قالیبدور اَللّریم قُوینومدا ای اَلدَه ئولَن قارداش
هارای اِی قَلبینی اوُچ شُعبه لَی پِیکان بُولَن قارداش
اِئشیدسُون زِینبَین اِعلانینی آزاده اَنسانلار
حَقیقَت خطّینی سیر اِیلینلَر پاک وِجدانلار
مِنای کَربَلادَه آلِ اَحمد دَن آخان قانلار
حَقیقَت اوُسته آخدی ظُلمی اِئتسون ریشه کَن قارداش
شُرِیحِ بی حَیا اِسلامَه قُوی فِتوا اوُخون آتُسون
تَعدی اِیلیُوب شَرعَه رَسُول اللّهی آغلاتسُون
آنام زَهرایَه آند اوُلسُون باجون قُویماز بُو قان باتسُون
ئولوبدور شیرِ مَردُون حَمد اوُلا وار شیرِ زن قارداش
قَسم اوُلسُون داغلمیش صَفحه وِه اِی جِلد سیز قرآن
حَقیقَت قُویمارام اوُلسُون رِیایی پَردَه دَه پِنهان
وَظیفَم دور اِمامَت مَکتبیندَه وارثَم اَلآن
علی المُرتضی تَک مَندَه اوُلّام بُت شِکَن قارداش
اَگر مَن مَن دِئمک نُقصان دور اَهلِ فَضیلَتدَه
سَهیمَم سیزدَه کی نامُوس و غِیرتدَه شَرافَتدَه
به حُولِ قُوّۀ حَق بُو سَفردَه بُو اِسارتدَه
اوُزی اوُستَه گَتیرّم کُرسیّ طاغُوتی مَن قارداش
بُو مَنطق کی وِئریب اَلله مَنه شَمشیرِ برّان دور
توانا مَنطقیم هر یِردَه حَلّالِ مُعما دور
دِمِشقین فاتِحی زِینَبدی گُون مِثلی هُویدا دور
اَگر چه قالمِیُوب آل اللّهه شَمشیرِ زَن قارداش
اَلولی اِیلَرم تَک خَرمنِ اَشراری یاندیرّام
حُسینیم وای شُعاریلَه دِلِ اَغیاری یاندیرّام
دوؤلسَمدَه چِراغِ حِیدرِ کرّاری یاندیرّام
زیاد اوُغلی اِئدور اِئتسُون نَبردِ تَن به تَن قارداش
نِئجَه گُور جِسمُووی صَد چاک اِئدیبدور نیزه و خنجر
نِئجَه گُور قان وِئرور جَدّیم پِیمبَر اؤپدیگی حَنجَر
اِیشیم یِتدی هارا گُور روزگار اوُلدی هارا مُنجَر
سَن اوُلدون قَرمزی گُل تَک مَن اوُلدوم یاسَمَن قارداش
سُوزوم چُوخ دور اؤرکدَه بُیلمورَم سُوز باشلیام هاردان
خیامُون تار و مار اوُلدی اَلیم چِخدی یُوخا وَاردان
مَنیم بَخت اوُلدوزُوم روشنگریدی کهکشان لاردان
مَداریندَه اِیتیردی سیرینی غَم غُصّه دَن قارداش
بو خَسته جان حُسین جان جانوَه جانانوَوه قُربان
رَسا فَریادوَه پُر طَنطنَه بُرهانُوَوه قُربان
یُوز اوُن دُورد سُوره نی تَضمین اِئدَن اَلقانُووه قُربان
سنَه قُربان آتام جَدّیم آنام مَظلوم حَسن قارداش
حسین سَن ساغلیقُوندا آختاراردُون آجی عُریانی
وِئرردُون خانه خانه مَردمَه پُوشاکِ اَلوانی
گُوروم وِیران قالا بو سُفلَه پَروَر هَرزَه دُنیانی
نَه دُنیا دور سَنه اوُندان یِتیشمَز بیر کَفَن قارداش
وِقارون عَرشدَن اَعظم یاتیبسان بیر چُوخُور یرده
تالانمش کوینگون یوخدور برهنه سینوه پِردَه
آنام دوزمَزدی بیر زُلفُون او شاقلیقدا باتا گَردَه
اوُتُورمازدُون مَگر مِهرِ نُبوَت اوُسته سَن قارداش
اَگر اِمکانیم اوُلسیدی اِئدردیم بُو چُولی مأوا
جَنازون دَفن اِئدردیم قُویمازیدیم آغلیا زَهرا
گَلینجَه اَربعینُون قَبریُون اَطرافینَه حتّیً
اَکردیم قَرمزی گُوللّر گُوگردردیم چَمَن قارداش
نَه باش آچدیم بُو نَعش اوُستَه نَه بَزمِ ماتَمُون قُوردوم
بالا قزلاری قَمچیلَه وُرولّار چاره یُوخ دُوردوم
بُو عُریان پِیکرون مَن بیر اوُلان اللّهه تاپشُوردُوم
بدون مَعجَرَم سَن یات بدون پیرهَن قارداش
گُوروم سََعد اوُغلنی اوُلسُون حسین خوار و سَر اَفکنده
عَرب تاریخینی تار اِیلیُوب جان قُویمادی مَندَه
چوخ عُضوون بیر بیریندَن آیریلیب اوُلمُوش پَراکَندَه
مناسب دور مَگر آتلار اَیاقیلَه بَدَن قارداش
اوُزاق یُول یُولداشیم عُورتدی یا اَطفالی دور خُردا
هاراگئتسم اوزوم اما خیالیم بوردادور بوردا
دُوشَم قُوی بَندیدَن بَندَه کُوچوم قُوی یُوردودان یُوردا
اوُزوَه سَن وَطن تاپدُون مَنه یُوخ دور وَطن قارداش
حسین جان سَنسَن اِیستکلَی رَسول اللّهه، اَللّهه
بُو کُوفه اَهلی کَج فکر اِیلیوبلَر گِئتدی بی راهه
قَسم اوُلسُون سُویُولمُوش نَعشوَه بَو چَکدیگیم آهَه
یخلماز هِئچ زَمان اََلله پِیمبَر اِیستیَن قارداش
- یکشنبه
- 15
- مرداد
- 1402
- ساعت
- 14:02
- نوشته شده توسط
- یوسف اکبری
