علی ئولوبدی چراغ عدالت اولدی خموش
شجاعتیله شرافت اولوبدی محنته توش
علینی سانما که اهل شقاوت ئولدوردی
اوشاهی دشمن عدل وعدالت ئولدوردی
اوقدر عادلیدی مرتضا او کنز وفــا
گورنمدی او شهون عدلینی گروه دغا
اجیر ایلدیلر بیر یهودیه بالاسین
نماز وقتی ییخوبدور یتیملر آتاسین
دوشوبدی بستر مرگه او میر ملک ولا
آخوردی قانی باشیندان ، دیلینده یازهرا
او خون دل که یئمیشدی جهاندا اول سردار
آخوب عذارینه باشدان ، یوزی اولوب گلنار
طبیب حاضر اولوب باشی اوسته سرعتیله
معاینه ائلدی مرتضانی دقتیله
حسینیله حسنی مورد خطاب ائلدی
طبیبِ عالمی بیر نسخه ده جواب ائلدی
دیوب بالالارینا سیز بُکایه حاضر اولون
قرا چکون بو سرایه ، عزایه حاضر اولون
بو سوزده بیت علیدن بکا اوجالدی گویه
حسین آغلادی یئردن نوا اوجالدی گویه
حسینون آغلاماقی ، شاهی غرق محنت ائدوب
غرض بالالارینا بیر به بیر وصیت ائدوب
دیردی آغلامیون ، ائتمیون داخی ناله
سیز آغلاسوز ، دوزه بیلمز علی بو احواله
بیلون علی اوگون ئولدی که حقی غصب اولدی
منافقون علمی ، عرش دینه نصب اولدی
بیلون علی اوگون اولدی که گوردی غوغانی
گوزی باخا باخا دشمن ویروبدی زهرانی
بیلون علی اوگون اولدی ، که عشقی کَف٘ن اولدی
بقیعده نیمهٔ شب دلستانی دفن اولدی
خلاصه یومدی گوزون پادشاه یوم جزا
فدای دین حق اولدی ، جهان او شاهه فدا
وئروبله غسل علینی حسن حسین اوگئجه
یووبلا سرور دینی ، حسن حسین اوگئجه
گییندیروبله کفن میرعشقه محنتیلن
جنازه حمل اولونوب چوخ جلال و عزتیلن
باخوردی صحنیه اشکین اَلوردی عزرائیل
جنازه نی آپارور جبرئیل و میکائیل
محمد حنفیه دیور بو جریانی
که مدفنه آپاراندا امام والانی
او شاهه انس وملک ، جنّیان ائدوب تکریم
اگیلدی داریله اشجار ، ایلیوب تعظیم
یئتنده بیریره گوردوک همان او اثناده
اولوبدی قبر شریفی قاباقدان آماده
بو حاله اهل سما محنتیله ناظردی
نه گوردوک اوندا که حتی لحدده حاضردی
باخاندا قبره گوروندی او یئرده بیر تخته
دوشوب شماره نفس ، حالتیم کئچوب سخته
یازیلمیشدی اونون اوستونه به خط جلی
بو قبری نوح نبی حفر ائدوب برای علی
قویوبلا قبره خلاصه او شاه ممتحنی
گوروبله آدم و ابراهیمی اودم علنی
رسول اکرمیلن فاطمه توکور گوزیاش
جناب مریم و سارا به دیدهٔ خونپاش
خلاصه دفن اولونوب پادشاه ملک شرف
او شاهه مأمن اولوب حشره جک دیار نجف
قلم بو یئره ده گینه مایل گریز اولدی
دوباره "ناعم" غمدیده اشکریز اولدی
دوشور خیالیمه بند فٶاد میر حنین
مزاره کرب و بلاده غریبه گئتدی حسین
علی حریر بهشتیله گرچه کفن اولدی
بوکولدی کهنه حصیره حسین دفن اولدی
- سه شنبه
- 12
- اسفند
- 1399
- ساعت
- 21:45
- نوشته شده توسط
- یوسف اکبری
ادامه مطلب
