بیر سرّ اولی دلداده و دلدار آراسندا
سویمز گوره بلبل گُلنی خار آراسندا
قویماز قالا حق، یارینی اغیار آراسندا
خلوتگه وصل ایچره ایدر یارینی دعوت
بو امره اولار پیک اجل پیک محبت
معشوق گوروب یارینی اغیار ایدور آزار
دنیادن ایدوب جور و جفا جاننی بیزار
تأخیر ایلموب فوراً ایدوب یارینی احضار
مأمور ایلیوب پیک اجل یاری گتورسون
خلوتگهینه محرم دلداری گتورسین
مرضیّه گوروب تا که گلوب پیک محبّت
آماده اولوب ایلیه تا جنّته رحلت
ایلوب او زمان یارینه بیر نچّه وصیت
بو نچّه وصیت دل دنیانی یاخوبدی
بو سوزلریله گوز یاشی مولانون آخوبدی
عرض ایتدی عم اوغلی یتشوب موسم هجران
گل لحن حجازیله بو ساعت اوخی قرآن
قرآن اوخین لبلریوه فاطمه قربان
قرآن اوخی ویر روحیمه بیر ذوق و صفا سن
صوتونله اولوم بدرقهء بزم لقا من
آخر نفسیمده ایلمه اشکوی جاری
باخ گوزلریمه صورتون ایله منه ساری
بیر گوز دولوسی فاطمه باخسین سنه باری
زهرا سنه باخدوقجا خدانی گورر آغلار
گوز یاشنی گل عارضه تزتز دوزر آغلار
من که گیدورم جسمیمی دفن ایله نهانی
پنهان اولا تا حشره قدر فاطمه جانی
جانیم سنه قربان اولا ای عاطفه کانی
بیر جان نه که مین جان سنه قربان اولا ایکاش
مین فاطمه جانی اولا بیر مویوه شاباش
حسرتله قالور گوزلریمون نوری حسینیم
آغلار بو غمه حشره کیمی اوز حسنینیم
کلثومله زینب او ایکی نور دوعینیم
گل سالما گوزوندن آناسیزلاری علی جان
آسوده ایدیم ترک جهانی سنه قربان
وصل رخوی جنته ویرمم بولوسن سن
راضی دگیدون سنده جوانلقدا اُلم من
اما بیله تقدیر ایلیوب حضرت ذوالمن
زهرا گیده یالقیز قالالار عترت یاسین
گیزلنجه دوتا شیر خدا فاطمه یاسین
تابوتیمی بیر نوعی ایله ای شه غیرت
مستور اولا زهرا بدنی گورمیه امت
ویرمز بو ایشه فاطمه نین غیرتی رخصت
واضح اولا زهرا بدنی بیر گوزه حتی
تشییع اولوناندا بدنیم ای شه والا
گُل شبنمی که عارض گلفامه دوزولدی
مینحسرتیله دیدهء شهلاسی سوزولدی
تا دست علی دامن زهرادن اوزولدی
گُل وقتی سولوب بلبلی غرق محن ایتدی
یعنی علیه یثربی بیت الحزن ایتدی
سو حاضر ایدوب گتدیله اصحاب وفادار
آغاز ایلیوب غسلنی ویرسین شه ابرار
بلممکه نلر گوردی او دم حیدر کرّار
غسلوندانالین چکدی یانوب عالمی یاخدی
دیواره قویوب یوز، یوزه گوز چشمه سی آخدی
دشمن لرین اول مرد که امّیدینی کسدی
تغسیل ایلینده خانما اللری اَسدی
گوزیاشی آخوب بیر دیمدی دور داخی بسدی
گویا بیله تقدیره یازوب حضرت باری
ئوز یارینه غسل ایلیه تا غصّه لی یاری
بیر شدّتیله آغلادی اول کان شجاعت
آغلاشدی اونون حالینه اصحاب ولایت
سرّین خبر آلدی او زمان راوی محنت
یعنی ندور علّت بیله سن آغلوسان ای شیر
گوزیاشینه غرق اولموسان ای شاه فلک گیر
فرمایش ایدوب حیدره بو غم چتین اولدی
علّت بودی که گوزلریم ایمدی بیله دولدی
خارین اثری ویرموب امان گل کیمی سولدی
واردور یری خون دله گوزیاشی قاتام من
لمس ایلمیشم یاره لرین کوینگین اوستن
بیر سینه که بوسه گه اولا یار خدایه
بیر سینه که محرم اولا اسرار خدایه
بیر سینه که مطلع اولا انوار خدایه
آیا نه روا یاره لییدی اونی مسمار
گل سینه سینی مسکن ایدیدی ایله بیر خار
ناتوری یقین آغلادی آفات خزانی
گر گُل لرینی گورسه سولوب غنچه زمانی
واردور یری گر آغلادا بو غصّه جهانی
آثار ستم حسّ ایلدیم گل بدنینده
گیزلتمیشیدی یاره لرین پیرهنینده
ایکاش اُلوب گورمزیدیم بیر بیله ساعت
تا گوردی گوزوم گوشهء چشمنده علامت
ایوای دیدیم کوچه ده دگمیش بونا ضربت
بو لکّه نی مه چهروه مضموم ایلیوبلر
عالم بوله جاق حیدری مظلوم ایلیوبلر
زهرایه خدا بُلدی نلر ایلدی ثانی
اول کوچه ده ظلمیله خطر ایلدی ثانی
آئینهء خلّاقی کدر ایلدی ثانی
بیر ظلم ایلدی عالمی تار ایتدی گوزونده
صول ال که گویه قاخدی اثر قویدی یوزونده
بیر سیلی وروب آلدی اونون تاب و توانین
جبریله سریب توپراقا بو یاره لی جانین
یاد ایلییَرم فاطمه نین من او زمانین
بو ظلمه نجه صبر ایلسین حیدر کرّار
عمروم نقدر واردی گوزوم بو غمه آغلار
ثانی ایلین ظلم کیمین ظلم علن اولماز
چوخ ظلم اولونار لیک بو ظلمی گورن اولماز
چوخلار یاناجاق بو غمه اما حسن اولماز
اوغلوم حسنی کوچه ده کی غصّه قوجالدار
وای ناله سینی حشره کیمی عرشه اوجالدار
باجائیدی زهرایه خطاب ایلیه مولا
سالدون منی عمرومجه غم و محنته زهرا
واردور نه سوزوم گر سوروشا حضرت طاها
زهرانی بو اُمّت نیه بو حاله سالوبدور
گل تک بدنی بس نیه بو حاله قالوبدور
رخساریوی گر گورسه پیمبر نه دیوم من؟
بو صورته گر باخسا او سرور نه دیوم من؟
گر آلسا خبر بو ندی حیدر؟ نه دیوم من؟
یوخ بیر سوزوم الّا که دییَم شاه حزینه
عمروم گونینی تیره ایدوب ماه مدینه
زهرایه غرض غسل ویروب حیدر کرّار
تکفینینه اقدام ایلیوب شاه دل افکار
تکفینی آچوب حیدره بیر غصّه لی طومار
گویا نچه دفعه او کفن قانه بویاندی
تکفینی بتولین اودور علّت که یوباندی
تودیعه گلوبدور بالالار کام آلا اول دم
گوز چشمه لرین هر بیریسی ایلدی بیر یم
واردور یری گر یاندیرا دنیانی بو بیر غم
گویا که خانم لاله دی، گل مثلی اوشاقلار
کام آلدی آنادان او زمان غنچه دوداقلار
سسلردی حسن بیزلری آیا نجه قویدون
زینب ده دیردی آنا مندن نجه دویدون
کلثوم دیردی آناجان قلبیمی اویدون
آهیله شراره بالالار عرشه سالوبلار
هر بیر گورنی حشره کیمی درده سالوبلار
تا گلدی حسین نالیه دنیانی یاخوبدی
چوخ حسرتیله حضرت زهرایه باخوبدی
گورجاق کفن ایچره آنانی اشگی آخوبدی
سویلوب آنا گَل آل منی آغوشیوه، یوخسا
باشیم آچارام درده گلر عالم بالا
ئوز آهیمی افلاکیله عرشه ساچارام من
دیوانه اولوب چوللره ایندی قاچارام من
آغوشیوه گر آلمیاسان باش آچارام من
آل بیر منی آغوشه آنا باغریوا چک سن
بیر لحظه ده باری گینه سیننده یاتوم من
راوی بو مطلب اوزیدور سرور ابرار
بو سوزلری تا سویلدی اول طفل دل افکار
گوردوم که بتول ئوز کفنی ایچره سیزیلدار
یاندیردی بو سوز تا که کفن ایچره آنانی
آچدی قولونی سینه سینه چکدی بالانی
بو یرده دوشور یادیمه بیر بزم غم افزا
اول بزم غم افزا که تنور اولدی مُسمّا
بولموشدی سُوَر سینه سینی حضرت زهرا
ئوز سینه گُلین گوتدی تنورین بوجاقندان
باسدی سینه سی اوسته اُپوب گُل دوداقندان
سوز دلینه یاندی سماوات و حجابات
آغلاردی اوغول حالینه اول منشاء خیرات
سسلردی آنان باشوه قربان اولا کرّات
بو زخم مکرّر که دگوب باشوون اوسته
باشوندان آخوردیب قانوی قاشوون اوسته
آغلاتدی غرض سبط علی ارض و سمانی
اول بیت امامتده اولان اهل بلانی
هم اهل بلا هم او زمان شاه ولانی
سس گلدی علی آغلوری بو حاله ملک لر
محشر قوپادوب عالم بالاده بو منظر
قویما بالالار ضجّه وورا سینه سی اوسته
آغلار قالالار محنت دیرینه سی اوسته
چک دُرّلری قالمیا گنجینه سی اوسته
اقدام ایله تدفینه، پیمبر گوزی یولدا
هر چند که محنت گورونر سینه ده قولدا
آیروبدی علی گُل بالالار آغلادی بیرده
بو محنتیله قلبلرین داغلادی بیرده
گوز چشمه لرین یوزلرینه باغلادی بیرده
شام اولدی یتوب موقع تدفینی بتولین
تا ردّ اولونا لالهء نعمانی رسولین
ختم ایله (نگین) دفن سوزون یازما دایان، دور
بو توسن طبعون داخی بو یرده دایاندور
تدفین سوزینی یازما که غم بحریدی، یان دور
هرچند که بیر وصلهء ناجوریدی شعرون
غم ایتمه عنایت اولی مأجوریدی شعرون
- چهارشنبه
- 12
- خرداد
- 1400
- ساعت
- 17:40
- نوشته شده توسط
- یوسف اکبری
ادامه مطلب
