چیدمان شرف و غیرته بنیاد حسین
کان احسان و کرم، مرحمت و داد حسین
ائدن عبّاسیله عزّت سۆزون ایراد حسین
همان عبّاس ادب پروره استاد حسین
یئری وار ایلیه شیعه بئله فریاد؛ حسین
ائوین آباد ابوالفضل ائوین آباد حسین
.
.
شیعه باشیندا اولان تاج سره عشق اولسون
نخل توحیدیده بیر جوت ثمره عشق اولسون
برج عزّتده کی شمس وق مره عشق اولسون
هاشمی ایکّی یل پُرهنره عشق اولسون
سند عبّاسیدی سردفتر اسناد حسین
ائوین آباد ابوالفضل ائوین آباد حسین
.
.
قیل توسّل بولارا درده دچار اولمیاسان
ایکی دنیاده گرفتار و فکار اولمیاسان
آچمیوب ئوزگیه ال، دهریده خوار اولمیاسان
غفلتاً دام مکافاته شکار اولمیاسان
رصدِ فتنۀ اهریمنه مرصاد حسین
ائوین آباد ابوالفضل ائوین آباد حسین
.
.
درده دوشسن گوزیوی تیکمه؛ سن اغیار الینه
الیوی وئرمه گیلن فرقۀ ناکار الینه
یوزیوی دوندر او دم کعبۀ احرار الینه
تیک فقط گوزلریوی قولسوز علمدار الینه
ائدر امداد ابوالفضل ائدر امداد حسین
ائوین آباد ابوالفضل ائوین آباد حسین
.
.
کیمدی عالمده اولا شیعه لرین آقاسی
گلمیوب گلمز حسین بن علی همتاسی
یا ابوالفضل کیمی کیمدی حرم سقّاسی
اهل عالم تانور عبّاسی کرم دریاسی
قلب عُشّاقیده مکتوب اولونان آد حسین
ائوین آباد ابوالفضل ائوین آباد حسین
.
.
ای قلم ظلمت گلزاری گل یاسه دئنن
سینه لر غصّه سینی یاز شرفُ النّاسه دئنن
بیر حسینه دئنه بیر ساقی اجلاسه دئنن
چاره سیز دردی اولان دردیوی عباسه دئنن
ائدر عباسینه خاطر سنه امداد حسین
ائوین آباد ابوالفضل ائوین آباد حسین
.
.
سود سرشار حسین گرمی بازار عبّاس
وزن و معیار حسین زُبده خریدار عباس
شور پیکار حسین فارسِ کرّار عباس
شاه دربار حسین شاهه علمدار عباس
کیمدی عباس تک اولسون؛ سنه منقاد حسین
ائوین آباد ابوالفضل ائوین آباد حسین
.
.
راه عشق و شرف عبّاسیدی ،منهاج حسین
طائر مرحمت عبّاسیدی، معراج حسین
کشتی منزلت عبّاسیدی، امواج حسین
همان عباسِ علی نین باشینا تاج حسین
ائتمیوب ائتمز ابوالفضلینه ایراد حسین
ائوین آباد ابوالفضل ائوین آباد حسین
.
.
مدعی ؛ گرمی بازار حسین بسدی بیزه
چرخ گردون سیزین، آثار حسین بسدی بیزه
گون سیزون آی سیزون انوار حسین بسدی بیزه
بیر حسین بیرده علمدار حسین بسدی بیزه
عاشق خونجگرین ایلیر انشاد حسین
ائوین آباد ابوالفضل ائوین آباد حسین
.
.
نئجه گوهر ساتانین گوزلری الماسه باخار
گول ستاندا نئجه گول پیچک رقّاصه باخار
عکسِ زیبا سالان عاشق نئجه عکّاسه باخار
چاره سیز درده دوا آختاران عبّاسه باخار
عشق عبّاسیله ایلر اونی دلشاد حسین
ائوین آباد ابوالفضل ائوین آباد حسین
.
.
رکن ایوان شرفدور حسنینون عشقی
دینی آباد ائلیوبدور ثقلینون عشقی
چیخمیوب چیخماز ئورکدن حرمینون عشقی
وار کیمین سینه ده عباس و حسینون عشقی
جان وئرن دم ائدر ئوز عاشقینی یاد حسین
ائوین آباد ابوالفضل ائوین آباد حسین
.
.
ای «مصیب» گویه گون چیخماسا آی وئرمزلر
بیرده آفاقه علی اوغلونا تای وئرمزلر
بی ریا اولماسان اشعاریوه پای وئرمزلر
بو جماعت بونی بول هر سۆزه های وئرمزلر
سعی ائله ایلمه سین شعریوه ایراد حسین
ائوین آباد ابوالفضل ائوین آباد حسین
- چهارشنبه
- 5
- خرداد
- 1400
- ساعت
- 22:02
- نوشته شده توسط
- یوسف اکبری
ادامه مطلب
