شمس یثرب کربلا دشتنده سکنی ایلدی
باش و جانیندن کچوب قرآنی احیا ایلدی
آز قالوردی عرصه ی اسلام اولسون قیر گون
تالی عهد الست اولدی گروه تتّقون
رهبر کابینه ی عشق اولدی زهرایه عیون
جانیله جنّاتی جانانیله سودا ایلدی
گلدی ایجاده ازل گون باغلانان پیمان عشق
یتمیش اوچ جانبازیله زینت لنوب میدان عشق
رهنمای عالم عشق اولدی چون سلطان عشق
غبطه اول میدان عشقه عرش اعلا ایلدی
سیر منهاجیله مهرین پایه سین تکمیل ایدور
یولّیور قربانلارین بیر بیر یولین تسهیل ایدور
ظهر عاشورانی درک ایتسون اوزی تعجیل ایدور
مقتلین شوقیله ظهر اولجاق مصلّی ایلدی
مژده ی وصلت ویروب سلطانه پیکان بلا
گل دیدی مصداق لفظ البلاءِ للولا
امر اولوب موسایه دون باخ بو حسیندور جابجا
ارض دشت کربلانی طور سینا ایلدی
وصلت دلدار جسمین ایلیوبدور پر کاه
آختاروردی خالی از اغیار وصله شاهراه
ایچدی قان پیمانه سین میخانه وحدتده شاه
قانیلن گلزار ایمانی مصفّی' ایلدی
مخزن اسرار حقدن دگدی تیر جان شکار
سرّ صندوقی سینوب الدن گیدوبدور اختیار
تا فنا فی اللّهه یول تاپسون یخلدی انتظار
عاشقه معشوق تیری نخل طوبی ایلدی
معبد عشقه یخلدی عاشق شوریده سر
سسلدی هل من معینی اولمادی امدادگر
فاطمه آچدی باشین سویلردی هنگام خطر
باش ویره جانانه سن تک کیم تمنّا ایلدی
هفتخوان عشقدن فاتح چخوب فرزانه فر
قرمزی قاندان قویوبدور باشینه تاج ظفر
بال جبریل اوسته رفعتله ایدوب عزم سفر
جنّت الاعلانی اکرامیله مأوا ایلدی
شمع بزم هستی عاشق مگر خاموش اولار
آختارار دلداری وصل یارلن مدهوش اولار
وحدت عشقین تاپار عشقیله هم آغوش اولار
عشق وادار ایلیوب پیمانه ایفا ایلدی
من حسینم سسلنوب اللّه رضاسین ایسترم
یاریمون تنها بو یولدا من وفاسین ایسترم
بستر اولسون اوخ منه اوخلار یاراسین ایسترم
دوزدی هر بیر محنته عشقنده غوغا ایلدی
رهروان شعردور اول شاعران ماسبق
هر بری گلزار غمدن گل دربدور بیر طبق
روز محشرده ویرر پاداشینی رب الفلق
یازدی بو شعری «صفا» ده یاد بیضا ایلدی
یا حسین منده سنون عشقونده شیدا سالُکم
ایستورم دائم سنه قان آغلیام قان یاش توکم
ایتمه سین آللّه باشیمدان سایوی عمریمده کم
قوی دیسونلر نوکرین شرمنده مولا ایلدی
من بو جسم خاکیه رخت محبت بیچمیشم
سن می وحدت ایچنده منده روحاً ایچمیشم
اکبر و عباس تک آخر بو جاندان کچمیشم
عین اسرار ضمیری خامم انشا ایلدی
- دوشنبه
- 4
- مرداد
- 1400
- ساعت
- 16:18
- نوشته شده توسط
- یوسف اکبری
ادامه مطلب
