من او بلبل کیمی گلزاریده یار آختارورام
گل و گلزار آرا بیر نازلی نگار آختارورام
گه دوشوب واله و حیران گزیرم چوللرده
گه چکوب دشت و بیابانیده جار آختارورام
سالموشام یکسر ایاقدان هامی دشت و دمنی
باغ و راغ ایچره نه چون سرو کنار آختارورام
صبریمی الدن آلوب صبر و قراریم یوخدی
چرپنان قلبیمه من صبر و قرار آختارورام
چوخلاری دهریده گوزیاشلی گزیر آردیجا
تک نه من یاریمی هر لیل و نهار آختارورام
بیلمیرم هاردا قوروب خیمه سینی، کیم بولسه
منه ده فاش اِیلسین لحظه شمار آختارورام
بیله فکر ایلمیون اولمیا دیوانه دی بو
گنج عشقی گزیرم دار و ندار آختارورام
کوچه کوچه دولانوب هر یره من باش چکورم
اولمیا بوردادی من گوشه کنار آختارورام؟
سیزی تاری خبروز اولسا نهان اِیلمیون
دویمشام جانه داخی راه فرار آختارورام
کیم گتیرسه خبرین مژده سی جانیمدی منیم
نقد جان الده اونی با دل زار آختارورام
گوزلریم نورینی بو غمده الیمدن ویردیم
گوزومون نورینی با دیده تار آختارورام
وار یوخوم غارت اولوب بیرجه اونون عشقینده
گینه بو حالیله بیر نازلی نگار آختارورام
دوشوب ئولسم سر کوینده منی دفن ایلیون
مقدمیندن گورلر گرد و غبار آختارورام
((ساده ام)) صادقم عشقونده منه بیر باش چَک
عمردور کی سنی من قلبی فکار آختارورام
- چهارشنبه
- 12
- آذر
- 1399
- ساعت
- 22:44
- نوشته شده توسط
- یوسف اکبری
چشم همه ی جهان به آدینه ی ماست
