زَهرا آدی اورکَلره روح و صفا وئرر
بیر کیمیادی عالمه خیر و عطا وئرر
زَهرا آدین بو شعره سر آغاز ایلورم
چون اسم پاکی دللّره شَهد و شَفا وئرر
دردانهء یگانهء طاهادی بی گمان
زَهرایه أم اَب لقبین مُصطفا وئرر
گردِ غم و مصیبتی دلدن بوتون سیلر
آیینهء وجوده آدی انجلا وئرر
کُفو على دی گورنه جلال و مقامی وار
ارزش بیله مقامی نه حیّ علا وئرر
زَهرادی علّتِ شرفِ جمله ماسوا
عزّت تمام عالم خیرالنسا وئرر
بیر دُرّ دور خانم حرف عصمته یقین
صرّافِ روزگار بو دُرّه بَها وئرر
بیر تار موینی ایکی دنیایه وئرمرم
بو تار مویه قَدر و بَها مُرتضی وئرر
نقش ایتمیشم محبّتِ زَهرانی قلبیده
ارزش بیله محبّته آلِ عبا وئرر
اکسیر دور محبتِ زَهرای مَرضیه
سینمده دور محبّتی عشقِ ولا وئرر
بزمِ غمینده سینه می هر لحظه داغلارام
بو سینه داغی قلبی مه شوقِ عزا وئرر
بزمِ عزاده فاطمیه آغلاماق بلی
روحه سرور و لذّتِ بی مُنتها وئرر
جدّی اَلیندن اؤپدی بویوردی فدا سنه
اقدام بیله فعلی نه فرمان خدا وئرر
سندَن بهشین عطری گلور جان مشامی نه
بو عطر دور که روحی مه یکسر صفا وئرر
چونکه رضای فاطمه الله رضاسی دور
راضی گر اولسا فاطمه الله رضا وئرر
آزار اِیلسه سنه هر کیم جهانیده
آزار مُصطفایه او کس بر ملا وئرر
هر کس که زیر سایهء زَهرا دوتا قرار
قیمت او شخصه خالقِ اَرض و سما وئرر
دارالشّفادی درگاهِ والای فاطمه
هر دردمنده حضرتِ زَهرا شفا وئرر
محبوبهء خدادی خانم وار کرامتی
دُخت کرمدی سائلی نه نُو قَبا وئرر
بیله مقام و شانیله ثانیِ نابکار
درگاهین اودلیوب اونا بی حَد جفا وئرر
ریحانهء رسول خدانین وجودی نه
ِاِیذا نقدر گور ستمِ اَشقیا وئرر
عجِّل وفاتی ورد ایلدی بانوی جهان
بو ظلم لر نشانِ غمِ کربلا وئرر
چونکه (خجسته) سائل درگه دی بی گمان
زهرا اوزی جزاسینی روزِ جزا وئرر
- سه شنبه
- 30
- شهریور
- 1400
- ساعت
- 20:40
- نوشته شده توسط
- یوسف اکبری
