اى دل هشيار اول حقيقت اهل ايمان آختارور
پارسا و عابد و پاكيزه دامان آختارور
عارف اول عاقل دولان اويما هواى نفسوه
مكتب قرآن هميشه اهل قرآن آختارور
كيم على خطّينده مايلدور ايده سير سلوك
بو سعادت شاهراهين اهل رضوان آختارور
اهل هيئتسن اگر بيل هيئتون آدابينى
رسمدن چيخماز اولاركى فيض شايان آختارور
يول تاپانماز بو الهى مكتبه هر ناخلف
بو عزا بزمين هميشه لايق انسان آختارور
هر كيمون لحم و عظامى رشد ايديب دوز لقمه دن
لاجرم وقت فراغت كوى جانان آختارور
هفته ده بير گون هامى تعطيل ايدر رسماً ايشين
چوخلارى آسايشه صحن گلستان آختارور
بير بيزه منّت قويوب آللّٰه ايديب توفيق عطا
جمعه لر دائم بو جمعى لطف يزدان آختارور
دم غنيمتدور اولوم گلسه خبردار ايلمز
نه جوانه رحم ايدور نى پير دوران آختارور
فرصتون وار گل قرانلوق قبروه بير فكر ايله
اورداكى هر گوز آچيلدى مهر جانان آختارور
اى حسينچى فخر ايله بو عشق و بو اقبالوه
كيمياى معرفتدور اهل عرفان آختارور
كاش بير لحظه كنار اولسون گوزوندن پرده لر
كيم گليب گور روضه شاه شهيدان آختارور
مشكلون وار قورخما ديلدن سسله يا صاحب زمان
ايلشوب بو خانه ى احساندا مهمان آختارور
پيشواز ايلور سنى جنًت سرا حوريّه لر
فاطمه بير شيشه الده چشم گريان آختارور
غبطه ايلور عرشيان بو حالوزه اى شيعه لر
همنشين اولسون سيزه بو بزمى خوبان آختارور
بوذر و مقدادنده گر سئوال اولسا دير
جنّت الاعلاده بو امكانى سلمان آختارور
چون بو فانى دهرى ترك ايتسون گرك هر ذيحشم
بو سببدن اهل معنى سود غفران آختارور
قبرده حسن عمل مطلوبدور هر شيعه دن
چون جوار حق مسلّم دوز مسلمان آختارور
اعتقادون وار اگر روز معاده بيل يقين
شافع محشرده سندن نور ايمان آختارور
زاد راه آخرتدور بيزلره گوز ياشلارى
بير بله امكانى چوخ شايسته سلطان آختارور
آغليوب هر گوز حسينه آغلاماز محشر گونى
بير حسين كى بزم ياسين فخر نسوان آختارور
سينه مالامال غمدور اود دوتوب يانسون اوره ك
آه سوزانه سبب بير شرح هجران آختارور
هفت شهر عشقى گزدى مرغ طبعيم كو به كو
قوى گوروم هاردان گريزه غملى عنوان آختارور
طاير طبعيم بلاد شامه اولدى مشترى
گوشه ى ويرانه دن لعل بدخشان آختارور
اوردا بير آهو باخيش زهرايه بنذر قيز ياتيب
مدفن دارالشفاسين چوخ پريشان آختارور
نذر ايله چنگ توسّل وير كچيك دامانينه
دردوون درمانى دور اولسون قسم اوز جانينه
حالينه بو غمكش ايّامون اغيار آغلادى
گُل سولوب بلبلّره تأثير ايديب خار آغلادى
اولدى چون ويرانسراى شامده عزلت نشين
گل يوزين قويدى هميشه پاى ديوار آغلادى
ياتدى اولدوزلار ولى نازلو رقيّه ياتمادى
گتدّى تحليله وجودى قالدى بيدار آغلادى
گاه گوزدن یاش توکوب لای لای دیوردی اصغره
گه غم اکبردن اولدی دیده خونبار آغلادی
گوز گوتورمزدی او شیرین دل در ویرانه دن
سسلدی قارداش آدون قربانی تکرار آغلادی
قیز اوشاقینه آتا قارداش فراقی تلخدی
شرح بو هجرانه هر دیل یاندی دلدار آغلادی
آلدی آغوشینه زینب غم یمه جانیم دیدی
ئولمیوب عمّون سنه اولّام پرستار آغلادی
آغلیوب آغلاتما غربتّده ربابی زینبی
چاره یوخدی دوز بالامسان یالواریب یار آغلادی
زلفینه ال چکدی اوپدی لبلرین ناز ایلدی
دوردی باشینه دولاندی مثل پرگار آغلادی
آغلاما قارداشلاروندان گر دوشوبسن سن اوزاق
منده اوز قارداشیما اولدیم عزادار آغلادی
چوخ دیله دوتّدی بوین اوخشادی سیلدی گوزلرین
جان دیدی قارداشیمه ارزنده آثار آغلادی
گل دیدی آجسان نچه مدّتدی میل ایله غذا
یوخ دیدی دای ایتمرم من عمّه افطار آغلادی
قول ویرمیشدی بابام گلسین منیم دیداریمه
گلمدی بلمم ندن اول ماه رخسار آغلادی
قان اولوب قلبیم شماتتدن سینوب بال و پریم
طعنه لی سوزلر منه اولدی شرر بار آغلادی
اولماسیدی عمّم ایندی چوخدان اولموشدیم هلاک
قبریم اولموشدی آنام زهرایه اوخشار آغلادی
بیر زمان گلدی منی خار مغیلاندان تاپوب
زجره گوردی اولموشام عمّم گرفتار آغلادی
حقّی وار بوینومدا اولسمده فراموش ایتمرم
جان و دیلدن اولدی طفلانه هوادار آغلادی
کربلادن شامه جن چکدی منی آغوشینه
اوپدی دیندیردی منی اول نیک رفتار آغلادی
عمه جان دیدیم قوجاقونده منی پنهان ایله
قورخورام زجری گورنده اول وفادار آغلادی
بیله فکر ایتمه دیدی عبّاس اولوب بیز یالقوزوک
زنده دی عباس و فضل و جمله یاران آغلادی
باخما بیز بو قوم ظلّامه اسیروک ظاهراً
چوخ بیزه غمخوار اولوب گزلنجه احرار آغلادی
بو جماعت کی تماشایه گلوبلر اکثراً
چون یزیدون فعلینه اولدی خبردار آغلادی
گورمدون من کوفه بازارینده بیر نطق ایلدیم
بیلدیلر من زینبم تا اهل بازار آغلادی
بسکی قلبینده ارادت وار "صفانون" روحوه
شاهدیدون سن نجه یازدیقجا اشعار آغلادی
- دوشنبه
- 4
- مرداد
- 1400
- ساعت
- 21:24
- نوشته شده توسط
- یوسف اکبری
