حضرت ختم رسول مدنی
بیر گوزل جمله بویورموش علنی
کیم حسین آدینه گوز یاشی توکه
گوز له سین روز جزا فاطمه نی
هر حسینچی که گیدور دنیا دن
مطمئن اولمالیدور عقبا دن
کیم خلوصیله ایدور خدمتینی
عاقبت مزدین آلار زهرادن
اوندا کی قورتاریب عمرین اله جک
قیمتین قطرهء اشکین بوله جک
آغلیوب چون که حسینین آدینا
قبرینین اوّل گجه سینده گوله جک
ای زاده پیغمبر لبیک حسین لبیک
وی نور دل حیدر لبیک حسین لبیک
ای مظهر آزادی دللرده گوزل آدی
هر لحظه اولان ازبر لبیک حسین لبیک
سن ماه دل آراسن سن نور تجلاسن
سن طور تجلاده موسایه تسلاسن
سن والی والاسن سن یوسف زهراسن
ای پادشه محشر لبیک حسین لبیک
دنیا که بولورموش سن الله پرستیدون
پابند قرار داد ایام الستیدون
چون جام الستی دن مستانه و مستیدون
ای مست می کوثر لبیک حسین لبیک
جبریل امین اولموش بیر وقفه سنه دایه
پرواز وروب عرشه اول دایه بو معنایه
ایلوبدی سماواته قونداقوی پیرایه
آسمانه اولان زیور لبیک حسین لبیک
سن گوگلره ایلوبسن مین عزتیلن معراج
آلتوندا پر جبریل باشوندا زمرد تاج
گیتدون او زیارتده رب الحقه اولدون حاج
ای شاه شهید پرور لبیک حسین لبیک
گنجینه خلقت ده ای درّ گرانمایه
احیای نماز ایتدون ویردون قوی بیر پایه
جانون مالون اولادون اولدی اونا سرمایه
عاشق لر اودور سسلر لبیک حسین لبیک
منبع انوار جلی دور حسین
مظهر ذات ازلی دور حسین
نور دوچشمان علی دور حسین
فاطمهء اطهره مفخر حسین
زینت آغوش پیمبر حسین
عالمه آرامش جان دور حسین
ما خلقه روح روان دور حسین
دارو ندار همگان دور حسین
جسم لره جان جانا جوهر حسین
بیر توکی مین دهره برابر حسین
ماه دل آرای ولادور حسین
آیت حق نور هدادور حسین
پنجمین افراد کسادور حسین
شاه جهان شافع محشر حسین
اهل ایکی عالمه سرور حسین
بارگه قدسه مقرب حسین
آب حسین تاب حسین تب حسین
ماه درخشنده هر شب حسین
هر گجه یه ماه منور حسین
هم آیا هم ده گونه زیور حسین
مشعل پر نور تجلا حسین
کل محبانه تولا حسین
کفردن ایلردی تبرا حسین
باطله دشمن حقه یاور حسین
عادله دل داده داور حسین
سن ده "امینی" ایله یاز یا حسین
سال اونی دلدن دله یاز یا حسین
قوش یله تاپشور سیله یاز یا حسین
عالمه قوی پخش ایده یللر حسین
دولدورا دریالری سیللر حسین
سن گیدوسن منده گرک آغلیوم
دایان بابا یارالارون باغلیوم
حافظ قرآن بابا من سنه قربان بابا
ای حضرت پیغمبرین مهمانی
جاندان گیچوب آختاروسان جانانی
دور قوی سیلیم یوز گوزوندن القانی
دایان بابا یارالارون باغلیوم
حافظ قرآن بابا من سنه قربان بابا
باغبان گلین بسلر وِرَر اللره
شانلی آدین سالسین دلدن دللره
آخر سنده سالدون بیزی چوللره
دایان بابا یارالارون باغلیوم
حافظ قرآن بابا من سنه قربان بابا
گتمه بابا مظلوم بابا جان بابا
سن گیدورسن باغریم اولور قان بابا
یاره لر آننوندا ورور سان بابا
دایان بابا یارالارون باغلیوم
حافظ قرآن بابا من سنه قربان بابا
حدن گچوب سنون درد و ملالون
الدن گیدوب جمله جاه و جلالون
گل ایندی که شهادتدی خیالون
دایان بابا یارالارون باغلیوم
حافظ قرآن بابا من سنه قربان بابا
بلبل نجه میلین سالار بوداقه
غنچه سیله قویسون دوداق دوداقه
لطف ایله سنده آل منی قوجاقه
دایان بابا یارالارون باغلیوم
حافظ قرآن بابا من سنه قربان بابا
یا حسین عشقیوه مدتدی گرفتارم آقا
سن منیم عشق گولومسن سنه من خارم آقا
چکمرم ال اتگوندن که دل افکارم آقا
گلمیشم بو دل ناشادیمی سن شاد ایده سن
لطفون اولسا منی غم غصه دن آزاد ایده سن
سن سن ای کان شرف سبط رسول مدنی
مظهر ذات الهی تانیور شیعه سنی
بولمم آخر نجه الدوردی سنی شمر دنی
گورمه دی گوزلری ثار اللهی نشر ایتدی یره
روحون اوج ایتدی سماواته قانون گیتدی یره
آغلادان ای غمی وی غصه سی جن و ملکی
چولقیان قیزلاری نین ناله سی چرخ و فلکی
مرتضانین نیه بس دوتمادی نان و نمکی
شمر شومیله عمر سعد ستمکار دنی
وردیلر ال اله الدوردیله ظلمیله سنی
توکدولر کرب و بلا دشتینه قوم کفری
اوندا ظلمیله غرض سیندی عدالت گهری
زهرلی تیره نشان ایلدیلر صود اَمَری
ظلمیله قویدولا قوینوندا ربابین الینی
غصه مرگ اولدی جوان الدی علی نین گلینی
اشقیا لشگری مولا یولوی باغلادیلار
قلبوی یاندیریب آفاق اورگین داغلادیلار
قتلیوه جمله قلجلاری عدو زاغلادیلار
هر نه انصار و مدد کارین اولوب دینه فدا
قالموسان تک دل میداندا سن ای میر هدا
هر نه بولدوکلرون ایلوبله سنه اهل ظُلَم
دوشدی عباسین الیندن یره سورتوشدی عَلَم
مشکی اوخلاندی اولوبدور ایکی قولاری قلم
سسله دون سالما منی درده ابوالفضلیم اویان
ای سینان لشکره سر کرده ابوالفضلیم اویان
کوفه نین لشگری مغلوب ایلدی لشگریوی
جبراً الدوردوله شهزاده علی اکبریوی
ظلم بی حدیله سیندیردیلا بال و پریوی
یاندیریب قلبیوی گوز یاشیوی قان ایلدیلر
عترت فاطمه یه محشر عیان ایلدیلر
سن که آچدون یره گودالیده بیر جای نماز
باشلادون بار تعالائیله بیر راز و نیاز
فرش ده ناله فلک ده واریدی سوز و گداز
قان گیدوردی یره یردن اوجالوردی گوگه آه
لیک درک ایلیه بولموردی او اوضانی سپاه
قاره یللر اسدی تلخ اولدی هوا
زینب مظلومه ایلردی نوا
یاره قان وردی که قالدی بی دوا
ای دواسیز دتلره درمان حسین
کربلا دشتینده بیر طوفان اولوب
گلشن زهراده چوخ گللر سولوب
پیکرون القانیوه غلطان اولوب
گوللنبدور لمعه لمعه قان حسین
گرم ایدوبسن کربلاده طوری سن
قویدون آغلار انس و جن و حوری سن
باشدان آتدون پیکر معطوری سن
گیتدون آخر جدیوه مهمان حسین
جنت الاعلایه پرواز ایلدون
اوز دمونلن خلقی دمساز ایلدون
نازیوه قربان عجب ناز ایلدون
اهل جنات اولماسین گریان حسین
لعن حق اولسون یزید کافره
ظلم بی حد ایلدی پیغمبره
ساخلاسین دیداری یوم محشره
بیللنر عصیانیلن احسان حسین
ایلدون سن جاودانه بیر قیام
مقصدون روشندور ای بی کس امام
بیزده گللوخ سنله مولا گام به گام
بیزده وار بیر جلوه لی وجدان حسین
کربلا دشتین بیزه ایتدون مصاف
ایلروخ قبرون زیارت صاف صاف
گورمدوخ مین دورت یوز ایلده بیر خلاف
ای اولان اوز قانینه غلطان حسین
من "امین"ائللردی شعره ویرقینام
شعر ساخلوب دی منی قویموب سینام
دوز حسین چی اورگدوبدور اوز آنام
ای ایکی نهرین آرا عطشان حسین
حسینیم آچ گوزون یاتما اوغول گلدیم یانا یانه
عدو مطبخ سراسیندا سنه شام غریبانه
سنی من بسلمیشدیم باغ چمنده گللر اوستونده
ندن خولی قویوبدور گل جمالون کللر اوستونده
بولوتلار اگلنوب سانکه او ماه انور اوستونده
ملکلر محو اولوب عرش خدای اکبر اوستونده
ولیکن ظلم بی حد ایلیوبدور انسان انسانه
قفادن سنگ دل بیر نانجیب ذبح ایلیوب باشون
وفاسیز امتین اوز باشینه دوشسون گوروم داشون
جهان آغلور سن آغلورسان رخساره گوز یاشون
اوغول دور سینمه گل قوی سیلیم اول کیپریگون قاشون
گوزون یاشیله خاکستر قاریشمیش قرمزی قانه
غمون ایلوبدی جنت ده غمه پیچیده حوانی
سالبدور چوللره مجنون کیمی مریمله سارانی
گلایه ایتمرم دیندیرمه سن دیندیرمه زهرانی
اقلی نطقه گل دیندیر دانشدیر باری طاهانی
ایدبدور آغلاماقدان کون و امکانی عزا خانه
یرون اوز شأنیوه لایق دگول ای شاه مظلومان
دگول بو رسم مهمانی تنور ایچره یاتا مهمان
کل اوستن دور گل آغوشه اوزوم آلام سنی الان
یورولموش جانیوه ای جان زهرا اوز آنان قربان
ورن یتمیش ایکی قربانی ای بیر جلد قرآنه
سنون قونداقوی حق ایلمشدی عرشه پیرایه
امامت نوری سندن پخش اولوردی کل دنیایه
واریتدور چوخ شباهت ایندی دوتقون اولدوزا آیه
دیسم زیبنده دور سنله گلیر حق سایه به سایه
ایدپبست جان و دلدن جانیوی قربان او جانانه
وازیدیم کربلا دشتینده سن قانه باتان وقته
نوا و نالهٔ اطفالون افلاکه چاتان وقته
بلالی زینبپن آغلار قویوب گوزدن آتان وقته
جفای ساربان گوز یاشیمی قانه قاتان وقته
کسیلمیش اللروندن قان سپیلدی قانلی میدانه
داغلمش دودمانلار تک داغلمش مقتلی گوردوم
خموش اولموشدی مقتل ده هدایت مشعلی گوردوم
اوغول اوندان قباق من باشون اوسته بجدلی گوردوم
گوزوم ای کاش که گورمیدی کسور الله الی گوردوم
کچیک انگشتره خاطر اوزین قویدی بیوک قانه
قانلی قتلگاهوندا پیکرون
غرق اولوب قزل قانه یا حسین
وادی بلانین بو قسمتی
اوخشیور گلستانه یا حسین
سن شهادتین شربتین ایچن
لحظه دن دوشوب لرزه جانیمه
حمله ور اولوبدور سپاه کین
رخنه سالدیلار آشیانیمه
خیمه لر یاناندا تالانمشام
قولاریمدا باخ ریسمانیمه
بولمورم علاجیم ندور منیم
قالمشام یانا یانه یا حسین
سن قیلاندا عشقسن نمازینی
قارداشیم جانی منده قیلمشام
سن گچن ناهاردان یخلمسان
من دونن سحردن یخلمشام
ایندی بیر قنادی سینان قوشام
سایه وه بو ساعت سخیلمشام
ایللریم که جانانه جان وروب
من گلمیشم جانه یا حسین
گیمیشم اسارت لباسینی
قولاریمدان الساعه باغلیام
یوخدی فرصتیم نعشون اوسته بیر
باش آچوب سنه سینه داغلیام
سن کیمی عزیز قارداشیم الوب
بیر دویونجا قویمولار آغلیام
الده تازیانه دوروب منیم
باشیم اوسته بیگانه یا حسین
بس که من او قدری ویریلمشام
چون کبوتر پر شکسته یم
سن اوجور که از هم گسسته سن
من سن تک از هم گسسته یم
نیلورم ایاقه دورانمورام
اوز یریمدن از بس که خسته یم
چرخ دون وروب اختیاریمی
شمر نا مسلمانه یا حسین
بیر بدنده ایوای باجون اله
دورت مینه یاخین یاره سان ورور
سانکه ایندیجه نیزه اوخ دگوب
یاره لر چوخی تازه قان ورور
یرده نقش اولان قانلی پیکرون
عرش کبریانی نشان ورور
دوغرانان وجودون شبیه دور
آیه آیه قرآنه یا حسین
ای شفیع روز جزا عجب
کربلاده محشر یاراتمسان
ایستی یاندیرور خلقی سن اوزون
ایستی قوملار اوستونده یاتمسان
اللی بش ائلین غملی یولداشین
بوشلیوب یادیندان چخاتمسان
من که پایبندم اوز عشقیمه
دوشموشم بیابانه یا حسین
اسير دام خزانم ، بهاري آختاریرام
چمن چمن دولانوب لاله زاري آختاریرام
او بلبلم كي نفسدن سالوب زمانه مني
شكسته شهپريلن عطر ياري آختاریرام
گداليق ايلورم ايللردي عشق شهرينده
اوزاتميشام اليمي شهرياري آختاریرام
تبارحضرت خورشيده قاتميشام ئوزومي
حبيب و حُرّ كيمين اعتباري آختاریرام
ياپيشميشام ايكي اَللي مَلك ئوپن اَتگي
حسين حسين دئيوب اوج وقاري آختاریرام
مسيح عشقيمه وقف ايتميشم جوانليقيمي
بلايه مشتريم چوبِ داري آختاریرام
كتاب مرثيه ده عمريدور قلم ويرورام
شعور ذاتي شعر و شعاري آختاریرام
رديف و قافيه قيدينده قالمارام هرگـز
غزل يازاندا نگاه نگاري آختاریرام
کعبه دی کربلا منه ، مروه صفانی نینیرم
جنته باشدی شانیده،طوف ومنانی نینیرم
زینت خلقتدی اورا، یتمیش ایکی اولدوزی وار
مست الیور حرم منی،سعی وصفانی نینیرم
دوزدی که خلاق جهان ،بدویده خلق ائتدی اونی
خادمی وهابی اولان ، بیت خدانی نینیرم
خیل ملائک دولانار، شوقیله اکبر باشینا
ثانی یاتان یئرده داخی، ورد ودعانی نینیرم
گرچه وئریلارحاجیلار اهرمنی داشلاریلان
شیطان حکومت ائلین یئرده،وفانی نینیرم
کعبه نی ایستیسن اگر،کرب و یلایه فکر ائله
طوف ائله بین الحرمی، سسله حرانی نینیرم
ظلمیله وهابی اولوب ، خادم شهر نبوی
شهر پیمبرده اولان ،ظلم و جفانی نینیرم
شیعه نین حجی باشلانار محرم آیی حاجیلار
منانی مقتل ایلین ، اهل خطانی نینیرم
جامهٔ احرام منه ، حسینیمین قراسیدی
کعبه نین اوستونده اولان شال عزانی نینیرم
قالدی خندان گل لریم سنده امانت کربلا
من خداحافظ حسینی ساخلا راحت کربلا
من گلن گوندن بورا آماج درد ایتدون منی
هر مصیبت هر غمه دوتدون پسند ایتدون منی
قارداشمدان آیری سالدون دردمند ایتدون منی
ایتدون ئوز تپراقوی کنز سعادت کربلا
ای مقدس یر ویرن ای دائما اسلامه پاس
تربت پاکون جنان و کعبه اولماز قیاس
سنده کی قان دجله سیندن قوزانار بیر انعکاس
پخش ائدر آفاقه انوار هدایت کربلا
کربلا سنده دئمه یتمیش ایکی قربان یاتوب
کلمه توحیده دی بیر عده پشتیبان یاتوب
جلوه گاه عشقده جانانه وئرمیش جان یاتوب
اولمیبسان بی جهت محراب حاجت کربلا
منکه ناچارم گئدم اکبر سنون لیلا منیم
ساخلا دامادی عروسی منده واویلا منیم
سنده اولدوزلار قرانلوقدان دولی دنیا منیم
منده عابد سنده ده شاه شهادت کربلا
چخدی اهل کینه سنده ظلمده اندازه دن
سالدیلار غربتده اوراق حقی شیرازه دن
آتلارا جولان وئروب منکوب ائدوبلر تازه دن
سنده شاهد سن ئوزون ایله قضاوت کربلا
کسدیلر سنده فرات اوستونده سقانین یولون
سالدیلار ظلمیله نخلستاندا قولدان صاق صولون
یاخشی شافع ایلدون زهرا ایچون بر جوت قولون
یوم وانفساده اسباب شفاعت کربلا
ایندی شامه عازمم قول باغلی اعدایه اسیر
منله وار هشتاده دین عورت اوشاق خرد و کبیر
سرپرستی بیر منم بیرده یانان تبدار امیر
وار نه اندازه ولی اهل عداوت کربلا
خادمون " شاکر " نه مدتور دوشوب سندن اوزاق
آزقالور چخسون یادیندان سنده کی صحن ورواق
ایستدیم اللهیدن منده یتردیم اشتیاق
قسمت اولسون بیرده دوران زیارت کربلا
بو همان گوندور بو گون قان آغلادی عرش برین
وای اوغول وای سسلدی باش آچدی ختم المرسلین
بو گونون مثلینده ایتدی اهل کوفه هلهله
بو گونون مثلینده دوشدی عرش و فرشه زلزله
بو گونون مثلینده زهرا ساچلارین آلدى اله
کربلایه باش آچوخ گلدی امیرالمؤمنین
بو گون آگاه اولدی گوگلر کاف و ها معناسینه
قاره پوش اولدی بو گون یرلر حسینون یاسینه
دوندی بو گون کربلا میدانی قان دریاسینه
قالدى گرداب بلاده کشتی دین مبین
بیر طرفده فرقۀ کافر دوزولدی صف بصف
بیر طرفده دوردی یتمیش بیر موحّد جان بکف
سینه لر نوک خدنگ و تیغ خونریزه هدف
گیچدیلر باشدان که اولسون سربلند اسلام و دین
اولدی بیر محشر بو گون دشت بلاده بر ملا
محشر کبری بو اصل کلّه بیر فرعی نما
یار و انصار ئولدی یالقوز قالدی شاه کربلا
ماسواللهین پناهی اولدی بی یار و معین
هیکل توحید ربانی قالاندا بی مدد
ظاهر اولدی سرّ لفظ قل هو اللهُ احد
رهبر اسلام آدی ارکان اسلامه عمد
ائتدی حمله دشمنه الده حسام آتشین
ائتدی دعوا اولدی خسته دوشدی دلدن شاه عشق
دوردی بیر یرده که وئرسون ئولماقی عشّاقه مشق
آچدی سلطان حجازه ظلم الین اهل دمشق
سجده گاهیندن دگوب بیر داش یارالاندی جبین
سجده گهدن قان آخوب دوتدی جمال اللهی ثار
سیلماقا قان لخته سین پیراهنین ایتدی کنار
اولدی پیغمبر اوپن بیر قرص خور تک آشکار
یعنی قلب عالمین قلبی مکان لامکین
بزم وصل یاره آچدی ناگهان بیر اوخ یولی
اوخ نه اوخ اوچ شعبه لی زهریله پیکانلا دولی
کربلا مظلومینون قلبی سوسوز پیکان سولی
اکبرین داغیله اولدی اودلی دلده هم نشین
پیش رودن دگدی جوف سینه ده گیزلندی تیر
پشت سرده زهرلی پیکانلار اولدی جای گیر
اوخ دگن یردن چخاتسون اولمادی امکان پذیر
مطلبی عرض ایلرم واضح قیریلمشدی وتین
ائتدی خم قدّین آت اوسته حجت پروردگار
زور وئردی کتفدن چکدی اوخی ائتدی کنار
پیش رودن پشت سردن قان آخوب میزای وار
عالم معناد زهرا باشلادی داد و انین
نقطۀ توحید اوز عشقین ایسته دی اعلان وئره
دوشدی دلدن دؤره سین آلدی قشون چون دایره
گلدی عرشین گوشواری صاق یوزی اوسته یره
سندی اسلامین ستونی تیتره دی عرش برین
آه یا زهرا یرون بوش اوردا یابن العسکری
بیر گوریدون نه جسارت ایتدی کوفه لشگری
قصد غربتله گلن ووردی او یالقوز سروری
شرحینه عذر ایستورم بیر سوزدی توضیحی چتین
بیر نفر مقتول سانسیز قاتل اللرده سنان
بیر طرفدن اوخ ورانلار گلدی اللرده کمان
بیر طرفدن داش ورانلار آه یازهرا امان
نه دیوم؟ نه ظلم لر ویردی بروزه اهل کین
باش یارالی، یوز یارالی سینه ده بیر دسته اوخ
اَنّی اوخلی سینه قانلی نیزه دن داش زخمی چوخ
آغزی قانلی دل دوداق قانلی کمک بر کیمسه یوخ
نحرى منحور ایسّی توپراق جسمی قاندان گل نشین
اوخ اوخ اوستوندن دگوب خنجر یریندن تیغ تیز
داش یریندن داش دگوب یوخ قدرتی ایتسون ستیز
جبرئیل لای لای دیین پیکر اولوبدور ریز ریز
باشینه توپراق سپوبدور عرشیده روح الامین
قتلگاهی دولدوروب دریا کیمی موج ایتدی قان
ایش دایاندی بیر یره رحم ایلدی یاره ووران
شمر گلدی خنجر الده آه یا صاحب زمان
خیمه دن عمَّن اوساعت چخدی محزون و حزین
اللری باشینده بیر باش یوز قویوب دور مقتله
دلده واغوثاه گوزی یاشلی اورکده ولوله
گلدی گوردی ئولمیوبدور قارداشی صاقدور هله
ایستوری اولسون مباشر قتلینه شمر لعین
قاتل و مقتولی گوردی بلمورم نه حالیله
دخت زهرا نطقه گلدی پر اسف احوالیله
قارداشیم جان اوسته دور اینجیتمه بو منوالیله
ال گوتور قوی باغلیوم جان اوسته باری گوزلرین
سینه سی اوستونده دورما چکمه لی ای بی حیا
بو یارالی سینه ده وار گورموسن سانسیز یارا
بوسه گاه حضرت زهرا هارا ؟ خنجر هارا ؟
کسمه باشین قویما باشسیز اهل بیتن دل غمین
یازما «سعدی زمان» مستور قوى قالسون کلام
صون نفسده آچدی قانلی گوزلرین مظلوم امام
زینبی بولمم نجه گوردی امام تشنه کام
توکدی وجه اللهه عین الله دن درّ ثمین
ای زینبون انصار و یارانی خداحافظ
پیغمبر اسلامون قربانی خداحافظ
یا اکبر و یا اصغر یا قاسم و یا جعفر
ای نهر فرات اوسته قولسوز ییخیلان پیکر
وی شام غریباندا قولدان کسیلن اللر
وی خاک و خون آلوده یان یانه یاتان لشکر
ویردیم سیزه بو قانلو میدانی خداحافظ
ای کرب و بلا دشتی ای خاک بلا کردار
من بیر گونون عرضینده ویردیم سنه چوخ کشتار
باس باغروا اینجیتمه گول اوزلو جوانلار وار
معشوقینی عاشق لر نازیله نئجه ساخلار
خوش ساخلا جوانان رعنانی خداحافظ
بیر کعبه بنا ایتدی سنده شه اعلاخیز
ئوز قانی ئیلن قیلدی دیوارینی رنگ آمیز
دعوت ایلیوب زوار تا موسم رستاخیز
زواری گرامی دوت ای دشت نواانگیز
راضی ایله مظلومه زهرانی خداحافظ
ای خیمه و صحراده مظلومه ئولن قیزلار
وی اکبریمون نعشی اوسته دوشن اولدوزلار
باشلار بیزیلن گیتدی قالدی سیزه باشسیزلار
آیریلدی اوغول لاردان قول باغلی اوغول سوزلار
دفن ایتمه میش ابدان عریانی خداحافظ
ای نهر فرات آخدون آرامیمیزی آلدون
سندن بو گلایم وار هی برق بلا چالدون
یاندی بالالار هاردان سن فکریمیزه قالدون
اصغر سنه یالواردی لب تشنه یولا سالدون
بدنام ایلدون بحر عمانی خداحافظ
ای شیر بشر خصلت ضرغام وفا بنیان
سن ایندی کی بو نعش عریانه نگهبانسان
پیغمبره منت قوی ویر زحمتوه پایان
اوچ گون ایلمه غفلت سن چیخما بو میداندان
حفظ ایت گیله اعضای سلطانی خداحافظ
ای پارچا بولودلار کی ویردوز گوگه آلایش
چارم کسیلوب آخر سیزدن ایدورم خواهش
بیر نوعی چکون پرده گون ایلمسون تابش
تاپسون آنامون اوغلی تا کولگه ده آسایش
جوش ایتمیه زخمینده آلقانی خداحافظ
ای گوگده گزن قوشلار خوش خال کبوترلر
میدانه توکون شهپر زلفون داراسون اکبر
موی سر اکبرلن منقاره ویرون زیور
بطحایه قیلون پرواز صغرا یولوزی گوزلر
آگاه ایلیون غمدن صغرانی خداحافظ
ای واحه نشین اعراب چولدن کوچری ایللر
بو غملو گذرگهده غیرتلو مسافرلر
الله رضاسینه یا خاطر پیغمبر
دفن ایلممیش کیچمون بو نعشلری سیزلر
تا شاد ایلیون روح طاهانی خداحافظ
ای چوللرون آهوسی جنگل لرون احراری
من ایلمدیم شاه مظلومه عزاداری
مندن صورا بو چولده باش باشه ویرون باری
ماتم دوتون اولاد زهرایه ایدون زاری
درده گتیرون اهل صحرانی خداحافظ
گوگلوم گنه ده غفلتی القانیله دولدی
عباس مزاری گوزومه جلوه گر اولدی
اولدی نظریمده ایکی گلدسته مجسّم
گوردوم ورولوب گنبده بیر قرمزی پرچم
گوردوم نجه که قرمزینی بهتیده قالدیم
پرچم نیه بس قرمزیدور من خبر آلدیم
آخر بو جواندور دئدی سرداری حسینون
فرمانده لشگردی علمداری حسینون
ناحق یوکولن تپراقا یتمیش ایکی قاندور
سرکردہ سی یتمیش ایکی جانون بو جواندور
اول وقتیکه بو ئولدی حسینون ایشی دوندی
عطشان بالالار آغلادی سعداوغلی سوئوندی
ناحق یره ئولدوردوله بو تشنه جوانی
پرچم اودی که قرمزیدور یرده دی فانی
بو قان قالاجاق محشره ای قان آلان الله
آلدى نجه آلدی امان الله امان الله
شمرون گوز آخوب روحی بدندن اوزولنده
آلدی او قانی اوستونه داشلار دوزولنده
هر کیمسه اوزاقدور دئسه که روز قیامت
سهو ایلوری قالدى نه گون یا نچه ساعت
قرآن دیَن رُعبیلی دیوان عدالت
جان چخدی بدندن نجه که قوپدی قیامت
سعد اوغلی دئدی یوخدی ئولوم یوخدی قیامت
امر ائتدی ورون آتلاروزا نعل بو ساعت
گوزلر قزاروب قولاری چمراق آتا میندی
من نعش حسینی قاتارام تپراقا ایندی
ابله کیشی فکر ائتمدی بیهوده دانشدی
قاندى گوره سن یا یوزی تپراقه قاریشدی
فکر ایلمدی نوریله ظلمات باریشماز
کیم حقه طرف دوز گئده تپراقه قاریشماز
قالخز اوت ایچیندن باشوی ای ایوی ویران
باخ گور نجه دربار حسین اولدی چراغان
باخ گور نه چراغانیدی درباری حسینون
مبهوت ائلیوب عالمی گلزاری حسینون
داش قاشدی تماماً در و دیواری حسینون
الان دولانور باشینه زوّاری حسینون
افسوس بو ایل بیزلره بخت ائتمدی یاری
آغوشه آلاق بیزده او ششگوشه مزاری
ای شیعه لرون قانه باتان تشنه امامی
زوّارلرون واردی سنه عرض سلامی
شش گوشه لی قبرونده چرغانیوه قربان
گلدسته لره طاقیوه ایوانیوه قربان
حق اوسته او ناحق توکولن قانیوه قربان
قان صاحبینه جانیوه جانانیوه قربان
یتمیش ایکی لشگر الى قانلی یوزی قانلی
نهر اوسته او غیرتلی نگهبانیوه قربان
اول تازه جوان که طوى اطاقینده یاتوبدور
آغ سقّل حبیبه قوجا دربانیوه قربان
نورسته جوان که یوزی قانلی ایاقوندا
سینونده یاتان خرداجا قربانیوه قربان
ای وئرن کرب و بلاده تشنه لب جان الدّخیل
ای اولان ئوز قانینه ظلمیله غلطان الدّخیل
ای اولان برهم اساسی خیمه گاهی اودلانان
ای گئن باشی جداده شام شومه ارمغان
اهل بیتی ای اولان با ناله و آه و فغان
ظلم الیلن دستگیر قوم عدوان الدّخیل
حدّه گلدی چرخون آخر ثابت و سیّاره سی
بو نجه پیکردی بیلمم حدّه گلمز یاره سی
اوچ گجه گوندوز قالان ای جسم پاره پاره سی
بی حنوط و بی کفن بی غسل و عریان الدّخیل
ای خلیله نار نمرودی گلستان ایلین
یوسفی مصر ایچره اهل مصره سلطان ایلین
فرقۀ گمراهه جداً حقی اعلان ایلین
ای ائدن موسی عصاسین عین ثعبان الدّخیل
سندن اوزگه اولمادی کس عابده محراب عشق
اولدی هم تابنده سندن مهر عالمتاب عشق
یتمیش ایکی تندن اوزگه تاپمیان احباب عشق
ایلین یالقوزدریغا عزم میدان الدّخیل
کئچمسه جانیندن عاشق میل جانان ایلمز
میل جانان ایلین میل سر و جان ایلمز
اکبرینی سن کیمین لب تشنه قربان ایلمز
شیرخواره اوغلنی آماج پیکان الدّخیل
آه او وقتدن ای شه گلگون قبای کربلا
کئچدی مینادن دییردون بو منای کربلا
بو حسین بو شمر بو باش بو فضای کربلا
قیلدون اوهام عقولی محو و حیران
الدّخیل
یاخشی سودا کربلاده ایلدون جانانیلن
وارد جانانه اولدون نقد باش و جانیلن
سویلدون اولسون گرک بو یرده آخر قانیلن
دستمازی عاشق حقون ،یوخ امکان الدّخیل
آرزوی وصلون ایلر چونکه مستوندور سنون
کسمیش عالمدن امیدین پای بستوندور سنون
التفاتون کسمه "بیضادن" شکستوندور سنون
ای امیر عرصه گاه یوم دیوان الدّخیل
سواره تیغ برق افشان الینده فکری دعوا دور
مرصع دور لجامی، مرکبون زینی مطلا دور
قزل جوشن وار اگنینده جلال و شأنی اعلا دور
حسین ابن علی روح نبی دلبند زهرا دور
بو وصفیلن گلوب میدان جنگه حیف تنها دور
سلاح جنگینون هر قطعه سی میراث سلطانی
رسول اکرمون دراعه و دستار شایانی
جناب حمزه نون گوهر نشان نه قبه قلخانی
علی المرتضی نون ذوالفقار تیز و برانی
طلابفت و جواهر کوب یک قبضه دو پهنا دور
هوایه ذوالجناحون نعل آلتدان کیمیا قالخار
کانه دنده ی سوهانیدن مغز طلا قالخار
نئجه لاهوته گور ناسوتیدن نور خدا قالخار
سوسوز لبلردن اما کلمه‌ی انی فدا قالخار
کنایه بو مبارک کلمه دن ذبحاً عظیما دور
حسینه خارجی آدی قویوبدور زاده ی هنده
شریحون خط و امضاسیله تکمیل اولدی پرونده
او حکمون رو نوشتین یازدی اوراقه نویسنده
سراسر مملکتده ائتدیلر پخش و پراکنده
حسینون قتلی گویا مسلمینه فرض ایفا دور
یزیدون حیطه‌ی حکمینده اسلامی اولان یرلر
نقاط آسیاده چینه پیوسته نئچه کشور
حدود غربده اقیانوس اطلس، موج آور
شمالا انتهای سیبریه مرزیدی سرتاسر
جنوباً استوائی خطه تاریخ حکمفرما دور
حبش نزدیک خط استواده خاک آفریقا
اروپاده فرنگستانیدن بیر حد مستثنی
شمالیده وین اطریشده پاتختدور حالا
هنودستاندا پاکستان فعلی خطه‌ی زیبا
قدیمی نقشه لرده بو ممالک نصف دنیا دور
بو وسعتده ممالک ده دهستان واردی شهرستان
گله هرتک تکیندن اون نفر تشکیل تاپار ملیان
فریضه بیلدیلر حکم شریحی مردم نادان
بلا صحراسینه لشکر شتابان اولدی هر یاندان
گوروندی روز عاشورا قشون چوخ موج دریا دور
شیوخ نهروان قرآن حمایل آلنی برجسته
سنین نیزه‌لر بنذر زبان افعی مسته
سه شعبه تیر و پیکان جعبه دانلاردا نئچه دسته
قلجلار سوولانوب قول چمرانوب دامن بئله بسته
امام ئولدورمگه الله اکبر گور نه غوغا دور
نقاب اعرفونی آتدی وجه الله جمالیندن
او نابینالر آلسون فائده شمع وصالیندن
یاغاردی در ابیض لعل و یاقوت اتصالیندن
اولون آگه جماعت سیز حسینون شرح حالیندن
بابام احمد آتام حیدر آنام زهرای کبرا دور
ندای اعرفونی دفعتا ناقص قویوب لشکر
آیاقلار بیر بیرینه دگدی سسلندی اوزنگی‌لر
نئجه آهن دوگنده سسلنور دکان آهنگر
پیاده صف لریندن ظاهر اولدی مختلف سسلر
امامون حجتینه بو هیاهو عذر بی جا دور
بو وضع نامناسب شهریاری ائله دی وادار
او قومه بیر نمونه قدرتیندن ائله سین اظهار
بویوردی ایها الجند الشاطین اسکتوا زنهار
واریمدور اقتداریم روحوزی الآن ائدیم احضار
منیم حکمیم تمام انفاس و ارواح ایچره مجرا دور
نشست ائتدی او دم رعب امامت نحس دللرده
تصرفله قوروتدی قوه‌ی روحی بدنلرده
پیاده یا سواره دوردی ساکت دوردوقی یئرده
یونولمیش داش تک هیکللر صف اندر صف برابرده
فنا آیینه سینده هر بیری بیر صورت لا دور
بو قدرتلن سیزی ائتدیم مخیر اوچ سوزه لشکر
گورون ذی نفع سوز هانسیندا اجرا ائیله یین سیزلر
قیتسون یثربه منع ائتمیون تا آل پیغمبر
وئرون یا بیر ایچیم سو تشنه دور تشنه یانور لبلر
و یا جنگیمه گلسون بیر به بیر کیم مرد هیجا دور
قبوله یتمدی افسوس شرط اول و ثانی
اوچومجی شرط قانون عرب جلب ائتدی اعدانی
شجاعان مبرز گلدی دوتدی راه نیرانی
او روباهان کم جرات تانیدی شیر میدانی
غراب بی هنر هاردان حریف رزم عنقا دور
گوروب سعداوغلی تاپماز قصدی بو ترتیبلن انجام
وئروب فرمان یئریندن اوینادی نیروی خون آشام
قشون واحدلری جنگ وجود واحده اعزام
او غیر عادلانه حمله که اونلار ائدوب اقدام
نه قانون عرب طرز رسم ترسا دور
نئجه پوره وئرور یای فصلی پشه شهد ناب اوسته
اونون مثلینده لشکر حمله گتدی اول جناب اوسته
نئجه بیر خشمگین شهباز اوچار فوج غراب اوسته
اونون مثلینده حضرت زیندن قالخوب رکاب اوسته
ملخ دن موردن زنبوردن شیره نه پروا دور
دوه‌لر صیحه سی آت شیهه سی آواز واویلا
عربلر سسلنور طبل و دهل گرهاگر اعدا
طنین اندازی دی آفاقه صوت غرش و عرا
او ساعتدور اهم ساعت ساعات عاشورا
هامی قدّوسیان حیرتده مشغول تماشا دور
هوانی توز دونوب یئللر اسور صحرا اولوب طوفان
زرهلر سسلنور اوخلار یاغور رد ائیله ییر قلخان
پاریلدار تیغلر آت دیرناقیندان برق اولور تابان
حسینون صولتی فردا به فردین ائیله ییب لرزان
گوروندی هرباش اوسته بیر حسین بیر تیغ برا دور
انا بن راکب الرفرف مقیمالعرش بالنعلین
انا بن ضارب السیفین انا بن صاحب الرمحین
انا بن فاتح خیبر انا بن فارس الصفین
انا بن سید الکونین با کی العینین
قریشون افتخاری خانه زاد حی یکتا دور
ابی مخنف دئیر بیر گوشه ده دور دوم تماشایه
حسینون سینه سین گوردیم نشان تیر اعدایه
اوخا پیوند اولوب اوخ تپراقا اوخلار سالوب سایه
یوخیدی یاره سی دالدان دلیلیم وار بو معنایه
او حضرت غیر فرار اوغلیدور کرار اعدا دور
قناد آچمیشدی اوخدان اوخشیوردی مرغ پرداره
زره منفذلریندن قان آتاردی مثل فواره
محاسن مولریندن قان سوزردی زین زرداره
اولوبدور ذوالجناحون سینه بندی سینه ده پاره
بویانمیش راکب و مرکوب چون یاقوت حمرا دور
بو حالتدن عجب‌تر حیرت آور بیر بو مطلب دور
ئولوب قارداشی اوغلی لشکری قانه مخضب دور
قالان تنها ئوزی دور بیر قلج دور بیرده مرکب دور
سسینه سس وئرن عورت اوشاقدور بیرده زینب دور
بو اوصافیله اعدا افکن و ضرغام غرا دور
روایتدور چکردی اول جناب هر نعره که دلدن
مبارزلر وئروردی اختیار مرکبی الدن
چکیلدی کوفه سمتیتنه قاچان لشگر مقابلدن
کنار اولدی او ساعت نور حق ظلمات باطلدن
بلی دیجوردن شمس جهان آرا مبرا دور
قیتدی مرکز میداندا دوردی مفخر لولاک
آلیشمیشدی حرارتدن اورک، عطشان دوداقلار خاک
قوری تخته کیمی آغزیندا دیلدن سس اولور ادراک
خطابی لشکر سفیانه من الما دور
کئچوردی بیر نفر سیاح دنیاگرد گردآلود
الینده چوبدست آشفته مو چالاک و ره پیمود
حمایل گردنینده سو دولی بیر قمقمه موجود
غذا و قوتی هم یانینده مست باده‌ی مقصود
زمین کربلاده گوردی بیر محشر هویدا دور
داغیلمیش حربگاهه قولدی باشدی دوغرانان پیکر
دایانمیش نیزیه بیر سید مظلوم و بی یاور
دوداقینده دیلینی گزدیرور گویا که سو ایستر
ولی تشخیص اولونماز پیکری پیکاندور اعضادور
چیخارتدی کیسه دن بیر ظرف چوبینه شتابیلن
همان ظرفی لبالب ائتدی فی الفوری آبیلن
مقابل اولدی سیاح احتراما اول جنابیلن
ایکی الده تعارف ائتدی عذر بی حسابیلن
دئدی آل ای غریب ایچ بو سوئی خیلی گوارا دور
او میراب بهشتی ساقی کوثر دلارامی
کمال لطف ایلن سیاح الیندن آلدی اول جامی
سوئی سپدی یئره سو ایچمدی بو تشنه هنگامی
ایکی انگشت آرا سیندان ائدوب سیاحه اعلامی
بویوردی گور نه عالم سیر ائدورسن هانسی ماوا دور
امامون امرینه تسلیم اولوب سیاح خوش کردار
چکیلدی پرده‌ی غفلت گوزیندن کشف اولوب اسرار
باخاندا بیر مکان گوردی مشجر گلشن و گلزار
ریاض جنت فیها عیون تجری الانهار
قدح‌لر الده شربتلن دولی آماده حورا دور
دوباره ائیله دی سیاحی آگه سر پنهاندان
توکوب سو جامینه بیر قبضه حضرت ریگ میداندان
قاماشدی مرد سیاحون گوزی برق درخشاندان
دولی گوردی سو جامین گوهر و لعل فروزاندان
تمام الماس و مرجان و زبرجد در لالا دور
گورنده بو ایکی اعجازی غیبون پرده داریندن
تعجب ائیله دی شاهون عجایب اقتداریندن
بو ایستی بو عطش بو قدرت و صبر و وقاریندن
ییخیلدی ذوالجناحون اوپدی سم خاکداریندن
دئدی جانیم سنه قربان بو نه سر
اِیلینده قَتلگهده شاهِ دین راز و نیاز
بارگاهِ قُدسدّن سَس گلدی گویا اِیتمه ناز
باخما آغلور زِینبِ کُبری حَبیبی یاحسین
گَل یولون گوزلور آنان زَهرا حَبیبی یاحسین
وِیرماقا جانان یُولوندا جان، نَدور بو کَش مَکش
چوخ حَرارحت وار هَواده جِلدون اِیلوب مُنکمش
یوم گوزون، باخما فراته، اِیتمه تکرار اَلعطَش
قوی سُوسوز قانون توکه اَعدا حَبیبی یاحسین
سَن دِیَنده اَلعطش اِی فَخرِ اولادِ خَلیل
مُوج اِیدور دَریا کیمی جَنّتده نَهرِ سَلسَبیل
باش آچوب ساقّی کوثر، ناله اِیلور جَبرَئیل
جَدّون اِیلور بَزمِ غَم بَرپا حَبیبی یاحسین
بُولدولر قانون اگر چه بی بَها اَهلِ جَفا
اِیتمه غَم امّا، اُوزوم اُولّام سَنه مَن خُونبها
دَرگهِ قُدسونده عَبدِ رِقّ اُولالّار ماسوا
اِی قتیلِ شِمرِ بی پَروا حَبیبی یاحسین
فَرش اِیدوبلر یولّارا گیسولَرین حوریّه لَر
اِنتظارِ مَقدم ندور قُدسیان با چشمِ تَر
باخما اِیلور داد و ناله زِینبِ شُوریده سَر
باش آچوب فَریاد اِیدر لیلا حَبیبی یاحسین
تَشنه سن کوثر سَنون، بو جَنّت المَأوی سَنون
عالَمِ اَعلا سَنون، دنیا و مافیها سَنون
دستگاهِ خِلقَتیم یِکسر، اوزوم حتّی سنون
ماسوا حُکمونده دور یِکجا حَبیبی یاحسین
پَرچَمون باخما یاتوب، لَشگر سینوب، یوخدور مُعین
دُوغرانوب اکبر، سالوب اَعدا اَبُوالفَضلین الین
وُور شَفاعَت بِیرقین مَحشرده مَقطوع الوَتین
حُکموی کیم ردّ اِیدر آیا حَبیبی یاحسین
تَک قالوبسان جَمع اولوب بی حَد جماعت باشیوه
اُون اِیکی یردن دَگوب کاری جَراحت باشیوه
سوگُلوم زیبنده دور تاجِ شَفاعت باشیوه
سن اوزون سَن شافعِ عُقبی حَبیبی یاحسین
سن کیمی هیچ عاشقین آبِ وضوسی قان دَگُول
گون قَباقینده یارالی پِیکری شان شان دَگُول
سَجده گاهی داش یری، مَسجَد دولی پیکان دَگُول
یاخشی اِیتدون عَهدیوه ایفا حَبیبی یاحسین
کیم سنون تک سُو یِرینه لَخته لَخته قان ایچوب؟
قامتِ رَعناسینه اوز اُوغلوون خَلعت بیچوب
شیرخواره اَصغر و عَبّاس و اَکبردن گیچوب
دینِ اسلامی اِیدوب اِحیا حَبیبی یاحسین
باخما تیغ و خَنجر اَلده اُوستوه لَشگر گلور
بیر طَرفدن اوخ گلور، بیر سَمتدن خَنجر گلور
باشون اوسته زینبِ مَظلومه بی یاور گلور
دیده گریان دلده واویلا حَبیبی یاحسین
سوزِ آهُون یاندیرور عَرشِ بَرین اَهلین یاخُور
چِشمه چِشمه بو یارالی پِیکروندن قان آخور
عَرشدن جدّون، آتان حِیدر، آنان زَهرا باخُور
آغلور اَهلِ عالَمِ بالا حَبیبی یاحسین
اِیلمه خَنجر دَمینده بیر بِیله جُوش و خُروش
ساکنانِ عرشِ اَعلادن آپاردُون صَبر و هُوش
آز قالور گوز یاشون اِیتسون نارِ نِیرانی خَموش
قاتلونده یانماسین اَصلا حَبیبی یاحسین
بو بُوغازون دان آخان قانه حَبیبیم اِیتمه غَم
اَهلِ دُوزَخدن جَزاده اُولقدر عَفو اِیلرم
تا اُوزون راضی اُولارسان اِی اِمامِ مُحتشم
شأنِ پنهانون اُولار پِیدا حَبیبی یاحسین
اِی عزیزِ فاطمه اِی جدّهء (سعدی زَمان)
اَیسته اُولعَرش آستان دَرباره گَلسون میهمان
بو حسینی لر، (حسینی) بیرده (اشرف) نوحه خوان
سَسلسونلر قَبرون اُوسته یا حَبیبی یاحسین
مجلس حال دوزلدوب اوزینه دلده خیال
عالم هجریده سرخوش ایدوری فکر وصال
خانهء هجریده وصلیله هم آغوش اوتوروب
یوز دوتوب عَقله اِیدور فعلیله تَصدیق سوال
سن دیردون که قضا کلکی قَدَر لوحه سینه
یازمیوب وصل نگاری اولا بو اَمر مَحال
بو سوزون دعوی باطل دور اوزی بی مدرک
مدرکون وار سوزون اِثباتینه گر اَلده تعال
ایکی میز فعلاً ایداق محکمهء عشقه رجوع
تا گوراق عشق حضورینده نولار اَمره مآل
سن دین اولماز اولوب حقّ سنیلن دور منیله
صدقیله کذب اَثَری ظاهر اولار حَیثُ یُقال
اَلغَرض مَحکمهء عشقه گلوب هر ایکیسی
بیر بیریله ایدوب اثبات کلام اوسته مَقال
مطلب از بس که چکوب طول اولوب عشق ملول
دل آچوب ردّ جوابه او پسندیده خصال
سُویلدی هجریله وصله نه بُلورسوز نَدی فَرق
بی خبرلر ایدوسوز مَحض غَلط جنگ و جدال
وصل بیر نکتهء باریک دور عشق اَهلی بُلر
دگل عقلی بُله لقمان، دگی زوری بُله زال
هجر بیر علّت مُهلکدی اولا هر کسده
قالا هیهات دوا اِیتمسه لقّمان خیال
لیک فکریله وصال اولسا تجسّم دی غلط
مَحو اولار فوراً، اونا صِدق ولی بی اَصل نَوال
وصل اولار اوندا ایکی روحه اولا بیر غالب
اوزگه لر بُلمز حسین بن عَلیدن خبر آل
او گزوب عالم هجرین دولانوب شش جَهتین
او تاپوب وصلِ نگاریله مَقامات و جَلال
عالم غیبی گزوب گَلدی شهود عالمینه
فکرِ وصلِ حقیله ویردی تمامه مَه و سال
گوردی حائلدی ره وصله شئونات وجود
اِیلدی ترک سر و مامَلَک و اَهل و عَیال
تاپدی بیر روحه ایکی قالب اولان رتبه نی لیک
ذات خلّاقه نه وار قالب و نه روح و مثال
کُنهِ عَبدیّتی درک اِیتدی ربُوبیّته باخ
عَبد رَقّ ایتدی اونا خلقی خدای مُتعال
کافیه باب امامتده اِصوله نظر اِیت
اونّدا که اُوستنه چکمیشدی قزل قانیله شال
اوردا بیر لطف خَفی اولدی اونا یوخدی یولوم
عَوض لَن نه گلوب اَرنی اِیدن وقته سوال
مطمئن اولدی دیدی ایمدی گوارا دور اُلوم
دوزه لوب گون خوشام عمر گونی درک ایتسه زوال
دیمورم اکبریمی دوغرادولار قوم دنی
لَخته قانیله خُسوف ایلدی اول ماه جمال
شبه طاها باشی حیدر کیمی مُنشقّ اولدی
ظلمیله قانه بویاندی او گوزل هاشمی خال
تشنه لب قارداشیم اوغلان لارین اُلدوردی عدو
سو کیمی قانلاری اولدی یارالاردان سیّال
آلتی آیلیق بالامی آلدیم اَلیم اوسته سوسوز
حَرمَله ویردی خَدنگیله اونا آب زُلال
ظلمیله قارداشیم عبّاس قولی اولدی قلم
جسمی شهباز کیمی آچدی اوخیله پر و بال
علمیم یاتدی، بیلیم سندی، داغلدی قوشو نوم
پایهء سلطنتیم تاپدی بو گون اضمحلال
دیمورم ویرمیشم عشقونده اوغول، قارداش، باش
دولودور قانیله دریا کیمی میدان قتال
گَله هیهات حسینون دلینه کلمهء من
سنه مختصّیدی باش، پیکر، اوغول، مال و منال
کربلا عشق مناسی، من اوزوم عشق ذَبیح
اوزگه بیر سرّیدی بو ناله، بو فریاد و ملال
نالهء عشقیدی جسمیمده سیزیلدار یارالار
گوستَرور یاریمه هر بیر یارا بیر صورت حال
کوفیان وورسالا مین بیله یارا اُوف دیمرم
عشق نقصانی تاپار یاره لر آرتدوقجا کمال
حقّ یرین دوتیدی دگن قلبیمه ناحقّ پیکان
پیک جانان بُلوب ایتدی اوره گیم استقبال
گوردوم اوچ شعبه لی اوخ تنگ ایدوب عشقون یرینی
کوره گیم دن چکوب آتدیم، اَله گَلدی آمال
مخزن سینمی سیندیردی سِنانیله سَنان
آنامی ایلدی جنّتده پریشان احوال
بو بلا دشتی، بو من، بو سپه کوفه و شام
بُلوری قانیمی بو قوم جفا پیشه حلال
راضیم شمر دنی نیزیه وورسون باشیمی
جسم یمی ایلسون آت دیرناقی یرده پامال
باجی مون قیزلاری مون باغلاسون اشرار قولین
آچسون اَل شیرخدا قیزلارینا قوم شغال
بیر بو شرطی له حسینی لری عفو ایله منه
بوغازیم قانیله گیچ ایلسه لر جرم و وبال
خاصّه (سعدی زمان) منشی درباریم دور
خلدیده قرب مقامین خوشام ایتسون اشغال
بارالها بو نماز آخر نمازیمدور منیم
بو بوغازیم دان آخان قان دستمازیم دور منیم
چونکه ایتموش دوم سنیله عهد من روز ازل
من ویرم جانی بو چولده ای خدای لم یزل
ایت دوقوم عهده بو گونده ایلرم یارَب عمل
بو قوری لبلر بو خنجر بو بوغازیم دور منیم
یاندوروب خشک و تری بو دلده کی سوز عطش
وار ازلدن عشق میدانی نده بیله کشمکش
عاشقه خوش دور آخا قانی ایده قان ایچره غش
جلوه گاه عشقیده بو یر نیازیم دور منیم
ایچدیق یم جام بلا صهباسی نین سر مستیم
عشق بزم ینده محبت نازینین پا بستیم
مقصدیم سنسن نه اهل کوفیه وا بستیم
شوق وصلیندن قوری یر جانمازیم دور منیم
نیزه باشیندا کسیک باشیله معراج ایلرم
یاره لن میش باشیمه قان لخته سین تاج ایلرم
مین خدنگه سینمی بو چولده آماج ایلرم
چونکه خولینین تنوری بزم رازیم دور منیم
جسم یمه وورسون گرک اول قدر یاره بو سپاه
سیل تک قانیم آخا تا که دولا بو قتلگاه
عشق مقتول ینه اولماز بوندان اوزگه خوابگاه
محضرونده بیله یاتماق خواب نازیمدور منیم
اولموشام موسی صفت بیر نوع یله محو جمال
یوز بیله ظلم ایتسه لر یتمز منه اصلا ملال
آتلارین دیرناقی آلتین دا اولا گر پایمال
راضیم چونکه نیاز بی نیازیم دور منیم
یا حسین تا وار حیاتیم روز و شب صبح و مسا
ایلرم شرح مصیبت ای شهید کربلا
شاهدی وار دور بو (دلریشین) آقا روز جزا
عارضیمده گوزیاشیم بو سوز و سازیم دور منیم
بو قدر ئولوم یولونا طرف ایلمه شتاب اخی یا اخی
گَلورم دالونجا توقّف ائت منه وير جواب اخی یا اخی
سنه گر چه زحمت اولور ولی منی بولمه بیر بیله بی ادب
بولوسن اوزون بو چاغورماقا بو جسارته نه اولوب سبب
که خصوصی بیرجه سوزوم قالوب اورگیمده ای شه ِتشنه لب
دیه بولمدیم اونی خیمه ده منِ دلکباب اخی یا اخی
هامی اهل بیت باخور دولار سوروش آنمادیم بو سوزی علن
بیور ایمدی واضحنی گوروم گلوسن خیامه دوباره سن؟
او فلک و یا که چتین قویا سنی صاغ گورم آنام اوغلی من
بو بلا کشیده وصالدن اولا کامیاب اخی یا اخی
باجینی گورن کیمی قارداشی ایله جِدّ و جَهد و تلاشيله
که فرات و شطّی خجل ایدر او ایکی گوزونده کی یاشیله
دیمدی داخی گَله بولمرم بیر اشاره ائیلدی باشیله
دئدی یعنی نیزه ده باشيمه باخوب ائت خطاب اخی یا اخی
دئدی ایمدی که گَله بولمسن داخی، بیرده خیمیه باری گَل
بیر اوپوب بوغازیوی ائیلیوم آنامون وصيّتنه عمل
بیله بیرده فرصت اولا چتین بیله مقتضی اولا بیر محل
بیله وقتی بیرده چتین تاپا بو ایوی خراب اخی یا اخی
شه اولوب پیاده تَلطفاً ائده شاهزاديه التفات
او وزیر زادهٔ اعظمی ایلدی بو لطفيه شاه، مات
او دوزوب نقودِ تحمّلین ایدوب عاصی عشقِ عشیقی لات
دئدی بحرِ عشقده زینبون گور اولوب حُباب اخی یا اخی
او یول اوسته قولّارینی آچوب، باجی بیر قوجاقلادی قارداشین
هر ایکیسی آغلادی اولمادی بیری تا گلوب سیله گوز یاشین
قویوب ال عماميه قوزادی باجی قارداشین یوخاری باشین
بوغازین اوپوب دئدی توکمه چوخ یوزه اشگِ ناب اخی یا اخی
بیله حسرتیله خیامیوه باخوب ایتمه اشگِ ترون روان
بیزی تاپشور حقّه اوزون دورُوب رهِ حقّده ئولماقا اول روان
منه قوی قالا بو قوری قفس، سنیله روانه اولا روان
باجیوین وفاسینی تا بوله هامی شیخ و شاب اخی یا اخی
آنامیز بتولدن ارث دور منه درد و محنت و رنج و غم
گور اونون کیمی آغاروب ساچیم بو کشیده قدّیم اولوبدی خم
داخی دور ماقا دگلم رضا که خیامدن باخوری حرم
غم و غصه آرتیری قلبوه يتشور عذاب اخی یا اخی
دیوری دلیم آنام اوغلی گئت ولی دوز موری اورگیم هنوز
که دولان دیراندا گوزون ائدر اورگیمده مِهر و وفا بروز
گر الیمده چارم اولا منیم سنی قویمارام گیده سن سوسوز
بیله لبلرون قوریوب دوتوب دلون التهاب اخی یا اخی
دیموسن دونن گئجه اشقیا بو گون ئولدورور منی تشنه لب
بو قوشون عنادینه، مرتضی آتامین عداوت یدور سبب
ولی منده کنج خرابه ده گئجه لر قيلاندا نماز شب
ایدرم ایکی دولی جام یله چو سبیل آب اخی یا اخی
من او بُلبلم سخنِ چمن، نقدر وارام دیوب آغلارام
سارالوب گلوم پوزولوب سمن نقَدَر وارام دیوب آغلارام
بو سوسوزلوقون آنام اوغلی من نقدر وارام دیوب آغلارام
که حرام اولور منه دهرده داخی خورد و خواب اخی یا اخی
او سرشکِ آلیوه من فدا بیله آغلاما سفر اوسته سن
بولورم که یاتمامیسان گئجه بدنونده وار یارا خسته سن
دیمه یوخ رکابوی ساخلیان گینه قوی قدم گوزوم اوسته سن
که عزیزیم اکبریمه عوض دوتارام رکاب اخی یا اخی
ویر اجازه فرش ایلیوم یولا آغاران بو زلفِ سیاهیمی
چاغوروم حرملری خیمدن چو صفِ سلامه سپاهیمی
مَلِکانه چتر کیمی آچوم باشون اوسته دودهٔ آهیمی
که مباد یاندیرا عارضِ مهون آفتاب اخی یا اخی
سنی گرچه (شأنی) آتوب بو خلق، ولی غم يمه که دوتوب حسین
سنه بیله نطق و فصاحتی چون اوزی عطا بویوروب حسین
اَبه یا اَبه سوزینی زبس هر عزاده خوش اوخیوب حسین
که یازوب وداعده بیرده یاز بیله بیرخطاب اخی یا اخی
ایله مشتاق وصالم بیلمرم صهبا ندور
غم ندور محنت ندور باشیمدا بو غوغا ندور
عالم تجری دیده صهبای غم نوش ایت موشم
بو علایقدن اوزوم بالمرّه مدهوش ایت موشم
ملک و مال و خانمانی هم فراموش ایت موشم
بلمرم بو نشئه ده دنیا و مافیها ندور
گر چه خلقه علّت غتئی وجودیم دور منیم
ترک قیلماق بو وجودی اصل جودیم دور منیم
عین طاعت قبلهء عشقه سجودیم دور منیم
مسجد و محراب و منبر گوشهء صحرا ندور
ماسوالله شوقینی قلبیمده اخراج ایلرم
عالم ناسوت یدن لاهوته معراج ایلرم
دین یولوندا ملک جسم و جانی تاراج ایلرم
عاشق و معشوق بلمز سر ندور سودان دور
گربلا طورینده من ادراک انوار ایلرم
لمعهء نور تجلای رُخ یار ایلرم
لَن تَرانی عالم ینده وصل دیدار ایلرم
مخفی عشق اولماز محبّت لَن ندور لَمّا ندور
درک انوار ایچره مدهوش اولمارام موسی کیمی
ظلم الیندن آسمانه چیخمارام عیسی کیمی
ترک قیلّام جسم و جانی حضرت یحیی کیمی
قاب قوسین عالمی موسی ندور عیسا ندور
طور سینای شهادت کربلا دشتینده دور
بو شهادتده سعادت کربلا دشتینده دور
عهد و میثاق و امانت کربلا دشتینده دور
عالم انوار دور موسی ید بیضا ندور
بو جفا لردن یتش مز قلبیمه گرد ملال
صبح عاشورادی ایمدی اولمیوب وقت زوال
اول سببدن انتظارم گوزلورم بزم وصال
بلمرم حنجر ندور خنجر ندور اعدا ندور
گر چکم یوز محنت و غم عین راحت دور منه
کربلا درد و ملالی عیش و عشرت دور منه
چکدیقیم در دو مصیبت شور و لذّت دور منه
لذّت جاوید خوشدور لذّت بیجا ندور
حالت کرببلا غوغاسی شور انگیزی دور
غصهء پر غصّه احوال ملال آمیزی دور
مختصر قیل (شاکیا) طوفان محشر خیزی دور
کیم گوره بو حشری بلمز مَحشر کُبرا ندور
اسیرم گر سپاه زادۀ مرجانیه قارداش
ولی ئولسمده من یالوارمارام بیگانیه قارداش
حسینیم دُخت زَهرایم عدودن ایتمرم پروا
شهامت درسینی ویرمیش منه سر مشق آنام زَهرا
در و دیوار آراسیندا گوروردی هر قدر اِیذا
گوروردون سن که یالوارمازدی اَصلاً ثانیه قارداش
بو رَسم عشقی دور پروانه لازم دور یانا شمعه
او بلبل سن سولوبدی گللّرون گلمز سسون سَمعه
خلیل عشق سن سن، سر پرستم منده بو جَمعه
بو مَنصب بسدی زهرادن اولان رِیحانیه قارداش
سنون قارداش یولوندا هر بلا گلسه دایانّام من
شرار عشقیوه پروانه تک شُوقیله یانّام من
دوشوب بیر باش باشون آردینجا شاماتی دولانّام من
قوی اوخشات سون سنون عشقون منی دیوانیه قارداش
دولانّام هر دیاری ناقه اوسته حال زاریله
سو ویرّم نخل دینِ حقّه چشم اشکباریله
وورار آهیم علم هر یرده بو پوزقون قطاریله
باخا هر کیم اِیده لعنت یزید جانیه قارداش
اگر دشمنلرین حالین پوزار حال پریشانیم
ولی جان گیتسه ده گیتسین بو دینه وقفی دور جانیم
تاپوب دور پرورش سر چشمهء دیندن اَتیم قانیم
باشیمدان آتمارام دین فکرینی بیر ثانیه قارداش
حسینیم کاسهء عشقیم اولوب دور شوریله لبریز
مگر وار هانسی عاشق ده بیله بیر عشق شور انگیز
قیاس ایتمز منی شَمعیم یقین پَروانیه هرگز
وفا سر مشقینی من ویرمیشم پروانیه قارداش
اَسنده تند یل گل سیندیرار سروین قدین اگمز
حریم عصمت کُبرای حقّه غیر الی دگمز
جهاندا آل هاشم دشمنه باش اگمیوب اگمز
باجون زینب ئولر عجز ایلمز بیگانیه قارداش
اگر چه سن علیهِ کفر و ظلمه ایلدون نهضت
بویان دون قانیوه هرگز یزیده ایتمدون بیعت
ولی سندن صورا عشق اهلی نه نه عید و نه عشرت
ملالون دوندرر بو عالمی غم خانیه قارداش
بو واضح دور مسافر سعی ایدر تیز منزله یتسون
گیدور شامه باجون گلدی دولان سون باشیوه گیتسون
ولیکن هر کسه لازم دی دیده بازدید ایتسون
بو دیدین باز دیدین ساخلا سن ویرانیه قارداش
گیچن گون خیمه دن عرشه او جالدی بانگ وا عبّاس
اوشاقلار بوینی چیگنینده سنه مخفی دوتوبلار یاس
گجه گوردوم نگهبان یوخ اوزوم اطفاله ویردیم پاس
قنادسیز قوش لاری یغدیم یانان کاشانیه قارداش
حسینیم نوکرون بو (اعظمی) ایلر مدام افسوس
ایدر حسرت او شش گوشه مزاره بیر اولا پابوس
او شه سن درگهوندن سائلی قیترمه سن مایوس
گله هیهات سن تک شه بو دار فانیه قارداش
باجون زینبی دور گور امان دور آتام اوغلی
باشون آردیجه شامه روان دور آتام اوغلی
دونن قانه غمی نده بو گون گوز یاشیم ایوای
دوشن درد و بلایه بلالی باشیم ایوای
قالان پیکری عریان سوسوز قارداشیم ایوای
بو حالون منِ زاره گران دور آتام اوغلی
باجون واریری یان سا ئولونجه محنین ده
نه بارماقون اَلی نده نه باشون بدنی نده
گیدوب غارته مندن آلان پیرهنی نده
حسین وای منه ورد زبان دور آتام اوغلی
نه رحم ایلوری دشمن منِ زاره یارالی
گلور قمچی الینده ویرور یاره یارالی
نه اطفاله باخولّار نه بیماره یارالی
اولوم حالی بالاندا عیان دور آنام اوغلی
اوزون رسم و فانی بو صحراده نشان وِیر
باجون قلبی نه بیرده آنام اوغلی توان وِیر
مسافر دالسی نجا ایاقه دور اَذان وِیر
باجون شامه گُورورسن روان دور آتام اوغلی
نه مهلت وِیرور اعدا سنه آغلیه زینب
توکوب گوزیاشی گوزدن سینه داغلیه زینب
قلج نیزه یاراسین قالوب باغلیه زینب
بو غمدن قد زینب کمان دور آنام اوغلی
بو صحرایه گلنده باجون یاریله گلدی
علی اکبر و قاسم علمداریله گلدی
نه نوعی گئده یالقوز چوخ انصاریله گلدی
ولی همرهی شمر و سنان دور آنام اوغلی
نَدن بیله یاتوب سان بو میدان آراسندا
قالوب باش سیز عیالین بیابان آراسندا
یارالی بیله یاتما قزل قان آراسندا
اویان گور نجه شور و فغان دور آتام اوغلی
سوزوم یوخ که لب عطشان کسوب باشوی عدوان
نه انصاف دور اما ایا خسرو خوبان
بیله گون قاباقندا قالا پیکرون عریان
باشون ظلمیله زیب سنان دور آنام اوغلی
دیسم نجم سمادن یاران جسم ده چوخدی
یقین دور یاراسیز یِر بوگل جسم ده یوخدی
منی یاندوران اما بو اوچ شعبه لی اوخدی
که قان چشمه تک اوندان روان دور آتام اوغلی
هامو اهل عزایه (علومی) ایله خدمت
سنه اردبیل اهلی ایدوب مهر و محبت
ایله مطلعی بیرده او احبابه قرائت
باجون زینبی دور گور امان دور آتام اوغلی
عنایت ایلسه گر حیّ قادر و دانا
بو مطلبی ائدرم دفتریمده من اِنشا
یازوللا حضرتِ پیغمبرین زمانینده
بو نقل قولی بو طرزیله اکثرِ عُلَما
گلوبدی شخص یهودی حضورِ سلمانه
بودیللّریله اِئدیب دور اوُرک سوزون افشا
یتور سلامیمی ختمِ نبیّ محضرینه
دِئنن واریمدور او مولادن التماس دعا
بیر آرزوم وار اؤرکده دِئنن دعا اِیلسون
که بلکه دردیمه اولسون منیم بو یِرده دوا
سوزوم بو دور نچه ایلدور گوزوم قالوب یولدا
منه ده بیر بالا لطفیله حقّ اِئده اِعطا
اگر دعا ائده اسلامی من قبول ائدرم
تمام ثروتیمی دینه ایلرم اِهدا
گلوبدی محضرِ پیغمبره او دَم سلمان
بیان ائدوبدی یَهودی سوزون او مردِ خدا
یازوللا دوردی ایاقه پیمبرِ رَحمت
بفوری ایلدی نچه رَکعت نمازی بپا
قویوبدی سجدیه باشین توکوبدی گوز یاشینی
که بلکه شاد اولا بو یِرده اُمّت موسی
آچوبدور اللّرینی ایلسون دعا گوردی
یتیشدی محضرینه پیکِ حیَّ بی همتا
دییوب رسول خدایه دایان، پیامیم وار
سلام ائدور سنه سبحانِ رَبّی الاَعلی
دییور دعا ایلمه چون که مُستجاب اولماز
سوزون دوشر یِره دوتما یوزون منه طاها
مقدر ائتمیشم اولادی اولماسون چون که
گئدوب چوخی بونون عمروندن آز قالور قوتولا
روایت ایلوری سلمان گلوب دِئدیم بو سوزی
نه گوردوم اولدی عذارینده گوزیاشی پیدا
او آغلادی منی آغلاتدی غملی احوالی
نه او دانیشدی نه من، گوردوم اوندا دوشدی یولا
او آغلادوقجا منیم قلبیم اود دوتوب یاندی
بو فکریلن که نئدیم درد و غصّه سی آزالا
نه گوردوم اوندا گلور فاطمه بالاسی حسین
دِئدیم غم ایلمه گلدی طبیب درد و بلا
یتوب سوال ایلدی اول یَهودیدن، دِئ گوروم
سنون بو گوز یاشیوین علّتی ندور آیا
جواب وِئردی که ای نورِ عینِ پیغمبر
سوروشما حالیمی بوندان چوخ اولمیوم رُسوا
فدا اولوم سنه جدّون منی ائدوب مأیوس
بو یِرده چاره ندور سن منه بویور شاها
دایاندی بابِ نبوتده بیر زمان گوردوم
حزین صدائیله اُوچ دَفعه عرض ائدوب بابا
ئوزون بویورموسان هر کیم گله بیزیم قاپیا
اَلین بوش اِیلمه سن شاه اولا و یا که گدا
ندن بو مردِ یهودینی بوش یولا سالدون
عنایت ایله اولا حاجتی بو یِرده روا
بویوردی ای گوزومون نوری من دعا ایلدیم
ولیک اَمرِ خدا دور گرک اولا اِجرا
دئدی بو یِرده حسین من ئوزوم دعا ایلرم
اجازه وِئر منه ای عالمه اُمید و رَجا
دوروب او حالیله اَوّلده دستماز آلدی
حضورِ اَقدسِ معبوده ائتدی حَمد و ثَنا
دِئدی خبر ایلیون تا آتام آنام گلسون
دعا ائدوم اولار آمین دِئسون که بلکه خدا
یهودی حاجت آلوب اولماسون سرافکنده
یوزون دوتوب بیر اُمیدیله بیزلره بو گدا
قویوبدی سجدیه باشین توکنده گُوز یاشینی
نه گوردوم اُوندا پیمبر بویوردی دور اَیاقا
سن آغلاما بالا یِر گوی قاریشدی بیر بیرینه
گلوبدی پیکِ خدادن قولاقیمه بو صدا
حسینیمه گوره وِئردیم بو شخصه قرخ اِیل عمر
ایکی بالا اِئدرم بیرده بو گدایه عطا
بو یِرده واردی سوزوم ای خدای فرد و قدیر
عنایت ایله اگر چه سوزوم جسارت اولا
سنی که راضی دِگلدون سنا حسین اورگی
بو حاله سن نجه دوزدون که شمرِ شُوم و دغا
او سینه اوسته قویا نَحس ایاقینی یارب
جسارتیله حسینی ائده ذَبیحِ قَفا
ووراندا نیزیه بیرده باشین ئوزون گوردون
نه حاله دوشدی او دَم دُختِ حضرتِ زَهرا
بو دیللّریله دِئدی زینبون سنه قربان
ایاقه دور گئدیروخ شامه گل بیزیله اَخا
قلم دایاندی وَرق اُود دوتوب الولاندی
بس ایله بوندان آچیق یازما مطلبی (شیدا)
ای اولان چرخِ اَمامت دَه جمالی مهرِ اَنور
بضعهء جانِ نبی بارِ نَهالِ عمرِ حیدر
اسمِ پاکون زینتِ اوراق دیوانِ وفا دور
خاکِ پایون توتیای دیدهء اهلِ وِلا دور
صورتون مُرآتِ معنای جمالِ کبریا دور
رَهروان عشقه راهِ عشقی دَه عشقوندی رهبر
پرتوِ مهرِ جمالون فالقِ صبحِ ازَل دور
تا جهان وار عشقون اهلی عشق اوچون ضَرب المثل دور
ذاتِ پاکِ کبریا تک ذاتِ پاکون بی مَثل دور
سن جلالتده بشر خلق ایتمیوب خلّاقِ اَکبر
خوابگاهون تُربتی مَسجود دور اهلِ ولایه
آستانون رفعتی مَحسودِ، عرشِ کبریایه
کربلا شایسته دور فخر اِیلیه سنله منایه
ای غمی آغلار قویان دنیا گُوزون تا روزِ مَحشر
درکِ فیضِ خاک بوسون مدّعای اَنبیا دور
آفرین بو مدّعایه واقعاً خوش مدّعا دور
نایلِ بو مدّعا دنیایه فخر اِیتسه سزا دور
طینتِ خاکِ درونده جوهرِ عزّتدی مضمر
اِیتماقا سیرِ مقاماتِ وفانی پایه پایه
جذبهء عشقون سنی چکدی دیارِ نینوایه
چوخ شَهامت له ازَل عهدون یتیردون اِنتهایه
اِیتمدی زنگِ بلا آئینهء قلبون مکدّر
بُلمدی افسوس قدرون معرفت دَن دور اُولانلار
بادهء کِبر و عناد و کُفریله مَخمور اُولانلار
بیر خطا نسلین دَن اَمرِ قتلیوه مامور اُولانلار
پیروانِ دیوِ نفس و بندگان نقره و زر
پاک قلبون هر بلا پیکانی نه آماج اُولوندی
بحرِ محنت دَه وجودون غرقهء اَمواج اُولوندی
خانهء دلدَن متاعِ طاقتون تاراج اُولوندی
کشتِ صبرون یاندیروب نارِ جفایه قُومِ اَبتر
قانیوی ناحقّ توکَن ظاهرده قُومِ کافر ائولدی
پیکرون صد چاک اِیدن ظلمیله تیغ و خنجر اُولدی
لیک باطن دَه سنی مقتول اِیدن سیم و زر اُولدی
بو سمومی له خزان اُولدی گُلِ باغِ پیمبر
اُولدولار سودائیانِ سُود سودای شَهادت
چون بلا بزمین دَه مستِ جامِ صهبای شَهادت
وِیردی جان نقدی تمامی آلدی کالای شَهادت
کربلا دشتین دَه قالدون بی کس و بی یار و یاور
بیر طرفدَن سَلب اِیدوب سوزِ عطش دلدَن توانون
بیر طرفدَن سوزِ داغِ مرگِ اَکبر تک جوانون
بیر طرفدَن شدّتِ حَرِّ هواسی کربلانون
بیر طرفدَن تابشِ خورشید سالموش جانه آذَر
اِیلدون بو حالتی له عشقی دَه طیّ مراحل
اُولدی قلبون یتماقا بَزمِ لقای یاره مایل
بُلدون اُولماز تا بدنده واردی باش مَطلوب حاصل
عاقبت بو مُشکلی حلّ اِیتدی بیر مَسموم خنجر
باشیوی باش سیز جماعت ووردولار نُوکِ جدایه
بو جفادَن ساکنانِ نُه فلک گَلدی نَوایه
شورِ مَحشر اُولدی برپا عترتِ خیرالَورایه
اُولدولار مُستغرقِ بحرِ غم و مُحنت سراسر
یتمدی کامه عَدو بو ظلمی دَن گویا حصوله
اُوزگه بیر بیداد، فکری وِیردی اوُز قُومِ جُهوله
دل حَیا اِیلور اشاره اِیتماقا سُمِّ خیوله
ای لبِ عطشانی نه عطشان لبِ تسنیم و کُوثر
اُولماسا تایید اوزون دَن ای شَهِ مُلکِ ولایت
بحرِ اوصافوندا بِاللَّه غَرق اُولار غوّاصِ فکرت
تارِ طبعِ (عابده) مضراب اُولوب دور شُوقِ خدمت
یوخسا خفّاشه دَگُول مَقدور وَصفِ مهرِ اَنور
ای ساربان عالملره دست سخاوتدور بو اَل
آهسته کس، بحر عطا، کان کرامتدور بو اَل
گیزلت ولی اول خنجری دورموش آنام زهرا باخور
زهرا الینده بسلنن دست عطوفتدور بو ال
بو الده واردور حشره تک نسل خلیل الله گوزی
موسائیله عیسالره ینبوعِ قدرتدور بو ال
شرم ایله بیر اللهدن باخ بیر کتاب مُنزَله
متنِ یدالله آیه سیندن بیر عبارتدور بو ال
آهسته کَس ای ساربان یورقوندی بو یاره الیم
گورمورسن آیا ظلمدن زخم و جراحتدور بو ال؟
اهل دل ایستر آنلیا، بو محنته قان آغلیا
دشمنلریم چوخ نانجیب چوخ بانجابتدور بو ال
گویلرده واردور اضطراب دوشموش ملائک وحشته
حورالره جناتیده اسباب حیرتدور بو ال
خیره اولوب چشم فلک آئینه اولموش مقتلیم
آغلور کواکب حالیمه مرآت محنتدور بو ال
هرگز دیمم کسمه الیم، کس وارلقمدان گیچمیشم
فانی اولان بیر عاشقه آیا نه حاجتدور بو ال؟
کامل اولان پیر طریق کامل سُور ئوز عهدینی
نقصان یتر پیمانیمه گورسم سلامتدور بو ال
چوخدور بلاسی بو الین یتمز باشا غمنامه سی
مجروح قوم کینه و جور و عداوتدور بو ال
من رهبرم عباسمه اولماز قالا سالم الیم
قطع الیدا مضمونینه عمده شباهتدور بو ال
سندن قاباق بجدل گلوب انگشتریم یغما ایدوب
دیوه دچارم نیلیوم؟ آماج غارتدور بو ال
ویردیم (نگینیم) دشمنه یوخدور نیازیم خاتمه
شیر خدانون مظهری بحر عنایتدور بو ال
عشقین خزانی یوخدی ولکن بهاری وار
هر یرده گلشنی گلی وار، لاله زاری وار
طوبی مثالی سایه سالوبدور نهال عشق
هر قدر محفلی، یری، دار و دیاری وار
هر یرده عشق خیمه ووروب محشر ایلیوب
شورآفرین کلامدی، شیرین شعاری وار
الفت دوتوب حسینیله آرتوب جلالتی
چون هم نشین لیقون اثر پایداری وار
یاره حسین سوزی گتیرور طپش قلبیده
معلوم اولور که دلده حسینون قراری وار
گوز مردمونده ده دیه سن زینب اگلشوب
صحن سرای دیده ده گوز آبشاری وار
آغلور حسینه، آغلاماقی آغلادور گوزی
گویا شکسته نی مثلی آه و زاری وار
هردم که جان حسین دیوری جانه اود سالور
جان کلمه سینده یاندوران اود تک شراری وار
ای کربلا غریبی نه عالمدی عالمون
دلداده وین نه اُلچیسی وار نه شماری وار
حیرتدیم که کیمدی سنه عاشق اولماسون
دیوانه سی، عقیل لیسی، خرد و کباری وار
یاللعجب مسیحیده دردین دیور سنه
کیمدی خدا یانندا بو شان و وقاری وار
قربان اولوم سنه بیزیده ایسته قبریوه
سلطانیدن غلام لرین انتظاری وار
قویمازلا یوخسا باغ بهشته قرالری
تسنیم آدینلی رنگی یووان جویباری وار
گلسون حبیبیانیله بیر وقفه حافظی
امّیدی وار، توکّل پروردگاری وار
حسین زمزم حسین سعی وصفادی
حسین کعبه حسین دشت منادی
حسیندی حامی دین و دیانت
حیین رنگینترین خون خدادی
حسیندی آغلادان دنیانی یکسر
حسینین عــــاشقی اهــــل بکادی
حسیندی پرچم ظلمی یاتوردان
حسین ویرانـــــگر ظلم وجفـــادی
ایاای عشقیدن بیمار اولانـــلار
حسینین تپراقی درده دوادی
حسیندی مشعل راه سعادت
حسین فرزند پاک مصطفادی
حسیندی زاده زهـــرای اطهـــر
حسین ابـــن عــلی مــرتضـــادی
حسینین قانی هرگون تازه تردی
حسین عــــاریفلره بیــــر رهنــــمادی
حسینین شیعه سی گورمزجهنم
حسین چـــون شــــافع روز جزادی
حسیندی تک قالان اغیار ایچینده
حسین مــــظلوم دشــــت نیــــنوادی
حسینی آختارانلاراولسون هشیار
حسین سلطــــان دشت کربـــلادی
حسین سیز یوخدی عشاقین پناهی
بیزه باغ جناندی بارگاهی
گنهکاره اگر ائتسه عنایت
مردد اولما قالماز هئچ گناهی
اولار نصرانیده مشتاق ارباب
اگر چیخسا اورکدن سوز و آهی
نه غم وار شیعه ده محشر گونوندن
حسیندی اول هیاهوده پناهی
قرانلیق قبریده عشاقه ارباب
مسلم گورسدر نور پگاهی
حسین ای زینبین جانی
کَرَم قیل بیر دایان قارداش
اگر دیندیرمَسون الان
ئولر زینب اینان قارداش
او گون که باغلادیم پیمان سنیله عشق یار اوسته
چالیشدیم خوان عشقونده اولام مهمان وارسته
خیال ائتمه باجون زینب بلا گلسه اولار خسته
وارام پیمانیمون اوسته نقدری واردی جان قارداش
فلک بیلدی روا جامِ مصیبت لب به لب دولسون
ولایت گلشنی دست خزان ظلمیدن سولسون
کیمیم واردی بو صحراده اگر سنده شهید اولسون
بو میدانه قدم قویسون اولار قَدّیم کمان قارداش
بو ایثاره قالوب حیران گویون اهلی باخور یکسر
ئوزون تشنه اورک داغلی یوزون جنّت لبون کوثر
سنه قربان ئوزوم قارداش آنام زهرا آتام حیدر
اولاردا غصّه دن اولموش منیله هم زبان قارداش
صفا تاپدی صبا قارداش سَحَر راز و نیازوندن
گونش چخدی شرار آلدی سنون سوز و گدازوندن
منیمده واردی گویلوم تا اؤپم تشنه بوغازوندن
شرارونده یانام بیرده وئرم جانانه جان قارداش
الون قوی قلبیمون اوسته تاپوم آرامش ای جانان
و یا ایله دعا قارداش اجل گلسین قوتارسین جان
اگر قالسامدا دنیاده منی دیلدن سالار هجران
ائله بیلّم بو ساعتده وفاتیمدور عیان قارداش
بو قانلی عرصه ده قارداش ائدور درک خطر زینب
هارا گئتسون بو چولده نقد جان الده گئدر زینب
بویور سن سیز اولار کیملن بو یولدا همسفر زینب
ئولن ئولدی دوشوب درده بو ماتمده قالان زینب
منیم دار و نداریم گئتمه بو طوفانلی میدانه
گئدن گلمور بو میداندان باتور یکسر قیزیل قانه
یئر آغلور گوئیا چون گوی گئدور اجرای پیمانه
بو پیمانه زمین آغلور ائدور نوحه زمان قارداش
