خراب اولیدی گوروم سر به سر بو دنیانی
دونیدی گردش چرخ سپهر مینانی
اویاندا ظالمه میدان آچور ویره جولان
بو یاندا تنگه سالور دایم اهل تقوانی
نه خاطره بولَنه بولمییَن اولور غالب
بولور بو سرّی جهانداخدایِ رحمانی
یاتور خرابه ده مظلوم ،کاخیده ظالم
خیالِ خامیله ایلور هوای سلطانی
خرابه منزل اِیدوب مرغ روحیمه رخنه
باشیمدا واردور هوا سیر اِیده او ماوانی
گوره نه خاطره آیا او اوچ یاشیندا قیزون
خرابه یرده چیخوبدور نواییله جانی
دیردی جانیمی جانانه ویرمرم عمه
زیارت ایلممیش من ولیِ سبحانی
آپارمارام اورگیم آرزوسینی قبره
گرگدی درک اِیدم آرام جان جانانی
وصال یاره نَدن من گرگ چَکم حسرت
اوزون خرابه ده حلّ اِیله بو معمانی
ساچوی آل الیوه بیر منی دعا ایله
حزین سسیله چاغیر بیرده حی منّانی
دِنن خدا بو قیزا بیرده بیر عنایت ایله
قبول قیل من دلخسته دن تمنانی
یتور بو بلبل مهجوری گلستاندا گوله
وصاله ایله مبدل بو شام هجرانی
خلاصه دلدن ایله نی کیمی سیزلداردی
یتردی عرش معلّایه آه و افغانی
ویرردی سس سسینه یکسره بنات رسول
توکردی عارضه یوزدن سرشک غلطانی
غرض نوای حرم شامه ولوله سالدی
گتیردی تنگه او سس اهل شام ویرانی
علاوه اولدی هراسان شهرین اهلی تمام
هراسه سالدی او ناله یزید نادانی
دیدی نه سَسدی بو سس اولمیا قیامتدی
جواب ویردی اونا لاجرم نگهبانی
که ای امیر دیوللر خرابه ده بیر قیز
توکوری عارضینه غصّه دن جگر قانی
دیور ای عمه بابام گوگلومه دوشوب بو گیجه
انیسی گوز یاشیدی آز قالور چیخا جانی
دیدی خرابیه گوندر بو باشی اول جانی
که بلکه خاتمه تاپسون همین قضایانی
یارالی باشی نگهبان قویوب طبق اوسته
خرابه سمتینه گوندردی شاهِ بطحانی
چکوبله اوستونه دسمال استتار اولسون
گوروشمسین دل شبده او راس نورانی
خرابه سمتینه آهسته اولدولار راهی
مباد فاش اولا رمز و رموز پنهانی
نه گوردی اهل حرم بیر باشی طبق اوسته
گلور خرابه مکانه او لیل ظلمانی
ملائک متقرب گلور زیارت ایدور
تمام عالم و آدم اولوبدی حیرانی
رواندی باطن ظاهرده طمطراقیله
ولیک صورت ظاهرده وار پریشانی
یتنده منزل ویرانیه امام زمن
بنات یکسره پیشواز ایدوب او مهمانی
رقیه نین ایاقی گلمدی اِیده پیشواز
تاپوبدی سینه پر دردی حال ویرانی
دیدی یارالی باشی ویر قوجاقیمه عمه
دیوم او باشه باشیمدا اولان بلایانی
یارالی باشی گوتوردی علی قیزی زینب
گلوب تکلمه عرض ایتدی ای سخا کانی
یامان گونومده منیم یاخشی دادیمه یتدون
غریبه وقتیده ایتدون بو لطف و احسانی
گلوبسن ایندی که آل بو امانتی مندن
بالان آتوبدی باشیندان بو دار دنیانی
تاپوپ زبس که بلالی باشی بو یرده بلا
معاینه گورونور دلده نار سوزانی
غرض ویروب گولی گلشنده بلبل زاره
اگر چه دویمادی گولدن شهیده ثانی
رقیه جان کیمی بیر باسدی باغرینا گولونی
دیدی که سندن اوتور گزمیشم من هریانی
خدا بولور که نه چکدیم غم فراقیندان
نه ابتداسی عیاندور نه حد پایانی
غریبه عالمیمش نصف شب او ماواده
او ظلمه قویدولا شام اهلی هانسی عنوانی
دیردی قانلی باشا جانیمی اولا قربان
عجب کسوفه دوشوب آفتاب رخشانی
یتیشمَمیشدی هلّه باشه درد دل، ناگه
نه گوردیلر که یوموبدی دو چشم گریانی
گوتوردی باغرینا باسدی رقیه نی زینب
مخاطب ایتدی او دمده رباب نالانی
دیدی کی مشتریم اوخشاما دِیسن ایندی
بالا غمینده نه چون چوخ یانار آنا جانی
رباب نوحه ایدوب آغلادی حرم اهلی
دوباره یاندی او ماتمده قلب بریانی
قویاندا قبره دیدی زینبا الون ساخلا
بالام گوزوندن آتوب ایندی که بو دنیانی
اجازه ویرسن اگر بیر سفارشیم واردور
دیوم بهشتیده گورسه او طفل عطشانی
دیسین غریب آناوی یاخشی در به در ایتدون
اورکده غملرینون یوخدی حد و میزانی
دئسین ربابه خدادن اوغول ئولوم ایسته
اگر چه عمرومی ایلوبدی محنتی فانی
علاجیم اولمادی سو اوسته باغلادیم اَلینی
بو فعلیمون واریدی بیر دلیل وبرهانی
نه تک بوسینه ی سوزانیمی خراش ایلدی
نواسی تنگه گتیردی بنات طاهانی
سوسوزلیقندان ایله یوز گوزون خراش ایلدی
خجالتیندن ئولوردی او چولده سقانی
(عتیق) نوحه یاز آغلا نه قدری عمرون وار
شفیع اولا سنه تا خسرو شهیدانی
- یکشنبه
- 3
- مرداد
- 1400
- ساعت
- 15:48
- نوشته شده توسط
- یوسف اکبری
ادامه مطلب
