قالمیشام چوللرده یوخ بیر یار غم گستر منه
هارداسان قارداش حسین سن اوز یرون گوستر منه
عشق سرگردانیم آواره لر آواره سی
من کیمی بیچاره نون بیچاره لقدور چاره سی
قابل مرهم دگول صد پاره قلبیم یاره سی
بو یارا جان یولداشیم دور تا دم محشر منه
بو امیدیله گلیردیم خاکپایون بوس ایدم
باغ وصلون صحنه سینده جلوه طاوس ایدم
گلمدیم چوللرده سرگردان قالوب افسوس ایدم
درد حسرتدور اولان هر درد دن بدتر منه
بو بیابانین نه مشگین بودی محزون توپراقی
یوخساقانونلا اولوب آغشته دلخون توپراقی
بیر منقش بستر راحتدی گلگون توپراقی
قرمزی مخمل سنه بستردی خاکستر منه
بس که توپراقلار بویاندی قان توکن گوز یاشیمه
قالمادی بیر کف قوری توپراق سپم تا باشیمه
بیر یانیق قلبله ایله آغلارام قارداشیمه
حسرت ایلر داغ دلده لاله احمر منه
خیمه ده بیر ساعت اوّل انس و الفت واریدی
حُسن خدمت منده، سنده لطف صحبت واریدی
من دیمم بیر رشته عشق اخوت واریدی
سن دگولدون سویلین هر بیر زمان خواهر منه
بلکه زینبدن مبارک خاصرون رنجیده دور
هیچ دیمزسن بو منیم باجیمدی نور دیده دور
بیر سارالمیش گلُ کیمی اوراق اولوب پاشیده دور
یادگار حضرت زهرادی بو مضطر منه
آغلادیم یاندیقجا قلبیم دوتدی قان یاش عالمی
یاندیرار سو اولماسا نار شررپاش عالمی
آیری عالمدور دیللر باجی قارداش عالمی
هاردا قالدی پس او عالم سویله ای سرور منه
رشته مژگانه مروارید اشگی دوزموشم
قورتولوشدان دانه تسبیح تک ال اوزموشم
هر بلایه گرچه من سس سیز صداسیز دوزموشم
وصفه گلمز عرض ایدم زخم زبان نیلر منه
ای جمالی کعبه ای سر منزل امن و پناه
شکوه ایتمم زائر مشتاقه خوشدور رنج راه
قوی سنون عشقونده اولسون آشیانم سیلگاه
خار و خاشاک بیابان بالش و بستر منه
خار صحرای بلا جاندان گیچن بیر تیردور
با گذشت و دلنشین و گرم و دامنگیردور
من بو خاره آشنایی هدیه تقدیردور
دسته گُلدور گوندروب بخت همایونفر منه
تیر غم تجدید ایدکن سطح قلبیم دَلمه سین
منده تکرار ایلرم صحیتلرون هر کلمه سین
یاده سالّام روحمه خوش سوزلرون خوش گلمه سین
یاد وصلوندور ویرن نیروی جان پرور من
سالکم سیریمده هر بیر شدته صبر ایلرم
شیوه رفتاریمی چون سایه ابر ایلرم
طاقت نیش جفا و سوزش جبر ایلرم
درس تسلیم و رضا اولموش عجب از برمنه
قول قانادسیز قوش کیمی گلشنده خرگه ویرمارام
باش او خرگاه فرح انگیز گه گه ویرمارام
شاخ امّید اوسته خوش لحنیله چه چه ویرمارام
دردمندم خوش گلور الحان حزن آور منه
خیمه گاهون اود دوتوب اود وُوردی استقبالیمه
هر شراره قوپدی دوندی دوشدی پرّ و بالیمه
بال و پریاندوقجا قوی یانسون خوشا احوالیمه
زینبم پروانه عشقم نه لازم پر منه
من او شمعم یانسا نابود اولسا شیون ایلمز
غرق اشگ گرم اولور اندیشه ی تن ایلمز
یانماسا باشدان اوزی اطرافی روشن ایلمز
تاج زرّین دور باشیمدا شعله ی آذر منه
اشگ چشم ناز پرور شوق دامان عفاف
متّصل قلبیم ایوینده آچسا زخم جان شکاف
بی گمان بونلار بلامشتاقینه ویرمز کفاف
ایسترم یوز دوندره دنیا غمی یکسر منه
سسلدیم سس ویرمدون اولدوم عجب خوار آغلارام
سیندی قلبیم چون سنار شاخ گرانبار آغلارام
آغلاماقدان راحت ایلر هر گرفتار آغلارام
مایه صبر و تسلّی دور بو اشگ تر منه
منده دیل یوخدور دیم شیرین دیلیم منلن دانیش
سن اوزون آخر دیلون قربانی بیر دیللن دانیش
من دیدیم اوز دردیمی نوبت سنوندور سن دانیش
وعده صحبت ورور بو عشق خوش باور منه
یوخسا قارداشیم خدایا غشّ ایدوب مدهوش اولوب
خلوت وحدتده اوز عشقیله هم آغوش اولوب
شمع بزم هستی زینب مگر خاموش اولوب
تیره و تار اولدی روز روشن و انور منه
تز مرّخص ایت منی قویما برادر گج قالام
بلکه تز شام غریبان ایشلرین نظمه سالام
چوخ امیدیم وار گلنده بو گیجه زهرا آنام
خاطره سالسون گتورسون بیر قرا معجر منه
بیر طرفدن باغریمی قان ایلیوبدور فرقتون
بیر طرفدن چاره سیزلیقدان سزیلدار عترتون
بیرطرفدن ساربان گلمیش دیور یوخ مهلتون
تازیانه بس دگیلمیش گوسترور خنجر منه
کربلانی ترک ایدوب من شامه هرگز گیتمرم
هرنه ممکن اولسا آختارام سنی تز گیتمرم
گیتمرم قارداش حسین گیتسمده سن سیز گیتمرم
یا اوزون گَل یا باشون گوندر اولا رهبر منه
گرچه تنها سرپرستم بیر بولوک مظلومه من
اوز دیلیله سوز دیم لازمدی هر معصومه من
حق بودور هر ایشده مدیونم باجیم کلثومه من
هم اوزی غدیده دور هم یار غم گستر منه
واریری گر عرض ایدم نائل مرام ایت زینبی
آستان قدسده صاحب مقام ایت زینبی
اوز یانوندا ساخلا همراز مدام ایت زینبی
قولّارون بالینیم اولسون، مقتلون مقبر منه
ای عزیز فاطمه ای زینب والا مقام
ای سلیل مرتضی نوّاده ی خیر الانعام
چوخ مباهاتیله (هندی) آرزو ایلر مدام
بندگان بندگانون سویله سون نوکر منه
- دوشنبه
- 12
- مهر
- 1400
- ساعت
- 15:49
- نوشته شده توسط
- یوسف اکبری
ادامه مطلب
