تصوّر ایلین اولسا مقامِ زینبدن
دوشر تحیّره شان عظامِ زینبدن
بو شان و رتبه ده دنیایه گلمیوب بانو
به غیر حضرت صدیقه، مامِ زینبدن
بو اعتقادده ام کسبِ احتشام ایلیوب
عُموم مُحتشمه ، اِحتشامِ زینبدن
نکاتِ تَسمیه دن بهره مند اولا هر کس
عرایضیم اونا روشندی نامِ زینبدن
هامی شرافته دارادور اصلاً و ذاتاً
هانی اصیل نژاد مهامِ زینبدن؟
آتاسی شاه ولادور، که دین تکمیله
یتوب وصایت باب گرامِ زینبدن
آناسی حضرت زهرادی ، قارداشی حسنِین
کمال لطف اولونوب لاینامِ زینبدن
او که شرافت ذاتیدی بسته دور علمه
نه جای بسطِ کلام ، علم تامِّ زینبدن
همان خانمدی که شأنینده عَمّتی اَنتِ
کلام صادر اولوندی امامِ زینبدن
ادبده ده گر اولا شرافت ذاتی
هانی مؤدّبه ذات گرامِ زینبدن؟
محالیدی که ادب آیریلیدی بیر لحظه
قیام و یَقظه ، قُعود و مَنامِ زینبدن
هامی مدایحی بیر یان ، شهامتی بیر یان
عجبدی شدّته صبر و دوامِ زینبدن
ثُبات و صبرینه باخ ، قتلگهده سجّاده
حُصول تسلیت اولدی کلامِ زینبدن
امامه نقل حدیث ایتدی، تاپدی بهبودی
علیل زخم دلی ، التیام ، زینبدن
(حدیث ام ایمن)
حیاتی مَصرعِ اکبرده ایلدی تجدید
حیاتِ عالمه باعث خُرام زینبدن
یقیناً امر شهادت نتیجه ویرمزدی
گر اولماسیدی اسارت مرامِ زینبدن
یقیناً امر شهادت نتیجه ویرمزدی
گر اولماسیدی اسارت مرام زینبدن
او گلستانِ شهادتده باغبان اولدی
گلِ مراد دریلدی قیامِ زینبدن
او گلشنی که بهارینده جبرا" اولدی خزان
اولوب همیشه بهار، اهتمامِ زینبدن
جِدا باشیندا حسین یقدی باشلاری باشنا
گیدردی سمت دمشقه ، اَمام زینبدن
بودا دوزوب باشا هشتاده دین قرا معجر
که شَه°جلالی چوخالسون نظامِ زینبدن
اولاندا کوفیه وارد قطارِ آل الله
تعجّب ایلدی خلق ، انتِظامِ زینبدن
سرور بَربَط و چنگیله ایتدی استقبال
همان او فرقهء بی ننگ و نام ، زینبدن
دیردیلر که بولار خارجی اسیری دیلر
بو سوز مخالف اولوب ، عینِ کامِ زینبدن
مصمّم اولدی خانم قُوهء فصاحتدن
بوله حقیقتی هر خاصّ و عام ، زینبدن
او پرده لر که چکوب حقّه قومِ بی پرده
جمالِ حق آتا عالی هُمامِ زینبدن
بویوردی ساکت اولون ای جماعتِ گمراه
طریقِ حقی تاپون اِعتصامِ زینبدن
کسیلدی همهمه و قیل و قال و بانگِ جَرس
همان او واجب الاذعان پیامِ زینیدن
دل آچدی عالِمهء بی معلّمه نطقه
شرر توکولدی لِسانِ حُسامِ زینبدن
یانوب همان شرره دودمانِ سفیانی
یخیلدی خانهء ظلم ، انهدامِ زینبدن
ایدوب او صوت و فصاحتله خطبه سین ایراد
بعین علی دانشور ، لیک کامِ زینبدن
خدایه حمد دئدی ، گوندروب رسوله سلام
خروش اوجالدی ، او حمد و سلامِ زینبدن
هامی دیردی خدایا علی اوخور خطبه؟
رهِ اعانت فرض مدام زینبدن
سینیق کجاوده یا بیر اسیر بانودور؟
عجب اسارت و وَقر تمامِ زینبدن
او قیل و قالی خانم کسدی کسرِ صحبتیله
خِتام°همهمه تاپدی ، ختامِ زینیدن
دئدی علی دگولم لیک مرتضی قیزییَم
بو لهجه ارثدی ، بابِ فَخامِ زینبدن
اوتانمسوز که بیزه خارجی خطاب ایدوسوز؟
مگر بو نقصیدی بیر احترامِ زینبدن؟
سیزه بو شهرده بیش ایل خانملوق ایلمیشم
حیا علیدن ایدون اتّهامِ زینیدن
مگر دگلسوز اولار توتیای چشم آلدوز
بیر عمر ، تربتِ درگاه و گامِ زینبدن
او مرده دللری سِحرِ بیان ایدوب إحیاء
سس آلدیلار او سیزیلدار عِظامِ زینبدن
چکوب سس آغلادیلار اوج ایدوب گوگه شیون
او شهر ایچینده حبیب و حضامِ زینبدن
بویاندا باشلادی قرآن ، جِدا باشیندا حسین
آزالدا بلکه اورکده ضرامِ زینبدن
که یعنی باجی منم شاهدِ بیاناتون
دم شهادته باخ مستضام زینبدن
باجی ایشتدی که قرآن اوخور گینه قارداش
بولوب حمایتی وار مستضام زینبدن
اورکلنوب دئدی لحنِ حجازیوه قربان
بو مرغِ روح ، بو مجروح دام زینبدن
جِدا بویوندا گونوم نولدی سایهء لطفون
دونن کسیلدی سرِ با لِثامِ زینبدن
بو گون بو وقتده تشریفون ای شرف کانی
سیلر گوگولده محندن قتام زینبدن
قسم خدایه بو شهری ، بولییدیم اجلالون
سولاردیم اشگیله سرشار°جام زینبدن
آخور عذاره جگر قانی ، سندن آیریلالی
گیجه گونوز مژهء چون سهام زینبدن
قوییدیلر آپاراردیم سعادت شوطی
او رأسِ باطنِ بیت الحرامِ زینبدن
اجازه ویر آپاروم لامحاله فیضِ نگاه
بو تیره گونده ، مه تیره شام زینبدن
محالدور گیده ظلمات اولماسان طالع
ولو مین آی چیخا لیلِ ظُلامِ زینبدن
بو شوقیله باشین ایتدی کنار محملدن
نتیجه حاصل ایده فکر خام زینبدن
باخوب جمالِ جمیل اوسته گوردی خاکستر
گیدوب قرار ، غمه قلبِ رامِ زینبدن
باشین کجاویه ووردی یاریلدی قان آخدی
آلوب شمیم دَمی جان°مشامِ زینبدن
قویولدی باشینه بیر تاجِ افتخار و شرف
او قطره قطره دم لعل فام زینبدن
دئدی محاقی هلالیم کول اوسته یاتمیشدون؟
که نورِ لطفیوی کسدون خیامِ زینبدن
نه بی مروّتمیش میزبانون عالمده
حیا و شرم ایلموب ذوانتقام زینبدن
او تازه قان ندی قارداش آخور جمالوندن؟
کلوخیله یارالاندون طفام زینبدن
بو سجع و قافیه بو طرز ذکرِ غم(ذهنی)
یازیلسون اولدی تقاضا غلامِ زینبدن
اوزون دوزنمزیدون نظمه دُرّ ابیاتون
دوزولدی لطف و عنایات وام زینبدن
- یکشنبه
- 18
- آبان
- 1399
- ساعت
- 14:54
- نوشته شده توسط
- یوسف اکبری
ادامه مطلب
