خلق اِیلیوب خدا بشری نچّه علته
بیر علتی اشاره اولوبدور عبادته
بیر علتینده معرفته وار اشاره سی
انسانی معرفت یتیرر اوج رفعته
بیر علتیده عهده وفادور ، گر اولماسا
حاشا یِته جهاندا بنی آدم عزّته
قران بیزه چراغ هدایتدی لاکلام
نازل اولوبدی حضرت ختم رسالته
البته دلده اولماسا گر حُب مرتضی
ممکن دگور اَیاق قویاسان باغ جنّته
جَنّت او کسلرین یِِریدور روزگاریده
یول ویرمیوب محبت هر بی کفایته
دل ملکینی محبت یاره اِیدوب مکان
ویرموب مقام شاهدی ارزان قیمته
بیرده آنا محبتی زیبنده دور دله
احسان حقّدی دهریده یکسر جماعته
هر کیمسه نین که واردی محبت آناسینا
قربان اولوم او دلده کی عشق و محبته
حَقّا آنا محبتیدور، هانسی دلده وار
گنجینه ایلیوب دلی آیات رحمته
قیزلار بولر محبتینین اصل و رسمینی
یوخدور توان خامه ده شرح عبارته
گورسه اگر محبت اونا اِیلمور آنا
رخصت ویرر گوزونده او دم اشک حسرته
باخسا آنا او گوزدن آخان اشکینه اونون
قلبی یانار او غمده دوشر اوزگه حالته
فوراً گلوب دوتار دله مین دل دیر اونا
اِیستر که روحی دوشمیه رنج و اذیته
بو نوعیله علاوه که قیز ایسته دَر ئوزون
فعلینده یوخ نیازی جهاندا وساطته
هر چند که بو فعلده وار چوخ مهارتی
آرتوق نیازی واردی ولیکن حمایته
حلال مشکلات بولر ئوز آناسینی
سسلر هراینه اِیشی دوشسه صعوبته
واقفدی که آنا تک اونا یوخدی بیر یانان
باخ سن اوشاقدا ای دل غافل فراسته
بیر آنیده سالور یول آنا قلبینه بالا
حیران قالوبدی خلق بو اعجاز خلقته
دلدن سنه آنا کیمی آیا یانان هانی
گولدور آنا او گولده باخ عطر و طراوته
دنیا بویی گوزلیقی قلبینده گور اونون
معنای حُبی گور نه چکوب صور صورته
اِیتسه دعا اگر بالاسین مستجاب اولار
الله دعاسینی یِتیرَر استجابته
گلدی بو یرده رشته مطلب اَله (عتیق)
سعی ایله ویرمه فرصت عالینی غفلته
یاز زینبین او حالینی که گوردی فاطمه
بیر اللی یاره باغلوری دوشموش اذیته
توکدی عذاره گوز یاشینی عرض اِیدوب آنا
گیزلتمیسن بو یاره نی آیا نه علته
نطقه گلوب بویوردی قیزیم من نجه دوزوم
آغلار گوزیله سن باخاسان بو جراحته
قالوبلا سالوبدی بلایایه باشیمی
عمروم چوخ آز قالور که یتیشسین نهایته
لازمدی که آچام سنه بیر غملی صحبتی
دیداریمز نه چون قالاجاخدور قیامته
جاندان عزیز آتاندی بیزه روزگاریده
خدمت ایله اولونجه او شاه ولایته
خدمت ایله او خدمتیوه فخر ایله مدام
یتدون صغیره سنیله عالی سعادته
دلده رضاسی بول گیلن الله رضاسیدور
تقدیر حقدی توش اولا سنگین ریاضته
جدین منه بویوردی علی باب علمیدور
بش گون قوناق گلوبدی بو دنیای ظلمته
قاصردی خامه لر یازا شان و جلالتین
مینلر کتاب اولار یِتیشه گر کتابته
باخما سقیفه اهلی یوزون دوندروب اونا
جاندان یانار امام زمن حال امته
بیر گون بولار که دوندروب ئوز ئُوز امامینه
بیر گونده بیعت ایلمیشیدی او حضرته
افسوس اولا که پوزدلا بیعتلرین تمام
آلاندلار جهاندا کَذایی ریاسته
بیر غملی سوزده وار که اِیدم فاش و برملا
قلبون مکان اولار گِینه بیر تیر محنته
سسلر حسن که گل انا جان دادیمه یتیش
قالمور جهاندا تاب و توانیم سکینته
قارداشیوین یتیش او زماندا هراینه
اول نائبه او دمده قیزیم بو وصیته
جان تاپشیراندا گوزلرینی باغلا زینبیم
تا دوشمسین دوباره گوزی دار محنته
تَشته گلر جگرلری قان آغلادار سنی
قان آغلاسان دوباره بیر آیری عبارته
بوندان بویوک بلاده هله باشیوی تاپار
کرب و بلا چولونده قالارسان مصیبته
بیر بیر باتالا قانه جوانان هاشمی
نوبت یِتن زمانیده شمس هدایته
اول پیرهن که فیضّیه تاپشیرمشام اونی
آل رد ایله او چولده شه با کرامته
قارداشیوین او دم عوضیمدن بوغازین اُوپ
باخ بیر دویونجا گول کیمی سولموش او صورته
اِیله سوار مرکبه عزتله سال یولا
قان لُجه سینده تا یِِتیشه بزم وحدته
عهد اِیلیوبدی اِیلیه ایفا ئوز عهدینه
لازمدی که او چولده یِتیشسین شهادته
آیرلسا بیرده خیمیه گلمز حسینیمی
نائل دوباره که اولاجاخسان زیارته
اُول نائب الزیاره منه مقتلینده ده
اولادی سندن اوزگه سی کیم بو نیابته
چوخدا یوبانما چون که گلر غارته قوشون
غارت دئمه که اوخشیاجاخدور قیامته
قالسا قالار او چولده سنه بیر یانان چادر
مسکن اولار او قورخلی صحراده عترته
بیر جرعه سو ربابه او دم بولدقون اِِیدر
سسلر سوسوز بالاسینی پی در حمایته
تاپشیرمیشام حسینه اَحبانی من (عتیق)
قبره گیدنده داده گله دوشمه وحشته
هر کیم حسینه آغلیا اولام شفیعه من
مشمولیدور شفاعت آل طهارته
محشرده آغلاماز کیم حسینه گر آغلیا
اشکی نه چون که ناصر اولوب قانلی نهضته
- یکشنبه
- 3
- مرداد
- 1400
- ساعت
- 12:24
- نوشته شده توسط
- یوسف اکبری
ادامه مطلب
