غریبه گوندی بو گون وار فضیلت و شانی
همان فضیلتی شاد ایلیوب مسلمانی
قویوبدولار بو قراری زمانه ده یاران
ویره ئولنلرینه تا قالانلاری احسان
زیارته اولارین توزلی قبری اوسته گیده
توکه سرشکینی قرآن حق تلاوت ایده
بیان ایلیه بیرحمد، بیر نچه سوره
سالا ئولن گونونی یادینه ایده شیون
توکه سرشکینی قبر اوسته اول قدر دایانا
دعا ایده اولاری عفو ایده خدای علا
اسیرِ خاکیدیلر بول چکیلله چوخ حسرت
دوباره عمر ایده لر بو جهاندا بیر ساعت
هوای عمریوی صرف ایتمه دم غنیمتدور
سنه بو عمرِ گرانمایه چون امانتدور
عبث دگول قویولوب بو گونه رغایب آد
گَلون ایدون بو گون امواتیزی اوزوزدن شاد
بیریسی ایتمسه بو رسمی حسرتِ دلدور
علاوه صاحبِ امواته چوخلی مشکلدور
عبث دگل که سرشگیله جامِ دیده دولور
گورون بو قصّه حسینه نقدری مشکل اولور
جفادن اهلِ عداوت او چولده دویمادیلار
حسینه آغلاماقا عترتینده قویمادیلار
علاوه عترتینون خاطری گلوب درده
قالوب جنازه سیده اوچگون اوچ گیجه یرده
هامی ئولنلرینی اهلِ کوفه دفن ایتدی
عزیز فاطمه نی قویدی بی کفن گیتدی
نه نوعی شیعه اوزون بیرده سوق ایدر صبره
تاپولمادی شهدا نعشینی قویان قبره
غرض بنی اسد اولدی اوچومجی گون آگاه
گلوبله کرب و بلا دشتینه به ناله و آه
ایدوب تمامیسی گوز یاشون عذاره روان
یتوبله قتلگهه وا امامتا گویان
باخوبلا نعشِ حسینه تمام حسرتیله
توکوبله اشکلرین منتهای رقّتیله
رئیسِ اهلِ قبیله دئدی اولون آگاه
بو نعش صاحبی وار چوخ احتمالی وار اولا شاه
او یاره لر که ووروبلار بونا یارا یرینه
او بیرسی نعشیلرین وورمیبلا هیچ بیرینه
همین بو حالیده نه گوردولر سواره گلور
دولوب بولود کیمی گلدوقجا آه و زاره گلور
او قدری اشک توکوب ایسلانوب یوزونده نقاب
ایدوب یتن کیمی اول جمعِ باوفایه خطاب
بویوردی نه سببه گلموسوز بو صحرایه
جواب ویردیله کی گلمیشوخ تماشایه
بویوردی من بولورم بو دگول مرامِ دیلوز
بو نیّتیله گلوبسوز بولاری دفن ایده سوز
بولنمیسوز ولی کیم شاهیدور، رعیّتدور
ئولونجه شیعه لری آغلادان بو محنتدور
عبث دگول که بو نوعیله قلبیدن یانورام
گلون منیله بولار کیمدی جمله من تانورام
قبیله اهلی کمکلیق ایدوبلر اولشاهه
درست ایلدی بیر قبر فِدیَةُ اللهه
آتاسین ایستدی دفن ایتسون اول حمیده خصال
کفن قضیّه سی ایلوبدی فکرینی اشغال
بویوردی توسنِ مقصودوزی بو چولده چاپون
یانان خیامی گزون بیر یانان حصیر تاپون
همان حصیری ایدوم باری بو غریبه کفن
گورورسوز عور قالیب شهریارِ مُلکِ زمن
غرض او وقتیده اجرا اولوندی حکمِ امیر
تاپوب گتوردیله تکفینِ شاه دینه حصیر
گوزونده موج ووروب اشکِ حسرتی داشدی
همان حصیری امام زمان یره آشدی
یغیبدی بیر یره منشور اولونموش اعضانی
قویوبدی قبره توکوب اشکِ چشمِ گریانی
دوباره آتشِ غم یاندیروب یانان دیلینی
تاپوب گتوردی او دمده ایکی کسیک الینی
گینه گوروبله امامین یوزه سرشکی آخور
اویان بویان ایدوری خاکِ کربلانی باخور
نه آختارور اولا یا فاطمه گوزوندن ایراق
نه گوردولر او زمان تاپدی بیر کیچیک بارماق
یغوبدی قبره تمام عضوین اول شهِ بیکس
گوروب آتا بوغازیندا او دم اوجالدی بو سس
اوغول قوجاقیمه ویر شاهزاده اصغریمی
سولان بو گلشنِ ایمانیده گلِ تریمی
آناسی شامه گیدوب لای لای دیین یوخدی
ایچوبدی سو یرینه قانی نیسگیلی چوخدی
نصیب اولا اولونا ذکری اوز رواقینده
یاتوبدی اصغری اول سَرورین قوجاقینده
آتانی دفن ایلدی یازدی قبری اوسته او دم
که بو حسینی سوسوز ئولدوروبدی قومِ ظُلَم
گورنده قارداشین الدن تحمّلی گیتدی
گتوردی نعشینی پایینِ پاده دفن ایتدی
توکوبدی خونِ جگر گلدی غملری جوشه
دوزلدی اکبریله بیرجه قبرِ شش گوشه
تمام حسرتیله نعشِ قاسمه باخدی
عم اوغلی وای دئدی رخساره گوز یاشی آخدی
ویروبدی بُلدی عدو ئولدورنده چوخ زحمت
قازوبدی قبرینی دفن ایتدی تا اولا راحت
حبیبی ایلدی دربانِ سیّدالشّهدا
عجب مقامه یتوردی اوزین او کانِ وفا
جوارِ شاهیده دفن ایلیوبدی اصحابین
کناره قویماز او سرور گوزیندن احبابین
قدِ دوتاسین ایدیب راست بیر نفس آلدی
بویوردی اهلِ قبیله گینه قالان واردی؟
فرات اوسته ایله سز گذار ایندی
سیزه عیان اولونی ماجرا قالان کیمدی
فرات اوستونه یوز قویدولار او جمعِ فکار
نه گوردولر نه دییوم یا بقیّة الاخیار
تمامینون اوره گی بو ملالیله سیخیلوب
باخوب نه گوردیله بیر سروِ بوستان یخیلوب
کسوبله قول بوداقین یرده بیر نماسی قالوب
بیر اوزگه حالته اول جسمی کوفه اهلی سالوب
نه باشی واردی نه بیر سالم عضوی پیکرده
ووراندا ال ساقا، صول طرف قالور یرده
او قدری یاره ووروب کوفیانِ بی ایمان
اولوبدی پیکری بیر دسته گول کیمی خندان
حضورِ حضرتِ سجّاده گلدیلر بیتاب
ادبله ایتدیلر اول شهریارِ دینه خطاب
نقدری جهد ایلدوخ ای شهنشهِ امّت
اونون جنازه سینه بیز ویرنمودوخ حرکت
او شهسواره قضا بندینی ایدوبدی کمند
اولوبدی گول بدنی قطعه به قطعه بند به بند
سزادی باش آچیلا نعشی اوسته باش یولونا
جنازه دوشدوقی یرده گرگدی دفن اولونا
دلِ امامی او سوزلر خدنگ تک دلدی
عمو جنازه سینه دفن ایده اوزی گلدی
بحقّ خامسِ آلعبا حسینِ شهید
اوزون بو «حامده» رحم ایله ای خدای مجید
یوزی قرادی الی بوشدی دردی بی درمان
رفیق قیل بونا توفیقون ای خدای جهان
- دوشنبه
- 16
- مرداد
- 1402
- ساعت
- 23:04
- نوشته شده توسط
- یوسف اکبری
ادامه مطلب
