلقنه تیرِ سه شعبه و مسموم

بو بیر خبردی ، ولی اکثرِ رواتِ خبر
کتابِ غمده ایدوب بو غمی بیله مرقوم

گتوردی اصغری صفلر برابرینده دوروب
آلوب اله او صف انبیالره مخدوم

بویوردی سیز دیوسوز بیز پیمبر امّتیوخ
اولوبسوز هرملل ایچره بو اسمیله موسوم

وصیِ ختمِ رسل جانشین ِشیرِ خدا
بو گون منم ير اوزینده بیر امردور محتوم

بتولِ اطهره مَهریّه دور بو شطّ فرات
من ِغریبه آنا ارثیدور بنا به رسوم

روادی اصغریمون لبلرین عطش قورودا
سو تاپمیوم بالاما چشم ِحسرتیله باخوم

گورون نئجه اليم اوسته سولوب خزان گلی تک
بهارِ عمرينه گویا اسوبدی بادِ سموم

بونون بو حالینه هر ملّت اولسا رحم ایلر
گر اهلِ گبر و فرنگ و گر اهلِ دیلم و روم

سیزون مراموزیله من گناه کارم اگر
صغیر اوشاخ که گناه ایلمز اولور معصوم

قوناق آدیله گتوردوز منی بو صحرایه
سو ویرمه ماق قوناقا هانسی دینده وار مرسوم

گَلون آچون یولومی ال چکوم جلالیمدن
گیدوم فرنگه ، یزیدین اولا بو مرز و بو ، بوم

یزیده بیعت ایدون سیز ، گرک جهاندا اولا
یزید تک بیر امامه سیزون کیمی مأموم

یانیقلی دل دئدی از بسکه دللری آلدى
قتالینه يغشان دشمنی اولوب مهموم

گوروب که همهمه وار لشکر ائیچره غوغادور
باخوب بیر حرمليه ابن سعدِ ناکسِ شوم

دئدی اماندی دایانما حسینی ساکت ایله
هدردی زحمتمیز شورش اولماسا مختوم

حیاسیز حرمله سعد اوغلینون بولوب قصدين
گوروب اطاعتِ فرمانی لازم و ملزوم

آلوبدی وعدهٔ انعامی شادکام اولدی
او حكمه بولدی اوزین بیر امیدیله محکوم

دیزین ووروب يره بیر تیر ایتدی وصلِ کمان
ترحّم ایتموب او آثار ِرحمدن معدوم

او اوخ نجه اوخیدی بولمورم یازیلّا ولی
بیچلدی خنجر ِتیزیله گوئیا حلقوم

قایتدی خیمیه آخموش ستاره الده او ماه
عزا بساطی قوروب آسمانِ غمده نجوم

بیوردی گَل باجی آل اصغریمی راحت اولوب
اگر چه حلقینه پیوند اولوب اوخیله قولوم

نه تک آناسی ، نه تک عمّه سی ، نه تک باجیسی
قاریشدی بیر بیره اهلحرم پوزولدی عُموم

باخوب آناسی دئدی جان اوغول آنان ئولسون
نه گونده من سفر ایتدیم بیله اولوب میشوم

غریب آتان باخوری شرم اولور منه مانع
ولیک باشه ووروب زلفیمی سزادی یولوم

دئدیم که( شأنی) بو طفل ِصغیره چوخ آغلا
دئدی ئولنجه یازوب حالین ایلرم منظوم

دئدیم که کیمدی ایدن درسِ نظموی تکمیل
دئدی که ظاهر ِصورتده (ذهنی) مرحوم

• یکشنبه
• 7
• شهریور
• 1400
• ساعت
• 13:58
• نوشته شده توسط
• یوسف اکبری

قالاندا ماه رجبدن ایگرمی گون کامل
جهانی ایتدی منور بو مهرین انواری

ربابدن متولد اولوب علی اصغر
مزین ایتدی بو گل غنچه سی او گلزاری

امامه ویردیله مژده آقا بیر اوغلون اولوب
وار آق جمالی، قرا زلفی، بخت بیداری

گلوب امام آناسیندان آلوب یوزیندن اپوب
اذان اقامه بویوردی او عشق سالاری

گوروب او اختر عشقین جمالی جلوه لنور
عذارینه داغیلوب طره سمن باری

باخوب او دیده حق بینیله گورردی امام
ایدر حکایت آینده چشم سحاری

ویروب آناسینا امر ایتدی آل آپار ساخلا
صغیر اولسادا معناده چوخدی مقداری

مواظب اول سارالوب سولماسین بو غنچه تر
سودونده اولماسا، قویما سوسوز قالا باری

هله سو ویر که عطش ایتمه سون کباب اورگین
گتورمه سین غضبه حالی حی غفاری

یرینی راحت ایله، اولماسین بالام بدخواب
اماندی قویما فراموش اولا بو هشیاری

آج اولسا آغلاسا قلبون خبر ویرر ناچار
قویوب طبیعت انساندا حق بو معیاری

تزلزل عرشه سالار ناله سی صغیر اوشاقین
سیزیلدیسی گتورر قهره حی قهاری

تلاش ایله یری گهواره سینده راحت اولا
اوشاقدی گورمیه دنیاده رنج و آزاری

محالدور یازا ایثارینی بو غنچه گلون
اگر قلم هامی دنیانین اولسا اشجاری

بهشتده بیزه بیر بزم اولوبدی آماده
بو شمع جمعیدی، روشن ایدن او درباری

قاباقدا وار بیزه بیر امتحان، بو شاخه گل
خزان اولار، آچیلار گونده عشق بازاری

آنام یانندا سنی روسفید ایدر بو بالام
بویوک بهایه آلار حق بو در شهواری

باشندا طره مشگینی وار که اولماز عوض
هامی جهانه اگر قیمت اولسا بیر تاری

صغیر سنیله اصغر جهاد اکبر ایدر
سالار تحیره اهل جهانی ایثاری

صراحتاً سنه آینده سین اگر دیمورم
رعایت ایلورم امر خدای ستاری

گلر او مرحله سنده گلوب اوزون گوره سن
قوم اوستونه داغیلوب ثابتیله سیاری

گیدنده شامه یولون قتلگاهدن دوشسه
فدالری گوره سن قانلاری اولوب جاری

جنازه لر توکولوب کربلا اولوبدی منا
بونون جنازه سین آختارماق اولما واداری

بونون یاتان یری عرش خدادن افضلدور
یارالی سینم اولار بو گل چمن زاری

حجاز قافله سی بیر گون اربعینه گلیر
او توزلی قبرلرین جابر اولسا زواری

گلنده کوفه دن اعجازیله بالام سجاد
مزاره تاپشوراجاق بیر بیر اهل پیکاری

منیله اصغری بیر قبریده زیارت ایله
ایاق طرفده شبیه رسول مختاری

رباب آگه اولوب سرنوشت اصغردن
بولوب ، تلاشینه معطوف ایدوبدی انظاری

آلوب گتوردی خانم گاهواریه سالدی
باساردی باغرینا جان تک او ماه رخساری

او دسته گلی، گل تک اوپردی ایگلردی
او رمز نقطه عشقین اولوبدی پرگاری

گیدوب گلوب دولانوب باشینه، دیردی اوغول
آنان فدا سنه ای نخل عشقیمون باری

سن آغلاما منه گلسون بلاسی گوزلریون
یانور گوگل گورور اول دیده گهرباری

فدا اولوم سنه ای شاهزاده ایله کرم
اماندی سالدی ایاقدان منی بو بیماری

آتاندان ایسته اودا ایسته سون خدای جلیل
نجات امنه چکه بلکه بو گرفتاری

جسارت ایلمه (خوندل) امام ساحتینه
اگر او ایستسه حقدن، قبول اولار آری

• یکشنبه
• 7
• شهریور
• 1400
• ساعت
• 23:48
• نوشته شده توسط
• یوسف اکبری

ساقیِ میخانهء بزمِ الست
ایسته دی ایتسون هامی مخموری مست

باغلادی پیمان آچا میخانه نی
باده دن سرشار ایده پیمانه نی

سسلدی یانقین قلندلر هانی؟
بادیه عطشان دلاورلر هانی؟

سالدی شورش عالمه بو اَلصَّلا
عالم اولدی عرصه گاهِ ابتلا

الصّلا صوتون کیم ایتدی استماع
ایلدی بابِ بلاده اجتماع

وقت او وقت اولدی بلا جوش ایلسون
اولیا جامِ بلا نوش ایلسون

فتحِ باب اولدی بلا میخانه سی
دوشدی دوره ، ابتلا پیمانه سی

ساقیِ بزمِ محبت بیر به بیر
ایتدی عشّاقی کمندیده اسیر

جمله سین مست ایلدی بیر جامدن
کیمسه نومید اولمادی انعامدن

لطفنی مشمولِ اصحاب ایلدی
بیر به بیر اول جمعی سیراب ایلدی

بیر نفسده مِی پرست اولدی هامی
بادهء عشقیله مست اولدی هامی

ساقیِ بزمِ وفا سالدی نظر
گوردی اصحابِ محبّت سر به سر

غرق اولوبلار جمله ، قان دریاسینه
باش قویوبلار کربلا صحراسینه

سرگران ، مِی دن دوشوب فرزانه لر
شعلهء شمعه یانان پروانه لر

گوردی ساقی وار قالان اول جمعدن
چون اوزاق پروانه دوشمز شمعدن

سسلدی وار جمعدن عطشان قالان
آخرین پیمانه نی مندن آلان

کیمدی قویسون مردِ مردانه قدم
عرصهء عشقه ، قدین ایتسون عَلم

کیم قالیر بو مجمعِ هوشیاردن
ایچمه میش بو ساغرِ سرشاردن

باده کوپ لَرده تلاطمدن داشور
سانکی دریا موج ایدور باشدان آشور

دوردن مِی دوشممیش تعجیل ایده
رندلیق نقصانینی تکمیل ایده

باده قینردن دوشرکن صاف اولوب
جامه توکجاق ، عین و شین و قاف اولوب

بو مِی ین اود دور ازل کیفیّتی
ایچمسین یوخ بیر کیمین ظرفیّتی

بیر ایچیم هر کیم بو صهبادن ایچوب
اولین پیمانه ده باشدان گچوب

ایندی بو میخانه ، بو ساغر ، بو مِی
ایتموشم شرطین سیزه اولده طی

کیمدی بسم الله بو مِی بو میکده
طاقتی گر وار چکسون عربده

اوز حضورین فورا" اعلام ایلسون
ساغر الده عزمِ پیمان ایلسون

باشلیوب دریای وحدت جزر و مد
نقش اولوب دللرده ذکرِ یا احد

هر کسه وار باده اوز اندازه سی
محو اولار بیر نشعه ده خمیازه سی

ناگهان اول جمعِ آتش پاره دن
آتدی بیر مخمور اوزون گهواره دن

سوزِ صهبا اود سالوبدور جانینه
شعله دور باخسان لبِ عطشانینه

سلب ایدوب آرامینی رنجِ خمار
اشتیاقِ باده ایلوب بی قرار

طلعتِ ساقی آلوب آرامینی
تلخ کام ایلوبدی هجران کامینی

عاشقِ اکبردی ، اصغر آدی وار
اکبره بنزر چوخ استعدادی وار

صورتِ ظاهرده بیر طفلِ صغیر
عالمِ معناده بیر فرزانه پیر

غنچیه بنزر سولان گل صورتی
صورتیندن بللدیر کیفیّتی

ظاهرا" گر طفل دور بو قرصِ ماه
پایهء شوکتده اما خضرِ راه

رشتهء قنداقه سی حَبلُ المَتین
حاملِ گهواره سی روح الامین

یاندیروب قلبین یاخوب گر چه فرات
فیضینه عطشاندی اما کاینات

بو تمنّاده ایدور معراجِ عشق
باشینه قویسون مکلّل تاجِ عشق

میلی وار آیریلماسون احبابدن
بهره مند اولسون شرابِ نابدن

ایستوری هر جام اولا رندانیله
اعتلاف ایلور سیه مستانیله

ایستوری سبقت آلا عُشّاقدن
نوش ایده مِی ساغرِ اشراقدن

عشق ایدوب ، هم ساغرِ عبّاس اولا
رنگده هم رنگِ خیرالنّاس اولا

ای عجب آز سنّیله بو محتشم
ایستور اولسون اکبریله هم قدم

ایلور اظهارِ ارادت ساقیه
محرم ایتسون سِرّ جامِ باقیه

ساقیِ عشقین اله دامانینی
سالدی تا ایتسون رضا جانانینی

آغلادی ایتدی او قدری التماس
آچدی آخر یوللاری سلطانِ ناس

محرمِ اسرارِ اشراق ایلدی
پایه ده هم شأنِ عُشّاق ایلدی

مست اولوب دوشدی او دم میخانیه
ملحق اولدی مجمعِ رندانیه

سینهء ساقی اولوب میخانه سی
قان شراب ، اوچ شعبه اوخ پیمانه سی

باده دن بیر جرعه تا نوش ایلیوب
ماسواللهی فراموش ایلیوب

ساقیِ بزمِ بلادن پیشواز
ایلدی لبخندیله اول یکّه تاز

سینهء ساقیده تئز یومدی گوزون
وحدتین دریاسینه ووردی اوزون

اوز اوزون دنیاده جاوید ایلدی
درگهین درگاهِ امید ایلدی

عالمه کشف ایتدی رازِ مطلبین
آلدی تا باب الحوائج منصبین

اوجونا دولدوردی قانین شاهِ دین
سپدی تا زینت تاپا عرشِ برین

عفو قیل عرض ایتدی یا الله سن
بنده وین اَسرارینه آگاهسن

باشه ویردیم ایتدیقیم پیمانیمی
عفو قیل یا رب اوزون نقصانینی

عهدیمه گوستردیم استعدادیمی
بذل قیلدیم عشقیوه هر زادیمی

عاشقِ (شبخیز) ساماندان گچر
عشقده سامان ندی جاندان گچر

• یکشنبه
• 7
• شهریور
• 1400
• ساعت
• 23:54
• نوشته شده توسط
• یوسف اکبری

گل پونه ها......

ای غنچه ی باغ امامت

اولدوم بوگون سندن خجالت

(ای لب عطشان اصغریم یات)

نوش ایلدون جام شهادت

اوزدی باشون پیکان ظلمت

(ای لب عطشان اصغریم یات)

اولدون شکار قوم ظالم ,
مه جبینیم مه جبینیم
اوچ پر اوخی آغوشه آلدون ,واریقینیم واریقینیم

سالدون منی دام بلایه

یوخ بیر کسیم گلسین هرآیه

(ای لب عطشان اصغریم یات)

غوغا دوشوبدی کربلایه

ظلم ائتدیلر آل عبایه

(ای لب عطشان اصغریم یات)

اللهه وئردیم خون پاکین ,
هدیه اصغر ,هدیه اصغر
آغلاتدون افلاکی بولحظه ,
ای دلاور ای دلاور

گریاندی مخیمده بناتیم

یوخدی منیم راه نجاتیم

(ای لب عطشان اصغریم یات)

سن سن منیم آب حیاتیم

سن سیزچوخلالدی مشکلاتیم

(ای لب عطشان اصغریم یات)

قنداقین اولدی بستر خون
,ای نگاریم ,ای نگاریم
گول تک الیمین اوسته سولدون
,نو بهاریم ,نو بهاریم

عباسیمی اولدوردی دشمن

بو رزمگهده بی کسم من

(ای لب عطشان اصغریم یات)

اکبر گئدنده سولدی گلشن

عباسیم اولدی یاندی خرمن

(ای لب عطشان اصغریم یات)

ایندی یوزوم گلمور باخام دای
,من ربابه ,من ربابه

یوخدی جوابیم تا وئرم اول
,دل کبابه ,دل کبابه

• شنبه
• 17
• تیر
• 1402
• ساعت
• 18:35
• نوشته شده توسط
• یوسف اکبری

آسمان عشقیده ای ماه تابان اصغریم
ای اولان بونهضته عشقیله قربان اصغریم

اوچ پری آغوشه آلدون تا تاپا عزت بویول
قدسیان باخدی سنه مبهوت و حیران اصغریم

مرحبا باشدا اولان ایمانیوه ای مه لقا
آلتی آیدا ایلدون امضای پیمان اصغریم

ورمیسن درس شجاعت خلقته گهوارده
خالقون تحسین ایدر بو عشقی هر آن اصغریم

یازدیلار چوخ نامه لر تاشاه اولام بوملته
ویردیلار خنجر من مهمانه دالدان اصغریم

چوخ نصیحت ایلدیم بیر کس منه یار اولمادی
شکی یوخ فرمان ویریر بو قومه شیطان اصغریم

گوردولر تا غیرت عباسیمی بو کوفیان
اولدولار روبه کیمین میداندا پنهان اصغریم

• شنبه
• 17
• تیر
• 1402
• ساعت
• 20:16
• نوشته شده توسط
• یوسف اکبری

دورما ای ساقیّ مَلک رُخسار
دور گُتور دوره ساغرِ سَرشار

وِئر منه اوُل مِیّ مُحبّت دَن
پاک اوُلا بو گُوگُلدَہ کی زَنگار

بادهء اَرغوانی وِئر ساقی
تا چَکُوم باشه مندَه عاشق وار

منی تأخیره وورما اِئتمه دِرنگ
طوطیِ طَبع چون آچوب گُفتار

اِیلیوم بَزمِ غیرتِ رِضوان
بیر حَدیث اِیلیوم بو دَم اِظهار

گُوش اِئدون بو حَدیثه سَرتاسَر
ای مُحبّان حیدرِ کرّار

بیر گُونی اوُل دو گُوشوارهء عَرش
گِئتدیلَر مَکتبه به عِزّ و وِقار

شاهِ لَب تَشنیه اِمامِ حَسن
دِیدی ای پاک ذات و خوش کِردار

گَل یازاق خَط بیر من و بیر سَن
گُستراق ای شَفیعِ روز شُمار

گُورَک هانسین دَیرلَه بِهتَر دور
اوُلدی راضی حُسینِ نیک شُعار

یازدیلار خَطّ، شُوقیله او زَمان
اوُل اِیکی بَرگُزیدهء غفّار

گَتدیلر خَطی خُوشدل و خَندان
وِئردیلر باخُسون اَحمدِ مُختار

دِئدیلَر باخ بو خَطّه یا جَدّا
بیزی سَن اِنتظاردَن قُورتار

وِئر جَواب هانسی یاخشیدور بُولارون
دِئدی شُوریله سیّدِ اَبرار

آپارون شاهِ لافتی یانینا
سیزه تا حَل اوُلا بو مُشکلِ کار

گَلدیلر خَدمتینَه اوُل شاهین
دِئدیلر ای امامِ خُورد و کُبار

یازمیشوق خَطّ بیز سَن اِیله نَظر
دِئگیلَن هانسی یاخشیدور سَردار

خَطلَره آلدى باخدی شاهِ نَجَف
دِئدی اوُل عَبدِ خالقِ جَبار

سیز بو خَطّی وِئرون بَتولَه نشان
او دِئسون هانسی یاخشیدور بُونلار

گلدیلر اوُردان اوُل شَبیر و شَبَر
فاطمه خُدمتینَه با دلِ زار

دِئدیلَر قالمیوبدی بیزده قَرار
داخی ای بانوی خُجستَه شُعار

سَن بو خَطّه نَظاره اِیله گَیلَن
بِئلَه فَرمایش اِئتدی بابِ کُبار

دِئگیلَن هر بیریندَه وار نُقصان
اِیلیک تا سَنه بو جانی نِثار

آلدی زَهرا باخوب بُویُوردی اوُغول
قُوی اِئدیم من بُو مَطلبی اِظهار

واردی بُوینیمدا بیرجَه گَردنبَند
دوزیلوب اوُتدا لؤلؤ شَهوار

سَپرم اِیندی من او دُرّلری
یِر یُوزینَه چو ثابِت و سَیار

هر کیم آرتُوق گُوتورسَه اوُنلارون
اوُنون آرتوقدی خَطّی بی گُفتار

اوُلدیلَر راضی سَپدی دُرّلَری
یِره اوُل زُوجِ حیدرِ کرّار

درّدَن هر بیری اوُچین گُوتُوروب
شُوق و ذُوقیلَه اوُل اِیکی سَردار

یِردَه قالدی بیری او دُرّلَرین
بُویُوروب اوُندا قادرِ غَفّار

اوُزیوی تِئز یِتُور اَیا جِبریل
حَسنین اوُلماسُونلا زار و نَزار

آرادان بؤل او دُرّی شَهپریلَن
اوُلاری اِیله شاد و بَرخُوردار

عَرشیدَن فَرشهِ گَلدی رُوح اَلامین
بُولدی اوُل دُرّی مِثلِ دانهء تار

هر بیری گُوتدی نِصفین اوُل دُرّین
اوُلدیلار غُصّه دَن او دَمدَه کنار

شیعه لَر یاندی بُو دِلِ زَاریم
اوُلمادی راضی قادرِ غَفّار

که حسین و حسن اوُلا غَمگین
توکه لَر گُوزیاشی چُو اَبرِ بَهار

یادیمَه دوشدی روزِ عاشُورا
شاهِ لَب تَشنه لَشگرِ کُفّار

قیردیلار بیر به بیر کُومک لَرینی
گِئتدى اَلدَن مَهاجِر و اَنصار

قاسمُون طُوى لباسی اوُلدی کَفن
سالدی باشه قَرا عَروسِ فِکار

شِبه پِیغمبری نَه ذلّتیلَن
یِتوروب قَتله فُرقهء اَشرار

گِئتدی عَبّاس آلا سَکینیه سُو
سالدیلار قُوللاّرینی اَهلِ نَقار

قدِ رَعناسی خاکی لَه یِکسان
اوُلدی دوشدی حُسیندَن او کَنار

تَشنَه لقدان علیّ اَصغر اوُ گُون
ضَعف اِئدوب خیمه دَه او گُل رُخسار

گَتدی مِیدانَه اَصغری شَهِ دین
دِیدی ای کُوفیانِ کینه شُعار

بیر اِیچیم سُو وِئرون بو اَصغره سیز
چوخ سُوسُوز دور بو غنچهء بی خار

حَرمَله سالدى عالَمَه غُوغا
گُتوروب بیر خَدنگِ آتَش بار

اَصغرون حَلقینی نِشانه اِئدوب
مُصطفادَن او دُون اِئتمدی عار

قُورتولوب اوُخ کمانِ حَرمَلَه دَن
اِیلیوب ناله مِثلِ مُوصی غار

تا یِتُوب دَگدی حَلقِ اَصغردَن
اِئتدى اوُل طفلی خَواب دَن بیدار

گُوز آچوب باخدی چون حُسینَه طرف
بیر تَبسّم اِئدوب او طِفلِ نَزار

دِئدی گُویا شَهِ شَهیدانَه
یاخشی سیراب اوُلدی اَصغرِ زار

بُوغازین دان چَکُوب اوُخی او زَمان
اَصغرین اوُل حسینِ بی غَم خوار

اوُجُوینا دوتدی قانین اَصغرینُون
گُوگه سَپدی به دیدهء خُون بار

عَرض اِئدوب ساخلا سَن بُو قانی خدا
اِیستَرم من بُو قانی روزِ شُمار

گرک اوُل قانیلَه شَفاعَت اِئدیم
اُمّتِ عاصیّانه یُومِ قَرار

ای خداوندِ قادرِ سُبحان
به حقِ آه و نالهء بیمار

نه قَدَر واردی مادِحِ مُولا
عَفو قیل سَن به حقَّ هَشت و چهار

جُملَه مَطلب لَرین رَوا اِیلَه
بِیلَه کیم اَگلشوب دِیلر حُُضّار

سیّما #دلریش گُنهکارون
نَخلِ امّیدین اِیلَمَه بی بار

خَتم اِئدون جُمله فاتحه بُو زَمان
بِنَبیّ و آله الأطهار

• شنبه
• 14
• مرداد
• 1402
• ساعت
• 22:57
• نوشته شده توسط
• یوسف اکبری

کُوفه دَن فَرمان یِتیشدی اِبنِ سَعدِ بی حَیایَه
باغلاسُون راهِ فَراتی اَهلِ بِیتِ مُصطفایَه

اِیلدی اِبنِ زیادین حُکمینی سَعد اوُغلی اِجرا
قوهء مُجریَه دورت مین اوُخ آتان قیلدی مُهیا
باغلانُوب راهِ شَریعه، قالدی عَطشان آلِ طاها
العطَش فَریادی یِردَن اُوج اِیدوب عَرشِ خدایَه

اِیلدی اَهلِ حَرمدَه تَشنه لَیق بیر نُوعی شِدّت
گُل کیمی سُولدی سارالدی عِترتِ خَتمِ رِسالت
اوُلدی بَرپا خیمه لَردَه شُورشِ روزِ قیامَت
دوندی دَشتِ کربلا بیر عَرصهء روزِ جَزایَه

اَللّریندَه بُوش سُو جامی یغدیلار خُوردا اوُشاقالار
شدّتِ سُوزِ عَطشدَن خُشک اوُلان غُنچَه دُوداقلار
آلدیلار یکسَر سَکینه دوره سین تَشنَه قُوناقلار
داغلی دِللّردَن اوُجالدی ناله لَر طاقِ سَمایَه

خیمهء عَبّاسه بیردَن قُویدولار یُوز دیدَه گِریان
دورِ سَقای حُسینی آلدی بیر دَستَه لَب عَطشان
عَرض اِیدوب اوّل سَکینه العطَش، یاندیم عَمُو جان
سُو تَدارک قیل سُوسُوزدان قُویما چوخ گَلسُون نَوایَه

اِیلیوب سَقا سَنی چون اَهلِ بِیتَه شاهِ عَطشان
خیمه لَردَه سُو تاپُولمُور، اوُلدی باغریم قان سُوسُوزدان
چارَه قیل، یاندیم، اَماندور اِیله سَن بو دردَه دَرمان
قالمیوب دِلدَه قَرار و طاقَتیم بُو ماجَرایَه

اوُد دوتوب یاندی سُوسُوزدان عِترتِ ساقیّ کُوثَر
ضعف اِیدوب بی کس آناسی اَللّری اوُستوندَه اَصغر
شُورِ مَحشر دور خیمدَه بیر بیره دَگمیش حَرملَر
قُولارون قُربانی اوُلام رَحم قیل آلِ عَبایَه

نه رَوا آبِ فَراتی چُوللَره دَریا تَک آخسُون
یاندیروب سُوزِ عَطشدَن عِترتِ طاهانی یاخسُون
اَللّریندَه بُوش سُو جامی تَشنه لَر حَسرتلَه باخسُون
سَن نِجَه راضی اوُلورسان بُو جَفای نارَوایَه

تیترُوری قَلبِ سپاهِ شام و کُوفه صُولتوندَن
نه رَوا دور اِستفادَه اِیتمیاخ بیز قُدرتُوندَن
تَشنَه لَب قالسُون اوُشاقلار چُوخ اُوزاقدی هُمّتوندَن
قُدرَت الله اوُغُلوسان سَن، آفتابِ حَقَه سایَه

اِیلدی ظُلمُندَه بَس که اَشقیا طُغیان بُو چُولدَه
اَکبریم اُلدی لَب عَطشان قانیلَه غَلطان بُو چُولدَه
اُولما راضی اَصغریمدَه جان وِیره عَطشان بُو چُولدَه
اُود سالا بی کس آناسی سُوزِ دِلدَن ماسَوایَه

قُوی فَرات اوُسته قَدَم، سال لَشکری خُوف و هَراسه
اِیلَه بیر اِتمامِ حُجّت فُرقهء حقّ ناشناسَه
تَشنه لَب قیزلار یانینجا گَلمیشَم مَن اِلتماسَه
سَعی قیل تَحصیلِ آبَه رَحم اِیلَه بُو بی نَوایَه

بی سَبَب آخماز #صحافون عارِضَه اَشگِ زُلالی
وار عَمو قَلبیندَه گِیزلین مُحنَت و دَرد و مَلالی
دَردینَه قِیل چارَه سَندَه اوُلسُون آسُودَه خیالی
اِیتمَسُون غَمدَن شکایَت بارگاهِ کِبریایَه

• شنبه
• 14
• مرداد
• 1402
• ساعت
• 23:00
• نوشته شده توسط
• یوسف اکبری

شِمر بُو گُون کَربَلایَه اَلدَه بیر عُنوان گتُوردی
باغلیا راهِ فَراتی کُوفه دَن فَرمان گتُوردی

تا گَلوب اُول بی مُروّت وارد اُولدی کَربلایَه
باغلادی سُو یُوللارینی اَهلِبِیتِ مُصطفایَه
چیخدی بُو گُوندَن صَدای العطَش اُوجِ سَمایه
بُو مُصیبَت اَهلِبِیتَه دَردِ بی پایان گتُوردی

فاطمه مَهریَه سیندَن اُولدی چون مَحروم عَیالی
گُون بَه گُون سُولدی سُوسُوزدان باغِ پِیغمبَر نَهالی
گُوردی مَیرابِ مُصیبَت چون بُو حالِ پُر مَلالی
رَحم اِیدوب باغِ وَفایَه سُو یِرینَه قان گتُوردی

ای خدا آبِ فَراتی کاش اُولیدی قان او گُوندَه
سُو دِیوب آلِ پِیمبَر قالدیلار نالان او گُوندَه
قُویمادی لَب تَشنه قالسُون اَصغرِ عَطشان او گُوندَه
بیر گُوارا سُو او طفلَه بیر سُولی پِیکان گتُوردی

اِئتدیلَر بیر نُوعیلَن تَنگ عَرصَه نی سُلطانِ دینَه
اُوج قیلدی آه و ناله خِیمَه دَن عَرشِ بَرینَه
باشینَه یغدی او گُوندَه خُردا قیزلاری سَکینه
خیمهء عَبّاسه بیر جُرعه سُویا مِهمان گتُوردی

باخدی عَرض اِئتدی عَمُو جان سَندَن ئوزگه یُوخ گُمانیم
شِدّتِ سُوزِ عَطشدَن قالمیُوب تاب و تَوانیم
اوُد دُوتوب یاندی آلیشدی قَلبِ زاریم جِسم و جانیم
جانیمَه بُو گُون سُوسُوزلُوق آتَشِ سُوزان گتُوردی

اِیلیُوب سَقا سَنی چون بیزلَرَه سُلطانِ بَطحا
نه رَوا یانسُون سُوسُوزلوق آتَشیلَه آلِ طاها
نه رَوا کَسسُون فَراتین یُوللّارین بُو قُومِ اَعدا
بو قُوری سُو مَشگین عُنوان اَلدَه بُو نالان گتُوردی

بیر کَسَه یُوخ دور اُمیدیم اِی اُمیدِ آلِ حِیدَر
اَلدَه سُو جامی دُولاندیم خِیمه و خَرگاهی یکسَر
تاپمادیم بیر شَربَه سُوی من یاندیم اُولدوم چوخ مُکَدّر
بیر سَنه آخر گُمان بُو خانه سی وِیران گتُوردی

نه رَوا آبی فَراتین اِی عَمُو هَر یانَه آخسُون
تَشنَه لوق اَطفالی اَمّا یاندیروب بَو نُوعی یاخسُون
بُوش سُو جامینَه اُوشاقلار آغلاسُون حَسرتلَه باخسُون
تَشنَه لیق اَطفالَه یکسَر دیدهء گِریان گتُوردی

هر قَدَر آخر #شهابا اَلدَه واردی وَقت و فُرصَت
نُوحه یاز بُو اَهلِ بِیتَه صِدق اُوزیلَه اِیلَه خِدمَت
آغلا، یان بَزمِ عَزادَه قُوی سَنه روزِ قیامَت
حَضرتِ زَهرا بُویُورسُون خِدمَتِ شایان گَتوردی

• شنبه
• 14
• مرداد
• 1402
• ساعت
• 23:02
• نوشته شده توسط
• یوسف اکبری

من اَصغرَم شُهدا جَرگه سیندَه مُمتازَم
شَهیدِ کُوی حَقَم، شیر خوارِه سَربازَم

بُو رَسمدور عُلمالَر مَنَه تَوَسُل اِیدر
مُهم اَمرلَره کَاشفَم سَبَب سازَم

بَنی اُمّیَه نی مَحو اِیلَدی مَنیم قانیم
صَغیر سنیلَه باشدان اَیاقَه اِعجازَم

بُو فَرقی واردی مَنیلَه عَمُوم اَبُوالفَضلین
او شاهبازیدی من شاه اَلیندَه کی بازَم

عَبَث دَگُل اوُزومی گاهوارَه دَن آتدیم
شَهیدِ شاهِدَه من جان نِثارِ جانبازَم

بابام آپاردی مَنی اللّر اوُسته مِیدانَه
تَمام کائن و ماکاندا شُهرهء نازَم

قَلَم دایاندی دایان #رهنما تَمام اِیلَه
زبانحالیدی یاز شیر خوارَه سَربازَم

• شنبه
• 14
• مرداد
• 1402
• ساعت
• 23:13
• نوشته شده توسط
• یوسف اکبری

الهی شیر خواره می قویوب مزاره آغلارام
الیمده قوش تک اوخلانان گوزل شکاره آغلارام

سو تاپمادی قالوب سوسوز سارالدی غنچه لر کیمی
دوداقی اولدی خشک اولان چمنده برگ تر کیمی
سولوب سارالدی صورتی ستاره سحر کیمی
سحر ستاره سی سوزوب باتان مداره آغلارام

مزارون اوسته آغلیوب بونی چوخ اینجدنمرم
ترابه اصغری قویوب دوشوب یولا گئدنمرم
ئوزون عنایت ایتمه سون بو طفلی دفن ایدنمرم
آناسین آگه ایلیوب گلوب دوباره آغلارام

نمازه باشلادی غرض او سرور جهانیان
گوزونده اشگ حسرتی النده قان یوزونده قان
نمازی قورتاروب دیدی اَیا خدای لامکان
سنون رضایتوندی چون بو جان نثاره آغلارام

سنوندی داغلانان اورک دولوبدی سوز و سازیلن
شکسته دل ال آچمیشام حضوریوه نیازیلن
تحمل ایت منه عطا بو قیلدیقیم نمازیلن
که طاق اولوبدی طاقتیم چکوب شراره آغلارام

حسین نه کاره دور خدا صدف سنون گهر سنون
شکسته دل سنون کیدور بو اوتلانان جگر سنون
سوسوز قالانلاریم سنون بو اوخلی صودامر سنون
قنادی قانلی بلبله ایدوب نظاره آغلارام

بلا اوخی بوغازینه ایله اوتوردی بلمدیم
قانا بلشدی قوش کیمی یوزین گوزونده سلمدیم
گر ایستسون ننه م کیمی علامتینده گزلدیم
که اللی ایلدی روز و شب ایتن مزاره آغلارام

کوسوبدی گاهواره نون اوزی داشین آتوبدی بو
بشیکدن اینجیوب گلوب مزاریده یاتوبدی بو
ستاره سحر کیمی چیخوبدی تیز باتوبدی بو
باتان ستاره اوستونه توکوب ستاره آغلارام

• چهارشنبه
• 18
• مرداد
• 1402
• ساعت
• 00:50
• نوشته شده توسط
• یوسف اکبری

اصغر ای بخت ایویمده ستاره

بسدی چوخ سینمه ورما یاره

گوز یاشون گل کیمی صورتونده

بنزیور شبنم نو بهاره

آغلاما گیتدی الدن قراریم

سویگولوم دلبریم شیرخواریم

نی لر ایلر نوا آیرلیقدان

غم دوتار ماسوا آیرلیقدان

بلبلوم صد چمن یاسه باتسا

باغدا قالماز صفا آیرلیقدان

آغلاما گیتدی الدن قراریم

سویگولوم دلبریم شیرخواریم

اوچی الده کمان سان ویرندن

تیرینه الده جولان ویرندن

آی دیر نوحه اولدوزلار آغلار

اوخ دیوب آهولار جان ویرندن

آغلاما گیتدی الدن قراریم

سویگولوم دلبریم شیرخواریم

سیر ایدر باغ گلشنده عاشق

دام غمده دوشر بنده عاشق

تاب الر درده دلبر یولوندا

سنده عاشق علی منده عاشق

آغلاما گیتدی الدن قراریم

سویگولوم دلبریم شیرخواریم

ای گل عشق نو رسته لای لای

تشنه لب بلبل خسته لای لای

چرپنوب مندن آرامی آلما

گل سالوم سینمون اوسته لای لای

آغلاما گیتدی الدن قراریم

سویگولوم دلبریم شیرخواریم

• چهارشنبه
• 18
• مرداد
• 1402
• ساعت
• 23:49
• نوشته شده توسط
• یوسف اکبری

قوربان سنه عشاق جهان یا علی اصغر
عاشقدی سنه پیروجوان یا علی اصغر
سسلر سنی مهدی شه دوران علی اصغر
دلبند حسین بن علی جان علی اصغر

علی لای لای علی لای لای
بالام لای لای بهاریم سن
سنون نالون قیامتدی
گولوم لای لای شعاریم سن

من علی اصغرم شهبازیم من
فاطمه اوغلینون هم رازیم من
شه دیدی جان بالا- من دیدیم جان بابا
کربلا شاهینون سربازیم من

علی اصغر.....
.................................
بند دوم

عشقیله حسین بن علی اوپدی بالاسین
نازیله چکوب اصغرینین نازو اداسین
باش باشینه قویدی یوزینه چکدی عباسین
گورسددی علی اصغرینه کرب وبلاسین

تو با صبرت نشون دادی
مث اکبر جنم داری
تو گهواره رجز خوندی
با سن کم علمداری

من علی اصغرم عینُ الحیاتم
من امام اوغلیم نور صلاتم
هر چتین درد وار منده حوائج
شیر خوارم ولی باب نجاتم

علی اصغر.......

• چهارشنبه
• 29
• شهریور
• 1402
• ساعت
• 13:59
• نوشته شده توسط
• یوسف اکبری