اشعار حضرت ابالفضل(ع)

سقای دشت کربلا گلدی
درمانسیز دردلره دوا گلدی
خلق الیـوب یزدان - بیر مَـهِ جـاویدان
جلوه لنوب رضوان - آدینـه ائل قربان
مولا – مولا – مولا- مولا
یابن الزهرا – یابن الزهرا

آل اطهــاره مـاه تـابـاندی
دیـنِ پیغمبـره نگهبـاندی
سقــا و ســاقی و علمــدارِ
بی مـاننــدِ شـاه شهیداندی
قارداشینون یاری - یار و سپهداری
شـاه شهیـدانین - گلدی علمداری
مولا – مولا – مولا- مولا
یابن الزهرا – یابن الزهرا

داغـلارا گلسِتـانه چَـم گلدی
شـورِ بی حَـدَّ بو سینم گلدی
کـربلا پرچمیـن آچـون یاران
چون صاحب مشک و علم گلدی
عشقی نه رایجدی - درده معالجدی
آدینه جان قربان - باب الحوائجدی
مولا – مولا – مولا- مولا
یابن الزهرا – یابن الزهرا

اللـه شـاد اِئـدی شـاه مردانی
پای وئردی بو مَـهِ درخشانی
اولدوزلار گویده محو اولوب نوره
بـاغ جنت اولـوب چراغانی
سینـه لرین آهی - آل علـی ماهی
شَه دی آقام حتی - شاهیلرین شاهی
مولا – مولا – مولا- مولا
یابن الزهرا – یابن الزهرا

• جمعه
• 3
• بهمن
• 1399
• ساعت
• 19:25
• نوشته شده توسط
• یوسف اکبری

ای لشکر کوفه من علمدار حسینم
سردارِ وفـادار و هوادار حسینم

صبری جالارام من * نه سوستالارام من
طوفان سالارام من * نهری آلارام من

تـا مـن نقـدر زنـده ایم ای لشکـر شیطان
قویمام باخاسوز شاهیمه چپ بیردَم و بیر آن
میـن جانیـم اولا ایلییـرم شـاهیمـه قربان
شاهیمـدی ، امامیمـدی غـلام دَرییم من
فکر ایلمیون قارداشی،یوخ،نوکرییم من

چون شاه شهیدان * ایلوب منه احسان
عالم هامی بولسون * جانیم اونا قربان

دوزدور کی ائدوبسوز بو یانان سینمی یاره
امـا منـه گـر ایلسـه سلطانیـم اشاره
شاهـلاروزی یکسر چکـرم شامیده داره
امر ائدسه امامیم اله طوفان ائدرم من
بو لشکری اوز قانینه غلطان ائدرم من

غرق غم و دردم * حیدر کیمی مَردم
یوخ جنگه هراسیم * استـاد نَبـَردَم *

سیمـرغی مگـس دالدالیوب جانین آلانماز
سیمرغ اوچان یئرده مگس هِش اوجالانماز
واضحدی مگس چَنگینه سیمرغی سالانماز
سیمـرغ حسینم قانادیم شَـع شَعهَ مثلی
اطرافیمی سیز گورنه آلوبسوز پَشه مثلی

من حامیه دینم * سرباز حُنینـم
ای کوفه لی لر من * سردار حسینم

باک ایلمـرم مین بئله اهریمنیم اولسا
شاهیم منه بسدی نقدر دشمنیم اولسا
عرش و فلک و عالم امکان منیم اولسا
شهـزاده رقیَمـدی اونـون چـاکریم من
شاهیمـدی حسیـن ابن علی نوکریم من

جانانم حسینه * حیرانم حسینه
مین لر جانیم اولسا * قربانم حسینه *

سر رشتة بیـدادی بو گـون قیرماسام اولماز
من نهـر فرات اوستـه علم وئرماسام اولماز
سعد اوغلونی میدانیده سیندیرماسام اولماز
لحظه سایرام تا کی او فرصت اله گلسین
سعداوغلی اگر گلمسه ده حرمله گلسین

صبری جالارام من * نه سوستالارام من
طوفان سالارام من * نهری آلارام من

میـدانـدا رجـزلـر اوخیـدی اُول یَلِ بارز
عیب اتمه دئسم قورخی اولوب لشکره عارز
گلسین قوشونوزدان دئدی هر کیمیدی مبارز
بو لشکـره تکلیفینی بـولدورمَسم اولماز
بیـر ظربتیلـه مُنقذی ئولدورمَسم اولماز

من حامیه دینم * سرباز حُنینـم
ای کوفه لی لر من * سردار حسینم

جان لاله سینی گلشن عشقیمده بیتورم
امر ائدسه امامیـم ئوزومی نهـره یتورم
نهری آلارام شُمـری قولی باغلی گتورم
عبـاس سـوزونده بولوسوز کی یالان اولماز
توتسام یاخاسین شمری الیمنن آلان اولماز

جانانم حسینه * حیرانم حسینه
مین لر جانیم اولسا * قربانم حسینه *

زهـر اولسا شکـرلر شکـم سیره نه فرقی؟
سینه داغیدا ، باش یارا ، شمشیره نه فرقی؟
میـن گلـة روبـاه اولا گـر شیـره نه فرقی؟
اِذنیـم اولا گـر قهـر و غضبـدن اَسرم من
بیر حَمله ائدوب نسلوزی یئردن کسرم من

صبری جالارام من * نه سوستالارام من
طوفان سالارام من * نهری آلارام من

• یکشنبه
• 5
• بهمن
• 1399
• ساعت
• 20:52
• نوشته شده توسط
• یوسف اکبری

نه اولار مقتلیمی غرق صفا ایلیه سن
آلاسان جانیمی بو روحی رها ایلیه سن

سنه لبیک دیور بو سینمون یاره لری
تا کی بو یاره لی قربانی دعا ایلیه سن

ای طبیبیم منه باش چک کی ئولور بیمارون
گوزلریم یولدادی گل بلکه دوا ایلیه سن

من سنون درگهیون نوکریم ؛ منن اوتور
حیف دور قامت شمشادیوی تا ایلیه سن

آغلاما قولاریمی گورسن ؛ اولار تحفه دیلر
بوکولن قامتیوه بلکه عصا ایلیه سن

• جمعه
• 10
• بهمن
• 1399
• ساعت
• 17:17
• نوشته شده توسط
• یوسف اکبری

دیولّه بیت خدانین نماسی گورمه لیدی
طوافی مروه سی سعی و صفاسی گورمه لیدی

دیولّه بیر سویی وار زمزم آدلی آب حیات
علی الخصوص عرفات و مناسی گورمه لیدی

همان مناده کسر حاجی قوچ قوزی قربان
حضور قلبله حجّین فداسی گورمه لیدی

عرب عجم هامونون ذکری بیردی نیّتی بیر
جوان قوجا هامونون آغ لباسی گورمه لیدی

سرود نغمۀ لبّیک ربّنا لبّیک
دوتوبدی مکّه نی ارض و سماسی گورمه لیدی

محلّ وحی الهیّه خانگاه نبی
داغین باشینداکی غار حراسی گورمه لیدی

نه شوقیله حجرالاسودی ئوپر حاجیلار
مقام و رُکن ده ذکر و دعاسی گورمه لیدی

آدی بقیعیدی وار بیر خرابه قبرستان
او یرده بیر نئچه قبرین نماسی گورمه لیدی

قالوبلا گون قباقیندا نه گنبد و نه ضریح
او یرده شیعه لرین التماسی گورمه لیدی

ولی او گورمه لی لردنده گورمه لی گوره نه
منیم حسین آقامون کربلاسی گورمه لیدی

او آلتدی گوشه لی قبره منیم ئوزوم قربان
نه قبر سینه سی پائین پاسی گورمه لیدی

فدا اولوم آقامون دورت مین اوخلی پیکرینه
یارالی سینه سی اوسته بالاسی گورمه لیدی

ایکی بالاجا الینی قویوب اوخین یرینه
دیور بابا یارام آغرور نواسی گورمه لیدی

آتا ایاقین آلوب سینیه جوان بالاسی
نئجه جوان ادبی هم حیاسی گورمه لیدی

تفاخر ایلمه سین کعبه چاه زمزمینه
فراتین آخماسی دلکش صداسی گورمه لیدی

اوجایدی قامتی امّ البنینه بنزریدی
باخون مقاتله قدّ رساسی گورمه لیدی

کیچیکدی قبری گورنلر دیور ندور سببی
بالاجا قبرین او قدّه کفاسی گورمه لیدی

او نعشی دفن ائلیندن گرک گئدک سوروشاخ
عمو حضورینه قارداش بالاسی گورمه لیدی

او بند بند اولان اعضانی یغدی دفن ائلدی
دئدی عمو گوزیوین اوخ یاراسی گورمه لیدی

دمیر عمودی باشوندان ویران الی شل اولا
فدا سینان باشوا ماجراسی گورمه لیدی

عمو گوزوندن ایراق قولاّریمی باغلادیلار
بو لشگرین بیزه جور و جفاسی گورمه لیدی

نقدری سن ساقیدون اهلبیت راحتیدی
حرملرین غم بی انتهاسی گورمه لیدی

• دوشنبه
• 13
• بهمن
• 1399
• ساعت
• 17:14
• نوشته شده توسط
• یوسف اکبری

سينيه عشق مداليـن وورانين اوغلی منم
عالم عشقيده فاتح چيخـانين اوغلی منم
دشمنين قلبيني دائم سيخانين اوغلی منم
خـم ابروسی عدو قورخودانين اوغلی منم
آديم عباسيدی مَرحب يخانين اوغلی منم

عاشـق جان به كف گنبـدِ دوار منم
حاميــه ذريــۀ احمـد مختار منم
مرتضـا اوغلی منم - جعفر طيار منم
مالک و حمزه منم ، حيـدر كرار منم
سيل دشمن قاباغيندا دورانين اوغلی منم

مرتصادی دانيشان زنده دی چون حيدر هَله
هـانی جنگ ايلينـوز عرصـه ميدانه گله
هر كيمون جرئتی وار جنگيمه اِئتسون عجله
تا كی بـو سينه سُوكن نيـزه دل خَصمی دله
گردن ظالمی چون سیندیرانین اوغلی منم

آديـم عبـاسيــدی قَتّال العَرَب اوغلی منم
من كيمم بير تانيون قلبيوزی اوخلان دلنم
عيـن طاهـا كيمـی ظلمه خَطِ بُطلان چكنم
نايب شیر خدا حیدرم و صف شكنـم
صف به صف اهرمنی دوغريانين اوغلی منم

دوزدی ‌ذاتيم‌بولوسوز‌ حق‌ائشيدوب حق‌ديينم
ديـن پاكيمدن اوتـور جـام شهـادت ايچنـم
علـفِ هـرزه كيـمی دشمنـی يكـسر بيچنـم
آديـم عباسيـدی خونخـواهی خـون حَسنم
بَدر وخَندق ده كی طوفان سالانین اوغلي منم

باغبان تک ائلدی عرصه‌ی میدانی هَرس
گلموشم‌جنگه اومن‌من‌ديين‌اشخاص‌هانی‌بس؟
هَـل مبارز دیدی ميداندا او پـاكيزه نفس
هَل مبارز سسينه وئـرمدی دشمن‌لری سس
دئدی دشمن‌لرین آغلار قويانين اوغلی منم

• چهارشنبه
• 22
• بهمن
• 1399
• ساعت
• 14:40
• نوشته شده توسط
• یوسف اکبری

«در سبک من مانده ام تنهای تنها»

دور گلموشم داده ابولفضل-ای قهرمان زاده ابولفضل
سرسپاهیم دور ایاقه
ای اهلبیتون نورعینی-تک قویما قارداشین حسینی
تکیه گاهیم دور ایاقه

آچ گوزلرون شأن و وقاریم،،آی ابولفضل آی ابولفضل
آتما منی دار و نداریم،،آی ابولفضل آی ابولفضل

نه قوللارین سالمدی تنده-نه صاف یرین واردی بدنده
اهلبیتون پاسبانی
جسمین سراسر اوخدی قارش-بیر بوسهٔ یر یوخدی قارداش
حیدر کرار ثانی

سو داغ داشا صحرایه آخدی،،آی ابولفضل آی ابولفضل
قیزلاریمی یاندیردی یاخدی،،آی ابولفضل آی ابولفضل

ازبس ویروبلار تیر و پیکان-قلبین اولوب سیننده شان شان
یاره لر گلنز شماره
آچ گوزلرون دیندیر حسینی-امّ البنین نورعینی
قلبیم اولدی پاره پاره
من نیلویوم دنیاده سنسیز،،آی ابولفضل آی ابولفضل
عریان قالوب جسمین کفنسیز،،آی ایولفضل آی ابولفضل

نوفل سنی گوردی کمکسیز-ویردی عمود آهن خبرسیز
تار اولوب دنیاده گوزومده
قان لخته سی باشیندن آخدی-عرش اهلی گویدن فرشه باخدی
عالمی یاندیردی یاخدی
مندن قاباخ چاتدون مرامه،،آی ابولفضل آی ابولفضل
سن پیش مرگ اولدون بالامه،،آی ابولفضل آی ابولفضل

• شنبه
• 25
• بهمن
• 1399
• ساعت
• 22:39
• نوشته شده توسط
• یوسف اکبری

چون دیار کربلاده لشگر عاشورا گونی
آتلانوب میدانه گلدی یکسر عاشورا گونی

هل مبارز صوتی لشگردن اوجالدی دمبدم
مضطرب او اهلبیت اطهر عاشورا گونی

بیرطرفدن صوت لشگر بیر طرفدن طبل جنگ
بی طرفدن شاه دین، بی یاور عاشورا گونی

گوردی بو حالی علمدار شه لب تشنگان
غیرتیندن رنگی اولدی احمر عاشورا گونی

لافتیٰ اوغلی اله آلدی او سیفِ حیدری
گلدی پابوسِ حسینه مضطر عاشورا گونی

عرض قیلدی سیدی، عباسی غیرت اؤلدورور
وئر منه رخصت، یانیر بو نوکر عاشورا گونی

بو چتیندور من اولام سقا،سوسوز قیزلار قالا
آز قالور گوللر اولا تا پرپر عاشورا گونی

عازم میدان اولوب سایسیزدی گوردی دشمنی
هرطرفدن باغلانوبدی یوللار عاشورا گونی

وارد نهر فرات اولدی او سردار دلیر
ایسنه دی ایچسین سودان او سرور عاشورا گونی

یادینه دوشدی ربابین ناله سی او حالیده
نیلیر الان خدایا اصغر عاشورا گونی

عشقه باخ چیپدی سویی نهره، او مشگین دولدوروب
یوز قویوبدور خیمیه شیر نر عاشورا گونی

گوردی بو حالی عمرسعد لعین و بی شرف
امر ایدوبدی لشگره او ابتر عاشورا گونی

قویمویون لشگر آپارسون سو بو نام آور بوگون
ایچمه سین سو عترت پیغمبر عاشورا گونی

دورت طرفدن لشگر کفار هجوم آور اولوب
اللرینده تیغ تیز و خنجر عاشورا گونی

او دلاور عزم قیلدی خیمهٔ ثاراللهه
صفدرین مثلی پوزوبدی، صفلر عاشورا گونی

باشلاری سالدی بدندن، کربلا صفین اولوب
گوییا جنگ گلوبدی حیدر عاشورا گونی

حیف اولا وصفِ وزیره، حقّاً عاجزدی فقیر
آند اولا زهرایه سالدی محشر عاشورا گونی

چوخ چتین گلدی عمرسعده،او گیر و داریده
اوخ آتانلاری یغوبدی یکسر عاشورا گونی

ناگهان بیر نخل خرمانون دالیندان ملحدی
ساق قولون قطع ایلدی او کافر عاشورا گونی

ساق قولوندان اولدی مأیوس، آلدی شمشیری صولا
صول قولونلا دفع ایدوب دشمنلر عاشورا گونی

صول قولونناندا بیری عباسی مأیوس ایلدی
باخدی تندن قطع اولوبدی اللر عاشورا گونی

فرق پاکی اولدی منشق دوشدی مرکبدن یره
یازمادوم نوفل جفاسین، نیلر عاشورا گونی

سسلدی گل داده قارداش گیتدی الان نوکرون
اؤلدورن عباسی اولدی، شش پر عاشورا گونی

• دوشنبه
• 27
• بهمن
• 1399
• ساعت
• 19:57
• نوشته شده توسط
• یوسف اکبری

سوسوزدان دلکباب اولدی خَیَمده عترت قرآن
سو تحصیل ایله قیزلاره،بالالار قالدولار عطشان

مگر مهریّه زهرا دگول آب روان قارداش
قالوبلار تشنه اطفالی بو صحراده الان قارداش
علی اصغر کباب اولدی،رقیه باغریقان قارداش
اخا باب الحوائج سن،سنین من مشکیوه قربان

خیم لرده دوشوب غوغا،یانیر هر ماه وَش آغلور
سو جامی الده اطفالین دئیوللر العطش آغلور
علی اصغر ربابیلن ایدوبدی کشمکش آغلور
علی عطشان،رباب عطشان،اولوبدی دیده لر گریان

بو گون اوچ گوندی سو یوخدی اوشاقلاره اولان اولدی
بوگون گلزار طاهانین سراسر گوللری سولدی
اناالعطشان دئیور قیزلار،بولوط تک قیزلاریم دولدی
چیخوبدی عرشیدن فرشه، گورورسن ناله و افغان

مگر انصافدور قارداش سو یکسر چوللره آخسین
سوسوزلوق آل اطهاری روادور یاندیروب یاخسین
سویا حسرتله اطفالیم اوتورسون خیمه دن باخسبن
گوروم ویران اولا دنیا،پوزولسون عالم امکان

او قدری آغلادی زینب،سارالدی رنگ سیماسی
شرف دریاسینه وئردی تکان قلبینده احساسی
دیله آخر گتوردی خیمه ده قارداشی عباسی
دئدی سو ایلرم تحصیل اگر ویرسم بو یولدا جان

ولی صد حیف اولا بیر اوخ ابولفضلی اوتاندیردی
دگوب اوخ مشکینی دلدی،دل سقانی یاندیردی
اوشاقلار ناامید اولدی،او اوخ رضوانی یاندیردی
سوسوزدان دلکباب اولدی بنات عترت سبحان

«فقیره»رحم ائله یارب سوزونده اعتبار اولسون
مبادا روز محشرده حسیندن شرمسار اولسون
و یا صول الده پرونده، اوتا بو رهسپار اولسون
باغیشلا قول سیز عباسه «فقیری» خالق رحمان

• پنج شنبه
• 30
• بهمن
• 1399
• ساعت
• 11:44
• نوشته شده توسط
• یوسف اکبری

بیر گونده دگوب جسمیوه مین یاره اباالفضل
گورنه داغیلوب گلشن و گلزاره اباالفضل
بو دشت بلا اولمادی مأمن بیزه قارداش
افسوس صد افسوس گلوبسن گوزه قارداش

یتمیش ایکی قربانی گتوردوم بو منایه
بیربیر هاموسین فدیه وئرم راه خدایه
تقدیر قضا چکدی بیزی کرب و بلایه
چکدی منی بو دشته الیمدن سنی آلدی
بوندان بئله غم غصه فقط زینبه قالدی

سن روز ازلدن منه غمخواریدون عباس
قیزلاریمه هر لحظه پرستاریدون عباس
فخریم بویودی سن منه سرداریدون عباس
بیر زهریلی پیکان آرادا فاصله سالدی
بیرگونده حسین،شیرخدا اوغلی قوجالدی

آچ گوزلریوی قویما حسینی بئله یالقیز
دشمن دئمه سین قالدی علی اوغلی آدامسیز
سیندیردین ابوالفضل بئلمی،قویدون اخاسیز
سالدون منی بو چولده عجب مشکله قارداش
بیجا دگی زینب ویرا باش محمله قارداش

بیر آهن عمود ائتدی منی خانه سی ویران
چولدن چوله قیزلاری سالوب قویدی هراسان
بوندان سورا وای زینبه،تک قالدی اورک قان
هجرون پوزوب او زینب غم پروری قارداش
آرام ائلیه بولمور علی اصغری قارداش

بیرده سنه تای مام جهان گوندره هیهات
سن ایلمیسَن عشقی،بو عاشقلری اثبات
زهرایه قسم،سن منیده ایلمیسَن مات
سن آل رسوله دُر نایابیدون عباس
نوکر دگودون،لشگره اربابیدون عباس

بیر گوز،ایکی قول وئردون علی اصغره خاطر
قارداش سوسوز اؤلدون قوریان لبلره خاطر
جان نقدینی آلدون الیوه،حیدره خاطر
امضا ایلدون قانیله بو مکتبی قارداش
شاماته سن عباس ایلدون،،زینبی قارداش

عالمده «فقیرین» دل و دلخواهیدی زینب
روح القُدوسی،یاور و همراهیدی زینب
بیر سرّیدی یازمام،اونا آگاهیدی زینب
بیر گجّه قسم وئردیم اونی ماه منیره
الحق اوزی دوز قاتدی بو اشعارِ فقیره

• پنج شنبه
• 30
• بهمن
• 1399
• ساعت
• 12:14
• نوشته شده توسط
• یوسف اکبری

درسبک (من مانده ام تنهای تنها...)

قارداش یخلدیم گل هرایه،باخ سجده گاهیمده یارایه
گل هرایه، اؤلورم من
قارداش دوشوب شیرین کمنده،، السیز قالوب جلاد الینده
باخ بلایه،ئولورم من

هرنه یارا دگدی دایاندوم--ای برادر ای برادر
سو مشکیمه اوخ دگدی یاندوم--ای برادر ای برادر

تز گلمه سن داده برادر،،اون یدّی جلاد الده خنجر
گئت گل ایلور باشیم اوسته
جرأت تاپوب نیزه ویرانلار،،اوّلده میداندان قاچانلار
جمع اوللولار دسته دسته

آل باشیمی آغوشه قارداش--جان زینب جان زینب
توکمه بئله رخساره قانیاش--جان زینب جان زینب

نوفل منی تا گوردی السیز،،ویردی آغیر ضربه خبرسیز
گوزلریمه دولدی القان
باش کاسه سی اولدی شکسته،،آهن عمودیله سو اوسته
شرمسار اولدوم حسینجان

آتدان یخلدوم تشنه شاها--یابن حیدر یابن حیدر
آلدی منی آغوشه زهرا--یابن حیدر یابن حیدر

زهرا منی آغوشه آلدی،،لای لای چالوب دردیمی آلدی
گوزلریم قالدی گوزونده
یاندیم آلیشدیم من دوباره،،گوردوم قولوندا کاری یاره
ردّ سیلی گول یوزونده

بو غم منی یاندیردی یاخدی--جان زینب جان زینب
خجلت تری آنلیمدان آخیدی--جان زینب جان زینب

• پنج شنبه
• 30
• بهمن
• 1399
• ساعت
• 12:22
• نوشته شده توسط
• یوسف اکبری

مُلک شرفده سرور، لبیک یا ابوالفضل
بحر ادبده گوهر، لبیک یا ابوالفضل
آل عبایه زیور، لبیک یا ابوالفضل
عرش خدایه لنگر، لبیک یا ابوالفضل
عشقیله شیعه سسلر، لبیک یا ابوالفضل

سن چلچراغ بزم آل عباسن، عباس
سن مرتضی علی تک باب رجاسن، عباس
ظلمت دوتاندا دهری بدّرالدجاسن، عباس
دار و ندار شاهِ کرب و بلاسن، عباس
سسلر فرات و کوثر، لبیــــک یا ابوالفضل

نور شریف طٰه چهره نده منجلیدی
اول شعشعه حسینون، ظلمتده مشعلیدی
صبر و ادبده بی شک واللاهی اوّلیدی
میدان رزمگهده، گ یا خودِ علیدی
ای رو نوشت حیدر، لبیـک یا ابوالفضل

سن دین مصطفایه،سر مقصد و هدف سن
سرباز بی ریاسن، سلطان جان بکف سن
سردار سر به دارِ شاهنشهِ نجف سن
هم مظهر وفاسن،هم اسوه ی شرف سن
ذکر «فقیـــــــــــر» و شهلر، لبیک یا ابوالفضل

سن پنجه ی شرفلن، قید جفانی قیردون
مردانه اوز سوزونده، کرببلاده دوردون
گلدی امان او لحظه،آلدون امانی جیردون
معنای واقعیده، بیر سیلی شمره ویردون
عشق ایلدی پیمبر، لبیک یا ابوالفضل

مات ایلیوبدی صبرین، دنیاده روح صبری
بیربیر یخیردین آتدان،شیر افکن و هژبری
واللّه بوغاردی پنجه ن، دوتسایدی فیل و ببری
سعداوغلی سسلنوردی،شمرین قازیلدی قبری
احسن یَل دلاور، لبیـک یا ابوالفضل

• یکشنبه
• 3
• اسفند
• 1399
• ساعت
• 22:36
• نوشته شده توسط
• یوسف اکبری

عاشقم وشیدای//نام ابوالفضلم
روزازلدن مست//جام ابوالفضلم
سائل دربارم٭٭عبدعلمدارم

کئچدی ئوزوندن عباس//دینه صفاوئردی
حشره کیمی دنیایه//درس وفاوئردی
علقمه ویردی پرچم//ماه فلک آرا
اصغره خاطراما//ایچمدی سواصلا
چیخدی سودان عطشان٭عالم اولوب حیـران
فرمانده اردوی وفاکیمدی اباالفضل
دلداده ی شاه شهداکیمدی اباالفضل
سلطان سخادی٭مصداق وفادی٭احراه رجادی
سائل دربارم٭٭عبدعلمدارم

حاجتون اولسایول سال//وادی احساسه
ایله توسل دلدن//حضرت عباسه
کرب وبلاده واردور//گورملی درگاهی
شاهلاری مات ایلوبدی//مرتبه وجاهی
باب الحوائجدی٭درده معالجدی
حیدرده اولان صولته دارادی ابالفضل
هردردون اگراولسا مداوادی ابالفضل
دردانه ی حیدر٭سرداردلاور٭عشق اهلینه سرور
سائل دربارم٭٭عبدعلمدارم

• پنج شنبه
• 14
• اسفند
• 1399
• ساعت
• 18:19
• نوشته شده توسط
• یوسف اکبری

دورکمگیم آی اباالفضل
ذکریم اولوب وای اباالفضل
چارم آزالدی بو چولده
یوخدی سنه تای اباالفضل
آرخام ائلیم، سیندی بئلیم دوشدی بلایه باشیم
سس وئره نیم یوخدی یتیش،دادیمه آی قارداشیم
اباالفضل قالمیشام تنها۲

اوستومه غملر توکولدی
سینه محندن سوکولدی
جسمووی قولسوز گورنده
عرصه ده قدیم بوکولدی
دورایاقا، سنسن اخا، بوردا منیم یاوریم
دردون اَگوب قامتیمی ایندی اَسور دیزلریم
اباالفضل قالمیشام تنها

فاطمه نون عطرین آلدیم
عالمه هنگامه سالدیم
باشوون اوسته گلینجه
عرصه ده والله قوجالدیم
گوزلروون،آق قره سی بیربیره دگمیش اخا
آی گوزلیم صورتووی قویمابئله تپراقا
اباالفضل قالمیشام تنها

آی منیم آرام جانیم
قانه باتان قهرمانیم
دورایاقادوت الیمدن
یوخدی دیزیمده توانیم
الده سوجامی سنی گوزلوربالالارخیمه ده
ای منه حامی سنه گوزلوربالالار خیمه ده
اباالفضل قالمیشام تنها

گورنجه حالیم یاماندی
دردون اورکده قالاندی
باشووی سیندیردی نوفل
باشیمامیدان دولاندی
آچ گوزووی حالیمه باخ یوخدی توانیم منیم
کربوبلانی بوریوب آه و فغانیم منیم
اباالفضل قالمیشام تنها

باد مخالف اسنده
پرپر اولار گل چمنده
گور نقدر اگلشوب اوخ
یاره لی،قولسوزبدنده
اوخلاری بیربیر چکرم، من سینمی داغلارام
مرکز میداندا سنی اوخشیارام آغلارام

• دوشنبه
• 18
• اسفند
• 1399
• ساعت
• 22:35
• نوشته شده توسط
• یوسف اکبری

عموجان دور ایله چاره
دوشدی قلبیمه شراره
باغلیوبلر سو یولونی
وای اولا بو روزگاره

رحم ایله/ سوسوزام یاندیم عموجان
یاندیم اودلاندیم عموجان

وردیلر بُروزه ایندی
کینه‌سین گروه شامی
آخدی چوللره سو امّا
تشنه قویدولار امامی
در خیمه‌ده اوشاقلار
اللرینده بوش سو جامی

بیزه سو حرام اولوبدی
قسمت اولدی چوخ وحوشه
بیر به بیر خیامی‌ گزدیم
العطش گلوردی گوشه
عطشین شراره سیندن
بعضی قیز گیدوبدی هوشه

بو فراتی قانه دونسون
قالدی لشگرین الینده
بو سوسوز بالالارین وار
گوزلری سنین الینده
سودامر آناسی ایندی
قالوب اصغرین الینده

العطش صداشی ایندی
اوج ایدر عمو هوایه
بیزی دعوت ایلینلر
سالدیلار بویوک بلایه
عموجان ازلدن ایکاش
گلمییدوخ کربلایه

عمو گَر کرم گوزیله
بالا قیزلارا باخیدون
قورین سو مشکی ایندی
نولی چگنیوه سالیدون
بو گروه کینه‌جودن
نچه جرعه سو آلیدون

عموجان بو *بیکَس* ایستور
یته چشمه ی بقایه
کرم ایله دعوت ایله
اونی ‌بیرده کربلایه
گله‌جاخ بو یرده گلسه
بیله شوریله نوایه
.

• جمعه
• 22
• اسفند
• 1399
• ساعت
• 17:51
• نوشته شده توسط
• یوسف اکبری

یا ابوالفضل آدیوی دردیمه درمان بلورم
نوکر درگهوی عالمه سلطان بولورم

ای علمدار حسین _ یار وفادار حسین
دوت الیمدن آقا جان _ ای اوجا سردار حسین

ایلده بیر گون آدیوا ثبت اولونوب دفتر غم
سنه گوز تیکمیشم ای صاحب احسان و کرم
هر زمان مشکله دوشسم آدیوی سسلیرم
ای علی اوغلی سنی یار ضعیفان بولورم

ای آدی باب الحوائج شه والایه غلامد
افتخاریمدی آقا منده سنه نوکرم اولام
نه اولار بیرده گوزل قبریوی آغوشه آلام
اوصفالی حرمی روضه رضوان بولورم

ای وزیر شه دین ای خلف شیر خدا
او کیچیک قبروه اولسون هامونون جانی فدا
لطف ایله بیزلره ویر تذکره ی کرب و بلا
کربلانون یرینی کعبه ی ایمان بولورم

غصه و غملر الینده ایله تاراجم آقا
من شماتت اوخونا روز و شب آماجم آقا
گلمیشم درگهوه چون سنه محتاجم آقا
سنی درمان غم و درد ملولان بولورم

دوزدی من غرق گنه عبد خطا کارم آقا
دائما یاندیرالار ناره سزاوارم آقا
نه اولار بیرده گوروم قبریوه زوّارم آقا
سنی من معدن الطافیله احسان بولورم

نه گوزل خلق ایلیوبدور سنی دنیا یارادان
اوز وفاوی نه گوزل طرزیله ایتدون اعلان
مرحبا غیرتیوه تشنه چیخیبسان او سودان
دوزدی اوچ گوندی سنون لبلرون عطشان بولورم

سالیرام یادیمه هردم او گوزل صورتیوی
هیبت هاشمی و مرتضوی غیرتیوی
وای اوگوندن کی بیر اوخ ایتدی عوض نیّتیوی
خیمیه گیتماقوا اولمادی امکان بولورم

گویده بیر اوخ پر آچیب مشکه اصابت ایلدی
آچدی طومار غم و دردی حکایت ایلدی
اوخ ایله بیر اوخدی شیری خجالت ایلدی
دوندریب گوز یاشیوی ایلدی اوخ قان بولورم

آستانونده سیَه روی غلامم من اوزوم
(بیکَسم) دردیمه قیل چاره داخی یوخدی دوزوم
سنون امّا اوکرملی الیوه واردی گوزوم
سنی چون معدن احسان فراوان بولورم

• جمعه
• 22
• اسفند
• 1399
• ساعت
• 22:14
• نوشته شده توسط
• یوسف اکبری

ای ساقی لب تشنه گان ابالفضل
ای ملجأ درماندگان ابالفضل

سسلروخ داده گل ایندی امداده گل

وای اباالفضل وای اباالفضل
ایوای اباالفضل

ای وارث حیدر پناه عالم
یوردی بیزی انبوه غصه و غم

گل آدون باصفا دردلره قیل دوا

دوزدی اوزون غملر الینده سولدون
وار علّتی باب الحوائج اولدون

توکمدون آبرو ایچمدون ذّره سو

سن سر سپاه شاه بی معین سن
سن حامی اسلامیان و دین سن

گوز تیکوب ماسوا او اوزون قولّلارا

سندن سورا کیمدور بو جاهه دارا
اون یدّی منصب صاحبی جهاندا

ساقی نینوا ویر بیزه کربلا

عباسه خاطر ای خدای عالم
لطف ایت گیداخ کرب و بلایه با هم

اوردا باهم دیاخ سلسیاخ آغلیاخ

من بیر گنهکارم اوزوم ذلیلم
درگاهوه بیر عمرودور دخیلم

تیکمیشم گوز سنه لطف ایله سن منه

من (بیکَسم) احسانوه گوزوم وار
بو قلبیده گیزلین نچه سوزوم وار

سسلورم من آقا حاجتیم قیل روا

• جمعه
• 22
• اسفند
• 1399
• ساعت
• 22:16
• نوشته شده توسط
• یوسف اکبری

سیّدی اماندی تئز یتیش هرایه
باشیمی آلوبدی دشمنیم آرایه

گرچه‌ من علمدارم بیر غلام دربارم
گل هرایه قارداش

ای وجود پاکی فخرِ نسلِ آدم
گل یخلدیم‌ آتدان ای شه دو عالم
صیدِ دامِ ظلمِ فرقه ی عِنادم

ای حبیبِ ربِّ فرد و حیُّ قادر
دشمن اوز جفاسین ایلیوبدی ظاهر
مندن اوتری گلمه گل آناوا خاطر

بو بلا چولونده همنشین خارم‌
قوللاریم دوشنده قالمیوبدی چارم
قان ویرور حسینیم باشداکی بو یارم

نوفلین عمودی سالدی آیری درده
قان آخوب باشیمدان بو جمال زرده
گوزلریم ده واردی ایندی قانلی پرده

کاروان عمروم یتدی انتهایه
چاره قیل حسینیم دوشموشم بلایه
دوره‌می‌ آلوبلار گل اوزون هرایه

سیدی بو چولده ظلم‌ الیله سولدوم
بیر بُلود مثالی گوزیاشیله دولدوم
خیردا قیزلاروندان من خجالت اولدوم

من دیمم‌ وجودیم اولدی پاره پاره
گل حسینیم ایله جسمیوه نظاره
پیکریم‌ بو چولده توش اولوبدی خاره

• جمعه
• 22
• اسفند
• 1399
• ساعت
• 22:19
• نوشته شده توسط
• یوسف اکبری

ای‌ منیم بو چولده یاوریم ابوالفضل
ظلم‌ الیله سیندی شهپریم ابوالفضل

وای یارالی قارداشیم
قان اولوبدی گوز یاشیم

دور ایاقه قارداش

ای مه منیر عرصه ی شهادت
خیمه لرده سن‌سیز باشلانوب قیامت
غم‌ یمه سو یوخدی چکمه چوخ خجالت

سن‌ ره وفاده باشیمی اوجاتدون
حیف اولا یارالی توپراق اوسته یاتدون
یاتماقونلا قارداش سن منی قوجاتدون

خیمه لرده قارداش بحر غم داشاندا
شدت عطشدن قیزلار آغلاشاندا
دلخوشام ابوالفضل تلّی سن آشاندا

اللرون اوزولدی قارداشیم‌ الیمدن
دوتموشام برادر بو سینان بلیمدن
سالمارام یارالی آدوی دیلیمدن

من دیمم بو تلّی بیر دوروب آشیدوخ
یا اولیدی امکان بیر قوجاخلاشیدوخ
زینبه ابوالفضل باهم‌ آغلاشیدوخ

من‌ بو گون سحردن غملره دچارم
قالموری کمکلر محنته شکارم
سنده گیتسن‌ ایندی یوخدی آیری چارم

گوزلوری یولوی خیرداجا اوشاقلار
سیل اشکی زینب گول عذاره باغلار
اصغرین آناسی ایندی سینه داغلار

ای ایشیقلی ماهیم‌ سرعتیله باتما
بو غریبی قارداش قانلی گوزدن آتما
دور‌ گیداخ ابوالفضل توپراق اوسته یاتما

• جمعه
• 22
• اسفند
• 1399
• ساعت
• 22:26
• نوشته شده توسط
• یوسف اکبری

دوشموشم توپراقا داده تز گل
رحم قیل قلب ناشاده تز گل
جان یتوبدی دوداقه حسین جان
گلمیشم بیله فریاده تز گل

گل باشی بلالیم
گل پژمرده لالیم
گل قارداش یارالیم

گل جان اوستیم حسین

شرمیدن اولموشام زار و خسته
بیر یارالی قوشام من قفسده
نچّه صیّاد کین تیغ الینده
کَشمَکش وار هله باشیم اوسته

گل رَدّ ایله دشمنی
گل هامّی دویور منی
گل گل بیرده گوروم سنی

گل جان اوستیم حسین

بیر خجالت زده بندیم گَل
سن بولورسن کی شرمندیم گَل
عفو ایله زحمته سالدیم آقا
فاطمه امریدی من دیم گَل

گل گورمور گوزوم حسین
گل چوخدی سوزوم حسین
گل قالمور دوزوم حسین

گل جان اوستیم حسین

تُحفه الده اولان جاندی قارداش
خاک پایوندا نقصاندی قارداش
قیزلارا سو دیدیم من گتورّم
حیف اولا مشکیم اوخلاندی قارداش

گل زخم دیلی بیتور
گل مشکی اوزون گوتور
گل قیزلاریوا یتور

گل جان اوستیم حسین

گر سرافراز ایدوب گلسن ارباب
غصّه دن دینجلر قلب بیتاب
شرمگینم ربابین یوزوندن
گیتمرم خیمیه یوخدی چون آب

گل گور (بیکَسم) آقا
گل من اصغره فدا
گل شرمندیم اَخا

گل جان اوستیم حسین

• شنبه
• 23
• اسفند
• 1399
• ساعت
• 12:13
• نوشته شده توسط
• یوسف اکبری

آچگوزون گلمیشم امداده ابولفضلیم اویان
گلمیشم ناله و فریاده ابولفضلیم اویان

عباس عباس ای منیم آرخام ائلیم
عباس عباس آچگوزون سیندی بلیم

خیمه ده منتظرین چوخدی یارالی گوزون آچ
یارالی جسمیده کی رمز و رموزی اوزون آچ
اوچ پر اوخ صحبتینی، بیرده عمودین سوزون آچ
قویدولار تک منی دنیاده ابولفضلیم اویان

عباس عباس یره سوتمه یوزوی
عباس عباس گوی سیلیم‌من‌گوزیوی

کیم دیر یاخچی پیسی دهریده سن سیچمه میسن
راه ایثار و وفادن بیلیرم گیچمه میسن
مشگیوی دولدورب اما او سودان ایچمه میسن
تشنه لب سن لب دریاده ابولفضلیم اویان

عباس عباس آفرین نیّتیوه
عباس عباس مَرحبا غیرتیوه

یانیرام حالیوه قلبیم نجه کوز باغلاماسین
بولسه احوالیوی زینب نجه دل داغلاماسین
نه دیلیله بالاقیزلاره دییم آغلاماسین‌
فاطمه آغلوری معناده ابولفضلیم اویان

عباس عباس خیمه ده چوخدی سوزون
عباس عباس قیزلار ئولدوردی اوزون

لشگر کوفه بوگون راه سعادتدن آزیب
خط به خط دفتر عمرون‌اودی تیغیله یازیب
اَیاقین یرده چکنده اوزووه قبر قازیب
لعن حق لشگر بیداده ابولفضلیم اویان

عباس عباس قلبیمی سیخما اویان
عباس عباس ایویمی یخما اویان

غم یمه یوخدی اَلون قانی گوزندن سیله سن
سیلرم منی گوزووی یانما بله نیسگیله سن
گوزوی آچسان اگر حالیمی یاخچی بوله سن
رحم ایله بو دل ناشاده ابولفضلیم اویان

عباس عباس حالیمی کیم بولوری
عباس عباس منه دشمن گولوری

بولورم عالم ذَرده گوزل آدون سیچیلیب
دست خیاط قضائیله بو خلعت بیچیلیب
او رسا قامتیوه نولدی بو نوعی کیچیلیب
نه گلوب قامت شمشاده ابولفضلیم‌اویان

عباس عباس قان آخوب گول یوزووه
عباس عباس نه‌گلیب صاق گوزوه

(بیکَسم) بوردا اَخا حالیمی بیر دوت نظره
قوی سالوم چیگنیوه مشگی قِییداخ خیمه لره
عَلَمین یرده قالوب دوشدی اوشاخلار خطره

عباس عباس حالیمی سال نظره
عباس عباس دور گداخ خیمه لره

• شنبه
• 23
• اسفند
• 1399
• ساعت
• 12:18
• نوشته شده توسط
• یوسف اکبری

چارم شعبان اولوب / مدینه نورانی
گلشن ایدوبدی خدا / منزل مولانی

شاد اولوب اهل حرم / ایلیوب ا... کرم
گلدی بو گون عالمه / صاحب مشک و علم
یا ابوفاضل مدد

ای حسین چی لر گلون /شوریله نوایه
تهنیت ویرون هاموز / شاه لافتایه

عالمه ویردی صفا / بو آیا بنذر آقا
ام بنینه دیون / گوزلرون آیدین اولا

یا ابوفاضل مدد

عالمی حیران قویان / شیوه ی وفاسی
سنده دی مولا هامی / دردلرین دواسی

کیم غم و درده دوشر / گل آدیوی سسلیر
قلبی سیخیلسا کیمون / یا ابوفاضل دییر

یا ابوفاضل مدد

رشک جناندی آقا /اوخیرداجا قبرون
قسمت اولا بیرده کاش/ او با صفا قبرون

صاحب شان و وقار / (بیکَسی) غملر سیخار
قبریوه زوّار ایله / عمرومه یوخ اعتبار

یا ابوفاضل مدد

• یکشنبه
• 1
• فروردین
• 1400
• ساعت
• 19:40
• نوشته شده توسط
• یوسف اکبری

ای علینون اوغلی ای وزیر شاه کربلا
ایتموسن دل جهانی درد عشقه مبتلا

کیم سنه اورکدن/باغلاسا محبت
حتماً ایلیَرسن/سن اونا عنایت

مرحبا ابالفضل مرحبا ابالفضل
ای حسینه یارِ باوفا ابالفضل

سَروی سَروِ قامتون ایدوبدی گورنه شرمسار
ایتموسن اورکلری او تیرِ عشقیله شکار
شعله ی محبتون سالوبدی قلبه بیر شرار

عبدِ خوارو زارم/دوزدی چوخ حقیرم
نچّه ایلدی مولا/عشقیوه اسیرم

خَلق ایدنده محشر ایلیوب خدای داورون
عالمی سالوبدی حیرته جمال اَنورون
چوخلی درده چاره ایلیوب سنون او اللرون

سن اوزون بولورسن/دیلده چوخ سوزوم وار
او قَلم قولوندا/هرزمان گوزوم وار

فضل و شأنیوین جهاندا یوخدی مطلقا سایی
ماهِ صورتون خجالت ایتدی گویده کی آیی
سهم و صولت و صلابتونده گلمییب تایی

حمله ایلینده/سوی قوم کافر
فکر ایدردی دشمن/جنگه گلدی حیدر

رأس مشرکینی جنگیلر ایچینده قییرمیسان
دوزَخَه گیدوبدی هرکیمه قیلنجی وییرمیسان
نامه ی امانِ شمری غیرتیله جییرمیسان

من دیدون غلامِ/شاهِ مشرقِینم
تا اَبد به زیرِ/ پرچم حسینم

ای شکسته دیللرین اولان جهاندا مرهَمی
درگهونده سائلین گیدر اورکده هر غمی
ای قَلَم قولیله ساخلیَن آت اوسته پرچمی

درده مبتلانی/ قووماسان قاپوندان
(بیکَس)و گدانی/ قووماسان قاپوندان

• دوشنبه
• 2
• فروردین
• 1400
• ساعت
• 22:37
• نوشته شده توسط
• یوسف اکبری

اوج سپهر عشقیده_عنقاسی واردی شیعه نون
منظومۀ احساسیده_آقاسی واردی شیعه نون
دام بلایه دوشسه گر_ئوزگه بیر آدی سسله مز
چون دامیدن آزاد ائدن_عباسی واردی شیعه نون

شکر ایلرم اللهیمه_عشقین اودی بو جاندادی
بو عشقیله هر دردیمون_پایانه سی درماندادی
هر دردمندون چاره سی_مشکل گشا اوغلوندادی
دست شفایه ئوزگه بیر_احساسی واردی شیعه نون

سردار عشقون رتبه سی_بیر دلربا دلبرده دی
اولدوزلارین امّیدی بیر_ماه ملک منظرده دی
بو کهکشانین چرخشی_بیر جوت آلا گوزلرده دی
بیر یول کرمدن باخسا گر_دونیاسی واردی شیعه نون

ای کوثری جمع ایلین_مشکینده،سقّایه سلام
ام البنینین میوه سی_فرزند زهرایه سلام
ای لطفیدن بذل ایلین_دریانی دریایه،سلام
آلسون سلامی،لطفیدن_دریاسی واردی شیعه نون

قبرونده زرّین گنبدون_عرش خدانون طاقیدی
ملک سلیمان ساحتی_اول مرقدون دیرناقیدی
اولسا حریمون دشتِ گل_جنّت فقط بیر باغیدی
اول یئرده جنّتدن شیرین_رؤیاسی واردی شیعه نون

• دوشنبه
• 2
• فروردین
• 1400
• ساعت
• 23:12
• نوشته شده توسط
• یوسف اکبری

سقا سووا معناده ائدوب ناله فراوان
ای سو اولاسان قان،نئدن اولمادون امکان

شرم ائتمدون عباسین آخان اشک تریندن
وئردی سنه خاطر ایکی قول بیر گؤزی قربان

گئتدیقجه آتی،پاره لِیوردی اونی اعدا
اوخلاری دیوم نیزه و یا تیغۀ برّان

اوخ یاره لری ییخدی او سردار جوانی
گلمز سایا اوخلار سینه سین ائتدی نیستان

ییخماز اونی یاره ائدورم بیله تصّور
وورموشدی یقیناً اونا دیل یاره سی عدوان

صبریم غم اوتی پارچالادی سؤز بئله گلدی
گرداب بلاده سیخیشوب حافظ قرآن

عرض ائتدی خدایا یوخ اَلیم قالخوزام ایندی
اَل سیزلری رد ایلمه ای خالق سبحان

عباس دعا ایلدی اوخلار دئدی آمین
دوشدی سینه سی اوسدونه سقای لب عطشان

بو حالیمی تنها بیری درک ایلیر الله
لطف ایله گله باشیمین اوسته شه مردان

عباس دعانی ائده یا ائتمیه گلدی
جان اوسته تاپار جمله نی اول قدرت یزدان

معناده گلوب علقمه حیدر اَلی باشدا
یوز یوزده دایاندی هر ایکی هیکل ایمان

غیرت بالاسی غیرته طومار غم آچدی
متن اَلَمی ائتدی قرائت لبی لرزان

سسلندی آتا منده دچار ستم اولدوم
بیگانه بیلوبلر منی ده قوم مسلمان

مولا سنه تاپشوردی پیمبر بیر امانت
اما اونی پژمرده ائدوب موسم هجران

بـو مشکیده عباسه امانتدی حسیندن
ایندی گؤروسن اوخلار ائدوب حالینی گریان

زهرا نئجه گئتدی سینه سی یاره اَلینن
دولدوردی منیم مشکیمی ده سو یئرینه قان

او لحظه ده نِیلَـک اَلیمیز ائتمدی یاری
سن قوللاری باغلی من اثر یوخدی قولومنان

• سه شنبه
• 3
• فروردین
• 1400
• ساعت
• 13:54
• نوشته شده توسط
• یوسف اکبری

ماتیدور امواج دریالر ابالفضل عشقینه
محویدور ابصار رعنالر ابالفضل عشقینه

سوزدی جامِ اُلفتیندن عشقینون بیر قطره‌سی
اولدی عاشق،عشقِ زیبالر ابالفضل عشقینه

گؤز که آچدی دهره احساسیله قیلدی بیر نگاه
سیغمادی گوشینده صحرالر ابالفضل عشقینه

گؤرمقه بیریول یوزون باش قویدی یکسر چوللره
اولدی مجنون کل لیلالر ابالفضل عشقینه

تا یازیلدی پاک آدی نوریله لوحِ اعظمه
دست بوسه گلدی حورالر ابالفضل عشقینه

آستان عشقینون توپراقینی تا اوپمقه
باش أگیبدور نخل طوبالر ابالفضل عشقینه

روحی اقدس دور،ازل عشقی مقدس خلق اولوب
یوز دوتوب پاکیزه سیمالر ابالفضل عشقینه

اول فقیرم منکه قلبیم،عشقی دولتمند ائدوب
یوخ نیازیم گلسه دنیالر،ابالفضل عشقینه

• چهارشنبه
• 4
• فروردین
• 1400
• ساعت
• 20:21
• نوشته شده توسط
• یوسف اکبری

ای گرفتار بلا داده ابالفضلی چاغیر
ایستوسَن کربُبَلا داده ابالفضلی چاغیر
صاحبِ مشک ولوا داده ابالفضلی چاغیر

جلوهٔ عشق و وفادی شرفُ النّاسین آدی
هامی امراضه شفادی آقام عبّاسین آدی

اونی الله بَیَنوب معنوی احساسه گوره
اوجا بویلی یارادوب نانجیب اشخاصه گوره
پای ویروب قارداشینا لحظهٔ حسّاسه گوره

نه فقط شیعه ائدر نذر اوگُلِ یاسه گوره
واردی چوخ ارمنی قربان کَسَر عبّاسه گوره

• پنج شنبه
• 5
• فروردین
• 1400
• ساعت
• 11:40
• نوشته شده توسط
• یوسف اکبری

ایلیور حمله اوتوز مین نفره جرأتیله
تولیور صاق و صولا قولارینی قدرتیله
دَرَکه واصل ائدور شامیلری خفّتیله
مجمع شعر حماسی اوزمان دائر اولوب
جبرئیل مدح ابالفضله اوزی شاعر اولوب

واژه یوخ وصف ابالفضله زبان قاصر اولوب
مارده ایلدیلر فوری خبر حاضر اولوب
قدرت حضرت عبّاسه بیرآز ناظر اولوب
صورا دستور ویروبلر قویا میدانه قدم
آلدی پاداش فراوان گئده میدانه اودَم

مارده سویلدی عبّاس سپهدارم من
فاطمه اوغلینا هریرده مددکارم من
اوجاقامتلی اوزون قولّی علمدارم من
فنّ رزم و جَدَله هرنَدَن آگاهم من
گئت اوشاقسان بابا شاگرد یداللهم من

سویلدی مارد ابالفضله اگر عاقلسن
اول پناهنده بیزه بیعته گر مایلسن
سنی حیفیم گلور اولدورمگه چوخ قابلسن
ایستوسن لذّت دنیانی بیزه همراه اوُل
چون امیریمدی یزید سن اونا خاطرخواه اوُل

ماردین کسدی سوزین حضرت عبّاس اوزمان
دئدی جنگ ایلمگه سنده اگر یوخدی توان
سال یره اسلحووی خواب جهالتدن اویان
مست و میخواره لره سرور و سلطان دیمرم
اویزیدی قاپیما هِچ ایت حساب ایلمرم

• پنج شنبه
• 5
• فروردین
• 1400
• ساعت
• 11:42
• نوشته شده توسط
• یوسف اکبری

.....آی دئمَلی دردی اولان.....

خوشدی بنده سوزونی٬ خالقِ داداره دئسون
رسمیدی یار گلوب٬ دردِ دلین یاره دئسون

ای علی شیعه سی شخصیّتوی خوار ائلمه
شیعیه ننگیدی٬ اوز دردینی اَغیاره دئسون

هرکیمین حاجتی وار٬ نیّتینی پاک ائلَسون
دیمورم هیچ سوزونی حیدر کرّاره دئسون

ولی حیدر اتگیندن٬ یاپیشوب حاجتینی
اوجا بوی اوغلی٬ ابالفضلِ علمداره دئسون

• پنج شنبه
• 5
• فروردین
• 1400
• ساعت
• 12:33
• نوشته شده توسط
• یوسف اکبری

رحم‌ائله‌بو اوغلی‌ئولموش بی‌کمک امامه قارداش
یاتما قانلی قتلگهده دور‌گئدَک‌خیامه قارداش

تپراقا دوشوب عمامون پرچمون قولون سو مشکون
گوزلرونده قان اولوبدور باشوین قانیلا اشکون
کشتگان راه قرآن سر‌به‌سر چکلله رشکون
چاتمیوبدی‌هئچ شهیدون شأنی بو مقامه قارداش

باشیوه سنون عمودی اندیرن زماندا دشمن
ابتدا منیم بلیمی سندیروب عمودِ آهن
بو یارالی باشون اوسته خم قدیله آغلارام من
یوخدی قامت خمیله طاقتیم قیامه قارداش

تندن اللرون سالانلار فرصت اللره سالوبلار
من یارالی باشون اوسته آغلادوقجا کام آلوبلار
قدّیمی گوروب خمیده شاد اولوبلار اَل چالوبلار
فُرصت جفا یِتوبدور لشکر ظلامه قارداش

عرش زینیدن دوشوبسن تپراقا شکسته شهپر
قامت بلند سروون گل کیمی اولوبدی پرپر
بَسکی پاره‌پاره اولموش آیِنه کیمی بو پیکر
ممکن اولمیور جنازون حمل اولا خیامه قارداش

• شنبه
• 7
• فروردین
• 1400
• ساعت
• 12:49
• نوشته شده توسط
• یوسف اکبری

قولّار قلم اولموشدی
قان گوزلره دولموشدی
آغلاردی مدارینده
شمس و قمر عبّاسه

صاق گئتدی کسر گئتدی
صول گئتدی سپر گئتدی
باش‌کاسه‌سی اولموشدی
تنها سپر عبّاسه

دورت‌سمتیدن‌اوخ دگدی
بیر آخ دئمدی والله
دیل یاره‌لری اولدی
اوخدان بَتر عبّاسه

کسدی قباقین ناگه
بیر غول قوی پیکر
بیر آهن عمود آلتدا
سالدی نظر عبّاسه

سسلندی،علی اوغلی
نه گلدی او قولّاره
بو سوز یارالاردان چوخ
ائتدی اثر عبّاسه

ناگه او عمود آهن
گزدی باشی اوستونده
جانجان دئدی زهراده
والا گُهَـــــر عبّاسه

زین اوسته ابوالفضلی
بیر صاق صولا ترپتدی
لایلای چالینور گویا
شوریده سر عبّاسه

بو واقعه واللّهی
زهرایه گران گلدی
یرگوی هامی‌قان آغلار
دشمن گولر عبّاسه

• شنبه
• 7
• فروردین
• 1400
• ساعت
• 12:55
• نوشته شده توسط
• یوسف اکبری