اشعار ترکی امام حسین (ع)

شور عشق تو ، به دلم افتاد
به خیال من ،یه حرم افتاد

چی میشه،رَهام بُکن از این عذاب
ذکرم گشته کربلا ، بده جواب
بعضی شبها میبینم ، من توی خواب
لالایی میگم برا طفل رباب

سلام ارباب
دوباره دل هوایی شد

سلام ارباب
دلم باز ، کربلایی شد
حسین جانم ۲

سلام ارباب
ببین تو شور و شِینم رو

سلام ارباب
بِنِویس اربعینم رو
حسین جانم۲

لَبَیکَ یا حسین لَبَیکَ یا حسین ۲

نه اولور مولا ، باخ بو مدهوشه
گویلومه دوشدی، گینه ششگوشه

قبریوین دیولّه چوخ صفاسی وار
گنبد آتدا فاطمه نواسی وار
خیمه گاهین آیری بیر هواسی وار
صودامر آناسینین صداسی وار

سلام ارباب
منه غملر اولوب دمساز

سلام ارباب
برات کربلامی یاز
حسین جانم۲

سلام ارباب
گدای بیکسم مولا

سلام ارباب
قاپوندان سائلی قووما
حسین جانم۲

لَبَیکَ یا حسین لَبَیکَ یا حسین ۲

سالوری آدون ، قلبیمه غوغا
یادیمه دوشدی ،یوم عاشورا

ایندی ده، یارالیدی گول پیکرون
قانه بویانوب، هامی کمک لرون
یاتوبدی ، ایاق طرفده اکبرون
سینه ن اوسته خواب ایدوبدی اصغرون

سلام ارباب
سلام ای جان ویرن عطشان

سلام ارباب
داغیلمیش جسمیوه قربان
حسین جانم۲

سلام ارباب
سنه هم یار و انصاره

سلام ارباب
سنه هم تشنه سرداره
حسین جانم۲

لَبَیکَ یا حسین لَبَیکَ یا حسین ۲

• شنبه
• 30
• اسفند
• 1399
• ساعت
• 09:26
• نوشته شده توسط
• یوسف اکبری

ای
زینبه جان/قانه غلطان
قوملار اوسته یاتوب سان یارالی
جسمی عریان

قانیوی توکوبله کینه دن
غارت اولدی کوینگون ندن

حیف اولا /گلشنه/ باد جور و ظلم اسوب
وای منه/ کیم حسین/اللرون بیله کسوب

یا حسین یاحسین جان یارالی قارداشیم

دور
گویلومی آلدی /یاتدی اقبال
مسافردی باجون شهر شامه
دور یولاسال

بو دیاری ترک ایدنمورم
سن سیز هیچ یره گیدنمورم

سن اوزون زینبین ال اورکده کی غمین
سویله عبّاس آچا باشیم اوسته پرچمین

دور
من غریبم/غم نصیبم
دوتوب اطرافی دشمن حسین جان
بی حبیبم

باغلیوبله قول قولا بیزی
دور ایاقه سال یولا بیزی

ظلموله گوندوزی ایتدیلر منه گجه
شامه سنسیز حسین شمریلن گیدوم نجه

ای سر شکسته /نیزه اوسته
باشون گویده حسین جسم پاکون
قوملار اوسته

الده قمچی شمر نابکار
آغلینده قیزلاری وورار

بیر دویون جا سنه آغلینمدیم حسین
نعشون اوسته جگر داغلینمدیم حسین

• شنبه
• 30
• اسفند
• 1399
• ساعت
• 09:38
• نوشته شده توسط
• یوسف اکبری

حسین جان، یوخومدی
حَشریمه اَلیمده بیر توشه

کَرَم قیل، گَدایم
لُطفیله باخ بو سیَه پوشه

ئولمه میش، بیر یولدا
یاز بیرده براتِ شش گوشه

دَردین مَحبوبه دیَر، اَحباب
هجروندن اولوبدی دیل، بیتاب
اِثبات اولدی عالَمه، بو سوز
مولا یوخدی سَن کیمی، اَرباب

صَرصَرِ غَم و بَلا، اَسدی
صَبرین رشته سین ایله، کَسدی
عالَم دولسا درد و رَنجیله
عشقون یا حسین منه ، بَسدی

گول آدون، اولوب اَزبَریم
ای منیم تاجِ سَریم

یا حسین، بوبَسیمدی کی
سَنسَن منیم رَهبَریم

یاحسین یاحسین
یاحسین جانم مولا

تاپیلماز، نَظیرون
ای تاجِ سَرِ بنی آدَم

اَمانِ، جَهاندی
اولسا هَر یرده قره پَرچَم

خداوند، آدوندان
خسته دیللره سالار مَرهَم

مولا مصباحِ هُدی' سَنسَن
دریای جود و سَخا سَنسَن
دیلده دَردیمه دوا اِیْله
دردِ عالَمه دوا سَنسَن

دوزدی چوخ خطا اولوب مَندن
مولاجان خَجالَتم سَندن
نیلوم دویمورام آدوندان من
سایه ن باشیمه دوشَن گوندَن

گول آدون، اولوب اَزبَریم
ای منیم تاجِ سَریم

یا حسین، بوبَسیمدی کی
سَنسَن منیم رَهبَریم

یاحسین یاحسین
یاحسین جانم مولا

عشقوندی، عالَمده
غَملَردن ایدوب منی آزاد

غَم گونی، سَسله دیم
مولا ایتموسن منه امداد

ایندی من، عشقیله
سَسلَرم آقا ایوین آباد

ای جانِ جَهانیان مولا
یوخدی دَهریده سنه هَمتا
شاهد سن من دیل آچان گوندن
اورگَشمیشم آدیوی آقا

سَنسَن دردِ عالَمه حاذِق
دَییَرَم سیزه اگر لایق
عالَم اَهلی قُوی بونی بولسون
شاهه نوکری اولوب عاشق

گول آدون، اولوب اَزبَریم
ای منیم تاجِ سَریم

یا حسین، بوبَسیمدی کی
سَنسَن منیم رَهبَریم

یاحسین یاحسین
یاحسین جانم مولا

• یکشنبه
• 1
• فروردین
• 1400
• ساعت
• 15:56
• نوشته شده توسط
• یوسف اکبری

وقاریمیز گلدی
قراریمیز گلدی
گوزوز آیدین شیعه لر
کی یاریمیز گلدی

حسین حسین مولا

حبیب یزداندی
صاحب احساندی
کیمون نه دردی وار گلسون
کی درده درماندی

حسین حسین مولا

شافع عقبادی
بو سبط طاهادی
جهانون اهلی بولسونلر
عالمه مولادی

حسین حسین مولا

حُسنی دل آرادی
جمالی زیبادی
فقط بو شانینده بسدی
زاده ی زهرادی

حسین حسین مولا

(بیکَس) و بیمارم
غمه گرفتارم
نولور کی بیرده من گورم
قبریوه زوّارم

حسین حسین مولا

• یکشنبه
• 1
• فروردین
• 1400
• ساعت
• 19:01
• نوشته شده توسط
• یوسف اکبری

ایتدی تَجلی نور خدا
عالمه ویردی آیری صفا

فاطمه بیر گول گتیریبدی بو جهانه
یثربی دوندردی بو گول باغ جنانه

شاهِ دوسَرادی/چون خونِ خدادی
بو گُلِ زیبانون حسیندی گوزل آدی

(بو گُلِ زیبانون حسیندی گوزل آدی)۲

عالمی حیران ایلیه جاخ
عشقیده طوفان ایلیه جاخ

کیمسه نظیرین تاپا بولمز بو جهاندا
جوشه گَلر قان، گوزل آدین چاغیراندا

ای کعبه ی ایمان/ای شاهِ شهیدان
عالم و آدم سنه قربان سنه قربان۲

گلدی جهانه خونِ خدا
عالمه سالدی شور و نوا

عشقی سالار قلبیلره شورش و غوغا
کرب و بلا نهضتینی ایلَسَه بر پا

خورشیدِ وِلادی چون فخر منادی

قبله ی عشّاق جهان کرب و بلادی۲

عشق سِپِهرین اَنجُمی دی
آل عبانین پنجمی دی

نوری تجلّا ایلدی چون رُخ مهتاب
گلدی جهانه اولا عاشقلره ارباب

عشق اهلی گداسی/جانلاردی فداسی
زاده ی زهرادی آقالارین آقاسی۲

ایتدی خجالت گویده آیی
جود و سخاده یوخدی تایی

سسله سن آدین غم و دردین گیده جاقدی
تذکره وی زینبی امضا ایده جاقدی

عشقی منه بَسدی/سینَمده نَفسدی
(بیکَسه)امّا ایکی دنیا آقا کَسدی۲

• یکشنبه
• 1
• فروردین
• 1400
• ساعت
• 19:15
• نوشته شده توسط
• یوسف اکبری

دیللرده وار شور و شعف
بابا اولوبدی بوگجه شاه نجف

قلبیم ای خدا ، اولدی بو گجه عشقه هدف عشقه هدف

به به گلوب دیلداریمیز
دنیایه قویدی مقدمین اربابمیز

گلدی تا اولا ، هرایکی جهان سالاریمیز سالاریمیز

یثرب اولدی چون باغ جنان
خدا ایدوب لطفون عیان
سفینه ی نجاتدی فقط بو شاه انس و جان

آقای من مولای من ای دین و ای دنیای من
آقای من مولای من ای شافع عقبای من
آقای من

ای محترم کان کرم
دائم گوزل آدیوی من هی سسلرم

قسمت اولموری ، چوخدان ای آقا بین الحرم بین الحرم

قلبیمده وار درد و محن
آدون گلنده اشک آخوری بو دیده دن

سندن اوزگه سی ، یوخ جهانیده دردیمی بولن دردیمی بولن

وار دیلیمده چوخ شور و نوا
اورک تاپوب آیری صفا
اوزون بیزه یاز نه اولار
زیارت کرب و بلا

ای با وفا کان سخا
بو دیلده کی دردیمیزه ایله دوا

سن دعا ایله ، صاحب الزمان تزگله آقا تزگله آقا

بو هیجریدن اشکیم آخار
تیر بلانی فرقتی قلبه تاخار

منتظر گوزوم ، دائماً آقا یولارا باخار یولارا با خار

سن بیزه بو گون ایله عطا
ویر عیدیانه ای خدا
یوسف زهرانی یتور
حسینوین قانین آلا

• یکشنبه
• 1
• فروردین
• 1400
• ساعت
• 19:22
• نوشته شده توسط
• یوسف اکبری

ویرسه رُخصت منه گر خالق نوراُلثَقَلین
سالارام قلبیلره، شعله چَکَن شوریله شِین
عالمی مست ایلیوب فاطمیه نور دوعین
یعنی شاهنشهِ عالَم، منیم اربابیم حسین(ع)

حسین شمس هدادی، حسین خون خدادی
حسین عزّت شیعه، شهِ کرب و بلادی

حسین دینه فدادی، امامِ دو سَرادی
حسین مُنجیِ دینِ، خداوندِ عَلادی

حسین درده دوادی، آدی خاکِ شِفادی
حسین قلبه جَلادی، حسین روحه صفادی

حسین محورِ خلقت، شهِ ارض و سَمادی
حسینین قاپیسیندا، جهان اهلی گدادی

حسین حسین مولا مولانا حسین

حسین کان کَرَم دی، حسین شاهِ اُمَم دی
حسین زینتِ باغ و، گلِستانِ اِرَم دی

نَقَدری اولا توصیف، مقاماتینا کَم دی
هامی اهل سماوات، بو اربابه خَدَم دی

حسین میرِ حَرَم دی، آدی مایه ی غَم دی
گَلَنده گوزل آدی، هامی دیده ده نَم دی

قَسَم اولسون او طفله، کی پیکان دَمین اَمدی
بو جَمعین آقا دردی، فقط بین الحَرَم دی

حسین حسین مولا مولانا حسین

حسین نور حقیقت، حسین مایه ی عزّت
حسین کَشتیِ دین و، نجاتِ بَشَریّت

حسین کان کرامت، بیزی ایتدی هدایت
حسین عادتی احسان، حسین معدن رحمت

حسین راه سعادت، حسین مَلجا اُمّت
ایدوب شورِ حسینی، یر اوستونده قیامت

نولور ایتسه عنایت، شهِ مُلکِ ولایت
غلامین ایده بیرده، او ششگوشیه دعوت

حسین حسین مولا مولانا حسین

حسین شاه شهیدان، حسین ناطق قرآن
هامی دردِ جهانه، حسینین آدی درمان

حسین حُجّت یزدان، اولوم آدینا قربان
حسین آدینی سسلر، دامارلاردا گَزَن قان

حسین مُرشدِ عرفان، حسین معنی ایمان
پیَمبَرلر اولوبدی، اونا طفل دبستان

اولوب عشق حسینه، خلایق هامی حیران
ایکی نهر آراسیندا، حسین تشنه ویروب جان

حسین حسین مولا مولانا حسین

بیزه عشق ولا ویر، اوزون قلبه جَلا ویر
اورکلرده کی درده، کَرَم ایله شِفا ویر

صفا سَنده دی مولا، عطا سَنده دی مولا
هامی دردِ جهانه، دوا سنده دی مولا

گَدایِ درِ شاهم، اوزوم غرق گناهم
سیزه نوکر اولاندان، آقا صاحبِ جاهَم

نِی عشقه نَوا ویر، سینیق قلبه صفا ویر
آقا (بیکَسه) لطف ایت، گینه کرب و بلا ویر

حسین حسین مولا مولانا حسین

• یکشنبه
• 1
• فروردین
• 1400
• ساعت
• 19:31
• نوشته شده توسط
• یوسف اکبری

شرف ارض خدا،روح مبرّا دی حسین
زینت مطلقه ی شانه ی طاهادی حسین
اقدسیّت سنَدی، ذات تولّادی حسین
مخرن الآیه دی آئینه ی قرآندی حسین
شاهکاری اثر خالق سبحاندی حسین

ماه شعبانین اوچو حق،سوزون اظهار ائلدی
یوسفی بیرده وئروب گرمیِ بازار ائلدی
انبیا و ملک و حوری خریدار ائلدی
تزه دن وئردی نمایش نَفَس توحیدی
کلّ انواری ییغیب خلق ائلدی خورشیدی

گوز آچیب گوزلرینه،گون ئوزی پیرایه گلوب
گویون اولدوزلاری گهوارسینه دایه گلوب
رُخ زیباسینه یوسف ده تماشایه گلوب
گون دئدی گوزلرینی ئوپمه قه منّت چکورم
آی دئدی چیخماقیما من که خجالت چکورم

صورت فاطمه یه گول کیمی لبخند اوتوروب
مرتضانین دهنین ده ائله بیل قند اوتوروب
احمدین سینه سینه غیبیله بیر پند اوتوروب
گوزون آیدین اولا جبریل دئدی نور دو عین
بو گوزل غنجه نی اوپ حنجرینی،سسله حسین

اهل عرشون بو جگر گوشه کسوب چاره سینی
صف چکوب گورسده تا فاطمه مهپاره سینی
تلسور حور و ملک ،ترپده گهواره سینی
دئدیلر قونداقینی عرشه گئتور یا الله
یا که اذن وئر علی بِیتین ائده خ منزلگاه

گلجگین قونداقی عرش اهلی تاپیبدور هیجان
دوزولوب دورینه جنّت ده کی پاکیزه زنان
دیوب احسن نه گوزللیک یارادیبسان یارادان
حیف دور شاخه جسمی قالا جنّت دن اوزاق
اذن وئر جمله گه بو گول بالیا دایه دوراق

فاطمه گلدی گوروب یوخدی بشیک ده بالاسی
تاب ائدنمز دئدی یا رب بو فراقه آناسی
مطلبی درک ائلیوب گلدی صدایه آتاسی
عرض ائدیب اولما ملول احمدین ای جانانی
اللهیم عرشه حسینی آپاریب مهمانی

سنی سلطان ائلین قدرته قربانم حسین
روز میلاد دی و منده خرامانم حسین
ولی عفو ائتسون اگر ایندی رثاخوانم حسین
گر بولود یاغماسا،گلزار ائوی آباد اولماز
گوزیاشی توکمه سه شاعر،ئورکی شاد اولماز

او حسینی که اونون سینۀ زهرادی یئری
او حسینی که اونون عرش معلّادی یئری
اوحسینی که اونون شانۀ طاهادی یئری
گور قویوب کوفه لی لر جسمینی نه احواله
عرش مهمانینی ظلمیله سالیب گوداله

بو همان شه دی که مات ائتیمیشیدی حورانی
ایستی قوملار بورویوب ایندی همان مولانی
بو حسین دور که هواداریدی هر بیر یانی
ولی گور ایندی نه بی کس ییخیلوب صحراده
ظلمیله دوغرانان اعضاسی ایتوب بلواده

• دوشنبه
• 2
• فروردین
• 1400
• ساعت
• 23:08
• نوشته شده توسط
• یوسف اکبری

دنیاده اوچ دلاور - زینب،حسین،ابالفضل
عشاقه اولدی سرور - زینب،حسین،ابالفضل
شیران نسل حیدر - زینب،حسین،ابالفضل
فخریله شیعه سسلر - زینب،حسین،ابالفضل

خاتونیمیزدی زینب،دنیایه نور عین دی
سالاریمیز دی عباس،ارباب عالمین دی
کل جهانیانه،رهبر فقط حسیندی
دیللرده اولموش ازبر - زینب،حسین،ابالفضل

اخذ مدال ائدوبلر - حیدر حکومتیندن
درس شرف آلوبلار - دریای صولتیندن
تیترر عدو اساسی - سیمای غیرتیندن
چون مرتضایه بنزر - زینب،حسین،ابالفضل

مردان کوی عشقون - فرهنگیدور ابالفضل
زینبدی نای غیرت - آهنگیدور ابالفضل
اردوگه حسینون - سرهنگیدور ابالفضل
پرچم ده یازدی لشکر - زینب،حسین،ابالفضل

بیز شیعه ی علییوک - پای وئرمروخ عنوده
بیز ساتماروخ حسینی - مشرک لره،یهوده
بیز عرصه ی جهادی - قان ایلروخ سعوده
استادیمیزدی یکسر - زینب،حسین،ابالفضل

بیز نام کربلانی - قازدیرمیشوخ بدنده
اوج حقه یئتیرروخ - مولا آدی گلنده
غیرتلی شیعه حتی - سسلر دیر ئولنده
تنها بولاردی رهبر - زینب،حسین،ابالفضل

• دوشنبه
• 2
• فروردین
• 1400
• ساعت
• 23:58
• نوشته شده توسط
• یوسف اکبری

ییخیلوب قتلگاهه - سویولان جسم و جانیم
بو اوتوز مین نفردن - ائـشیــدن یوخ فغانیم

بو صولان گول ستاندا _ گل و خاره نسیبم
منـــــی درک ایله یا رب _ یارالیـــــام ، غریبم

بو باتان حنجریم ده - سسیم آوایه گلمور
سوکولن بو بــدن ده - یارالار سایه گلمور
نه وورانلار چکیر ال - نه منی ئولـدوروللر
بو ئورک سیز جماعت - بیری یـارایه گلمور

نَفَسیم حبس اولوبدی - بو سینان پیکر ایچره
قوجا بیر عاشقم که - بوغولور قان تــر ایچره
که یـــداللهَ حتی - بو قوشون رحمی یوخدی
کسیلنــدن ایتوبـــــدی - بو اَلیم اَللـــــر ایچره

منتظر دورموش اَلده - اوخ آتانلار دا صف ده
نچه مین زهریلی اوخ - هامیسی بیر هـدف ده
بو گؤزوم یــول تاپانمیر - باخـا بیر خیمه گاهه
باشیم اوستونده نیزه - دوزولوب هر طرف ده

بو جراحـاتِ سنگین - باشیـــــمی باش ائدوبدی
سینه مین سرّ عشقین - دگن اوخ فاش ائدوبدی
منی بـــــو تئزلیقیجه - ییخـــا بیلمزدی اعـــــدا
منه هـــــر نـــه ائدوبدی _ غمِ قارداش ائدوبدی

بو چمن زار عشقین - سارالان یاسی گئتدی
اورگیندن ربابین - داخی رؤیــــاسی گئتدی
علـــــی اکبـــــر عباده - ســـــرِ قاسـم آراده
آرالــــی قیزلاریمنان - اودور عباسی گئتدی

• سه شنبه
• 3
• فروردین
• 1400
• ساعت
• 14:09
• نوشته شده توسط
• یوسف اکبری

ای شاه عالمین،وئر بین الحرمین،احسان ائت یا حسین، ماه امت
اذن وئرن یکصدا،سسلنخ کربلا،ایستروخ ای خدا،ایله قسمت

قلبیمی زائر،ائت ایله کرم
استشمام ایلییم،بوی حرم
ابالفضله دیم،سوزلریمی
هر دردیمه دوا، قانلی علم

چیخماز یاددان چون عاشورا - پاینده دی کرببلا
صلّ اللهُ علــــی الحُسین - یبن الزهرا یبن الزهرا

لبیک یاحسین،لبیک یا حسین،لبیک،یا حسین
یـا ثـــــــــارالله

قاره می باغلارام،سینه می داغلارام،سیزلارام آغلارام،هر محرّم
هیئت لر سربه سر،قلبه ایلر اثر،گویده پرچم اَسر،ماه ماتم

گوردوقجه پرچمی،گؤزلر آغلار
پرچم ده نقش اولان،سوزلر آغلار
معناده فاطمه، اوز بالاسین
قانلی پیراهنین ،گؤزلر آغلار

چیخماز یاددان چون عاشورا - پاینده دی کرببلا
صلّ اللهُ علــــی الحُسین - یبن الزهرا یبن الزهرا

لبیک یاحسین،لبیک یاحسین،لبیک یاحسین
یــا ثــــــــــارالله

• سه شنبه
• 3
• فروردین
• 1400
• ساعت
• 14:20
• نوشته شده توسط
• یوسف اکبری

بیز حیدریوک٬ حیدری شخصیّتیمیز وار
مهدی کیمی عالمده٬ ولی نعمتیمیز وار

هراون ایکی آی٬ مست مِیِ نابِ حسینوک
بایرام گونوده باخسوز اگر هیئتیمیز وار

بو بزم عزادن بیزی هئچکس آیرانمز
هریاندا حسینچی آدینا شهرتیمیز وار

بَهبَه نه سعادتدی حسین نوکری اولماق
حتما آناسی فاطمه دن خلعتیمیز وار

واللّهی حسین مجلسی جنّتدی سراسر
هیئتده خیال ایلیَروک جنّتیمیز وار

ایراد ائلمه چوخ بیزه ای مدّعی لال اوُل
چون عشق حسینیله گوزل اُلفتیمیز وار

سعی ایله دولاشما بیزه٬ گِردابه دوشرسن
عبّاسِ علی تک٬ یَلِ پُر قدرتیمیز وار

ال چکمه میشوک٬ چکمروک اَل٬ عشق حسیندن
قاش گئت بابا بیز آذریوک غیرتیمیز وار

(فیضی) بئله یاز مدّعیلر تا باشا دوشسون
اولادِ علیدندی نَقَدْر عزّتیمیز وار

• پنج شنبه
• 5
• فروردین
• 1400
• ساعت
• 11:29
• نوشته شده توسط
• یوسف اکبری

شکر خدا رهبریمیزدور حسین
نوکریوک سروَریمیزدور حسین

عاشق دیوانه سیوک هامّومیز
شام و سَحر ازبریمیزدور حسین

سیم و زَرَه ایلَمَروک اعتنا
لَعل و دُر و گوهریمیزدور حسین

یوخدی بجز عشق حسین٬ عشقیمیز
اوّلیمیز٬ آخریمیزدور حسین

واهمه میز یوخدی بیزیم حشریدن
چونکه شَهِ محشریمیزدور حسین

• پنج شنبه
• 5
• فروردین
• 1400
• ساعت
• 11:31
• نوشته شده توسط
• یوسف اکبری

ای کفنسیز دفن اولا مولاسلام اولسون سنه
عرشیدن باش روحیدن اولاسلام اولسون سنه

ای قویان معراجیده٬ خرگاه عشقین پایه سین
قاشلارون شرح ائتمسیدی٬ قاب قوسین سایه سین
عالمه سالمازدی سبحان٬ عشق و عرفان آیه سین
فیض بخش اولمازدی او ادنا٬ سلام اولسون سنه

ای مکاندا لامکان تختینده شاهنشاه اولان
ملک اسمای الهیده مسمّا جاه اولان
لبلرینده قُم باذنی٬ قُم باذن اللّه اولان
مظهر و مـــــــرآت کرّمنا٬ سلام اولسون سنه

ای چوخور مقتلده یاحیّان و یامنّان دیَن
جدّی پیغمبر اوذکره٬ کلمه کلمه جان دیَن
کیم دیور اغراق ائدوبدور٬ سینووه قرآن دیَن؟
سن کلام اللّهیسن حقا سلام اولسون سنه

سن داشا امر ایلسیدون٬ داش اولاردی شهد ناب
ئوز دوداقون یاندی عطشان٬ داشه دونسون نهرِ آب
نهرِ آب اوستن اوجالمیش موجیلر ایلور خطاب
ای حسین ای تشنه لب دریا سلام اولسون سنه

بیر تهیدستم که شعر پُربها عرض ایلورم
تپراقام امّا سوزیمده٬ کیمیا عرض ایلورم
(شاهیَم)من(یحیوینن) همصدا عرض ایلورم
ای عزیز حضرت زهرا سلام اولسون سنه

• پنج شنبه
• 5
• فروردین
• 1400
• ساعت
• 12:17
• نوشته شده توسط
• یوسف اکبری

من حسینم کیم منه ساری گوتورسه بیر قدم
مین قدم گللم یقین امیدوار اولسون منه

پاک‌عزاداریم و یا زوّاریم ئولسه قورخماسون
قبرینون اوّل شبینده انتظار اولسون منه

باشیمی‌دفن ایتمه قوی چوللرده سرگردان گزوم
هر باخاندا باشیمه زینب خمار اولسون منه

فاطمه اوغلی مگر عیسادی دار اوستن قاچا
شامه‌جک هر گون گرک تکلیف دار اولسون منه

ویرمرم مین بیله دیره خیزرانون خیرینی
بوسه آلماقدا اودا معشوقه یار اولسون منه

مانعی‌یوخدی گوزومدن دیشلریمدن ئوپسه‌ده
مجلس شُربون گرک تالاری تار اولسون منه

گُل نثار ایللّه سلطانه گلی من نیلورم
طشتده ئوز لبلریم گوهر نثار اولسون منه

قانه باتمیش لبلریمله دمبدم یاهو دیوم
خالقیم‌‌باخسون ئوزی قیمت گذار اولسون منه

انتقامیم آلماقا مجلسده دیلّنسون باجیم
منطق برّانی مثل ذوالفقار اولسون منه

"انورم"بو نوحه‌نون نظمینده پرشور اولموشام
ارزشی وار دفتریمده شاهکار اولسون منه

• پنج شنبه
• 5
• فروردین
• 1400
• ساعت
• 15:53
• نوشته شده توسط
• یوسف اکبری

گوردی خنجرین برقین شمر الینده تا زینب
قتلگاهه تل اوستن قاچدی بی نوا زینب

قتلگاهیلن تلین مختصر آراسی وار
درک ایدن قولاقلاردا وا حسین صداسی وار
ایندیده او تلّ اوسته زینبون نواسی وار
مقتله دوشوب گویا حضرتون یاراسی وار
روبرو دوروب ایلر شمره التجا زینب

مرتضی قیزی آخر هرچه آه و داد ایتدی
رحمه گلمدی قاتل شدت عناد ایتدی
قتل شاه مظلومه سرعتین زیاد ایتدی
خامه ی شریحیلن حنجر اتحاد ایتدی
غشّ ائدوب یوزی اوسته دوشدی تپراقا زینب

چاره سیز قالوب دوتدی شمرون آستینیندن
آستینی سهو ائتدیم تیغ آهنینیندن
قینَدی آخان قانلار کربلا زمینیندن
قاتلمه یالوارما گلدی سس حسینیندن
کایناتی بالمرّه ایلرم فنا زینب

• پنج شنبه
• 5
• فروردین
• 1400
• ساعت
• 16:33
• نوشته شده توسط
• یوسف اکبری

تن یرده‌قالوب‌باش‌دئدی ای‌یار جداده
حیران ائلدی عالمی عیّار جداده

دل‌اهلی سَر نی‌ده گورونمزلری گوردی
فاش ائتدی مگو سرّینی ستاّر جداده

سسلندی سَرِ نیزه‌ده سلطان لِمَن المُلک؟
گور سندی گوزه قادر و قهّار جداده

طومار شهنشاهی هنگامهٔ حشری
امضا ائلدی مالک مختار جداده

عرش‌اهلی‌تماشایه‌چیخوب سویلدی بهبه
به به نه گوزل منظره لر وار جداده

عیسادی‌بو یانوحیدی؟ریحاندی‌بو یاروح؟
هرکیمدی ائدور معجزین اظهار جداده

تجویزیم اگر شرعیدن اولسیدی دییردیم
یا رب بو اوغولسوز سنه اوخشار جداده

ئوز قلبی سینان قزلارینا نوبه یتیشمور
از بس کی اُوپور حلقینی زوّار جداده

زینب‌دئیور ای شاه باجون‌حُسنوه قربان
حلقومون اولوب مطلع الانوار جداده

افسوس‌ولی شب‌پَره بیلمز ندی‌خورشید
فرصت ائلسه آلنووی داشلار جداده

انصافیدی‌گور‌قولّاری باغلی باخا باجی
قارداش باشینی اینجیده اشرار جداده

جان‌رشته‌می‌آل‌باغلا سَرنِیْده دوگون‌ویر
تا که بوغازون گورمیه آزار جداده

هرچند اَلیم‌چاتمور اُپم حلقوی بیر‌یول
روحیم دولانور باشوه صد بار جداده

سنده یره اَن یاد ایله من محتاجی قارداش
بیردم نه اولار یرده دولانسوق باجی قارداش

• پنج شنبه
• 5
• فروردین
• 1400
• ساعت
• 16:36
• نوشته شده توسط
• یوسف اکبری

ای عشق مناسینده ناحق توکولن قانی
زهرایه قسم وئرم دیندیر من نالانی

ای کشتی خوبانون طوفانه دوشن نوحی
گرداب بلیاتون غلطیده و مجروحی
عیسی کیمی آویزان داره سر مذبوحی
ای زینبون آرامی وی فاطمه نون روحی
آگاه ائله حالوندن من زار و پریشانی

تانور باجی قارداشین اولسا اوچ علامتدن
باشدان ایکی اللردن یا جسم سلامتدن
دولموش گورورم سینون بی حد جراحتدن
باش یوخ ایکی اللر یوخ یاندیم بو حکایتدن
یاندیم نقدر یانسام حقّیم وار حسین جانی

ظاهردی قیافوندن سن شاه شهیدان سان
شاهانه لباسون یوخ بس سن نئجه سلطان سان
باشونده گئدوب تاجون آیا نیه عریان سان
اوخلار سنه پیراهن مستغرق پیکان سان
هاردا گیینور شاهلار منسوجه ی پیکانی

سندن یارالی ایلور زهرا قیزی بیر خواهش
سسلن سسوه قربان قلبیم دوتا آرامش
آیا سن حسینیم سن آدون ائله فرمایش
زلفیمه سالوب سایه تاپ ایستی دن آسایش
یوخ زینبوون بوندان آرتوق زادا امکانی

اعجاز امامتدن بیر منظره گورسندی
ناگاه او باشسیز نعش بیر تتردی ترپندی
منحور بوغازیندن گلدی دیله سسلندی
یازینب اناالمظلوم ای فاطمه دلبندی
قارداشون حسینم من لب تشنه چیخان جانی

بالای سره کئچدی محزون دل و کج گردن
چاک ائتدی گریبانین تپراقه دوشوب بیردن
زلفینی خضاب ائتدی اول خون مطهردن
قویدی دوداقین اوپدی خنجر قویولان یئردن
سیراب ائدوب اشگیله اول حنجر عطشانی

• شنبه
• 7
• فروردین
• 1400
• ساعت
• 12:26
• نوشته شده توسط
• یوسف اکبری

آلنینون قانییلن قانه بویانمیشدی یوزی
اورگیندن چکه بیلموردی او پیکانی اوزی
نهر علقم طرفینده ایله قالمیشدی گوزی
وار دییَردی یری دل مجمر غمدن آلیشا
هانی غیرتلی ابالفضلیم الیمدن یاپیشا

آپارا کاش بیری قارداشیم عبّاسه خبر
دیه گل ائتدیله زهرا ایوینی زیر و زبر
ویردیلارقارداشوون قلبینه بیر تیرسه‌پر
گوزلیور لوح دیله نقش مُحَسَّن چکه سن
اورگیندن گلیب اوچ‌شعبه‌اوخی سن ‌چکه سن

سالدی بو غمده حسین عالمه محنت کوزونی
تیکدی چوخ حسرتیله نهر فراته گوزونی
گوئیا ائتدی بو نوعیله مخاطب اوزونی
گوزووی نهر فرات اوسته دولاندیرما حسین
چاغیریب دادووَه عبّاسی اوتاندیرما حسین

خرمن عمرینه ظلمیله عدو سالدی شرر
اولدی کاشانه امّیدی اونون زیر و زبر
بیر نفر السیز اگر اولسا الیندن نه گلر
کیم مگر سسلییر امدادینه امدادی یوخی
الی اولسیدی چکردی اوزی آلنیندان اوخی

• شنبه
• 7
• فروردین
• 1400
• ساعت
• 12:44
• نوشته شده توسط
• یوسف اکبری

ائللر گوزینه گر چه نظر کرده گدایم
مدّتدی ولی حسرت ایوان طلایم
گلسم او فراتون سویونا واردی گلایم
آخدون نه سببدن دیرم چوللره ای سو
ئوز قانینی ایچدیردون علی اصغره ای سو

ای کاش بو غفلت یوخوسیندن اویانیدیم
گوزیاشلی گلوب صحن حسینده دایانیدیم
پروانه کیمین شمع وصاله دولانیدیم
وصلت اودینا کاش یانیدیم آلشیدیم
خاکستر اولوب تپراقوویلان قاریشیدیم

چون (منزویم) عالمه بیگانه منم من
شمع شرفون باشینه پروانه منم من
لب تشنه حسین عشقنه دیوانه منم من
زاهد بوراخ ائتمه دل مجروحیمی محزون
انصاف ائله تکلیفیدن آزادیدی مجنون

• شنبه
• 7
• فروردین
• 1400
• ساعت
• 13:03
• نوشته شده توسط
• یوسف اکبری

طوفان ائله که قوپدی جهان باتدی سراپا
دنیا اولوب اوُل وقتیده بیر قورخولی دریا

نوحون گمیـسی موجیلر اوسته اوجالاندی
بیر مدّت او کشتی سویون اوستونده دولاندی

بیر یرده گلوب شدّتیله ایلدی لنگر
آز قالدی باتا خوفه دوشوب نوح‌ پیمبر

قالخیزدی اَلین ایستدی امداد خدادن
قورتار بیزی یا ربّی بو گرداب بلادن

جبریل امین نازل اولوب وئردی سلامی
‌‌پیغمبر محبوبه یتوردی بو پیامی

فکر ایلمه یا نوح بو گرداب بلادور
قانلار توکولن یردی بورا کربُبَلادور

گر ایستیوسن قورتاراسان آغلا حسینه
من نوحه دیوم سنده عزا ساخلا حسینه

نوح آغلادی رام ایلدی طوفان بلانی
طوفان بلا دوتدی بیابان بلانی

ای نوحی چکن ساحله طوفان آراسیندان
چک شاه شهیدانی قزل قان آراسیندان

گردابه دوشوب قورخولی میدان آراسیندا
آواره او دریای خروشان آراسیندا

اَمر اولدی حسینیم هامی دنیا سنون اولسون
دوقّوز فلک‌و جنّت‌ُالاَعلا سنون اولسون

کوثر سنون اولسون داخی طوبا سنون اولسون
منظومهٔ آفاق سراپا سنون اولسون

اَمر ایله قیریلسین هامی بو لشکر اشرار
اَمر ایله دیریلسین اوجا قامتلی علمدار

عرض ایلدی ربّی بو جوانلار سنه قربان
تپراقه آخان قرمزی قانلار سنه قربان

اخیامیده آواره قالانلار سنه قربان
عطشان بالالار قاره سالانلار سنه قربان

چوخ‌ راضیم اللّه بدنیم قانه بویانسین
قوی من یخیلوم پرچم اسلام اوجالانسون

کئچدیم اوجا قامتلی علمداریدن اللّه
کئچ سنده قیامتده عزاداریدن اللّه

• شنبه
• 7
• فروردین
• 1400
• ساعت
• 13:07
• نوشته شده توسط
• یوسف اکبری

عنایت ائله ای شاه کرم
آدیوی آقاجان سسلیرم
قیل اوزون اورک دردیمه دوا
باشیما دوشوبدی شوق حرم

یوخومدی دوزوم ،اورکده سوزوم(یا ابا عبدالله2بار)
قالوبدی فقط حرمده گوزوم (یا ابا عبدالله)
عنایت ائله دوباره آقا(یا ابا عبدالله)
اورکدن ائداخ حرمده نوا(یا ابا عبدالله)
مظلوم آقام.......

نه قالوب اورکده طاقت و تاب
قاپوندا منی قیل نوکر حساب
بو هیئتین اهلی یکسر آقا
اولونجه دیلر مدیون رباب

اولونجه آدون دیلیمده قالار(یا اباعبدالله)
فراق حرم بو جانی آلار(یا اباعبدالله)

دعاده الیم سن ایسته گلیم(یا ابا عبدالله)
همیشه دیر بو آدی دیلیم(یا اباعبدالله)
مظلوم آقام.....

• شنبه
• 7
• فروردین
• 1400
• ساعت
• 20:36
• نوشته شده توسط
• یوسف اکبری

گئجم گونوزوم،اورکده سوزوم ،اولوبدی حسین و کرب و بلا
اورک باشینا،یازوبدی خدا،گدادی هامی ،حسیندی آقا
گویلوم اسور آقاجان هر وقت اسوری علمون/من اولمسمده بولورم اولدورجاق داغ غمون
حقیریوم آقاجان،فقیریوم آقاجان،آدیوی سسلیرم،او دور اسیریوم آقاجان
آقام آقام آقام ای......

نه اون گون عزا،همیشه آقا،سنه ائدرم من شور و نوا
آقا کرم ائت،بو جمعه اوزون ،وئر تذکریه بیر کرب و بلا
اوزون الیمدن توت آقا،اولوم قاپوندا صبح و شام،ای اهل عالم ائشیدون آقام حسیندی والسلام
چاکریوم آقاجان،یاوریوم آقا جان،همیشه سسلیرم فقط،نوکریوم آقاجان
آقام آقام آقام ای......

دوشوبدی گینه آقا باشیما دوباره هوایه بین الحرم
هایاندا قرا، علم گوررم ،اورکدن همیشه عشق ائلرم
چاتمور الیم آقاجان اگر او عالی تربته
حرم یادیله گلرم اودور هر هفته هیئته
دیلده سوزوم آقاجان،سنه گوزوم آقاجان
فراقه مرقدیوه،نجه دوزوم آقاجان
آقام آقام آقام ای......

• شنبه
• 7
• فروردین
• 1400
• ساعت
• 20:38
• نوشته شده توسط
• یوسف اکبری

ماه شب تاریم حسین/دیلده کی اذکاریم حسین/دنیاو هم عقباده چون/عشقیمدی هم یاریم حسین
سن کی کرم دریاسی سان/دردیمیزون دواسی سان/بو کوری داعشیلر/آقالارین آقاسی سان
خاک در اکبریوم،نوکره کوی نوکریوم،هامی اورکدن دیجاق، یا ابن الحسن یاوریوم
العجل العجل یا ابن الحسن العجل....

شاه شهیداندی حسین/جانیله جاناندی حسین/نوکر کوی دریوخ/ بیزلره سلطاندی حسین
دل یاناجاق ماتمینه/اوت توتاجاق هر غمینه/هر شب جمعه گلرم/عشقیله زیر پرچمینه
قسمتیم ائله شاه زمن،کرب وبلا اون دشت محن،بو قاپودا نوکر اولوم،تا فرج یا ابن الحسن
العجل العجل یا ابن الحسن العجل....

• شنبه
• 7
• فروردین
• 1400
• ساعت
• 20:57
• نوشته شده توسط
• یوسف اکبری

یاحسین ای شه و مقتدا،وار گوزوم کرمونده آقا،وئر اوزون برات کربلا

بو جمعیله منه،هامی سینه زنه

چینمه آلارام بیرده من علمون( یاحسین 2 بار)/اربعینده اولام زائر حرمون( یاحسین2 بار)

دردیمه سن ائله دوا،نوکرم من سنده اقا،قسمتیم ایله کربلا

حسین آقام آقام......

ای شهنشه عالمین،بیزلره قیل کرم یاحسین،ایستروخ بین الحرمین

قالوب سنده گوزوم،یوخوم هجره دوزوم

قالوری قلبیمده حسرته حرمه( کربلا 2بار)/بیر گونی اولدورجاق منی بو غمه( کربلا 2 )

ایستمه بیزلری کناریوه،آلتی گوشه لی مزاریوه،قربانام او شیرخواریوه

حسین آقام آقام......

• شنبه
• 7
• فروردین
• 1400
• ساعت
• 21:08
• نوشته شده توسط
• یوسف اکبری

یا حسین آچ کرم قاپون - اللریوه سلام اولا

قانلی مناده دفن اولان پیکریوه سلام اولا

سن آقاسن گواهسن واردی سنه ارادتیم

بیر یوزی قاره نوکرم - سینده قالدی حسرتیم

قبریوی گورمدیم گنه - اولمادی چون سعادتیم

صحن و ضریح و گنبد - اطهریوه سلام اولا

ای گوزل آدی زینت عرش خدای ذوالکرم

حکّ اولونوبدی قلبیده - نقشه‌ی گنبد و حرم

قورخورام عمر قورتولا - قبریوی گورمیم ئولم

قبریده بی‌کفن یاتان - پیکریوه سلام اولا

باشدا منیم بیر عمرودی کرب‌و‌بلا هواسی وار

یوز او مزاره قویماقین - عالمی وار صفاسی وار

اکبر آناسینون یقین - ایندیده آه واسی وار

گول کیمی جسمی دوغرانان اکبریوه سلام اولا

کعبیه ناز ایده گرک - رتبده دشت کربلا

غبطه ایدر مقامینه - مشعر و مروه و صفا

سینه‌وین اوسته چون یاتوب - نازیله صود امن بالا

تشنه بوغازی اوخلانان اصغریوه سلام اولا

یاد ایدرم قلم قولی بیرده کی قانلی پرچمی

روحوم اوچوب گیدور گزور هر گیجه نهر علقمی

هاردا سو گورسم آغلارام - آغلادارام بو عالمی

قوللاری جسمیدن دوشن افسریوه سلام اولا

باده‌ی عشقی میل ایدوب حقّه بلی دینلره

عشق یولوندا شوقیله - خون‌جگر یینلره

رخت علایقین سویوب - بیرجه کفن گینلره

جام شهادتی ایچن لشگریوه سلام اولا

آندولا خردا قیزلارین عرشه چاتان نواسینه

آندولا جان اکبره - قلبیوین اوخ یاراسینه

آغلارام حشر اولونجا من - باشیوین ابتلاسینه

نازلی رقیّه تک سولان گوللریوه سلام اولا

"اکرمیم" سیخیلمیشام - درگهیوه بو نیّته

ساخلا قاپوندا سن منی - ایله قبول خدمته

دوشسه یولوم فراتیدن - چاتسا الیم او تربته

سسلرم اللّره دوشن - اللریوه سلام اولا

• دوشنبه
• 9
• فروردین
• 1400
• ساعت
• 11:42
• نوشته شده توسط
• یوسف اکبری

ای باشیمین شوری حسین

ای گوزومون نوری حسین

شیعه‌لرین سنسن آقا

دلده‌کی منظوری - حسین

باش آچوب افغان ایدرم - جان سنه قربان ایدرم

سنده‌دی هر درده دوا

سن آقاسان منده‌ - گدا

سائلی مایوس ایلمز

سن کیمی عالمده - آقا

باش آچوب افغان ایدرم - جان سنه قربان ایدرم

واردی سنه چوخلی سوزوم

یوخ داخی قلبیمده دوزوم

قویما قالا - حسرتیله

قبر شریفونده - گوزوم

باش آچوب افغان ایدرم - جان سنه قربان ایدرم

گل آقاجان قسمت ایله

گویلومی آل رافت ایله

بیر اربعین هیئتیله

قبریوه سن دعوت ایله

باش آچوب افغان ایدرم - جان سنه قربان ایدرم

اوردا گلاخ سینه ووراخ

جامه‌ی ماتم بوروناخ

بیز آقا نذر ایلمیشوخ

بین‌الحرمده سوروناخ

باش آچوب افغان ایدرم - جان سنه قربان ایدرم

دلده‌دی غم ناعره‌سی

باشدا محرّم قره‌سی

گورممیشم من نجه‌دی

قتلگهین پنجره‌سی

باش آچوب افغان ایدرم - جان سنه قربان ایدرم

اوردا گرک چوخ دایانام

نارِ مصیبتده یانام

سن ییخیلان یرده گرک

قانیمه منده بویانام

باش آچوب افغان ایدرم - جان سنه قربان ایدرم

یاد ایدرم غملریوی

گوردی باجون پیکریوی

اوخلاری سینوندن آتوب

ئوپدی کسیک حنجریوی

باش آچوب افغان ایدرم - جان سنه قربان ایدرم

باخدی دیدی جان یارالی

پیکری عریان یارالی

گل دیله دیندیر باجیوی

من سنه قربان یارالی

باش آچوب افغان ایدرم - جان سنه قربان ایدرم

"اکرمیم" وای دیرم

من آقام ایوای دیرم

دوشسه یولوم خیمه‌گهه

اصغره لایلای دیرم

باش آچوب افغان ایدرم - جان سنه قربان ایدرم

• دوشنبه
• 9
• فروردین
• 1400
• ساعت
• 11:52
• نوشته شده توسط
• یوسف اکبری

اولان عالم صفاسی

سنده دی دردیم دواسی

باشیمدا قبرون هواسی

اورکده یوخ طاقت

دلده وار غم نواسی

اورکده هجران یاراسی

قبریوین اوللام فداسی

گر ایله سن قسمت

باخما نالایقم - عشقیده صادقم

قاپیوا نوکرم - آدیوا عاشقم

آقام آقام حسین (ع)

ای اولان قان وضوسی

شیعه لرین آبروسی

مزاریوین آرزوسی

باشیمدا وار مولا

عشقون اولموش سرشتیم

خدا یازان سرنوشتیم

کرب و بلادور بهشتیم

سنه فدا - آقا

اول آخر کلام - نوکرم والسلام

او گوزل قبریوه - آقا اولسون سلام

یانمیشام نار غمده

داغ فراقون سینمده

او گنبد اوسته علمده

گوزوم قالوب مولا

گر یتیشسم مراده

بیر گونی کرب و بلاده

اکبره پایین پاده

سوزوم قالوب مولا

قاره وی باغلارام - سینمی داغلارام

اکبره یاس دوتوب - سس چکوب آغلارام

وار یری اشگ ماتم

عارضه توکسم دمادم

یاندی بو احواله عالم

شبیه - طاهانی

آلدی لشگر آرایه

باشی دوشوب چوخ بلایه

نعشینی ییغدون عبایه

یره آخوب قانی

همزبانیم علی - مهربانیم علی

نیه سس ویرموسن - نوجوانیم علی

اویان ای ماهپاره

قلبیمه سالما شراره

جسمون اولوب پاره پاره

جوان علی اکبر

سنسیز ای شبه طاها

خیمده محشردی برپا

شماتت ایلور بو اعدا

اویان علی اکبر

وای آنان لیلیه - گله جاخ نالیه

نجه نعشون اوغول - آپاروم خیمیه

• دوشنبه
• 9
• فروردین
• 1400
• ساعت
• 12:14
• نوشته شده توسط
• یوسف اکبری

زاهده دوشدی گوزوم یول گزور اسراره طرف
ترکِ مِحراب ایلیوبدور گیده خَمّاره طَرف

دیدیم ای اَهلِ مُناجات و دُعا زاهد پیر
آخرعُمرونده گیدورسن نیَه اغیاره طَرف

دیدی سَهو ایلمه ئیللَر بوئی طاعت ایلدیم
قُرب و قَدریله گیدَم درگه دلداره طرف

دلبرون ذکر و مناجاتیله دوگدوم قاپوسین
دلِ ظلمتده گزوردوم یُولی اَنواره طرف

دیدیلَر طاعت و زُهدیله آچلماز دَرِ یار
پَرِ پَروانیه باخ سَنده دولان ناره طرف

اولماسون مَستِ درِ عشق دُوشَنمَزسَن اُودا
عشق اوُدی چکدی خلیل اُللّهی گلزاره طرف

عشق بازیچه دَگُل گوهرِ جان آل ویریدی
عشقه جان بذل ایلین ، یُول تاپار اَسراره طرف

جان ساتوب اولدی حسین خالقینه مَحرَم راز
یول آچوب جَنّت اُلاَعلادن عَزاداره طرف

هانسی عاشقدی حسین تک ویره ئوز مامَلَکین
اَلده جان نقدی گیده خَنجَرِ خونباره طرف

هانسی سُودا ایلین اَلده قیزیل گُل گتوروب
حق دِیَن حَنجَره نی پارچالیان خاره طرف

• شنبه
• 14
• فروردین
• 1400
• ساعت
• 22:53
• نوشته شده توسط
• یوسف اکبری

ياحسين! درگاهيوه بو چؤلده مهمان گلميشم
گوردوگوم ايشدن پيشمانم پشيمان گلميشم

یول کسیب چوخ ظلم ائتديم اوّل آل هاشيمه
سپّوشم بو چؤل لرين تپراقینى من باشيمه
سن آنان زهرا جانى بير باخ منيم گوزياشيمه
گور نئجه خوار و ذليلم ديده گريان گلميشم

قوى اياقون تورپاقین من ايليوم كُحلِ بَصر
خاك پايوندن ئوپوم چوخ فخريلن من ديده ‏تر
وئرمه‏سون رخصت باشيمى قووزامام شام و سحر
بس كه چوخدور خجلتيم حالى پريشان گلميشم

آند ويرّم حضرت عباس تك قارداشيوه
غم يولوندا زينب كبرى كيمين يولداشيوه
وئر اجازه ياحسين! ايندى دولانيم باشيوه
شمع سن، پروانه تك يانماقه الآن گلميشم

اكبر و عباسى سن يولّادون استقباليمه
گر منى قووسون قاپوندان واى منيم احواليمه
اولين قربانون اولسام چاتمیشام آماليمه
دين و قرآنه بو گون اولماقه قربان گلمیشم

عرضيمى سالما یئره، پيغمبره خاطر حسين!
چك قلم تقصيريمه، سن اكبره خاطر حسين!
كِئچ گناهيمدن علىّ اصغره خاطر حسين!
بيلمیشم بو درگهى درگاه رحمان گلميشم

نوكر درباريووم «سيّدبشير»م ياحسين!
قیل عنایت من قاپوندا چوخ حقيرم ياحسين!
آلتى گوشه قبريوه حسرت چكيرم ياحسين!
بزم ياسه قاره كؤينك، قلبى سوزان گلميشم

دوبیتی حضرت حُرّ (ع)

هر سو یغیشا بیر چوخورا کُرّ اولا بیلمز
هر دامجی دنیزه دوشه کی دُرّ اولا بیلمز
دوزخ طرفیندن چکیلوب جنّته ساری
هر توبه ائدن شخص گلوب حُرّ اولا بیلمز

• سه شنبه
• 17
• فروردین
• 1400
• ساعت
• 19:19
• نوشته شده توسط
• یوسف اکبری