گلوب دستورسجّاده ؛ گرک عزّت مکان تاپسون
حسینون پیکرین دفن ائت حرارتدن امان تاپسون
یدالله اوغلی نوک نی ده کی باشلاردان آیریلدی
اسیران بلادن غملی یولداشلاردان آیریلدی
الهی حکمیلن باشسیز قالان باشلاردان آیریلدی
امامین دفنینه غیر از امام اولماز گمان تاپسون
دیلینده ذکر یا زهرا ئورکده شورش محشر
اراده ائتدی صحرای بلانی اول ملک منظر
یتیشدی طی الارضیلَن او دشته نائب حیدر
صولان گلزاری آختارسون گولون تاباغبان تاپسون
نه گولشن ؛ گوللرین خار مغیلان پایمال ائتمیش
هجوم صرصر کین قامتین طوق زوال ائتمیش
یانان بیر اوتدا گولزارین اسیر اشتعال ائتمیش
او خاکستر نشان چولدن گرک بیر پرنیان تاپسون
بیلوردی آختاران گولده نه بیر گلبرگ حَمرا وار
پوزولموش ساقه قدّی،نه وار شاخه نه اعضا وار
و لیکن بو گل زهراده بیر عطر دل آرا وار
کی رشک ایلراگر اوُل عطریدن بیرآن جنان تاپسون
همان بیر یئر کی آل حیدرین صبری تالانمیشدی
همان یئر کی او یئرده جام اجلالی جالانمیشدی
چاتوب بیرمقتله گوردی داش اوسته داش قالانمیشدی
کناره داشلاری چکدی کی کامین کامران تاپسون
چکوب شیرازه سیز قرآنی آغوشه ولیّ دین
همان صدچاک اولان اعضایه آچدی بیر گوگل سرّین
دیوب؛دور،گلمیشم باشسیز بو جسمی ایلیم تدفین
روا دور جسم بیماریم بو نوعی امتحان تاپسون؟
اولوب یاور قبیله اهلی بیمار دل افکاره
نهایت بیر حصیر آماده اولدی شاه خونباره
ییغیلدی اول حصیرایچره همان اعضای صدپاره
کسیلمیش اللرینده قویدی جسمین شکلی جان تاپسون
مطهّر جسمی تا یتدی آقا بیر قبر معلومه
گوزی یاشلی باخوب بیر سینۀ سلطان مظلومه
گوروبدور بهترین یئردور او یئر بیر طفل معصومه
اوحسرت سینیه،بیرسینه اوستونده مکان تاپسون
صورا آختاردی جسم اکبریندن تاپدی بیر آیت
دئدی آلدیم ربابین گویلونی اولدیم بیر آز راحت
نئدوم تا لیلی زاره آز اولسون شدت محنت
قازوب پایین پاده قبرینی تا آستان تاپسون
بنای قبری تاقویدی گوروب قبراولدی شش گوشه
بلشمیش قانه گوزیاش کاسۀ گوزدن گلوب جوشه
ئورکلندی چکوبدور توزلی قبر شاهی آغوشه
دئدی ششگوشه مرقددن صفا هفت آسمان تاپسون
صورا توپراقلار اوسته بیله یازدی سیّد سجاد
بو ششگوشه بنا کی دشت ماتمده تاپوب بنیاد
حسینون قبریدور ایلر بو ویران ئولکه نی آباد
نه تنها کربلا بلکه صفا کلّ جهان تاپسون
باخوبدور صونرابیله گوردی اول درگاه بس فاخر
گرکدور مدخلینده بیر نفر دربان اولا طاهر
حبیبی دفن ائدوب سرْ درده تا هرآن گلور زائر
بو دربانین صفاسیندن صفا اول میهمان تاپسون
اولوب فارغ بو ایشلردن امام و سرور اوتاد
روا بیلموب قالا باشسیز او باشسیز مابقی اجساد
قازوب بیرقبرآتمیش نئچه گوهر دفن ائدوب سجاد
نشاط معنوی شه دن بوتون باشسیزقالان تاپسون
امام واجب الطّاعه ائدوبدور علقم آهنگین
دوتوب یوز یار و همراهه آچوب سرِّ دل ِتنگین
دِیوب هرکیمسه آختارسون حسینون تشنه سرهنگین
اوجسمی آختاران اوّل کسیک قولدان نشان تاپسون
اولوبلارپیکرین جویا همان حکم و خطاب اوسته
کسیک بیر قوللاری آختاردیلار قانلی تراب اوسته
کیچیلمیش نعش عباسی تاپوبلار نهر آب اوسته
توکوب گوزیاشی سجادآزقالوب روحی تکان تاپسون
دییوب؛ دار جهاندا بیر بئله تاج ِسر اولمازدی
عَموم تک کشتی قرآن و دینه لنگر اولمازدی
علی المرتضایه بیله ، بیرکس بنزر اولمازدی
فتوّت درسینی عبّاسیدن هر پهلوان تاپسون
کیچیک بیر قبر قازدی دوغرانان بیر قدّ رعنایه
بیچیلمیش نعشی قویدی قبره اولسون دشته پیرایه
کسیلمیش اللرین همراه ائدوبدور نعش سقایه
محال امریدور بیر ایله ال کون ومکان تاپسون
یازوب اول قبرین اوسته بوردا بیر درد آشنا یاتمیش
همان بی بال و پر شهباز مُلک کربلا یاتمیش
شهنشاه ولانین هنگینه صاحب لوا یاتمیش
عمومدان غیرتین معناسینی پیر و جوان تاپسون
درود ایله امامه قان دولان نعشه کفن ووردی
الیلن قازدی اول توپراقی بیربیت الحزن ووردی
ولی افسوس شمر ایله اله بند رسن ووردی
او اللردن شفاعت حشریده هرنوحه خوان تاپسون
#مصیب باب دفنه سۆز یازانمازدی قالوب یازدی
قدیمی نوحه لردن شعرلردن درس آلوب یازدی
بوشعره ذهنی و صافی سوزوندن دوز سالوب یازدی
الیندن بو گلور بلکه جهنّمدن امان تاپسون
- شنبه
- 1
- خرداد
- 1400
- ساعت
- 19:51
- نوشته شده توسط
- یوسف اکبری
ادامه مطلب
