دوشموشم هجرونده چوخ تاب و تبه یا فاطمه
آغلورام باخدیقجا حال زینبه یا فاطمه
آغلیور از بس قیزون زینب فراقونده دونوب
بدر سیماسی هلال یک شبه یا فاطمه
ارتحال زود هنگامون آلیب مندن توان
غصّه ی هجرانی آیا من نئجه ایلوم بیان
من سنه همرازیدیم سنده منه روح روان
ای منیم شمع شب افروزیم وفالی همسریم
دامن وصلوندن آخر تئز اوزولدی اللریم
رسمدور ائوده چکر نازین اوشاقلارین آنا
محرم اسرار اولانماز قیز اوشاقینه آتا
زینبیم گیزلین سؤزین آیا کیمه سویلر خدا
قیز یتیم اولسا سوزین بیلدیرمز هئچ بیگانیه
یاره لی قوش تک دوشر افسرده کنج خانیه
وحی ائوینده دوقّوز ایل باتدون غبار محنته
بخت ائوینده حسرت اولدون خوش گونه خوش ساعته
قبر ائوینده چاتدون آخر نعمت امنیّته
باغلاموشدی حیف اولا مشی قضا قولّاریمی
یوخسا کیمده واریدی جرأت ویرا دلداریمی
مصطفانون امرینه من اختیار ائتدیم سکوت
فوق ایدیهیم منیم شأنیمده حیّ لایموت
سویلیوب غزوات بدر و خیبریم ایلر ثبوت
لفظ تسلیماً لامرکدور منی خاموش ائدیب
بو سببدن محسنیم جام شهادت نوش ائدیب
اولمادی افسوس اجازم تا چکم شمشیریمی
چکمدیم آللّهه خاطر قهرلن تکبیریمی
بوردا سن معذور دوت یا فاطمه تقصیریمی
عَمر و مرحبده اگر اولسیدی هر اوچ یوز نفر
گوز ویریم آندا ائدردیم طعمۀ نار سقر
ویردیلار اوز آستانونده بویاندون قانوه
محسنون قانی یاخیلدی محترم دامانوه
قبر قازدیم گوز یاشیلا اوّلین قربانوه
سن منه خاطر یخیلدون دادوه من گلمدیم
چوخ عجبدور بو سن ئولدون غصّه دن من ئولمدیم
قدروی خلق زمانه بیلمدی افسوس اولا
غاصبان حق شفاعتدن گرک مأیوس اولا
عالم برزخده دائم حشره جن محبوس اولا
چون اراده ایلدی آللّه قیامت باشلانا
ثانی جانی بیلر کیمدور بتول مصطفا
فاطمه بیر نوریدی آللّه یاراتمیش نوردن
خُلقاً و خَلقاً ئوزی افضلدی جمله حوردن
عصمتین گوزلردی بو دنیاده مرد کوردن
ای خانم عورت کی زهرادن وارون چشم امید
درسوی زهرادن اورگنسون اولارسان رو سفید
اعتقادون وار اگر روز معاده جنّته
سعی ائله اوخشاتما ای بانو اوزون بی عصمته
هاردا چون بی عصمت اولسا شامل اولماز رحمته
بهترین زینت بویورموش دختر ختمی مآب
عورته آللّه معیّن ایلیوب حفظ حجاب
جود و احسانینده میندن بیر سؤزی دوشموش دیله
آج قالیب چوخ گون طعامین بذل ائدردی سائله
طوی گونی وئردی عروسی جامه سین زهرا صله
خیرةالنسوان ئوزی اُنسیّۀ حورائیدی
یرده زهرا فاطمه گوگلرده منصورائیدی
ای علی المرتضانون دوقوز ایل همسنگری
صر صر ظلمین جفاسیندن سینان بال و پری
ئوز الیملن قبره قویدوم یاره لی گل پیکری
غسل ائدن وقته یارالی جسموه دیل داغلادیم
نعشوه باخدیقجا زینب آغلادی من آغلادیم
جان دئدی بیردن قزون زینب ال آتدی باشینه
آغلادوخ قاتدوخ جگر قانین هامی گوز یاشینه
اشکلیه یارون یودوخ دوقّوز ایلون پاداشینه
وای دئدی دنیاده خوش گون گورمین یالقوز ننم
عُمری آز باشی بلالی ئولدی قارداشسیز ننم
یاندیرار بو محنتون ای بانوی عظمی منی
کوچه ده ویرمیشدی من بیلمدیم هئچ ثانی سنی
کاش ئولیدی جسموی گورمِیدی حیدر سوسنی
محرمیندن گیزلدن سرّین حیالی فاطمه
شوهره بیلدیرمین دردین وفالی فاطمه
ای پیمبردن نشانه عصمت پروردگار
گئتدون آخر سن گلیلی منده سندن شرمسار
قبره تاپشوردیم سنی سینه یارا نیلی عذار
گورسم هاردا بیر گورمیش برگ ریحان آغلارام
وای دیوب زهرا توکوب من اشک سوزان آغلارام
گورمین بهره جوان عمریندن ای زیبا گولوم
دویمیان دورد گل بالاسیندان یارالی سوگولوم
ائوده گیزلین آغلیان چوللرده شیدا بلبلوم
بش یاشیندان بو فنا دنیاده اولدون خونجگر
اولمادی آرامشون بو ائوده نه شام و سحر
غم یمه اولّام سنه دائم نوا خوان آغلارام
نصف شب گلّم مزارون اوسته پنهان آغلارام
زینبی کلثومی گورسم مو پریشان آغلارام
قویمارام قونسون غبار غم حسینون باشینه
دؤزمرم منده سنون تک آغلاسا گوز یاشینه
دورد بالوندان ناگران اولما گوزومدن آتمارام
گئتمینجه خواب شیرینه حسینون یاتمارام
عیش دنیایه من عقبا اجر و مزدین ساتمارام
هر وصیّت ایلیوبسن عامل اولّام تک به تک
غمگسار اولّام حسینه زینبه قیلّام کمک
ای جلال و شأنوه مبهوت عرش ذوالجلال
خلق ائدیب دنیانی سندن اوتری حیّ لایزال
بس بو نه حکمتدی عمرون آز اودا درد و ملال
ایندیده چوخ سؤزلری واجبدی پنهان ایلیک
قاتلون کیمدی خانم قویمازلا اعلان ایلیک
غم یمه قالماز «صفا» دائم بولوط آلتیندا آی
دوستلارا دشمندن اولماز بو مسلّمدور هارای
صبر ائله اولسون مساعد وقت یاتسون چولده های
گور نئجه آللوخ بیز اوندا انتقام اغیاردن
اوّل و ثانی و ثالث آیریلار اخیاردن
اقتضا ایلور دیک لفّافه ده چوخ سؤزلری
دوز ولایت اهلینون واردی بصیرت گوزلری
هر ایشه ناظردی ای شیعه ائمّه ئوزلری
انتقام فاطمه تفویض اولوب اوز اوغلونا
منتظردی شیعه لر مهدی گلیب قانین آلا
- سه شنبه
- 5
- مرداد
- 1400
- ساعت
- 11:40
- نوشته شده توسط
- یوسف اکبری
ادامه مطلب
