کمک اولسا گر حیّ داداردن
گهر یاغدیرار طبعیم اشعاردن
او اشعارکی نغمه ی عشقدی
آچار منظره جلوه ی یاردن
قولاق وئرسه هر سالک نیکخو
نتیجه آلار فیض سرشاردن
ایکی عالمون خیرینه مشتری
مسلّم اوزین قورتارار ناردن
گزر اهل معنای اولسون اَنیس
نشان آختارار چهر دلداردن
فنا دهرده دوز تلاش ایلیور
معلّم سُوَر دوزگون اخیاردن
دوز عاشقلرین وصف حالین بیلر
دونر قابل انسانه رفتاردن
دیر استغیثینی ربّی مدام
یوار قلبینی لوث زَنگاردن
اگر اولسا توفیق ربّ جلیل
واریم بیر خبر گنج اخباردن
یازور بیر نفر مرتضایه مرید
ائدور ناله دائم دل زاردن
دیردی سنه من فدا یا علی
نولار کام آلام بخت بیداردن
گورم گُل جمالون اوپم مقدمون
آلام سبقت خدمت ابراردن
خلیفیدی اوندا علی کوفه ده
گلیب کوفیه ذوق دیداردن
مقیم اولدی اول شهرده لاجرم
آلا عطر مولانی ازهاردن
مغازه آلیب اولدی قصّاب شهر
فراغت تاپیب فکری امراردن
گلور گونده دکّانه بو عشقیله
علی یول سالا بلکه بازاردن
گلیب بیر گونی بیر عفیفه کنیز
آلیب اَت گئدیب گلدی تکراردن
دئدی اولمادی باب میل خانم
عوض قیل دوشه روحیم آزاردن
همین فعلی اوچ دفعه تکرار ائدیب
گلیب غیضه قصّاب اصراردن
دئدی آند اولا حیدرون جانینه
اگر بیرده ائتسون بو اظهاردن
عوض ائتمرم آند اولا خالقه
یوخوم واهمه شخص بی عاردن
کنیز سیه بخت آپاردی اَتی
خانم بیرده قیتردی درباردن
گذرگهده ایلشدی اول بینوا
روان قیلدی گوز یاشی ابصاردن
عبور ایلیوردی علی ناگهان
گلور گوردی بیر ناله خونباردن
الهی دیور بس کیمه یالواریم
قوتارسون منی رنج بسیاردن
ائشتدی علی ناله ی عورتی
یولیندان قویوب شدّت غیرتی
علی چاره ی درد بیچارگان
گلوب درده بو ناله دن ناگهان
باخیب گوردی بیر محترم خادمه
عذاره ائدور سیل اشکین روان
قباقه گلیب کان رأفت علی
نیه آغلیورسان دئدی قیل بیان
کنیزه اورک وئردی بو پرس و جو
آچیب شرح آلامه رطب لسان
امام امر ائدیب دور گیدک آغلاما
قوتارّام سنی غصّه دن بی گمان
کنیزیله همراه اولوب ماحصل
ولیّ خدا والی مؤمنان
گلیب مرد قصّابه ایلوب خطاب
هراس ایله سبحاندن ای جوان
اتین بیرده اللّهه خاطر دییش
الوندن دوتار خالق لامکان
ولی حیف قصّاب نا آشنا
خطا ایلدی با یَد و با زبان
دئدی واردی بیر چاره گلسون علی
عوض ائتمرم گلسه هر قهرمان
نه حکمتدی فاش ائتمدی مرتضی
منم سن گزن شهره ی انس و جان
کنیزه دئدی دور گئدک غم یِمه
سنه یاردی همدم بی کسان
رجوع ائتدیلر منزله عاقبت
چخیب صاحب خانه ی نکته دان
نه گوردی کنیزیله شاه ولا
سلام عرض ائدیب حضرته شادمان
علی جان سنه من فدا سویلدی
ائویم اولدی السّاعه رشک جنان
اگیلدی اوپوب مقدم پاکینی
توکوب اشک شادی گوزیندن عیان
بویوردی امام رعیّت نواز
کنیزیله انسان اولار مهربان
مؤثّر اولوب حضرتین صحبتی
دئدی گتسون اوندان گوتوردیم ضمان
خُذیفه مرید صدیق علی
قرین نماز اولدی وقت اذان
گوروب مسجده گلمدی مقتدا
الیندن گئدیب اختیار عنان
گلیب آلدی قصّابدن تئز خبر
گلوردی بورا رهبر شیعیان
چکیب ناله قصّاب قان آغلادی
دئدی وای منه عشقیم اولدی یالان
همای سعادت گلیب قُوموشام
بصیر اولماسا شخصی ایلر زیان
گوتوردی شجاعتله ساطورینی
الین قطع ائدیب عبرت مجرمان
دئدی بیر الیکه ادب بیلمیه
تقاصین گرک پس وئره بی امان
چکیب درب دکّانینی باغلادی
آقا عفو ایله سسلدی آغلادی
یتشدی بو سوز ساقی کوثره
شفیع امم حیدر صفدره
چاغیردی حسن نور عینیم بالا
گوتور بیر عبا گز دولان یکسره
او قصّابی تئز تاپ کسیلمیش الین
عبایه بوک اوغلوم گتیر محضره
حسن امر مولانی اجرا ائدیب
گتیردی اونی ساحت رهبره
علی بیر دعا قیلدی تاپدی شفا
کسیلمیش الی وصل اولوب پیکره
گرک بوردا عبّاسی یاد ایلیک
اجازه وئرک سیل اشک تره
اوز اوغلیدی عبّاس علینون خدا
ایکی قولّارین سالدی دشمن یره
ندن بس علی دادینه گلمدی
یخیلمیشدی عبّاسی قان بستره
یوخیدی الی گوزلریندن سیله
قزل قان آخور گوزلره پیکره
گلن اولمادی دادینه بیر نفر
سالیب دامه عنقانی مین شب پره
بیری داش بیری نیزه بعضی لر اوخ
ویرور کینه دن زاده ی حیدره
کچیب یاره جسمینده اندازه دن
دونوب گُل بدن لاله ی احمره
علمدارین الدن گئدیب طاقتی
دوشوب بیر حالا گلمیور باوره
قالیب فکری مشکینده ایوای دیور
سو اولمادی حمل ایلیم اصغره
نچه باش کسندی آلیب دوره سین
هامی سبقت ایستور آلا بیر بیره
تاپیلمادی بیر منصف انسان دئسون
قویون راحت اوز باشینه جان وئره
ایکی گوزلرین قان دوتوب گورمیور
دونوب کاسه ی سر سینان ساغره
نه اللر قالیب نه ایاقدا توان
دوشوب یرده اوخشار گُل پرپره
فقط دمبدم سولیور جان حسین
تصدّقدی عبّاس او جان پروره
اگر اولسا امکانی آخر نفس
یتیر ال بو السیز دوشن افسره
نولا بیر سیلیدون گوزوم قانینی
باخام بیرده روی مه انوره
صورا باش کسنلر کسه باشیمی
وئرم ذوقیله باش دم خنجره
دگولدوم رضا تک قویام شاهیمی
ندیم اولمادی چاره بو مضطره
بویور قزلارون انتظار اولماسین
سویی بی وفا چیخدی پیغمبره
حسین قویما عبّاسه خاطر "صفا"
الی بوش گله صحنه ی محشره
- دوشنبه
- 4
- مرداد
- 1400
- ساعت
- 11:57
- نوشته شده توسط
- یوسف اکبری
ادامه مطلب
