بو جبینمدن دگن اوخ پیک وحدتدور منه
باشیم اوسته سیّدی گلسن عنایتدور منه
سرسپاه شهریار عشق پاداش آختارور
قان دولان گوزلر سنی هرلحظه قارداش آختارور
ظلمیله اون یدی ظالم بیر سینان باش آختارور
چوخ يوبانما بو يوبانماق چوخ اذیّتدور منه
بو قفس چوخ اولدی مرغ روحيمه ننگین و تنگ
منده یوخ قدرت اولوب دشمنلريم تشویق جنگ
اوستومه گویدن یاغور باران ذوبین و خدنگ
دشمنه زائیدهٔ عشرتدی، حسرتدور منه
تا علمدارین سسین آلدی امیر نه قباب
شرق مخيمدن طلوع ایتدی بسان آفتاب
سرعتیله گلدی قارداش باشی اوسته باشتاب
سسلدی ای سرو قامت، دور قیامتدور منه
روز روشن گوزلریمده تار اولوبدی چون شبه
دور ایاقه یاتما آل الله دوشوب تاب و تبه
کوفیه گیتماق مسلم اولدی ایمدی زینبه
چون بو صحراده شریک درد و محنتدور منه
قانیله مستور اولوبدور هاله تک زیبا یوزون
نطقه گل قويما قالا قلبونده واردی گر سوزون
اوای منه آماج پیکاندور یارالی صاق گوزون
- روحيمون ایذاسينه بو غم کفایتدور منه
کربلا سقاسی گوز آچدی گوروب قارداشینی
صورتين پاک ایلیوب آلموش دیز اوسته باشینی
توکدی حسرتله یوزه قانه دونن گوز یاشینی
عرض ایدوب شاها عجيبه بیر سعادتدور منه
خوشه ممکن اولمادی تا نخل خدمتدن دریم
پیشوازه گلمدیم، بیجان اولوبدی پیکریم
پیشواز ایتدی ولی یولدا کسلميش الكريم
وای اولا سرلشکر شاهم حقارتدور منه
بیله بولمه خدمتیمده من بو گون ایتدیم قصور
سو یولون گوردوم دوتوبدور ظلميله قوم شرور
شور عشقیله فراته ایله دیم فوراً عُبور
مرتضی ارثیه سی قارداش شجاعتدور منه
من عرق ریزان و مجروح و سوسوز لعل لبیم
گون ترخم ایتمیوبدی یاغدوروب نار جهيم
اسدی بیر نهر فرات اوسته سرین دلکش نسیم
دیزلریم سست اولدی گوردوم ضعف شدتدور منه
الشكر اشراريدن خالی گورنده دورهمی
سو نسیمی قلبدن پاک ایلهدی زنگ غمی
نصب قیلدیم من فرات اوستونده قانلی پرچمی
شدت سوز عطش گوردوم زیادتدور منه
بی اراده اللریم ایتدی اراده سوی سو
سو گوتوردوم گوردوم امّا یوخ سودا بیر آبرو
من ایچم سو قالسون عطشان کودکان ماهرو؟
حدس ویردیم عالم امکاندا رخوتدور منه
بیر سویا حسرتله باخدیم بیرده نهر علقمه
بیرده نهر اوسته اسن دلکش سسیله پرچمه
بیر قولاق ویردیم ایدیردی اهل کوفه همهمه
مشکی دولدورماق اودور بولدوم غنيمتدور منه
مشکی دولدوردوم او دور که عزم قیلدیم مخیمی
چیگنیمه سالدیم سومشکین گوتدوم الده پرچمی
ایستیردی مشکه اوخ دگسین دوتاردیم سینه می
چونکه مشکیم روح طاقت، تاپ و قدرتدور منه
الشكر اهلی گولدولر قلبیمده حس رشکیمه
قلبيمون قانین قاتوبلار ظلم آليله اشگیمه
ویر میوبلار سینهمه اوخ ويردولار سو مشگیمه
خجلتیمدن چاره می بولدوم شهادتدور منه
مشکیمه اوخ دگدی اعدايه حمایت ایله دی
سرسپاهی پیشگاهوندا خجالت ایله دی
سجده گاهیمدن بیر اوخ ناگه اصابت ایله دی
و پیک وحدتدن اودور گوردوم اشارتدور منه
تخم حيرت قلب لشکرده حسینیم اکمیشم
سینه ده اوخ باشیمی فوراً اشاقه اگمیشم
دوشدی عمّامم يره امّاخدنگی چکمیشم
هامی ساعتدن چتین قارداش او ساعتدور منه
گلستان عشق و امیدیم او ساعتدن سولوب
قان جبينمدن آخوبدی کاسه چشمیم دولوب
قوی دیوم واضح باشیمدا ظلم اليله کُرد اولوب
قلبه تأثیر ایلین امّا شماتتدور منه
بو جفائیله حسین، دوشدوم ستمله غرق خون
واردی یادونده ولی مخیمده اولدوق قول بویون
نه آليم وار نه قولوم سال بوینوما بیرده قولون
چوخ یاخین هر لحظه جام پیک رحلتدور منه
قولارين آچدی او دمده نور عين بوتراب
ماوراء جوده گورسندی حال انقلاب
قول بویون اولد بلا دشتينده ماه و آفتاب
آی دیوب ای گون چوخ آرتوخ بو محبّتدور منه
دوردی شه حسرتله ایتدی ناگهان عزم خیم
گوردی قارداشی گلور، زینب، اولوبدور غرق غم
سینه سینده واردی اوخلی مشگیله قانلی علم
عرض ایدوب قارداش بو حالون چوخ صعوبتدور منه
ای حسین ابن علی ای هادی دین خدا
(هادیه) بذل ایله بو ایل بیر برات کربلا
مطلع شعری فرات اوسته اونون تکرار اولا
بو جبینیمدن دگن اوخ پیک وحدتدور منه
- یکشنبه
- 7
- شهریور
- 1400
- ساعت
- 14:28
- نوشته شده توسط
- یوسف اکبری
ادامه مطلب
