ای دل نَدن وفا اِیلمز چرخ کجمدار
اِیلر مدام اهل دلی غصّیه دچار
هیچ کیم دئمز که اِیتدی زمانه وفا منه
عالم دِیر اِیدوبدی جفا خلقه روزگار
بش گون اگر وفا اِیلیور باخما بیر کَسه
بیر گون دوباره اِیلیجاخ دهریده نزار
اولسیدی گر وفاسی اِیدردی پیمبره
دنیا یالاندی یوخدی بو دنیایه اعتبار
تاکید اِیدردی امته طاها بو نکته نی
آلامیون بو عالمه ای خلق کردگار
آگاهیدی بشرده اولان نفسه لاکلام
بو نکته نی سفارش ایدردی اودور کِرار
قدرین جهاندا بولمدیلر موقع حیات
دائم اذیت اِیتدیله پنهان و آشکار
فرمایش ایلیردی همین سرور گرام
مندن صورا علیدی بو عالمده تاجدار
آگاه اولون رضایتی الله رضاسیدور
دلدن یانار چون امتیمه بو بزرگوار
کیمدور علی خدا بولوری روزگاریده
مشکل گشادی مشکل عالملری آچار
ذکر جلّی بولون ئوزوزه نام پاکینی
عیسی ایدوبدی ورد زبان اِیلر افتخار
هر کیمسه صدقیله چاغیرا یا علی مدد
هر یرده اولسا داده گلر قیدینه قالار
مندن صورا ولایتینون قدرینی بولون
مرد عمل بو فعله اُلون ویرمیون شعار
طاها بولوردی امتینه یوخدور اعتبار
فرمایش ایلمیشدی ، دگور دور از انتظار
تا گوردیلر وداع اِیلدی عالمی رسول
سالدی آرایه تفرقه بیر عده اهل نار
جمع اولدولار سقیفیه بیر نچّه مرد پست
تصمیم دوتدولار سالالار یثرب ایچره جار
هر کیمسه که علیله او گون بیعت ایلیوب
پوزدی دوباره بیعتی اول جمع بی شمار
بوبکره بیعت ایلوری یکسر جماعتی
چوخ قالموری علی اولا تا صحنه دن کنار
دستور وار علیدده گَرک بیعت ایلیه
امضا اِیده خلافتینی اِیتدی واگذار
بیر حالیده بو فکره او دم دوشدی نچّه دون
تازه علی و فاطمه اولموشدی داغدار
هیچ کیمسه بیر دئموردی که آیا نه علته
ایستیرسیز اولسون حیدر کرار بر کنار
جرعت تاپوپ بو خاطره اهل سقیفه نی
بِیت ولی حقّه طرف اولدی رهسپار
ازًل که دوگدولر قاپونی اولمادی جواب
ویردی لگد او درگهه بیر نچّه کین شعار
زهرا نه گوردی چکدی علی آه جانگداز
قان آغلادی او حالینه اول دمده ذوالفقار
عرض اِیلدی عم اوغلی علی لطف قیل منه
رخصت بویور گیدوم قاپیا تا گوروم نه وار
اذن آلدی گلدی پشت دَره دخت مصطفی
نطقه گلوب بویوردی که ای قوم نابکار
بیز دن نه ایستیسوز بولوسوز که عزالیوخ
دلدن یتوبدی عرشه بو ماتمده آه و زار
سس ویردیلر گرکدی علی بیعته گَله
گوزلور یولون خلیفه اونون ایندی بی قرار
دستوریدور اگر قاپونی آچماسان بو دم
درگاهیوه بیز اوت ویراروخ درگهون یانار
زهرا بویوردی اِیلمیون بیله فکر خام
من قویمارام ولی خدا تاپسین انکسار
روباهه شیر فکر اِیدیسوز بیعت اِیلیر
بو فعله اولمسوز نه سببدن امیدوار
نومید اِیتدی یکسره اهل سقیفه نی
اوت ویردلار همان قاپیا اولدی شعله بار
یاندی گونون گون اورتا زمانینده درگهی
معناده اِیتدی حضرت طاهانی اشکبار
ای کاش آچیلمییدی قاپی، سال خیالیوه
زهرا قاپی دالندادی گر ویرسلر فشار
تنها نه پشت درده قالار فاطمه ئوزی
محسن قالار مصیبته بیر گول کیمی سولار
اما آچیلدی مین ستمیله یانان قاپی
حشره کیمین بو غم دل عشاقی یاندورار
زهرا چاغیردی فیضه ئوزون دادیمه یتیش
بو سس یتیشسه دلبره گور یاندورار یاخار؟
بیر حالیده چیخوبدی علی آستانیه
اِیستَکلی یاره فکر ایله گور گوز نجّه باخار
باخدی نه گوردی قان آپارور یار یارینی
مُحسن ایاخلانور قوری یر اوسته آشکار
سسلندی سس یتور منه زهرا نه یاتموسان
کُونلوم قوشی بو نوعیله بلکه تاپا قرار
زهرا او دمده سسلدی بیر یا علی مدد
دیندیرسه یار یارینی واضحدی دم تاپار
مخمور جام عشق مسیحادن آلدی دم
دم ویرسه یار یاره اولار باده خوشگوار
دوردی ایاقه محکم ایدوب باشدا چادرون
گوردی اولوبدی یاری عجب مشکله دچار
ظلمیله باغلانوبدی یدالله قولاری
یوز دوتدی سسلنوب دیدی که ای قوم پست و خوار
اَکملتو آیه سین اوخیون والی دور سیزه
والی حقه اِیلمیون ظلم بی شمار
دامانینی محالیدی اَلدن ویرم بو دم
آمادیم یولوندا ایدم جانیمی نثار
بیله خیال ایلمیون تک قالوب علی
زهرا کیمی ولایتینین جانفشانی وار
اولسم اگر بو یولدا منه افتخاریدور
داغلی دئیله دوباره گلون سالمیون شرار
ثانی نه گوردی اَل گوتومور یار یاریدن
اِیتدی اشاره قُنفذّا اول مرد حیله کار
یعنی که اَل گوتورموری زهرا یوبانما چوخ
حیدر طنابه باغلیدی زهرادی اصل کار
قُنفذّ او دمده آلدی اله تازیانه سین
باغ بهشت لاله سین ایتدی نشان خار
بیر آیری ظلم اولوبدی قلم شَرم ایدور یازا
هوشه دوباره گیتدی او نخل شکسته بار
مولانی چکدی مسجده اوچ یوز نفر دَنی
بوبکره بیعت ایلیه تا میر با وقار
زهرا دوباره هوشه گلوب آچدی گوزلرین
باخدی علینی گورمدی قلبی اولوب فکار
فرمایش ائتدی فیضه عم اوغلوم هایاندادی
ویردی جواب آپاردی اونی فرقه شرار
دوردی او وضع و حالیله یوز قویدی مسجده
تا یتدی مسجد ایچره امامه او غمگسار
سالدی سکوت مُبهمه اهل سقیفه نی !
حیرتدن اِیتدیلر او زمان بیر بیرین نظار
دوتموشدی یوز سمایه او دم دخت مصطفی
گوزیاش توکوردی عارضه چون بارش بهار
سسلوردی ای خدا بو علیدور که ظلمیله
غصب ایلیوله حقینی یاددان مگر چیخار
شمشیریله نه نسبتی وار اهل منطقین
بو غملی منظره آلوری دلدن اختیار
بیعت آلولا جبریله سن شاهد اول ئوزون
بو علته ویرور منه یوز حال ناگوار
یا صبر ویر ئوزون منه بو فعلده و یا
آل جانیمی ئوزون منی بو غصه دن قوتار
قورتارمامیش اورک سوزینی خیره النساء
قَهر بلای حَق نچه یول اولدی آشکار
ناچار اولوب گوتوردی اَلین ظلمدن عدو
بیر عدّه دوشدی وحشته اِیتدی او دم فرار
گورجاخ ععلی او منظره نی دوزمدی اورک
نطقه گلوب بویوردی گل اولما بو غمده زار
قورخوم بودور که اُت دوشه یکسر عوالمه
حقدن بو غمده اِیسته فقط ویرسون اصطبار
افغانه سن گلنده دوشور لرزه عالمه
چکسن اورکدن آه جهان قالماز استوار
نطقه نه گوردی گلدی او دم دخت مصطفی
عرض ایلدی یرینده اورک تاپموری قرار
صبر ایلرم ولیک همین بو مصیبته
هر چند که بو غم سالاجاخ قلبیمه شرار
یاز نوحه آغلا بو غم عظماده ای (عتیق)
سندن قالار بو نوحه لر عالمده یادگار
- یکشنبه
- 3
- مرداد
- 1400
- ساعت
- 15:17
- نوشته شده توسط
- یوسف اکبری
ادامه مطلب
