عم اوغلي عالم وصلت يتور پايانه حيف اولسون
الور زهرا دونور گوگلون بو غمده قانه حيف اولسون
عم اوغلي اي آدي بازار روحيمده اولان عزّت
گَل اگلش باشيمون اوسته ايداخ هجرانيدن صحبت
يتوبدور آيريليق وقتي که بو وصلت بيله ساعت
اله دوشمز بو دوران و بيله بير آنه حيف اولسون
منيم عمروم گونه بنزر گونون دائم باتان وقتي
تاپار رنگي اونون تغيير دوشر دلدن اذان وقتي
يتوب ايمدي اذان وقتي گوزيمون باغلانان وقتي
اذان اولدي داخي وصليم چاتور پايانه حيف اولسون
گونون رنگي سارالدوقجا منيم رنگيم اولور ساري
مرور لحظه لر ايلور دليمدن صلب گفتاري
يوزومي قبليه دوندر يوزوم معبوديمه ساري
ويروم جان آغلا دي بو درد بي درمانه حيف اولسون
رضايم خستيم گوزدن بو دنياني آتام ايمدي
اُلم گون باتماميش گوندن تيز آماله چاتام ايمدي
بهشته ناگرانيمدور مني گوزلر آتام ايمدي
بهشت ايمدي دونوب من سيز اونا زندانه حيف اولسون
ايله حاليم پريشاندور ايله غمدن گلوگيرم
خيال ايلر مني هر کيم گوره بير نقش و تصويرم
رضايم اُلماقا، دنياده قالماقدان داخي سيرم
بو خسته جانيمي گر ويرمه سم جانانه حيف اولسون
سرشک آليوي از صفحه ي سينونده ياز آغلا
نظام صبريوي پوزما بيله آز جانگداز آغلا
يورولموش جانيم اولسون گوزلرون قرباني آز آغلا
آخور اشکون يازور اشکي آخان دامانه حيف اولسون
باشيم اوستونده اي دردي اولان مندن گران اگلش
گوزومي باغلاماقا اي گوزومي باغليان اگلش
باشما مثل پروانه يورولدون آز دولان اگلش
يانور دردونله بي پروا هامي پروانه حيف اولسون
بو ايوده سن منيم چوخ اگلشوبسن باشيمون اوسته
بو ساعت تک سني ايتموب عم اوغلي هيچ بيري خسته
بو ساعت آيري ساعتدور دگل بو عمره وابسته
بو دورانيم گيدور الدن بيله دورانه حيف اولسون
عروج ايستور ايده روحيم قوشي، بال و پريمدن دوت
سراغ وحشت مرگي بو لرزان پيکريمدن دوت
دوتان درماندگانين اللريندن اللريمدن دوت
که دوشدوم دوت اليمدن درد بي درمانه حيف اولسون
منه دست قضا گرچه فراقون رختيني تيکدي
مغيره باعث اولدي محنت و غم قدّيمي بوکدي
بالامون قانيمي ثاني جفائيله يره توکدي
او بي تقصيريدن يرده آخان آلقانه حيف اولسون
ديللر دهريده هيچ بير شيرين مانند جان اولماز
بالا جاندان اولار شيرين او شيرينه چاتان اولماز
منيم تک جان و اطفاليندن عالمده دويان اولماز
بالالاريمدا درديمدن گلوبدور جانه حيف اولسون
من اُلسم غملريم سنلن اولار بو ايوده هم خانه
دل زينب فراقيمدن يقينيمدور دونر قانه
اونا تاپشور ديسون دائم ووراندا زلفينه شانه
آنام هيچ ايتمدي زلفين بو ايوده شانه حيف اولسون
من اُلسم درد هجرانيم سنون دردون گران ايلر
منيده تنگدل سنسيز يقين باغ جنان ايلر
گزر فردوس باغين فاطمه ورد زبان ايلر
گيچن گونلر اولار سنلن سر و سامانه حيف اولسون
فلک هر لقمه ي تلخي سنه ويردي يِدون اوتدون
منه صدمه يتن گون سن لباس صبريوي يتدون
اليمدن اونداکي طوفانه دوشموشدوم منيم دوتدون
من اولدوم غرق، سن دوشدون ولي طوفانه حيف اولسون
بو ايوده درديمي بُلمور منيم سندن صورا بير کس
قولومين سينمين زخمي عميق اولدي ايله از بس
نه زحمتله وضو تجديد ايدوب باشه چکوردوم مس
ويريرديم من نمازي يا نجه پايانه حيف اولسون
حسين نازين حسن چکسون او دل آگاهه تاپشوردوم
بالام کلثومي زينب اول غمي جانکاهه تاپشوردوم
بالالاري سنه بير بير سني اللهه تاپشوردوم
خداحافظ که من سيز قالدي بو کاشانه حيف اولسون
شرار محنتله بو ايوده سنلن يانميشوخ باهم
سنه مندنده چوخ محنت بو ايوده يوز ويروب بُلّم
مني دلدن سالوب ثاني داخي من قالمارام اُلّم
منيم قتليمده کي مطرح اولان فرمانه حيف اولسون
بو ايو مندن صورا بُلّم دونر بير ليله ي تاره
صفاسين تيز ويرر الدن وورار چوخ دللره ياره
چکون سيز بو ايوين اُلسم در و ديوارينه قاره
يازون زهرا اُلوب بو ايو اولوب غم خانه حيف اولسون
يازون پشت دره زهرا بو يرده گُل کيمي سولدي
بو يرده بير گلستانه نچه زاغ و زغن دولدي
يازون من ضعف ايدن يرده بالام محسن شهيد اولدي
بو يرده سو کيمي قاني آخوب هر يانه حيف اولسون
يازون بو ايوده زهرانون توانون محنت آلموشدي
يره دوشموش اياق آتدا قالان گُل تک سارالموشدي
آغارموشدي قرا زلفي جوانليقدا قوجالموشدي
اورک داغي چکوب اود داغلي داغستانه حيف اولسون
يازون بو ايوده هر محنت شکيبي بي شکيب اولدي
حريم امّته اود ووردولار دوشدي لهيب اولدي
باشي اوسته اوتورموشدي طبيبي بي طبيب اولدي
يازون بير دردي سنگين و غمي پنهانه حيف اولسون
منه دوتسان عزا چون يوخ منيم يار و هواداريم
قاپوني باغلا بير ايوده اوزون اول بير بالالاريم
اوزون سن نوحه خوانيم اول قيزيم زينب عزاداريم
ايله ورد زبان گوگلي دونن القانه حيف اولسون
منيم درديمده اي دردي اولان هر يرده باش آغلا
دلون آئينه سين سعي ايله چوخ ايتمه خراش آغلا
اورگون دوزمسه آغلا، بالالاردان يواش آغلا
ياواش دي درد بي درمان اولان انسانه حيف اولسون
جنازم اوستونه بيرده منيم چکسن عبا خوشدور
حسينيم گر گلوب سندن خبر دوتسا دي ناخوشدور
مني يردن گوتورمه تيز، باخوب گورسه يريم بوشدور
اوزوني اُلدورر آغلار گَلر افغانه حيف اولسون
ابلالاريم دوشر ياده دليمده محنتيم آرتار
مواظب اول اولاردان سن، اولاره اول اوزون دلدار
حسينين هر گئجه تاپشور باشي اوسته سو قويسونلار
بالامي تشنه لب اعدا بويالّار قانه حيف اولسون
وصيّت چونکه لازمدي اُلنده هر مسلمانه
وصيّت ايلورم عمروم اودم که يتدي پايانه
مني گيزلينجه دفن ايله فغانه گَل يانا يانه
شبانه دفن اولان، سرّي اولان پنهانه حيف اولسون
حضوروندن سنون بيرده تقاضا ايلورم شاها
قاپودا بير قرا پرچم وورون ممکن اگر اولسا
اوني هر رهگذر گورسه بُلر حتماً اُلوب زهرا
دير ياسه باتوب ايمدي بو اهل خانه حيف اولسون
اوايل که گلشني بير نادر انسان داديوه يتدي
حساب چاپ ديوانون کمکليق ايتدي چاپ ايتدي
او بير انسانيدي تاريخ قرخ بشده گَلوب گيتدي
او دوران و او کس گيتدي، ايله دورانه حيف اولسون
- شنبه
- 23
- اسفند
- 1399
- ساعت
- 16:52
- نوشته شده توسط
- یوسف اکبری
ادامه مطلب
