بُو مَطلَبی که قلَم نَظمِیلَن اِئدور اِنشاء
خَبَر نِوِیس لَرُون اَکثری چَکُوب اِمضا
صَحِیح دور اوُدی که قُول وِئرمِیشَم ئوزُیمَه
یازام او مَطلَبی اوُلسون مُقدّمَه سُوزومَه
یازلمِیش اَکثرِ تارِیخِیدَه هَمِین عُنوان
خَلافَت اَمرِینی غَصب اِیلِیَن زَمان عُثمان
دُوشُوب بُو فِکرَه اِئده مُوقِعیَتین مُحکَم
عَلینُون اِیلیَه باشیندَه کی صَحابه نی کَم
سالُوب اَذیّتَه مَردانِ صَدرِ اِسلامی
اَیاقلادِی او سِتَم پِیشَه نَصّ اَحکامی
گُورُوب اَباذَرِی یُوخ اِعتناسی بِیعَتِینَه
دِیُور حَقِیقَتی لَطمَه وِرُور خِلافَتِینَه
بُو فِکریلَه اِئلَسُون حَقّ گُولّرِی تَهدِید
رَبَذَه آدلی یِرَه اِیلَدِی اوُنی تَبعِید
همان او یِر که دِئدُوم بِیر سُوسُوز بیابان دُور
اَباذَرَه او بیابان بَلالی زِندان دور
بُلندگُوی وَفانُون کَسیلدِی آوازِی
آییردِیلار وَطَنِیندَن او مَردِ جانبازی
او سُوزناک چُولی مَسکن اِیلَدی ئوزُینَه
حَیاتی باشَه یِتُوب مَدفَن اِیلَدی ئوزُینَه
جَهانِ عارِیَه نی تَرک اِئدُوب گِئدَن وَقتَه
بالاجا بیر قِیزی واریدی جان وِئرَن وَقتَه
فَقَط او خُوردا قِزیدِی یُوخِیدِی آیرِی کَسی
وَصیَتِین اوُنا اِئتدی چِیخان زَمان نَفَسی
فَراقِیمَه بِیلُورَم سَندَه کی دُوزوم یُوخدُور
آچُوب باشُوی مَنَه آغلاسُون سُوزُوم یُوخدور
لِباسِ عُنصُری بُو گُون قِیزِیم سُویُوب گِئدُورَم
سَنی بُو چُولدَه گُوزِی یاشلی مَن قُویُوب گِئدُورم
بِیر آز کِچُوب بُو بیابانَه قافلَه گلَه جَک
هَمان زَماندا سَنُون نِیّتُون اَله گلَه جَک
مَنیم جَنازَه می تَرک اِیلَه گِئت یُول اوُستَه دایان
رَئیسِ قافِلیَه ئولمَگیمی اِیلَه بَیان
هَمان او قافلَه سالار مالِکِ اَشتَر
گلَر جَنازَه مَه آغلار بُوچُولدَه دَفن اِیلَر
وَصیّتِین قُوتارُوب رُوحی اِیلَدِی پَرواز
اوُجالدی خُوردا قِزُیندان سَمایَه سُوز و گُداز
دِئدِی بابا مَندَن نَه تِئز دُویُوب گِئتدُون
نِیَه بُو قُورخُولی چُولدَه مَنی قُویُوب گِئتدُون
بِیر آزجا آغلادی حالِین گُورُوب مُشَوّشدِی
قُویُوب آتاسینی گلدِی یُول اوُستَه اَگلَشدی
بِیر آز اوُتُوردِی او قِیز قافِلَه سُراقِیندَه
دَوام اِئتمَدِی اَمّا آتا فَراقِیندَه
دُورُوب دُوبارَه قِییتدِی جَنازَه نُون یانِینا
بِیر آزجا نالَه اِئدُوب واهِمَه دُوشُوب جانِینا
بابا بابا دِئدی چُوخ صَبر کَاسَه سی داشدِی
گُوتُوردِی قافلَه فِکرِی یُول اوُستونَه قاشدِی
خِلاصَه سُوز یِتِیشُوب قافِلَه او صَحرایَه
او خُوردا قِیز آتا اَمرینی قُویدِی اِجرایَه
حُضُورِ مالِکه عَرض اِئتدی مَطلَبِ جانسُوز
آتام ئولُوب عَمو بُو چُولدَه قالمِیشام یالقُوز
وَصیَتی بُودی غُسلِین وِئرُوب کَفَن اِئدَه سَن
گرک مَنیم آتامی دَفن اِئدُوب صُورا گِئدَه سَن
تُوکُوب سِرِشکینی مالِک اوُلوبدی غَرقِ مُحَن
اَباذَرِی اِئلَدِی ئوز اَلیلَه غُسل و کَفَن
رِسُومِ دَفن یِتُوب عِزَتِیلَه پایانَه
وَلی تَوَجُهُون اوُلسون هَمِین بُو عُنوانَه
اَباذَرُون قِزینُون دَردی تاپدی اَفزایِش
توُکُوب سِرِشکِینی مالِکدَن اِیلَدِی خواهِش
بُو گِجَه قافلَه نی لَنگه سال عَمُو گِئتمَه
عَزالیم بُیلوسَن گُوگُلیم آل عَمُو گِئتمَه
آتام بُو چُولدَه گِئدُوب نِسگِلِیلَه چون قبره
توکم سرشک گرک گوزلریم دؤنه ابره
قبول ایلدی مالک او قیز دعا ائلدی
یتیمی راضی ائدوب حقیده رضا ائلدی
بلی گرکدی یتیمی گورن نوازش ائده
الین چکوب باشینا محنتینی کاهش ائده
گوروب یتیمی طریق جفاده دورمازلار
یتیم اولان قیزا عالمده قمچی ویرمازلار
قلم مقدمه نی شرح ائدوب گلین دردی
ربذه دن سُوزومی کربلایه دُوندردی
گورور حسینی چوخور یرده گل کیمی اوراق
یاتوب نه حالدا ولی فاطمه گوزیندن ایراق
سپهر تک سینه سی اوسته سایسیز اولدوزلار
ولی او سینه نون اوستونده خوردا بیر قیز وار
حسین قوجاقینه آلمیش او ماه منظرینی
سالوبدی گردنینه قطع اولان بلک لرینی
آتا یانوب بالانون حالینه محبت ائدور
بالا ولی آتیا شمردن شکایت ائدور
دیور که شمر لعین قویمیوب توان منده
یارالی نعشوه من اولموشام پناهنده
سویولموشام دئمورم زینت و زریم یوخدور
فقط بونی دیورم باشدا معجریم یوخدور
دوشنده ظلمون اودی فاطمه تفاقینه
منی او شمر لعین سالدی آت قباقینه
منی قوئوبدی او بی شرم قورخولی جانیلان
یوزیمه سیلی وروب گوزلریم دولوب قانیلان
او سیلینون قولاقیمدا بابا گینه سسی وار
چکیلمیوب یری گوینور یوزیمده نقشه سی وار
سنون سینونده اگر چکمه ردی نقشه سالوب
منیمده سیلی یری تابیمی الیمدن آلوب
بو دردیمی دئمرم ایلرم نهان بیبیمه
یوزیمی گیزلدرم وئرمرم نشان بیبیمه
هامی ملالیمه آغلار یوزومدن اشکی سیلر
ولی بو نسگلیمی من گئدنده قبره بیلر
منیم ترحم ائدن یوخ بابا بو گوزیاشیما
سنون گوزوندن ایراق قمچی چوخ دگوب باشیما
یارالی سینوه که باشیمی بابا قویورام
باشیم یوزیم بدنیم آغریور سیزیلدیورام
یورولموشام قاچا قاچدا چوخ اولمشام خسته
سخلمیشام یارالی قوش کیمین سینون اوسته
من آغلارام سنه سنده بو زاره آغلیاسان
نولور منی سینون اوسته همیشه ساخلیاسان
بو شامون اهلی نیه ریشۀ وفا اکمور
نیه او شمر ستمگر قیزوندان ال چکمور
اوُنُون جَفالَرِینَه نِیلِیُوم دُوزُوم یُوخ دور
دِئسُون گُناهِیمی وِورسُون مَنِیم سُوزُوم یُوخ دور
یازاندا بُو سُوزی« #انور» اوُرَگی قان اوُلدی
صَحِیفِهء دِلی تِیرِ غَمَه نِشان اوُلدی
- شنبه
- 22
- مهر
- 1402
- ساعت
- 20:21
- نوشته شده توسط
- یوسف اکبری
ادامه مطلب
« حسینه یئرلر آغلار گؤیلر آغلار
