دوشوب باشون آردیجا حسین باش آچوخ گِیدوب شامه گَلمیشم
بوگون سنه دوتماقا عَزا من گِیوب قَرا جامه گَلمیشم
حسین دِیوب چوخ دوُلانمشام
حسین فراقوندا یانمشام
زینبون گلدی
زینبون گلدی
اگر چه هر ماجرا سنه بیر به بیر عَیان دور دَگُل نَهان
ولیک بو رَسمدی اِیدر هر مسافر اوُز حالینی بیان
گوزوم یاشی روی زَردیمه سرگُذشتیمی ثَبت اِیدوب عَیان
صَحیفهء غم تک اَلده وار حالی نه بَیان نامه گلمیشم
باجون فَدا نُور پاکُوّه کربلا چولین روشن اِیتمی سن
بو موسی عشقه پُر خَطر دَشتی وادیّ ایمن اِیتمی سن
دِیمم اوزون وِیر منه نشان چون ازَل جوابِ لَن اِیتمی سن
بو قَبره گوز یاشلو یوز قویوب نایل اوُلماقا کامه گلمیشم
بو شُوقیله اَربعینوه گلمیشم بو گون قَبرون اوُسته من
شَمیمِ جان پَرورین آلّام تا بو تَربتِ مُشک خیزدن
دور اِی منِ بَخت قَاره نی دردِ فرقتی مو سفید اِیدن
دیوم نجه دوندروب غمون روزگاریمی شامه گلمشیم
بو گون که من دام ظلمدّن فارغ اوُلماقین شُکرین اِیلرم
نه ظلم لر یوز وِیروب منه بیر به بیر سنه ذِکرین اِیلرم
بو روضهء پاکدن ولی آیری دوشماقین فکرین اِیلرم
سنیله هَمدَفن اوُلماقا کاش اَجل سالا دامه گلمیشم
گیدنده من شامه نَعشوی فرصت اوُلمادی دَفن اِیدوب گِیدم
قصُوریمون اِعتذاری نه قَبریوه گرک جان فدا اِیدم
نولور یِتم بو سَعادته روحیم آیریلا جان وِیرم بو دَم
تأسفیم وار که عمر و گون یِتمیوب سر اَنجامه گلمشیم
وِیرنده جان سن که ممّکنیم اوُلمیوبدی بیر جُرعه سو وِیرم
ولی اِیدم قَبر پاکیوه اِیمدی مُختصر خدمت اِیسترم
سَپم سو مُژگانی له سیلم قَبریون توزون اِی شَه حَرم
اودور جگر قانینی سُوتک دوُلدروب اِیکی جامه گلمیشم
(شهاب) شه بیتی اِیتدی بیر اِیله وقتده مَطلَعِ کَلام
مُصمّم شهر طُوسیدی فرصت اوُلمادی اِیتسون اِختتام
رَجا اولوب (ذهنی) اِیلدی اوز دِلین جه بو نوحه نی تمام
مَعاینه نوحه ده دییَر من او دِلده الَساعه گلمیشم
- یکشنبه
- 28
- شهریور
- 1400
- ساعت
- 16:13
- نوشته شده توسط
- یوسف اکبری
